Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI | MAWU GBƆE BIBLIA TSO NYATEƑEA?

Biblia La—Ede Pɛpɛpɛ Le Go Sia Go Me

Biblia La—Ede Pɛpɛpɛ Le Go Sia Go Me

Ede Le Dzɔdzɔmeŋutinunya Gome

TOGBƆ be menye dzɔdzɔmeŋutinunyagbalẽe Biblia nye o hã la, ne ele nu ƒom tso dzɔdzɔmenuwo ŋu la edena pɛpɛpɛ. Na míade ŋugble le yamenutomenusɔsrɔ̃ kple domenyiŋusẽfianu (DNA alo AND), ŋu kpɔ.

YAMENUTOMENUSƆSRƆ̃—ALE SI TSI WƆNA DZANA

YAMENUTOMENUSƆSRƆ̃

Biblia gblɔ be: “[Mawu hea] tsi toŋtoŋwo yia dzii; wozua tsidzadza tso eƒe afu me; ale be alilikpowo dzanɛ.”—Hiob 36:27, 28.

Le afi sia la, Biblia ɖɔ mɔ etɔ̃ siwo dzi tsi tona dzana la nyuie. Mawu—Ame si gbɔ ɣea ƒe dzoxɔxɔ tso la—‘hea tsi toŋtoŋwo yia dzii’ to mɔ etɔ̃ siawo dzi (1) ɣea ƒe dzoxɔxɔ lɔa tsi si le abe afu ene yia dzi. (2) Tsia blana zua alilikpo eye wòkɔna ɖi alo (3) dzana. Va se ɖe egbea gɔ̃ hã la, yamenutomenusrɔ̃lawo mese ale si tututu tsi wɔna dzana la gɔme bliboe o. Mewɔ nuku o be Biblia bia be: “Ðe ame aɖe ate ŋu ase ɖoɖo si nu alilikpowo le” la gɔmea? (Hiob 36:29) Ke hã Wɔlaa ya nya ale si tsi wɔna dzana eye wòkpɔ egbɔ be ame siwo ŋlɔ Biblia la ƒo nu tso eŋu wòde pɛpɛpɛ. Ena amewo ŋlɔ nya sia xoxoxo hafi dzɔdzɔmeŋutinunyalawo va ŋɔ ɖe eme.

DOMENYIŊUSẼFIANU—ALE SI FUGBOE WƆNA TSINA

DOMENYIŊUSẼFIANU

Fia David si nye Biblia ŋlɔla gblɔ na Mawu be: “Wò ŋkuwo kpɔm esime menye ʋukɔe; eye woŋlɔ eŋu nuwo katã ɖe wò agbalẽ me.” (Psalmo 139:16) David ƒo nu tso ale si fugboe tsinae ŋu le hakpanya me be, woŋlɔe ɖe “agbalẽ” me alo wowɔ eŋu ɖoɖo do ŋgɔ. Ewɔ nuku be woŋlɔ nya siawo ɖi ƒe 3,000 aɖewoe nye esi va yi!

Ke hã le ƒe 1800-awo me hafi Austriatɔ numiemieŋutinunyala Gregor Mendel va ke ɖe ɖoɖo si nu domenyiŋusẽfianu wɔa dɔ le la ŋu. Eye nyitsɔ laa le April 2003 me hafi numekulawo va se ɖoɖo si nu domenyiŋusẽfianu (DNA alo AND), si me nyatakaka siwo katã hiã hafi ametia nate ŋu atsi nyuie wɔa dɔ le la gɔme bliboe. Dzɔdzɔmeŋutinunyalawo ɖɔ lãmetsi si le domenyiŋusẽfianua me be ele abe nyagɔmeɖegbalẽ si me nyagbe siwo me alfabetawo sɔ gbɔ ɖo la ene. Nyagbeawo fiaa mɔ domenyiŋusẽfianua. Mɔfiame siawo dzie fugboa ƒe akpa vovovoawo—abe susua, dzia, dzitodzitoawo kpakple asiwo kple afɔwo—zɔna ɖo eye wotsina le ɖoɖo si tututu nu wòle be woanɔ la nu eye ɖe ɣeyiɣi si tututu woɖo na wo la dzi. Esɔ be dzɔdzɔmeŋutinunyalawo ɖɔ domenyiŋusẽfianua be enye “agbegbalẽ.” Aleke David si nye Biblia ŋlɔla wɔ hafi te ŋu ƒo nu tso nya sia ŋu pɛpɛpɛ? Elɔ̃ ɖokuibɔbɔtɔe be: “Yehowa ƒe gbɔgbɔe ƒo nu to dzinye; eye eƒe nya le nye aɖe dzi.” *2 Samuel 23:2.

