Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  No. 2 2017

Spain ƒe blemaxɔwo kple nu siwo ku ɖe woƒe dekɔnuwo ŋu la le Toledo. Le ƒe 1986 me la, wotia Toledo kpe ɖe teƒe siwo tsaɖilawo ayi akpɔ Blemanuwo le xexea me la ŋu

 DUKƆWO KPLE AMEWO

Tsaɖiɖi Yi Spain

Tsaɖiɖi Yi Spain

AME ƒomevi vovovowo kple nu vovovowoe le Spain. Lugblewo, waingblewo kple amitigblewo xɔ Spain dukɔa ƒe akpa geɖe. Atsiaƒu si ƒe kekeme nye kilometa 14 koe tso Spain ƒe anyiehe kple Afrika dome.

Foiniketɔwo, Helatɔwo kple Carthagetɔwoe ʋu va tsi Europa ƒe anyieheɣetoɖoƒe dukɔ sia me. Esi Romatɔwo va ɖo afi ma le ƒe alafa etɔ̃lia Do Ŋgɔ Na Yesu (D.Y.) me la, wotrɔ ŋkɔ na teƒe sia si woxɔ la be Hispania. Emegbe Visigottɔwo kple Moortɔwoe va nɔ afi ma eye woƒe dekɔnuwoe xɔ teƒea.

Le nyitsɔ laa ƒe ƒe aɖe me la, ame siwo wu miliɔn 68 ye ɖi tsa yi Spain. Tsaɖilawo dometɔ geɖe yia afi ma le ŋdɔkutsu ƒe ʋuʋu, woƒe ƒuta siwo nya kpɔ, dukɔa ƒe aɖaŋudɔwo, blemanuwo kple ale si woƒe xɔwo nya  kpɔe ta. Spaintɔwo ƒe nuɖuɖuwo hã doa dzidzɔ na tsaɖila geɖe. Nuɖuɖu siawo dometɔ aɖewoe nye, bɔlu, fɔlĩ, halã, tadi viviwo, salada, kple amagbe siwo woɖa alo wodzaba kple ami. Spaintɔwo ƒe koklozi tɔtɔe, mɔlu si wotsɔ bɔlu kple nu vovovowo tsaka ɖa kple numeɖenu si woyɔna be tapas nye nuɖuɖu siwo wonya le xexea ƒe afi sia afi.

Mariscada, nye nuɖuɖu si me bɔlu, fɔlĩ kple bubuawo le

Wole ɣe si nye flamenco ɖum

Spaintɔwo kɔa mo ɖe ame eye wodoa vivi ɖe ame ŋu ŋutɔ. Wo dometɔ geɖe gblɔna be Roma Katolikotɔwoe yewonye gake ʋɛ aɖewo koe dea Misa. Nyitsɔ laa la, ame gbogbo aɖewo tso Afrika, Asia, kple Latin Amerika ʋu va tsi Spain. Edzɔa dzi na wo dometɔ geɖe be yewoaƒo nu tso yewoƒe dzixɔsewo kple dekɔnuwo ŋu. Yehowa Ðasefowo ɖoa dze viviwo kple wo dometɔ geɖe eye wokpe ɖe wo ŋu wosrɔ̃ nu si Biblia fia tso nu geɖewo ŋu.

Le ƒe 2015 me la, Ðasefo siwo wu 10,500 tsɔ wo ɖokuiwo na faa eye wotu woƒe tadeaguƒe si woyɔna be Fiaɖuƒe Akpata 70 alo dzra wo ɖo. Dɔwɔƒe siwo kpɔa anyigbanyawo gbɔ la na anyigba wo be woatu woƒe tadeaguƒeawo ƒe ɖewo. Esi Yehowa Ðasefowo di be yewoakpe ɖe ame siwo ʋu va tsi dukɔa me ŋu ta la, wowɔa kpekpewo le gbegbɔgblɔ siwo wu 30 me kpe ɖe Spaingbea ŋu. Le ƒe 2016 me la, ame siwo wu 186,000 ye de kpekpe tɔxɛ aɖe si Yehowa Ðasefowo wɔ tsɔ ɖo ŋku Yesu Kristo ƒe kua dzi.