Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  August 2013

Wò ‘Dzi Meganyra Ðe Yehowa Ŋu’ Gbeɖe O

Wò ‘Dzi Meganyra Ðe Yehowa Ŋu’ Gbeɖe O

“Amegbetɔ ƒe bometsitsie nana eƒe mɔ glɔ̃na; ke eƒe dzi nyrana ɖe Yehowa ŋu.”LOD. 19:3.

1, 2. Nu ka tae mele be míabu fɔ Yehowa ɖe kuxi siwo me tom amegbetɔƒomea le la ta o? Gblɔ eƒe kpɔɖeŋu.

TSƆE be ènye srɔ̃ŋutsu si le dzidzɔ kpɔm le srɔ̃ɖeɖe me ƒe geɖee nye esia. Gake gbe ɖeka esi nègbɔ va aƒe me la, èkpɔe be nu sia nu trɔ ta tu le aƒea me. Xɔmenuwo kaka, agbawo kple kpluwo katã gbã gudugudu, anyigbakuntru si le xɔa me la dome gblẽ keŋkeŋ. Wò aƒe si gbɔ mèlɔ̃a nu le o la va le abe afi si dzɔdzɔmefɔku aɖe dzɔ le ene. Ðe nàdo ɣli kple dziku be, “Nu ka tae srɔ̃nye wɔ nu sia?” Alo ɖe nàgblɔ boŋ be “Ame kae wɔ nu sia?” Ðikeke mele eme o be nyabiase eveliae ava wò susu me enumake. Nu ka tae? Elabena ènyae be srɔ̃wò lɔlɔ̃a maɖoe koŋ agblẽ nuwo dome susumanɔmetɔe alea o.

2 Egbea, míekpɔe be ɖiƒoƒo, ŋutasẽnuwɔwɔ kple agbe gbegblẽ nɔnɔ gblẽ amegbetɔƒomea ƒe aƒe si nye anyigba la. Mí ame siwo srɔ̃ Biblia míenyae be kuxi siawo mate ŋu atso Yehowa gbɔ gbeɖe o. Ðe wòwɔ míaƒe anyigba sia be wòanye paradiso dodzidzɔname aɖe. (1 Mose 2:8, 15) Lɔlɔ̃ Mawue Yehowa nye. (1 Yoh. 4:8) Ŋɔŋlɔawo sɔsrɔ̃ kpe ɖe mía ŋu míeva kpɔ ame si tututu gbɔ xexea me kuxi geɖewo tso. Menye ame bubu aɖeke wu Satana Abosam, si nye “xexea dzi ɖula” la o.Yoh. 14:30; 2 Kor. 4:4.

3. Mɔ ka nue wòate ŋu adzɔ le be míaflu mía ɖokui?

3 Ke hã, míate ŋu ada míaƒe kuxiwo katã ƒe agba ɖe Satana dzi o. Nu ka tae? Elabena míaƒe kuxiwo dometɔ aɖewo nyea míaƒe vodadawo me tsonuwo. (Mixlẽ 5 Mose 32:4-6.) Togbɔ be míanya lɔ̃ ɖe nyateƒenya ma dzi hã la, míaƒe ŋutilã madebliboa ate ŋu aflu mí ahana míaɖe afɔ si ava kplɔ mí ade afɔku me mlɔeba. (Lod. 14:12) Le mɔ ka nu? Le esi míabu fɔ mía ɖokui alo Satana ɖe míaƒe kuxiwo ta teƒe la, míava nɔ fɔ bum Yehowa boŋ. Ate ŋu adzɔ gɔ̃ hã be míaƒe ‘dzi nanyra ɖe Yehowa ŋu.’Lod. 19:3.

4, 5. Aleke wòate ŋu adzɔe be Kristotɔ ƒe ‘dzi nanyra ɖe Yehowa ŋu’?