 Egblɔ Etsɔme Ði Wòde Pɛpɛpɛ

ESESẼ ŋutɔ, alo le mɔ bubu nu la, manya wɔ gɔ̃ hã be míanya ɣeyiɣi kple ale si fiaɖuƒewo kple duwo akpɔ ŋusẽ eye emegbe woava mu la o. Ke hã, Biblia gblɔ du sesẽwo kple du gãwo ƒe tsɔtsrɔ̃ ŋu nyawo ɖi tsitotsito. De ŋugble le eƒe kpɔɖeŋu eve ŋu kpɔ.

BABILON MU EYE WÒZU AƑEDO

Blema Babilon nye fiaɖuƒe sẽŋu aɖe si kpɔ ŋusẽ ɖe ɣetoɖoƒe Asia nutowo dzi ƒe alafa geɖe. Ɣeaɖeɣi va yi la, eyae nye du gãtɔ wu le xexea me. Ke hã, ƒe 200 aɖewo do ŋgɔ la, Mawu ƒe gbɔgbɔ ʋã Biblia ŋlɔla Yesaya wògblɔ ɖi be aʋafia si ŋkɔe anye Kores la aɖu Babilon dzi eye wòatsrɔ̃e ɖikaa. (Yesaya 13:17-20; 44:27, 28; 45:1, 2) Ðe nu sia dzɔ nyateƒea?

ŊUTINYA

Le zã aɖe me, le October ƒe 539 D.Y. la, Kores Gãtɔ ɖu Babilon dzi. Eteƒe medidi o, tɔsisi siwo dea tsi woƒe anyigbawo le nutoa me wònya kpɔna la me xe le esi wogblẽ wo ɖi ta. Kaka ƒe 200 K.Ŋ. naɖo la, du bliboa zu gbegbe. Egbea Babilon zu aƒedo. Abe ale si tututu Biblia gblɔe ɖi ene la, Babilon zu “aƒedo ɖikaa.”—Yeremiya 50:13.

Aleke Biblia ŋlɔlaa wɔ nya do ŋgɔ be nu siawo adzɔ pɛpɛpɛ le ŋutinya me? Biblia ɖee fia be nya sia nye “nya si Yesaya, Amoz vi, kpɔ ɖe Babilon ŋu le ŋutega” me.—Yesaya 13:1.

NINIWE—‘AƑU KPLAKPLAKPLA ABE GBEGBE ENE’

Niniwe nye Asiria Fiaɖuƒea ƒe fiadu, eye wobunɛ be enye du si wotso nyuie wònya kpɔ ŋutɔ. Mɔdodowo, tsaɖibɔwo, gbedoxɔwo kple fiasã gã nyadriwo bɔ ɖe dua me. Ke hã, nyagblɔɖila Zefaniya gblɔe ɖi be du gã nyakpɔ sia azu “aƒedo, eye wòaƒu kplakplakpla abe gbegbe ene.”—Zefaniya 2:13-15.

