Dzo kpo yi emenuwo dzi

Dzo kpo yi emenuawo dzi

“Migaŋlɔ Dɔmenyonyo Na Amedzrowo Be O”

“Migaŋlɔ Dɔmenyonyo Na Amedzrowo Be O”

“Migaŋlɔ amedzrowɔwɔ [si fia, dɔmenyonyo na amedzrowo] be o.”—HEB. 13:2.

HADZIDZI: 124, 79

1, 2. (a) Kuxi kawoe amedzro geɖe doa goe egbea? (Kpɔ foto si le nyati sia ƒe gɔmedzedze.) (b) Ŋkuɖodzinya kae apostolo Paulo gblɔ, eye biabia kawoe esia fɔ ɖe te?

ƑE 30 kple edzivɔ ye nye esi va yi la, Osei [1] zɔ mɔ tso Ghana yi Europa. Ɣemaɣi la, menye Ðasefoe wònye o. Egblɔ be: “Esi meɖo la, eteƒe medidi hafi mekpɔe be amewo metsɔ ɖeke le eme nam o. Nyemenya kura be nenema gbegbee teƒea fa miamiamia o. Esi medo go le yameʋudzeƒea eye fafa ma lém zi gbãtɔ le nye agbe me la, ɖeko mewó avi.” Esi Osei mese afi ma tɔwo ƒe gbea nyuie o ta la, ƒe ɖeka kple edzivɔ va yi si mekpɔ dɔ gbagbe aɖeke wɔ o. Esi wòva le adzɔge ʋĩi tso eƒe ƒometɔwo gbɔ ta la, etsi akogo eye aƒe hã dzronɛ vevie.

2 Ne wòe le nɔnɔme ma me la, de ŋugble le ale si nàdi be amewo nawɔ nu ɖe ye ŋui ŋu kpɔ. Èɖanye dukɔ bubu me tɔ alo wò ŋutigbalẽ to vovo o, ɖe madzɔ dzi na wò ŋutɔ be woaxɔ wò vividoɖeameŋutɔe le Fiaɖuƒe Akpataa me oa? Le nyateƒe me la, Biblia de dzi ƒo na Kristotɔ vavãwo be: ‘Migaŋlɔ dɔmenyonyo na  amedzrowo be o.’ (Heb. 13:2) Eya ta mina míadzro biabia siawo me: Aleke Yehowa bua amedzrowoe? Nu ka tae wòahiã be míatrɔ míaƒe susu le ale si míebua amedzrowoe ŋu? Eye nu kae míate ŋu awɔ be dukɔ bubu me tɔ siwo le míaƒe hamea me la naɖe dzi ɖi le mía dome?

ALE SI YEHOWA BUA AMEDZROWO

3, 4. Le 2 Mose 23:9 la, aleke Mawu di be yeƒe dukɔa nawɔ nu ɖe amedzrowo ŋu, eye nu ka tae?

3 Esi Yehowa ɖe Israel-viwo tso Egipte megbe la, ede sewo na wo. Se mawo ɖe ale si wòle be woawɔ nu ɖe dukɔ bubu me tɔ gbogbo siwo va le wo dome ŋu ameŋububutɔe la fia. (2 Mose 12:38, 49; 22:21) Esi wònye be zi geɖe nu medea amedzrowo dzi o ta la, Yehowa wɔ ɖoɖo aɖewo lɔlɔ̃tɔe be wòaɖe vi na wo. Ðoɖo mawo dometɔ ɖekae nye be gome le wo si be woafɔ nukuwo le agblewo me ale be woakpɔ nu aɖu.—3 Mose 19:9, 10.

4 Yehowa meƒoe ɖe Israel-viwo nu be woade bubu amedzrowo ŋu o, ke boŋ egblɔ nya siwo aʋã wo be woase veve ɖe wo nu. (Xlẽ 2 Mose 23:9.) Woawo ŋutɔwo ‘wonya ale si wònɔna na amedzrowo.’ Hafi Israel-viwo nava zu kluviwo le Egipte gɔ̃ hã la, anɔ eme be Egiptetɔwo doa vlo wo le esi wonye dukɔ bubu me tɔwo eye woƒe mawusubɔsubɔ to vovo ta. (1 Mose 43:32; 46:34; 2 Mose 1:11-14) Esime Israel-viwo nye amedzroviwo la, agbea sesẽ na wo ale gbegbe, gake Yehowa bia tso wo si be woawɔ nu ɖe amedzro siwo le wo dome la ŋu abe ‘dumevidzidziwo’ ene.—3 Mose 19:33, 34.

