Dzo kpo yi emenuwo dzi

Dzo kpo yi emenuawo dzi

Lé Dzi Ðe Ƒo—Yehowa Li Kpli Wò!

Lé Dzi Ðe Ƒo—Yehowa Li Kpli Wò!

“Lé dzi ɖe ƒo, eye nàsẽ ŋu. . . . Yehowa, wò Mawu la, li kpli wò.”—YOS. 1:9.

1, 2. (a) Nɔnɔme nyui kawoe ate ŋu akpe ɖe mía ŋu míado dzi le dodokpɔwo me dzidzedzetɔe? (b) Aleke nàɖe xɔse gɔmee? Wɔ eƒe kpɔɖeŋu.

YEHOWA subɔsubɔ naa míekpɔa dzidzɔ. Ke hã mí Mawu subɔlawo hã míekpea fu siwo amegbetɔwo katã kpena, eye ate ŋu adzɔ be “[míakpe] fu le dzɔdzɔenyenye ta” hã. (1 Pet. 3:14; 5:8, 9; 1 Kor. 10:13) Be míado dzi le dodokpɔ siawo me dzidzedzetɔe la, míehiã xɔse kple dzideƒo.

2 Nu kae nye xɔse? Apostolo Paulo ŋlɔ bena: ‘Xɔse nye dziɖoɖo ɖe nu siwo wole mɔ kpɔm na la ŋu kakaɖedzitɔe, kpeɖodzi si dze kɔtɛ be nu siwo kpɔm womele o la li ŋutɔŋutɔ.’ (Heb. 11:1) Biblia bubu aɖe ɖe eme be: “Xɔse nye nu siwo míele mɔ kpɔm na la ƒe kpeɖodzigbalẽ. Xɔse nye kaka ɖe nu siwo míate ŋu akpɔ kple ŋku o la dzi.” (The Simple English Bible) Ne wotsɔ nunɔamesi aɖe na mí hewɔ agbalẽ ɖe edzi na mí la, míekana ɖe edzi be nua zu mía tɔ. Esi míexɔe se be Mawu tea ŋu wɔa eƒe ŋugbedodowo dzi ɣesiaɣi ta la, ɖeko wòle abe ɖe wòna kpeɖodzigbalẽ xɔasi aɖe mí ene. Míaƒe xɔse na míekana ɖe edzi bliboe be míava kpɔ Mawu ƒe ŋugbedodowo me vava teƒe, eye be nu siwo katã wògblɔ na mí le eƒe Nyaa me la nye nyateƒe, “nu siwo míate ŋu akpɔ kple ŋku o” gɔ̃ hã.

3, 4. (a) Nu kae dzinɔameƒo nye? (b) Mɔ ɖeka ka dzie míate ŋu ato ado ŋusẽ míaƒe xɔse eye dzi nanɔ mía ƒo geɖe wu?

3 Dzinɔameƒo nye nuƒoƒo alo nuwɔwɔ vɔvɔ̃manɔmee ne kuxi sesẽ aɖe alo afɔku aɖe dze ŋgɔ mí. Ne dzi le mía ƒo la, ŋusẽ nɔa mía ŋu, míewɔa kalẽ, eye míelɔ̃na be míakpe fu gɔ̃ hã ɖe míaƒe dzixɔse ta.—Marko 6:49, 50; 2 Tim. 1:7.

4 Mí katã míedina be xɔse nanɔ mía si eye dzi nanɔ mía ƒo. Gake tsɔe be míawo ŋutɔwo míede dzesii be míehiã xɔse kple dzideƒo geɖe wu. Mawu subɔla akpe geɖe siwo ɖe xɔse kple dzinɔameƒo fia la ƒe kpɔɖeŋuwo le Biblia me. Eya ta mɔ ɖeka aɖe si dzi míate ŋu  ato ado ŋusẽ míaƒe xɔse eye dzi nanɔ mía ƒo geɖe wue nye be míade ŋugble le kpɔɖeŋu siawo dometɔ aɖewo ŋu.

