“Nye Yehowae nye wò Mawu, nyee nye ame si fiaa nu wò be wòaɖe vi na wò.”—YESAYA 48:17.

HADZIDZI: 117, 114

1, 2. (a) Aleke Yehowa Ðasefowo bua Biblia lae? (b) Biblia ƒe akpa kae vivia nuwò?

MÍ Yehowa Ðasefowo, míelɔ̃ Biblia la ale gbegbe. Emenyawo faa akɔ na mí, enaa mɔkpɔkpɔ mí, eye mɔfiafia siwo dzi míate ŋu aka ɖo la le eme na mí. (Romatɔwo 15:4) Menye amegbetɔwo ƒe susue woŋlɔ ɖe eme o, ke boŋ “Mawu ƒe nya” ye wònye.—1 Tesalonikatɔwo 2:13.

2 Kakaɖedzitɔe la, Biblia ƒe akpa aɖewo koŋ vivia mía dometɔ ɖe sia ɖe nu. Nyanyuigbalẽawo xexlẽ vivia mía nɔvi aɖewo nu elabena ale si Yesu wɔ nui la nana míekpɔa Yehowa ƒe nɔnɔme nyoameŋuwo. (Yohanes 14:9) Mía dometɔ aɖewo hã lɔ̃a nyagblɔɖigbalẽwo abe Nyaɖeɖefia ene xexlẽ, elabe enana míekpɔa “nu siwo ava dzɔ kpuie la.” (Nyaɖeɖefia 1:1) Psalmowo xexlẽ faa akɔ na nɔvi aɖewo, eye aɖaŋuɖoɖo nyui siwo le Lododowo ƒe agbalẽa me xexlẽ doa dzidzɔ na mía dometɔ aɖewo hã. Edze ƒãa be Biblia nye agbalẽ si nyo na ame sia ame.

3, 4. (a) Nya kae nàgblɔ tso míaƒe agbalẽwo ŋu? (b) Agbalẽ bubu kawo hãe míetana na ame aɖewo koŋ?

3  Esi míelɔ̃a nu le Biblia gbɔ o ta la, míefena kple míaƒe agbalẽwo hã o, elabena Mawu ƒe Nya la dzie wotu wo ɖo. Yehowa ƒe nunanae agbalẽ, agbalẽ gbadza, magazine kple nu bubu siwo katã ŋu wotrɔ asi le na mí la nye. Wokpena ɖe mía ŋu mía kplii dome nyona ɖe edzi eye míesẽa ŋu le xɔse me.—Tito 2:2.

4 Yehowa Ðasefowo katãe woŋlɔ míaƒe agbalẽwo dometɔ geɖe na. Gake woŋlɔ ɖewo na ɖeviwo kple sɔhɛwo kpakple dzilawo koŋ. Eye wotrɔ asi le nyati kple video siwo le míaƒe Nyatakakadiƒea dometɔ geɖe hã ŋu na ame siwo menye Yehowa Ðasefowo o. Esia ɖee fia be Yehowa wɔ ɖe ŋugbe si wòdo be yeatsɔ nu nyui vovovo aɖo kplɔ̃e na dukɔwo katã la dzi.—Yesaya 25:6.

5. Nu ka wɔwɔe ana Yehowa nakpɔ ŋudzedze ɖe mía ŋu?

5 Mía dometɔ akpa gãtɔ dina be míakpɔ ɣeyiɣi geɖe ɖe Biblia kple míaƒe agbalẽwo xexlẽ ŋu. Gake etea ŋu dzɔna be míekpɔa ɣeyiɣi agbɔsɔsɔ ma ke ɖe míaƒe agbalẽ ɖe sia ɖe ŋu o. Ke hã, míate ŋu aka ɖe edzi be ne míewɔa míaƒe ɣeyiɣi ŋu dɔ nyuie le Biblia kple míaƒe agbalẽwo xexlẽ kple wo sɔsrɔ̃ me la, Yehowa akpɔ ŋudzedze ɖe mía ŋu. (Efesotɔwo 5:15, 16) Gake afɔku aɖe li si wòle be míaƒo asa na. Eyae nye ka?

