Dzo kpo yi emenuwo dzi

Dzo kpo yi emenuawo dzi

 AGBEMEŊUTINYA

Míedi Vevie Be Míasubɔ Yehowa, Afi Ka Kee Míeɖale O

Míedi Vevie Be Míasubɔ Yehowa, Afi Ka Kee Míeɖale O

Nye ɖeka nyemeyi gbeadzi ɖaɖe gbeƒã kpɔ o. Menɔ vɔvɔ̃m ale gbegbe be nye afɔwo nɔa ƒoƒom kpakpakpa ɣesiaɣi si meyi gbeadzi. Nu si gagblẽ nyaa ɖe edzi wue nye be, anyigbamamaa me tɔwo meɖoa to kura o. Wo dometɔ aɖewo wɔa adã ale gbegbe, eye wodina be yewoaƒom. Le nye mɔɖeɖedɔa wɔwɔ ƒe ɣleti gbãtɔ me la, agbalẽvi ɖeka ko mena!—Markus.

ƑE 1949 me nyae nye esia, ewu ƒe 60 fifia, gake nye ŋutinyaa ŋutɔ dze egɔme ƒe geɖe do ŋgɔ na esia. Fofonye Hendrik nye afɔkpawɔla kple abɔdɔwɔla le Donderen, si nye kɔƒe sue aɖe le Drenthe ƒe dzigbe, le Netherlands. Afi mae wodzim le le ƒe 1927 me; mí ame adree wodzi eye nyee nye vi enelia. Míaƒe aƒea le mɔ aɖe si womedo o to. Aƒelika akpa gãtɔ nye agbledelawo, eye agbledede doa dzidzɔ nam ŋutɔ. Le ƒe 1947 me, esime mexɔ ƒe 19 la, meke ɖe nyateƒea ŋu to míaƒe aƒelika si woyɔna be Theunis Been dzi. Meɖo ŋku edzi be Theunis ƒe nu medo dzidzɔ nam zi gbãtɔ si medo goe o, gake le Xexemeʋa II megbe kpuie la, eva zu Yehowa Ðasefo eye mede dzesii be ewɔa nu xɔlɔ̃tɔe wu tsã. Tɔtrɔ si wòwɔ la ʋãm ŋutɔ, eya ta meɖo toe esi wòƒo nu nam tso paradisonyigba si ŋugbe Mawu do la ŋu. Mexɔ nyateƒea enumake, eye míezu xɔlɔ̃wo le míaƒe agbe me katã. *

Medze gbeƒãɖeɖe gɔme le May 1948 me, eye le ɣleti si kplɔe ɖo me la, mexɔ nyɔnyrɔ le June 20 lia dzi le takpekpe aɖe si wowɔ le Utrecht me. Le January 1, 1949, dzi la, medze mɔɖeɖedɔa wɔwɔ gɔme eye woɖom ɖe Borculo, le Netherlands ƒe ɣedzeƒe, afi si hame sue aɖe nɔ. Ele be mazɔ mɔ kilometa 130 hafi aɖo afi ma, eya ta metiae be mado gasɔ ayi. Mesusui be gaƒoƒo 6 aɖewo koe mazã, gake le tsidzadza gã kple ya sesẽ aɖe si ƒo kpem ta la, mezã gaƒoƒo 12 sɔŋ, togbɔ be meva ɖo keteke tsɔ zɔ mɔ susɔea si nye kilometa 90 gɔ̃ hã! Zã do ŋutɔ  hafi meva ɖo, eye menɔ Ðasefowo ƒe ƒome aɖe ƒe aƒe me hewɔ mɔɖeɖedɔa le nuto ma me.

Le aʋamegbeƒe mawo me la, nu ʋɛ aɖewo koe nɔ amewo si. Kot ɖeka kple atawui eve koe nɔ asinye—kot la lolo wum, eye atawuiawo hã nɔ kpuie ŋutɔ! Abe ale si megblɔe le gɔmedzedzea ene la, gbeƒãɖeɖe le Borculo menɔ bɔbɔe nam le ɣleti gbãtɔ me o, gake Yehowa yram Biblia nusrɔ̃vi geɖewo va su asinye. Dzinu asieke megbe la, woɖom ɖe Amsterdam.

