Dzo kpo yi emenuwo dzi

Dzo kpo yi emenuawo dzi

Mègana Wò Lɔlɔ̃ Nayi To O

Mègana Wò Lɔlɔ̃ Nayi To O

“Le sedzimawɔmawɔ ƒe dzidziɖedzi ta la, ame akpa gãtɔ ƒe lɔlɔ̃ ayi to.”—MAT. 24:12.

HADZIDZI: 60, 135

1, 2. (a) Ame kawo ŋue Yesu ƒe nya si le Mateo 24:12 la ku ɖo gbã? (b) Aleke Dɔwɔwɔwo ƒe agbalẽa na míekpɔe be Kristotɔ gbãtɔwo dometɔ akpa gãtɔ yi edzi ɖee fia be yewolɔ̃ yewo nɔewo? (Kpɔ nɔnɔmetata si le nyati sia ƒe gɔmedzedze.)

YESU gblɔ be nu siwo ade dzesi “nuɖoanyia ƒe nuwuɣi” la ƒe akpa aɖee nye be, “ame akpa gãtɔ ƒe lɔlɔ̃ ayi to.” (Mat. 24:3, 12) Le ƒe alafa gbãtɔ me la, Yudatɔwo gblɔna be Mawu ƒe dukɔe yewonye, ke hã, woɖe mɔ woƒe lɔlɔ̃ na Mawu yi to.

2 Gake Kristotɔ akpa gãtɔ siwo nɔ anyi ɣemaɣi la yi edzi ‘nɔ Kristo ŋuti nya nyui la gblɔm’ veviedodotɔe, eye woyi edzi lɔ̃ Mawu, wo hati Kristotɔwo kpakple dzimaxɔsetɔwo. (Dɔw. 2:44-47; 5:42) Ke hã, Yesu yomedzela siwo nɔ anyi le ƒe alafa gbãtɔ me la dometɔ aɖewo ɖe mɔ woƒe lɔlɔ̃ yi to.

3. Nu ka gbɔe wòanya tso be Kristotɔ aɖewo ƒe lɔlɔ̃ yi to?

3 Yesu Kristo si wofɔ ɖe tsitre la gblɔ na ƒe alafa gbãtɔ me Kristotɔ siwo nɔ Efeso la be: “Nya si le asinye ɖe ŋuwòe nye be, ègblẽ lɔlɔ̃ si nɔ asiwò gbã la ɖi.” (Nyaɖ. 2:4) Nu ka gbɔe esia anya tso? Anɔ eme be xexea me tɔ siwo ŋutilã ƒe nudzodzrowo xɔ susu me na la ƒe nuwɔnawo kpɔ ŋusẽ ɖe Kristo ƒe nusrɔ̃la gbãtɔ siawo dzi. (Ef. 2:2, 3) Nu baɖa wɔwɔ xɔ aƒe ɖe Efeso le ƒe  alafa gbãtɔ me, abe ale si wòle le dugã geɖe me egbea ene. Enye dugã si me kesinɔnuwo bɔ ɖo eteƒe mekɔ o, eye agbeɖuɖu, dzidzɔdonamenuwo kple dzidzemegbenɔnɔ ye nye nu vevitɔ na amewo. Edze ƒãa be ɖokuitɔdidi ƒe nudzodzrowo yome nɔnɔ wɔe be ɖokuitɔmadimadi ƒe lɔlɔ̃ yi to. Azɔ hã, ŋukpenanuwɔwɔ dzimesesẽtɔe kple gbɔdɔdɔ ƒe agbe gbegblẽ nɔnɔ nyɔŋuwo xɔ aƒe ɖi ɣemaɣi.

4. (a) Aleke amewo ƒe lɔlɔ̃ yi to egbea? (b) Nu etɔ̃ kawo mee wòle be míana míaƒe lɔlɔ̃ nu nasẽ le?

