Dzo kpo yi emenuwo dzi

Dzo kpo yi emenuawo dzi

Ènyaa?

Ènyaa?

 Le blema la, ɖe wòdzɔna ŋutɔŋutɔ be ame aɖe nawu gbe vɔ̃ɖiwo ɖe ame bubu ƒe agble mea?

Fiagã Justinian ƒe Digest, si wota le ƒe 1468 me la nye nuŋlɔɖi vovovo siwo na numekɔkɔ ku ɖe blema senyawo ŋu la dometɔ ɖeka

LE MATEO 13:24-26 la, Yesu gblɔ be: “Dziƒofiaɖuƒe la le abe ame aɖe si wu nuku nyui ɖe eƒe agble me ene. Esi amewo dɔ alɔ̃ la, eƒe futɔ va wu gbe vɔ̃ɖi ɖe luawo dome, eye wòdzo. Esi luawo to aŋgba hetse la, gbe vɔ̃ɖiawo hã do.” Agbalẽŋlɔla vovovowo tsɔ nya ɖe kpɔɖeŋu sia ƒe nyateƒenyenye ŋu, ke hã, Romatɔwo ƒe blema-segbalẽwo ɖee fia be enye nu si dzɔna ŋutɔŋutɔ ɣemaɣi.

Biblia-gɔmeɖegbalẽ aɖe gblɔ be: “Le Romatɔwo ƒe se nu la, sedzidadae wònye ne ame aɖe wu gbe vɔ̃ɖi ɖe ame bubu ƒe agble me . . . le hlɔ̃biabia ta. Esi wònye be wode se ɖe nuwɔna sia nu ta la, edze ƒãa be enye nu si bɔ ɣemaɣi.” Senyala Alastair Kerr gblɔ be, le ƒe 533 K.Ŋ. me la, Roma Fiagã Justinian ta Romatɔwo ƒe segbalẽa me nya veviwo kple senyala siwo nɔ anyi le ƒe 100-250 K.Ŋ. lɔƒo la ƒe nya aɖewo ɖe eƒe agbalẽ si nye Digest me. Wogblɔ le agbalẽ ma ƒe akpa aɖe (Digest, 9.2.27.14) be senyala Ulpian he susu yi nudzɔdzɔ aɖe si ƒe alafa evelia me Roma dziɖuɖumegã Celsus drɔ̃ la dzi. Ame aɖe wu gbe vɔ̃ɖiwo ɖe ame bubu ƒe agble me, eye esia gblẽ eƒe agblemenuwo dome. Digest la gblɔ ale si woate ŋu adrɔ̃ nyaa na agbletɔa, alo ame si haya anyigba nɔ agble dem le edzi la, ale be woabia nu si gblẽ la ŋu fe le vɔ̃wɔlaa si atsɔ aɖo eteƒe.

Eya ta esi nu vlo siawo tɔgbi dzɔna le blema Roma Fiaɖuƒea me ta la, nudzɔdzɔ si ŋu nya Yesu gblɔ la nye nu si dzɔna ŋutɔŋutɔ.

Ŋusẽ ka gbegbee Roma dziɖuɖua na Yudatɔwo ƒe ŋgɔnɔlawo le ƒe alafa gbãtɔ me?

ƔEMAƔI la, Roma dziɖuɖua ƒe ŋusẽ tee Yudea nɔ, eye woɖoa dziɖuɖua teƒenɔla si nye nutodziɖula, si te asrafohawo nɔ la, ɖe nutoa me. Eƒe dɔ koŋ ye nye be wòaxɔ adzɔ na Roma fiaɖuƒea, wòakpɔ egbɔ be amewo nɔ anyi le ŋutifafa me eye nuwo le ɖoɖo nu. Nu si ŋu Romatɔwo tsi dzi ɖoe nye be woaɖo asi aglãdzenuwɔnawo dzi eye woahe to na ame sia ame si de tɔtɔ dukɔa me. Ema manɔmee la, enye Romatɔwo ƒe ɖoɖo be yewoagblẽ nutoa ƒe gbe sia gbe hadomeɖoɖowo dzi kpɔkpɔ ɖe nutoa me ŋgɔnɔlawo si me.

Yudatɔwo ƒe Sanhedrin la kpe ta

Sanhedrin, si nye Yudatɔwo ƒe ʋɔnudrɔ̃ƒe kɔkɔtɔ kple adaŋudetakpekpe lae kpɔa nya siwo ku ɖe Yudatɔwo ƒe sewo ŋu la gbɔ. Ʋɔnudrɔ̃ƒe suesuewo hã nɔ Yudea ƒe teƒeteƒewo. Anɔ eme be ʋɔnudrɔ̃ƒe mawoe drɔ̃a Yudatɔwo dome dzrenyawo kple nya siwo ku ɖe nu vlo wɔwɔ ŋu ƒe akpa gãtɔ eye Roma dziɖulawo medea nu eme o. Gake Romatɔwo meɖe mɔ na Yudatɔwo ƒe ʋɔnudrɔ̃ƒewo be woawu nu vlo wɔlawo o—Romatɔwo ɖoe be yewo koe kpɔ mɔ awɔ esia. Gake go si me Sanhedrin la mewɔ ɖe ɖoɖo sia dzi le o ye nye esime wodrɔ̃ ʋɔnu Stefano eye wona woƒu kpee wòku.—Dɔw. 6:8-15; 7:54-60.

Eya ta, ŋusẽ geɖe nɔ Yudatɔwo ƒe ʋɔnudrɔ̃ƒe si nye Sanhedrin la si. Ke hã, agbalẽnyala Emil Schürer gblɔ be: “Seɖoƒe si ŋu Romatɔwo mefena le kura o, si woɖo na Sanhedrin lae nye be Roma dziɖulawo ate ŋu atso le wo ɖokuisi ɣesiaɣi ade nu nya aɖe me, abe ale si wowɔnɛ ne wokpɔe be nyaa ka Roma dziɖuɖua ene.” Esia tɔgbi ye dzɔ le aʋafiagã Klaudio Lisia ƒe kpɔkplɔ te esime wòxɔ apostolo Paulo, ame si nye Romatɔ la le Yudatɔwo si hekplɔe yi asrafowo nɔƒe.—Dɔw. 23:26-30.