Dzo kpo yi emenuwo dzi

Dzo kpo yi emenuawo dzi

Do Ŋusẽ Wò Xɔse Le Nu Siwo Nèle Mɔ Kpɔm Na Me

Do Ŋusẽ Wò Xɔse Le Nu Siwo Nèle Mɔ Kpɔm Na Me

“Xɔse nye dziɖoɖo ɖe nu si wole mɔ kpɔm na la ŋu kakaɖedzitɔe.”—HEB. 11:1.

HADZIDZI: 81, 134

1, 2. (a) Aleke mɔkpɔkpɔ xɔasi si le Kristotɔ vavãwo si la to vovo na nu si Satana ƒe xexea me tɔwo kpɔa mɔ na? (b) Biabia vevi kawo mee míadzro?

MƆKPƆKPƆ wɔnuku ka gbegbee nye esi le Kristotɔ vavãwo si! Míeɖanye amesiaminawo alo ‘alẽ bubuawo’ o, mí katã míele mɔ kpɔm be tame si Yehowa Mawu ɖo le gɔmedzedzea me la nava eme eye woakɔ eƒe ŋkɔa ŋuti. (Yoh. 10:16; Mat. 6:9, 10) Esiawoe nye nu nyuitɔ kekeake si wòle be amegbetɔ ɖe sia ɖe nanɔ mɔ kpɔm na. Azɔ hã, míele mɔ kpɔm vevie na agbe tegbee nɔnɔ le dziƒo loo alo anyigba dzi, abe ale si Mawu do ŋugbe ene. (2 Pet. 3:13) Gake hafi ɣemaɣi naɖo la, míele mɔ kpɔm be Yehowa ayi edzi anɔ mɔ fiam eƒe amewo le nuwuɣi sia me.

2 Satana ƒe xexea me tɔwo hã kpɔa mɔ na nanewo, gake womate ŋu aka ɖe edzi be yewoƒe mɔkpɔkpɔa ava eme o. Le kpɔɖeŋu me, ame miliɔn geɖe kpɔa mɔ be yewoaɖu loto, ke hã womate ŋu aka ɖe edzi be ava eme na yewo o. Gake xɔse vavã ya nye “dziɖoɖo ɖe nu si” mí Kristotɔwo míele ‘mɔ kpɔm na kakaɖedzitɔe’ la ŋu. (Heb. 11:1) Ðewohĩ àbia be, nu kae míate ŋu awɔ be míaka ɖe Mawu ƒe ŋugbedodowo dzi geɖe wu? Eye ne míedo ŋusẽ míaƒe xɔse fifia la, aleke wòaɖe vi na mí?

3. Nu ka tae míexɔe se be Mawu ƒe ŋugbedodowo ava eme?

 3 Womedzi mía dometɔ aɖeke kple xɔse o; eye xɔse mesua ame si agbagbamadzemadzee o. Hafi xɔse nasu mía si la, ele be míaɖe mɔ Mawu ƒe gbɔgbɔ kɔkɔea nawɔ dɔ ɖe míaƒe dzi dzi. (Gal. 5:22) Biblia megblɔ be xɔse le Yehowa si loo alo ele be xɔse nanɔ esi o. Esi Yehowa nye Mawu ŋusẽkatãtɔ eye eƒe nunya ƒo ɖe sia ɖe ta ta la, naneke mate ŋu axe mɔ nɛ be wòagawɔ eƒe ŋugbedodowo dzi o. Mía Fofo si le dziƒo la ka ɖe edzi be yeƒe ŋugbedodowo ava eme ale gbegbe be le eya gome la, ɖeko wòle abe ɖe wova eme xoxo ene. Eya tae wògblɔ tso wo ŋu be: “Wova eme!” (Xlẽ Nyaɖeɖefia 21:3-6.) Míenyae be Yehowa wɔa eƒe ŋugbedodowo dzi ɣesiaɣi. Enye “Mawu nuteƒewɔla.” Esia tae míeka ɖe edzi be eƒe ŋugbedodowo katã ava eme ɖo.—5 Mose 7:9.