YEHOWA NƆ KPLE YOSUA

5. Nu kawoe Yosua hiã hafi wòate ŋu akplɔ Israel viwo dzidzedzetɔe?

5 Mina míade ŋugble le nane si dzɔ ƒe 3,500 ye nye esi va yi la ŋu kpɔ. Ɣemaɣi la, ƒe 40 aɖewo va yi tso esime Yehowa tsɔ alɔ sesẽ ɖe Israel vi miliɔn geɖe tso kluvinyenye me le Egipte. Nyagblɔɖila Mose ye nɔ ŋgɔ na wo. Exɔ ƒe 120 ɣemaɣi, ekpɔ Ŋugbedodonyigbaa le adzɔge ɖaa eye emegbe eku ɖe Nebo To la tame. Yosua, ame si xɔ ɖe eteƒe la, nye ŋutsu si ‘nunyagbɔgbɔ yɔ fũu.’ (5 Mose 34:1-9) Azɔ Israel viwo le dzadzraɖoɖi be yewoaxɔ Kanaan-nyigba la. Hafi Yosua nate ŋu akplɔ wo dzidzedzetɔe la, ahiã be nunya si tso Mawu gbɔ nanɔ esi. Ele be wòaxɔ Yehowa dzi se, wòalé dzi ɖe ƒo eye wòasẽ ŋu.—5 Mose 31:22, 23.

6. (a) Le Yosua 23:6 ƒe nya nu la, nu ka tae míehiã dzideƒo ɖo? (b) Nu kae míesrɔ̃ tso Dɔwɔwɔwo 4:18-20 kple Dɔwɔwɔwo 5:29 me nyawo me?

6 Anɔ eme godoo be nunya, dzideƒo kple xɔse si Yosua ɖe fia le ƒe gbogbo siwo wotsɔ wɔ aʋa kple Kanaantɔwo hafi xɔ woƒe anyigba la me do ŋusẽ Israel viwo. Menye ɖeko wòhiã be dzi nanɔ wo ƒo ɖe aʋawɔwɔ ŋu o, ke ehiã hã be dzi nanɔ wo ƒo be woaɖo to Mawu ƒe gbe. Do ŋgɔ teti na Yosua ƒe ku la, egblɔ na wo be: “Milé dzi ɖe ƒo vevie, ne mialé nu siwo katã woŋlɔ ɖe Mose ƒe segbalẽa me la me ɖe asi, eye miawɔ wo dzi, eye migadze ɖe ɖusi alo mia me o.” (Yos. 23:6) Míawo hã míehiã dzideƒo be míaɖo to Yehowa ƒe gbe ɣeawokatãɣi, vevietɔ ne amegbetɔ tsɛwo bia tso mía si be míawɔ nu siwo tsi tsitre ɖe Mawu ƒe lɔlɔ̃nu ŋu. (Mixlẽ Dɔwɔwɔwo 4:18-20; 5:29.) Ne míedo gbe ɖa na Yehowa eye míeɖo dzi ɖe eŋu la, akpe ɖe mía ŋu be dzideƒo si míehiã la nasu mía si.

