Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  October 2016

 AGBEMEŊUTINYA

Medze Agbagba Srɔ̃ Kpɔɖeŋu Nyui Ðolawo

Medze Agbagba Srɔ̃ Kpɔɖeŋu Nyui Ðolawo

Mebia bia be: “Ènya ƒe si mexɔa?” Nɔviŋutsu Izak Marais si ƒo ka nam tso Patterson, New York, esime menɔ Colorado la ɖo eŋu nam be: “Menya ƒe si tututu nèxɔ.” Na maɖe ale si wòdzɔe be dzeɖoɖo ma yi edzi le nye kplii dome la me.

WODZIM le Wichita, Kansas, Amerika, le December 10, 1936, dzi. Mí ame enee wodzi, eye nyee nye tsitsitɔ. Fofonye William kple danye Jean siaa nye Yehowa subɔla dovevienuwo. Papa nye hamesubɔla; nenemae woyɔa nɔviŋutsu si xɔa ŋgɔ le hamea me ɣemaɣi. Danye srɔ̃ Biblia me nyateƒea tso nɔa, Emma Wagner gbɔ. Emma Wagner fia Biblia me nyateƒea ame bubuwo hã; wo dometɔ ɖekae nye Gertrude Steele, si wɔ dutanyanyuigbɔgblɔdɔa le Puerto Rico ƒe geɖe. * Eya ta kpɔɖeŋu nyui ɖola geɖewo nɔ anyi siwo ƒe kpɔɖeŋu mate ŋu asrɔ̃.

AME SIWO ƑE KPƆÐEŊU NYUIWO MESRƆ̃

Fofonye le tsitre ɖe mɔ ƒe dzogoe dzi hele magazinewo nam ame siwo le eme tsom

Le Memleɖagbe ɣetrɔ aɖe me esime mexɔ ƒe atɔ̃ la, nye kple tɔnye míeyi ɖanɔ Gbetakpɔxɔ kple Consolation (si woyɔna fifia be Nyɔ!) magazineawo mam na amewo le ablɔdzi. Ɣemaɣi la, míaƒe dukɔa nɔ aʋa wɔm vevie, elabena Xexemeʋa II lia nɔ edzi yim. Ŋutsu aɖe si nye ɖɔkta, si mu aha la va nɔ Papa dzum le esi wònye Kristotɔ si medea akpa aɖeke dzi le aʋawɔwɔ me o ta. Enɔ gbɔgblɔm be Papa nye vɔvɔ̃nɔtɔ si medi be yeayi aʋa o. Ðɔktaa tsɔ eƒe mo va ɖo Papa ƒe mo gbɔ tututu hegblɔ be, “Ƒom makpɔ; kpɔ vɔvɔ̃nɔtɔ ƒe vɔvɔ̃nɔtɔ ya ɖa!” Mevɔ̃ ŋutɔ, gake Papa ƒe nu nyo ŋunye ale gbegbe le ale si wòte ŋu ɖu eɖokui dzi ta. Ðeko wòyi edzi nɔ magazineawo nam ame siwo va ƒo ƒu ɖi. Kasia, asrafo aɖe zɔ va yina, eye ɖɔktaa do ɣli gblɔ nɛ be, “Va di nya aɖe gblɔ na vɔvɔ̃nɔtɔ ƒe vɔvɔ̃nɔtɔ ya!” Asrafoa kpɔe be ŋutsua mu aha, eya ta egblɔ nɛ be, “Heyi aƒe me ne aha nakɔ le mo na wò!” Eye woa kple evea wolé woƒe mɔ tsɔ. Ne meɖo ŋku ale si Yehowa na dzi nɔ fofonye ƒo dzi la, ewɔa dɔ ɖe dzinye ŋutɔ. Ðakpaƒe eve nɔ fofonye si le Wichita, eye ɖɔktaa hã va kpaa ɖa le egbɔ!

