Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  No. 1 2017

 NYATI SI LE AKPAA DZI

Sɔhɛwo Ƒe Blanuiléledɔ—Nu Ka Gbɔe Wotso? Nu Kae Akpe Ðe Wo Ŋu?

Sɔhɛwo Ƒe Blanuiléledɔ—Nu Ka Gbɔe Wotso? Nu Kae Akpe Ðe Wo Ŋu?

ANNA * gblɔ be: “Ne nane te ɖe dzinye melé blanui vie la, naneke wɔwɔ medzroam o, nyemedina be mawɔ nu siwo melɔ̃a wɔwɔ zi geɖe la gɔ̃ hã o. Alɔ̃ koe medina be madɔ. Ewɔna nam be womelɔ̃m o, nyemeɖi naneke o eye mezu agba na amewo.”

Julia hã gblɔ be: “Mebui kpɔ be mawu ɖokuinye. Evɔ menye ɖe medi be maku ŋutɔŋutɔ o. Ðeko medi be ale si menɔ sesem le ɖokuinye me la nu natso. Metsɔa ɖe le eme na amewo ŋutɔ, gake ne melé blanui la, nyemegatsɔa ɖeke le eme na ame aɖeke loo alo na naneke o.”

Ðeko Anna kple Julia ɖo woƒe sɔhɛ me teti koe nye ma blanuiléledɔ ɖe fu na wo zi gbãtɔ. Togbɔ be sɔhɛwo tea ŋu léa blanui vie ɣeaɖewoɣi hã, Anna kple Julia ƒe blanuilélea ya xɔ kwasiɖa aɖewo alo ɣleti aɖewo gɔ̃ hã. Anna gblɔ be: “Ðeko wòle abe nàxaxa ɖe do globoo doviviti aɖe si me màte ŋu ado le o me ene. Awɔ na wò abe ɖe wò tagbɔ le gbegblẽm eye mègale ame me o ene.”

Menye Anna kple Julia koe kuxi sia ɖea fu na o. Sɔhɛ geɖewo va le blanuiléledɔ lém fifia ŋutɔ, eya ta Xexea Me Lãmesẽ Habɔbɔ ka nya ta be, “blanuiléle koŋ gbɔe wòtsona be ŋutsuvi kple nyɔnuvi siwo xɔ tso ƒe 10 va se ɖe 19  la ƒe lãme gblẽna, wogbɔdzɔna eye woƒe susu mewɔa dɔ nyuie o.”

Blanuiléledɔ ƒe dzesi siwo ate ŋu adze le ɖevi si le sɔhɛ me ɖom ŋu ƒe ɖewoe nye alɔ̃dɔdɔ fũu, alɔ̃madɔmadɔ nyuie, nuɖuɖu fũu akpa, numaɖumaɖu nyuie kple lolo alo kuɖiɖi. Bubuwo hã ate ŋu anye dzodzodzoetsitsi, mɔkpɔkpɔbuɖeame, nuxaxa kple sese le ame ɖokui me be yemeɖi naneke o. Ðewo hãe nye ame ɖokui ɖeɖe ɖe aga, susu ƒe nu ŋu manɔmanɔ alo nuŋlɔbe, ame ɖokui wuwu ƒe susuwo alo nuwɔna kple nɔnɔme siwo ŋu ɖɔktawo menya nu tsoe o. Dzesi aɖewo siwo dzena le ame ŋu hena kwasiɖawo eye wonana ame ƒe gbe sia gbe nuwɔna trɔna dzie tagbɔdɔdalawo nɔa te ɖo ƒoa nya ta be blanuiléledɔe le fu ɖem na ame.