SRƆ̃ BLEMATƆ SIWO SI XƆSE NƆ LA ƑE KPƆÐEŊU

4. Nu kae Mawu subɔla wɔnuteƒe siwo nɔ anyi do ŋgɔ na Kristotɔwo la nɔ mɔ kpɔm na vevie?

4 Woyɔ ŋutsu kple nyɔnu siwo xɔ Mawu dzi se la dometɔ 16 ŋkɔ le Hebritɔwo ta 11 lia me. Ame si gbɔgbɔ ʋã wòŋlɔ Biblia-gbalẽ sia la ƒo nu tso xɔsetɔ mawo kple ame bubu geɖe siwo “kpɔ ɖaseɖiɖi nyui na wo ɖokuiwo le woƒe xɔse ta” la ŋu. (Heb. 11:39) Wo katã ‘woka ɖe edzi’ bliboe be Mawu ana “dzidzimevi” si ƒe ŋugbe wòdo la nava ɖe Satana ƒe aglãdzedzea me tsonuwo katã ɖa, eye wòana tame si Yehowa ɖo le gɔmedzedzea me la nava eme. (1 Mose 3:15) Nuteƒewɔla mawo ku hafi Yesu Kristo si nye ‘dzidzimevia’ va ʋu agbenɔnɔ le dziƒo ƒe mɔnukpɔkpɔa ɖi. (Gal. 3:16) Ke hã, esi wònye be Yehowa ƒe ŋugbedodowo ava eme godoo ta la, afɔ wo ɖe tsitre eye woava zu amegbetɔ deblibowo be woanɔ agbe tegbee le paradiso me le anyigba dzi.—Ps. 37:11; Yes. 26:19; Hos. 13:14.

5, 6. Nu kae Abraham kple eƒe ƒomea nɔ mɔ kpɔm na vevie, eye aleke wowɔ do ŋusẽ woƒe xɔse? (Kpɔ foto si le nyati sia ƒe gɔmedzedze.)

5 Hebritɔwo 11:13 gblɔ tso ame siwo nɔ anyi do ŋgɔ na Kristotɔwo la dometɔ aɖewo ŋu be: “Le xɔse me ame siawo katã ku, togbɔ be woƒe asi mesu ŋugbedodoawo dzi o hã; ke wokpɔ wo le adzɔge ɖaa, eye wodo ɖoaƒe na wo.” Wo dometɔ ɖekae nye Abraham. Ðe wòtsɔ dzidzɔ nɔ mɔ kpɔm be yeava nɔ agbe le “dzidzimevi” si ƒe ŋugbe wodo la ƒe dziɖuɖu tea? Yesu ɖo nya sia ŋu eme kɔ nyuie esi wògblɔ na eƒe futɔwo be: “Mia fofo Abraham tso aseye be yeakpɔ nye ŋkeke la, ekpɔe hã, eye dzi dzɔe.” (Yoh. 8:56) Nenemae wònɔ le Sara, Isak, Yakob kple ame bubu geɖe siwo nɔ mɔ kpɔm na Fiaɖuƒe “si ƒe aɖaŋuwɔla kple tsolae nye Mawu” la hã gome.—Heb. 11:8-11.

6 Aleke Abraham kple eƒe ƒomea do ŋusẽ woƒe xɔsee? Ɣeaɖewoɣi la, Mawu ƒo nu na wo to mawudɔlawo dzi, alo le drɔ̃ewo me loo alo ŋutegawo me. Anɔ eme hã be wosrɔ̃ nu tso eŋu le nuteƒewɔla siwo nɔ anyi ɣemaɣi la gbɔ alo le blemagbalẽ siwo ŋu kakaɖedzi nɔ la me. Gawu la, womeŋlɔ nu siwo wosrɔ̃ la be o, ke boŋ wode asixɔxɔ Mawu ƒe ŋugbedodowo kple nudidiwo ŋu, eye wode ŋugble le wo ŋu. Esi wònye be ŋutsu kple nyɔnu xɔsetɔ mawo ka ɖe edzi bliboe be yewoƒe mɔkpɔkpɔa ava eme ta la, wonɔ klalo be yewoado dzi le fukpekpe ɖe sia ɖe me ale be yewoayi edzi awɔ nuteƒe na Mawu.

