ÐE NÈXƆE se be Biblia la tso Mawu gbɔa? Alo èsusu be amegbetɔwo ƒe susuwo sɔŋ koe le emea?

Ðikeke gakpɔtɔ le ame siwo gblɔna be Kristotɔwoe yewonye gɔ̃ hã me ku ɖe nya sia ŋu. Le kpɔɖeŋu me, numekuku aɖe (Gallup poll) si wowɔ le Amerika le ƒe 2014 me ɖee fia be, ame siwo gblɔna be Kristotɔwoe yewonye dometɔ akpa gãtɔ lɔ ɖe edzi be “Biblia la tso Mawu gbɔ le mɔ aɖe nu.” Le mɔ bubu nu la, ame ɖeka le atɔ̃ ɖe sia ɖe me bu Biblia be enye “blemagbalẽ si me nyakpakpawo, glitotowo kple ŋutinyawo le, eye amewo ƒe sededewoe woŋlɔ ɖe eme.” Nyaʋiʋli sia fia be ame geɖe tɔtɔ eye womenya afi si Biblia la dzɔ tso o, togbɔ be Biblia ŋutɔ gblɔ be “Ŋɔŋlɔ blibo la tso Mawu ƒe gbɔgbɔ me” hã.—2 Timoteo 3:16.

“ŊƆŊLƆ BLIBO LA TSO MAWU ƑE GBƆGBƆ ME”​—NU KAE NYA SIA FIA?

Agbalẽ suesue 66 ye ƒo ƒu wɔ Biblia la, eye ame vovovo 40 ye ŋlɔe le ɣeyiɣi ƒe didime si awu ƒe 1,600 me. Gake ne amewoe ŋlɔ Biblia la, ke nu ka tae wogblɔ be etso “Mawu ƒe gbɔgbɔ me”? Kpuie ko la, nyagbɔgblɔ tso “Mawu ƒe gbɔgbɔ me” fia be Mawu gbɔe nya siwo woŋlɔ ɖe emea tso. Biblia ŋutɔ gblɔ be: “Gbɔgbɔ kɔkɔe ye ʋã amewo wogblɔ Mawu ƒe nyawo ɖi.” (2 Petro 1:21) Ne míagblɔe bubui la, Mawu to gbɔgbɔ kɔkɔea si nye Eƒe dɔwɔŋusẽ makpɔmakpɔa dzi, tsɔ gbedeasia na Biblia ŋlɔlawo. Ðeko wòle abe ale si dɔtɔ aɖe nabia tso eƒe agbalẽŋlɔla si be wòaŋlɔ lɛta aɖe na ye ene. Menye ame si ŋlɔ lɛta la tɔe lɛtaa nye o ke boŋ ame si gblɔ nyawo nɛ wòŋlɔ la tɔe.

Biblia ŋlɔla aɖewo se Mawu ƒe gbedeasia tẽe tso mawudɔlawo gbɔ. Ame bubuwo kpɔ ŋutegawo tso Mawu gbɔ. Le go bubu mea, Mawu tsɔ eƒe gbedeasia na amewo to drɔ̃ewo me. Togbɔ be Mawu ɖe mɔ na amewo be woazã woawo ŋutɔwo ƒe nyawo atsɔ aŋlɔ eƒe gbedeasia hã la, ɣeaɖewoɣi la egblɔa nya siwo tututu woaŋlɔ la na wo tẽe. Le nudzɔdzɔawo katã me la, Mawu ƒe susuwoe woŋlɔ, ke menye woawo ŋutɔ tɔ o.

Aleke míawɔ aka ɖe edzi bliboe be Mawu ƒe gbɔgbɔe ʋã Biblia ŋlɔlawo? Na míade ŋugble le kpeɖodzi etɔ̃ siwo na míeka ɖe edzi be Mawu gbɔe Biblia tso la ŋu.