Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  November 2012

Mitsɔ Ke Mia Nɔewo Faa

Mitsɔ Ke Mia Nɔewo Faa

“Miyi edzi miado dzi anɔ anyi kple mia nɔewo, eye miatsɔ anɔ mia nɔewo kem faa.”—KOL. 3:13.

1, 2. Nu ka tae wòle vevie be nàbu eŋu nenye be ènye ame si lɔ̃na faa tsɔna kea ame bubuwo?

YEHOWA ƒe Nya si woŋlɔ ɖi la kpena ɖe mía ŋu be míanya ale si wòbua nu vɔ̃e kple ale si wòwɔa nui ne míewɔ nu vɔ̃. Eƒe Nya la fia nu geɖe hã mí tso eƒe tsɔtsɔke ŋu. Le nyati si do ŋgɔ me la, míelé ŋku ɖe ale si nɔnɔme si David kple Manase ɖe fia la ʋã Yehowa wòtsɔ woƒe nu vɔ̃wo ke wo la ŋu. Wose veve ɖe nu vɔ̃ si wowɔ la ta, woʋu woƒe nu vɔ̃a me, woɖe asi le woƒe agbenɔnɔ vɔ̃ɖia ŋu, eye wotrɔ dzi me vavã. Esia ta Yehowa ve wo nu eye wògakpɔ ŋudzedze ɖe wo ŋu ake.

2 Azɔ mina míasrɔ̃ nu tso tsɔtsɔke ŋu le gɔmesese bubu aɖe nu. Tsɔe be wò ƒometɔ aɖe nɔ ame maɖifɔ siwo ŋu Manase ƒe nu vɔ̃a gblẽ nu le la dome; anye ne aleke nàse le ɖokuiwò me ɖe Manase ŋu? Ðe àlɔ̃ atsɔ ake Manasea? Emae nye nyabiase aɖe si sɔ be míabia egbea, elabena míele xexe aɖe si me sedzimawɔmawɔ, ŋutasesẽ kple ɖokuitɔdidi bɔ ɖo me. Ke nu ka tae wòle be Kristotɔ nasrɔ̃ tsɔtsɔke? Eye ne wogblɔ gbɔɖiamenyawo ɖe ŋuwò la, nu kae ate ŋu akpe ɖe ŋuwò nàɖu wò seselelãme dzi, awɔ nu abe ale si Yehowa di tso asiwò ene, eye nàlɔ̃ faa atsɔ ake?

NU SI TA WÒHIÃ BE MÍATSƆ AKE

3-5. (a) Kpɔɖeŋu kae Yesu wɔ tsɔ kpe ɖe eƒe nyaselawo ŋu wokpɔ tsɔtsɔke ƒe vevienyenye dze sii? (b) Nufiame kae le Yesu ƒe kpɔɖeŋu si dze le Mateo 18:21-35 la me?

3 Ele be míalɔ̃ faa atsɔ ake ame siwo da vo ɖe mía ŋu la, woɖanye Kristo hamea me tɔwo loo, alo womenye hamea me tɔwo o. Esia wɔwɔ kpena ɖe mía ŋu míenɔa ŋutifafa me kple míaƒe ƒometɔwo, mía xɔlɔ̃wo, kple ame bubuwo kpakple Yehowa. Biblia ɖee fia be wobia tso mí Kristotɔwo si be míalɔ̃ faa atsɔ ame bubuwo ƒe vodadawo ake wo, ne wodaa vo ɖe mía ŋu enuenu gɔ̃ hã. Yesu wɔ kpɔɖeŋu aɖe ku ɖe kluvi aɖe si nyi fe gbogbo aɖe le eƒe aƒetɔ ŋu la ŋu, eye kpɔɖeŋu sia kpe ɖe mía ŋu míekpɔ nu  si tae wòle vevie be míatsɔ ake ame bubuwo.