7. Nu kawoe Yehowa na mí dɔmenyotɔe be xɔse sẽŋu nasu mía si, eye aleke wòle be míawɔ wo ŋu dɔe?

7 Yehowa na eƒe Nya, Biblia la, mí dɔmenyotɔe be wòakpe ɖe mía ŋu míado ŋusẽ míaƒe xɔse. Hafi míanye ‘dzidzɔtɔwo’ eye míaƒe mɔwo ‘nadze edzi’ la, ele be míanɔ Mawu ƒe Nya la xlẽm gbe sia gbe ne anya wɔ. (Ps. 1:1-3; xlẽ Dɔwɔwɔwo 17:11.) Tsɔ kpe ɖe eŋu la, ele be míayi edzi anɔ ŋugble dem le Mawu ƒe ŋugbedodowo ŋu ahanɔ agbe ɖe  eƒe nudidiwo nu, abe ale si Yehowa subɔla siwo nɔ anyi do ŋgɔ na Kristotɔwo la wɔe ene. Azɔ hã, Yehowa toa “kluvi nuteƒewɔla kple aɖaŋudzela” la dzi naa gbɔgbɔmenuɖuɖu gbogbo aɖewo mí. (Mateo 24:45) Eya ta, ne míedea asixɔxɔ nu siwo míesrɔ̃na tso Biblia kple agbalẽ siwo Yehowa na mí me ŋu la, míanɔ abe xɔsetɔ siwo nɔ anyi le blema, siwo ‘ɖo dzi ɖe’ Fiaɖuƒemɔkpɔkpɔa ŋu “kakaɖedzitɔe” la ene.

8. Aleke gbedodoɖa ate ŋu ado ŋusẽ míaƒe xɔse?

8 Gbedodoɖa hã wɔ akpa vevi aɖe be xɔse sẽŋu nɔ ɖaseɖila siwo nɔ anyi do ŋgɔ na Kristotɔwo la si. Esi wokpɔe be Mawu ɖo yewoƒe gbedodoɖawo ŋu la, esia do ŋusẽ woƒe xɔse. (Neh. 1:4, 11; Ps. 34:4, 15, 17; Dan. 9:19-21) Míawo hã míate ŋu agblɔ míaƒe dzimenyawo na Yehowa, elabena míenya be aɖo to mí ahado ŋusẽ mí be míado dzi le dzidzɔ me. Eye ɣesiaɣi si míekpɔe be Mawu ɖo míaƒe gbedodoɖawo ŋu la, esia doa ŋusẽ míaƒe xɔse. (Xlẽ 1 Yohanes 5:14, 15.) Esi wònye be gbɔgbɔa ƒe kutsetse ƒe akpa aɖee xɔse nye ta la, ehiã be ‘míanɔ’ Mawu ƒe gbɔgbɔa ‘biabia dzi’ abe ale si Yesu de dzi ƒo na mí be míawɔe ene.—Luka 11:9, 13.

9. To vovo na gbedodoɖa ɖe mía ɖokuiwo ta la, ame kawo hã ta wòle be míado gbe ɖa ɖo?

9 Esɔ be míado gbe ɖa abia kpekpeɖeŋu tso Mawu gbɔ, gake mele be míaƒe gbedodoɖawo naku ɖe kpekpeɖeŋubiabia ɖeɖe ko ŋu o. Míate ŋu ada akpe na Yehowa ahakafui gbe sia gbe ɖe eƒe ‘nukudɔ siwo mele xexlẽ me o’ la ta! (Ps. 40:5) Azɔ hã, ele be míaƒe gbedodoɖawo naɖee afia be míele “ŋku ɖom ame siwo le gaxɔ me la dzi.” Ele be míado gbe ɖa ɖe míaƒe xexea me katã ƒe nɔviwo ƒe habɔbɔa ta, vevietɔ “ame siwo le ŋgɔ xɔm le [mía] dome.” Ne míekpɔ ale si Yehowa ɖoa gbe siwo míedona ɖa kple tame ɖeka ŋui la, ewɔa dɔ ɖe mía dzi ale gbegbe!—Heb. 13:3, 7.

