Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  June 2013

Kpɔ Ŋudzedze Ðe Yehowa Ƒe Nuteƒewɔwɔ Kple Tsɔtsɔke Ŋu

Kpɔ Ŋudzedze Ðe Yehowa Ƒe Nuteƒewɔwɔ Kple Tsɔtsɔke Ŋu

“Aƒetɔ, wò dɔme nyo, eye nèlɔ̃a tsɔtsɔke; amenuveve bɔ ɖe asiwò na ame siwo katã yɔa wò la.”PS. 86:5.

1, 2. (a) Nu ka tae míedea asixɔxɔ xɔlɔ̃ siwo wɔa nuteƒe helɔ̃a tsɔtsɔke ŋu? (b) Biabia kawo mee míadzro?

AME kae nye xɔlɔ̃ vavã? Nɔvinyɔnu Kristotɔ aɖe si ŋkɔe nye Ashley gblɔ be: “Xɔlɔ̃ vavã nye ame si nɔa klalo ɣesiaɣi be yeakpe ɖe ŋuwò, eye wòtsɔ kea wò faa ne èwɔ vodada.” Mí katã míedea asixɔxɔ xɔlɔ̃ siwo wɔa nuteƒe eye wolɔ̃a tsɔtsɔke ŋu. Wokpena ɖe mía ŋu míesena le mía ɖokui me be wolɔ̃ mí eye be míele dedie.—Lod. 17:17.

2 Yehowa ye nye Xɔlɔ̃ wɔnuteƒe si lɔ̃a tsɔtsɔke si ɖeke mesɔ kplii o la. Hakpala la gblɔe wòsɔ be: “Aƒetɔ, wò dɔme nyo, eye nèlɔ̃a tsɔtsɔke; amenuveve bɔ ɖe asiwò na ame siwo katã yɔa wò la.” (Ps. 86:5) Nu kae wòfia be woanye nuteƒewɔla kple ame si lɔ̃a tsɔtsɔke? Aleke Yehowa ɖea nɔnɔme nyui siawo fianae? Eye aleke míate ŋu asrɔ̃ eƒe kpɔɖeŋuae? Nya siawo ƒe ŋuɖoɖowo akpe ɖe mía ŋu míalɔ̃ mía Xɔlɔ̃ vevitɔ Yehowa geɖe wu. Woakpe ɖe mía ŋu hã be míado ŋusẽ mía kple mía nɔviwo dome xɔlɔ̃dzedze.—1 Yoh. 4:7, 8.

YEHOWA NYE NUTEƑEWƆLA

3. Nu kae nuteƒewɔwɔ fia?

3 Nuteƒewɔwɔ nye nɔnɔme lédziname aɖe, elɔ kuku ɖe ame nɔewo ŋu, anukwareɖiɖi na ame, kple ame ƒe akpa dzi nɔnɔ tamanamanae ɖe eme. Nuteƒewɔla ƒe susu metrɔna kabakaba o. Ke boŋ ekuna ɖe ame (alo nane) ŋu goŋgoŋ heléna ɖe eŋu le ɣeyiɣi sesẽwo gɔ̃ hã me. Ɛ̃, Yehowae nye “Nuteƒewɔla” gãtɔ kekeake.—Nyaɖ. 16:5.

4, 5. (a) Aleke Yehowa ɖenɛ fiana be yenye nuteƒewɔla? (b) Aleke ŋugbledede le ale si Mawu wɔa nuteƒe na esubɔlawoe ŋu doa ŋusẽ mí?

4 Aleke Yehowa ɖenɛ fiana be yenye nuteƒewɔla? Megblẽa esubɔla wɔnuteƒewo ɖi gbeɖe o. Fia David si nye nuteƒewɔla mawo dometɔ ɖeka la ɖo kpe  Yehowa ƒe nuteƒewɔwɔ dzi esi wògblɔ be: “Èwɔa nuteƒe na ame si wɔa nuteƒe.” (2 Sam. 22:26, NW) Le David ƒe dodokpɔɣiwo me la, Yehowa fia mɔe, ekpɔ eta, eye wòxɔ nɛ nuteƒewɔwɔtɔe. (2 Sam. 22:1) David kpɔe be Yehowa ƒe nuteƒewɔwɔ lɔ nu geɖe ɖe eme wu nyagbɔgblɔ ko. Nu ka tae Yehowa wɔ nuteƒe na David? Elabena David ŋutɔ hã nye “ame si wɔa nuteƒe.” Yehowa dea asixɔxɔ esubɔlawo ƒe nuteƒewɔwɔ ŋu; eye ewɔa nuteƒe na ame siwo wɔa nuteƒe nɛ.—Lod. 2:6-8.

