Dzo kpo yi emenuwo dzi

Dzo kpo yi emenuawo dzi

 NU SI BIBLIA GBLƆ

Tugbedzedze Alo Ðekadzedze

Tugbedzedze Alo Ðekadzedze

Ale si míebua míaƒe dzedzeme ate ŋu ana míakpɔ dzidzɔ loo alo míakpɔ dzidzɔ o.

Nu ka tae nu si nya kpɔ léa dzi na mí?

Ale si míaƒe susu tea ŋu dea dzesi nu si nya kpɔ nye nu si wɔ nuku. Biblia megblɔ ale si wòdzɔnae o gake eƒo nu tso nu si tae nu si nya kpɔ léa dzi na mí la ŋu elabena Mawu wɔ mí ɖe eƒe nɔnɔmewo nu. (1 Mose 1:27; Nyagblɔla 3:11) Ewɔ míaƒe ametia wonya kpɔ eye eƒe akpa vovovoawo wɔa dɔ nukutɔe. Esia ta hakpala aɖe si nɔ anyi le blema gblɔ be: “Mekafu wò [Mawu], elabena ale si nèwɔm la dzi ŋɔ eye wòwɔ nuku.”—Psalmo 139:14.

Gake zi geɖe la ale si amewo bua tugbedzedze alo ɖekadzedze egbea mesɔ o, eye ame siwo toa awuwo ƒe atsyãwo vɛ kple nyakakamɔnuwo koŋ gbɔe esia tso. Le agbalẽ aɖe (Body Image) ƒe nya nu la, numekuku siwo wowɔ le Europa kple Amerika ƒe dukɔ aɖewo me ɖee fia be, “ame geɖe mekpɔa ŋudzedze ɖe woƒe dzedzeme ŋu o ne wonye ame nyuiwo gɔ̃ hã. Ne wokpɔe be yewonya kpɔ ko hafi woƒe dzi dzea eme.” Susu totro sia ate ŋu ana míaŋe aɖaba aƒu nu vevitɔ si nye ame si míenye le dzi me la dzi.—1 Samuel 16:7.

Le dukɔ geɖe me la wotea gbe ɖe ame ƒe dzedzeme kple nu si ana ame ƒe nu nalé dzi na ame dzi

Nu bubu hãe nye dzadzraɖo si ana ame ƒe nu nalé dzi na ame, vevietɔ le nyɔnuwo gome. Le numekuku aɖe si Habɔbɔ aɖe (American Psychological Association) wɔ tso nyakakamɔnuwo ŋu le ƒe 2007 me ɖee fia be “nyɔnuwo dzrana ɖo be yewoƒe nu nalé dzi na ame.” Biblia de dzi ƒo na mí vevie be míagana nɔnɔme sia nakpɔ ŋusẽ ɖe mía dzi o, eye susu nyui aɖe tae!—Kolosetɔwo 3:5, 6.

“Migana miaƒe atsyɔ̃ɖoɖo nanye gota gome tɔ . . . o, ke boŋ mina wòanye dzi me ƒe ame ɣaɣla si nye gbɔgbɔ fatu si nɔa anyi kpoo la ƒe atsyɔ̃ɖoɖo si megblẽna o, si xɔ asi ŋutɔ le Mawu ŋkume.”1 Petro 3:3, 4.

Nu ka tae wònyo be míada asɔ?

Amewo gblɔna be, “ne èdze tugbe alo dze ɖeka la, ele be nàna amewo nakpɔe!” Habɔbɔ si ŋu míeƒo nu tsoe va yi gblɔ be le dukɔ siwo me susu sia xɔ aƒe ɖo me la, nyɔnuvi ƒewuiviwo kple esiwo meɖo ƒewuiwo me o la “dzea agbagba trɔa asi le woƒe dzedzeme ŋu be amewo nagblɔ be yewonya kpɔ.” Nuŋububu sia ate ŋu agblẽ nu. Le habɔbɔa ƒe nya nu la, eva le fu ɖem le hadomegbenɔnɔ kple lãmesẽnyawo me, eye  ate ŋu “agblẽ nu geɖe le ame ƒe seselelãme ŋu.” Nu siwo wòagblẽ dometɔ aɖewoe nye, “dzodzodzoetsitsi kple ŋudzedze makpɔmakpɔ ɖe ame ɖokui ŋu . . . , nu maɖumaɖu nyuie, sese le ame ɖokui me be yemele ɖeke me o kple blanuiléle.”

“Ðe dzivedonamenuwo ɖa le wò dzi dzi, eye nàtsri nu siwo agblẽ nu le ŋuwò, elabena sɔhɛmenɔnɔ kple ɖekakpuimenɔnɔ la, toflokoe wonye.”Nyagblɔla 11:10.

Nɔnɔme kae aɖee afia be míeɖɔa ŋu ɖo?

Biblia de dzi ƒo be ‘míaɖɔ ŋu ɖo’ alo awɔ nu le nunya me. (1 Timoteo 2:9) Le kpɔɖeŋu me: Ame siwo ɖɔa ŋu ɖo la bua nuwo ŋu nyuie, wometsia dzi ɖe woƒe dzedzeme ŋu fũu o, ke boŋ woda sɔ le ale si wobua wo ɖokuiwo me. Wobua ame bubuwo ŋu eya ta amewo kpɔa ŋudzedze ɖe wo ŋu, dea bubu wo ŋu eye vevietɔ wu la, Mawu kpɔa ŋudzedze ɖe wo ŋu. (Mika 6:8) Gawu la, wotea ŋu dzea xɔlɔ̃ vavãwo, eye wokpɔa ame siwo metsia dzi ɖe tugbedzedze alo ɖekadzedze ŋu fũu o ke boŋ ɖe srɔ̃ɖeɖe si anɔ anyi eteƒe nadidi ŋu la ɖena.

Susu nyui geɖewo li si tae Biblia xlɔ̃ nu mí be míaƒe susu nanɔ ame si míenye le ememe si nye “dzi me ƒe ame ɣaɣla” la ŋu. (1 Petro 3:3, 4) Tugbedzedze ememetɔ nu meyina o. Le nyateƒe me la, ne ɣeyiɣiawo va le yiyim la eganyona ɖe edzi! Lododowo 16:31 gblɔ be: “Ta ƒowɔ nye atsyɔ̃fiakuku, ne wokpɔe le dzɔdzɔenyenye ƒe mɔ dzi.” Eya ta èɖanye ɖevi alo ame tsitsi o, ame siwo wɔna ɖe Biblia ƒe aɖaŋuɖoɖo si de ŋgɔ sãsãsã dzi la dzea sii be tugbedzedze alo ɖekadzedze vavãtɔ nɔa anyi ɖaa eye wòhea bubu kple dzidzeme vanɛ na ame.

“Nyonyo la, beblee, eye tugbedzedze hã nu yina kaba, ke nyɔnu si vɔ̃a Yehowa la, eyae woakafu.”Lododowo 31:30.