Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  February 2013

Dze Agbagba Be Wò Asi Nasu Bubu Dzi

Dze Agbagba Be Wò Asi Nasu Bubu Dzi

“Ame si bɔbɔ eɖokui ɖe anyi la ƒe asi asu bubu dzi.”—LOD. 29:23.

1, 2. (a) Nu kae nya si gɔme woɖe be “bubu” le gbegbɔgblɔ gbãtɔa me la fia? (b) Nyabiase kawo mee míadzro le nyati sia me?

NE ÈSE nya “bubu” la, nu kae vaa susu me na wò? Atsyɔ̃ gã si le Mawu ƒe nuwɔwɔwo ŋu yea? (Ps. 19:2) Bubu si wodea amegbetɔ siwo si kesinɔnu gbogbo aɖe le, ame siwo si nunya le, alo ame siwo kpɔ dzidzedze le agbe me ŋu ye vaa susu me na wòa? Le Ŋɔŋlɔawo me la, nya si gɔme woɖe be “bubu” le gbegbɔgblɔ gbãtɔa me la hea susu yia nane ƒe kpekpeme dzi. Le blema la, wozãa sika alo klosalo tsɔ wɔa gakuwo. Gakua ƒe kpekpemee wotsɔ kpɔa eƒe asixɔxɔ. Susu ma tae nya si gɔme woɖe be “bubu” la tea ŋu fiaa nane si ŋu asixɔxɔ gã aɖe le, nane si dze ani, alo nya kpɔ.

2 Mí amegbetɔwo míelɔ̃a bubudede ame siwo si ŋusẽ kple ɖoƒe le, alo ame siwo xɔ ŋkɔ la ŋu. Gake hafi Mawu ya nade bubu ame aɖe ŋu la, nu ka ŋue wòléa ŋku ɖo? Ŋɔŋlɔawo ƒo nu tso bubu si Mawu dea amegbetɔwo ŋu la ŋu. Le kpɔɖeŋu me, Lododowo 22:4 gblɔ be: “Kesinɔnu, bubu kple agbe enye fetu tso ɖokuibɔbɔ kple Yehowa vɔvɔ̃ me.” Eye nusrɔ̃la Yakobo hã ŋlɔ bena: “Mibɔbɔ mia ɖokui ɖe anyi le Yehowa ŋkume, eye ado mi ɖe dzi.” (Yak. 4:10) Nu kae nye bubu si Yehowa dea amegbetɔwo ŋu? Nu kae ate ŋu axe mɔ na mí be bubu sia nato mía ŋu? Eye aleke míate ŋu akpe ɖe ame bubuwo ŋu be woƒe asi nasu bubu sia dzi?

3-5. Aleke Yehowa dea bubu mía ŋui?

3 Hakpala la ka ɖe edzi be Yehowa alé yeƒe nuɖusi eye wòakplɔ ye ayi bubu vavãtɔ me. (Mixlẽ Psalmo 73:23, 24.) Aleke Yehowa wɔa esia? Yehowa yraa esubɔla ɖokuibɔbɔlawo le mɔ vovovowo nu tsɔ dea bubu wo ŋu. Ekpena ɖe wo ŋu wosea eƒe lɔlɔ̃nu gɔme. (1 Kor. 2:7) Eʋua mɔnukpɔkpɔ gã aɖe ɖi na ame siwo sea eƒe nya la heɖoa toe la be woanɔ ƒomedodo kplikplikpli me kpli ye.—Yak. 4:8.

 4 Yehowa de bubu mía ŋu esi wòtsɔ Kristotɔwo ƒe subɔsubɔdɔ xɔasi aɖe de mía si. (2 Kor. 4:1, 7) Eye subɔsubɔdɔ sia nana bubu nɔa mía ŋu. Yehowa do ŋugbe na ame siwo wɔa woƒe subɔsubɔmɔnukpɔkpɔa ŋu dɔ hena eƒe kafukafu eye be wòaɖe vi na ame bubuwo la be: “Ame si buam la, mabui.” (1 Sam. 2:30) Yehowa dea bubu ame siawo ŋu henaa ŋkɔ nyui sua wo si, eye wònana Mawu subɔla bubuwo hã ƒoa nu nyui le wo ŋu.—Lod. 11:16; 22:1.