Nye kple dzinyelawo míeyina takpekpe le Wichita, le ƒe 1940-awo me

Esi mexɔ ƒe enyi la, dzinyelawo dzra woƒe aƒea kple ɖakpaƒeawo hewɔ xɔdɔmeʋu sue aɖe, eye woʋu yi Colorado be yewoaɖasubɔ le afi si gbeƒãɖela geɖe wu hiã le. Míeyi ɖanɔ afi si gogo Grand Junction, eye afi mae dzinyelawo wɔ gbesiagbe mɔɖeɖedɔa le esime wonɔ ɣeyiɣi aɖe ƒe dɔ wɔm le amewo ƒe agblewo me  kple lãnyiƒewo. Woƒe kutrikuku le gbeƒãɖeɖedɔa me kple Yehowa ƒe yayra wɔe be woɖo hame le afi ma. Afi mae Papa nyrɔm ɖe tɔsisi aɖe si to to aɖe ƒe aga me la me le, le June 20, 1948, dzi, hekpe ɖe ame bubu siwo hã xɔ Biblia me nyateƒea ŋu. Billie Nichols kple srɔ̃a hã nɔ wo dome. Emegbe, woa kple srɔ̃a wova wɔ nutome sue dzikpɔkpɔdɔa, eye wo viŋutsua kple srɔ̃a hã wɔ dɔ ma ke.

Míebɔ ha kplikplikpli kple nɔvi geɖe siwo ƒo wo ɖokuiwo ɖe Fiaɖuƒea ƒe dɔwo me eye mía kpli wo míeɖoa dze tuameɖowo tso gbɔgbɔmenuwo ŋu, vevietɔ Steele ƒomea me tɔwo: Don kple Earlene, Dave kple Julia, kpakple Si kple Martha. Wo katã wokpɔ ŋusẽ nyui ɖe nye agbe dzi. Wona mekpɔ ale si gbegbe Fiaɖuƒea tsɔtsɔ ɖo nɔƒe gbãtɔ nana dzidzɔ kple taɖodzinu vavã nɔa ame ƒe agbe ŋu.

EGAVA HIÃ BE MAƲU

Esi mexɔ ƒe 19 la, Nɔviŋutsu Bud Hasty, si nye míaƒe ƒomea ƒe xɔlɔ̃ kpem be mava wɔ ɖeka kpli ye míawɔ mɔɖeɖedɔa le Amerika ƒe anyiehenutowo me. Nutome sue dzikpɔla bia tso mía si be míaʋu ayi Ruston, Louisiana, afi si Ðasefo geɖe siwo dzudzɔ gbeadzidede la nɔ. Egblɔ be míanɔ kpekpeawo katã wɔm kwasiɖa sia kwasiɖa, ne vavalawo mede ha o gɔ̃ hã. Míedi teƒe aɖe si sɔ na kpekpeawo wɔwɔ hedzrae ɖo. Míewɔa kpekpeawo katã, gake nye kple nɔviŋutsua ɖeɖe koe nɔa kpekpeawo dem hena ɣeyiɣi aɖe. Ne mía dometɔ ɖeka le kpekpea dzi kpɔm la, ke evelia ɖoa nyabiaseawo katã ŋu. Ne ehiã be míawɔ wɔwɔfia aɖe la, mí ame evea ye wɔnɛ le kplɔ̃a ta, evɔ nyasela aɖeke menɔa anyi kpɔa eteƒe o! Mlɔeba, nɔvinyɔnu tsitsi aɖe te vava. Eteƒe medidi o, Biblia-nusrɔ̃viwo kple nɔvi siwo dzudzɔ gbeadzidede hã te kpekpeawo dede, eye ɣeyiɣi kpui aɖe megbe la, ƒuƒoƒoa va zu hame si nɔ dzidzedze kpɔm nyuie.

Gbe ɖeka, nye kple Nɔviŋutsu Bud míedo go Church of Christ ƒe osɔfo aɖe si ƒo nu tso mawunyakpukpui siwo nyemenya o ŋu. Eƒe nyawo ʋuʋum ale gbegbe be mede ŋugble le nye dzixɔsewo ŋu vevie. Menɔ zã dzi kwasiɖa ɖeka blibo be makpɔ ŋuɖoɖo na nya siwo wòbia le míaƒe dzeɖoɖoa me. Esia kpe ɖe ŋunye ŋutɔ be mewɔ nyateƒea tɔnye, eye menɔ tsɔtsɔm nam kura be magado go osɔfo bubu o.