5. Nu kae akpe ɖe mía ŋu míatsɔ ɖe le eme na amedzrowo abe ale si Yehowa wɔnɛ ene?

5 Egbea hã, míeka ɖe edzi be Yehowa tsɔ ɖe le eme na amedzro siwo dea míaƒe hamea ƒe kpekpewo la vevie nenema ke. (5 Mose 10:17-19; Mal. 3:5, 6) De ŋugble le kuxi siwo amedzrowo doa goe ŋu kpɔ. Le kpɔɖeŋu me, amewo mewɔa nu ɖe wo ŋu nyuie o eye ɖewohĩ womese gbea hã o. Eya ta anyo be míadze agbagba be míawɔ nu ɖe wo ŋu le nɔvilɔlɔ̃ me ahanyo dɔme na wo.—1 Pet. 3:8.

ÐE WÒHIÃ BE MÍAÐƆ MÍAƑE SUSU ÐO LE ALE SI MÍEBUA AMEDZROWOE ŊUA?

6, 7. Nu kae ɖee fia be Kristotɔ siwo nɔ anyi le ƒe alafa gbãtɔ me la ɖu susu manyomanyo siwo nɔ wo si ɖe ame bubuwo ŋu la dzi?

6 Kristotɔ siwo nɔ anyi le ƒe alafa gbãtɔ me la dze agbagba ɖu susu gbegblẽ siwo nɔ Yudatɔwo si ɖe dukɔ bubu me tɔwo ŋu la dzi. Le ƒe 33 K.Ŋ. ƒe Pentekoste ŋkekea dzi la, wo dometɔ siwo nɔ Yerusalem la wɔ amedzro na dukɔ vovovo me tɔ siwo va zu Kristotɔwo. (Dɔw. 2:5, 44-47) Ale si Yudatɔ Kristotɔwo tsɔ ɖe le eme na woƒe haxɔsetɔ siwo nye dukɔ bubu me tɔwo la ɖee fia be wose nya, “amedzrowɔwɔ,” si fia “dɔmenyonyo na amedzrowo,” la gɔme.

7 Gake edze ƒãa be esi Kristotɔ gbãtɔawo nɔ agbɔ sɔm ɖe edzi la, ameŋkumekpɔkpɔ ƒe nya aɖe va do mo ɖa. Yudatɔ Helagbe dolawo fa konyi be womele nu wɔm ɖe yewoƒe ahosiwo ŋu nyuie o. (Dɔw. 6:1) Be woakpɔ kuxi ma gbɔ la, apostoloawo tia ŋutsu adre be woakpɔ egbɔ be womegblẽ ame aɖeke ɖi o. Helatɔwo ƒe ŋkɔwoe nɔ ŋutsu mawo katã si, eya ta anɔ eme be apostoloawo di be masɔmasɔ si ɖo Kristotɔ gbãtɔawo dome le dukɔ si me ame tso ta la nu nayi.—Dɔw. 6:2-6.

8, 9. (a) Nu kae ate ŋu aɖee afia be vovototodedeameme alo dumevinyenye ƒe dada le mía me? (b) Nu kae wòle be míaho ɖa le míaƒe dzi me? (1 Pet. 1:22)

8 Míenya alo míeɖanyae o, míaƒe dekɔnuwo kpɔa ŋusẽ ɖe mía dometɔ ɖe sia ɖe dzi le mɔ aɖe nu kokoko. (Rom. 12:2) Gakpe ɖe eŋu la, míesenɛ míaƒe aƒelikawo, dɔwɔhatiwo alo sukuhatiwo gblɔa nya siwo mesɔ o tso ame siwo tso dukɔ bubu me, to bubu me tɔwo alo ame siwo ƒe ŋutigbalẽ to vovo ŋu. Ŋusẽ ka gbegbee nya mawo  kpɔna ɖe mía dzi? Aleke míewɔa nui ne ame aɖe gblɔ alɔmeɖenya aɖe tso dukɔ si me míetso ŋu alo ɖi gbɔ nane si mía detɔwo wɔna?