Babilontɔwo kple Mediatɔwo ƒe asrafowo wɔ ɖeka eye wotsrɔ̃ Niniwe gbidii le ƒe alafa adrelia D.Y. me. Numekuku aɖe gblɔ be du gã sia si dzi woɖu la “nu yi keŋkeŋ ƒe 2500 sɔŋ.” Ɣeaɖeɣi va yi la, amewo ke ɖi nenye be Niniwe dua nɔ anyi kpɔ gɔ̃ hã! Le ƒe alafa 19 lia ƒe domedome lɔƒo hafi tomenukulawo va ke ɖe Niniwe dua ƒe glikpowo ŋu. Egbea, teƒe ma le gbegblẽm ɖe edzi ale gbegbe be habɔbɔ aɖe (Global Heritage Fund) gblɔ be: “Blema Niniwe dua ƒe glikpo siwo susɔ la abu kura.”

Aleke Zefaniya wɔ hafi nya nu siawo do ŋgɔ? Egblɔ be enye “Yehowa ƒe gbe si va [nam].”—Zefaniya 1:1.

 Biblia La Ðo Agbemebiabia Vivitɔwo Ŋu

BIBLIA ɖo agbemebiabia vivitɔwo ŋu wo me kɔ nyuie. De ŋugble le kpɔɖeŋu siwo gbɔna ŋu kpɔ.

NU KA TAE NU VLO WƆWƆ KPLE FUKPEKPE BƆ ÐE XEXEA ME?

Ŋɔŋlɔawo ƒo nu tso nu si gbɔ nu vlo wɔwɔ kple fukpekpe tso ŋu eme kɔ. Biblia ɖe eme ale:

  1. “Amegbetɔ ɖua fia ɖe amegbetɔ dzi hena eƒe gbegblẽ.”Nyagblɔla 8:9.

    Ŋutete mele amegbetɔwo ŋu o eye dziɖuɖumegãwo ƒe anukwaremaɖimaɖi he fukpekpe geɖe vɛ.

  2. “Azãgbe kple nuɖiɖeame li na wo katã.”Nyagblɔla 9:11.

    Nu siwo míele mɔ kpɔm na o—abe dɔ vɔ̃wo, afɔkuwo, alo dzɔdzɔmefɔkuwo ene—ate ŋu adzɔ ɖe mía dometɔ ɖe sia ɖe dzi le vo me.

  3. “To ame ɖeka dzi nu vɔ̃ va xexea me, eye to nu vɔ̃ me ku la va.”Romatɔwo 5:12.

    Amegbetɔwo ƒe blibomademade kple ku menɔ anyi le gɔmedzedzea me esi wowɔ ŋutsu kple nyɔnu gbãtɔ o. Nu vɔ̃ “va xexea me” esi ame eve mawo ɖoe koŋ gbe toɖoɖo wo Wɔlaa.

Menye nu si tae amegbetɔwo kpea fu ŋu nya koe Biblia gblɔ o. Edo ŋugbe be Mawu aɖe vɔ̃ɖinyenye ɖa eye “atutu aɖatsi sia aɖatsi ɖa le woƒe ŋkume, eye ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o.”—Nyaɖeɖefia 21:3, 4.

NU KAE DZƆNA ÐE MÍA DZI NE MÍEKU?

Biblia ɖe eme be ne ame ku la meganyaa naneke kura o eye magate ŋu awɔ naneke hã o. Nyagblɔla 9:5 gblɔ be: “Agbagbeawo nyae be yewogbɔna kuku ge, ke kukuawo meganya naneke kura o.” Ne ame ku la, “eƒe tamesusuwo katã nu yina.” (Psalmo 146:4) Eya ta le ku me la, susua dzudzɔa dɔwɔwɔ, eye ŋku, ŋɔti, to kple ŋutinu bubuawo hã megawɔa dɔ o. Míate ŋu aʋã, alé nu kpɔ alo abu tame ne míeku o.

Gawu la, menye nɔnɔme si me ame kukuwo le koe Biblia gblɔ o. Ke egblɔ tsitretsitsi si dzi woato agbɔ agbe ame siwo le alɔ̃ dɔm le ku me ŋu nya dodzidzɔname aɖe hã ɖi.—Hosea 13:14; Yohanes 11:11-14.

TAMEÐOÐO KAE LE AGBEA ŊU?

