Dzo kpo yi emenuwo dzi

Dzo kpo yi emenuawo dzi

Nyɔnu si bua nuwo ŋu nyuie mawɔ nu si aɖe fu na eƒe dzitsinya o

 NU SI BIBLIA GBLƆ

Fuɖeɖe

Fuɖeɖe

Woɖea vi nɔdɔme akpe geɖe ƒua gbe ƒe sia ƒe, xexlẽme sia sɔ gbɔ wu dukɔ geɖe me tɔwo ƒe agbɔsɔsɔ.

Ame ŋutɔ ƒe tiatiae loo alo mesɔ o?

NYA SIWO AMEWO GBLƆNA

Susu vovovowo tae nyɔnu aɖewo ɖea fu, wo dometɔ aɖewoe nye ganyawo, wo kple wo srɔ̃wo dome masɔmasɔwo, didi be yewoavo agade suku alo awɔ dɔ bubu aɖe alo esi nyɔnua medi be yeanye dzilaɖekɛ o ta. Gake ame aɖewo hã bua fufɔfɔ be enye mɔnukpɔkpɔ si su nyɔnu si, eya ta fuɖeɖe mesɔ o.

NYA SI BIBLIA GBLƆ

Mawu bua agbe, vevietɔ amegbetɔ ƒe agbe nu kɔkɔe. (1 Mose 9:6; Psalmo 36:9) Mɔfiame sia ku ɖe vidzĩ si le tsitsim le dadaa ƒe dɔ me, afi si Mawu ŋutɔ wɔ be ɖevia natsi le la ŋu. Biblia ŋlɔla aɖe gblɔ be: “Ètsɔ nu xe ŋunye le danye ƒe dɔ me.” Egblɔ kpee be: “Wò ŋkuwo kpɔm esime menye ʋukɔe; eye woŋlɔ eŋu nuwo katã ɖe wò agbalẽ me, le ŋkeke siwo me wowɔ wo.”—Psalmo 139:13, 16.

Ale si Mawu bua vi nɔdɔme la gadze le Se si wòtsɔ na Israel-dukɔa kple dzitsinya si Mawu na mí la me. Mawu ƒe Sea gblɔ be ne ame aɖe sẽ ŋuta le funɔ aɖe ŋu eye via si le dɔ me nɛ la ku la, ele be woawu eya hã ɖe vidzĩ si wòwu la ta. (2 Mose 21:22, 23) Gake ele be ʋɔnudrɔ̃lawo nalé ŋku ɖe nu si ta wòwu amea ɖo la ŋu hafi atso nya me.—4 Mose 35:22-24, 31.

Dzitsinya le amegbetɔwo katã si. Ne nyɔnu ɖo to eƒe dzitsinya eye wòde bubu vi si le dɔ me nɛ ŋu la, eƒe dzitsinya maɖe fu nɛ o. * Gake ne egbe toɖoɖo eƒe dzitsinya la, dzitsinyaa abu fɔe eye wòawɔ fui gɔ̃ hã. (Romatɔwo 2:14, 15) Nyateƒee, numekukuwo ɖee fia be nu tena ɖe nyɔnu siwo ɖe fu kpɔ la dzi eye woléa blanui bɔbɔe.

Ke ne vi dzi kpɔkpɔ zu agba, evɔ vi bubu si ŋu womewɔ ɖoɖo ɖo o gale mɔ dzi gbɔna ɖe? Se ŋugbe si Mawu do na ame siwo wɔna ɖe eƒe mɔfiamewo dzi pɛpɛpɛ la ɖa: “Èwɔa nuteƒe na ame si wɔa nuteƒe; èwɔa nu fɔmaɖitɔe ɖe ame maɖifɔ ŋu.” (Psalmo 18:25) Biblia gagblɔ be: “Yehowa lɔ̃a nya dzɔdzɔe, eye magblẽ ame siwo wɔa nuteƒe nɛ la ɖi o.”—Psalmo 37:28.

“Woƒe dzitsinya hã ɖia ɖase, eye woawo ŋutɔwo ƒe tamesusuwo bua fɔ wo alo tsoa afia na wo be wo tɔ dzɔ.”Romatɔwo 2:15.

 Ke ne èɖe fu kpɔ ɖe?

NYA SIWO AMEWO GBLƆNA

Ruth, si nye dzilaɖekɛ gblɔ be: “Vi etɔ̃ le asinye xoxo, eye nyemate ŋu akpɔ enelia dzi akpee o. Ke hã esi meɖe fua la, mekpɔe be mewɔ nu vɔ̃ gã aɖe.” * Gake ɖe Mawu atsɔ nu si wòwɔ la akeea?

NYA SI BIBLIA GBLƆ

Yesu Kristo ɖe nu si nye Mawu ƒe susu le nya sia ŋu fia esi wògblɔ be: “Menye ame dzɔdzɔewo yɔ gee meva o, ke boŋ nu vɔ̃ wɔlawo yɔ gee meva be woatrɔ dzi me.” (Luka 5:32) Ɛ̃, ne míese veve ɖe nu vɔ̃ si míewɔ ta, míetrɔ dzi me eye míebia Mawu be wòatsɔe ake mí la, atsɔe ake faa ne nu vɔ̃ gãe wònye gɔ̃ hã. (Yesaya 1:18) Psalmo 51:17 gblɔ be: “Oo Mawu, màdo vlo dzi si gbã hetugu la o.”

Ne ame si trɔ dzi me do gbe ɖa na Mawu la, ana eƒe susu nadze akɔ anyi eye wòana dzitsinya dzadzɛe. Filipitɔwo 4:6, 7 gblɔ be: “Mito gbedodoɖa kple kokoƒoƒo kpakple akpedada dzi miana Mawu nanya miaƒe dzimedidiwo; eye Mawu ƒe ŋutifafa, si ƒo gɔmesesewo katã ta la, adzɔ miaƒe dziwo kple miaƒe tamesusuwo ŋu.” * Esi Ruth va srɔ̃ Biblia eye wògblɔ eƒe dzimenyawo na Mawu la, eƒe susu dze akɔ anyi. Eva srɔ̃e be Mawu gbɔe “tsɔtsɔke vavãtɔ le.”—Psalmo 130:4.

[Mawu] mewɔa nu ɖe mía ŋu ɖe míaƒe nu vɔ̃wo nu o, eye meɖoa eteƒe na mí ɖe míaƒe vodadawo nu o.” Psalmo 103:10.

^ mm. 8 Ne edze abe funɔa alo vi si le dɔ me nɛ ƒe agbe ɖo afɔku me gɔ̃ hã la, mefia be woate ŋu aɖe fu o. Ne eva hiã be woatso nya me le ame si woaxɔ ɖe agbe le vidziɣi ŋu la, srɔ̃tɔawo ŋutɔe atso nya me. Togbɔ be ele alea hã, ŋgɔyiyi siwo wowɔ le atikewɔnyawo me wɔe be kuxi sia megabɔ le dukɔ deŋgɔ geɖe me o.

^ mm. 12 Míetrɔ ŋkɔa.

^ mm. 14 Tsitretsitsi ƒe ŋugbe si Mawu do hã ana míaƒe susu nadze akɔ anyi. “Kpɔ Nyabiabia Siwo Tso Exlẽlawo Gbɔ” si dze le April 15, 2009 ƒe Gbetakpɔxɔ me, si ƒo nu tso Biblia me mɔfiame siwo ɖee fia be ɖewohĩ woafɔ vidzĩ siwo womedzi hafi woku o la ɖe tsitre.