4 Kluvi la nyi dɔwɔŋkeke miliɔn 60 ƒe fetu le eƒe aƒetɔ si; ke hã eƒe aƒetɔ tsɔe kee. Esia megbe la, kluvi la do go eye wòkpɔ ehati kluvi aɖe si nyi fe si ƒe home nye ŋkeke 100 ƒe dɔwɔfetu le esi. Fenyila la ɖe kuku nɛ be wòaxɔ dzigbɔɖi na ye, gake kluvi si wotsɔ fe gbogbo aɖe ke la na wode ehati kluvia gaxɔ me. Eƒe nuwɔna sia ve dɔme na woƒe aƒetɔa eye wòbiae be: “Ðe mele be . . . nàkpɔ nublanui na hawòti kluvi abe ale si nye hã mekpɔ nublanui na wòe ene oa?” Eye “esi eƒe nuwɔnaa na aƒetɔa do dɔmedzoe la, [etsɔ kluvi makpɔnublanuia] de asi na gaxɔdzikpɔlawo, va se ɖe esime wòaxe fe siwo katã wònyi la hafi.”—Mat. 18:21-34.

Nufiame vevi kae le Yesu ƒe kpɔɖeŋu sia me?

5 Nu kae Yesu di be míasrɔ̃ tso kpɔɖeŋu sia me? Eƒo nya ta be: “Nenema kee Fofonye si le dziƒowo la hã awɔ nu kpli mi ne mia dome ame sia ame metsɔna kea nɔvia tso dzi me o.” (Mat. 18:35) Yesu ƒe nufiamea me kɔ. Míenye ame madeblibowo eye míewɔa nu vɔ̃ zi geɖe. Mate ŋu anya wɔ be míaɖo Yehowa ƒe dzidzenuwo gbɔ bliboe o. Ke hã elɔ̃na faa be yeatsɔ míaƒe nu vɔ̃wo ake mí keŋkeŋ, abe ale si wotutua nuŋɔŋlɔ ɖa keŋkeŋ le nuŋlɔkpe dzi ene. Eya ta ele be ame sia ame si di be yeanye Yehowa xɔlɔ̃ la natsɔ ehavi amegbetɔwo ƒe vodadawo ake wo. Abe ale si Yesu hã gblɔe le Todzimawunyaa me ene la, “Ne mietsɔa amewo ƒe vodadawo kea wo la, mia Fofo si le dziƒo hã atsɔ ake mi; gake ne mietsɔa amewo ƒe vodadawo kea wo o la, mia Fofo hã matsɔ miaƒe vodadawo ake mi o.”—Mat. 6:14, 15.

6. Nu ka tae mele bɔbɔe ɣesiaɣi be míatsɔ ake o?

6 Ðewohĩ àgblɔ be: ‘Nya mawo nya se ya; gake egbɔgblɔ le bɔbɔe, ke edziwɔwɔ sesẽna.’ Nu si tae nye be, zi geɖe la, ne ame aɖe wɔ nu madzɔmadzɔ ɖe mía ŋu la, evea mí kaɖikaɖi. Le kpɔɖeŋu me, míate ŋu ado dziku alo ase le mía ɖokui me be womewɔ nuteƒe na mí o. Ðewohĩ míate ŋu ase le mía ɖokui me be ehiã be míakpɔ egbɔ be wohe to na amea alo míaɖo nu si wòwɔ ɖe mía ŋu la teƒe nɛ. Le nyateƒe me la, ame aɖewo susui be yewomate ŋu atsɔ ake vodalaa gbeɖe o. Ne èse le ɖokuiwò me nenema la, nu kae nàwɔ be nàte ŋu atsɔ anɔ ame bubuwo kem faa abe ale si Yehowa bia tso mía si ene?

 DZRO ÐOKUIWÒ ME KPƆ

7, 8. Ne ame bubuwo ƒe nuwɔwɔ ameŋumabumabutɔe do dziku na wò la, nu kae ate ŋu akpe ɖe ŋuwò nàtsɔe ake wo?

7 Ne woda vo le mía ŋu alo míesusu be wowɔ nu madzɔmadzɔ ɖe mía ŋu la, evea mí ŋutɔ. De ŋugble le ale si ɖekakpui aɖe si ŋu woƒo nu tsoe le numekuku aɖe si wowɔ tso dzikudodo ŋu me la wɔ nui ŋu kpɔ; egblɔ be: ‘Gbe ɖeka, esi medo dziku helĩhelĩ la, medo go le aƒe me heta nu be nyemagatrɔ agbɔ gbeɖe o. Dzomeŋɔli ƒe ŋkeke dzeani aɖe dzi ye, eye nye ɖeɖe mezɔ to afɔmɔ aɖe si le nuto dzeani aɖe me, eye vivivi la, ale si teƒea fa miɔɔ, ɖoɖoe zi toŋtoŋ eye wònya kpɔ la fa akɔ nam, eye gaƒoƒo aɖewo megbe la, metrɔ yi aƒea me eye wòte ɖe dzinye be medo dziku nenema gbegbe.’ Abe ale si kpɔɖeŋu sia ɖee fia ene la, ne èɖe mɔ ɣeyiɣi aɖe va yi be wò dzi nadze eme eye nètsɔ nukpɔsusu nyuitɔ bu nuwo ŋu la, ate ŋu akpe ɖe ŋuwò nàƒo asa na nuwɔwɔ le mɔ si ava ve wò emegbe la nu.—Ps. 4:5; Lod. 14:29; Yak. 1:19, 20.