5 Ŋugbledede le ale si Yehowa wɔa nuteƒe na esubɔlawoe ŋu doa ŋusẽ mí. Nɔviŋutsu wɔnuteƒe aɖe si ŋkɔe nye Reed gblɔ be: “Ne mexlẽ nu tso ale si Yehowa kpe ɖe David ŋu le eƒe fukpekpewo me ŋu la, edoa ŋusẽm ŋutɔ. Esime David nɔ sisim eye wònɔ ɣaɣlam tso agado me yi agado me gɔ̃ hã la, Yehowa kpe ɖe eŋu ɣesiaɣi. Esia dea dzi ƒo nam ŋutɔ! Eɖoa ŋku edzi nam be aleke kee nɔnɔmeawo ɖale o, ne edze abe mɔkpɔkpɔ aɖeke megali o ene gɔ̃ hã la, Yehowa le klalo be yeakpe ɖe ŋunye zi ale si nye hã mewɔ nuteƒe nɛ.” Ðikeke mele eme o be wò hã èsena le ɖokuiwò me nenema ke.—Rom. 8:38, 39.

6. Mɔ bubu kawo nue Yehowa ɖenɛ fiana le be yenye nuteƒewɔla, eye aleke esia ɖea vi na esubɔlawoe?

6 Mɔ bubu kawo nue Yehowa ɖenɛ fiana le be yenye nuteƒewɔla? Meɖea asi le eƒe dzidzenuwo ŋu o. Ena kakaɖedzi mí be: “Ame ma ke manye, va se ɖe esime miaku amegã.” (Yes. 46:4) Ɣeawokatãɣi la, eƒe dzidzenu siwo metrɔna o la dzie wònɔa te ɖo wɔa nyametsotso. (Mal. 3:6) Gakpe ɖe eŋu la, Yehowa wɔa nuteƒe le eƒe ŋugbedodowo dzi wɔwɔ me. (Yes. 55:11) Eya ta Yehowa ƒe nuteƒewɔwɔ ɖea vi na esubɔla wɔnuteƒewo katã. Le mɔ ka nu? Ne míedzea agbagba wɔna ɖe Yehowa ƒe dzidzenuwo dzi la, kakaɖedzi nɔa mía si be ayra mí abe ale si wòdo ŋugbee ene.—Yes. 48:17, 18.

SRƆ̃ YEHOWA ƑE NUTEƑEWƆWƆ

7. Mɔ ɖeka ka dzie míate ŋu ato asrɔ̃ Mawu ƒe nuteƒewɔwɔ?

 7 Aleke míate ŋu asrɔ̃ Yehowa ƒe nuteƒewɔwɔe? Mɔ ɖeka si dzi míato awɔ esiae nye be míawɔ nyui na ame siwo ɖo xaxa me. (Lod. 3:27) Le kpɔɖeŋu me, ɖe nènya haxɔsetɔ aɖe si ƒo dzi ɖe le, ɖewohĩ le lãmegbegblẽ, ƒometɔwo ƒe tsitretsiɖeŋu, alo le eya ŋutɔ ƒe vodadawo ta? Ðe manyo be nàte ɖe nɔvia ŋu agblɔ “nya nyui kple akɔfanyawo” nɛ oa? (Zak. 1:13) * Ne èwɔ esia la, ke èle eɖem fia be yenye xɔlɔ̃ vavã wɔnuteƒe si “kuna ɖe ame ŋu wu ame nɔvi gɔ̃ hã.”—Lod. 18:24.

