Dzo kpo yi emenuwo dzi

Dzo kpo yi emenuawo dzi

 GBEBIAME | RAJESH KALARIA

Susuŋutinunyala Aɖe Ƒe Xɔse

Susuŋutinunyala Aɖe Ƒe Xɔse

NUFIALAGÃ Rajesh Kalaria, si le Newcastle Yunivɛsiti le England la le nu srɔ̃m tso amegbetɔwo ƒe susu ŋu wu ƒe 40. Tsãa, exɔe se be ɖe nuwo dzɔ le wo ɖokui si. Gake eva trɔ susu emegbe. Nyɔ! magazinea talawo bia gbee tso eƒe xɔse kpakple eƒe dɔa ŋu.

Míeɖe kuku subɔsubɔha ka mee nènɔ tsã?

Wodzi tɔnye le India, eye togbɔ be Indiatɔe danye nye hã Uganda ye wodzii le. Hindutɔwo ƒe dzixɔsewo koŋue kpɔ ŋusẽ ɖe wo dzi. Mí ame etɔ̃e wodzi eye nyee nye evelia. Míenɔ Nairobi, le Kenya. Hindutɔ geɖewo hã nɔ afi ma.

Nu kae na dzɔdzɔmeŋutinunya va dzɔ dzi na wò?

Lãwo ƒe nu dzɔa dzi nam eye zi geɖe la, nye kple xɔ̃nyewo míezɔa mɔ legbeewo ɖatsia avewo me be míakpɔ lãwo. Dɔ si koŋ medi be mawɔe nye be manye lãwo ƒe ɖɔkta. Gake esi medo le asinudɔsrɔ̃suku aɖe le Nairobi la, meyi London Yunivɛsiti le England, va srɔ̃ nu tso ale si dɔlékuiwo wɔna tsina ŋu. Emegbe meva srɔ̃ nu tso amegbetɔwo ƒe ahɔhɔ̃ koŋ ŋu.

Ðe wò sukunusɔsrɔ̃wo kpɔ ŋusẽ ɖe wò dzixɔsewo dzia?

Ɛ̃. Esi menɔ nu geɖe srɔ̃m tso dzɔdzɔmeŋutinunya ŋu la, eva sesẽ nam be mayi edzi axɔ Hindutɔwo ƒe nyakpakpawo kple kɔnuwo dzi ase. Esia ƒe ɖewoe nye lãwo kple legbawo subɔsubɔ.

Nu ka tae nèxɔ nɔnɔmetɔtrɔ ƒe nufiafia dzi se?

Esi menye ɖevi la, ame siwo dome menɔ la xɔe se be Afrika ye nɔnɔmetɔtrɔ dze egɔme tsoe, eye wofiaa nu siawo mí le suku enuenu. Azɔ hã, nufialawo kple yunivɛsiti nufialagãwo na mí sukuviawo míexɔe se be dzɔdzɔmeŋutinunyala gãwo katã ka ɖe edzi be ɖe nuwo dzɔ le wo ɖokui si.

 Esi ɣeyiɣiawo va nɔ yiyim la, wò susu va trɔ le afi si agbe dzɔ tso ŋu. Nu ka tae?

Menɔ nu srɔ̃m tso nu gbagbewo kple woƒe wɔwɔme ŋu ƒe aɖewo va se ɖe esime sukuhati aɖe va gblɔ nu siwo srɔ̃m wònɔ le Biblia me tso Yehowa Ðasefowo gbɔ la nam. Medi be manya nu geɖe. Eya ta esi Ðasefoawo va wɔ takpekpe aɖe le míaƒe sukua ƒe takpexɔ me le Nairobi la, nye hã mede. Emegbe Ðasefo eve siwo nye dutanyanyuigblɔlawo va ɖe Biblia me nufiafia aɖewo me nam. Esi mekpɔe be woxɔ Wɔla Gã aɖe dzi se eye be egbɔe míakpɔ agbemebiabia vevitɔwo ƒe ŋuɖoɖowo le la, nyemebui kura be nyakpakpa aɖee o. Enya se nam eye susu le eme hã.

Ðe nu siwo nèsrɔ̃ tso ahɔhɔ̃a ŋu na wòsesẽ na wò be nàxɔe ase be ɖe wowɔ nuwoa?

Kura o! Esi menɔ nu srɔ̃m tso nuwo ƒe wɔwɔme ŋu la, meva kpɔe be wowɔ nu gbagbewo le mɔ wɔnuku aɖe ŋutɔ nu. Be míagblɔ be naneke mefiaa mɔ nuwɔwɔ wɔnuku siawo o la nye nu si me susu megava nɔ nam o.

Àte ŋu agblɔ eƒe kpɔɖeŋu aɖe na mía?