5 Ke aleke nuwo anɔ na ame siwo ‘kpɔa mɔ na Yehowa, eye woléa ŋku ɖe eƒe mɔwo ŋu’ la le etsɔme? Wodo ŋugbe na wo be: ‘Yehowa ado wo ɖe dzi, woanyi anyigba la dome, eye ne woatsrɔ̃ ame vɔ̃ɖiwo la, woakpɔ eteƒe.’ (Ps. 37:34) Wole mɔ kpɔm na bubu si ɖeke mesɔ kplii o si nye be woanɔ agbe tegbee.—Ps. 37:29.

“NYEMELƆ̃NA XƆA KAFUKAFU TSO AMEWO GBƆ O”

6, 7. Nu ka tae ame geɖe gbe Yesu dzi xɔxɔse?

6 Nu kae ate ŋu ana bubu si Yehowa di be yeade mía ŋu la nato mía ŋu? Ðekae nye ame siwo mele ƒomedodo nyui me kple Mawu o la ƒe nukpɔsusuwo bubu nu vevii akpa. Bu nu si apostolo Yohanes ŋlɔ tso ame siwo nɔ ŋusẽnɔƒewo le Yesu ƒe ŋkekea me la ŋu kpɔ, egblɔ be: “Dziɖulawo kura gɔ̃ hã dometɔ geɖe xɔ [Yesu] dzi se, gake le Farisitɔwo ta la, womeʋua eme be yewoxɔ edzi se o, bene woaganya wo ɖa le ƒuƒoƒe la me o; elabena wolɔ̃ amewo ƒe kafukafu wu Mawu ƒe kafukafu kura gɔ̃ hã.” (Yoh. 12:42, 43) Ne ɖe dziɖula mawo metsɔa Farisitɔ mawo ƒe nyawo nu vevii akpa o la, anye ne ede wo dzi hafi.

7 Tso Yesu ƒe subɔsubɔdɔa ƒe gɔmedzeɣi ke la, egblɔ nu si tae ame geɖe maxɔ ye dzi ase o. (Mixlẽ Yohanes 5:39-44.) Israel dukɔa nɔ mɔ kpɔm na Mesia la ƒe vava ƒe alafa geɖe. Esi Yesu dze eƒe gbeƒãɖeɖedɔa gɔme la, ame aɖewo anya kpɔe tso Daniel ƒe nyagblɔɖiwo me be ɣeyiɣi si wòle be Kristo la nava la de. Ɣleti aɖewo do ŋgɔ esi Yohanes Amenyrɔɖetsimela nɔ gbeƒã ɖem la, ame geɖe nɔ gbɔgblɔm be: “Alo eyae nye Kristo laa?” (Luka 3:15) Fifia Mesia si wonɔ mɔ kpɔm na ɣeyiɣi didi lae nye ema le wo dome le nu fiam. Gake ame siwo nya Sea nyuie la mexɔ edzi se o. Yesu gblɔ woƒe kuxia na wo esi wòbia wo be: “Aleke miawɔ axɔe ase, esi miele kafukafu xɔm tso mia nɔewo gbɔ, eye miele kafukafu si tso Mawu ɖeka kolia gbɔ ya dim o?”

8, 9. Zã kekeli ƒe kpɔɖeŋua nàtsɔ aɖe ale si bubu si tso amegbetɔwo gbɔ la ate ŋu axe mɔ na bubu si tso Mawu gbɔ la me.