8. Aleke míate ŋu asrɔ̃ Yehowa ƒe nuteƒewɔwɔ le srɔ̃ɖeɖe kple go bubuwo me?

8 Míagate ŋu asrɔ̃ Yehowa ƒe nuteƒewɔwɔ ne míewɔ nuteƒe na míaƒe lɔlɔ̃tɔwo. Le kpɔɖeŋu me, ne srɔ̃tɔwoe míenye la, ele be míawɔ nuteƒe na mía srɔ̃wo. (Lod. 5:15-18) Eya ta míeƒoa asa na afɔ gbãtɔ si ate ŋu akplɔ mí ade ahasiwɔwɔ me la ɖeɖe. (Mat. 5:28) Tsɔ kpe ɖe eŋu la, míewɔa nuteƒe na míaƒe haxɔsetɔwo ne míeƒoa asa na ameŋunyagbɔgblɔ vɔ̃ɖi alo ameŋugbegblẽ, eye míekakaa mía nɔviwo ŋu nya gbegblẽwo alo ɖoa to wo gɔ̃ hã o.—Lod. 12:18.

9, 10. (a) Ame kae míedi vevie be míawɔ nuteƒe na? (b) Nu ka tae Yehowa ƒe sewo dzi wɔwɔ menɔa bɔbɔe ɣesiaɣi o?

9 Ƒo wo katã ta la, ele be míawɔ nuteƒe na Yehowa. Nu kae esia bia? Ebia be míalɔ̃ nu siwo wòlɔ̃, míalé fu nu siwo wòlé fui, eye míawɔ nu si dzea eŋu. (Mixlẽ Psalmo 97:10.) Zi ale si míaƒe susuwo kple seselelãmewo wɔa ɖeka kple Yehowa tɔ la, zi nenemae eƒe sewo dzi wɔwɔ nɔa bɔbɔe na míi.—Ps. 119:104.

 10 Yehowa ƒe sewo dzi wɔwɔ menɔa bɔbɔe ɣesiaɣi ya o. Ate ŋu ahiã be míaʋli vevie hafi alé nuteƒewɔwɔ me ɖe asi nɛ. Le kpɔɖeŋu me, anye Kristotɔ tre aɖewo ƒe didi be yewoaɖe srɔ̃, ke hã womele ame si woaɖe la kpɔm le Yehowa subɔlawo dome o. (1 Kor. 7:39) Nɔvinyɔnu tre aɖe ƒe dɔwɔhati siwo nye dzimaxɔsetɔwo ate ŋu anɔ agbagba dzem be yewoadi ŋutsu nɛ be wòazɔ kplii. Ðewohĩ nɔvinyɔnua le avu wɔm kple akogotsitsi ƒe seselelãmewo. Ke hã, eɖoe kplikpaa be yeawɔ nuteƒe na Yehowa. Ðe míekpɔa ŋudzedze ɖe kpɔɖeŋu nyui ɖola siawo ŋu ŋutɔ oa? Kakaɖedzitɔe la, Yehowa aɖo eteƒe na ame siwo katã wɔa nuteƒe nɛ le nɔnɔme sesẽwo gɔ̃ hã me.—Heb. 11:6.

“Xɔlɔ̃ aɖewo kuna ɖe ame ŋu wu ame nɔvi gɔ̃ hã.”—Lod. 18:24 (Kpɔ memama 7)

[Nɔnɔmetata si le axa 19]

“Mitsɔ nɔ mia nɔewo kem faa.”—Ef. 4:32 (Kpɔ memama 16)

YEHOWA LƆ̃A TSƆTSƆKE

11. Nu kae wòfia be ame nalɔ̃ tsɔtsɔke?

11 Yehowa ƒe nɔnɔme siwo léa dzi na ame wu la dometɔ ɖekae nye ale si wòlɔ̃na faa tsɔna kena. Nu kae wòfia be ame nalɔ̃ tsɔtsɔke? Efia be wòatsɔ agɔ si ame aɖe dze le edzi la akee. Gake esia mefia be ame si lɔ̃a tsɔtsɔke la de nu gbegblẽ si agɔdzelaa wɔ dzi alo ŋe aɖaba ƒu edzi o. Ke boŋ efia be etiae be yemalé dziku ɖe dɔ me o. Ŋɔŋlɔawo ɖee fia be Yehowa ‘lɔ̃na faa tsɔa’ ame siwo trɔ dzi me vavã la ƒe nu vɔ̃wo kea wo.—Ps. 86:5.