4 Nya si Yesu gblɔ ɖi be amewo ƒe lɔlɔ̃ ayi to la ku ɖe míaƒe ŋkekea hã ŋu. Egbea, lɔlɔ̃ na Mawu le to yim tso ŋkeke yi ŋkeke. Ame miliɔn geɖe trɔ ɖa le Mawu yome eye wokpɔa amegbetɔwo ƒe habɔbɔwo sinu be woakpɔ ameƒomea ƒe kuxiwo gbɔ. Esia wɔe be ame siwo mesubɔa Yehowa Mawu o la ƒe lɔlɔ̃ le to yim ɖaa. Abe ale si wòdzɔ ɖe Kristotɔ siwo nɔ Efeso le ƒe alafa gbãtɔ me dzi ene la, ate ŋu adzɔ be Kristotɔ vavã siwo li egbea hã naɖe ŋu ɖi eye woaɖe mɔ woƒe lɔlɔ̃ nayi to. Azɔ míadzro nu etɔ̃ siwo me wòle be míana míaƒe lɔlɔ̃ nu nasẽ le la me: (1) Lɔlɔ̃ na Yehowa, (2) lɔlɔ̃ na Biblia me nyateƒea kple (3) mía nɔvi Kristotɔwo lɔlɔ̃.

LƆLƆ̃ NA YEHOWA

5. Nu ka tae wòle be míalɔ̃ Mawu?

5 Hafi Yesu naƒo nu tso ale si amewo ƒe lɔlɔ̃ ayi toe ŋu la, ete gbe ɖe lɔlɔ̃ si le vevie wu la dzi do ŋgɔ le ŋkeke ma ke dzi. Egblɔ be: “‘Lɔ̃ Yehowa wò Mawu kple wò dzi blibo kple wò luʋɔ blibo kpakple wò tamesusu blibo.’ Esiae nye sedede gãtɔ kple gbãtɔ.” (Mat. 22:37, 38) Vavãe, Yehowa Mawu lɔlɔ̃ kple dzi blibo kpena ɖe mía ŋu be míawɔ ɖe eƒe sededewo dzi, ado dzi ahalé fu vɔ̃. (Xlẽ Psalmo 97:10.) Ke hã, Satana kple eƒe xexea le agbagba dzem be yewoana míaƒe lɔlɔ̃ na Mawu nu natsi.

6. Esi amewo ƒe lɔlɔ̃ na Mawu yi to la, nu kae do tso eme?

6 Le xexea me la, susu totrowoe le amewo si ku ɖe lɔlɔ̃ ŋu. Le esi amewo nalɔ̃ Wɔla la teƒe la, wozu “ɖokuilɔ̃lawo” boŋ. (2 Tim. 3:2) Xexe sia si dzi ɖum Satana le la doa “ŋutilã ƒe nudzodzro kple ŋkuwo ƒe nudzodzro kple ame ƒe nunɔamesiwo fiafia adegbeƒoƒotɔe” ɖe ŋgɔ. (1 Yoh. 2:16) Apostolo Paulo xlɔ̃ nu ehati Kristotɔwo be woagati ŋutilã ƒe nudzodzrowo yome o, esi wògblɔ be: “Susu ɖoɖo ŋutilã la ŋu hea ku vanɛ . . . elabena susu ɖoɖo ŋutilã la ŋu fia Mawu ƒe futɔnyenye.” (Rom. 8:6, 7) Eme menyo na ame siwo tsɔ ŋutilãmenuwo yome titi alo kɔɖiɖi na gbɔdɔdɔ ƒe dzodzro vɔ̃wo ɖo dɔe la kura o, eye wohe vevesese geɖe va wo ɖokuiwo dzi.—1 Kor. 6:18; 1 Tim. 6:9, 10.

7. Nu bubu kawoe ate ŋu agblẽ nu le Kristotɔwo ŋu egbea?

7 Le dukɔ aɖewo me la, mawudzimaxɔselawo, Mawu ƒe anyinɔnɔ ŋuti ɖikelawo kple ame siwo xɔe se be xexea dzɔ le eɖokui si la doa susu vovovowo ɖe ŋgɔ si wɔnɛ be menye ɖeko amewo ƒe lɔlɔ̃ na Mawu yia to ko evɔ o, ke womegaxɔa Mawu dzi sena hã o. Wona ame geɖe bunɛ be ɖekemanyalawo kple ame manyanuwoe xɔnɛ sena be Wɔla aɖe li. Azɔ hã, amewo dea bubu tɔxɛ dzɔdzɔmeŋutinunyalawo ŋu, si wɔe be woɖe susu ɖa le Wɔla la boŋ ŋu. (Rom. 1:25) Toɖoɖo nufiafia mawo ate ŋu ate mí ɖa le Yehowa ŋu, eye ana míaƒe lɔlɔ̃ nayi to.—Heb. 3:12.