WOMENA TA O

10. Mawu subɔla siwo lé nuteƒewɔwɔ me ɖe asi tamanamanae la dometɔ aɖewo ɖe, eye nu kae do ŋusẽ wo wowɔ nuteƒe?

10 Le Hebritɔwo ta 11 lia me la, apostolo Paulo ƒo nu tso tetekpɔ vovovo siwo me Mawu subɔla geɖe siwo ŋkɔwo womeyɔ o la to ŋu. Le kpɔɖeŋu me, apostoloa ƒo nu tso nyɔnu xɔsetɔ siwo ƒe viwo ku gake emegbe wofɔ wo ɖe tsitre la ŋu. Eyome eƒo nu tso ame bubu siwo melɔ̃ “be yewoana ta ale be yewoakpɔ ablɔɖe le mɔ aɖe nu o, be yewoakpɔ tsitretsitsi si nyo wu la” ŋu. (Heb. 11:35) Togbɔ be míate ŋu anya ame siwo koŋ nɔ susu me na Paulo o hã la, woƒu kpe ame aɖewo abe Nabot kple Zakariya ene le esi woɖo to Mawu hewɔ eƒe lɔlɔ̃nu ta. (1 Fia. 21:3, 15; 2 Kron. 24:20, 21) Ne ɖe Daniel kple exɔlɔ̃awo tiae be yewomawɔ nuteƒe na Mawu o la, anye ne mɔnukpɔkpɔ asu wo si be ‘woakpɔ ablɔɖe le mɔ aɖe nu’ hafi. Gake esi woka ɖe Mawu ƒe ŋusẽ dzi ta la, wote ŋu ‘mia nu na dzatawo hetsi dzo ƒe ŋusẽ nu,’ le kpɔɖeŋunyagbɔgblɔ nu.—Heb. 11:33, 34; Dan. 3:16-18, 20, 28; 6:13, 16, 21-23.

11. Dodokpɔ kawoe va nyagblɔɖila aɖewo dzi le woƒe xɔse ta?

11 ‘Woɖu fewu’ le nyagblɔɖilawo, abe Mika kple Yeremiya ene ŋu, eye ‘wokpe gaxɔmenɔnɔwo ƒe fu’ hã le woƒe xɔse ta. Nyagblɔɖila bubuwo, abe Eliya ene, tsa “tsaglãla le gbedzi kple towo dzi kpakple anyigba dzi agadowo kple ʋewo me.” Wo katã wodo dzi, elabena ‘woɖo dzi ɖe nu si wonɔ mɔ kpɔm na kakaɖedzitɔe la ŋu.’—Heb. 11:1, 36-38; 1 Fia. 18:13; 22:24-27; Yer. 20:1, 2; 28:10, 11; 32:2.

12. Ame kae ɖo dzidodo le dodokpɔwo me ƒe kpɔɖeŋu gãtɔ kekeake ɖi, eye nu kae kpe ɖe eŋu wòdo dzi?

12 Esi Paulo ƒo nu tso ŋutsu kple nyɔnu xɔsetɔ vovovowo ŋu vɔ la, ehe susu yi ame si ɖo dzidodo ƒe kpɔɖeŋu gãtɔ ɖi la dzi—eyae nye mía Aƒetɔ Yesu Kristo. Hebritɔwo 12:2 gblɔ be: “Edo dzi kpe fuwɔameti  ŋuti fu, eye mebu ŋukpe ɖe naneke me o, eye wòbɔbɔ nɔ Mawu ƒe fiazikpui la ƒe ɖusime.” Vavãe, ele be míaƒe susu nanɔ ale si Yesu do dzi le xɔse ƒe dodokpɔ sesẽtɔ kekeake me la dzi. (Xlẽ Hebritɔwo 12:3.) Nusrɔ̃la Antipa kple Kristotɔ gbãtɔ bubu siwo ku xɔsetaku la ɖoe kplikpaa be yewomadzudzɔ nuteƒewɔwɔ na Yehowa o, abe ale si Yesu wɔe ene. (Nyaɖ. 2:13) Woafɔ wo ɖe tsitre woaɖanɔ agbe le dziƒo, eye teƒeɖoɖo sia ƒo “tsitretsitsi si nyo wu,” si xɔsetɔ siwo nɔ anyi le blema la nɔ mɔ kpɔm na la ta. (Heb. 11:35) Ɣeyiɣi aɖe megbe tso esime woɖo Fiaɖuƒea anyi le ƒe 1914 me la, wofɔ amesiamina wɔnuteƒe mawo katã ɖe tsitre yi dziƒo ale be woa kple Yesu woaɖu fia ɖe amegbetɔƒomea dzi.—Nyaɖ. 20:4.

