Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  October 2017

‘Mitsɔ Nuwɔna Kple Nyateƒe Lɔ̃ Ame’

‘Mitsɔ Nuwɔna Kple Nyateƒe Lɔ̃ Ame’

“Migana míatsɔ nya kple aɖe ko alɔ̃ ame o, ke boŋ míatsɔ nuwɔna kple nyateƒe alɔ̃ ame.”—1 YOH. 3:18.

HADZIDZI: 106, 100

1. Lɔlɔ̃ kae ƒo lɔlɔ̃ ɖe sia ɖe ta, eye nu ka tae? (Kpɔ foto si le nyati sia ƒe gɔmedzedze.)

LƆLƆ̃ si wotu ɖe gɔmeɖose dzɔdzɔe dzi, si woyɔna be a·gaʹpe, la nye nunana tso Yehowa gbɔ. Eyae nye eƒe Dzɔtsoƒe. (1 Yoh. 4:7) Lɔlɔ̃ siae ƒo lɔlɔ̃ ɖe sia ɖe ta. Togbɔ be elɔ numalɔ̃malɔ̃leamegbɔ kple vividoɖeameŋu ɖe eme hã la, nu si koŋ me wòdzena lee nye nuwɔwɔ ɖokuitɔmadimaditɔe be wòaɖe vi na ame bubuwo. Le numekugbalẽ aɖe ƒe nya nu la, a·gaʹpe “dzena le nu si wòʋã ame wòwɔ la koŋ me.” Ne míeɖe ɖokuitɔmadimadi ƒe lɔlɔ̃ fia ame aɖe alo ame aɖe ɖee fia mí la, enana agbea vivina, míekpɔa dzidzɔ, eye míaƒe dzi dzea eme.

2, 3. Aleke Yehowa ɖe ɖokuitɔmadimadi ƒe lɔlɔ̃ fia amegbetɔwo?

2 Yehowa ɖee fia be yelɔ̃ amegbetɔwo hafi wɔ Adam kple Xawa gɔ̃ hã. Ewɔ anyigba la be wòanye amegbetɔwo nɔƒe tegbee; menye ɖeko wòwɔe be wòalé amegbetɔwo ƒe agbe ɖe te ko evɔ o, ke etrɔ asi le eŋu hã be wòanye teƒe si woase vivi na agbea le bliboe. Míaƒe viɖe koŋ tae Yehowa wɔ nu siawo katã ɖo, ke menye na eya ŋutɔ ƒe viɖe o. Egaɖe ɖokuitɔmadimadi ƒe lɔlɔ̃ fia le mɔ bubu nu esi wòyra via siwo le anyigba dzi la be woanɔ agbe tegbee le Paradiso si wòdzra ɖo nyuie na wo la me.

 3 Le Adam kple Xawa ƒe aglãdzedzea megbe la, Yehowa ɖe ɖokuitɔmadimadi ƒe lɔlɔ̃ gãtɔ kekeake fia. Ewɔ ɖoɖo be yeana tafe ɖe aglãdzela eve mawo ƒe dzidzimeviwo ta, elabena eka ɖe edzi be wo dometɔ aɖewo akpɔ ŋudzedze ɖe lɔlɔ̃ si yeɖe fia wo la ŋu. (1 Mose 3:15; 1 Yoh. 4:10) Le nyateƒe me la, esime Yehowa do Ðela la ŋugbe ko la, le eya gbɔ la, ɖeko wòle abe ɖe Ðelaa tsɔ eɖokui sa vɔ ɖe amegbetɔwo ta xoxo ene. Ƒe 4,000 aɖewo megbe la, Yehowa tsɔ eƒe Tenuvi si gbɔ melɔ̃a nu le o la sa vɔe ɖe amegbetɔwo ta. (Yoh. 3:16) Míekpɔa ŋudzedze ɖe lɔlɔ̃ gã sia si Yehowa ɖe fia mí la ŋu ale gbegbe!