ALE SI NÀWƆ BE WÒ MƆWO NADZE EDZI NA WÒ

7. Hafi Yosua nate ŋu awɔ nu dzinɔameƒotɔe eye wòakpɔ dzidzedze la, nu kae wòhiã be wòawɔ?

7 Hafi dzideƒo si míehiã be míawɔ Mawu ƒe lɔlɔ̃nu nasu mía si la, ele be míasrɔ̃ eƒe Nya la eye míawɔ ɖe emenyawo dzi. Nya siae wogblɔ na Yosua esime wòva xɔ ɖe Mose teƒe be: “Lé dzi ɖe ƒo, eye nàsẽ ŋu vevie ko; lé se, siwo katã nye dɔla Mose de na wò la me ɖe asi, eye nàwɔ wo dzi. . . . Mègaɖe nu le segbalẽ sia ŋu o, eye nàbu eŋu zã kple keli, ne nàlé nu siwo katã woŋlɔ ɖe eme la me ɖe asi, eye nàwɔ wo dzi; elabena eya ko hafi [wò mɔwo adze edzi na wò, eye àwɔ nu le nunya me, NW].” (Yos. 1:7, 8) Yosua wɔ ɖe aɖaŋuɖoɖo sia dzi, eye ‘eƒe mɔwo dze edzi nɛ.’ Ne míawo hã míewɔ ɖe aɖaŋuɖoɖo ma dzi la, dzi anɔ mía ƒo geɖe wu eye míakpɔ dzidzedze le Mawu ƒe subɔsubɔdɔa me.

Míaƒe ƒe 2013 ƒe mawunyakpukpuia ye nye: “Lé dzi ɖe ƒo, eye nàsẽ ŋu. . . . Yehowa, wò Mawu la, li kpli wò.”—Yosua 1:9

8. Afi kae woɖe ƒe 2013 ƒea ƒe mawunyakpukpuia tso, eye aleke nèkpɔe be nya mawo akpe ɖe ŋuwòe?

8 Esi Yosua see Yehowa gagblɔ nɛ be, ‘Lé dzi ɖe ƒo, eye nàsẽ ŋu, ŋɔ megadzi wò o, eye dzidzi megaƒo wò oa. Elabena Yehowa, wò Mawu la, li kpli wò le afi sia afi, si nàyi’ la, esia anya de dzi ƒo nɛ ŋutɔ. (Yos. 1:9) Yehowa li kple míawo hã. Eya ta  dodokpɔ ka kee ɖava mía dzi o, mele be ‘ŋɔ nadzi mí alo dzidzi naƒo mí o.’ Nya si le vevie na mí wue nye esi wògblɔ be: “Lé dzi ɖe ƒo, eye nàsẽ ŋu. . . . Yehowa, wò Mawu la, li kpli wò.” Yosua 1:9 ƒe nya siae wotia be wòanye ƒe 2013 ƒea ƒe mawunyakpukpuia. Nya siawo kple ame bubu siwo ɖe xɔse kple dzideƒo fia ƒe nyawo kpakple woƒe kpɔɖeŋuwo ado ŋusẽ mí le ɣleti siwo gbɔna me godoo.

DZI NƆ WO ƑO WOTIAE BE YEWOAWƆ MAWU ƑE LƆLƆ̃NU

9. Mɔ kawo nue Raxab ɖe xɔse fia hewɔ nu dzinɔameƒotɔe le?

9 Esime Yosua dɔ ŋkutsala eve ɖe Kanaan-nyigba dzi la, Raxab, gbolo la, tsɔ wo ɣla eye wòna futɔwo to mɔ bubu dzo. Esi wòxɔ Mawu dzi eye wòwɔ nu dzinɔameƒotɔe la, wokpɔ woa kple eƒe aƒemetɔwo ta esime Israel viwo tsrɔ̃ Yerixo dua. (Heb. 11:30, 31; Yak. 2:25) Le nyateƒe me la, Raxab dzudzɔ gbolowɔwɔ ale be yeadze Yehowa ŋu. Ame aɖewo siwo va zu Kristotɔwo la ɖe xɔse fia hewɔ nu dzinɔameƒotɔe nenema ke. Woʋli vevie wɔ tɔtrɔ mawo tɔgbi le woƒe agbenɔnɔ me be Mawu nakpɔ ŋudzedze ɖe yewo ŋu.