TSO KƆƑE ME YI DUGÃ ME

Agbledenuto mee wonyim le, gake fifia meva kpɔ ɖokuinye le Amsterdam, si nye dugã si lolo wu ɖe sia ɖe le Netherlands. Subɔsubɔdɔa tse ku ale gbegbe. Le ɣleti gbãtɔ me la, mena agbalẽ wòsɔ gbɔ wu esi mena le ɣleti asieke siwo do ŋgɔ me. Eteƒe medidi o, menɔ Biblia nusɔsrɔ̃ enyi ya teti wɔm. Esi woɖom hamea ƒe zimenɔla (si yɔm míele fifia be hamemetsitsiwo ƒe ha ƒe ɖoɖowo gbɔ kpɔla) megbe la, wode dɔ asi nam be maƒo dutoƒonuƒo gbãtɔ. Mevɔ̃ ŋutɔ, eya ta evivi nam esi woɖom ɖe hame bubu me do ŋgɔ teti na ɣeyiɣi si woɖo be maƒo dutoƒonuƒoa. Nyemenya kura be mava ƒo nuƒo 5,000 kple edzivɔ ne ƒeawo va le yiyim o!

Etame: Markus (ɖusime ɖaa) le ablɔdziɖaseɖiɖidɔ wɔm le Amsterdam gbɔ lɔƒo le ƒe 1950 me

Le May 1950 me la, woɖom ɖe Haarlem. Eyome wokpem be mava wɔ nutome sue dzikpɔdɔ. Metsi dzi ale gbegbe be alɔ̃ menya dɔ nam o ŋkeke etɔ̃ sɔŋ. Megblɔ na Robert Winkler, si nɔ subɔsubɔm le alɔdzedɔwɔƒea be nyemebui be medze o, gake egblɔ nam be: “Wò ya, kpe dɔbiagbalẽvia ɖo ko. Àsrɔ̃e.” Le ema megbe kpuie la, wona hehem ɣleti ɖeka eye medze nutome sue subɔla (dzikpɔla) ƒe dɔ gɔme. Esi meyi ɖasrã hame aɖe kpɔ la, medo go Janny Taatgen, si nye mɔɖela dzidzɔme, si me ɖokuitsɔtsɔsavɔ ƒe gbɔgbɔ le eye wòlɔ̃ Yehowa vevie. Míeɖe mía nɔewo le ƒe 1955 me. Gake hafi mayi nye ŋutinyaa dzi la, Janny agblɔ ale si wòwɔ va zu mɔɖela kple ale si míesubɔ ɖekae le míaƒe srɔ̃ɖeɖe megbe.

SUBƆSUBƆ ÐEKAE ABE SRƆ̃TƆWO ENE

Janny: Danye zu Ðasefo le ƒe 1945 me esime mexɔ ƒe 11. Enumake ekpɔe be ele vevie be yeasrɔ̃ Biblia kple ye vi etɔ̃awo; gake fofonye ya tsi tsitre ɖe nyateƒea ŋu, eya ta danye fiaa nu mí ne mele aƒea me o.

Kpekpe gbãtɔ si medee nye takpekpe si wowɔ le The Hague le ƒe 1950 me. Kwasiɖa ɖeka megbe la, mede kpekpe gbãtɔ le Fiaɖuƒe Akpata si le Assen (Drenthe) la me. Fofonye do dziku vevie eye wònyam le aƒe me. Danye gblɔ nam be, “Ènya afi si nàte ŋu anɔ.” Menya be nye gbɔgbɔmenɔviwo ŋue wònɔ nu ƒom tsoe. Meyi ɖanɔ Ðasefowo ƒe ƒome aɖe si te ɖe mía ŋu gbɔ, gake fofonye ganɔ fu ɖem nam, eya ta meʋu yi hame si le Deventer (Overijssel), si didi tso mía gbɔ anɔ kilometa 95  la me. Gake esi nyemetsi anɔ ɖokuinye si o ta la, fofonye ɖo nya me le setɔwo gbɔ le esi wònyam le aƒe me ta. Eya ta elɔ̃ be magbɔ va aƒe me. Togbɔ be fofonye meva xɔ nyateƒea o hã la, eva ɖe mɔ nam medea kpekpeawo katã eye meyia gbeadzi hã.

