Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  November 2012

Woƒe Nu Siwo Gbɔ Edzi La Kpɔ Hiahiã Aɖe Gbɔ

Woƒe Nu Siwo Gbɔ Edzi La Kpɔ Hiahiã Aɖe Gbɔ

LE ƑE 49 M.Ŋ. me la, Petro, Yakobo kple Yohanes—“ame siwo dze abe sɔtiwo ene la”—de dɔ aɖe asi na apostolo Paulo kple eƒe hadɔwɔla Barnaba. Eyae nye be woanɔ Kristotɔ dahewo ŋu bum esime woyi edzi le gbeƒã ɖem le dukɔwo dome. (Gal. 2:9, 10) Aleke wokpɔ dɔdeasi sia gbɔe?

Paulo ƒe lɛtawo ɖe ale si gbegbe wòlé fɔ ɖe dɔ sia wɔwɔ ŋui la fia. Le kpɔɖeŋu me, eŋlɔ ɖo ɖe Kristotɔ siwo nɔ Korinto la bena: “Le nudzɔdzɔ si woaɖo ɖe ame kɔkɔeawo ŋuti la, ale si meɖoe na Galatia hameawo la, mia ŋutɔwo hã miwɔe nenema ke. Le kwasiɖa ɖe sia ɖe ƒe ŋkeke gbãtɔ dzi la, mia dometɔ ɖe sia ɖe nedzra nane ɖo ɖi le ye ŋutɔ ƒe aƒe me, le eƒe viɖekpɔkpɔ nu, be ne meva ɖo la, nudzɔdzɔ mayi edzi ɣemaɣi o. Gake ne meva ɖo afi ma la, matsɔ miaƒe dɔmenyonunana la ade asi na ŋutsu siwo dzi miaŋlɔ agbalẽ ada asi ɖo la, be woatsɔe ayi Yerusalem.”—1 Kor. 16:1-3.

Paulo gaɖo ŋku taɖodzinu si le nudzɔdzɔ ƒe ɖoɖoa ŋu dzi na Korintotɔwo le agbalẽ evelia si gbɔgbɔ ʋãe wòŋlɔ ɖo ɖe wo la me. Eyae nye ‘be nuwo nasɔ pɛ, eye miaƒe nu siwo gbɔ edzi la, nakpɔ woƒe hiahiã gbɔ na wo fifia.’—2 Kor. 8:12-15.

Esime Paulo ŋlɔ agbalẽ ɖo ɖe Kristotɔ siwo nɔ Roma le ƒe 56 M.Ŋ. me lɔƒo la, wowu nudzɔdzɔawo nu keŋkeŋ kloe. Egblɔ be: “Mele mɔ dze ge ayi Yerusalem be masubɔ ame kɔkɔeawo. Elabena edze ame siwo le Makedonia kple Axaya la ŋu be, yewoama yewoƒe nuwo kple ame kɔkɔe siwo le Yerusalem la ƒe ame dahewo to nudzɔdzɔ aɖo ɖe wo dzi.” (Rom. 15:25, 26) Esia megbe kpuie la, Paulo wu eƒe dɔdeasia nu, elabena esime wòtrɔ yi Yerusalem eye wolée le afi ma la, egblɔ na Roma Nutomefia Felike be: “Meva be matsɔ dɔmenyonunanawo avae na nye dukɔ la, eye masa vɔ hã.”—Dɔw. 24:17.

Gbɔgbɔ si ƒe alafa gbãtɔ me Kristotɔwo ɖe fia la dze kɔtɛ le nya si Paulo gblɔ tso Makedoniatɔwo ŋu la me. Egblɔ be “[wonɔ] kukuɖeɖe dzi na mí vevie, be míana mɔnukpɔkpɔ yewo yewoana nu dɔmenyotɔe.” Apostoloa de dzi ƒo na Korintotɔawo be woasrɔ̃ kpɔɖeŋu ma. Egblɔ be: “Ame sia ame newɔ abe ale si wòɖo le eƒe dzi me ene, menye kple veve alo dzizizi o, elabena ame si naa nu kple dzidzɔ lae Mawu lɔ̃na.” Nu kae ʋã hameawo be wona nu dɔmenyotɔe alea gbegbe? Menye woƒe didia ye nye “nu geɖewo nana ame kɔkɔewo le woƒe nu hiahiãwo nu ko o, ke be wòana woada akpe geɖe na Mawu hã.” (2 Kor. 8:4; 9:7, 12) Taɖodzinu mawo ke ate ŋu aʋã mí míana nu dɔmenyotɔe. Yehowa Mawu ayra ɖe ɖokuitɔmadimadi ƒe gbɔgbɔ nyui ma dzi godoo—eye eƒe yayra wɔa ame kesinɔtɔ.—Lod. 10:22.