NU SIWO GBƆ SƆHƐWO ƑE BLANUILÉLEDƆ ATE ŊU ATSO

Xexea Me Lãmesẽ Habɔbɔa gblɔ be: “Nu siwo me ame to, nu siwo dome wònyi kple nu siwo ŋu wòbuna gbɔe blanuiléledɔ tsona.” Esiawo dometɔ aɖewoe nye:

Ƒome si me ame tso, atike muamewo zazã. Abe ale si wòle le Julia gome ene la, blanuiléledɔ le ƒome aɖewo me si wɔnɛ be zi geɖe la, ƒome mawo me tɔwo tea ŋu léa dɔa. Nu bubu siwo hã gbɔ dɔa tsonae nye dzidɔ alo ʋukamedɔléle aɖewo siwo nana lãmetsi aɖewo mewɔa dɔ nyuie o kple atikemuamewo zazã ɣeyiɣi didi hã ate ŋu ana dɔa nanyra. *

Nuteɖeamedzi. Megblẽ naneke ne nu te ɖe sɔhɛ aɖe dzi vie o, gake ne nu te ɖe edzi ɣeyiɣi didi alo vevie la, ate ŋu agblẽ nu le eƒe ametia kple susua ŋu, esia wɔnɛ be ɣeaɖewoɣia sɔhɛ siwo le seselelãmekuxiwo me tom xoxo, alo esiwo blanuiléledɔ le ƒome na la nalé dɔa. Togbɔ be ele alea hãa, ame aɖeke menya nu si gbɔ tututu blanuiléledɔ tsona o, ɖewohĩ nu geɖewo gbɔe wòtsona abe ale si míegblɔe va yi ene.

 Nu siwo nana nu tena ɖe ame dzi wòléa blanui ate ŋu anye ame dzilawo ƒe wo nɔewo gbegbe alo kaklã ɖa, ame vevi ƒe ku, ameƒoƒo alo ame gbɔ dɔdɔ sesẽe, afɔku sesẽ aɖe dzedze, dɔléle alo ne ɖevi aɖe menyaa nu o, eye vevietɔ ne ɖevia sena le eɖokui me be wometsɔa ɖeke le eme na ye o. Nu bubu hã ate ŋu anye ne dzilawo kpɔa mɔ be wo vi aɖe nawɔ nu siwo gbɔ eƒe ŋutete ŋu, ɖewohĩ le eƒe agbalẽsrɔ̃nyawo me. Ðewo hãe nye ne wowɔa ŋlɔmi le ame ŋu, ne ame tsi dzi ɖe etsɔme ŋu kple ame dzila si le blanuiléledɔ lém la ƒe nuwɔwɔ ɖe ame ŋu tramatrama. Ne ɖevi aɖe lé blanui le nu siawo dometɔ aɖe ta la, nu kae ate ŋu akpe ɖe eŋu?

LÉ BE NA WÒ AMETIA KPLE WÒ SUSU

Wotea ŋu tsɔa atike aɖewo siwo tagbɔdɔléleŋutinunyalawo nana kple woƒe aɖaŋuɖoɖowo léa blanuiléledɔ si nu sẽ la nu. * Yesu Kristo gblɔ be: “Ame siwo le lãmesẽ me la mehiã gbedala o, negbe ame siwo le dɔ lém ko.” (Marko 2:17) Eya ta dɔléle ate ŋu aɖe fu na míaƒe ametia ƒe akpa sia akpa, ate ŋu aɖe fu na míaƒe susu hã! Anyo hã be míaɖe asi le agbe aɖewo siwo míenɔna tsã la ŋu le esi susua kple ametiae wɔa dɔ aduadu ta.

Ne èle blanuiléledɔ lém la, dze agbagba nànɔ nu siwo ana wò susu nawɔ dɔ nyuie eye nànɔ lãmesẽ me la wɔm. Le kpɔɖeŋu me, ɖu nu siwo me amenyinu le, dɔ alɔ̃ wòasu wò nyuie eye nànɔ kame dem edziedzi. Kamedede nana lãmetsi siwo nana dzi dzɔa ame dzana ɖe lãme na ame, enana ŋusẽ ɖoa ame ŋu eye wònana wodɔa alɔ̃ nyuie. Ne anya wɔ la, dze agbagba nàde dzesi nu siwo hoa dɔ sia na wò eye nàwɔ nu siwo nàtsɔ alé enu la ŋuti ɖoɖo ɖi. Gblɔ wò dɔlélea ŋu nya na ame aɖe si dzi nèka ɖo. Wò ƒomea me tɔwo kple xɔlɔ̃wo ƒe alɔdodo wò ate ŋu akpe ɖe ŋuwò nànɔ te ɖe dɔlélea nu eye ɖewohĩ ana wòaka ɖe eme na wò gɔ̃ hã. Ŋlɔ  nu siwo vaa susu me na wò kple wò seselelãmewo ɖe agbalẽ aɖe me—nu siae kpe ɖe Julia si ƒe nya míegblɔ va yi la ŋu. Vevietɔ wu la, kpɔ egbɔ be wò kple Mawu dome le nyuie. Esia ate ŋu ana mɔkpɔkpɔ nasu asiwò le agbe me geɖe wu. Yesu Kristo gblɔ be: “Dzidzɔtɔwoe nye ame siwo nyae be gbɔgbɔmenuwo hiã yewo.”—Mateo 5:3.