9 Vovototodedeameme ƒe gbɔgbɔ nɔ apostolo Petro me ɖe ame siwo menye Yudatɔwo o ŋu hena ɣeyiɣi aɖe, gake vivivi la, edze agbagba ɖe nuŋububu ma ɖa le eƒe dzi me. (Dɔw. 10:28, 34, 35; Gal. 2:11-14) Nenema kee ne míede dzesii be vovototodedeameme alo dumevinyenye ƒe dada le mía me la, ele be míadze agbagba vevie ahoe ɖa le míaƒe dzi me. (Xlẽ 1 Petro 1:22.) Anyo be míade ŋugble le nyateƒe si wònye be mía dometɔ aɖeke medze na ɖeɖekpɔkpɔ o la ŋu; mí katã míenye ame madeblibowo, dukɔ ka mee míeɖatso o. (Rom. 3:9, 10, 21-24) Eya ta nu ka tae míabui be míenyo wu ame bubuwo? (1 Kor. 4:7) Ele be susu si nɔ apostolo Paulo si la tɔgbi nanɔ míawo hã si esi wòxlɔ̃ nu ehati Kristotɔ amesiaminawo be ‘womeganye ame tutɔwo kple amedzrowo o, ke boŋ wonye Mawu ƒe aƒe la me tɔwo.’ (Ef. 2:19) Ne míedze agbagba vevie be míaɖu vovototodedeameme ƒe gbɔgbɔ si le mía me ɖe dukɔ bubu me tɔwo ŋu dzi la, esia akpe ɖe mía ŋu godoo be míado amenyenye yeyea.—Kol. 3:10, 11.

ALE SI MÍANYO DƆME NA AMEDZROWO

10, 11. Aleke Boaz ƒe nuwɔwɔ ɖe Rut si nye Moabitɔ ŋu la ɖee fia be ebua amedzrowo abe ale si Yehowa bua wo ene?

10 Ðikeke mele eme o be ale si Boaz wɔ nu ɖe Rut Moabitɔa ŋu la ɖe ale si Yehowa bua amedzrowoe la fia. Esi Boaz va eƒe agblea me le nuŋeɣi la, ede dzesi nyɔnu dɔ sesẽ wɔla aɖe si nye amedzro wòle nuku fɔm le eƒe nuŋelawo yome. Esi wòse be nyɔnua bia mɔ hafi dze nukua fɔfɔ gɔme, togbɔ be gome le esi be wòafɔ nuku le agblewo me hã la, Boaz ɖe mɔ nɛ dɔmenyotɔe be wòafɔ nukuawo le lu bablaawo gɔ̃ hã dome.—Xlẽ Rut 2:5-7, 15, 16.

11 Dzeɖoɖo si yi edzi le Boaz kple Rut dome la ɖee fia kɔtɛ be Boaz tsɔ ɖe le eme na Rut eye wòtsi dzi ɖe nɔnɔme madeamedzi si me wòle abe amedzro ene ŋu. Le kpɔɖeŋu me, Boaz gblɔ nɛ be wòanɔ yeƒe ɖetugbuiawo ŋu ale be ŋutsu siwo le dɔ wɔm le agblea me nagaɖe fu nɛ o. Boaz wɔ ɖoɖo hã be Rut nakpɔ tsi kple nuɖuɖu si asu nɛ, abe eya ŋutɔ ƒe dɔwɔlawo ke ene. Gakpe ɖe eŋu la, Boaz meda nyɔnu amedzro dahe la ɖe anyi o, ke boŋ ede dzi ƒo nɛ.—Rut 2:8-10, 13, 14.