8. (a) Kuxi kawoe ate ŋu aɖe dzi le Yehowa subɔlawo ƒo? (b) Kakaɖedzinya kae le Psalmo 136 lia me na mí?

8 Dziɖeleameƒo hã ate ŋu ana míaƒe xɔse nagbɔdzɔ eye wòana míaƒe lɔlɔ̃ na Mawu nayi to. Le xexe vɔ̃ɖi sia si dzi Satana kpɔ ŋusẽ ɖo me la, mí katã míedoa go nɔnɔme siwo ɖea dzi le mía ƒo ɣeaɖewoɣi. (1 Yoh. 5:19) Ðewohĩ tsitsi, lãmesẽkuxiwo  alo gakuxiwo wɔe be míele nɔnɔme sesẽwo me tom. Alo sese le mía ɖokui me be míele ɖeke me o, mɔkpɔkpɔ siwo meva eme o, alo míawo ŋutɔwo míaƒe kpododo nu na míelé blanui. Ke hã, mele be míaɖe mɔ gbeɖe be nɔnɔme alo seselelãme mawo nawɔe be míasusui be Yehowa gblẽ mí ɖi o. Ke boŋ ele be míanɔ ŋugble dem le nya siwo ana míakpɔ kakaɖedzi be lɔlɔ̃ si le Yehowa si na mí la nu metsina gbeɖe o la ŋu. Nya ma tɔgbi dze le Psalmo 136:23, afi si gblɔ be: “Eya ame si ɖo ŋku mía dzi esime wobɔbɔ mí ɖe anyi, elabe eƒe lɔlɔ̃ si nu metsina o la li tegbee.” Vavãe, lɔlɔ̃ si le Yehowa si na esubɔlawo nu metsina gbeɖe o. Eya ta, míate ŋu aka ɖe edzi be esea míaƒe “kokoƒogbe,” eye wòɖoa eŋu.—Ps. 116:1; 136:24-26.

9. Nu kae do ŋusẽ Paulo wòyi edzi lɔ̃ Mawu?

9 Paulo hã de ŋugble le ale si Yehowa léa be nɛ la ŋu abe ale si hakpalaa hã wɔe ene. Paulo ŋlɔ bena: “Yehowa ye nye nye kpeɖeŋutɔ; nyemavɔ̃ o. Nu kae amegbetɔ ate ŋu awɔm?” (Heb. 13:6) Esi Paulo ka ɖe edzi bliboe be Yehowa léa be na ye ta la, ete ŋu do dzi le agbemekuxiwo me. Meɖe mɔ nɔnɔme madeamedzi aɖeke ɖe dzi le eƒo o. Le nyateƒe me la, esime Paulo nɔ gaxɔ me gɔ̃ hã la, eŋlɔ agbalẽ geɖe tsɔ de dzi ƒo na hameawo. (Ef. 4:1; Flp. 1:7; Filem. 1) Ɛ̃, togbɔ be Paulo to nɔnɔme sesẽ geɖe me hã la, eyi edzi lɔ̃ Mawu. Nu kae kpe ɖe eŋu? Eɖo ŋu ɖe “akɔfafawo katã ƒe Mawu, ame si faa akɔ na mí le míaƒe tetekpɔwo katã me” la ŋu. (2 Kor. 1:3, 4) Aleke míate ŋu asrɔ̃ Paulo ƒe kpɔɖeŋua be lɔlɔ̃ si le mía si na Yehowa la nu nagasẽ ɖe edzi?

