Dzo kpo yi emenuwo dzi

Dzo kpo yi emenuawo dzi

Ne ame si nènye le vevie na wò la, àte ŋu anɔ te ɖe nɔnɔme sesẽwo nu

 NA SƆHƐWO

9: Ame Si Nènye

9: Ame Si Nènye

NU SI WÒFIA

Menye wò ŋkɔ kple wò dzedzeme koe fia ame si nènye o. Nu siwo nu nènɔa agbe ɖo, wò dzixɔsewo kple nɔnɔme si le asiwò hã le eme. Le nyateƒe me la, nu sia nu si ɖɔ ame si nènye le gota kple ememe ye fiaa ame si nènye.

NU SI TA WÒLE VEVIE

Ne ame si nènye le vevie na wò la, àlé nu siwo dzi nèxɔ se la me ɖe asi eye màɖe mɔ hawòtiwo nanɔ nu ɖom na wò o.

“Ame geɖe le abe amewɔwɔe siwo le fiasewo me ene. Menye woawo ŋutɔwoe tia woƒe nudodowo o; amewoe tia awuawo eye wodonɛ na wo.”—Adrian.

“Mesrɔ̃ ale si matɔ afɔ to awɔ nu si nyo ne ewɔwɔ sesẽ nam gɔ̃ hã. Ne meɖe dzi ɖi le xɔ̃nye siwo dea bubu nu siwo nu menɔa agbe ɖo ŋu dome la, mekpɔnɛ be wonye xɔlɔ̃ nyuiwo nam.”—Courtney.

BIBLIA ƑE MƆFIAME: “Midzudzɔ agbenɔnɔ ɖe nuɖoanyi sia ƒe nɔnɔme nu, ke boŋ mitrɔ miaƒe nɔnɔme to miaƒe tamesusu wɔwɔ yeyee me.”—Romatɔwo 12:2.

NU SI NÀTE ŊU AWƆ

Bu ame si ƒomevi nènye fifia kple ame si nèdi be yeava nye la ŋu to ŋugbledede le nu siwo nèwɔna nyuie, nu siwo me nègbɔdzɔ le kple nu siwo dzi nèka ɖo la ŋu me. Mɔ nyui aɖe si dzi nàto awɔ esiae nye be nàɖo biabia siwo gbɔna la ŋu.

Nu siwo nèwɔna nyuie: Nu kawo mee mebi ɖo? Nu kawo mee medoa vevie le? (Le kpɔɖeŋu me: Ðe menɔa game dzia? Ðe meɖua ɖokuinye dzia? Ðe medoa vevie dɔa? Ðe menyoa dɔmea?) Nu nyui kawoe mewɔna?

AÐAŊUÐOÐO: Ðe wòsesẽ na wò be nàde dzesi nu nyui siwo nèwɔnaa? Ke bia dziwòla alo xɔ̃wò aɖe si dzi nèka ɖo wòagblɔ nu siwo nèwɔna nyuie kple nu siwo me wodzena le la na wò.

BIBLIA ƑE MƆFIAME: “Ame sia ame nadzro eya ŋutɔ ƒe nuwɔnawo me kpɔ, ekema akpɔ susu si ta wòatso aseye le eya ŋutɔ ɖokui ɖeɖe ŋu, ke menye le eɖokui tsɔtsɔ sɔ kple ame bubu me o.”—Galatiatɔwo 6:4.

Nu siwo me nègbɔdzɔ le: Nye nɔnɔme ka ŋue wòhiã be magatrɔ asi le? Ɣeyiɣi kawoe wòate ŋu anɔ bɔbɔe be mana ta le tetekpɔwo me? Nu kawo mee wòahiã be magaɖu ɖokuinye dzi le wu?

BIBLIA ƑE MƆFIAME: “Ne míegblɔna be, “Nu vɔ̃ mele mía ŋu o” la, ekema míele mía ɖokuiwo flum.”—1 Yohanes 1:8.

Nu siwo dzi nèka ɖo: Mɔfiame kawo nue menɔa agbe ɖo, eye nu ka tae? Ðe mexɔ Mawu dzi sea? Nu kawoe na meka ɖe edzi be eli? Nu kawoe mebuna be womesɔ o, eye nu ka tae? Nu kawoe mele mɔ kpɔm na be woadzɔ le etsɔme?

BIBLIA ƑE MƆFIAME: “Tamebubuŋutete adzɔ ŋuwò, eye nugɔmesese akpɔ tawò.”—Lododowo 2:11.