EGBEGBE MAWU SUBƆLA SIWO SI XƆSE SẼŊU LE

13, 14. Dodokpɔ kawoe va Rudolf Graichen dzi, eye nu kae kpe ɖe eŋu wòdo dzi?

13 Mawu subɔla miliɔn geɖe le Yesu ƒe kpɔɖeŋu srɔ̃m egbea esi wona woƒe susu nɔa woƒe mɔkpɔkpɔa dzi eye womeɖea mɔ dodokpɔwo nana woƒe xɔse me gbɔdzɔna o. Bu Rudolf Graichen, si wodzi le Germany le ƒe 1925 me ŋu kpɔ. Eɖo ŋku nu siwo ŋu Biblia ƒo nu tsoe ŋuti nɔnɔmetata siwo woklã ɖe gli ŋu le woƒe aƒe me dzi. Egblɔ be: “Le wo dometɔ ɖeka me la, wota amegãxi kple alẽvi, gbɔ̃vi kple lãklẽ, nyivi kple dzata—wo katã wole teƒe ɖeka le ŋutifafa me, eye ŋutsuvi sue aɖe le wo kplɔm. . . .  Nɔnɔmetata  mawo tsi susu me nam ɖikaa.” (Yes. 11:6-9) Togbɔ be Nazi Adzamekpovitɔwo wɔ fu Rudolf kutɔkutɔe ƒe geɖe, eye emegbe ekpe fu le Ɣedzeƒe Germany ƒe Adzamekpovitɔwo si me hã la, eyi edzi xɔe se kple kakaɖedzi be anyigba la ava zu paradiso.

14 Dodokpɔ sesẽ bubu siwo va Rudolf dzie nye be dɔléle aɖe si woyɔna be typhus la dze dadaa si gbɔ melɔ̃a nu le o dzi le Ravensbrück fuwɔamegaxɔ me eye wòku, eye eya ŋutɔ kpɔ eteƒe fofoa ƒe xɔse gbɔdzɔ ale gbegbe be wòva gbe nu le xɔse la gbɔ mlɔeba hede asi agbalẽ te be yemeganye Yehowa Ðasefo o. Esi wova ɖe asi le Rudolf ŋu le gaxɔ me mlɔeba la, mɔnukpɔkpɔ su esi wòzu nutome sue dzikpɔla eye emegbe wokpee wòyi ɖade Gilead Suku. Esia megbe ezu dutanyanyuigblɔla le Chile, eye wògazu nutome sue dzikpɔla le afi ma hã. Ke hã, xɔse ƒe dodokpɔ siwo va Rudolf dzi la mese ɖe afi ma o. Eɖe dutanyanyuigblɔla aɖe si ŋkɔe nye Patsy, eye ƒe ɖeka megbe la, wo vinyɔnuvi si nye vidzĩ la ku. Emegbe srɔ̃a si gbɔ melɔ̃a nu le o, si xɔ ƒe 43 pɛ ko la hã ku. Rudolf do dzi le dodokpɔ mawo katã me. Esi wòku amegã eye lãmesẽkuxiwo nɔ fu ɖem nɛ gɔ̃ hã la, egakpɔtɔ nɔ gbesiagbe mɔɖeɖedɔa wɔm eye wòganye hamemetsitsi hã esime eƒe agbemeŋutinya dze le August 1, 1997, ƒe Gbetakpɔxɔ me, axa 20-25. [1]