Ðee fia be yelɔ̃ Yehowa (Kpɔ memama 10)

10. Nu kae míate ŋu awɔ be lɔlɔ̃ si le mía si na Yehowa la nu nagasẽ ɖe edzi?

10 Paulo ŋutɔ gblɔ mɔ vevi si dzi míato ana lɔlɔ̃ si le mía si na Yehowa la nu nagasẽ ɖe edzi. Eŋlɔ ɖo ɖe haxɔsetɔwo be: “Minɔ gbedodoɖa dzi ɣeawokatãɣi.” Emegbe egaŋlɔ na wo be: “Minɔ gbedodoɖa dzi ɖaa.” (1 Tes. 5:17; Rom. 12:12) Eya ta nuƒoƒo kple Mawu to gbedodoɖa dzi ye nye mɔ vevi si dzi míato ana ƒomedodo kplikplikpli nanɔ mía kplii dome. (Ps. 86:3) Ne míedia ɣeyiɣi doa gbe ɖa na Yehowa hegblɔa míaƒe susuwo kple dzimenyawo nɛ la, esia ana míate ɖe mía Fofo si le dziƒo, si nye “Gbedodoɖasela” la ŋu kplikplikpli. (Ps. 65:2) Eye ne míekpɔe be Yehowa ɖo míaƒe gbedodoɖawo ŋu la, esia hã nana míaƒe lɔlɔ̃ na eyama nu gasẽna ɖe edzi. Míeva kpɔnɛ dzea sii kɔtɛ be “Yehowa tsɔ ɖe ame siwo katã yɔnɛ la gbɔ.” (Ps. 145:18) Ne míeva ka ɖe edzi be Yehowa léa be na mí lɔlɔ̃tɔe alea la, esia akpe ɖe mía ŋu míado dzi le xɔse ƒe dodokpɔ bubuwo me.

LƆLƆ̃ NA BIBLIA ME NYATEƑEA

11, 12. Nu kae míate ŋu awɔ be míalɔ̃ Biblia me nyateƒea vevie?

11 Mí Kristotɔwo míelɔ̃ nyateƒe, eye míedea asixɔxɔ eŋu. Mawu ƒe Nya la me koe míakpɔ nyateƒe vavã le. Yesu do gbe ɖa na Fofoa be: “Wò nya la nye nyateƒe.” (Yoh. 17:17) Eya ta, hafi ame nate ŋu alɔ̃ nu si nye nyateƒe la, ele be Mawu ƒe Nya la ŋuti sidzedze vavãtɔ nasu esi. (Kol. 1:10) Ke hã, ebia nu geɖe wu sidzedze ƒe ame si susu ko. De dzesi ale si Psalmo 119 lia ŋlɔla kpe ɖe mía ŋu míese nu si wòfia be míalɔ̃ Biblia me nyateƒeae la gɔme. (Xlẽ Psalmo 119:97-100.) Ðe míedea ŋugble le Ŋɔŋlɔawo me nyawo ŋu le ŋkeke bliboa mea? Ne míedea ŋugble le mɔ vovovo siwo nu Biblia me nyateƒea dzi wɔwɔ ɖea vi na mí le ŋu la, míagava kpɔ ŋudzedze ɖe eŋu geɖe wu.

12 Psalmo 119 lia ŋlɔla yi edzi gblɔ be: “Aleke gbegbe wò nyawo vivi le nye ve mee nye esi! Wovivi wu anyitsi le nye nu me.” (Ps. 119:103) Biblia-srɔ̃gbalẽ siwo  Mawu ƒe habɔbɔa tana na mí la le abe nuɖuɖu viviwo ene. Ne míele nuɖuɖu si vivia mía nu ɖum la, míegbɔa dzi ɖe eŋu ɖunɛ be míase vivi nɛ. Nenema kee wòle be míagbɔ dzi ɖi ne míele nu srɔ̃m. Ekema míase vivi na ‘nyateƒenya viviawo’ eye míazã wo atsɔ akpe ɖe ame bubuwo ŋu.—Nyagb. 12:10.