Esia megbe kpuie la, nutome sue dzikpɔlaa bia tso asinye be maʋu ayi El Dorado, Arkansas, aɖakpe asi ɖe hame si nɔ afi ma ŋu. Esi menɔ afi ma la, metrɔna yia Colorado enuenu le esi dɔwɔƒe si xɔa ame ɖe asrafodɔ me la biana tso asinye be mava ta. Le mɔzɔzɔ siawo dometɔ ɖeka me la, mɔɖela bubuwo nɔ ʋua me kplim, eye míeva kpɔ ʋufɔku le Texas, si wɔe be nye ʋua meganyo na naneke o. Míeƒo ka na nɔviŋutsu  aɖe wòva kɔ mí yi eƒe aƒe me eye emegbe míede hame ƒe kpekpe. Woɖe gbeƒã le kpekpea be míekpɔ ʋufɔku le mɔ dzi, eye nɔviawo na gakpekpeɖeŋu mí dɔmenyotɔe. Nɔviŋutsua hã dzra nye ʋua dɔlar 25.

Míeɖo ʋu yi Wichita, afi si míaƒe ƒomea ƒe xɔlɔ̃ vevi si nye E. F. “Doc” McCartney nɔ mɔɖeɖedɔa wɔm le. Viaŋutsu siwo ŋkɔwoe nye Frank kple Francis, siwo nye venɔviwo la nye xɔ̃nye veviwo tso ɣemaɣi va de asi na egbe. Wodzra woƒe ʋu xoxo aɖe nam dɔlar 25, si nye ho si tututu woxe nam ɖe nye ʋu gbagbã la ta. Emae nye zi gbãtɔ si wòdze ƒãa nam be Yehowa kpɔ nye nuhiahiã vevi aɖe gbɔ nam le esi metsɔ Fiaɖuƒea ƒe nuwo ɖo nɔƒe gbãtɔ ta. Esi menɔ afi ma la, McCartney ƒomea ɖe nɔvinyɔnu nyui aɖe si xɔ dzo le gbɔgbɔ me, si ŋkɔe nye Bethel Crane, la fiam. Nɔa si ŋkɔe nye Ruth, la hã nye Ðasefo si me dzo nɔ, le Wellington, Kansas, eye ekpɔtɔ nɔ mɔɖeɖedɔa wɔm le eƒe ƒe 90-awo me gɔ̃ hã. Mede ƒe ɖeka hafi nye kple Bethel míeɖe mía nɔewo le ƒe 1958 me o, eye eva wɔ ɖeka kplim le mɔɖeɖedɔa me le El Dorado.

AMEKPEKPE DODZIDZƆNAMEWO

Esi míede ŋugble le ame siwo ɖo kpɔɖeŋu nyuiwo ɖi na mí tso míaƒe ɖevime ke ŋu la, míetso nya me be míatsɔ mía ɖokuiwo ana faa awɔ dɔ ɖe sia ɖe si Yehowa ƒe habɔbɔa ade asi na mí. Woɖo mí ɖe Walnut Ridge, Arkansas, be míanye mɔɖela veviwo le afi ma. Emegbe esi wokpe mí be míava de Gilead Sukua ƒe klass 37 lia le ƒe 1962 me la, gbɔgblɔ bu ɖe mí. Eye edzɔ dzi na mí ŋutɔ be Don Steele hã nɔ klass ma ke me. Esi míewu sukua nu la, woɖo nye kple Bethel ɖe Nairobi, Kenya. Aɖatsi lólo ɖe ŋku dzi na mí esi míenɔ dzodzom le New York, gake aɖatsi mawo trɔ zu dzidzɔ sɔŋ esi mía nɔviwo va kpe mí le Nairobi yameʋudzeƒea!