8 Míate ŋu ase ale si bubu si amegbetɔwo dea mía ŋu nate ŋu awɔe be bubu si tso Mawu gbɔ nato mía ŋu la gɔme nyuie ne míetsɔ bubu sɔ kple kekeli. Míaƒe dziƒonutoa me yɔ fũu kple ɣletiviwo. Èɖo ŋku zi mamlɛtɔ si nèfɔ mo dzi le zã si me kɔ nyuie me hekpɔ ɣletivi gbogbo aɖewo la dzia? ‘Ɣletiviwo ƒe ŋutikɔkɔe’ wɔa nuku hewɔa dɔ ɖe ame dzi ŋutɔ. (1 Kor. 15:40, 41) Gake ne dugã si me akaɖiwo sɔ gbɔ le mee nèle la, alekee ɣletiviawo dzenae? Akaɖiawo ƒe keklẽ wɔnɛ be míetea ŋu kpɔa ɣletiviawo ƒe keklẽ nyuie o. Ðe wònye be akaɖi siwo le mɔdodowo dzi, bɔlƒoƒewo kple aƒewo me la nu sẽ wu alo nya kpɔ wu ɣletiviawo ƒe keklẽ taea? Kura o! Esi dugã me kaɖiwo tsɔ mía gbɔ tae míetea ŋu kpɔa kekeli si tso Yehowa ƒe nuwɔwɔwo gbɔ nyuie o ɖo. Ne míeyi kɔƒewo me, afi si akaɖiwo mesɔ gbɔ le o, ko hafi míate ŋu akpɔ ɣletiviawo ƒe ŋutikɔkɔe nyuie wu.

9 Nenema kee ne míena bubu alo ŋutikɔkɔe si mesɔ o le vevie na mí wu la, ate ŋu axe mɔ na mí be míakpɔ ŋudzedze ɖe bubu si tso Yehowa gbɔ la ŋu boo o. Ame geɖe gbe Fiaɖuƒegbedeasia sese le esi wole vɔvɔ̃m na nu si woƒe ame nyanyɛwo  alo ƒometɔwo abu tso wo ŋu ta. Gake ɖe kafukafu didi tso amegbetɔwo gbɔ ate ŋu akpɔ ŋusẽ ɖe Mawu subɔla ɖeadzɔgbewo gɔ̃ hã dzia? Tsɔe be wogblɔ na ɖekakpui aɖe be wòaɖe gbeƒã le nuto si me amewo nyae nyuie le la me evɔ nutoa me tɔwo menya be Yehowa Ðasefoe wònye o. Ðe esia wɔwɔ asesẽ nɛa? Alo ne woɖu fewu le nɔvi aɖe ŋu le teokrasi taɖodzinu si minyam wòle la ta ya ɖe? Ðe wòaɖe mɔ ame siwo ƒe ŋkuwo dzi do viviti le gbɔgbɔ me la nakpɔ ŋusẽ ɖe eƒe tiatiawɔwɔwo dzia? Alo ɖewohĩ Kristotɔ aɖe wɔ nu vɔ̃ gã aɖe. Ðe wòaɣla nu gbegblẽ si wòwɔ la le vɔvɔ̃ be mɔnukpɔkpɔ aɖewo age le ye si le hamea me alo be anye nuxaxa na yeƒe ame veviwo ta? Ne nu si le vevie na nu vɔ̃ wɔlaa ye nye be yeadzra ye kple Yehowa dome ƒomedodoa ɖo la, ekema ‘ayɔ hamemetsitsiwo’ abia woƒe kpekpeɖeŋu.—Mixlẽ Yakobo 5:14-16.

10. (a) Aleke dzitsitsi fũu ɖe ale si amewo abu míi ŋu ate ŋu akpɔ ŋusẽ ɖe míaƒe nuŋububu dzi? (b) Ne míebɔbɔa mía ɖokuiwo la, nu ka dzie míate ŋu aka ɖo?