NUDZƆDZƆ HENA XEXEA ME KATÃ ƑE DƆA

Abe ale si wònɔ le apostolo Paulo ƒe ɣeyiɣia me ene la, ame geɖe ‘dzraa nane’ alo ga home aɖe koŋ ɖo ɖi egbea eye wotsɔnɛ dea nudzɔɖaka siwo dzi woŋlɔ ɖo be, “Xexea Me Katã Ƒe Dɔa” la me le woƒe hamea me. (1 Kor. 16:2) Ɣleti sia ɣleti la, hameawo ɖoa nudzɔdzɔ siawo ɖe Yehowa Ðasefowo ƒe dɔwɔƒe si kpɔa dɔa dzi le woƒe dukɔa me. Àte ŋu aɖo wò lɔlɔ̃nu faa nudzɔdzɔwo ɖe Watch Tower Bible and Tract Society of Ghana, Attention Accounts Department, P. O. Box GP 760, Accra, Ghana alo atsɔe ade habɔbɔa ƒe gadzraɖoƒe siwo gbɔna la tẽe: Watch Tower, Barclays Bank, Accra High Street Branch, Account number 048/2746365 alo Watch Tower, Ghana Commercial Bank, Accra High Street Branch, Account number 1011130008990 alo aɖoe ɖe Yehowa Ðasefowo ƒe alɔdzedɔwɔƒe si kpɔa dɔa dzi le miaƒe dukɔa me. (Àte ŋu aɖo lɔlɔ̃nu faa nudzɔdzɔ siwo gbɔna la ɖe Yehowa Ðasefowo ƒe alɔdzedɔwɔƒe si kpɔa dɔa dzi le miaƒe dukɔa me.) Ne èdi be yeaɖo gaxɔgbalẽvi ɖe adrɛs si le etame la, ke ŋlɔ Watchtower la ŋɔŋlɔ eve; ŋlɔ “Watch” la ɖe vovo eye nàŋlɔ “Tower” hã ɖe vovo. Woate ŋu aɖo sikanuwo alo nu xɔasi bubuwo hã ɖa. Ne èɖo nu siawo tɔgbi ɖa la, anyo be nàŋlɔ lɛta kpui aɖe kpe ɖe wo ŋu atsɔ aɖe eme be wonye nunana siwo yetsɔ ke keŋkeŋ.

NUNANA SIWO NUNALAA AGATE ŊU AXƆ ƑE ÐOÐO

Woate ŋu adzɔ ga le ɖoɖo tɔxɛ sia nu na Watch Tower Bible and Tract Society of Ghana be wòanɔ zazãm hena xexea me katã ƒe dɔa gbɔ. Gake ne gatɔa gahiã gaa la, woagatrɔe anae. Ne èdi numeɖeɖe bubuwo la, taflatsɛ, zã adrɛs si dze le etame nàtsɔ aŋlɔ agbalẽ ɖo ɖe Accounts Department alo nàza telefonxexlẽdzesi si gbɔna atsɔ aƒo ka na wo (030) 2712456.

NUNANA SI ŊU WOWƆ ÐOÐO ÐO

Tsɔ kpe ɖe ga kple nu siwo woatsɔ ake keŋkeŋ ŋu la, nunana ƒe mɔnu bubu siwo dzi woato akpe asi ɖe xexea me katã ƒe Fiaɖuƒesubɔsubɔdɔa ŋu hã li. Esiawo ƒe ɖewoe nye:

Nugblẽfexexe: Ame ate ŋu atia Watch Tower Bible and Tract Society of Ghana be eyae woaxe yeƒe nugblẽfe na ne yeku.

Ga Siwo Le Gadzraɖoƒe: Ame aɖe ate ŋu awɔ ɖoɖo le wo gbɔ gadzraɖoƒewo ƒe sewo nu atsɔ ga si wòdzra ɖo ɖe gadzraɖoƒe, alo ga si wòda ɖe gadzraɖoƒe si adzi ɖe edzi ƒe ɖaseɖigbalẽwo, alo eƒe dzudzɔxɔledɔmega ade Watch Tower Bible and Tract Society of Ghana ƒe ŋkɔ me esime wògakpɔtɔ le agbe alo be woaxe ga siawo na habɔbɔ sia le yeƒe ku megbe.

Ga Si Wode Dɔ Aɖe Me Kple Esi Wodo Na Dɔwɔƒewo: Woate ŋu atsɔ ga siawo ana Watch Tower Bible and Tract Society of Ghana wòanye nunana si wotsɔ ke keŋkeŋ alo woagblɔ be woaxee na habɔbɔ sia le nunalaa ƒe ku megbe.

Aƒewo, Dɔwɔxɔwo, Kple Anyigbawo: Woate ŋu atsɔ aƒe, dɔwɔxɔ, alo anyigba siwo woate ŋu adzra la ana wòanye nu si ŋu woɖe asi le keŋkeŋ, alo ne aƒe si me nunalaa lee wònye la, woagblẽ xɔawo dometɔ aɖe ɖi nɛ be wòanɔ eme le eƒe agbenɔɣi. Ne èdi be yeawɔ nunaɖoɖo sia la, ke bia numekɔkɔ tso alɔdzedɔwɔƒe si le míaƒe dukɔa me gbɔ hafi nàwɔe.

Domenyinumagbalẽwo Kple Nunɔamesi Siwo Woanɔ Zazãm Gbɔ: Ame ate ŋu ato domenyinumagbalẽ si wòwɔ le setɔwo gbɔ dzi ana eƒe nunɔamesi alo ga nazu Watch Tower Bible and Tract Society of Ghana tɔ le eƒe ku megbe.

Abe ale si nyagbɔgblɔ “nunana si ŋu wowɔ ɖoɖo ɖo” ƒe gɔmesese ɖee fia ene la, ehiã be nunalaa nawɔ ɖoɖo aɖe koŋ ɖe nunana siawo tɔgbi ŋu. Ame siwo di be yewoado alɔ Yehowa Ðasefowo ƒe xexea me katã ƒe dɔa to nunana siwo ŋu wowɔ ɖoɖo ɖo ƒomevi aɖewo dzi alo ame siwo di be yewoaxɔ numekɔkɔ tso mɔnu vovovo siwo ŋu woƒo nu tsoe le afi sia ŋu la ate ŋu azã adrɛs si le ete atsɔ aŋlɔ agbalẽ na Accounts Department loo alo aƒo ka na wo.