Biblia gblɔ be, Yehowa Mawue wɔ ŋutsu kple nyɔnu. (1 Mose 1:27) Woyɔ ŋutsu gbãtɔ, Adam be “Mawu ƒe vi.” (Luka 3:38) Taɖodzinu  si ta wowɔ ame ɖoe nye be, xɔlɔ̃wɔwɔ ƒe kadodo nanɔ eya kple Fofoa si le dziƒo la dome eye wòakpɔ dzidzɔ ahase vivi le anyigba dzi tegbee. Eya ta wode ŋutetea amegbetɔwo katã me be woadi be woasubɔ Mawu eye woasrɔ̃ nu tso eŋu. Esia tae Biblia gblɔ be: “Dzidzɔtɔwoe nye ame siwo nyae be gbɔgbɔmenuwo hiã yewo.”—Mateo 5:3.

Biblia gado ŋugbe be: “Dzidzɔtɔwoe nye ame siwo le Mawu ƒe nya la sem, eye wole edzi wɔm!” (Luka 11:28) Menye ɖeko Biblia fia nu mí tso Mawu ŋu ko evɔ o, ke boŋ ekpena ɖe mía ŋu be míakpɔ dzidzɔ le agbe me eye míanɔ mɔ kpɔm na nu nyuiwo le etsɔme.

Te Ðe Mawu Si Nye Biblia La Ŋlɔla Ŋu

LE KPEÐODZIA me dzodzro vɔ megbe la, ame miliɔn geɖe siwo le xexea me godoo ƒo nya ta be Biblia la de ŋgɔ boo wu blemagbalẽ dzro aɖe ko. Woxɔe se bliboe be Mawu ƒe gbɔgbɔe ʋã amewo woŋlɔ eƒe Nya, Biblia si dzi wòtona ƒoa nu na amegbetɔwo katã—wò hã ele eme! Mawu to Biblia la dzi le kpewòm be nàdze si ye eye nàzu ye xɔlɔ̃. Biblia do ŋugbe be: “Mite ɖe Mawu ŋu, eye ate ɖe mia ŋu.”—Yakobo 4:8.

Biblia me dzodzro tsitotsito ahe nu nyuiwo vɛ na wò le etsɔme. Nu nyui kawoe? Abe ale si ko agbalẽ aɖe xexlẽ ana nàva nya eŋlɔla ƒe susu nyuie wu la, Biblia xexlẽ hã akpe ɖe ŋuwò nàva nya Mawu ame si ƒe gbɔgbɔe ʋã amewo woŋlɔ Biblia la ƒe susuwo kple seselelãmewo nyuie. Bu nu si gbegbe esia anye na wò ŋu kpɔ. Àte ŋu ava nya Wɔlaa ƒe didiwo kple seselelãmewo! Tsɔ kpe ɖe eŋu la, Biblia na míenya

Àdi be yeagasrɔ̃ nu geɖe akpea? Adzɔ dzi na Yehowa Ðasefowo be yewoakpe ɖe ŋuwò. Woawɔ ɖoɖo asrɔ̃ Biblia kpli wò faa femaxee. Esia akpe ɖe ŋuwò nàte ɖe Yehowa Mawu, ame si ƒe gbɔgbɔe ʋã amewo woŋlɔ Biblia la ŋu.

Nyati sia dzro kpeɖodzi aɖewo siwo ɖee fia be Mawu ƒe gbɔgbɔe ʋã amewo hafi woŋlɔ Biblia la me. Àte ŋu axlẽ nu geɖe tso nya sia ŋu le agbalẽ si nye Nu Kae Biblia Fia Mí? ƒe ta 2 lia me. Yehowa Ðasefowoe tae. Àkpɔe le Internet hã dzi le www.jw.org/ee, alo nàtsɔ QR-xlẽnu aɖe foto dzesi sia

Àte ŋu akpɔ video si nye Ame Kae Nye Biblia La Ŋlɔla? si le Internet hã dzi le www.jw.org/ee

Àkpɔe le AGBALẼWO > VIDEOWO

^ mm. 10 Biblia na míenya be Mawu ƒe ŋkɔe nye Yehowa.—Psalmo 83:18.