Medze nusɔsrɔ̃ tso amegbetɔ ƒe ahɔhɔ̃ ŋu tso ƒe 1970-awo me, eye ahɔhɔ̃a ƒe dɔwɔwɔ gawɔa nuku nam kokoko. Ahɔhɔ̃a koŋ ye nana míebua tame, ɖoa ŋku nu dzi eye wònana míaƒe ŋutinu vovovoawo katã wɔa dɔ. Eya kee nana lãmesidzenu vovovoawo wɔa dɔ eye wòwɔa nyatakaka siwo tso ametia me kple esiwo tso ametia godo siaa ŋu dɔ.

Susu si ta míaƒe ahɔhɔ̃a wɔa dɔ nyuie nye be eme tsiwo kple ahɔhɔ̃menugbagbeviwo wɔa dɔ aduadu le mɔ wɔnuku aɖe nu. Ahɔhɔ̃menugbagbevi biliɔn gbogbo aɖewoe le amegbetɔ ƒe ahɔhɔ̃ me, eye wowɔa dɔ aduadu kple wo nɔewo to lãmeka falɛfalɛ legbee siwo woyɔna le Eŋlisigbe me be axons dzi. Ahɔhɔ̃menugbagbevi siawo dometɔ ɖeka ate ŋu awɔ dɔ aduadu kple ahɔhɔ̃menugbagbevi bubuwo to lãmeka falɛfalɛ (dendrites) siwo dzea alɔ la dzi. Esia wɔe be xexlẽme mele ale si ahɔhɔ̃mekawo de nu wo nɔewo me ŋu o! Azɔ hã ahɔhɔ̃menugbagbevi akpeakpe siawo kple lãmeka falɛfalɛ siawo wɔa dɔ ɖe ɖoɖo nyui nu eye wometɔtɔna o. Ale si “wolɔ̃” ɖe wo nɔewo me la wɔ nuku ŋutɔ.

Míeɖe kuku ɖe eme.

Ahɔhɔ̃mekawo dzea dɔwɔwɔ ɖe ɖoɖo nu gɔme ne vidzĩwo le dɔ me kple ne wodzi wo vɔ megbe. Ahɔhɔ̃menugbagbeviwo ɖoa lãmeka falɛfalɛwo ɖa be woavae tsiã kple ahɔhɔ̃menugbagbevi bubu siwo dome didi tso wo gbɔ sentimeta ʋɛ aɖewo—gake dometsotsoa adidi ŋutɔ ne lãmenugbagbeviwo gbɔe woɖo wo ɖo. Gake menye lãmenugbagbevi aɖe koŋ koe lãmeka falɛfalɛa yina ɖatsiãna kple o ke eƒe akpa aɖe koŋ ye.

Ne lãmeka falɛfalɛ yeye aɖe dze tso ahɔhɔ̃meka aɖe me la, lãmetsiwo fiaa mɔe eye wogblɔna nɛ be “tɔ,” “dzo” alo “trɔ” va se ɖe esime wòaɖo afi si yim wòle. Ne womefia mɔ lãmeka falɛfalɛ siawo nyuie o la, woabu. Ale si nu siawo katã wɔa dɔ nukutɔe la nɔ te ɖe mɔfiame siwo woŋlɔ ɖe domenyiŋusẽfianua (DNA, ADN) me la dzi.

Togbɔ be míenya nu siawo hã la, nu gbogbo aɖewo gali siwo mímenya tso ale si ahɔhɔ̃a wɔa dɔe, ale si wòwɔna ɖoa ŋku nu dzi, ɖea seselelãmewo fiana kple ale si wòbua nuwo ŋu la nyuie o. Le gonyeme la, ale si ahɔhɔ̃a wɔa dɔe ɖeɖe dzaa fiam be ame aɖe si ƒe susu de ŋgɔ sãsãsã wu mía tɔ la li, eye mehiã be maƒo nu tso ale si ahɔhɔ̃a wɔa dɔe tsitotsito gɔ̃ hã ŋu o.

Nu kae na nèva zu Yehowa Ðasefo?

Ðasefoawo na mekpɔ kpeɖodziwo be Biblia nye Mawu ƒe Nya. Le kpɔɖeŋu me, menye dzɔdzɔmeŋutinunyagbalẽe Biblia nye o, gake ne ele nu ƒom tso dzɔdzɔmeŋutinunya ŋu la edena pɛpɛpɛ. Nyagblɔɖi siwo de pɛpɛpɛ hã le eme. Eye ame siwo wɔna ɖe emenyawo dzi la nɔa agbe nyui. Ale si mele agbe nɔm fifia la hã nye kpeɖodzi ɖeka. Tso esime meva zu Yehowa Ðasefo le ƒe 1973 me la, Bibliae nye agbalẽ vevitɔ si fiaa mɔm. Esia wɔe be nye dzi dze eme eye taɖodzinu va le nye agbe ŋu.