 4 Ðe wòate ŋu adzɔ vavã be míaƒe ‘dzi nanyra ɖe Yehowa ŋua’? Le nyateƒe me la, ema wɔwɔ anye dzodzro. (Yes. 41:11) Nu kae míakpɔ tso ema me? Hakpanyaŋlɔla aɖe ŋlɔ bena: “Wò abɔwo le kpuie akpa be nàda kɔ kple Mawu.” Ðewohĩ madzɔ gbeɖe be míanɔ egblɔm na amewo be míedo dziku ɖe Yehowa ŋu o. Gake Lododowo 19:3 gblɔ be, “amegbetɔ ƒe bometsitsie nana eƒe mɔ glɔ̃na; ke eƒe dzi nyrana ɖe Yehowa ŋu.” Esia fia be ame ate ŋu ado dziku ɖe Mawu ŋu le eƒe dzi me. Esia ate ŋu anɔ dzedzem le amea ƒe nuwɔna me. Ate ŋu adzɔ be amea nalé Yehowa ɖe dɔ me. Eye ate ŋu ana wòadzudzɔ hadede kple hamea alo maganɔ asi kpem ɖe ɖoɖo siwo wowɔ na mí hena tadedeagu na Yehowa la ŋu bliboe o.

5 Nu kawoe ate ŋu ana míaƒe ‘dzi nanyra ɖe Yehowa ŋu’? Aleke míawɔ aƒo asa na mɔ̃ sia? Ele vevie be míakpɔ nyabiase siawo ƒe ŋuɖoɖowo ale be míakpɔ mía kple Yehowa Mawu dome ƒomedodoa ta!

NU KAWOE ATE ŊU ANA MÍAƑE ‘DZI NANYRA ÐE YEHOWA ŊU’?

6, 7. Nu ka tae Israel vi siwo nɔ anyi le Mose ƒe ŋkekea me va nɔ nyatoƒoe tom le Yehowa ŋu?

6 Nu kawoe ate ŋu ana be Yehowa subɔla wɔnuteƒe nava nɔ nyatoƒoe tom le eƒe Mawu ŋu le dzi me? Mina míadzro nu atɔ̃ siwo gbɔ wòate ŋu atso me, eye míadzro ame siwo mɔ̃ sia ɖe ƒe kpɔɖeŋu siwo le Biblia me la dometɔ aɖewo me.1 Kor. 10:11, 12.

Toɖoɖo dziɖeleameƒonyawo ate ŋu agblẽ nu le ŋuwò (Kpɔ memama 7)

7 Amewo ƒe dziɖeleameƒonyawo tea ŋu kpɔa ŋusẽ ɖe mía dzi. (Xlẽ 5 Mose 1:26-28.) Ðeko woɖe Israel viwo tso kluvinyenye me le Egipte tetie nye ema. Yehowa he fuwɔame ewo va Egiptetɔ ameteɖeanyila mawo dzi eye eyome wòtsrɔ̃ Farao kple eƒe aʋakɔa le Ƒudzĩa me. (2 Mose 12:29-32, 51; 14:29-31; Ps. 136:15) Mawu ƒe amewo nɔ klalo be yewoage ɖe Ŋugbedodonyigbaa dzi. Gake le ɣeyiɣi vevi ma me la, Israel viwo va nɔ nyatoƒoe tom le Yehowa ŋu. Nu kae na woƒe xɔse gbɔdzɔ? Woƒe dzi lólo le nyatakaka ɖedzileameƒo si ŋkutsala siwo de anyigbaa dzi la dometɔ aɖewo tsɔ vɛ na wo ta. (4 Mose 14:1-4) Nu kae do tso eme? Womeɖe mɔ na dzidzime blibo ma be woayi “anyigba nyui” ma dzi o. (5 Mose 1:34, 35) Ðe wòate ŋu adzɔ be míaɖe mɔ amewo ƒe dziɖeleameƒonyawo nagbɔdzɔ míaƒe xɔse eye wòana míanɔ nyatoƒoe tom le ale si Yehowa le eƒe amewo kplɔm egbeae ŋua?