Ete: Janny (ɖusime ɖaa) esime wònɔ kpekpeɖeŋu mɔɖeɖedɔ wɔm le ƒe 1952 me

Esi metrɔ gbɔ va aƒe me megbe kpuie la, danye dze dɔ vevie eye wòhiã be mawɔ aƒemedɔwo katã. Le esiawo katã me hã la, meyi edzi wɔ ŋgɔyiyi le gbɔgbɔ me eye mexɔ nyɔnyrɔ le ƒe 1951 me esime mexɔ ƒe 17. Le ƒe 1952 me esi Dada ƒe lãme sẽ la, mesubɔ abe kpekpeɖeŋu mɔɖela ene hewɔ dɔ kple nɔvinyɔnu mɔɖela etɔ̃ ɣleti eve. Tɔdziʋuƒe aɖe mee míenɔ, eye míeɖe gbeƒã le du eve me le Drenthe nutoa me. Le ƒe 1953 me la, mezu gbesiagbe mɔɖela. Ƒe ɖeka megbe la, ɖekakpui nutome sue dzikpɔla aɖe va srã míaƒe hamea kpɔ. Markus ye. Míeɖe mía nɔewo le May 1955 me, esi míese le mía ɖokui me be míate ŋu asubɔ Yehowa nyuie wu abe srɔ̃tɔwo ene ta.Nyagb. 4:9-12.

Míaƒe srɔ̃ɖegbe le ƒe 1955 me

Markus: Le míaƒe srɔ̃ɖeɖea megbe la, woɖo mí ɖe Veendam (Groningen) abe mɔɖelawo ene. Xɔ vi sue aɖe si ƒe didime nye meta etɔ̃ eye eƒe kekeme nye meta eve ko mee míenɔ. Gake Janny dzra xɔa me ɖo nyuie wònye gbɔɖemeƒe. Zã sia zã la, ehiãna be míate míaƒe kplɔ̃ kple zikpui vi eveawo ɖa be míate ŋu amu abati si míeziɔ ɖe gli ŋu la amlɔ edzi.

Ɣleti ade megbe la, wokpe mí be míava wɔ mɔzɔzɔdɔ le Belgium. Le ƒe 1955 me la, gbeƒãɖela 4,000 aɖewo koe nɔ dukɔa me. Fifia wodzi ɖe edzi zi gbɔ zi ade! Le Flanders, si nye Belgium ƒe dziehe la, amewo doa gbegbɔgblɔ si Netherlandstɔwo dona la ke. Ke hã, ale si Belgiumtɔwo doa gbea to vovo, eya ta le gɔmedzedzea la, ehiã be míaɖu gbemasemasekuxiwo dzi.

Janny: Mɔzɔzɔdɔa bia ɖokuitsɔtsɔsavɔ blibo. Míedoa gasɔ yina ɖasrãa hameawo kpɔ eye míedzea mía nɔviwo ƒe aƒewo me. Esi aƒe mele míawo ŋutɔwo si si me míanɔ le subɔsubɔ kwasiɖaa ƒe nuwuwu o ta la, míenɔa hamea gbɔ va se ɖe Dzoɖagbe, eye míedzona Braɖa ŋdi yia hame bubu gbɔ. Gake míebua míaƒe subɔsubɔdɔa ɣesiaɣi be enye yayra tso Yehowa gbɔ.

Markus: Le gɔmedzedzea me la, míenya nɔvi aɖeke le hameawo me o, ke hã wonyo dɔme hewɔ amedzro na mí ale gbegbe. (Heb. 13:2) Esi ƒeawo va nɔ yiyim la, míesrã Netherlandsgbe hame siwo le Belgium la kpɔ zi geɖe. Esia na míekpɔ yayra geɖewo. Le kpɔɖeŋu me, míeva nya nɔvi siwo le Netherlandsgbe nutome gã la me katã kloe, eye míelɔ̃ wo vevie. Míekpɔ ɖevi alafa geɖewo tsi hewɔ gbɔgbɔmeŋgɔyiyi, wotsɔ wo ɖokuiwo ɖe adzɔgbe na Yehowa, eye wotsɔ Fiaɖuƒea ƒe nuwo ɖo nɔƒe gbãtɔ le woƒe agbe me. Dzidzɔ gãe wònye be míekpɔ wo dometɔ geɖewo le Yehowa subɔm nuteƒewɔwɔtɔe le ɣeyiɣiawo katã ƒe subɔsubɔdɔa me. (3 Yoh. 4) “Dzidedeƒo na ame nɔewo” sia na  wòle bɔbɔe be míayi edzi anɔ subɔsubɔm kple dzi blibo.Rom. 1:12.