Nye kple srɔ̃nye kpakple Mary kple Chris Kanaiya míele gbeadzi le Nairobi

Ɣeyiɣi kpui aɖe megbe la, Kenya nɔnɔ va dze edzi na mí ŋutɔ, eye míekpɔ dzidzɔ geɖe le gbeƒãɖeɖedɔa me. Míaƒe Biblia-nusrɔ̃vi gbãtɔ siwo kpɔ dzidzedze lae nye Chris kple Mary Kanaiya. Wokpɔtɔ le ɣeyiɣiawo katã ƒe subɔsubɔdɔa wɔm le Kenya. Habɔbɔa bia tso mía si le ƒe si kplɔe ɖo me be míaʋu ayi Kampala, Uganda, eye míawoe nye dutanyanyuigblɔla gbãtɔwo le dukɔ ma me. Míekpɔ dzidzɔ ɣemaɣi ale gbegbe, elabena ame geɖe di vevie be yewoasrɔ̃ Biblia me nyateƒea, eye wova zu mía nɔvi Ðasefowo. Gake esi míesubɔ le Afrika ƒe etɔ̃ kple afã megbe la, eva hiã be míatrɔ ayi aƒe le ƒomegbanɔamedziwo ta. Eya ta míetrɔ yi Amerika. Gbe si gbe míedzo le Afrika la, aɖatsi lólo ɖe ŋku dzi na mí, eye esia ya gate ɖe mía dzi wu ale si wònɔ esime míenɔ dzodzom le New York. Míeva lɔ̃ Afrikatɔwo ŋutɔ, eye míenɔ mɔ kpɔm be míagatrɔ ayi Afrika gbe ɖeka.

MÍAƑE AGBANƆAMEDZI YEYEA

Míeyi ɖanɔ Colorado toawo ƒe ɣetoɖoƒekpa dzi, afi si mía dzilawo nɔ. Esia megbe kpuie la, míedzi mía vinyɔnu gbãtɔ, Kimberly, eye ɣleti 17 megbe la, míedzi Stephany. Míebu míaƒe dzilanyenye ƒe agbanɔamedzi yeye sia dɔ vevii, eye míedze nyateƒea ƒaƒã ɖe mía vinyɔnu lɔlɔ̃awo ƒe dzi me. Míedi be míaɖo kpɔɖeŋu nyui na wo abe ale si ame bubuwo ɖo kpɔɖeŋu nyuiwo na mí ene. Ewɔa nublanui ŋutɔ be, togbɔ be kpɔɖeŋu nyui ɖoɖo kpɔa ŋusẽ nyui ɖe ɖeviwo dzi ne wole tsitsim hã la, mefia kokoko be woava lɔ̃ Yehowa ahasubɔe le woƒe tsitsime o. Yonyemetɔ ŋutsu kple nɔvinyenyɔnuawo dometɔ ɖeka dzudzɔ Yehowa subɔsubɔ. Mele mɔ kpɔm be woagava srɔ̃ kpɔɖeŋu nyui siwo mía dzilawo kple ame bubuwo ɖo ɖi na mí la ake.

Míekpɔ dzidzɔ le mía vinyɔnuawo hehe me ale gbegbe eye míedzea agbagba ɣesiaɣi wɔa nuwo ɖekae.  Esi míeva te ɖe Aspen, Colorado, ŋu ta la, mí katã míeva srɔ̃ snodzifefe ƒomevi aɖe ale be míanɔ gome kpɔm le eme ɖekae ɣeaɖewoɣi. Modzakaɖeɣi mawo naa mɔnukpɔkpɔ mí míeɖoa dze kple mía vinyɔnuawo. Mía kpli wo míeyia mɔkekeɖuƒe afi si míemlɔa dogbadzi le le avɔgbadɔwo me, eye mí katã míeƒua dzo henɔa dze ɖom dzidzɔtɔe le zã me. Togbɔ be ɖeviwo koe wonye hã, wobiana nya siawo tɔgbi be, “Nu kae mawɔ ne metsi?” kple “Ŋutsu ka ƒomevie madi be maɖe?” Míedze agbagba ƒã Yehowa vɔvɔ̃ ɖe mía vinyɔnuawo ƒe dzi kple susu me. Míedea dzi ƒo na wo be woaminya ɣeyiɣiawo katã ƒe subɔsubɔdɔa, eye míenana wonyana nu si tae nunya le eme be woaɖe ame si si taɖodzinu ma tɔgbi le. Míekpe ɖe wo ŋu wokpɔ nu si tae wònyo be woatsi ato sɔhɛnyenye me hafi aɖe srɔ̃. Eya ta míelɔ̃a gbɔgblɔ le míaƒe ƒomea me be “Lala va se ɖe esime nèxɔ ƒe 23 ya teti.”