8. Nu kae na Mawu ƒe ame siwo nɔ anyi le Yesaya ƒe ŋkekea me va nɔ fɔ bum Yehowa ɖe nɔnɔme si me wonɔ ta?

8 Nɔnɔme sesẽwo kple kuxiwo tea ŋu ɖea dzi le mía ƒo. (Xlẽ Yesaya 8:21, 22.) Le Yesaya ƒe ŋkekea me la, Yuda dukɔa ɖo xaxa me. Futɔwo ɖe to ɖe wo. Nuɖuɖu nɔ vevem. Dɔ nɔ ame geɖe wum vevie. Gake esi gavɔ̃ɖi wue nye be, gbɔgbɔmedɔ hã to vevie. (Amos 8:11) Le esi woatrɔ ɖe Yehowa ŋu be wòaxɔ na yewo teƒe la, wova nɔ ‘fi ƒom de’ woƒe fia kple woƒe Mawu boŋ. Ɛ̃, wobu fɔ Yehowa ɖe woƒe kuxiwo ta. Ne afɔkuwo dzɔ ɖe mía dzi alo míele kuxiwo me tom la, ɖe wòate ŋu adzɔ be míawo hã míanɔ gbɔgblɔm le dzi me be, ‘Afi kae Yehowa nɔ esime mehiã eƒe kpekpeɖeŋu?’

9. Nu kae na nukpɔsusu gbegblẽ va su Israel vi siwo nɔ anyi le Xezekiel ƒe ŋkekea me la si?

9 Míenyaa nu siwo katã ku ɖe nyaa ŋu o. Esi Israel vi siwo nɔ anyi le Xezekiel ƒe ŋkekea me mese nu siwo nɔ dzɔdzɔm la gɔme nyuie o ta la, wosusui be Yehowa ƒe “nuwɔnawo mele eteƒe o.” (Eze. 18:29) Ðeko wòle abe ɖe wotsɔ wo ɖokuiwo ɖo ʋɔnudrɔ̃la ɖe Mawu nu ene, eye woɖo woawo ŋutɔwo ƒe dzɔdzɔenyenye ƒe dzidzenuwo wògbɔ Yehowa tɔ ŋu togbɔ be womese susu siwo ta Yehowa ɖe mɔ ɖe nanewo ŋu gɔme nyuie o hã. Ne míawo hã míese Biblia me nudzɔdzɔ aɖe alo  ale si nanewo le edzi yim le míaƒe agbe me gɔme nyuie o la, ɖe esia ana míasusui le míaƒe dzi me be Yehowa ƒe nuwɔnawo mesɔ o, alo ‘mele eteƒe oa’?Hiob 35:2.

10. Aleke wòate ŋu adzɔe be míava srɔ̃ Adam ƒe kpɔɖeŋu gbegblẽa?

10 Míedaa míaƒe nu vɔ̃wo kple vodadawo ƒe fɔbubu ɖe ame bubuwo dzi. Tso gɔmedzedzea me ke la, ame gbãtɔ Adam da eƒe nu vɔ̃ ŋuti fɔbubu ɖe Mawu dzi. (1 Mose 3:12) Togbɔ be Adam ɖoe koŋ da le Mawu ƒe se dzi eye wònya emetsonuawo nyuie hã la, eda fɔbubua ɖe Yehowa boŋ dzi. Míagblɔ ko be enɔ gbɔgblɔm be Yehowa ye wɔ vodada be mena srɔ̃nyɔnu nyui ye o. Tso ɣemaɣi la, amewo srɔ̃ Adam ƒe kpɔɖeŋu gbegblẽa eye wobua fɔ Mawu ɖe woƒe vodadawo ta. Anyo be míabia mía ɖokuiwo be, ‘Ðe nye ŋutɔ nye vodadawo ate ŋu ana mɔkpɔkpɔ nabu ɖem alo ana dzi naɖe le ƒonye ale be mava nɔ nyatoƒoe tom le Yehowa ƒe dzidzenuwo ŋua?’

