Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  June 2013

Hamemetsitsiwo—Ðe Miafa Akɔ Na ‘Luʋɔ Si Ŋu Nu Tea’?

Hamemetsitsiwo—Ðe Miafa Akɔ Na ‘Luʋɔ Si Ŋu Nu Tea’?

Angela, * si nye nɔvinyɔnu tre aɖe si le eƒe ƒe 30-awo me la tsi dzimaɖi vie. Ele hamemetsitsiwo lalam. Nya ka gblɔ ge woala nɛ? Le nyateƒe me la, eda kpekpe ʋɛ aɖewo ƒu ya, gake eƒe dɔwɔɖuia, si nye ame tsitsiwo dzi kpɔkpɔ, nana ɖeɖi tea eŋu vevie. Tsɔ kpe ɖe eya ŋutɔ ƒe kuxiwo ŋu la, dadaa ƒe lãmesẽnyawo hã na wòtsi dzi vevie.

Ne wòe ayi aɖasrã Angela kpɔ la, aleke nàde dzi ƒo na ‘luʋɔ sia si ŋu nu te’ lae? (Yer. 31:25) Gbã la, aleke nàdzra ɖoe be alẽkpɔkplɔ ƒe sasrãkpɔa nàfa akɔ nɛ?

BU NƆVIAWO ƑE NƆNƆMEWO ŊU

Ɣeaɖewoɣi la, ɖeɖi tea mí katã ŋu le míaƒe dɔwɔɖuiwo alo teokrasigbanɔamedziwo ta. Le kpɔɖeŋu me, “nu te” nyagblɔɖila Daniel ŋu esi wòkpɔ ŋutega aɖe si gɔme mese o. (Dan. 8:27) Mawudɔla Gabriel ye va kpe ɖe eŋu. Mawu ƒe ame dɔdɔ sia kpe ɖe Daniel ŋu wòse ŋutegaa gɔme, ena kakaɖedzii be Yehowa se eƒe gbedodoɖawo, eye wògblɔ nɛ be ekpɔtɔ nye ame si “wolɔ̃” vevie. (Dan. 9:21-23) Ɣebubuɣi la, mawudɔla bubu ƒe nya fakɔnamewo gado ŋusẽ nyagblɔɖila sia si ŋu nu te la ŋutɔ.—Dan. 10:19.

Hafi nàyi aɖasrã nɔvi aɖe kpɔ la, bu nɔnɔme si me tom wòle la ŋu

Nenema kee hafi nàyi aɖasrã haxɔsetɔ aɖe si ŋu nu te alo si ƒo dzi ɖe le kpɔ la, gbɔ dzi ɖi nàbu nɔnɔme si me wòle la ŋu do ŋgɔ. Kuxi kawo me tom wòle? Aleke gbegbee kuxi siawo le ŋusẽ kpɔm ɖe edzi? Nɔnɔme nyui kawoe wòɖena fiana? Richard, si nye hamemetsitsi ƒe 20 kple  edzivɔe nye esia, gblɔ be: “Nɔviawo ƒe nɔnɔme nyuiwo ŋue nye susu nɔna.” Egblɔ kpee be: “Nɔviawo ŋu bubu alea hafi ayi wo gbɔ nana wònɔa bɔbɔe nam be made dzi ƒo na wo wòasɔ ɖe woƒe hiahiãwo nu.” Ne wò kple hamemetsitsi bubue ayi la, ɖe manyo be mi ame evea miabu nɔnɔme si me tom nɔvia le la ŋu ɖekae oa?

NA NƆVIAWO NAÐE DZI ÐI

Ðewohĩ àlɔ̃ ɖe edzi be menɔa bɔbɔe be míagblɔ míaƒe dzimenyawo na amewo o. Le kpɔɖeŋu me: Ate ŋu asesẽ na nɔvi aɖe be wòagblɔ eƒe dzimenyawo na hamemetsitsiwo ne wova srãe kpɔ. Nu kae nàwɔ be wòaɖe dzi ɖi aƒo nu faa? Wò alɔgbɔnukoko si tso dzi me kple kakaɖedzinya ʋɛ aɖewo gbɔgblɔ nɛ ate ŋu aɖe vi. Ne Michael, si nye hamemetsitsi ƒe 40 kple edzivɔe nye esia yi ɖasrã nɔvi aɖe kpɔ la, edzea dzeɖoɖoa gɔme zi geɖe be: “Ènyaa, mɔnukpɔkpɔ nyuitɔ siwo sua hamemetsitsiwo si la dometɔ ɖekae nye be woasrã nɔviwo kpɔ le woƒe aƒewo me be woanya wo nyuie. Eya ta menɔ mɔ kpɔm na ŋkeke sia vevie.”

Àte ŋu atiae be yewoado gbe ɖa atsɔ adze dzeɖoɖoa gɔme. Le apostolo Paulo ƒe gbedodoɖawo me la, esɔ nyuie be ehe susu yi nɔviawo ƒe xɔse, lɔlɔ̃ kple dzidodo dzi. (1 Tes. 1:2, 3) Ne ègblɔ ale si nèsena le ɖokuiwò me tso nɔvia ƒe nɔnɔme nyuiwo ŋu nɛ la, èle mi ame evea siaa ƒe dzi dzram ɖo hena dzeɖoɖo tuameɖowo. Wò nyawo ate ŋu afa akɔ nɛ ale gbegbe. Ray, si nye hamemetsitsi kpɔnuteƒe aɖe, gblɔ be: “Ɣeaɖewoɣi la, míeŋlɔa nu nyui siwo wɔm míele la be. Eya ta ne ame aɖe ɖo ŋku wo dzi na mí la, efaa akɔ na mí ŋutɔ.”