4. Nu kae ɖee fia be amegbetɔ madeblibowo tea ŋu ɖea ɖokuitɔmadimadi ƒe lɔlɔ̃ fiana?

4 Míetea ŋu ɖea ɖokuitɔmadimadi ƒe lɔlɔ̃ fiana le esi Mawu wɔ mí ɖe eƒe nɔnɔme nu ta. Gake nu vɔ̃ si ƒe dome míenyi la nana wòsesẽna na mí be míaɖe lɔlɔ̃ sia afia, ke hã, ŋutetea gakpɔtɔ le mía ŋu kokoko. Le kpɔɖeŋu me, Abel medi eɖokui tɔ o, ke boŋ lɔlɔ̃ si nɔ esi na Mawu la ʋãe wòtsɔ nu nyuitɔ si nɔ esi la sa vɔ nɛ. (1 Mose 4:3, 4) Noa ɖe ɖokuitɔmadimadi ƒe lɔlɔ̃ fia ehavi amegbetɔwo esi wòɖe gbeƒã Mawu ƒe gbedeasia na wo ƒe geɖe togbɔ be wogbe toɖoɖo hã. (2 Pet. 2:5) Abraham ɖee fia be lɔlɔ̃ si le ye si na Mawu la nɔ vevie na ye wu nu sia nu esi wòlɔ̃ faa be yeatsɔ ye vi Isak asa vɔe. (Yak. 2:21) Míedi be míaɖe lɔlɔ̃ afia abe nuteƒewɔla mawo ene, ne esia wɔwɔ mele bɔbɔe o hã.

NU KAE NYE LƆLƆ̃ VAVÃ?

5. Mɔ kawo nue míate ŋu aɖe lɔlɔ̃ vavã afia le?

5 Biblia na míenya be nu si wòfia be míaɖe lɔlɔ̃ vavã afia ye nye be, ‘míagatsɔ nya kple aɖe ko alɔ̃ ame o, ke boŋ míatsɔ nuwɔna kple nyateƒe alɔ̃ ame.’ (1 Yoh. 3:18) Ðe esia fia be mímate ŋu aɖe lɔlɔ̃ afia to nyagbɔgblɔ me oa? Kura o! (1 Tes. 4:18) Ke boŋ, efia be menye nyagbɔgblɔ me koe wòle be míaɖe lɔlɔ̃ afia le o, vevietɔ ne nɔnɔmea bia be míawɔ nane atsɔ ana kpekpeɖeŋu. Le kpɔɖeŋu me, ne agbemenu veviwo hiã hati Kristotɔ aɖe la, ehiã be míakpe ɖe eŋu, ke menye be míagblɔ nyuidinamenyawo nɛ ko evɔ o. (Yak. 2:15, 16) Nenema kee lɔlɔ̃ na Yehowa kple mía havi aʋã mí be míakpɔ gome le gbeƒãɖeɖedɔa me bliboe, ke menye be míabia Mawu ‘be wòadɔ dɔwɔlawo ɖe nuŋeŋe la me’ ko evɔ o.—Mat. 9:38.

6, 7. (a) Nu kae nye “lɔlɔ̃ si me alakpa mele o”? (b) Lɔlɔ̃ si me alakpanuwɔwɔ le ƒe kpɔɖeŋu aɖewoe nye kawo?

6 Apostolo Yohanes ŋlɔ bena ele be “míatsɔ nuwɔna kple nyateƒe” alɔ̃ ame. Eya ta, mele be “alakpanuwɔwɔ aɖeke” nanɔ míaƒe lɔlɔ̃ la me o, alo le mɔ bubu nu la, míaƒe lɔlɔ̃ nanye esi me “alakpa mele o.” (Rom. 12:9; 2 Kor. 6:6) Esia fia be, ne míele ameŋkumenu wɔm la, ekema menye lɔlɔ̃ vavãe nye ema o. Ðewohĩ míabia be, ‘Ne lɔlɔ̃a nye alakpanuwɔwɔ la, lɔlɔ̃ ŋutɔŋutɔe wònyea?’ Kura o. Menye lɔlɔ̃e wònye kura o, ke boŋ ameŋkumenuwɔwɔ dzro koe.