10. Nɔnɔme ka mee Rut tiae le be yeasubɔ Mawu vavã la le, eye aleke Yehowa yrae?

10 Le Yosua ƒe ku megbe la, Rut, si nye Moabtɔ la, lé dzi ɖe ƒo hetiae be yeasubɔ Mawu vavã la. Esi srɔ̃a si dɔ alɔ̃ le ku me la nye Israel ŋutsu ta la, anɔ eme godoo be ese nya aɖewo tso Yehowa ŋu kpɔ. Lɔ̃xoa, Naomi, yi ɖanɔ Moab-nyigba dzi gake azɔ la, eʋu tso afi ma trɔ yina Israel du si nye Betlexem me nɔ ge. Esi wonɔ mɔa dzi la, Naomi gblɔ na Rut be wòatrɔ ayi wo de, gake Moab-nyɔnu la ɖo eŋu nɛ be: “Mègaƒoe ɖe nunye be, magblẽ wò ɖi agbugbɔ le yowòme o! . . . Wò dukɔ anye nye dukɔ, eye wò Mawu anye nye Mawu.” (Rut 1:16) Nu ma tututue Rut wɔ. Ɣeyiɣi aɖe megbe la, ŋutsu aɖe si nye Naomi ƒe ƒometɔ, si ŋkɔe nye Boas, la ɖe Rut, eye wòdzi ŋutsuvi, eye wòva zu David kple Yesu mama. Ɛ̃, eme kɔ ƒãa be Yehowa yraa ame siwo xɔa eyama dzi se hewɔa nu dzinɔameƒotɔe la.—Rut 2:12; 4:17-22; Mat. 1:1-6.

AME GEÐE TSƆ WOƑE AGBE DE AFƆKU ME!

11. Aleke Yehoyada kple Yoseba wowɔ nu dzideƒotɔe, eye nu kae do tso esia me?

11 Ne míekpɔe be Mawu nɔ anyi kple ame siwo tsɔ eƒe lɔlɔ̃nu wɔwɔ kple woƒe haxɔsetɔwo ƒe nyonyo ɖo nɔƒe gbãtɔ la, esia doa ŋusẽ míaƒe xɔse eye wònaa dzi gaɖoa mía ƒo geɖe wu. Le kpɔɖeŋu me, de ŋugble le Nunɔlagã Yehoyada kple srɔ̃a nyɔnu Yoseba ŋu kpɔ. Le Fia Axazya ƒe ku megbe la, dadaa, Atalya, wu fiavi siwo susɔ la katã negbe Yoas ko, eye wòxɔ fiazikpuia sesẽe. Yehoyada kple Yoseba tsɔ woƒe agbe de afɔku me hekpɔ Axazya viŋutsuvi, Yoas, ta, eye wotsɔe ɣla ƒe ade sɔŋ. Le ƒe adrelia me la, Yehoyada na woɖo Yoas fiae hena wowu Atalya. (2 Fia. 11:1-16) Emegbe la, Yehoyada nɔ megbe na Fia Yoas le gbedoxɔa ɖɔɖɔɖo ŋuti dɔwo wɔwɔ me. Esi Yehoyada xɔ ƒe 130 eye wòku la, woɖii ɖe fiawo ɖiƒe, “elabena ewɔ nyui na Israel kple Mawu kpakple Eƒe aƒe la.” (2 Kron. 24:15, 16) Gakpe ɖe eŋu la, Yehoyada kple srɔ̃a ƒe nuwɔwɔ dzideƒotɔe alea kpɔ David ƒe fiaƒome si me Mesia la ava dzɔ tso mlɔeba la ta.