12. Ne míenyo dɔme na amedzro siwo va eteƒe medidi o la, dɔ nyui kae wòate ŋu awɔ ɖe wo dzi?

12 Menye lɔlɔ̃ vavã si nɔ Rut si na lɔ̃xoa, Naomi, koe wɔ dɔ ɖe Boaz dzi o, ke esi wòsee be Rut zu Yehowa subɔla la, eya hã wɔ dɔ ɖe edzi ŋutɔ. Le nyateƒe me la, lɔlɔ̃ vavã si le Yehowa si na Rut lae dze le ale si Boaz wɔ nu ɖe nyɔnu si ‘va be ɖe Israel ƒe Mawu ƒe aʋala te’ ŋui me. (Rut 2:12, 20; Lod. 19:17) Nenema kee egbea hã, ne míewɔ nu ɖe “amewo katã ƒomevi” ŋu dɔmenyotɔe la, ate ŋu akpe ɖe wo ŋu woade dzesi nyateƒea kple ale si gbegbe Yehowa lɔ̃ woe.—1 Tim. 2:3, 4.

Ðe míedoa gbe na ame yeye siwo vaa Fiaɖuƒe Akpata me la vividoɖeameŋutɔea? (Kpɔ memama 13, 14)

13, 14. (a) Nu ka tae wòle be míadze agbagba ado gbe na amedzro siwo va Fiaɖuƒe Akpata me? (b) Nu kae ate ŋu ana wòanɔ bɔbɔe na wò be nàte ɖe ame siwo nye dukɔ bubu me tɔwo ŋu?

13 Mɔ siwo dzi míato awɔ nu ɖe ame siwo tso dukɔ bubu me va eteƒe medidi o ŋu dɔmenyotɔe dometɔ ɖekae nye be míado gbe na wo vividoɖeameŋutɔe le Fiaɖuƒe Akpata me. Ðewohĩ míade dzesii be ame yeye siwo ʋu va dukɔa me la kpea ŋu eye woɖea wo ɖokui ɖe aga. Azɔ hã, nu siwo me woto le agbe me alo ɖoƒe si le wo si ate ŋu awɔe be woase le wo ɖokui me be dukɔ bubu me tɔwo nyo wu yewo. Eya ta anyo be míate ɖe wo ŋu ado vivi ɖe wo ŋu ahatsɔ ɖe le eme na wo. Ne JW Language dɔwɔnua le mia degbe me la, ate ŋu akpe ɖe ŋuwò nàsrɔ̃  ale si nàdo gbe na amedzrowo le wo degbe me.—Xlẽ Filipitɔwo 2:3, 4.

14 Ðewohĩ asesẽ na wò vie be nàte ɖe dukɔ bubu me tɔwo ŋu. Nu si ana wòanɔ bɔbɔe na wòe nye be nàgblɔ nya aɖe na wo tso ɖokuiwò ŋu. Eteƒe madidi hafi nàkpɔe be, to vovo na ale si nèsusui la, vovototo boo aɖeke mele mia kpli wo dome o, ke boŋ àkpɔe be ame ɖekawo ko mienye—eye nyuiƒewo kple gbagbãƒewo le dekɔnu ɖe sia ɖe ŋu.

KPE ÐE AMEWO KATÃ ŊU WOƑE DZI NADZE EME

15. Nu kae akpe ɖe mía ŋu be míase nu gɔme na ame yeye siwo tso dukɔ bubu me?

15 Be nàkpe ɖe amedzrowo ŋu woaɖe dzi ɖi le hamea me la, bia ɖokuiwò anukwaretɔe be, ‘Ne nyee yi dukɔ bubu me la, aleke madi be amewo nawɔ nu ɖe ŋunye?’ (Mat. 7:12) Gbɔ dzi ɖi na ame siwo le agbe yeye gɔme dzem le dukɔ bubu me. Le gɔmedzedzea me la, ɖewohĩ mímase ale si wobua nuwo ŋui alo woƒe nuwɔna aɖewo gɔme o. Gake le esi míakpɔ mɔ be woatrɔ ɖe míaƒe dekɔnuwo ŋu teƒe la, ɖe manyo wu boŋ be míase nu gɔme na wo oa?—Xlẽ Romatɔwo 15:7.

16, 17. (a) Nu kawoe míate ŋu awɔ be mía kple dukɔ bubu me tɔwo dome nanɔ kplikplikpli? (b) Kpekpeɖeŋu kawoe míate ŋu ana dukɔ bubu me tɔ siwo le míaƒe hamea me?