10 Tsɔe be èle ŋgɔyiyi wɔm be yeatsi le gbɔgbɔ me, gake haxɔsetɔ aɖe ɖo aɖaŋu aɖe na wò. Míate ŋu alɔ̃ axɔ eƒe aɖaŋuɖoɖoa awɔ edzi wòaɖe vi na mí loo alo agbe exɔxɔ le dada ta, alo le esi wòwɔ na mí be esia aklo bubu le mía ŋu, alo le esi míedi be míaʋli mía ɖokui ta la ta. Alo na míatsɔe be mia kple haxɔsetɔ aɖe miele dɔ wɔm ɖekae. Ðe nàɖe mɔ ame si axɔ wò susu nyuiawo kple wò dɔ sesẽ wɔwɔ ŋuti kafukafua ŋu bubu nakpɔ ŋusẽ ɖe ale si nàkpe asi ɖe dɔa ŋui la dzia? Ne èkpɔ ɖokuiwò le nɔnɔme siawo tɔgbi me la, ka ɖe edzi be “ame si bɔbɔ eɖokui ɖe anyi la ƒe asi asu bubu dzi.”—Lod. 29:23.

11. Aleke wòle be míase le mía ɖokui me ne wokafu mí, eye nu ka tae?

11 Ele be dzikpɔlawo kple ame siwo le “dzikpɔladɔ minyam” hã nakpɔ nyuie be woagadi kafukafu tso amewo gbɔ o. (1 Tim. 3:1; 1 Tes. 2:6) Ne wokafu nɔviŋutsu aɖe ɖe eƒe dɔ nyui wɔwɔ ta la, aleke wòle be wòawɔ nui? Anɔ eme be matɔ asi akɔ be ye tututue nye ema, alo ali ŋkuɖodzikpe na eɖokui abe ale si Fia Saul wɔe ene o. (1 Sam. 15:12) Gake ɖe wòalɔ̃ ɖe edzi enumake be Yehowa ƒe amenuvevee na yewɔ dɔ nyui ma, eye be Mawu ƒe kpekpeɖeŋu kple eƒe yayra koe ana yeagate ŋu akpɔ dzidzedze le etsɔmea? (1 Pet. 4:11) Ale si míewɔa nui le dzi me ke ne wokafu mí lae ɖea bubu si tɔgbi dim míele la fiana.—Lod. 27:21.

“MIA FOFO LA ƑE NUDZODZROWO MIEDINA BE MIAWƆ”

12. Nu kae na Yudatɔ aɖewo gbe Yesu ƒe nyawo sese?

12 Nu bubu si ate ŋu axe mɔ na mí be míaƒe asi masu bubu si Mawu dea mía ŋu dzi o lae nye míaƒe dzodzrowo. Dzodzro vɔ̃wo ate ŋu ana amewo nagbe nyateƒea sese kura. (Mixlẽ Yohanes 8:43-47.) Yesu gblɔ na Yudatɔ aɖewo be womedi be yewoase yeƒe nyawo o elabena ‘wo fofo Abosam ƒe nudzodzrowoe wodina be yewoawɔ.’

13, 14. (a) Nu kae numekulawo de dzesii le ale si susua wɔa nu ɖe amegbetɔwo ƒe gbeɖiɖiwo ŋu la ŋuti? (b) Nu kae akpe ɖe mía ŋu míatia ame si ƒe gbe míase?

13 Míaƒe didiwo kpɔa ŋusẽ ɖe nya siwo míedina be míase dzi. (2 Pet. 3:5) Yehowa de ŋutete wɔnuku aɖe mía me be míate ŋu ado toku toɣliɖeɖe aɖewo. Tɔ vie nàɖo to nyuie, ne nàkpɔe ɖa be gbeɖiɖi vovovo kawoe nàte ŋu ase fifi laa hã. Anɔ eme be wò susu menɔ gbeɖiɖi siwo sem nèle fifia la dometɔ geɖe ŋu do ŋgɔ o. Togbɔ be ŋutete le susua ŋu be wòase gbeɖiɖi vovovo mawo katã le ɣeyiɣi ɖeka me hã la, enɔ kpekpem ɖe ŋuwò be nàtsɔ wò susu aɖo nu ɖeka ko ŋu. Gake numekulawo de dzesii be, ne amegbetɔwo ƒe gbeɖiɖiwo sem nèle la, esesẽna na susua be wòanɔ ɖeka ko ŋu. Esia fia be ne èle ame eve  ƒe nuƒo sem le ɣeyiɣi ɖeka ma ke me la, wò ŋutɔe atia esi ŋu nàtrɔ susua ɖo. Tiatia si nàwɔ la nɔa te ɖe esi nèdi be yease la dzi. Yudatɔ siwo di be yewoawɔ yewo fofo Abosam ƒe lɔlɔ̃nu la, tiae be yewomaɖo to Yesu o.