12. Afɔ kae Ebed-Melex ɖe dzideƒotɔe?

12 Ebed-Melex, si nye Fia Zedekiya ƒe aƒedzikpɔla la, tsɔ eƒe agbe de afɔku me ɖe Yeremiya ta. Fia la tsɔ Yeremiya de asi na Yuda amegã siwo tso enu alakpatɔe be etsi tsitre ɖe fia ŋu la, eye wotsɔe de vudo aɖe si me ba le la me, be wòaku ɖe afi ma. (Yer. 38:4-6) Togbɔ be Ebed-Melex nyae be yeƒe agbe ate ŋu aɖo afɔku me le esi amegãwo lé fu Yeremiya ta hã la, eyi ɖaƒo koko na Zedekiya be wòakpe ɖe nyagblɔɖila la ŋu. Zedekiya lɔ̃ ɖe edzi na Ebed-Melex, eye wòtsɔ ŋutsu 30 kpe  ɖe eŋu be woayi aɖaɖe Yeremiya le vudoa me. Mawu to nyagblɔɖila la dzi ka ɖe edzi na Ebed-Melex be, ne Babilontɔwo va dze Yerusalem dzi la, womawui o. (Yer. 39:15-18) Ɛ̃, Mawu ɖoa eteƒe na ame siwo léa dzi ɖe ƒo heɖoa ŋu ɖe eŋu la.

13. Aleke Hebrivi etɔ̃awo wɔ nu dzideƒotɔe, eye nu kae míate ŋu asrɔ̃ tso woƒe ŋutinya me?

13 Le ƒe 600 lia D.M.Ŋ. me lɔƒo la, Mawu ɖo Hebrivi etɔ̃ siwo nye esubɔlawo la ƒe xɔse kple dzideƒo teƒe na wo. Fia Nebukadnezar ƒo amegã siwo le Babilon la nu ƒu hebia tso wo si be woabɔbɔ ade ta agu na sikalegba kɔkɔ si yeli la. Ame sia ame si mawɔ nu sia o la, woatsɔe ade kpodzo me wòaku. Hebrivi etɔ̃awo gblɔ na Nebukadnezar bubutɔe be: “Mía Mawu, si subɔm míele la, ate ŋu aɖe mí tso kpodzo bibi la me, eye wòate ŋu aɖe mí tso wò fia si me. Ke ne menɔ alea o hã la, fia, nyae be, míele wò mawuwo subɔ ge akpɔ gbeɖe o, eye míado gbe ɖa na sikalegba, si nèli anyi la o.” (Dan. 3:16-18) Woŋlɔ ale si Mawu ɖe Hebrivi etɔ̃awo nukutɔe la ŋuti nya wɔdɔɖeamedzi la ɖe Daniel 3:19-30. Ðewohĩ womele míawo ya de ge kpodzo me be míaku o, ke hã míetoa nuteƒewɔwɔ ƒe dodokpɔ sesẽwo me ɣeaɖewoɣi, eye míate ŋu aka ɖe edzi be Mawu ayra mí ne míexɔ eyama dzi se hewɔ nu dzideƒotɔe.

14. Le Daniel ta 6 ƒe nya nu la, aleke Daniel wɔ nu dzideƒotɔe, eye nu kae do tso eme?

14 Daniel xɔ Mawu dzi se eye wòwɔ nu dzideƒotɔe esime futɔwo ƒo nya ɖe Fia Dario nu wòde se be “ame sia ame, si abia nu mawu alo amegbetɔ bubu aɖe le ŋkeke blaetɔ̃ me, eye menye tso wò fia si ko o la, woatsɔe aƒu gbe ɖe dzatawo ƒe do me.” Esi Daniel nya see be fia la de asi segbalẽa te ko la, “eyi eƒe me le dziƒoxɔ, si ƒe fesrewo ʋu ɖo ta Yerusalem la me, eye wòdze klo do gbe ɖa na eƒe Mawu hekafui gbe ɖeka zi etɔ̃, abe ale si wòwɔna tsã ene.” (Dan. 6:7-11) Wotsɔ Daniel dzinɔameƒotɔ la ƒu gbe ɖe dzatawo ƒe do me, gake Yehowa ɖee.—Dan. 6:17-24.

15. (a) Xɔse kple dzideƒo ƒe kpɔɖeŋu kae Akwila kple Priskila ɖo ɖi na mí? (b) Yesu ƒe nya si le Yohanes 13:34 la gɔme ɖe, eye aleke Kristotɔ geɖewo ɖe lɔlɔ̃ ma tɔgbi fiae?