Míedzea agbagba vevie kplɔa mía viawo dea kpekpeawo eye mía kpli wo míekpɔa gome le gbeadzisubɔsubɔdɔa me edziedzi, abe ale si ko mía dzilawo wɔe na mí ene. Míewɔ ɖoɖo nɔvi siwo wɔa ɣeyiɣiawo katã ƒe subɔsubɔdɔa va dzea míaƒe aƒe me. Eye míeƒoa nu tso míaƒe dutanyanyuigblɔdɔa ŋu edziedzi kple dzidzɔ. Míegblɔna be adzɔ dzi na mí be mí ame enea míaɖi tsa ayi Afrika gbe ɖeka. Enye mía vinyɔnuawo ƒe didi vevie be wòava eme nenema.

Míewɔa ƒomenusɔsrɔ̃ edziedzi, eye míewɔa nɔnɔme siwo ate ŋu ado mo ɖa le suku la ƒe wɔwɔfiawo le nusrɔ̃ɣia. Míenana ɖeviawo wɔa Ðasefo si le nya ŋu ɖom la ƒe akpa dzi. Nusɔsrɔ̃ alea vivia wo nu, eye wòna dzi ɖo wo ƒo. Esi wonɔ tsitsim la, wotoa nyatoƒoe ɣeaɖewoɣi ne ɣeyiɣia de be míawɔ ƒomenusɔsrɔ̃. Gbe ɖeka, eva glom eye megblɔ na wo be míele ƒomenusɔsrɔ̃a wɔ ge o, eya ta woayi woƒe xɔwo me. Nyaa dze wo kpo eye wote avifafa hegblɔ be yewodi be yewoasrɔ̃ nu. Esia na míeva kpɔe be agbagba siwo dzem míenɔ be míaƒã nyateƒea ɖe mía viawo ƒe dzi me la le ku tsem vavã. Esi wotsi hã la, wogalɔ̃ ƒomenusɔsrɔ̃a eye míeɖea mɔ na wo wogblɔa woƒe susuwo faa. Gake etena ɖe mía dzi ɣeaɖewoɣi ne wogblɔ be yewoƒe susu mewɔ ɖeka kple Biblia ƒe nufiafia aɖe o. Ke hã, ne edzɔ alea la, míenyaa nu si tututu le woƒe dzi me. Eye ne míekpe ɖe wo ŋu wode ŋugble le nyawo ŋu nyuie vɔ la, wova kpɔa ŋudzedze ɖe ale si Yehowa bua nuwo ŋui ŋu.

MÍETRƆ ÐE NƆNƆMEAWO ŊU

Míaƒe dzilanyenye ƒe agbanɔamedzia va yi kaba wu ale si míesusui. Le Mawu ƒe habɔbɔa ƒe mɔfiafia kple kpekpeɖeŋu me la, míewɔ mía tɔ sinua he mía viawo wova lɔ̃ Yehowa le woƒe tsitsime. Dzi dzɔ mí ŋutɔ be esi mía viawo wu sekɛndrisuku nu la, wodze mɔɖeɖedɔa wɔwɔ gɔme, eye wosrɔ̃ dɔ si akpe ɖe wo ŋu woakpɔ wo ɖokuiwo dzi. Woa kple nɔvinyɔnu eve aɖewo ʋu yi Cleveland, Tennessee, be yewoaɖasubɔ le afi si gbeƒãɖela geɖe wu hiã le. Míesusu wo ŋutɔ, gake edzɔ dzi na mí be woƒo wo ɖokuiwo ɖe ɣeyiɣiawo katã ƒe subɔsubɔdɔa me. Ɣemaɣie nye kple Bethel míegadze mɔɖeɖedɔa gɔme ake, eye esia wɔe be subɔsubɔmɔnukpɔkpɔ siwo me míekpɔ dzidzɔ le va su mía si. Míewɔ nutome sue dzikpɔla ƒe kpeɖeŋutɔ ƒe dɔa eye míekpɔ gome le takpekpedɔwo hã me.