12. (a) Aleke Yehowa tsɔna kenae? (b) Nu kae wòfia be ‘woatutu nu vɔ̃ ɖa’?

12 Aleke Yehowa tsɔna kenae? Yehowa ‘tsɔa nu vɔ̃ kena geɖe,’ si fia be etsɔna kena keŋkeŋ heŋlɔnɛ be tegbee. (Yes. 55:7) Aleke míewɔ nya be Yehowa tsɔ kena keŋkeŋ? Bu kakaɖedzinya si le Dɔwɔwɔwo 3:19 ŋu kpɔ. (Mixlẽe.) Apostolo Petro de dzi ƒo na eƒe nyaselawo be: “Mitrɔ dzi me, eye migbugbɔ.” Ne nu vɔ̃ wɔla aɖe trɔ dzi me vavã la, exaa nu vevie ɖe afɔ baɖa si wòɖe ta, eye wòɖonɛ kplikpaa be yemagawɔ nu vɔ̃ ma ake o. (2 Kor. 7:10, 11) Dzimetɔtrɔ vavãtɔ ʋãa nu vɔ̃ wɔla be ‘wòagbugbɔ,’ si fia be, wòadzudzɔ nu gbegblẽa wɔwɔ, eye wòayi edzi awɔ nu si adze Mawu ŋu. Ne Petro ƒe nyaselawo ɖe dzimetɔtrɔ vavã  fia la, nu kae ado tso eme? Petro gblɔ be ‘woatutu woƒe nu vɔ̃wo ɖa.’ Helagbe me nya si gɔme woɖe be ‘woatutu ɖa’ la fia be ‘woatutu nu keŋkeŋ.’ Eya ta ne Yehowa tsɔ nu vɔ̃wo ke la, etsɔ kena keŋkeŋ abe ɖe wòtsɔ nututunu tutu nuŋɔŋlɔ ɖa le nuŋlɔkpe dzi kura ene.—Heb. 10:22; 1 Yoh. 1:7.

13. Esi Yehowa gblɔ be, “nyemagaɖo ŋu woƒe nu vɔ̃wo azɔ o” la, kakaɖedzi kae esia na mí?

13 Aleke míewɔ nya be Yehowa tsɔ kena tegbee? Bu Yeremiya ƒe nyagblɔɖi si ku ɖe nubabla yeye si wowɔ kple Kristotɔ amesiaminawo, si ʋu tsɔtsɔke vavã ƒe mɔnukpɔkpɔ ɖi na ame siwo xɔa tafevɔsaa dzi se, la ŋu kpɔ. (Mixlẽ Yeremiya 31:34.) Yehowa gblɔ be: “Matsɔ woƒe vodadawo ake wo, eye nyemagaɖo ŋu woƒe nu vɔ̃wo azɔ o.” Eya ta Yehowa le kakam ɖe edzi na mí be ne yenya tsɔ nu vɔ̃ aɖe ke mí ko la, yemagaɖe afɔ aɖeke ɖe mía ŋu le etsɔme le nu vɔ̃ ma ta o. Megaɖoa ŋku nu vɔ̃ siwo míewɔ va yi la dzi kple susu be yeanɔ fɔ bum mí alo anɔ to hem na mí agbadre o. Ke boŋ Yehowa tsɔa nu vɔ̃ mawo kena faa eye wòŋlɔa wo be tegbee.—Rom. 4:7, 8.