6. Nu kae ate ŋu awɔe be Yehowa ƒe nunana aɖewo nato mía ŋu?

6 Ne míekpɔ nyuie o la, ate ŋu awɔ na mí be Biblia ƒe akpa aɖewo alo míaƒe agbalẽ aɖewo meka mí o. Le kpɔɖeŋu me, nu kae nèwɔna ne edze abe Biblia ƒe akpa aɖe mesɔ ɖe wò nɔnɔmewo nu o ene? Alo nu kae nèwɔna ne mèle ame siwo koŋ woŋlɔ míaƒe agbalẽ aɖe na la dome o? Ðe nèxlẽa agbalẽ mawo toa eme dzradzradzra alo gbea wo xexlẽ kura gɔ̃ hã? Ne nenemae nèwɔnɛ la, ke nufiame vevi aɖewo siwo ate ŋu aɖe vi na wò hafi la ato ŋuwò. Ke nu kae nàwɔ be wòagadzɔ alea o? Na wòanɔ susu me na wò be Yehowa gbɔe nufiame siwo katã míexɔna la tso. Egblɔ le Biblia me be: “Nye Yehowae nye wò Mawu, nyee nye ame si fiaa nu wò be wòaɖe vi na wò.” (Yesaya 48:17) Le nyati sia me la, míadzro aɖaŋuɖoɖo etɔ̃ aɖewo siwo afia nu siwo míawɔ be Yehowa ƒe nunanawo katã naɖe vi na mí la me.

NU SIWO NÀWƆ BE BIBLIA XEXLẼ NAÐE VI NA WÒ

7. Nu ka tae wòle be míaʋu míaƒe dzi ne míele Biblia xlẽm?

7 Ʋu wò dzi ne èle Biblia xlẽm. Enye nyateƒe be woŋlɔ Biblia ƒe akpa aɖewo na ame alo ƒuƒoƒo aɖe koŋ. Gake Biblia gblɔe eme kɔ be, “Ŋɔŋlɔ blibo la tso Mawu ƒe gbɔgbɔ me, eye wònyo.” (2 Timoteo 3:16) Ema tae wòle be míaʋu míaƒe dzi ne míele Biblia xlẽm. Nɔviŋutsu aɖe ɖoa ŋku edzi na eɖokui ɣesiaɣi be ne yetsɔ ŋutinya ɖeka la, yeate ŋu asrɔ̃ nu vovovowo tso eme. Esia kpena ɖe eŋu wòkpɔa nufiame siwo ɖewohĩ ame bubuwo made dzesii o. Eya ta hafi míaxlẽ Biblia la, anyo be míado gbe ɖa abia Yehowa be wòaʋu míaƒe dzi eye wòana nunya mí be míase nu si wòdi be míasrɔ̃ tso eme la gɔme.—Ezra 7:10; xlẽ Yakobo 1:5.

Ðe nèle agbagba dzem be Biblia xexlẽ naɖe vi na wò bliboea? (Kpɔ memama 7)

8, 9. (a) Nya kawoe míate ŋu abia mía ɖokui ne míele Biblia xlẽm? (b) Nu kae nudidi siwo gbɔ wòle be Kristotɔ hamemetsitsiwo naɖo la fia mí tso Yehowa ŋu?

8  Bia nya ɖokuiwò. Ne èle Biblia xlẽm la, tɔ sẽe nàbia ɖokuiwò be: ‘Nu kae nya sia fiam tso Yehowa ŋu? Aleke mate ŋu awɔ eŋudɔ le nye agbe me? Aleke mate ŋu azãe atsɔ akpe ɖe ame bubuwo ŋu?’ Ne míebiaa nya siawo la, Biblia xexlẽ aɖe vi na mí geɖe wu. Na míawɔ eƒe kpɔɖeŋu. Biblia gblɔ nudidi aɖewo siwo gbɔ wòle be Kristotɔ hamemetsitsiwo naɖo. (Xlẽ 1 Timoteo 3:2-7.) Evɔ menye hamemetsitsiwoe mía dometɔ akpa gãtɔ nye o, eya ta ate ŋu awɔ na mí be ema menye mía gbɔ nya o. Gake na míazã biabia etɔ̃ siwo ƒe nya míegblɔ fifia atsɔ adzro ale si nudidi siawo ate ŋu aɖe vi na mí katãe la me.