KUXI SESẼ AÐE KPLE YAYRA VAVÃWO

Markus: Tso gbe si gbe míeɖe mía nɔewo la, míaƒe didie nye be míade Gilead Suku. Míesrɔ̃a Eŋlisigbe gaƒoƒo ɖeka ya teti gbe sia gbe. Gake Eŋlisigbea sɔsrɔ̃ le agbalẽ ɖeɖe ko me menɔ bɔbɔe o, eya ta míeɖoe be míayi England le míaƒe mɔkekeɖuɣiwo, ale be míate ŋu aɖe gbeƒã na amewo atsɔ asrɔ̃ gbea nyuie. Mlɔeba le ƒe 1963 me la, míexɔ lɛtakotoku aɖe tso habɔbɔa ƒe dɔwɔƒegã si le Brooklyn. Lɛta evee le eme, tɔnye ɖeka, Janny tɔ ɖeka. Nye lɛta la nye amekpekpe be mava xɔ hehe tɔxɛ le Gilead Sukua ɣleti ewo. Sukua ƒe taɖodzinu koŋ ye nye be woana hehe nɔviŋutsuwo be woawɔ dzikpɔkpɔdɔwo nyuie. Eya ta sukuvi 100 siwo wokpe la dometɔ 82 nye nɔviŋutsuwo.

Janny: Le nye lɛtaa me la, wobia tso asinye be mabu eŋu ahado gbe ɖa tso eŋu nenye be malɔ̃ anɔ Belgium esime Markus yi Gilead Sukua. Esia medze ŋunye gbã o. Ðeko wòdze abe Yehowa meyra ɖe agbagba si dzem menɔ be mawɔ ŋgɔyiyi la dzi o ene. Ke hã meɖo ŋku Gilead Sukua ƒe taɖodzinu dzi—si nye be wòakpe ɖe ame siwo dee ŋu be woate ŋu awɔ gbeƒãɖeɖedɔa nyuie le xexea me godoo. Eya ta melɔ̃ be matsi anyi; ale woɖom mɔɖela vevi be mawɔ dɔ kple Anna kple Maria Colpaert, siwo nye mɔɖela vevi kpɔnuteƒewo, le Belgium du si nye Ghent.

Markus: Wobia tso asinye be mava Brooklyn ɣleti atɔ̃ do ŋgɔ na sukua gɔme dzedze be mate ŋu asrɔ̃ Eŋlisigbea nyuie. Mewɔ dɔ le Agbalẽwo Ðoɖoɖa Dɔwɔƒe kple Subɔsubɔ Dɔdzikpɔƒea. Subɔsubɔ le habɔbɔa ƒe dɔwɔƒegã la kple asikpekpe ɖe agbalẽwo ɖoɖo ɖe Asia, Europa, kple Anyiehe Amerika ŋu na mekpɔ ŋudzedze ɖe xexea me katã ƒe nɔviwo ƒe habɔbɔa ŋu geɖe wu. Meɖoa ŋku Nɔviŋutsu A. H. Macmillan, si wɔ mɔzɔzɔdɔa le Nɔviŋutsu Russell ƒe ŋkekea me la dzi vevie. Ɣemaɣi la, etsi eye megasea nu tututu o, ke hã edea kpekpeawo katã nuteƒewɔwɔtɔe. Ema wɔ dɔ ɖe dzinye vevie eye wòna mekpɔe be mele be míabu hadede kple mía nɔvi Kristotɔwo nu tsɛ gbeɖe o.Heb. 10:24, 25.

Janny: Nye kple Markus míeƒoa ka na mía nɔewo zi gbɔ zi geɖe le kwasiɖaa me. Míesusua mía nɔewo ŋutɔ! Gake Markus nɔ dzidzɔ kpɔm ɖe hehe si xɔm wònɔ le Gilead Sukua me la ŋu, eye gbeƒãɖeɖedɔa nɔ nye hã nunye vivim. Kaka Markus nagbɔ tso Amerika la, menɔ Biblia nusɔsrɔ̃ 17 sɔŋ wɔm! Togbɔ be menɔ bɔbɔe esime mía dome ma ɣleti 15 sɔŋ o hã la, mekpɔe be Yehowa yra mí ɖe nu siwo míetsɔ sa vɔe ta. Gbe si gbe Markus agbɔ la, yameʋu si wòɖo la tsi megbe gaƒoƒo geɖe, eya ta esi wòva ɖo mlɔeba la, míefa avi ɖe kɔ dzi na mía nɔewo. Tso ɣemaɣi la, naneke megamaa mía dome o.