13. Nu kae kpe ɖe Yeremiya ŋu wòlɔ̃ Ŋɔŋlɔawo me nyateƒea, eye dɔ kae wòwɔ ɖe edzi?

13 Nyagblɔɖila Yeremiya lɔ̃ Ŋɔŋlɔawo me nyateƒea. De dzesi ale si Mawu ƒe nyawo wɔ dɔ ɖe eƒe dzi dzii. Eya ŋutɔ gblɔ be: “Esi wò nyawo ka asinye la, meɖu wo; eye wò nya la na nye dzi kpɔ dzidzɔ hetso aseye, elabena wò ŋkɔe woyɔ ɖe ŋunye, Oo aʋakɔwo ƒe Yehowa.” (Yer. 15:16) Yeremiya de ŋugble le Mawu ƒe nya xɔasiawo ŋu nyuie. Ðeko wòle abe ɖe wòɖui eye eƒe dɔgbo tui wòme nyuie ene. Esia wɔe be ede asixɔxɔ gã mɔnukpɔkpɔ si su esi be Mawu ƒe ŋkɔ le eŋu la ŋu. Ðe lɔlɔ̃ si le mía si na Biblia me nyateƒea na míede dzesi mɔnukpɔkpɔ tɔxɛ si su mía si be Mawu ƒe ŋkɔ nanɔ mía ŋu eye míaɖe gbeƒã eƒe Fiaɖuƒea le nuwuɣi sia mea?

Ðee fia be yelɔ̃ Biblia me nyateƒea (Kpɔ memama 14)

14. Aleke míawɔ be lɔlɔ̃ si le mía si na Biblia me nyateƒea nu nasẽ ɖe edzi?

14 Tsɔ kpe ɖe Biblia kpakple Biblia-srɔ̃gbalẽwo xexlẽ ŋu la, nu kae míagate ŋu awɔ be lɔlɔ̃ si le mía si na Biblia me nyateƒea nu nasẽ ɖe edzi? Míagate ŋu ana lɔlɔ̃ si le mía si na Biblia me nyateƒea nu nasẽ ɖe edzi ne míedea hamea ƒe kpekpewo edziedzi. Míezãa Gbetakpɔxɔ tsɔ srɔ̃a Biblia kwasiɖa sia kwasiɖa, eye enye mɔ vevi aɖe si dzi Yehowa tona fiaa nu mí. Hafi míate ŋu ase nyati si me woadzro gɔme nyuie la, ele be míadzra ɖo ɖe Gbetakpɔxɔ Nusɔsrɔ̃ ɖe sia ɖe ŋu nyuie. Mɔ ɖeka si dzi míato adzra ɖo nyuie ye nye be míaxlẽ mawunyakpukpui siwo me nyawo womeŋlɔ ɖe nyatia me o. Egbea, míate ŋu awɔ Gbetakpɔxɔ magazinea ƒe kɔpi le jw.org nyatakakadzraɖoƒea alo akpɔe le JW Library dɔwɔnua dzi le gbe vovovowo me. Gbetakpɔxɔ ƒe kɔpi siwo le mɔ̃ dzi la tea ŋu wɔnɛ be mawunyakpukpui siwo me nyawo womeŋlɔ ɖe nyatia me o la ʋuʋu nɔa bɔbɔe eye wòtsɔna. Gake mɔnu ka kee míeɖazã o, mawunyakpukpuiawo xexlẽ kple ŋugbledede le wo ŋu nyuie awɔe be míaƒe  lɔlɔ̃ na Biblia me nyateƒea nagasẽ ɖe edzi.—Xlẽ Psalmo 1:2.

MÍA NƆVI KRISTOTƆWO LƆLƆ̃

15, 16. (a) Le Yohanes 13:34, 35 ƒe nya nu la, se kae Yesu de na mí? (b) Aleke lɔlɔ̃ si le mía si na mía nɔvi Kristotɔwo la do ƒome kple lɔlɔ̃ si le mía si na Mawu kple Biblia me nyateƒea?

15 Le Yesu ƒe anyigba dzi nɔnɔ ƒe zã mamlɛtɔ me la, egblɔ na eƒe nusrɔ̃lawo be: “Mele se yeye nam mi be mialɔ̃ mia nɔewo; ale si melɔ̃ mi la, miawo hã milɔ̃ mia nɔewo nenema ke. Esia me amewo katã anyae le be nye nusrɔ̃lawo mienye, ne lɔlɔ̃ le mia dome.”—Yoh. 13:34, 35.