16 Nusɔsrɔ̃ tso amedzro siwo le mía dome ƒe dukɔ kple woƒe dekɔnuwo ŋu ana wòanɔ bɔbɔe na mí be míade ha kpli wo. Míate ŋu azã ɣeyiɣi aɖe le míaƒe ƒometadeaguɣi atsɔ aku nu me tso ame siwo mímenya nyuie le míaƒe hamea alo anyigbamama me o ŋu. Nu bubu si míawɔ be kadodo nyui nanɔ mía kple dukɔ bubu me tɔwo dome lae nye be míakpe wo woava ɖu nu le mía ƒeme. Esi wònye be Yehowa ʋu “xɔse ƒe ʋɔtru la na dukɔwo me tɔwo” ta la, ɖe manyo be míawo hã míaʋu míaƒe ʋɔtruwo na ame siwo “do ƒome kpli mí le xɔse la me” oa?—Dɔw. 14:27; Gal. 6:10; Hiob 31:32.

Ðe míewɔa amedzro na ame yeye siwo tso dukɔ bubu me la dɔmenyotɔea? (Kpɔ memama 16, 17)

 17 Ne míedea ha kple ƒome aɖe si tso dukɔ bubu me la, míava se agbagba si dzem wole be woatrɔ ɖe nɔnɔmea ŋu le mía de la gɔme nyuie wu. Ke hã, ɖewohĩ míakpɔe be wohiã kpekpeɖeŋu be woate ŋu asrɔ̃ mía degbea. Nu bubu si míagate ŋu awɔ na woe nye be míakpe ɖe wo ŋu woakpɔ dɔ awɔ alo afi si woanɔ. Ne míekpe ɖe míaƒe haxɔsetɔwo ŋu alea la, ana agbea naka ɖe eme na wo.—Lod. 3:27.

18. Ame ka ƒe kpɔɖeŋue amedzrowo ate ŋu asrɔ̃ le bubudede dukɔ si me wole ƒe dekɔnuwo ŋu me, eye aleke woaɖee afia be yewokpɔ ŋudzedze ɖe kpekpeɖeŋu siwo wona yewo ŋu?

18 Ele be amedzrowo hã nadze agbagba awɔ woƒe ŋutete ɖe sia ɖe atrɔ ɖe ale si amewo wɔa nui le dukɔ si me wova le la ŋu. Rut ɖo kpɔɖeŋu nyui aɖe ɖi le go sia me. Gbã, ede bubu dukɔ si me wòva le ƒe dekɔnuwo ŋu esi wòbia mɔ hafi dze nukuwo fɔfɔ gɔme. (Rut 2:7) Togbɔ be gome le esi be wòafɔ nukuwo hã, mebui be amewo ƒe agbae wònye be woakpɔ yeƒe nuhiahiãwo gbɔ na ye o. Evelia, eɖee fia be yekpɔ ŋudzedze ɖe ale si wonyo dɔme na ye la ŋu. (Rut 2:13) Ne amedzrowo ɖe nɔnɔme nyui sia tɔgbi fia la, dukɔa me tɔwo kple wo nɔvi haxɔsetɔwo ade bubu wo ŋu.

19. Susu kawo tae wòle be míaxɔ amedzro siwo le mía dome la nyuie?

19 Dzidzɔe wònye na mí be Yehowa ɖe mɔ be dukɔwo katã me tɔwo nase nya nyuia le eƒe amenuveve geɖe la ta. Ðewohĩ mɔnukpɔkpɔ mesu wo si le woƒe dukɔ me be woasrɔ̃ Biblia alo ade ha kple Yehowa ƒe amewo le ablɔɖe me o. Gake fifia esi mɔnukpɔkpɔ su wo si be woade ha kpli mí la, ɖe manyo be míakpe ɖe wo ŋu ale be woƒe dzi nadze eme le mía dome oa? Ne míenyo dɔme na wo le mɔ suetɔ kekeake si míate ŋui nu hã, esia afia be míele lɔlɔ̃ si le Yehowa si na wo la srɔ̃m. Esi míenye “Mawu srɔ̃lawo” ta la, mina míawɔ míaƒe ŋutete ɖe sia ɖe be míaxɔ amedzro siwo le mía dome la nyuie.—Ef. 5:1, 2.

^ [1] (memama 1) Míetrɔ ŋkɔa.