11. Nu kae míate ŋu asrɔ̃ tso Yona ƒe ŋutinyaa me?

11 Míebua mía ɖokui ŋu fũu akpa. Ewɔ na nyagblɔɖila Yona be nane gblẽ le nyametsotso si Yehowa wɔ be yeakpɔ nublanui na Niniwetɔwo la ŋu. (Yona 4:1-3) Nu ka tae? Eva tsi dzi fũu akpa ɖe ŋukpe si wòanye nɛ ne eƒe tsɔtsrɔ̃gbedeasia meva eme o la ŋu. Yona ɖe mɔ dzitsitsi fũu akpa ɖe ale si amewo abui ŋu gbã ŋku nɛ be eƒe dɔme metrɔ ɖe Niniwetɔ siwo trɔ dzi me la ŋu o. Ðe wòate ŋu adzɔ be míawo hã míanɔ mía ɖokui ŋu bum fũu akpa ale be míaƒe ‘dzi nanyra ɖe Yehowa ŋu’ le esi mehe nuwuwua vɛ kaba o ta? Ðewohĩ ƒe geɖee nye esia míele gbeƒã ɖem be Yehowa ƒe ŋkekea gogo. Ke ne amewo le nya hem ɖe mía ŋu be va de asi na egbea ŋkekea meva kpɔ o la, ɖe wòadzɔ be míanɔ dziku dom ɖe Yehowa ŋua?2 Pet. 3:3, 4, 9.

ALE SI MÍAWƆ BE MÍAƑE ‘DZI NAGANYRA ÐE YEHOWA ŊU’ O

12, 13. Ne míeva le ɖi kem Yehowa ƒe nuwɔna aɖewo le míaƒe dzi me la, nu kae míate ŋu awɔ?

12 Ne míaƒe dzi madebliboa na míeva le ɖi kem Yehowa ƒe nuwɔna aɖewo la, nu kae míate ŋu awɔ? Ðo ŋku edzi be nunya mele esia wɔwɔ me o. Biblia aɖe ɖe Lododowo  19:3 gɔme be: “Amegbetɔ ƒe bometsitsie tɔtɔa eƒe ɖoɖowo, ke etsona ɖe Yehowa boŋ ŋu.” (Byington) Esi esia le susu me na mí la, mina míadzro nu vevi atɔ̃ siwo akpe ɖe mía ŋu be míagaɖe mɔ gbeɖe agbemekuxiwo nana míabu fɔ Yehowa o la me.

13 Na wò kple Yehowa dome nanɔ kplikplikpli ɣesiaɣi. Be míagaɖe mɔ míaƒe dzi madebliboa nanyra ɖe Mawu ŋu o la, ele be míayi edzi anɔ ƒomedodo nyui me kplii. (Mixlẽ Lododowo 3:5, 6.) Ele be míaɖo ŋu ɖe Yehowa ŋu. Mele be míanye nunyalawo le mía ɖokuiwo ŋkume alo anɔ mía ɖokui ŋu bum fũu akpa o. (Lod. 3:7; Nyagb. 7:16) Esia akpe ɖe mía ŋu be míava nɔ fɔ bum Yehowa ne vɔ̃ dzɔ ɖe mía dzi o.

14, 15. Nu kae akpe ɖe mía ŋu be amewo ƒe dziɖeleameƒonyawo nagakpɔ ŋusẽ ɖe mía dzi o?

14 Mègaɖe mɔ amewo ƒe dziɖeleameƒonyawo nakpɔ ŋusẽ ɖe dziwò o. Susu geɖewo li siwo tae wòle be Israel vi siwo nɔ anyi le Mose ƒe ŋkekea me naka ɖe edzi be Yehowa akplɔ wo ayi Ŋugbedodonyigbaa dzi. (Ps. 78:43-53) Gake esi wose ŋkutsala ewoawo ƒe nyatakaka manyomanyoawo la, “womeɖo ŋku eƒe [alɔ sesẽ la] dzi” o. (Ps. 78:42) Ne míede ŋugble le Yehowa ƒe dɔwɔwɔwo ŋu heɖo ŋku nu nyui siwo katã wòwɔ na mí dzi la, ana mía kplii dome ƒomedodoa nasẽ ɖe edzi. Esia awɔe be míaɖe mɔ gbeɖe be amewo ƒe nukpɔsusu manyomanyowo nama mía kple Yehowa dome o.Ps. 77:12, 13.

15 Ke ne míebua susu vɔ̃ ɖe haxɔsetɔwo ŋu ɖe? Esia wɔwɔ ate ŋu agblẽ mía kple Yehowa dome ƒomedodo me. (1 Yoh. 4:20) Esime Israel viwo to nyatoƒoe esi woɖo Aron nunɔlagãe la, Yehowa bui be ye ŋue wonɔ liʋiliʋi lim le. (4 Mose 17:25) Nenema kee ne míetoa nyatoƒoe helia liʋiliʋi le ame siwo zãm Yehowa le tsɔ le mɔ fiam eƒe habɔbɔa ƒe akpa si le anyigba dzi ŋu la, Yehowa abui be enye liʋiliʋilili ɖe ye ŋu.Heb. 13:7, 17.