9 “Nu kae nya sia fiam tso Yehowa ŋu?” Yehowa yɔ nudidi siwo gbɔ wòle be hamemetsitsiwo naɖo la na mí ɖekaɖeka. Nudidiawo de ŋgɔ. Ema fia be hamea xɔ asi na Yehowa ale gbegbe. Biblia gblɔ be “eya ŋutɔ Via ƒe ʋu” ye wòtsɔ ƒlee. (Dɔwɔwɔwo 20:28) Eya ta Yehowa di be hamemetsitsiwo naɖo kpɔɖeŋu nyui, eye abia akɔnta wo le ale si wowɔa nu ɖe hamea me tɔwo ŋui ŋu. Edi be míaɖe dzi ɖi bɔkɔɔ le woƒe dzikpɔkpɔ te. (Yesaya 32:1, 2) Nudidi siawo xexlẽ  ana nàkpɔe be Yehowa léa be na mí vavã.

Yehowa di be mía dometɔ ɖe sia ɖe nase nu gɔme na ame ahaɖɔ ŋu ɖo

10, 11. (a) Aleke míate ŋu awɔ nudidi siwo gbɔ wòle be hamemetsitsiwo naɖo la ŋu dɔe le míaƒe agbe? (b) Aleke míate ŋu azã nya sia atsɔ akpe ɖe ame bubuwo ŋu?

10 “Aleke mate ŋu awɔ eŋudɔ le nye agbe me?” Ne hamemetsitsie nènye la, anyo be nànɔ nudidiawo me tom enuenu ale be wò nɔnɔme naganyo ɖe edzi. Ne èle “dzikpɔladɔ minyam la,” dze agbagba ale si nàte ŋui nàɖo nudidiawo gbɔ. (1 Timoteo 3:1) Kristotɔwo katã ate ŋu asrɔ̃ nu vevi aɖewo tso nudidi siawo me. Le kpɔɖeŋu me, Yehowa di be mía dometɔ ɖe sia ɖe nase nu gɔme na ame ahaɖɔ ŋu ɖo. (Filipitɔwo 4:5; 1 Petro 4:7) Ne hamemetsitsiwo nye ‘kpɔɖeŋu na alẽhaa’ la, míate ŋu ato woƒe afɔtoƒe ‘ahasrɔ̃ woƒe xɔse.’—1 Petro 5:3; Hebritɔwo 13:7.

11 “Aleke mate ŋu azã nya sia atsɔ akpe ɖe ame bubuwo ŋu?” Míate ŋu azã nudidi siawo atsɔ akpe ɖe Biblia nusrɔ̃viwo kple ɖetsɔlemetɔwo ŋu be woakpɔ vovototo si le Kristotɔ hamemetsitsiwo kple subɔsubɔhawo ƒe kplɔlawo dome. Nudidi siawo ate ŋu akpe ɖe mía ŋu míaɖo ŋku dɔ sesẽ si wɔm hamemetsitsiwo le le hamea me hã dzi, eye wòaʋã mí be míade bubu nɔviŋutsu siawo ŋu. (1 Tesalonikatɔwo 5:12) Zi ale si míedea bubu wo ŋui la, zi nenemae woakpɔ dzidzɔ geɖe le woƒe dɔa me.—Hebritɔwo 13:17.

12, 13. (a) Nu kawo ŋue míate ŋu aku nu me le? (b) Gblɔ kpɔɖeŋu aɖe si fia ale si numekuku le nuŋlɔɖi aɖe ŋu ate ŋu ana míakpɔ nufiame siwo be ɖe eme.

12 Ku nu me tsitotsito. Míate ŋu adi biabia siawo ƒe ŋuɖoɖowo ne míele Biblia srɔ̃m:

  • Ame kae ŋlɔ Biblia ƒe akpa sia?

  • Afi kae wòŋlɔe le eye ɣekaɣie?

  • Nu vevi kawoe nɔ dzɔdzɔm esime wòŋlɔ agbalẽ sia?

Nyatakaka siawo akpe ɖe mía ŋu míakpɔ nufiame siwo be ɖe nuŋlɔɖia me.