Ðu nu siwo me amenyinu le, dɔ alɔ̃ wòasu wò nyuie eye nànɔ kame dem edziedzi

Ðu nu siwo me amenyinu le, de kame edziedzi eye dɔ alɔ̃ nyuie, Ne wò kple Mawu dome le nyuie la, ana wò dzi nadze eme

Anna kple Julia siaa ɖo kpe Yesu ƒe nya mawo dzi. Anna gblɔ be: “Dɔ siwo ku ɖe mawusubɔsubɔ ŋu wɔwɔ nana nye susu nɔa ame bubuwo hã ŋu ke menye nye kuxiwo ɖeɖe ko ŋu o. Esia wɔwɔ menɔa bɔbɔe ɣesiaɣi o gake ne mewɔea enana mekpɔa dzidzɔ.” Gbedodoɖa kple Biblia xexlẽ ye faa akɔ na Julia. Egblɔ be: “Nye dzimenyawo gbɔgblɔ na Mawu le gbedodoɖa me nana meɖea dzi ɖi. Biblia kpe ɖe ŋunye mekpɔe be mexɔ asi le Mawu ŋkume eye be eléa be nam. Biblia xexlẽ na kakaɖedzi su asinye ɖe etsɔme ŋu.”

Esi Yehowa Mawue wɔ mí ta la, ese ale si hehe si míexɔ, míaƒe agbemenuteƒekpɔkpɔwo kple nu siwo dome míenyi kpɔa ŋusẽ ɖe míaƒe agbenɔnɔ kple seselelãme dzii la gɔme bliboe. Eya ta etea ŋu naa kpekpeɖeŋu kple akɔfafa si míehiã la mí ɣeaɖewoɣi to mía havi amegbetɔ siwo sea veve ɖe ame nu hesea nu gɔme na ame dzi. Azɔ hã, ɣeyiɣi aɖe gbɔna si Mawu ada míaƒe dɔlélewo katã na mí. Yesaya 33:24 gblɔ be: “Dua me tɔ aɖeke magblɔ be, ‘Mele dɔ lém o.’”

Ɛ̃, Biblia do ŋugbe be Mawu “atutu aɖatsi sia aɖatsi ɖa le [míaƒe] ŋkume, eye ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o.” (Nyaɖeɖefia 21:4) Nya sia faa akɔ henaa kakaɖedzi ame lo! Ne èdi be yeasrɔ̃ nu geɖe tso Mawu ƒe tameɖoɖo na amegbetɔ ŋu la, ekema míeɖe kuku yi jw.org nyatakakadzraɖoƒea. Àkpɔ Biblia nyui aɖe kple nyati gbogbo siwo ƒo nu tso nu vovovo siwo dome blanuiléledɔ hã le la ŋu le afi ma.

^ mm. 3 Míetrɔ ŋkɔawo.

^ mm. 10 Dɔléle bubu geɖe, atike siwo ɖɔktawo ŋlɔ na ame kple esiwo amewo ŋutɔ ƒlena zãna la ate ŋu ana ame nalé blanui, eya ta ele vevie be woaku nu me nyuie akpɔ nu si gbɔ blanuilélea tso.

^ mm. 14 Nyɔ! mekafua dɔdamɔnu aɖe koŋ be eyae nyo wu o.