16, 17. Nu ka dzie wòhiã be míaɖo ŋkui ne míele kuxiwo me tom?

16 Ðo ŋku edzi be menye Yehowa gbɔe míaƒe kuxiwo tso o. Togbɔ be Israel vi siwo nɔ anyi le Yesaya ƒe ŋkekea me la trɔ megbe de Yehowa hã la, Edi kokoko be yeakpe ɖe wo ŋu. (Yes. 1:16-19) Kuxi ka ke me tom míeɖale o, efaa akɔ na mí ŋutɔ ne míeɖo ŋku edzi be Yehowa léa be na mí eye wòdi vevie be yeakpe ɖe mía ŋu. (1 Pet. 5:7) Le nyateƒe me la, edo ŋugbe be yeana ŋusẽ si míehiã be míayi edzi ado dzi la mí.1 Kor. 10:13.

17 Ne vɔ̃ dzɔ ɖe mía dzi alo wowɔ nu madzɔmadzɔ ɖe mía ŋu—abe ale si wòdzɔ ɖe nuteƒewɔla Hiob dzi ene la—ehiã be míaɖo ŋku edzi na mía ɖokuiwo be Yehowa mewɔa nu madzɔmadzɔ gbeɖe o. Yehowa lé fu madzɔmadzɔnyenye eye wòlɔ̃a dzɔdzɔenyenye. (Ps. 33:5) Abe Hiob xɔlɔ̃ Elihu ene la, mina míalɔ̃ ɖe edzi be: “Nede megbe xaa be Mawu nawɔ nu vɔ̃ɖi, eye ŋusẽkatãtɔ nawɔ nu madzɔmadzɔ.” (Hiob 34:10) Menye Yehowa ye hea kuxiwo vaa mía dzi o, ke boŋ eyae naa “nunana nyui ɖe sia ɖe kple nunana blibo ɖe sia ɖe” mí.Yak. 1:13, 17.

18, 19. Nu ka tae mele be míake ɖi Yehowa gbeɖe o? Gblɔ eƒe kpɔɖeŋu.

18 Mègake ɖi Yehowa gbeɖe o. Mawu de blibo, eye eƒe susuwo kɔ boo wu mía tɔwo. (Yes. 55:8, 9) Ne míebɔbɔa mía ɖokui eye míenya míaƒe ŋutete ƒe seɖoƒe la, míalɔ̃ ɖe edzi be menye nu sia nu gɔmee míese o. (Rom. 9:20) Zi geɖe la, míenyaa nyateƒe siwo katã ku ɖe nya aɖe ŋu o. Ðikeke mele eme o be èkpɔ lododo sia ƒe nyateƒenyenye dze sii: “Ame gbãtɔ si to eƒe nya la dzena dzɔdzɔetɔe, va se ɖe esime ame aɖe va ŋgɔ va bia gbee.”Lod. 18:17, Agbenya La.

19 Ne mía xɔlɔ̃ si dzi míeka ɖo vevie wɔ nane si gɔme míese gbã o, alo wɔ nane si  wɔ nuku na mí la, ɖe míatsɔ dzitsitsi atso enu be ewɔ nu gbegblẽa? Ao. Esi míenya mía xɔlɔ̃a ƒe geɖe heka ɖe edzi ta la, ɖewohĩ awɔ na mí be míawo boŋue mese nya bliboa gɔme nyuie o. Ne míewɔa nu ɖe mía xɔlɔ̃ madeblibowo ŋu le lɔlɔ̃ me alea la, ɖe mele be míaka ɖe mía Fofo si le dziƒo, si ƒe mɔwo kple susuwo kɔ boo wu mía tɔwo la dzi geɖe wu oa?

20, 21. Nu ka tae mele be míada míaƒe kuxiwo ƒe fɔbubu ɖe Yehowa dzi o?