13 Le kpɔɖeŋu me, Ezekiel 14:13, 14 gblɔ be: “Ne anyigba aɖe wɔ nu vɔ̃ ɖe ŋunye eye mewɔ nuteƒe nam o la, mado nye asi ɖa ɖe eŋu, eye magblẽ eƒe nuɖuɖudaɖoƒewo, maɖo dɔwuame ɖe edzi, eye matsrɔ̃ amegbetɔwo kple lãwo siaa ɖa le edzi. ‘Ne ŋutsu etɔ̃ siawo—Noa, Daniel kple Hiob—le edzi gɔ̃ hã la, woawo ŋutɔwo ɖokui koe woate ŋu aɖe le woƒe dzɔdzɔenyenye ta,’ Aƒetɔ Dziɖulagã Yehowa ye gblɔe.” Ne míeku nu me la, míakpɔe be Ezekiel ye ŋlɔ nya siawo le ƒe 612 Do Ŋgɔ Na Yesu me lɔƒo. Ƒe alafa geɖewoe nye ema va yi tso esime Noa kple Hiob ku, gake Yehowa kpɔtɔ ɖoa ŋku woƒe nuteƒewɔwɔ dzi. Daniel ya ganɔ agbe. Anɔ eme be exɔ abe ƒe 20 ene esime Yehowa gblɔ tso eŋu be enye ame dzɔdzɔe abe Noa kple Hiob ke ene. Nu kae míesrɔ̃ tso esia me? Eyae nye be Yehowa kpɔa esubɔla wɔnuteƒewo, ɖeviwo  kple tsitsiawo siaa, eye wòdea asixɔxɔ wo katã ŋu.—Psalmo 148:12-14.

WƆ MÍAƑE AGBALẼ VOVOVOAWO ŊU DƆ WÒAÐE VI NA WÒ

14. Aleke nyati siwo wotana na ɖeviwo kple sɔhɛwo kpena ɖe wo ŋu, eye vi kae wo xexlẽ aɖe na ame bubuwo hã? (Kpɔ nɔnɔmetata si le nyati sia ƒe gɔmedzedze.)

14 Agbalẽ siwo woŋlɔ na ɖeviwo. Míeva srɔ̃e be Biblia ƒe akpa sia akpa ate ŋu aɖe vi na mí. Nenema kee nye agbalẽ siwo katã wotana na mí hã. Na míadzro wo dometɔ ʋɛ aɖewo me kpɔ. Yehowa na wota nyati geɖe na ɖeviwo kple sɔhɛwo le ƒe siawo me. [1] (Kpɔ dzesidenya la.) Nyati siawo kpena ɖe wo ŋu wonɔa te ɖe nyaƒoɖeamenuwo kple kuxi siwo wodoa goe ne wole tsitsim la nu. Gake aleke wo xexlẽ ɖea vi na mí katãe? Ekpena ɖe mía ŋu míekpɔa kuxi siwo me tom ɖekakpuiwo kple ɖetugbuiwo le, ale be míetea ŋu ɖoa aɖaŋu na wo hedea dzi ƒo na wo nyuie.

Mele be Kristotɔ tsitsiwo nagbe nyati siwo woŋlɔ na sɔhɛwo xexlẽ o

15. Nu ka tae wòanyo be Kristotɔ tsitsiwo hã natsɔ ɖe le nyati siwo wotana na sɔhɛwo me?

15 ‘Lã geɖe megblẽa detsi o,’ eya ta mele be Kristotɔ tsitsiwo nagbe nyati siwo woŋlɔ na sɔhɛwo xexlẽ o. Kuxi siwo me wodzro le nyatiawo me dometɔ geɖe ka Kristotɔwo katã. Le kpɔɖeŋu me, ele be mí katã míaʋli míaƒe dzixɔsewo ta, aɖu mía ɖokuiwo dzi, anɔ te ɖe nyaƒoɖeamenuwo nu ahaƒo asa na hadede vɔ̃wo kple modzakaɖeɖe gbegblẽwo. Eya ta togbɔ be ɖekakpuiwo kple ɖetugbuiwoe woŋlɔ agbalẽ siawo na hã la, Biblia mee nya siwo le wo me la tso eye ate ŋu aɖe vi na Kristotɔwo katã.

