Dzo kpo yi emenuwo dzi

Dzo kpo yi emenuawo dzi

 ŊKUÐOÐO BLEMATƆ AÐEWO DZI

Aristotle

Aristotle

ƑE 2,300 kple edzivɔe nye esia la, Aristotle do dzɔdzɔmeŋutinunya kple xexemenunya ɖe ŋgɔ le mɔ geɖe nu. Aristotle ƒe dɔwo do dzidzɔ na amewo, eye woɖe wo gɔme hesrɔ̃ wo hena ƒe geɖe. Blemaŋutinyawo ƒe nufialagã James MacLachlan ŋlɔ bena, “Ale si Aristotle bua dzɔdzɔmenuwoe la kpɔ ŋusẽ ɖe Europatɔwo dzi ƒe 2,000 kloe.” Aristotle ƒe susu le nanewo ŋu kpɔ ŋusẽ ɖe Katolikotɔwo, Protestantɔwo kple Moslemtɔwo gɔ̃ hã ƒe nufiafiawo dzi.

Nu Siwo Ŋu Wòŋlɔ Nu Tsoe Keke Ta

Aristotle ŋlɔ nu tso aɖaŋunuwo, ɣletiviŋutinunya, nugbagbeŋutinunya, agbenɔnɔŋutisewo, gbegbɔgblɔ, senyawo, nuwo ŋu bubu nyuie, galékpeŋusẽ, dzɔdzɔmeŋusẽŋutinunya, nuwo ƒe zɔɖeɖe, dzidzɔkpɔkpɔ, hakpanyawo, dunyahehe, susuŋutinunya, nuƒoƒo ƒe ŋutete kpakple luʋɔ si wòsusu be ekuna la ŋu. Ke hã, nu siwo wòŋlɔ tso nugbagbeŋutinunya kple nuwo ŋu bubu nyuie ŋu ye na eƒe ŋkɔ de du.

Blema Hela-gbalẽnyalawo nɔ te ɖe woƒe ŋkuléle ɖe nu ŋu, nu siwo dzi woka ɖo be wonye nyateƒe kple nuwo ŋu bubu nyuie ƒe ŋutete dzi tsɔ ɖea ale si nuwo le le xexea me la me. Woxɔe se be ne yewonɔ te ɖe nu siwo yewo susu be wonye nyateƒe dzi hebu wo ŋu nyuie la, yewoate ŋu aƒo nya ta nyuiwo.

Nunya ma kpe ɖe wo ŋu woƒo nya ta nyuiwo le nanewo ŋu, wo dometɔ ɖekae nye be wokpɔe be sewo dzie xexea zɔna ɖo. Ke hã, kuxiae nye be esi wònye nu siwo wokpɔna dzi koe wonɔ te ɖo tso nya me ta la, wo dometɔ aɖewo siwo nye nunyala gãwo, siwo dome Aristotle le da ƒu le nanewo me. Le kpɔɖeŋu me, woxɔe se be ɣletinyigbawo  kple ɣletiviwo ƒoa xlã anyigba la. Ɣemaɣi la, ame geɖe da asi ɖe susu ma dzi. Agbalẽ aɖe gblɔ be, “Nuŋububu kple nu siwo teƒe amewo kpɔ ɖo kpe Helatɔwo ƒe susu si nye be anyigbaa le xexea titina la dzi.”—The Closing of the Western Mind.

Ne dzɔdzɔmeŋutinunyalawo dome koe nuŋububu totro sia tsi la, ne enyo. Gake medzɔ alea o.

Katolikoha La Lɔ̃ Ðe Aristotle Ƒe Nufiafiawo Dzi

Wolɔ̃ ɖe Aristotle ƒe nufiafia aɖewo dzi be wonye nyateƒe le Titinaɣeyiɣiwo me le Europa “Kristotɔwo” dome. Roma Katolikotɔwo ƒe mawunyaŋutinunyalawo, siwo dometɔ ɖekae nye Thomas Aquinas (ƒe 1224-1274 lɔƒo)—zã nu siwo ŋu Aristotle ŋlɔ nu tsoe le eƒe nufiafiawo me. Aleae wòdzɔe be Aristotle ƒe nuŋububu si nye be anyigbaa le xexea titina la va zu Katolikoha la ƒe nufiafia. Protestantɔwo ƒe ŋgɔnɔlawo abe Calvin kple Luther hã lɔ ɖe nufiafia ma dzi eye wogblɔ be Biblia mee wòtso.—Kpɔ aɖaka si nye “ Wose Biblia Me Nya Aɖewo Gɔme Bubui.”

Wolɔ̃ ɖe Aristotle ƒe nufiafia aɖewo dzi be wonye nyateƒe

Agbalẽŋlɔla si ŋkɔe nye Charles Freeman gblɔ be: “Eva sesẽ be woade vovototo [Aristotle ƒe nufiafiawo] kple Katolikotɔwo ƒe dzixɔsewo dome le nanewo me.” Eya ta wogblɔna be Aquinas “nyrɔ” Aristotle wòzu Katolikotɔ. Gake le nyateƒe me la, Freeman ŋlɔ bena, “Aquinas boŋue va zu Aristotle yomedzela.” Eye míate ŋu agblɔ kpee be le mɔ aɖe nu la, sɔlemeha la hã dze eyome. Esia wɔe be, esi Italytɔ ɣletiviŋununyala kple akɔntanyala Galileo te kpɔ be yeagblɔ be nu si yede dzesie nye be anyigba la ƒoa xlã ɣea la, wobia tso esi be woado ɖe ŋutasẽʋɔnudrɔ̃ƒea ŋkume eye wozi edzi be wòagblɔ be aʋatsoe yeka. * Ke hã woate ŋu agblɔ be esia na Aristotle kpɔe be nu geɖe li woagasrɔ̃ tso dzɔdzɔmeŋutinunya ŋu. Ne ɖe sɔlemehawo hã kpɔe nenema la anye ne enyo hafi!

^ mm. 11 Àte ŋu axlẽ nu geɖe tso “Nyahehe Si Ðo Galileo Kple Sɔlemeha La Dome,” ŋu le April 22, 2003, ƒe Nyɔ!, si le yevugbe me la me.