Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  No. 3 2016

 NU SI BIBLIA GBLƆ

Xɔse

Xɔse

Ame aɖewo gblɔna be mawusubɔlawoe yewonye, gake womese nu si “xɔse” fia la gɔme o. Nu kae nye xɔse, nu ka tae xɔse le vevie?

Nu kae nye xɔse?

NYA SIWO AME AÐEWO GBLƆNA

Ame geɖe susuna be ame si si xɔse le la xɔa nane si ŋu kpeɖodzi mele o la dzi se. Le kpɔɖeŋu me, bu ame aɖe si doa vevie mawusubɔsubɔ si gblɔna be, “Mexɔ Mawu dzi se” la ŋu kpɔ. Ne wobia ame ma be, “Nu ka tae nèxɔ Mawu dzi se” hã la? ate ŋu aɖo eŋu be, “Nenemae wohem” alo, “Nu mae wofiam ɣesiaɣi.” Ne ame aɖe ɖo nya ŋu alea la, efia be ɖewohĩ vovototo vi aɖe le xɔse ƒe amesinɔnɔ kple nu sia nu dzi xɔxɔ se dome.

NYA SI BIBLIA GBLƆ

“Xɔse nye dziɖoɖo ɖe nu si wole mɔ kpɔm na la ŋu kakaɖedzitɔe kple kpeɖodzi si dze ƒãa be nu siwo kpɔm womele o la li ŋutɔŋutɔ.” (Hebritɔwo 11:1) Be ame aɖe naɖo dzi ɖe nane si wòle mɔ kpɔm na ŋu la, ele be kpeɖodzi sẽŋu nanɔ esi. Le nyateƒe me la, le gbegbɔgblɔ gbãtɔ me la, nya “dziɖoɖo ɖe nu si wole mɔ kpɔm na la ŋu” fia nu si yi ŋgɔ wu seselelãme dzro aɖe alo asusu nane dzro ko. Eya ta xɔse fia be woaka ɖe nane si ŋu kpeɖodzi le la dzi.

[Mawu] ƒe nɔnɔme makpɔmakpɔawo dzena gaglãa wokpɔna tso xexea wɔwɔ dzi, elabe wodze ƒãa le nu siwo wòwɔ la me, ɛ̃, eƒe ŋusẽ mavɔmavɔ kple Mawunyenye la dzena.”Romatɔwo 1:20.

Nu ka tae wòle vevie be xɔse nanɔ asiwò?

NYA SI BIBLIA GBLƆ

“Ne xɔse mele ame si o la, mate ŋu adze Mawu ŋu nyuie o, elabena ele be ame sia ame si tena vaa Mawu gbɔ la naxɔe ase be eli, eye wònyea teƒeɖola na ame siwo dinɛ vevie la.”—Hebritɔwo 11:6.

Abe ale si míegblɔe va yi ene la, ame geɖe xɔ Mawu dzi se le esi wofia wo be Mawu li ta. Ðewohĩ woagblɔ be ‘nenemae wohem.’ Gake Mawu di be ame siwo dea ta agu na ye la naka ɖe edzi bliboe be yeli, eye yenye Mawu si lɔ̃a ame. Esia hã le susu siwo ta Biblia te gbe ɖe ale si wòhiãe be míadi Mawu vevie ale be míate ŋu adze sii nyuie la dzi.

“Mite ɖe Mawu ŋu, eye ate ɖe mia ŋu.”Yakobo 4:8.

 Aleke nàwɔ hafi xɔse nasu asiwò?

NYA SI BIBLIA GBLƆ

Biblia gblɔ be “nu si wose la mee xɔse tsona.” (Romatɔwo 10:17) Nu gbãtɔ si míawɔ be míaƒe Mawu dzi xɔse me nasẽ ye nye be míaɖo to ‘ase’ nu si tututu Biblia fia tso xɔse ŋu. (2 Timoteo 3:16) Biblia sɔsrɔ̃ akpe ɖe ŋuwò be nàkpɔ ŋuɖoɖo siwo ŋu kpeɖodzi le na biabia veviwo abe esiawo ene: Ame kae nye Mawu? Nu kae ɖo kpe edzi be Mawu li? Ðe Mawu tsɔa ɖe le eme nama? Tame kae Mawu ɖo ɖe etsɔme ŋu?

Kpeɖodzi gbogbowo ƒo xlã mí be Mawu li

Adzɔ dzi na Yehowa Ðasefowo be yewoakpe ɖe ŋuwò nàsrɔ̃ Biblia. Abe ale si míegblɔe le míaƒe nyatakakadzraɖoƒe si nye jw.org/ee ene la, “edoa dzidzɔ na Yehowa Ðasefowo be yewoafia Biblia amewo, gake míezinɛ ɖe ame aɖeke dzi gbeɖe be wòaɖo míaƒe haa me o. Ke boŋ míegblɔa Biblia me nyawo na amewo ameŋububutɔe, eye míenyae be gome le ame sia ame si be wòanɔ subɔsubɔha si eya ŋutɔ lɔ̃ la me.”

Míagblɔ atsɔ aƒo eta be, ele be ŋutɔ nàxlẽ Biblia be nàkpɔ kpeɖodzi vavã na nu siwo dzi nèxɔ se. Ne èwɔe nenema la, ànɔ ƒe alafa gbãtɔ me nusrɔ̃vi aɖewo ƒe kpɔɖeŋu srɔ̃m elabena, “woxɔ nya la kple dzi faa, eye wonɔa Ŋɔŋlɔawo me dzrom tsitotsito gbe sia gbe be yewoakpɔ ɖa be nya siawo le eme hã.”—Dɔwɔwɔwo 17:11.

“Esiae nye agbe mavɔ la bena woanya wò, Mawu vavã ɖeka la, kple Yesu Kristo si nèdɔ ɖa la.”Yohanes 17:3.