8 Gake nu kae nàwɔ ne dziku gakpɔtɔ le mewò kokoko togbɔ be èna ɣeyiɣi geɖe va yi be wò dzi nafa gɔ̃ hã? Dze agbagba nànya nu si tae dzi le kuwòm ɖo. Ðe wòanye be esi wowɔ nu madzɔmadzɔ ɖe ŋuwò alo wɔ nu ɖe ŋuwò ameŋumabumabutɔe taea? Alo ɖe wòanye be esi nèse le ɖokuiwò me be ɖe amea ɖoe koŋ be yeawɔ nu wòave wò taea? Ðe eƒe nuwɔnaa vɔ̃ɖi nenema gbegbea? Susu si tae dzi le kuwòm ɖo la me dzodzro kple egɔmesese ana nàde dzesi Ŋɔŋlɔawo me gɔmeɖose siwo akpe ɖe ŋuwò nàɖu wò dzikudodoa dzi. Ekema àte ŋu awɔ nu le mɔ si dzea Yehowa ŋu la nu. (Mixlẽ Lododowo 15:28; 17:27.) Nuwo ŋu bubu alea ate ŋu akpe ɖe ŋuwò nàkpɔ nɔnɔmeawo abe ale si tututu wole ene eye àlɔ̃ faa atsɔ ake. Ne èwɔ nu le mɔ sia nu la, togbɔ be esesẽ hã la, àɖe mɔ be Mawu ƒe Nya la nàdzro “[wò] dzimesusuwo kple tameɖoɖowo” me kpɔ eye akpe ɖe ŋuwò be nàsrɔ̃ Yehowa ƒe tsɔtsɔke.—Heb. 4:12.

ÐE WÒLE BE WÒAVE WÒ ÐIKAA?

9, 10. (a) Ne ewɔ na wò be ame aɖe dze agɔ le dziwò la, nu kae nàte ŋu awɔ? (b) Ne mèdoa dziku kabakaba o eye nèlɔ̃na faa tsɔna kea ame bubuwo la, aleke nàse le ɖokuiwò me?

9 Agbemenudzɔdzɔ geɖe tea ŋu doa dziku na ame. Le kpɔɖeŋu me, tsɔe be esi nèle ʋu kum la, esusɔ vie ʋukula bubu aɖe tsɔ eƒe ʋu va kpe ŋgo kple wò ʋua. Aleke nàwɔ nui? Ðikeke mele eme o be, èxlẽ nu tso nudzɔdzɔ aɖe si me ʋukula aɖe do dziku helĩhelĩ eye wòwɔ anyra ɖe ʋukula bubu aɖe ŋu le mɔ dzi ŋu kpɔ. Gake kakaɖedzitɔe la, mí Kristotɔwo ya míadi be míawɔ nu sia tɔgbi o.

10 Ðe manyo wu kura be nàtsɔ ɣeyiɣi vi aɖe ade ŋugble le nudzɔdzɔa ŋu oa? Anya nɔ eme be wò hã èwɔ vodada aɖe; ɖewohĩ nane he wò susu esi nèle ʋua kum. Alo ɖewohĩ kuxi aɖe anya nɔ fu ɖem na ʋukula kemɛa ƒe ʋua. Susu vevi si le kpɔɖeŋu sia mee nye be, míate ŋu aɖe dziku, dziɖeleameƒo kple seselelãme manyomanyo bubuwo dzi kpɔtɔ ne míedze agbagba be míase nu si tae nua dzɔ ɖo gɔme, ne míelɔ̃ ɖe edzi be anɔ eme be míenya nu siwo katã gbɔe vodadaa tso o, eye míelɔ̃ faa tsɔ ke. Nyagblɔla 7:9 gblɔ be: “Wò gbɔgbɔ megayɔ ɖe dzikudodo ŋu o, elabena bometsilawo ƒe akɔtae dziku nɔna.” Mele be míanɔ dziku dom kabakaba o. Zi geɖe la, míetea ŋu susuna be, ɖe amewo ɖoe koŋ be yewoawɔ nu wòave mí; gake menye nenemae nyaa le o, ke boŋ woƒe blibomademade gbɔe wòtso alo ɖewohĩ míawoe mese nu si dzɔ la gɔme nyuie o. Dze agbagba nàɖo ŋku edzi be anɔ eme be mènya nyateƒenya ɖe sia ɖe le nu si ame aɖe wɔ alo nya si wògblɔ ŋu o. Eya ta lɔ̃ faa nàtsɔ ake amea le lɔlɔ̃ ta. Àkpɔ dzidzɔ geɖe wu ne èwɔe alea.—Mixlẽ 1 Petro 4:8.