Hafi mía viawo naʋu ayi Tennessee la, wozɔ mɔ yi London, England, eye woyi ɖaɖi tsa le alɔdzedɔwɔƒea. Esi woyi la, Stephany, si xɔ ƒe 19 ɣemaɣi la, do go ɖekakpui si ŋkɔe nye Paul Norton, si nye Betel-ƒomea me tɔ. Esi wogaɖi tsa yi Betel ɣebubuɣi la, Kimberly do go Paul Norton ƒe dɔwɔhati aɖe si ŋkɔe nye Brian Llewellyn. Paul kple Stephany va ɖe wo nɔewo—gake Stephany xɔ ƒe 23 hafi. Eye Brian kple Kimberly hã ɖe wo nɔewo le ƒe si kplɔe ɖo me esime wòxɔ ƒe 25. Eya ta wolala va se ɖe esime woxɔ ƒe 23 ya teti. Míeda asi ɖe nyametsotso nyui si wo dometɔ ɖe sia ɖe wɔ le ame si wòaɖe tiatia me la dzi bliboe.

Mía kple Paul, Stephany, Kimberly kpakple Brian le Malawi alɔdzedɔwɔƒea, le ƒe 2002 me

Mía vinyɔnuawo gblɔ na mí be kpɔɖeŋu si mía kple mía dzilawo ɖo ɖi na yewo la kpe ɖe yewo ŋu yewowɔ ɖe se si Yesu de be ‘míayi edzi anɔ Fiaɖuƒe la dim gbã’ la dzi le ɣeyiɣi siwo me ganyawo sesẽ na yewo gɔ̃ hã me. (Mateo 6:33) Le April 1998 me la, wokpe Paul kple Stephany be woava de Gilead Suku ƒe klass 105 lia, eye esi wowu sukua nu la, wode dɔ asi na wo be woaɖasubɔ le Malawi, Afrika. Ɣemaɣie wokpe Brian kple Kimberly hã be woaɖasubɔ le London Betel, eye le ɣeyiɣi aɖe megbe la, woɖo wo ɖa be woaɖawɔ dɔ le Malawi Betel. Dzi dzɔ mí wu gbɔgblɔ, elabena míenyae be esiae nye agbemedɔ nyuitɔ si ɖekakpuiwo kple ɖetugbuiwo ate ŋu awɔ.

AMEKPEKPE DODZIDZƆNAME BUBU

January 2001 mee dzeɖoɖo si ŋu meƒo nu tsoe le gɔmedzedzea me la yi edzi le mía kple nɔviŋutsua  dome le fon dzi. Nɔviŋutsu Marais si nye Gbegɔmeɖeɖedɔa Dzikpɔƒe dzi kpɔla gblɔ nam be nɔviawo le ɖoɖo wɔm ɖe hehenasuku aɖe ŋu le xexea me godoo be woakpe ɖe gbegɔmeɖelawo ŋu woase Eŋlisigbea gɔme nyuie, eye wodi be woana hehe nye, ame si xɔ ƒe 64, hã be manye hehenasuku ma ƒe nufialawo dometɔ ɖeka. Nye kple Bethel míedo gbe ɖa tso eŋu hedzro eme kple mía nɔ tsitsiawo be míakpɔ woƒe susu le nyaa ŋu. Wo ame evea siaa di be míayi dɔa gbe, togbɔ be mímanɔ anyi anɔ kpekpem ɖe wo ŋu o hã. Metrɔ ƒo ka na nɔviŋutsua hegblɔ nɛ be adzɔ dzi na mí ŋutɔ be míaxɔ subɔsubɔmɔnukpɔkpɔ tɔxɛ ma.

