Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  July 2016

Nu Ka Tae Wòle Be ‘Míanɔ Ŋudzɔ’?

Nu Ka Tae Wòle Be ‘Míanɔ Ŋudzɔ’?

“Mienya ŋkeke si dzi miaƒe Aƒetɔ la ava o.”—MAT. 24:42.

HADZIDZI: 136, 129

1. Gblɔ nu si tae wòle vevie be míanya ɣeyiɣi si me míele kple nu siwo le dzɔdzɔm la ƒe kpɔɖeŋu. (Kpɔ foto si le nyati sia ƒe gɔmedzedze.)

ESUSƆ vie takpekpea nadze egɔme. Esi míekpɔ be gaƒoɖokui si le dzedzem le videoɖemɔ̃ gã la dzi le ɣeyiɣi si susɔ xlẽm ko la, míenya be game su be míanɔ anyi ase haƒoƒo si wotsɔ dzea takpekpea gɔme. Enyea haƒoƒo vivi si ŋu Gbetakpɔxɔ Habɔbɔa ƒe haƒohaa trɔ asi le na mí be míatsɔ adzra míaƒe susu kple dzi ɖo ɖe nuƒo siwo woaƒo ŋu. Ke ne nɔvi aɖewo le nu bubuwo wɔm, wole yiyim le gbɔgbɔm alo le dze ɖom vevie kple wo xɔlɔ̃wo, eye womede dzesii be wɔnawo le egɔme dzem o ɖe? Efia be womele ŋudzɔ ɖe ɣeyiɣia kple nu siwo le dzɔdzɔm ŋu o. Zimenɔlaa le kplɔ̃a ta, wole ha ƒom, eye nɔviwo nɔ anyi xoxo. Kpɔɖeŋu sia ate ŋu akpe ɖe mía ŋu míase ale si wole nudzɔdzɔ vevi aɖe ƒe ɣeyiɣi si susɔ xlẽm, si bia be míanɔ ŋudzɔ ɖe nu siwo gbɔna ŋu la gɔme. Nudzɔdzɔ vevi kae?

2. Nu ka tae Yesu gblɔ na eƒe nusrɔ̃lawo be ‘woanɔ ŋudzɔ’?

2 Esime Yesu Kristo nɔ nu ƒom tso “nuɖoanyi sia ƒe nuwuɣi” ŋu la, egblɔ na eƒe nusrɔ̃lawo be: “Mikpɔ nyuie, minɔ  ŋudzɔ, elabena mienya ɣeyiɣi ɖoɖi la o.” Emegbe Yesu xlɔ̃ nu wo enuenu be: “Minɔ ŋudzɔ.” (Mat. 24:3; xlẽ Marko 13:32-37.) Mateo ƒe nuŋlɔɖi si ku ɖe Yesu ƒe nuƒo ma ke ŋu hã ɖee fia be Yesu xlɔ̃ nu eyomedzelawo be woanɔ ŋute hegblɔ be: “Minɔ ŋudzɔ, elabena mienya ŋkeke si dzi miaƒe Aƒetɔ la ava o. . . . Minɔ dzadzraɖoɖi, elabena Amegbetɔvi la gbɔna le gaƒoƒo si miesusu be eya dzie wòava o la dzi.” Egagblɔe ake be: “Minɔ ŋudzɔ, elabena mienya ŋkeke la alo gaƒoƒo la o.”—Mat. 24:42-44; 25:13.

3. Nu ka tae míewɔna ɖe Yesu ƒe nuxlɔ̃amea dzi?

3 Yesu ƒe nuxlɔ̃amea le vevie na mí Yehowa Ðasefowo ŋutɔ. Míenya be míele “nuwuɣi la” ƒe yɔyrɔe nu, eye ɣeyiɣi si susɔ ne “xaxa gã” nadze egɔme la le sue! (Dan. 12:4; Mat. 24:21) Míele aʋa dziŋɔwo, agbe ƒaƒã nɔnɔ kple sedzimawɔmawɔ, mawusubɔsubɔ ƒe tɔtɔ, nuɖuɖu ƒe veve, dɔvɔ̃wo kple anyigbaʋuʋuwo teƒe kpɔm le xexea me godoo. Míenya hã be Yehowa ƒe amewo le Fiaɖuƒegbeƒãɖeɖedɔ gã aɖe wɔm le afi sia afi. (Mat. 24:7, 11, 12, 14; Luka 21:11) Míele mɔ kpɔm vevie na nu siwo Aƒetɔ la awɔ na mí ne eva ɖo, kple ale si wòana Mawu ƒe tameɖoɖowo nava emee.—Marko 13:26, 27.