14. Aleke ŋugbledede le Yehowa ƒe tsɔtsɔke ŋu ate ŋu afa akɔ na míi? Gblɔ eƒe kpɔɖeŋu.

14 Ŋugbledede le Yehowa ƒe tsɔtsɔke ŋu faa akɔ na mí. Kpɔ eƒe kpɔɖeŋu aɖe ɖa. Ƒe gbogbo aɖee nye esi va yi la, woɖe nɔvinyɔnu aɖe si míayɔ be Elaine la le hamea me. Ƒe geɖe megbe la, wogbugbɔ xɔe. Elaine gblɔ be: “Togbɔ be megblɔna be mexɔe se be Yehowa tsɔ nye nu vɔ̃wo kem hã la, mesena le ɖokuinye me ɣesiaɣi be Yehowa le adzɔge tso gbɔnye eye be ame bubuwo te ɖe eŋu eye wònye ame ŋutɔŋutɔ na wo wum.” Gake nuxexlẽ tso kpɔɖeŋunyagbɔgblɔ siwo Biblia tsɔ ɖɔ ale si Yehowa tsɔna kenae ŋu kple ŋugbledede le wo ŋu na Elaine kpɔ akɔfafa. Elaine gblɔ kpee be: “Meva kpɔ ale si gbegbe Yehowa lɔ̃m heléa be nam la dze sii wu tsã.” Kpɔɖeŋunyagbɔgblɔ si ʋãe vevie wu lae nye esi: “Ne Yehowa tsɔ míaƒe nu vɔ̃wo ke mí la, mele be míase le mía ɖokui me be nu vɔ̃ mawo ƒe ɖi akpɔtɔ anɔ mía ŋu le míaƒe agbemeŋkekewo katã me o.” * Elaine gblɔ be: “Meva de dzesii be tsã la, nyemexɔe se ŋutɔŋutɔ be Yehowa ate ŋu atsɔ akem keŋkeŋ o, eye mesusui be madro agba sia le nye agbemeŋkekewo katã me. Menya be axɔ ɣeyiɣi, gake fifia mele sesem le ɖokuinye me be mele tetem ɖe Yehowa ŋu, eye be woɖe agba kpekpe aɖe le dzinye.” Mawu lɔ̃ame si lɔ̃a tsɔtsɔke ka gbegbee nye esi subɔm míele!—Ps. 103:9.

SRƆ̃ YEHOWA ƑE TSƆTSƆKE

15. Aleke míate ŋu asrɔ̃ Yehowa ƒe tsɔtsɔke?

15 Míate ŋu asrɔ̃ Yehowa ƒe tsɔtsɔke ne míelɔ̃na faa tsɔna kea mía nɔewo ɣesiaɣi si wòhiã. (Mixlẽ Luka 17:3, 4.) Ðo ŋku edzi be, ne Yehowa tsɔ míaƒe nu vɔ̃wo ke mí la, megaɖoa ŋku wo dzi o, le gɔmesesea nu be, megabiaa nu vɔ̃ mawo ƒe fe tso mía si emegbe o. Ne míetsɔ amewo ƒe vodadawo ke wo la, míawo hã míate ŋu aŋlɔ wo be, le gɔmesesea nu be, míagahe nya mawo ɖe go ake le etsɔme o.

16. (a) Ne míelɔ̃a tsɔtsɔke la, ɖe wòfia be míede nu gbegblẽ wɔwɔ dzi alo míeɖe mɔ ame bubuwo le mía bama? Ðe eme. (b) Hafi Mawu natsɔ míaƒe nu vɔ̃wo ake mí la, nu kae wòle be míawɔ?

 16 Ne míelɔ̃a tsɔtsɔke la, mefia be míede nu gbegblẽ si agɔdzelaa wɔ dzi alo ŋe aɖaba ƒu edzi o; eye mefia hã be míeɖe mɔ ame bubuwo le nu vevi wɔm mí alo le mía bam o. Ao. Nu si wòfia boŋ ye nye be míetiae be míalé dziku ɖe dɔ me o. Eye ele vevie be míaɖo ŋkui be hafi Yehowa Mawu natsɔ míaƒe nu vɔ̃wo ake mí la, ele be míawo hã míatsɔ anɔ amewo kem. (Mat. 6:14, 15) Yehowa sea veve ɖe mía nu heɖoa ŋku edzi be “kewɔ míenye.” (Ps. 103:14) Eya ta  ɖe mele be veveseɖeamenu naʋã míawo hã be míado dzi atsɔ mía nɔviwo ƒe gbɔdzɔgbɔdzɔwo eye míatsɔ anɔ wo kem faa tso dzi me oa?—Ef. 4:32; Kol. 3:13.