‘MIAƑE ŊUTIFAFA NEGBUGBƆ VA MIA DZI’

11. Aleke kee amewo ɖawɔ nu ɖe mía ŋu le gbeadzi o, aleke wòle be mí Fiaɖuƒegbeƒãɖelawo míase le mía ɖokui me?

11 Ne èle gbeadzi eye ame aɖe wɔ nu ɖe  ŋuwò ameŋumabumabutɔe la, aleke nàte ŋu aɖu ɖokuiwò dzi? Esime Yesu dɔ gbeƒãɖela 70 ɖo ɖe gbeadzi la, egblɔ na wo be woabia ŋutifafa na aƒe ɖe sia ɖe si me woage ɖo. Yesu gblɔ be: “Ne ŋutifafalɔ̃la aɖe le afi ma la, miaƒe ŋutifafa anɔ edzi. Gake ne ɖeke meli o la, ekema agbugbɔ ava [mia dzi].” (Luka 10:1, 5, 6) Ne amewo xɔ mí nyuie le gbeadzi la, míekpɔa dzidzɔ, elabena míenyae be gbedeasi si míetsɔ yi na wo la aɖe vi na wo. Gake ɣeaɖewoɣi la, amewo menyea ŋutifafamewo o. Nu kae wòle be míawɔ azɔ? Yesu gblɔ be ŋutifafa si míebia na aƒea me tɔwo la nagbugbɔ ava mía dzi. Nu ka kee ɖadzɔ o, ele be ŋutifafa nanɔ míaƒe dziwo me ne míedo go le aƒe ɖe sia ɖe me, aleke kee ameawo ɖawɔ nu ɖe mía ŋui o. Gake ne amewo do dziku na mí eye míawo hã míeƒo nu na wo dzikutɔe la, afia be míete ŋu na míaƒe ŋutifafa la gbugbɔ va mía dzi o.

12. Le Paulo ƒe nya siwo dze le Efesotɔwo 4:31, 32 nu la, aleke wòle be míawɔ nui?

12 Dze agbagba nànye ŋutifafame le nɔnɔme ɖe sia ɖe me, menye le Kristotɔwo ƒe subɔsubɔdɔa me ɖeɖe ko o. Míate ŋu alɔ̃ faa atsɔ ame bubuwo ƒe vodadawo ake wo, gake esia mefia be ele be míalɔ̃ ɖe woƒe nɔnɔme gbegblẽa dzi alo míawɔ abe ɖe woƒe nɔnɔmea medoa vevesese na ame bubuwo o ene o. Gake nu si tsɔtsɔke fia ye nye be nàɖe dziku ɖe sia ɖe kple vevesese si ame aɖe ƒe nuwɔna do na wò la ɖa le dɔme eye wò ŋutifafa nakpɔtɔ anɔ dziwò. Gake ame aɖewo yia edzi nɔa nu manyomanyo siwo amewo wɔ ɖe wo ŋu la ŋu bum eye esia wɔnɛ be womekpɔa ŋutifafa o. Mègaɖe mɔ dziku naɖu dziwò o. Ðo ŋku edzi be, ne èlé dziku ɖe dɔme la, màte ŋu akpɔ dzidzɔ o. Eya ta lɔ̃ nàtsɔ ake faa.—Mixlẽ Efesotɔwo 4:31, 32.

WƆ NU LE MƆ SI DZEA YEHOWA ŊU LA NU

13. (a) Gɔmesese ka nue Kristotɔ ‘alɔ dzoka xɔxɔwo’ akɔ ɖe eƒe futɔ ƒe ta dzi le? (b) Ne wodo dziku na mí eye míeɖo nya ŋu tufafatɔe la, nu kae ate ŋu ado tso eme?