7 Bu lɔlɔ̃ si me alakpanuwɔwɔ le ƒe kpɔɖeŋu aɖewo ŋu kpɔ. Le Eden-bɔa me la, Satana wɔ nu abe ɖe wòle Xawa ƒe nyonyo dim ene, ke hã, eƒe nuwɔnawo ɖee fia be ɖokuitɔdila kple alakpanuwɔlae wònye. (1 Mose 3:4, 5) Le David ƒe ŋkekea me la, Ahitofel ƒe nuwɔna ɖee fia be menye xɔlɔ̃ vavãe wònye na fia la o. Ahitofel va zu yomemɔfiala esi wòsusu be esia ade ye dzi ta. (2 Sam. 15:31) Nenema kee egbea la, xɔsegbelawo kple ame bubu siwo dea mama hamea me la toa “aɖe ŋanɛ kple kesekukuɖɔɖɔname” dzi nana wòdzena abe ɖe wolɔ̃ nɔviawo ene, gake le nyateƒe me la, ɖokuitɔdilawoe wonye.—Rom. 16:17, 18.

8. Nya kae wòle be míabia mía ɖokuiwo?

8 Lɔlɔ̃ si me alakpanuwɔwɔ le nye ŋukpenanu, elabe eto vovo sãa na mawumenɔnɔme si nye ɖokuitɔmadimadi ƒe lɔlɔ̃. Alakpanuwɔwɔ sia ate ŋu aflu amewo, gake mate ŋu aflu Yehowa ya o. Le nyateƒe me la, Yesu  gblɔ be woahe to na ame siwo wɔa nu abe alakpanuwɔlawo ene la “vevie.” (Mat. 24:51) Mí Yehowa subɔlawo míadi gbeɖe be míanye alakpanuwɔlawo o. Ke hã, anyo be míabia mía ɖokuiwo be, ‘Lɔlɔ̃ vavã, si me ɖokuitɔdidi alo amefuflu mele o, ye meɖena fiana ɣesiaɣia?’ Na míadzro go asieke aɖewo siwo me míate ŋu aɖe lɔlɔ̃ si me “alakpa mele o” afia le la me kpɔ.

ALE SI MÍATSƆ “NUWƆNA KPLE NYATEƑE ALƆ̃ AME”

9. Nu kae lɔlɔ̃ vavã aʋã mí be míawɔ?

9 Akpa si wɔm nèle nedze ŋuwò ne ame aɖeke mele ekpɔm o hã. Ele be lɔlɔ̃ naʋã mí míalɔ̃ faa be míakpe ɖe mía nɔviwo ŋu alo anyo dɔme na wo, ne ame aɖeke manya nu tso eŋu o gɔ̃ hã. (Xlẽ Mateo 6:1-4.) Anania kple Safira mewɔ nu alea o. Medze wo ŋu be yewoanyo dɔme evɔ ame aɖeke manya nu tso eŋu o. Woda alakpa le nu si wodzɔ la ŋu ale be wòawɔ dɔ ɖe amewo dzi eye Mawu he to na wo ɖe esia ta. (Dɔw. 5:1-10) Gake ne míelɔ̃ mía nɔviwo vavã la, adzɔ dzi na mí be míanyo dɔme na wo eye mímana ame bubuwo nanya nu tso eŋu o. Le kpɔɖeŋu me, nɔviŋutsu siwo kpea asi ɖe Dɔdzikpɔhaa ŋu wòtrɔa asi le gbɔgbɔmenuɖuɖua ŋu la mehea amewo ƒe susu vaa wo ɖokuiwo dzi alo gblɔa akpa si koŋ wowɔna la na amewo o.

10. Aleke míate ŋu atre mía nɔviwo bubu?

10 Tre bubudede amewo ŋu. (Xlẽ Romatɔwo 12:10.) Yesu ɖo kpɔɖeŋu ɖi na mí le bubudede amewo ŋu me esi wòklɔ afɔ na eƒe apostolowo. (Yoh. 13:3-5, 12-15) Ðewohĩ ahiã be míaku kutri vevie hafi míate ŋu abɔbɔ mía ɖokui asubɔ amewo abe ale si Yesu wɔe ene. Apostoloawo gɔ̃ hã mete ŋu se nu si Yesu wɔ la gɔme o va de asi na esime woxɔ gbɔgbɔ kɔkɔe la. (Yoh. 13:7) Ne mímebua mía ɖokui gã wu ame bubuwo le míaƒe sukudede, nunɔamesiwo, alo subɔsubɔmɔnukpɔkpɔwo ta o la, efia be míele bubu dem wo ŋu. (Rom. 12:3) Eye mímeʋãa ŋu ame bubuwo ne wokafu wo o, ke míekpɔa dzidzɔ kpli wo boŋ, ne ewɔ na mí be míawo hã míedze na kafukafua ƒe ɖe gɔ̃ hã.