ŊKEKEAWO LE VƆVƆM

4. (a) Nu ka tae míexɔe se be fifia Yesu nya ɣeyiɣi si Armagedon ava? (b) Togbɔ be míenya ɣeyiɣi si xaxa gã la adze egɔme o hã la, nu ka dzie míeka ɖo?

4 Ne míeyi takpekpewo la, mí katã míenya ɣeyiɣi si tututu woɖo be eƒe akpa ɖe sia ɖe nadze egɔme. Gake le xaxa gã ya gome la, ne míewɔ alekeleke hã, míate ŋu anya ƒe si me tututu wòava, kaka ahayi ŋkekea kple gaƒoƒoa nya ge o. Yesu gblɔ be: “Le ŋkeke ma kple gaƒoƒo ma ŋuti la, ame aɖeke menyae o, mawudɔla siwo le dziƒo la menyae o, eye Vi la hã menyae o, negbe Fofo la ko.” (Mat. 24:36) Gake wona ŋusẽ Kristo le dziƒo be wòaho aʋa ɖe Satana ƒe xexea ŋu. (Nyaɖ. 19:11-16) Eya ta esɔ be míaƒo nya ta be fifia Yesu nya ɣeyiɣi si Armagedon ava. Míawo ya míenya o. Esia tae wòle vevie be míanɔ ŋudzɔ ahanɔ mɔ kpɔm na xaxa gã la ɖo. Yehowa ɖo gaƒoƒo si tututu dzi wòadzɔ ɖi xoxo, eye wòle ɣeyiɣi si susɔ xlẽm. Ŋkekeawo le vɔvɔm, eye xaxa gã la “mahe ɖe megbe o!” (Xlẽ Habakuk 2:1-3.) Nu ka tae míeka ɖe nya sia dzi?

5. Gblɔ kpɔɖeŋu si ɖee fia be Yehowa ƒe nyagblɔɖiwo vaa eme ɖe ɣeyiɣi dzi.

5 Yehowa ƒe nyagblɔɖiwo vaa eme ɖe eƒe ɣeyiɣi dzi pɛpɛpɛ ɣesiaɣi! Bu ale si wòɖe Israel-viwo tso Egipte ɖe ɣeyiɣi dzi ŋu kpɔ. Ema dzɔ le Nisan 14, 1513 Do Ŋgɔ Na Yesu (D.Y.). Mose gblɔ le ŋkeke ma ŋu be: “Le ƒe alafa ene blaetɔ̃awo ƒe nuwuwu, le gbe ma gbe tututu la, Yehowa ƒe amehawo katã ʋu dzo le Egipte-nyigba dzi.” (2 Mose 12:40-42) Woxlẽ “ƒe alafa ene blaetɔ̃awo” tso ɣeyiɣi si me nubabla si Yehowa wɔ kple Abraham la dze dɔwɔwɔ gɔme le ƒe 1943 D.Y. me. (Gal. 3:17, 18) Ƒe aɖewo megbe la, Yehowa gblɔ na Abraham be: “Nyae kɔtɛe be, wò dzidzimeviwo ava zu amedzrowo le dzronyigba dzi, anyigba ma dzi tɔwo awɔ wo kluviwoe eye woawɔ fu wo ƒe alafa ene sɔŋ.” (1 Mose 15:13; Dɔw. 7:6) Edze ƒãa be “ƒe alafa ene” siwo woyɔ le afi sia dze egɔme tso ƒe 1913 D.Y. me. Ɣemaɣie Ismael ɖu fewu le Isak ŋu esime  Sara tso no nɛ, eye wòwu enu le ƒe 1513 D.Y. esime Israel-viwo ʋu le Egipte. (1 Mose 21:8-10; Gal. 4:22-29) Ewɔ nuku be Yehowa ɖo ɣeyiɣi si tututu dzi wòaɖe eƒe amewo ɖi ƒe alafa ene sɔŋ do ŋgɔ!