15 Biblia gblɔ be Akwila kple Priskila ‘tsɔ woawo ŋutɔwo ƒe kɔwo ɖo anyi ɖe Paulo ƒe luʋɔ ta,’ gake megblɔ ale si esia dzɔe o. (Dɔw. 18:2; Rom. 16:3, 4) Wowɔ nu dzideƒotɔe hewɔ ɖe Yesu ƒe sedede sia dzi be: “Se yeye nam mele mi, be mialɔ̃ mia nɔewo; abe ale si melɔ̃ mi ene la, miawo hã milɔ̃ mia nɔewo.” (Yoh. 13:34) Mose ƒe Sea bia be ame nalɔ̃ ehavi abe eya ŋutɔ ɖokui ene. (3 Mose 19:18) Gake Yesu ƒe sea nye se “yeye” le esi wòbia be míalɔ̃ mía haviwo ale gbegbe be míalɔ̃ faa atsɔ míaƒe agbe aɖo anyi ɖe wo ta abe ale si  eya ŋutɔ wɔe ene ta. Kristotɔ geɖewo ɖe lɔlɔ̃ fia wo nɔewo esi ‘wotsɔ woƒe kɔwo ɖo anyi’ dzinɔameƒotɔe be yewoakpɔ yewoƒe haxɔsetɔwo ta be futɔwo ƒe asi nagasu wo dzi ne woawɔ fu wo loo alo awu wo o.—Mixlẽ 1 Yohanes 3:16.

Kristotɔ gbãtɔwo gbe be yewomana ta o

16, 17. Xɔse ƒe dodokpɔ ka mee Kristo yomedzela gbãtɔwo to, eye aleke esia sɔ kple nu si me Kristotɔ aɖewo to le míaƒe ŋkekea me?

16 Kristotɔ gbãtɔwo de ta agu na Yehowa ɖeɖe ko dzideƒotɔe, abe ale si Yesu wɔe ene. (Mat. 4:8-10) Wogbe be yewomado dzudzɔ ʋeʋẽe atsɔ ade bubu Roma fiagã la ŋu o. (Kpɔ nɔnɔmetataa.) Daniel P. Mannix ŋlɔ bena: “Kristotɔ ʋɛ aɖewo ŋutɔ koe na ta, togbɔ be wodoa dzo ɖe vɔsamlekpui si le fefewɔƒea dzi ɣesiaɣi be woazã gake. Nu si wodi tso gamenɔla si koe nye be wòawu lifi sue aɖe ɖe dzoa me, eye woanɛ Vɔsa ƒe Ðaseɖigbalẽ ahaɖe asi le eŋu. Woɖea eme hã nɛ nyuie be menye fiagã la subɔm wòle o; ɖeko wòle lɔlɔ̃m ɖe fiagã la ƒe mawunyenye dzi le esi wònye Roma-dukɔa ƒe dziɖula ta. Gake Kristotɔwo katã kloe melɔ̃ wɔ kɔnu ma be woaɖe asi le yewo ŋu o.”—Those About to Die.

17 Wona mɔnukpɔkpɔ egbegbe Kristotɔ siwo wolé de Nazitɔwo ƒe fuwɔamegaxɔwo me, siwo woate ŋu awu, la enuenu be woade asi agbalẽ aɖe te be yewogbe nu le Yehowa gbɔ eye woaɖe asi le wo ŋu. Ke hã ame ʋɛ aɖewo ŋutɔ koe lɔ̃ de asi agbalẽ ma te. Le to aɖe me tɔwo tsɔtsrɔ̃ ɖa si yi edzi le Rwanda nyitsɔ laa me la, Tutsi kple Hutu Ðasefowo kpɔ wo nɔewo ta. Dzidodo le dodokpɔ mawo tɔgbi me biaa dzideƒo kple xɔse.