14 Míexɔa nyawo tso ‘nunya ƒe aƒe’ kple ‘bometsitsi ƒe aƒe’ me. (Lod. 9:1-5, 13-17) Nunya kple bometsitsi siaa le ɣli dom ɖo ɖe mí, le kpɔɖeŋunyagbɔgblɔ nu, eye esia bia be míawɔ tiatia. Wo dometɔ ka ƒe gbee míase? Ŋuɖoɖoa nɔ te ɖe ame si ƒe lɔlɔ̃nu míedi be míawɔ la dzi. Yesu ƒe alẽwo sea eƒe gbe eye wodzea eyome. (Yoh. 10:16, 27) Wole “nyateƒea ƒe akpa dzi.” (Yoh. 18:37) “Womedzea si ame tutɔwo ƒe gbe o.” (Yoh. 10:5) Ðokuibɔbɔla siawo ƒe asi sua bubu dzi.—Lod. 3:13, 16; 8:1, 18.

“NU SIAWO NYE BUBU NA MI”

15. Gɔmesese ka nue Paulo ƒe xaxa nye “nye bubu” na ame bubuwo le?

15 Míaƒe dzidodo le Yehowa ƒe lɔlɔ̃nu wɔwɔ me akpe ɖe ame bubuwo ŋu be woawo hã ƒe asi nàsu bubu dzi. Paulo ŋlɔ na hame si nɔ Efeso la be: “Mele biabiam tso mia si be, miagana ta le xaxa siawo, siwo me tom mele le mia ta la me o, elabena nu siawo nye bubu na mi.” (Ef. 3:13) Gɔmesese ka nue Paulo ƒe xaxa nye “nye bubu” na Efesotɔwo le? Esi Paulo ɖoe kplikpaa yi edzi subɔ Efesotɔwo togbɔ be enɔ xaxawo me tom hã la, ena wokpɔe be mɔnukpɔkpɔ gã si su yewo si be yewonye Kristotɔwo la nye esi ŋu asixɔxɔ gãtɔ kekeake le. Ne ɖe Paulo na ta le xaxawo me la, ɖe esia mana Efesotɔawo nasusui be asixɔxɔ aɖeke mele yewo kple Yehowa dome ƒomedodoa, yewoƒe subɔsubɔdɔa kple yewoƒe mɔkpɔkpɔa ŋu oa? Paulo ƒe dzidodo do Kristotɔnyenye ɖe dzi eye wòɖee fia be ehiã be ame natsɔ nu sia nu asa vɔe ɖe Kristo ƒe nusrɔ̃lanyenye ta.

16. Xaxa kawo mee Paulo to le Listra?

16 De ŋugble tso ŋusẽ si Paulo ƒe veviedodo kple dzidodo kpɔ ɖe nɔviawo dzi la ŋu kpɔ. Dɔwɔwɔwo 14:19, 20 gblɔ be: “Yudatɔwo tso Antioxia kple Ikonio va, eye woƒoe ɖe amehaawo nu, eye woƒu kpe Paulo, eye wohee do goe le [Listra] dua me, esi wosusu be eku ta. Ke hã, esi nusrɔ̃lawo va ƒo xlãe la, etso heva dua me. Eye esi ŋu ke la, woa kple Barnaba wodzo yi Derbe.” Bu eŋu kpɔ be ame si wosusu be eku lae nye ema dze kilometa 100 ƒe mɔzɔzɔ gɔme le ŋkeke si kplɔe ɖo dzi, evɔ wònye afɔe wòle be wòato!