6. Nu ka tae míeka ɖe edzi be Yehowa axɔ na eƒe amewo?

6 Yosua, si hã nɔ ame siwo woɖe tso Egipte dome la, ɖo ŋku edzi na Israel-viwo katã be: “Mienyae nyuie tso miaƒe dzi blibo kple luʋɔ blibo me be, nya ɖeka pɛ hã medo kpo emevava le ŋugbe nyui siwo katã Yehowa mia Mawu do na mi la me o. Wo katã va eme na mi. Wo dometɔ ɖeka pɛ hã medo kpo emevava o.” (Yos. 23:2, 14) Míeka ɖe edzi be ŋugbe si Yehowa do be yeaɖe mí le xaxa gã la me mado kpo emevava o. Gake hafi míatsi agbe le nuɖoanyi sia tsrɔ̃ɣi la, ele be míanɔ ŋudzɔ.

NƆ ŊUDZƆ BE NÀTSI AGBE

7, 8. (a) Le blema la, nu kae nye dzɔlawo ƒe dɔ, eye nu kae míate ŋu asrɔ̃ tso eme? (b) Gblɔ nu si ate ŋu adzɔ ne dzɔlawo dɔ alɔ̃ ƒe kpɔɖeŋu.

7 Míate ŋu asrɔ̃ ale si ŋudzɔnɔnɔ le vevie tso blemakpɔɖeŋuwo me. Ɣemaɣi woɖoa gli kɔkɔwo ɖe dugãwo, abe Yerusalem ene, ŋu. Gliawo kpɔa dua me nɔlawo ta tso futɔwo si me, eye wòganye teƒe kɔkɔ si dzɔlawo nɔna kpɔa nuto bliboa me. Dzɔlawo nɔa gliawo dzi kple dua ƒe agbowo nu zã kple keli. Ne wokpɔ afɔku aɖe gbɔna la, woxlɔ̃a nu dua me tɔwo. (Yes. 62:6) Ele vevie be dzɔlawo nanɔ ŋudzɔ ahanɔ mo xexi, elabena agbe kple ku ƒe nyae.—Eze. 33:6.

8 Yudatɔ blemaŋutinyaŋlɔla Josephus gblɔ be, nu si na Roma-srafowo xɔ Antonia Mɔ́ si nɔ Yerusalem glia ƒe dzogoe dzi le ƒe 70 Kristotɔwo Ŋɔli ye nye be, dzɔla siwo nɔ agboa nu la nɔ alɔ̃ dɔm! Esia na Roma-srafowo te ŋu ge ɖe dua me. Woyi gbedoxɔa me, tɔ dzoe, eye wotsrɔ̃ Yerusalem du bliboa. Esiae nye xaxa gãtɔ si va Yudatɔwo dzi la ƒe akpa mamlɛa.

9. Nu kae le ɣaɣla ɖe ame akpa gãtɔ egbea?

9 Egbea dedzisrafowo, siwo míayɔ be “dzɔlawo,” le dukɔ geɖe si, eye le teƒe aɖewo la, wozãa videoɖemɔ̃ deŋgɔwo tsɔ léa ŋku ɖe nu siwo wɔm amewo le ŋu. Wonɔa ŋku tsam be yewoakpɔ degbãlawo kple amedzidzela ŋɔdzinuwɔlawo. Gake amegbetɔwo kple dukɔwo ƒe ŋɔdzinuwo ko ŋue “dzɔla” mawo ƒe ŋku nɔna. Womenya naneke tso Mawu ƒe Dziƒofiaɖuƒe si le Kristo si me kple nu siwo wɔm wòle kpakple aʋa si wòaho ɖe dukɔwo katã ŋu kpuie la ŋu kura o. (Yes. 9:6, 7; 56:10; Dan. 2:44) Gake ne míawo míele ŋute hele ŋudzɔ ɖe Biblia ƒe nyagblɔɖiwo me vava ŋu hesubɔ Yehowa nuteƒewɔwɔtɔe la, ŋkeke ma maɖi ɖe mí o.—Ps. 130:6.