13 Ɣeaɖewoɣi la, àte ŋu ase le ɖokuiwò me be yeate ŋu akpe ɖe ame aɖe si wɔ nu madzɔmadzɔ ɖe ye ŋu la ŋu wòakpɔ ŋudzedze ɖe Kristotɔwo ƒe dzidzenuwo ŋu. Apostolo Paulo ŋlɔ bena: “‘Ne dɔ le wò futɔ wum la, na nui wòaɖu; ne tsikɔ le ewum la, na nanee wòano; elabena ne èwɔ esia la, àlɔ dzoka xɔxɔwo akɔ ɖe eƒe ta dzi.’ Mègaɖe mɔ nu vɔ̃ɖi naɖu dziwò o, ke boŋ yi edzi nàtsɔ nu nyui anɔ nu vɔ̃ɖi dzi ɖum.” (Rom. 12:20, 21) Ne amewo do dziku na wò gake èyi edzi wɔ nu ɖe wo ŋu bubutɔe la, woate ŋu atrɔ woƒe nɔnɔme eye woate ŋu awɔ nu ɖe ŋuwò dɔmenyotɔe gɔ̃ hã. Ne èsea nu gɔme na amea hesea veve ɖe enu, eye nèkpɔa nublanui gɔ̃ hã nɛ la, ɖewohĩ àte ŋu akpe ɖe eŋu wòadi be yeasrɔ̃ Biblia. Aleke kee nɔnɔmea ɖale o, nyaŋuɖoɖo fafɛ naa mɔnukpɔkpɔ amea be wòade ŋugble le wò nɔnɔme nyuiwo ŋu.—1 Pet. 2:12; 3:16.

14. Aleke kee ame aɖe wɔ nu madzɔmadzɔ ɖe ŋuwòe o, nu ka tae mele be nàlé amea ɖe dɔme o?

14 Masɔ be míade ha kple ame aɖewo o. Ame siawo dometɔ aɖewoe nye ame siwo nye hamea me tɔwo tsã gake wowɔ nu vɔ̃ gã aɖe hegbe dzimetɔtrɔ, eye woɖe wo le haa me. Ne nu vɔ̃ gã si ame sia tɔgbi wɔ la gblẽ nu le ŋuwò la, ate ŋu asesẽ ŋutɔ be nàtsɔe akee ne etrɔ dzi me gɔ̃ hã, le esi wònye be seselelãmebiwo xɔa ɣeyiɣi geɖe hafi kuna ta. Le nɔnɔme sia tɔgbi me la, ahiã be nànɔ gbe dom ɖa na Yehowa be wòakpe ɖe ŋuwò nàlɔ̃ faa atsɔ ake nu gbegblẽ wɔla si trɔ dzi me la. Esia le vevie, elabena màte ŋu anya ame bubu aɖe ƒe susu alo ale si wòle sesem le eɖokui me gbeɖe o. Gake Yehowa ya nyae. Enyaa ame ƒe seselelãme ememetɔwo, eye wògbɔa dzi ɖi na nu gbegblẽ wɔlawo. (Ps. 7:10; Lod. 17:3) Esia tae Ŋɔŋlɔawo gblɔ be: “Migatsɔ vɔ̃ ɖo vɔ̃ teƒe na ame aɖeke o. Miwɔ nu siwo amewo katã akpɔ be wonyo la. Ne anya wɔ, eye wòanye nu si atso mia gbɔ la, minɔ anyi kple amewo katã le ŋutifafa me. Lɔlɔ̃tɔwo, migabia hlɔ̃ na mia ɖokuiwo o, ke miɖe mɔ na dziku la boŋ; elabena woŋlɔ ɖi be: ‘Tɔnyee nye hlɔ̃biabia, maɖo eteƒe, Yehowa ye gblɔe.’”  (Rom. 12:17-19) Míate ŋu anya nu siwo katã le nyanya na Yehowa o, eye Biblia gblɔ na mí be míagadrɔ̃ ʋɔnu amewo o. (Mat. 7:1, 2) Gake kakaɖedzi ate ŋu anɔ asiwò be Mawu adrɔ̃ ʋɔnu dzɔdzɔe.