ÐO ŊKU EDZI—YEHOWA LI KPLI MÍ!

18, 19. Xɔse kple dzideƒo ƒe kpɔɖeŋu siwo le Biblia me kawoe ate ŋu akpe ɖe mía ŋu míate ŋu awɔ míaƒe gbeƒãɖeɖedɔa?

18 Mɔnukpɔkpɔ gã aɖe su mía si egbea be míele dɔ gãtɔ kekeake si wode asi na Mawu subɔla amegbetɔwo la wɔm, si nye gbeƒãɖeɖe Fiaɖuƒegbedeasia kple nusrɔ̃lawo wɔwɔ. (Mat. 24:14; 28:19, 20) Míedaa akpe geɖe ɖe Yesu ƒe kpɔɖeŋu si ɖeke mesɔ kplii o la ta! “Eyi tso du me yi du me kple kɔƒe yi kɔƒe nɔ gbeƒã ɖem henɔ Mawu fiaɖuƒea ŋuti nya nyui la gblɔm.” (Luka 8:1) Abe Yesu ene la, míehiã xɔse kple dzideƒo be míaɖe gbeƒã Fiaɖuƒegbedeasia. Le Mawu ƒe kpekpeɖeŋu me la, míate ŋu awɔ nu abe Noa, dzinɔameƒotɔ, si nye “dzɔdzɔenyenye ƒe gbeƒãɖela,” si mevɔ̃na o, si ɖe gbeƒã na “ame mavɔ̃mawuwo ƒe xexe aɖe” si wole tsɔtsrɔ̃ ge emegbe kpuie to xexea me katã ƒe tsiɖɔɖɔ aɖe dzi, la ene.—2 Pet. 2:4, 5.

19 Gbedodoɖa kpena ɖe mía ŋu le míaƒe gbeƒãɖeɖedɔa me. Esime wonɔ Kristo yomedzela aɖewo yome tim eye wodo gbe ɖa be Mawu nana ‘yewoagblɔ eƒe nya la kple dzideƒo’ la, Mawu se woƒe gbedodoɖaa. (Mixlẽ Dɔwɔwɔwo 4:29-31.) Ne gomekpɔkpɔ le tso aƒe me yi aƒe me dɔa me ɖoa vɔvɔ̃ na wò eye nèdo gbe ɖa na Yehowa be wòana dzideƒo kple xɔse geɖe ye la, aɖo wò gbedodoɖaa ŋu na wò.—Mixlẽ Psalmo 66:19, 20. *

20. Esi míenye Yehowa subɔlawo ta la, ame kawoe le klalo be yewoakpe ɖe mía ŋu?

20 Mele bɔbɔe be míayi edzi anɔ Mawu ƒe lɔlɔ̃nu wɔm esime míele dodokpɔwo me tom le xexe vɔ̃ɖi sia si me xaxawo bɔ ɖo la me o. Ke hã womegblẽ mí ɖi o. Mawu li kpli mí. Via, si nye hamea ƒe Ta la, hã li kpli mí. Eye Yehowa ƒe Ðasefo 7,000,000 kple edzivɔ siwo le xexea me godoo la hã li kpli mí. Mina mía kpli wo siaa míayi edzi axɔ Mawu dzi se eye míaɖe gbeƒã nya nyui la. Ƒe 2013 ƒe mawunyakpukpuia si nye, “Lé dzi ɖe ƒo, eye nàsẽ ŋu. . . . Yehowa, wò Mawu la, li kpli wò” la, akpe ɖe mía ŋu míawɔ esia.—Yos. 1:9.

^ mm. 19 Kpɔ ame siwo wɔ nu dzideƒotɔe la ƒe kpɔɖeŋu bubuwo le nyati si nye “Lé Dzi Ðe Ƒo, Eye Nàsẽ Ŋu Vevie” si dze le February 15, 2012, ƒe Gbetakpɔxɔ me la me.