MÍEDAA AKPE ÐE SUBƆSUBƆMƆNUKPƆKPƆ SIWO SU MÍA SI TA

Markus: Esi megbɔ tso Gilead Sukua le December 1964 me la, wokpe mí be míava subɔ le Betel. Míenya tso gɔmedzedzea me be woaganɔ dɔ ɖɔlim na mí o. Ɣleti etɔ̃ pɛ megbe la, woɖo mí ɖe Flanders be míaɖawɔ nutome gã dzikpɔdɔa. Esi woɖo Aalzen kple Els Wiegersma ɖe Belgium abe dutanyanyuigblɔlawo ene la, wode dɔ asi na wo be woawɔ nutome gã dzikpɔdɔa, eye míawo míetrɔ  yi Betel; mesubɔ le Subɔsubɔ Dɔdzikpɔƒea. Tso ƒe 1968 yi ƒe 1980 me la, woɖɔli dɔ na mí tso Betel yi mɔzɔzɔdɔa me, kple tso mɔzɔzɔdɔa me yi Betel zi gbɔ zi geɖe. Mlɔeba la, tso ƒe 1980 va ɖo ƒe 2005 me la, mesubɔ abe nutome gã dzikpɔla ene.

Togbɔ be míaƒe dɔdeasiwo trɔ enuenu zi geɖe hã la, míeŋlɔ be gbeɖe be míeɖe adzɔgbe na Yehowa be míasubɔe kple luʋɔ blibo o. Míese vivi le dɔ ɖe sia ɖe si wode asi na mí la me, esi míeka ɖe edzi be tɔtrɔ ɖe sia ɖe si woawɔ le míaƒe subɔsubɔdɔa me ado Fiaɖuƒea ƒe nuwo ɖe ŋgɔ ta.

Janny: Mɔnukpɔkpɔ si su asinye be nye kple Markus míeyi Brooklyn le ƒe 1977 me, kple Patterson le ƒe 1997 me, esime wòyi ɖaxɔ hehe bubuwo kpee abe Alɔdzekɔmiti me tɔ ene la do dzidzɔ nam ŋutɔ.

YEHOWA NYA MÍAƑE HIAHIÃWO

Markus: Le ƒe 1982 me la, wowɔ dɔ na Janny, eye eƒe lãme va sẽ. Ƒe etɔ̃ megbe la, hame si le Louvain na xɔ mí le woƒe Fiaɖuƒe Akpataa ƒe dzisasrã dzi. Le subɔsubɔ ƒe 30 megbe la, esiae nye zi gbãtɔ si xɔ su míawo ŋutɔwo si. Le Braɖagbewo ne míedo agba be míayi aɖasrã hame aɖe kpɔ la, ehiãna be mafɔ míaƒe agbawo ato atrakpuifɔflɔ 54-awo dzi aɖi agaliae zi gbɔ zi geɖe! Dzidzɔtɔe le ƒe 2002 me la, wona míeʋu le dziƒoxɔa dzi va xɔ siwo le gɔmea dometɔ aɖe me. Esi mexɔ ƒe 78 la, woɖo mí ɖe Lokeren abe mɔɖela veviwo ene. Edoa dzidzɔ na mí be míekpɔtɔ le subɔsubɔm alea eye míetea ŋu yia gbeadzi gbe sia gbe.

“Míexɔe se vevie be menye afi si míele subɔsubɔm le alo mɔnukpɔkpɔ si su mía sie nye nu vevitɔ o, ke ame si subɔm míele la boŋ ye”

Janny: Ne wotsɔ ƒe siwo katã mí ame evea míetsɔ wɔ ɣeyiɣiawo katã ƒe subɔsubɔdɔa ƒo ƒui la, awu ƒe 120! Míekpɔ ŋugbe si Yehowa do be ‘yemaɖe asi le mía ŋu gbeɖe o,’ eye be ne míesubɔ ye nuteƒewɔwɔtɔe la, ‘naneke mahiã mí o’ la me vava teƒe.Heb. 13:5; 5 Mose 2:7.

Markus: Míeɖe adzɔgbe na Yehowa be míasubɔe tso esime míenye sɔhɛwo ko. Míedi nu gãwo na mía ɖokui gbeɖe o. Míelɔ̃ faa xɔ dɔ ɖe sia ɖe si wode mía si, elabena míexɔe se vevie be menye afi si míele subɔsubɔm le alo mɔnukpɔkpɔ si su mía sie nye nu vevitɔ o, ke ame si subɔm míele la boŋ ye.

^ mm. 5 Esi ƒeawo va nɔ yiyim la, fofonye, danye kple nɔvinyenyɔnu tsitsi ɖeka kpakple nɔvinyeŋutsu eve hã va zu Ðasefowo.