11. Nu ka tae wòle be míakafu amewo anukwaretɔe?

11 Kafu nɔviwòwo anukwaretɔe. Ele be míawɔ mɔnukpɔkpɔwo ŋu dɔ akafu mía nɔewo, elabe kafukafunyawo “nyo hena tutuɖo.” (Ef. 4:29) Ke hã, ele be míakafu amewo anukwaretɔe. Ne menye nenema o la, míava nɔ kesekuku ɖɔm na amewo alo anɔ ta ɖem le agba si le mía dzi be míaɖɔ wo ɖo la te. (Lod. 29:5) Ne míekafu ame aɖe eye emegbe míeva le edam ɖe anyi le ame bubuwo ŋkume la, enye alakpanuwɔwɔ. Apostolo Paulo ƒo asa na mɔ̃ ma eye wòɖo kpɔɖeŋu nyui ɖi na mí esi wòɖe lɔlɔ̃ vavã fia nɔvi Kristotɔwo le wo kafukafu me. Le kpɔɖeŋu me, ekafu Kristotɔ siwo nɔ Korinto la anukwaretɔe le nu nyui siwo wowɔ ta. (1 Kor. 11:2) Gake esi woƒe nuwɔnawo bia be wòaɖɔ wo ɖo la, eɖe susu si tae la me na wo dɔmenyotɔe eme kɔ nyuie.—1 Kor. 11:20-22.

Nunana mía nɔvi siwo ɖo hiã me nye dɔmenyonyo kple mɔ si dzi míetona ɖenɛ fiana be míelɔ̃ wo (Kpɔ memama 12)

12. Aleke míate ŋu aɖe lɔlɔ̃ vavã afia le amedzrowɔwɔ me?

12 Nye amedzrowɔla. Yehowa de se na mí be míanyo dɔme na mía nɔviwo. (Xlẽ 1 Yohanes 3:17.) Ke hã, ele be míawɔ esia kple susu nyuitɔ, ɖokuitɔdidi manɔmee. Míate ŋu abia mía ɖokuiwo be: ‘Xɔ̃nye kplikplikpliwo, ame ŋkutawo, alo ame siwo ate ŋu ava ɖo nyui si mewɔ na wo teƒe nam la koŋue mewɔa amedzro na? Alo ɖe míedia mɔ siwo dzi mato anyo dɔme na nɔviŋutsu kple nɔvinyɔnu siwo nyemenya nyuie o alo esiwo si naneke mele be woaɖo eteƒe nam oa?’ (Luka 14:12-14) Alo tsɔe be hiã tu hati Kristotɔ aɖe le esi mewɔ ɖoɖo ɖe nuwo ŋu nyuie o ta. Alo tsɔe be nɔvi aɖe meda akpe ɖe dɔmenyo si míewɔ nɛ la ta o. Le go siawo tɔgbi me la, anyo be míawɔ ɖe aɖaŋuɖoɖo si nye, “Miwɔ amedzro na mia nɔewo liʋiliʋĩlilĩ manɔmee” la dzi. (1 Pet. 4:9)  Ne èwɔ ɖe aɖaŋuɖoɖo sia dzi la, dzidzɔ si tsoa nunana faa me la asu asiwò.—Dɔw. 20:35.

13. (a) Ɣekaɣie wòate ŋu asesẽ be míakpe ɖe gbɔdzɔgbɔdzɔtɔwo ŋu? (b) Nu ŋutɔŋutɔ kawoe míate ŋu awɔ atsɔ akpe ɖe gbɔdzɔgbɔdzɔtɔwo ŋu?