Do gbe ɖa ɖe ame siwo dze agɔ le dziwò la ta tso dzi me (Kpɔ memama 17)

17. Ne haxɔsetɔ aɖe wɔ nu wòve mí la, nu kae akpe ɖe mía ŋu míatsɔ akee?

 17 Mele bɔbɔe ɣesiaɣi be míatsɔ ake amewo o. Esesẽ na Kristotɔ amesiamina aɖewo siwo nɔ anyi le ƒe alafa gbãtɔ me gɔ̃ hã be woakpɔ wo dome masɔmasɔ aɖewo gbɔ. (Flp. 4:2) Ne haxɔsetɔ aɖe wɔ nu wòve mí la, nu kae akpe ɖe mía ŋu míatsɔ akee? Bu Hiob ƒe kpɔɖeŋua ŋu kpɔ. Ete ɖe edzi ŋutɔ esi Elifaz, Bildad kple Zofar siwo be yewonye exɔlɔ̃wo la bu fɔe madzemadzee. (Hiob 10:1; 19:2) Emegbe Yehowa ka mo na Hiob nu tsola alakpatɔ mawo. Mawu gblɔ na wo be woayi Hiob gbɔ aɖasa vɔ ɖe woƒe nu vɔ̃wo ta. (Hiob 42:7-9) Gake Yehowa bia tso Hiob hã si be wòawɔ nane. Nu kae? Yehowa gblɔ na Hiob be wòado gbe ɖa ɖe enutsolawo ta. Hiob wɔ abe ale si Yehowa bia tso esi ene eye Yehowa yrae ɖe ale si wòlɔ̃ faa tsɔ ke ta. (Mixlẽ Hiob 42:10, 12, 16, 17.) Nufiame kae le esia me na mí? Gbedodoɖa tso dzi me ɖe ame si dze agɔ le mía dzi ta akpe ɖe mía ŋu míaɖe dziku ɖa le dɔ me.

YI EDZI NÀNƆ ŊUDZEDZE KPƆM ÐE YEHOWA ƑE NƆNƆME NYUIWO ŊU

18, 19. Aleke míayi edzi anɔ ŋudzedze kpɔm ɖe Yehowa ƒe nɔnɔme lédzinamewo ŋu geɖe wu?

18 Yehowa ƒe nɔnɔme lédziname vovovo siawo me dzodzro do dzidzɔ na mí ŋutɔ. Míekpɔe be enye ame si ŋu wotena ɖo bɔbɔe, mekpɔa ame ŋkume o, enyoa dɔme, esea nu gɔme na ame, enye nuteƒewɔla, eye wòlɔ̃a tsɔtsɔke. Nyateƒee, nu geɖewo gali míasrɔ̃ tso Yehowa ŋu. Mɔnukpɔkpɔ ava su mía si be míasrɔ̃ nu geɖe tso eŋu tegbee. (Nyagb. 3:11) Míelɔ̃ ɖe apostolo Paulo ƒe nya siawo dzi be: “Oo, Mawu ƒe kesinɔnuwo kple nunya kpakple sidzedze me goglo loo!” Míate ŋu agblɔ nya sia ke le Mawu ƒe lɔlɔ̃ kple eƒe nɔnɔme ade siwo me míedzro le nyati etɔ̃ siawo me la ŋu.—Rom. 11:33.

19 Neva eme be mí katã míayi edzi anɔ ŋudzedze kpɔm ɖe Yehowa ƒe nɔnɔme lédzinamewo ŋu geɖe wu. Míate ŋu awɔ esia ne míenya nu tso nɔnɔmeawo ŋu nyuie, míede ŋugble le wo ŋu, eye míawo ŋutɔwo míesrɔ̃ nɔnɔme mawo heɖe wo fia le míaƒe agbenɔnɔ me. (Ef. 5:1) Ne míewɔ esia la, ɖikeke mele eme o be míawɔ ɖeka kple hakpalaa esi wògblɔ be: “Ke nye la, Mawu ƒe gbɔnyenɔnɔ enye nye dzidzɔ.”—Ps. 73:28.

^ mm. 7 Kpɔ nyati si nye “Ðe Nède Dzi Ƒo na Ame aɖe le Ŋkeke Siawo Mea?” le January 15, 1995, ƒe Gbetakpɔxɔ kple “De Dzi Ƒo Le Lɔlɔ̃ Kple Dɔ Nyui Wɔwɔ Me—Alekee?” le April 1, 1995, tɔ me hena esia ŋuti ɖaŋuɖoɖo bubuwo.

^ mm. 14 Kpɔ agbalẽ si nye Te Ðe Yehowa Ŋu, ta 26, memama 10.