17, 18. (a) Gɔmesese ka nue Timoteo dze fukpekpe siwo me Paulo to le Listra la yome pɛpɛpɛ le? (b) Ŋusẽ kae Paulo ƒe dzidodoa kpɔ ɖe Timoteo dzi?

17 Ðe Timoteo hã nɔ ‘nusrɔ̃la’ siwo na kpekpeɖeŋu Paulo la domea? Nuŋlɔɖi  si le Dɔwɔwɔwo ƒe agbalẽa me megblɔe tẽe o, gake anɔ eme nenema. Bu nya si Paulo ŋlɔ ɖe eƒe agbalẽ evelia me na Timoteo ŋu kpɔ: “Wò la, èdze nye nufiafia, nye agbenɔnɔ, . . . nu siwo ƒomevi dzɔ ɖe dzinye le Antioxia [wonya Paulo do go le dua me], le Ikonio [woɖo nugbe vɔ̃ɖi aɖe be yewoaƒu kpee], le Listra [woƒu kpee], yometiti siwo ƒomevi me meto, la yome pɛpɛpɛ; ke hã, Aƒetɔ la ɖem tso wo katã me.”—2 Tim. 3:10, 11; Dɔw. 13:50; 14:5, 19.

18 Timoteo ‘dze’ nudzɔdzɔ mawo “yome pɛpɛpɛ,” si fia be enya Paulo ƒe dzidodo ƒe ŋutinya nyuie. Esia kpɔ ŋusẽ gã aɖe ɖe Timoteo dzi. Esi Paulo ɖi tsa yi Listra la, Timoteo zu Kristotɔ kpɔɖeŋu nyui ɖola si ŋu “nɔvi siwo le Listra kple Ikonio la ƒo nu nyui” le. (Dɔw. 16:1, 2) Le ɣeyiɣi aɖewo megbe la, Timoteo dze axɔ agbanɔamedzi gãwo.—Flp. 2:19, 20; 1 Tim. 1:3.

19. Ŋusẽ kae míaƒe dzidodo ate ŋu akpɔ ɖe nɔvi bubuwo dzi?

19 Míaƒe dzidodo le Mawu ƒe lɔlɔ̃nu wɔwɔ me ate ŋu akpɔ ŋusẽ ma tɔgbi ke ɖe mía nɔviwo dzi—vevietɔ ɖe sɔhɛ siwo dometɔ geɖe atsi ava zu Mawu subɔla siwo ŋu asixɔxɔ gã aɖe le la dzi. Menye ɖeko sɔhɛwo srɔ̃a nɔnɔme nyuiwo kple nuƒoƒo ƒe ŋutete tso mía gbɔ ne míeyi gbeadzi kpli wo o, ke eɖea vi geɖe na wo ne wolé ŋku ɖe ale si míedoa dzi le nɔnɔme sesẽwo me la hã ŋu. Paulo ‘yi edzi do dzi le nu sia nu me’ ale be ame siwo katã yi edzi wɔ nuteƒe la ‘nakpɔ ɖeɖe hekpe ɖe ŋutikɔkɔe mavɔ ŋuti.’—2 Tim. 2:10.

Sɔhɛwo srɔ̃a nu tso Kristotɔ tsitsiwo ƒe dzidodo me

20. Nu ka tae wòle be míayi edzi adi bubu si tso Mawu gbɔ la?

20 Eya ta ɖe mele be míayi edzi anɔ “kafukafu si tso Mawu ɖeka kolia gbɔ” la dim oa? (Yoh. 5:44; 7:18) Ele be míawɔ esia godoo! (Mixlẽ Romatɔwo 2:6, 7.) Yehowa naa ‘agbe mavɔ ame siwo le bubu dim.’ Gawu la, “dzidodo le dɔ nyui wɔwɔ me” ʋãa ame bubuwo be woanɔ te sesĩe hena woƒe agbe mavɔ kpɔkpɔ. Eya ta mègaɖe mɔ naneke nana bubu si tso Mawu gbɔ la nato ŋuwò ayi o.