15. Gblɔ nɔvi siwo gakpɔtɔ le Yehowa subɔm kple dzidzɔ togbɔ be wole yometiti me tom hã ƒe kpɔɖeŋu aɖewo.

15 Yehowa Ðasefo geɖewo gakpɔtɔ le dzidzɔ kpɔm le mɔkpɔkpɔ si le wo si la ta togbɔ be wole wo yome tim vevie hã. Le kpɔɖeŋu me, wolé mía nɔvi geɖewo de gaxɔ me le Eritrea, Singapore kple South Korea, le esi wole Yesu ƒe se si nye be míagatsɔ yi ɖe mía havi ŋu o la dzi wɔm ta. (Mat. 26:52) Mía nɔvi alafa geɖe siwo le gaxɔ me la dometɔ aɖewoe nye Isaac, Negede kple Paulos, siwo le gaxɔ me le Eritrea ƒe 20 kple edzivɔwoe nye esia! Eye le ɣeyiɣi mawo katã me la, mɔnukpɔkpɔ mesu wo si be woaɖe srɔ̃ alo akpɔ wo dzila tsitsiwo dzi o. Nɔviŋutsu mawo gakpɔtɔ le nuteƒe wɔm na Yehowa togbɔ be wowɔ fu wo vevie hã. Dzidzɔ si le mo na wo le woƒe foto si le míaƒe Internet nyatakakadzraɖoƒe si nye jw.org la ɖee fia be wogakpɔtɔ lé xɔsea me ɖe asi sesĩe. Gaxɔdzikpɔlawo gɔ̃ hã dea bubu wo ŋu.

Ðe nèle nu srɔ̃m tso xɔse ƒe kpɔɖeŋuɖola siwo le miaƒe hamea me la gbɔa? (Kpɔ memama 15, 16)

16. Aleke xɔse sẽŋu ate ŋu akpɔ tawòe?

16 Yehowa ƒe amewo dometɔ akpa gãtɔ mele yometiti sesẽwo me tom o. Gake wole xɔse ƒe dodokpɔ bubuwo me tom. Wo dometɔ geɖe da ahe alo wokpe fu le aʋawɔwɔ siwo yi edzi le woƒe dukɔa me alo dzɔdzɔmefɔkuwo si me. Bubuwo hã gbe be yewomati nudzedziname kple ŋkɔxɔxɔ yome le xexe sia me o, abe Mose kple blemafofo bubuwo ke ene. Wole ʋiʋlim vevie be yewomaɖe mɔ ŋutilãmenudidi vivivo ƒe mɔ̃ naɖe yewo o. Nu kae kpe ɖe wo ŋu wote ŋu le esia wɔm? Nu si kpe ɖe wo ŋue nye be wolɔ̃ Yehowa eye woxɔe se kple kakaɖedzi blibo be ava ɖe nu madzɔmadzɔ wɔwɔ katã ɖa eye wòana esubɔla wɔnuteƒewo nakpɔ agbe mavɔ le xexe yeye si me dzɔdzɔenyenye anɔ la me.—Xlẽ Psalmo 37:5, 7, 9, 29.

17. Nu kae nèɖo kplikpaa be yeawɔ, eye nu ka mee míadzro le nyati si kplɔ esia ɖo me?

17 Le nyati sia me la, míekpɔ ale si ŋugbledede le Mawu ƒe ŋugbedodowo ŋu kple gbedodoɖa edziedzi akpe ɖe mía ŋu be xɔse sẽŋu nakpɔtɔ anɔ mía si. Esia hã akpe ɖe mía ŋu míaƒe susu nanɔ nu si míele “mɔ kpɔm na la ŋu kakaɖedzitɔe” eye míado dzi le xɔse ƒe dodokpɔwo me. Nu si Biblia gblɔ tso xɔse ŋu la ƒe akpa aɖe me ko míedzro le nyati sia me. Míagadzro bubuwo me le nyati si kplɔ esia ɖo me.

^ [1] (memama 14) Kpɔ nyati si nye “Meto Dodokpɔ Geɖe Me Gake Nyemebu Mɔkpɔkpɔ O,” si dze le April 22, 2002, ƒe yevugbe me Nyɔ! me. Eku ɖe Andrej Hanák si tso Slovakia ƒe agbemeŋutinya ŋu.