NA GBƆGBƆMENUNANA

Abe Paulo ene la, àte ŋu ana “gbɔgbɔmenunana” nɔvia ne miede ŋugble le Ŋɔŋlɔawo me nya aɖe ŋu, ne mawunyakpukpui ɖeka pɛ ye gɔ̃ hã. (Rom. 1:11) Le kpɔɖeŋu me, nɔvi aɖe si lé blanui ase le  eɖokui me be viɖe aɖeke megale ye ŋu o, abe ale si hakpalaa tsɔ eɖokui sɔ kple ‘lãgbalẽgolo si mia sũu le dzudzɔ nu ene.’ (Ps. 119:83, 176) Ne èɖe nyagbɔgblɔ ma me nɛ kpuie vɔ la, àte ŋu agblɔ nɛ be yeka ɖe edzi be eƒe “ŋku medzo” le Mawu ƒe seawo dzi o.

Nenema kee draxma gaku búbu ƒe kpɔɖeŋua ate ŋu ade dzi gbɔ na nɔvinyɔnu aɖe si ɖe eɖokui ɖe aga le hamea ŋu alo gbɔdzɔ. (Luka 15:8-10) Anɔ eme be gaku búbu la nye klosalogaku gbogbo siwo wotsɔ wɔ klosalo kɔgɛ xɔasi aɖe la dometɔ ɖeka. Kpɔɖeŋu sia me dzodzro kplii akpe ɖe eŋu wòakpɔe be yeƒe wɔƒe le Kristo hamea me le vevie. Eyome àte ahe eƒe susu ayi ale si Yehowa léa be nɛ abe eƒe alẽviwo dometɔ ɖeka ene la dzi.

Edzɔa dzi na míaƒe haxɔsetɔwo be woagblɔ woƒe susu tso nu siwo woxlẽ le Biblia me ŋu. Eya ta wò ɖeka mègaxɔ nyawo katã gblɔ o! Ne miexlẽ kpukpui aɖe si ku ɖe woƒe nɔnɔmea ŋu vɔ la, àte ŋu ahe woƒe susu ayi nya alo nyagbɔgblɔ vevi aɖe dzi ahabia wo be woagblɔ woƒe susu tso eŋu. Le kpɔɖeŋu me, ne miexlẽ 2 Korintotɔwo 4:16 vɔ la, àte ŋu abia be, “Ðe wò ŋutɔ nèkpɔ mɔ vovovo siwo dzi Yehowa le ame si nènye la wɔm yeyee lea?” Mɔnu sia ate ŋu ana ‘miade dzi ƒo na mia nɔewo’ vavã.—Rom. 1:12.

Edzɔa dzi na míaƒe haxɔsetɔwo be woagblɔ woƒe susu tso nu siwo woxlẽ le Biblia me ŋu

Àte ŋu afa akɔ na haxɔsetɔ aɖe ne miedzro Bibliameme aɖe si hã to eƒe nɔnɔmea tɔgbi me la ƒe ŋutinya me. Nɔvi si lé blanui la ate ŋu ase le eɖokui abe Xana alo Epafrodito ene; nu te ɖe ame eve siawo dzi vevie ɣeaɖewoɣi, gake asixɔxɔ kpɔtɔ nɔ wo ŋu le Mawu ŋkume. (1 Sam. 1:9-11, 20; Flp. 2:25-30) Ðe manyo be miadzro Biblia me kpɔɖeŋu nyui aɖewo me ne nɔnɔmeawo ɖe mɔ oa?

YI EDZI NÀÐE ÐETSƆLEME VAVÃ FIA

Yi edzi nàɖe ɖetsɔleme vavã fia nɔviawo le wò sasrãkpɔa megbe. (Dɔw. 15:36) Le sasrãkpɔa ƒe nuwuwu la, àte ŋu awɔ ɖoɖo be ye kplii yewoazɔ le gbeadzi. Ne Bernard, si nye hamemetsitsi kpɔnuteƒe aɖe, do go nɔviŋutsu alo nɔvinyɔnu siwo wòyi ɖasrã kpɔ nyitsɔ laa la, ebiana tso aɖaŋu si wòɖo na nɔvia ŋu ayedzetɔe be: “Gblɔe nam, ewɔ dɔ nyuiea?” Ne èɖe ɖetsɔleme sia tɔgbi fia la, ànya ne nɔvia gahiã na kpekpeɖeŋu bubu.

Ehiã fifia wu ɣeyiɣi ɖe sia ɖe be mía nɔviwo nase le wo ɖokui me be wotsɔ ɖe le eme na yewo, wosea nu gɔme na yewo, eye wolɔ̃ yewo. (1 Tes. 5:11) Eya ta hafi nàwɔ alẽkpɔkplɔ ƒe sasrãkpɔ la, anyo be nàgbɔ dzi ɖi ade ŋugble le nɔnɔme si me nɔviwòa le ŋu do ŋgɔ. Do gbe ɖa tso eŋu. Tia mawunyakpukpui siwo sɔ. Ekema àkpɔ nya siwo sɔ, siwo nàzã atsɔ afa akɔ na ‘luʋɔ si ŋu nu te’!

^ mm. 2 Míetrɔ ŋkɔawo.