16 Kadodo le lɔlɔ̃ si le mía si na mía nɔvi Kristotɔwo kpakple lɔlɔ̃ si le mía si na Yehowa la dome. Le nyateƒe me la, mímate ŋu alɔ̃ mía nɔvi Kristotɔwo ne mímelɔ̃ Yehowa o. Apostolo Yohanes ŋlɔ bena: “Ame si melɔ̃a nɔvia si kpɔm wòle o la, mate ŋu alɔ̃ Mawu si kpɔm mele o la o.” (1 Yoh. 4:20) Azɔ hã, míaƒe lɔlɔ̃ na Yehowa kpakple mía nɔvi Kristotɔwo do ƒome kple lɔlɔ̃ si le mía si na Biblia me nyateƒea. Nu ka tae? Nu si tae nye be, lɔlɔ̃ si le mía si na Biblia me nyateƒea ʋãa mí míewɔna ɖe Ŋɔŋlɔawo ƒe sedede si nye be míalɔ̃ Mawu kple mía nɔvi Kristotɔwo la dzi tso dzi me.—1 Pet. 1:22; 1 Yoh. 4:21.

Ðee fia be yelɔ̃ nɔvi Kristotɔwo (Kpɔ memama 17)

17. Mɔ kawo nue míate ŋu aɖee afia le be míelɔ̃ mía nɔviwo?

17 Xlẽ 1 Tesalonikatɔwo 4:9, 10. Mɔ siwo dzi míate ŋu ato aɖe lɔlɔ̃ afia mía nɔviwo le hamea me la ƒe kpɔɖeŋu aɖewo ɖe? Ðewohĩ ahiã be míakpe ɖe mía nɔvi tsitsi aɖe ŋu le ʋuɖonyawo me be wòate ŋu ade Kristotɔwo ƒe kpekpewo. Alo ahiã be woadzra aƒemenu aɖewo siwo gblẽ la ɖo na ahosi aɖe. (Yak. 1:27) Ehiã be míakpɔ vovo ɖe mía nɔvi siwo ƒo dzi ɖe le alo esiwo dzi nu te ɖo alo esiwo le nɔnɔme sesẽ bubuwo me tom la ŋu, eye míade dzi ƒo na wo ahafa akɔ na wo, woɖanye sɔhɛwo alo ame tsitsiwo o. (Lod. 12:25; Kol. 4:11) Ne míetoa míaƒe nyagbɔgblɔwo kple míaƒe nuwɔnawo dzi ɖenɛ fiana be míetsɔ ɖe le eme na ame siwo “do ƒome kpli mí le xɔse la me” la, míeɖoa kpe edzi be míelɔ̃ mía nɔviwo vavã.—Gal. 6:10.

18. Nu kae akpe ɖe mía ŋu míakpɔ masɔmasɔ suesuesue siwo doa mo ɖa le mía kple mía nɔvi Kristotɔwo dome la gbɔ?

18 Biblia gblɔe ɖi be ɖokuitɔdidi kple ŋukeklẽ ƒe gbɔgbɔ axɔ aƒe ɖi le nuɖoanyi vɔ̃ɖi sia ƒe “ŋkeke mamlɛawo me.” (2 Tim. 3:1, 2) Eya ta, ele be mí Kristotɔwo míaʋli vevie be lɔlɔ̃ si le mía si na Mawu, Biblia me nyateƒea kpakple mía nɔviwo la nu nagasẽ ɖe edzi. Ele eme be masɔmasɔ viviviwo aɖo mía kple haxɔsetɔwo dome ɣeaɖewoɣi ya. Ke hã, yayra ka gbegbee nye esi wònyena na hame bliboa ne lɔlɔ̃ ʋã mí míekpɔ masɔmasɔ mawo gbɔ le lɔlɔ̃ me! (Ef. 4:32; Kol. 3:14) Eya ta, negadzɔ gbeɖe be míaɖe mɔ míaƒe lɔlɔ̃ nayi to o! Ke boŋ mina míayi edzi alɔ̃ Yehowa, eƒe Nya la kple mía nɔvi Kristotɔwo vevie.