13 Kpe ɖe gbɔdzɔgbɔdzɔtɔwo ŋu. Biblia ƒe sedede si nye be “mikpe ɖe gbɔdzɔgbɔdzɔtɔwo ŋu, migbɔ dzi ɖi na amewo katã” la ate ŋu ado míaƒe lɔlɔ̃ ƒe nuvãnyenye kpɔ. (1 Tes. 5:14) Togbɔ be gbɔdzɔgbɔdzɔtɔ geɖewo va sẽna le xɔse me emegbe hã, ehiã be míagbɔ dzi ɖi na ame aɖewo ya ahayi edzi anɔ kpekpem ɖe wo ŋu. Esia ate ŋu abia be míazã Ŋɔŋlɔawo me nya aɖewo atsɔ ade dzi ƒo na wo, míakpe wo be woava kpɔ gome le gbeƒãɖeɖedɔa me kpli mí, alo míakpɔ vovo ɖe wo ŋu ase woƒe nyawo ko. Gakpe ɖe eŋu la, le esi míabu nɔviŋutsu alo nɔvinyɔnu aɖe be enye ame “sesẽ” alo enye “gbɔdzɔgbɔdzɔtɔ” teƒe la, anyo wu be míaɖo ŋku edzi be ŋutetewo kple gbɔdzɔgbɔdzɔwo le mí katã mía ŋu. Apostolo Paulo gɔ̃ hã lɔ̃ ɖe edzi be gbɔdzɔgbɔdzɔwo le ye ŋu. (2 Kor. 12:9, 10) Eya ta, mí katã míehiã kpekpeɖeŋu tso mía nɔewo gbɔ.

14. Nu kae míalɔ̃ faa be míawɔ be míana ŋutifafa kple ɖekawɔwɔ nakpɔtɔ anɔ mía kple mía nɔviwo dome?

14 Wɔ ŋutifafa. Míewɔa nu sia nu si míate ŋui be ŋutifafa nanɔ mía kple mía nɔviwo dome, ne ewɔ na mí be womese nu gɔme na mí o alo womewɔ nu ɖe mía ŋu nyuie o gɔ̃ hã. (Xlẽ Romatɔwo 12:17, 18.) Kukuɖeɖe na ame si bi dzi ate ŋu ana eƒe dzi nafa, gake ele be kukuɖeɖea natso dzi me. Le kpɔɖeŋu me, le esi nàgblɔ be, “Ete ɖe dzinye be èse le ɖokuiwò me nenema” teƒe la, anyo wu ne èlɔ̃ ɖe edzi be ye hã ye tɔ medzɔ le go aɖe me o. Àte ŋu agblɔ be, “Ete ɖe dzinye ŋutɔ be megblɔ nya si ve wò.” Ŋutifafa le vevie ŋutɔ le srɔ̃ɖeɖe me. Mele be atsu kple asi nanɔ nu wɔm le ame dome abe ɖe wolɔ̃ wo nɔewo ene gake ne woawo ɖeɖe woli la, numaƒomaƒo na ame nɔewo, nya veamewo gbɔgblɔ, alo asidodo ɖe ame nɔewo gbɔ nanɔ edzi yim o.

15. Aleke míate ŋu aɖee afia be míetsɔ vɔ̃ si wowɔ ɖe mía ŋu la ke tso dzi me?

15 Tsɔ ke faa. Ne míetsɔ vɔ̃ si wowɔ ɖe mía ŋu ke faa la, míeɖea susu ɖa le vodadaa ŋu eye míeléa amea ɖe dɔ me o. Ne míewɔ ɖe aɖaŋu si Biblia ɖo be, mido dzi mianɔ anyi “kple mia nɔewo le lɔlɔ̃ me, eye midze agbagba vevie mialé gbɔgbɔ la ƒe ɖekanyenye me ɖe asi le ŋutifafa ƒe nublanu la me” dzi la, esia ate ŋu akpe ɖe mía ŋu míalɔ̃ faa atsɔ ame siwo da vo ɖe mía ŋu le manyamanya me la ƒe vodada ake wo. (Ef. 4:2, 3) Hafi míate ŋu atsɔ ake tso dzi me la, ele be míaɖu míaƒe tamesusuwo dzi ale be ‘míagalé vɔ̃ siwo wowɔ ɖe mía ŋu la ɖi o.’ (1 Kor. 13:4, 5) Gake ne míeléa nya ɖe dɔ me la, menye ɖeko esia agblẽ ƒomedodo si le mía kple mía nɔviwo dome la me o, ke agblẽ ƒomedodo si le mía kple Yehowa dome hã me. (Mat. 6:14, 15) Míate ŋu aɖee afia hã be míetsɔ ke mía nɔvi siwo dze agɔ le mía dzi la tso dzi me ne míedoa gbe ɖa ɖe wo ta.—Luka 6:27, 28.