15. Nu kae akpe ɖe mía ŋu míadzudzɔ dzikudodo ɖe ame aɖe si wɔ nu vɔ̃ɖi ɖe mía ŋu la ŋu?

15 Ne èse le ɖokuiwò me be ame aɖe wɔ nu madzɔmadzɔ aɖe ɖe ye ŋu alo èkpɔe be esesẽ na ye be yeatsɔ nu vɔ̃ wɔla trɔdzime aɖe ƒe nu vɔ̃wo akee la, anyo be nàɖo ŋku edzi be agɔdzelaa hã le avu wɔm kple nɔnɔme sesẽ aɖe. Eyae nye be eya hã le fu kpem le blibomademade si ƒe dome wònyi la me tsonuwo si me. (Rom. 3:23) Yehowa sea veve ɖe amegbetɔ madeblibowo katã nu. Eya ta esɔ be nàdo gbe ɖa ɖe ame si dze agɔ le dziwò la ta. Ne míedoa gbe ɖa ɖe ame aɖe ta la, manya wɔ be míayi edzi aganɔ dziku dom ɖe eŋu o. Yesu na eme kɔ ƒãa be mele be míalé ame siwo wɔ nu vɔ̃ɖi ɖe mía ŋu gɔ̃ hã ɖe dɔme o. Egblɔ be: “Miyi edzi mialɔ̃ miaƒe futɔwo, eye mianɔ gbe dom ɖa ɖe ame siwo tia mia yome la ta.”—Mat. 5:44.

16, 17. Aleke wòle be nàwɔ nui ne Kristotɔ hamemetsitsiwo tso nya me be nu vɔ̃ wɔla aɖe trɔ dzi me, eye nu ka tae?

16 Yehowa de dɔ asi na Kristotɔ hamemetsitsiwo be woakpɔ nu gbegblẽ wɔwɔ ƒe nyawo gbɔ le hamea me. Nɔviŋutsu siawo mate ŋu ase nu sia nu gɔme le nya aɖe ŋu abe Mawu ene o, gake woƒe taɖodzinue nye be yewoawɔ nyametsotso siwo wɔ ɖeka kple mɔfiame siwo le Mawu ƒe Nya la me le gbɔgbɔ kɔkɔea ƒe mɔfiafia te. Esia ta ne wodo gbe ɖa bia Yehowa ƒe kpekpeɖeŋu hafi wɔ nyametsotso le nya siawo me la, míate ŋu aka ɖe edzi be woƒe nyametsotsoa wɔ ɖeka kple Yehowa ƒe nukpɔsusu.—Mat. 18:18.

Wobia tso mí Kristotɔwo si be míalɔ̃ faa atsɔ ake

17 Nɔnɔme sia tɔgbi mee wòhiã be míawɔ nuteƒe le. Ne wodrɔ̃ ʋɔnu ame aɖe hetso nya me be etrɔ dzi me la, ɖe àlɔ̃ atsɔ ake amea ahaɖee afiae be nèlɔ̃ea? (2 Kor. 2:5-8) Esia manɔ bɔbɔe ya o, vevietɔ ne nu vɔ̃ si wòwɔ la gblẽ nu le wò ŋutɔ alo wò ƒometɔ aɖe ŋu. Gake ne èka ɖe Yehowa dzi eye èka ɖe ale si wòkpɔa nyawo gbɔ le hamea me dzi la, àwɔ nu le nunya me. Àɖee afia be ètsɔna kena faa vavã.—Lod. 3:5, 6.

18. Ne ètsɔ kena faa la, aleke wòate ŋu aɖe vi na wòe?

18 Susuŋutinunyala bibiwo kpɔe be viɖe geɖe dona tso lɔlɔ̃ faa atsɔ ake me. Enaa míenɔa lãmesẽ me, elabena míeɖea dziku ɖa le dɔme hedzudzɔa blanuiléle, eye enaa míenɔa ƒomedodo nyui me kple ame bubuwo. Gake ne míelɔ̃na faa tsɔna kena o la, ate ŋu ana míadze dɔ, nu ate ɖe mía dzi, míanɔ ƒomedodo nyui me kple ame bubuwo o, eye asesẽ be míaɖo dze kpli wo. Viɖe gãtɔ kekeake si ado tso eme ne míelɔ̃ faa tsɔ ke ye nye be míanɔ ƒomedodo nyui me kple Yehowa, mía Fofo si le dziƒo la.—Mixlẽ Kolosetɔwo 3:12-14.