Dzo kpo yi emenuwo dzi

Dzo kpo yi emenuawo dzi

Dzeɖoɖo le abe tɔdzisasrã si le wò kple viwòwo dome ene

 NA DZILAWO

5: Dzeɖoɖo

5: Dzeɖoɖo

NU SI WÒFIA

Dzeɖoɖo si tso dzi me ye nye esi me dzilawo kple wo viwo siaa ɖea woƒe susuwo kple seselelãmewo gblɔna le.

NU SI TA WÒLE VEVIE

Ate ŋu ava sesẽ be woaɖo dze kple sɔhɛwo. Agbalẽ aɖe (Breaking the Code) gblɔ be, Tsãa, “ɖeko wòle abe ɖe nèle fefewɔlawo gbɔ le fefewɔƒe aɖe eye àte ŋu akpɔ nu sia nu si wɔm viwòa le le afi si fefewɔlawo ɖeɖe le la ene. Gake fifia, eva le ko abe ɖe nèva nɔ anyi ɖe nukpɔlawo dome eye màgate ŋu akpɔ viwòa le afi si fefewɔlawo ɖeɖe le o ene.” Ne edze abe viwòa medi be miaɖo dze o ene hã la, ɣeyiɣi sia mee wòhiã be mianɔ dze ɖom wu!

NU SI NÀTE ŊU AWƆ

Ðo dze kple viwòa ɣesiaɣi si wòdi. Wɔ esia ne eva hiã be nànɔ zã dzi aɖo dze kplii gɔ̃ hã.

“Ðewohĩ ava susu me na wò be nàgblɔ be, ‘Fifia hafi nèdi be yeaɖo dzea? Menɔ gbɔwò ŋkeke bliboae!’ Gake ɖe wòle be míahe nya ne mía viwo di be yewoagblɔ yewoƒe dzimenyawo na mía? Ðe menye esia dim dzila ɖe sia ɖe le oa?”—Lisa.

“Togbɔ be medina be mamlɔ anyi kaba hã la, zi geɖe la, zãtiƒe koŋue meɖoa dze kple vinye sɔhɛwo wu.”—Herbert.

BIBLIA ƑE MƆFIAME: “Ame aɖeke meganɔ eya ŋutɔ ƒe nyonyo ko dim o, ke nedi ame bubu tɔ hã.”—1 Korintotɔwo 10:24.

Mègana naneke nahe wò susu o. Vifofo aɖe gblɔ be: “Mede dzesii be zi geɖe nye susu nɔa nu bubuwo ŋu ne vinyewo le nu ƒom nam. Gake wonyana be nye susu mele yewo ŋu o!”

Ne wò nɔnɔmea sɔ kple esia la, ekema tsi television kple elektrɔnikmɔ̃ bubuwo. Na wò susu nanɔ nya si gblɔm viwòa le ŋu, eye nu si ŋu wòtsi dzi ɖo nanɔ vevie na wò wu nu sia nu, ne nya si gblɔm wòle dze ɖevinya hã.

“Ele be míana mía viwo nase le wo ɖokui me be, nu si ŋu wotsi dzi ɖo la le vevie na mí. Ne wokpɔe be míetsɔ ɖeke le eme na yewo o la, womagagblɔ woƒe nyawo na mí o eye woatrɔ ɖe ame bubuwo ŋu.”—Maranda.

“Ne viwòa ƒe nyawo mesɔ o gɔ̃ hã, mègado dziku o.”—Anthony.

BIBLIA ƑE MƆFIAME: “Milé ŋku ɖe ale si mieɖoa toe ŋu nyuie.”—Luka 8:18.”

Miɖo dze le vo me. Ɣeaɖewoɣia, ɖeviwo ɖoa dze kple wo dzilawo bɔbɔe wu ne womeɖoe be yewoaɖo dze ŋutɔŋutɔ o.

“Míeɖoa dze kpli wo ne míele ʋu me. Ne míeɖo dze le vo me la enɔa bɔbɔe wu be míaɖoe koŋ be míaɖo dze.”—Nicole.

Nuɖuɣiwo hã nyo na dzeɖoɖo le vo me.

“Le míaƒe fiẽ nuɖuɣiwo la, ame sia ame gblɔa nu nyui kple nu manyomanyo siwo dzɔ ɖe edzi le ŋkekea me. Esia nana míewɔa ɖeka eye mehiã be kuxia nanye agba na ame ma ɖeka o.”—Robin.

BIBLIA ƑE MƆFIAME: “Ame sia ame naɖe abla le nusese me, [eye wòanɔ] blewu le nuƒoƒo me.”—Yakobo 1:19.