KPƆ NYUIE BE NANEKE MEGANA NÀÐE ŊU ÐI O

10, 11. (a) Nu ka ŋue wòle be míakpɔ nyuie le, eye nu ka tae? (b) Nu kae na nèkpɔe be Abosam gbã ŋku na amewo?

10 Kpɔe ɖa ko be dzɔla aɖee nye ema le ŋu zã bliboa katã. Esi wòsusɔ vie eƒe zãdzɔɣia nawu enu la, ɖeɖi te eŋu eye alɔ̃ bla ŋku nɛ. Nenema ke esi míawo hã míele tetem ɖe nuɖoanyi sia ƒe nuwuwu ŋu la, ŋudzɔnɔnɔ anɔ sesẽm na mí ɖe edzi. Le nyateƒe me la, ŋudzɔmanɔmanɔ anye ku na mí! Na míadzro nu etɔ̃ siwo ate ŋu ana míaɖe ŋu ɖi ne míekpɔ nyuie o la me.

11 Abosam gbã ŋku na amewo ale be wometsɔ ɖeke le subɔsubɔ vavãtɔ me o. Esi wòsusɔ vie Yesu naku la, exlɔ̃  nu eƒe nusrɔ̃lawo zi etɔ̃ sɔŋ tso “xexe sia dzi ɖula” ŋu. (Yoh. 12:31; 14:30; 16:11) Yesu nyae be Abosam ana amewo ƒe susu me nado viviti ale be womakpɔ Mawu ƒe nyagblɔɖiwo me vava adze sii o. (Zef. 1:14) Satana le alakpasubɔsubɔhawo katã ƒe ƒuƒoƒoa hã zãm tsɔ le amewo flum. Ðe mèkpɔnɛ nenema ne èle dze ɖom kple amewo oa? Ðe Abosam ‘megbã ŋku na dzimaxɔsetɔ siawo ƒe tamesusu’ ale be womenya be nuɖoanyi sia ƒe nuwuwu le aƒe tum, eye be woɖo Kristo wòzu Mawu Fiaɖuƒea ƒe Fia wòle dzi ɖum fifia oa? (2 Kor. 4:3-6) Míekpɔe nenema, elabe zi geɖe ne míetsɔ nya nyuia yi na amewo la, wogblɔna be, “Nyemedi be masee o!” Enuenu la, wometsɔa ɖeke le eme ne míegblɔ na wo be xexe sia le enu wu ge kpuie o.

12. Nu ka tae mele be míaɖe mɔ Abosam nable mí o?

12 Mègana amewo ƒe ɖekematsɔleme naɖe dzi le ƒowò ale be màyi edzi anɔ ŋudzɔ o. Dze aʋa ɖi aʋa mesinɛ o. Paulo gblɔ na haxɔsetɔwo be: “Mienyae nyuie be, Yehowa ƒe ŋkeke la gbɔna abe ale si tututu fiafitɔ vana le zã me ene.” (Xlẽ 1 Tesalonikatɔwo 5:1-6.) Yesu hã ɖo aɖaŋu na mí be: “Minɔ dzadzraɖoɖi, elabena Amegbetɔvi la ava le gaƒoƒo si miesusu o la dzi.” (Luka 12:39, 40) Eteƒe madidi o, Satana aflu amewo woabui be yewole “ŋutifafa kple dedienɔnɔ” me. Atrɔ wo ato eme woaxɔe ase be nu sia nu le edzi yim nyuie le xexea me. Ke míawo ya ɖe? Ne ‘míenɔa ŋudzɔ, eye míenɔa mo xexi’ la, tsɔtsrɔ̃ ma ‘maɖi ɖe mí abe ale si ŋkeke ɖina ɖe fiafitɔwo ene o.’ Ema tae wòle be míaxlẽ Mawu ƒe Nya la ahade ŋugble le nu si fiam Yehowa le mí ŋu.