16. Aleke wòle be míabu subɔsubɔmɔnukpɔkpɔ siwo sua mía si le Yehowa ƒe habɔbɔa me?

 16 Lɔ̃ faa nàtsɔ nuwo asa vɔe. Ne subɔsubɔmɔnukpɔkpɔwo su mía si le Yehowa ƒe habɔbɔa me la, ele be míabu wo be wonye mɔnukpɔkpɔ na mí be míaɖee afia be lɔlɔ̃ vavãe le mía si. Míewɔa esia ne ‘mímenɔa míawo ŋutɔwo ƒe nyonyo ko dim o, ke ame bubuwo tɔ hã.’ (1 Kor. 10:24) Le kpɔɖeŋu me, le míaƒe takpekpe suewo kple gãwo me la, anyinɔƒegbɔkpɔlawo dzea woƒe dɔa gɔme le agbadɔa te do ŋgɔ na ame bubuwo ƒe vava. Ke hã, womebua woƒe dɔdeasia be enye mɔnukpɔkpɔ na yewo be yewoatia nɔƒe nyuitɔwo na yewo ɖokuiwo kple yewoƒe ƒomewo o, ke boŋ nɔviŋutsu siawo dometɔ geɖe nɔa afi si medea ame dzi tututu o gɔ̃ hã ale be woate ŋu anɔ teƒe si woawɔ woƒe dɔdeasia le. Esi wolɔ̃na faa tsɔa woawo ŋutɔwo ƒe nyonyo saa vɔe alea la, woɖea lɔlɔ̃ si me ɖokuitɔdidi aɖeke mele o la fiana. Aleke nàte ŋu asrɔ̃ woƒe kpɔɖeŋua?

17. Ne míewɔ nu vɔ̃ si nye ŋkubiãnya la, nu kae lɔlɔ̃ vavã aʋã mí be míawɔ?

17 Ʋu nu vɔ̃ ɣaɣlawo me eye nàɖe asi le wo ŋu. Kristotɔ aɖewo siwo wɔ nu vɔ̃ siwo nye ŋkubiãnya la dze agbagba be yewoatsyɔ nu wo dzi ale be yewoagaɖu ŋukpe alo ahe ŋukpe ava ame bubuwo dzi o. (Lod. 28:13) Gake esia menye nuwɔwɔ le lɔlɔ̃ me o, elabe menye nu vɔ̃ wɔlaa ŋu koe esia gblẽa nu le o, ke egblẽa nu le ame bubuwo hã ŋu. Esia ate ŋu axe mɔ na Mawu ƒe gbɔgbɔa ƒe dɔwɔwɔ bliboe le hamea me eye ate ŋu agblẽ hame bliboa ƒe ŋutifafa me. (Ef. 4:30) Lɔlɔ̃ vavã ʋãa Kristotɔ siwo wɔ nu vɔ̃ siwo nye ŋkubiãnya la wogblɔnɛ na hamemetsitsiwo ale be woate ŋu ana kpekpeɖeŋu si wohiã la wo.—Yak. 5:14, 15.

18. Aleke gbegbee lɔlɔ̃ vavã le vevie?

18 Lɔlɔ̃ ye ƒo nɔnɔme nyuiwo katã ta. (1 Kor. 13:13) Edea dzesi mí be míenye Yesu yomedzelawo kple Yehowa, Ame si nye lɔlɔ̃ sia Dzɔtsoƒe la srɔ̃lawo. (Ef. 5:1, 2) Paulo ŋlɔ bena: “Ne . . .  lɔlɔ̃ mele asinye o la, nyemenye naneke o.” (1 Kor. 13:2) Neva eme be míayi edzi atsɔ “nuwɔna kple nyateƒe” alɔ̃ ame, ke menye be míatsɔ ‘nya ko’ alɔ̃ ame o.