20 Mègatrɔ fɔbubua da ɖe ame bubu dzi o. Nu ka tae? Anɔ eme be mía gbɔe kuxi aɖewo tso. Ne nenemae la, ke ehiã be míalɔ̃ ɖe edzi. (Gal. 6:7) Mègadze agbagba be yeada fɔbubua ɖe Yehowa dzi o. Nu ka tae nunya manɔ esia wɔwɔ me o? Bu kpɔɖeŋu sia ŋu kpɔ: Ðewohĩ ʋu aɖe ate ŋu aƒu du ŋutɔ. Gake ne ʋukulaa megbɔ dzi ɖi esi wòdi be yeaxa mɔ o, ke boŋ wòku ʋua sesĩe akpa ale be afɔku dzɔ la, ɖe woabu fɔ ʋuwɔlaa be eya gbɔe afɔkua tsoa? Gbeɖegbeɖe! Nenema kee Yehowa wɔ mí eye wòna tiatiawɔblɔɖe mí. Gake ena mɔfiame siwo akpe ɖe mía ŋu míawɔ nyametsotso nyuiwo hã mí. Eya ta mele be míabu fɔ mía Wɔla la ɖe míaƒe vodadawo ta gbeɖe o!

21 Enye nyateƒe be menye míaƒe kuxiwo katãe tsoa míaƒe vodadawo kple afɔɖeɖe gbegblẽwo gbɔ o. Nudzɔdzɔ aɖewo nyea “azãgbe kple nuɖiɖeame” ko. (Nyagb. 9:11) Gake migana míaŋlɔ be gbeɖe o be Satana Abosam gbɔ koŋ ye vɔ̃ɖinyenye si le xexea me la tso. (1 Yoh. 5:19; Nyaɖ. 12:9) Eyae nye futɔ la—ke menye Yehowa o!1 Pet. 5:8.

DE ASIXƆXƆ WÒ KPLE YEHOWA DOME ƑOMEDODOA ŊU

Yehowa yra Yosua kple Kaleb le esi woɖo ŋu ɖe eŋu ta (Kpɔ memama 22)

22, 23. Ne míaƒe kuxiwo na dzi ɖe le mía ƒo la, nu kawo dzie wòle be míaɖo ŋkui?

22 Ne èle nɔnɔme sesẽwo kple kuxiwo me tom la, ɖo ŋku Yosua kple Kaleb ƒe kpɔɖeŋua dzi. To vovo na ŋkutsala ewoawo la, nuteƒewɔla eve siawo he du nyui gbɔe. (4 Mose 14:6-9) Togbɔ be woxɔ Yehowa dzi se hã la, woawo hã wotsa tsaglãla le gbea dzi kpe ɖe Israel vi susɔeawo ŋu ƒe 40 sɔŋ. Ðe Yosua kple Kaleb to nyatoƒoe alo do dziku be mesɔ be woawɔ nu ɖe yewo ŋu nenema oa? Ao. Woɖo ŋu ɖe Yehowa ŋu. Ðe woyra wo ɖe esia ta? Ɛ̃, woyra wo ale gbegbe! Togbɔ be dzidzime blibo ma ku le gbedadaƒo hã la, wo ame evea woyi Ŋugbedodonyigbaa dzi mlɔeba. (4 Mose 14:30) Nenema kee Yehowa ayra míawo hã ne “ɖeɖi mete mía ŋu” le eƒe lɔlɔ̃nu wɔwɔ me o.Gal. 6:9; Heb. 6:10.

23 Ne kuxiwo, ame bubuwo ƒe blibomademade, alo wò ŋutɔ wò blibomademade na dzi ɖe le ƒowò la, nu kae nàwɔ? Ðo ŋku Yehowa ƒe nɔnɔme nyuiwo dzi. Kpɔ ale si mɔkpɔkpɔ si Yehowa na mí ava emee la le susu me ɖaa. Bia ɖokuiwò be, ‘Ne menye Yehowae o la, anye ne aleke nye agbe anɔ?’ Nɔ Yehowa ŋu kplikplikpli ɣeawokatãɣi, eye mègaɖe mɔ wò dzi nanyra ɖe eŋu gbeɖe o!