Eteƒe medidi o, wokpɔ kansa le nɔnye ŋu. Megblɔ nɛ be míedi be míatsi anyi ahakpe ɖe nɔvinyenyɔnu Linda ŋu le beléle nɛ me. Gake Dada gblɔ nam be: “Gbeɖe. Nyemeda asi ɖe nya ma dzi o. Ne mimeyi dɔa gbe o la, ana nuwo nagate ɖe dzinye wu.” Linda hã se le eɖokui me nenema. Míekpɔ ŋudzedze ɖe ɖokuitsɔtsɔsavɔ ƒe gbɔgbɔ si woɖe fia kple kpekpeɖeŋu si nutoa me nɔviwo na ŋu ale gbegbe! Gbe si gbe míedzo yi Gbetakpɔxɔ Habɔbɔa Ƒe Hehenaƒe si le Patterson ƒe ŋufɔke la, Linda ƒo ka na mí be Dada ku. Míeƒo mía ɖokui ɖe míaƒe dɔdeasi yeyea me bliboe, abe ale si Dada ade dzi ƒo na mí be míawɔ ene.

Dzi dzɔ mí ŋutɔ be, teƒe gbãtɔ si woɖo mí ɖoe nye Malawi alɔdzedɔwɔƒea, afi si mía vinyɔnu eveawo kple wo srɔ̃wo nɔ subɔsubɔm le. Dzidzɔ ka gbegbee nye esi be mí katã míeva wɔ ɖeka! Eyome, míeyi ɖana hehe gbegɔmeɖelawo le Zimbabwe kple Zambia hã. Esi míewɔ hehenadɔ ma ƒe etɔ̃ kple afã vɔ la, habɔbɔa bia tso mía si be míatrɔ ayi Malawi aɖawɔ nuŋlɔɖiwo ku ɖe nu siwo me Ðasefowo to le yometiti me le woƒe akpaɖekedzimademade ta la ŋu. *

Mía kple mía tɔgbuiyɔviwo míele gbeadzi

Aɖatsi galólo ɖe ŋku dzi na mí ake esi wòva hiã be míatrɔ ayi aƒe le ƒe 2005 me, le Basalt, Colorado, afi si nye kple Bethel míeyi edzi le mɔɖeɖedɔa wɔm le. Le ƒe 2006 me la, Brian kple Kimberly ʋu va Colorado va nye míaƒe aƒelikawo be woahe wo vinyɔnu eveawo, siwo nye Mackenzie kple Elizabeth. Paul kple Stephany ya kpɔtɔ le Malawi, eye Paul nye Alɔdzekɔmitia me tɔ le afi ma. Fifia, esusɔ vie maxɔ ƒe 80. Eye dzidzɔ gãe wònyena nam ne mekpɔ ɖekakpui siwo mewɔ dɔ kpli ƒe aɖewo va yi la le dɔ siwo mewɔ tsã la wɔm azɔ. Kpɔɖeŋu nyui siwo mía dzilawo kple ame bubuwo ɖo ɖi na mí kple ale si míedze agbagba srɔ̃ woƒe kpɔɖeŋua be wòaɖe vi na mía viwo kple wo viwo la katãe wɔe be míele dzidzɔ kpɔm.

^ mm. 5 Ne èdi be yeaxlẽ nu geɖe tso dutanyanyuigbɔgblɔdɔ si Steele ƒomea me tɔwo wɔ ŋu la, kpɔ Gbetakpɔxɔ ƒe tata siwo nye May 1, 1956, axa 269-272, kple March 15, 1971 tɔ, axa 186-190.

^ mm. 30 Le kpɔɖeŋu me, kpɔ Trophim Nsomba ƒe agbemeŋutinya si dze le April 15, 2015 ƒe Gbetakpɔxɔ me, axa 27-31.