16. Nu bubu ka hãe míaƒe agbalẽwo kpena ɖe sɔhɛwo ŋu wowɔna?

16 Azɔ hã agbalẽ siwo woŋlɔ na ɖekakpuiwo kple ɖetugbuiwo la kpena ɖe wo ŋu wotua wo kple Yehowa ƒe xɔlɔ̃wɔwɔa ɖo. (Xlẽ Nyagblɔla 12:1, 13.) Eye eɖea vi na Kristotɔ tsitsiwo hã. Le kpɔɖeŋu me, nyati si nye “Sɔhɛwo Biana Be . . . Aleke Mawɔ Biblia Xexlẽ Navivi Nunye?” dze le April 2009 ƒe Nyɔ! me. Aɖaŋuɖoɖo geɖewo kpakple aɖaka aɖe si woate ŋu alã ahazãe emegbe atsɔ asrɔ̃ nui la le nyatia me. Ðe nyati ma ɖe vi na ame tsitsiwo hã? Srɔ̃nyɔnu vidada aɖe gblɔ be ƒe geɖe ye nye esia Biblia xexlẽ le sesẽm na ye. Ewɔ ɖe aɖaŋu siwo woɖo le nyatia me dzi eye fifia edina vevie be yeaxlẽ Biblia. Egblɔ be ale si Biblia gbalẽwo de nu wo nɔewo me kple ale si yenɔa nudzɔdzɔawo kpɔm le susu me dzɔa dzi na ye ŋutɔ. Eye wògblɔ kpee be: “Biblia xexlẽ mevivi nunye alea gbegbe kpɔ o.”

17, 18. Aleke agbalẽ siwo míemana na amewo ate ŋu aɖe vi na mí? Gblɔ eƒe kpɔɖeŋu.

17 Agbalẽ siwo míemana na amewo. Tso ƒe 2008 mee wodze Gbetakpɔxɔ, tata si míesrɔ̃na, tata gɔme na mí. Yehowa Ðasefowo koŋue wotae na, gake  wotaa magazine bubu siwo míemana hã. Aleke míawɔ be esiawo hã naɖe vi na mí? Na míawɔ eƒe kpɔɖeŋu ale. Ne èkpe ame aɖe be wòava Fiaɖuƒe Akpataa me eye wòva la, dzi dzɔa wò. Ne nuƒoa le edzi yim la, ànɔ ŋugble dem le wò ame kpekpea ŋu. Ànɔ tame bum le ale si nuƒoa le dɔ wɔm ɖe edzii kple ale si nya si sem wòle ate ŋu atrɔ eƒe agbenɔnɔ ŋu. Ewɔwɔ alea ana nya la nade dzi gbɔ na wò ŋutɔ eye àkpɔ ŋudzedze ɖe eŋu geɖe wu.

18 Nu sia tɔgbi ate ŋu adzɔ ne míexlẽ agbalẽ siwo míemana na amewo. Le kpɔɖeŋu me, le Gbetakpɔxɔ tata si míemana kple nyati siwo wodana ɖe jw.org dzi me la, wozãa nya kple nyagbɔgblɔ siwo gɔme sese le bɔbɔe tsɔ ɖea Biblia mee. Ne míexlẽ nya siawo la, míegasea Biblia me nyateƒe siwo míenya xoxo la gɔme ɖe edzi hekpɔa ŋudzedze ɖe wo ŋu. Eye míate ŋu afɔ nya aɖewo le afi ma atsɔ aɖe míaƒe dzixɔsewo me le gbeadzi. Nenema kee Nyɔ! la hã tua xɔse si le mía si be Wɔla aɖe li la ɖo. Egakpena ɖe mía ŋu míesrɔ̃a ale si míaʋli míaƒe dzixɔsewo tae.—Xlẽ 1 Petro 3:15.

19. Aleke míada akpe na Yehowa ɖe eƒe nunanawo ta?

19 Eme kɔ keŋ be Yehowa le aɖaŋu ɖom na mí hele mɔ fiam mí hena míaƒe nyonyo. (Mateo 5:3) Mina míayi edzi anɔ agbalẽawo xlẽm ahanɔ aɖaŋuɖoɖo siwo le wo me la dzi wɔm. Ne míewɔe alea la, aɖe vi na mí eye míaɖee afia Yehowa be míekpɔa ŋudzedze ɖe eƒe nunanawo katã ŋu.—Yesaya 48:17.

^ [1] (memama 14) Nyati siawo ƒe ɖewo le Sɔhɛwo Biana Be gbalẽa, ƒe Babla 1 kple 2 lia si le yevugbe me la me, eye bubue nye Nyɔ! me nyati siwo nye “Sɔhɛwo Biana Be” si dam wole ɖe Internet ɖeɖe ko dzi fifia.