13. Aleke xexea ƒe gbɔgbɔ le ŋusẽ kpɔm ɖe amewo dzi, eye nu kae míawɔ be míaƒo asa na ŋusẽkpɔɖeamedzi vɔ̃ɖi sia?

13 Xexea ƒe gbɔgbɔ le amewo nu blem wole alɔ̃ dɔm. Ame geɖe vu ɖe woƒe gbe sia gbe dɔwɔnawo ŋu ale gbegbe be womenyae “be gbɔgbɔmenuwo hiã yewo” o. (Mat. 5:3) Wokplɔ “ŋutilã ƒe nudzodzro kple ŋkuwo ƒe nudzodzro” ɖo kɔ̃ɔ. (1 Yoh. 2:16) Tsɔ kpe ɖe eŋu la, adzɔha siwo wɔa modzakaɖenuwo  la na amewo ‘lɔ̃a dzidzɔkpɔkpɔ’ ale gbegbe be ɖeko esia le wo mum abe aha ene, eye tetekpɔa nu le sesẽm ɖe edzi ƒe sia ƒe. (2 Tim. 3:4) Eya tae Paulo ɖo afɔ afɔta na Kristotɔwo be woaganɔ “ɖoɖo wɔm ɖe kɔɖiɖi na ŋutilã ƒe nudzodzrowo ŋu o.”—Rom. 13:11-14.

14. Nuxlɔ̃ame kae le Luka 21:34, 35?

14 Míedi be Mawu ƒe gbɔgbɔa nakpɔ ŋusẽ ɖe míaƒe agbenɔnɔ dzi, ke menye xexea ƒe gbɔgbɔ o. Yehowa to eƒe gbɔgbɔa dzi kpe ɖe mía ŋu míese nu siwo gbɔna dzɔdzɔ ge kpuie la gɔme. [1] (1 Kor. 2:12) Menye nu gã aɖekee blea ame nu wòdɔa gbɔgbɔmekɔlɔ̃e o, ke boŋ nu suesue siwo míewɔna gbe sia gbe ate ŋu ahe míaƒe susu ɖa le mawusubɔsubɔ ŋu ne míeɖe mɔ. (Xlẽ Luka 21:34, 35.) Ate ŋu adzɔ hã be amewo nako mí le esi míele ŋudzɔ ta, gake menye ema tae míaƒe lãme nafa eye míaɖe ŋu ɖi o. (2 Pet. 3:3-7) Ele be míanɔ ha dem kple mía nɔvi Kristotɔwo le kpekpeawo edziedzi, elabena afi mae Mawu ƒe gbɔgbɔa le.

Ðe nèle nu sia nu si nàte ŋui wɔm be nànɔ ŋudzɔa? (Kpɔ memama 11-16)

15. Nu kae dzɔ ɖe Petro, Yakobo kple Yohanes dzi, eye aleke wòate ŋu adzɔ ɖe míawo hã dzi?

15 Míaƒe ŋutilã madebliboa ate ŋu agbɔdzɔ mí be míanɔ ŋudzɔ o. Yesu nya be enɔa bɔbɔe be amegbetɔ madeblibowo naɖe mɔ woƒe gbɔdzɔgbɔdzɔwo naɖu wo dzi. De ŋugble le nu si dzɔ le zã si do ŋgɔ na Yesu ƒe ku me ŋu kpɔ. Yesu kpɔe be ehiã be yeado gbe ɖa abia ŋusẽdodo tso ye Fofo si le dziƒo gbɔ ne yeayi edzi awɔ nuteƒe. Ɣemaɣi la, ebia tso Petro, Yakobo kple Yohanes si be ‘woanɔ ŋudzɔ.’ Womekpɔe dze sii be nu gã aɖee nɔ ŋgɔ gbɔna o. Esi woanɔ ŋudzɔ kple woƒe Aƒetɔa teƒe la, woɖe mɔ woƒe ŋutilã kpɔ ŋusẽ ɖe wo dzi ale be wodɔ alɔ̃. Togbɔ be ɖeɖi te Yesu hã ŋu vevie hã la, enɔ ŋu henɔ gbe dom ɖa na Fofoa vevie. Nu mae wòle be exɔlɔ̃awo hã nawɔ hafi.—Marko 14:32-41.

16. Le Luka 21:36 ƒe nya nu la, nu kae Yesu gblɔ be míawɔ ale be ‘míanɔ ŋudzɔ’?

16 ‘Ŋudzɔnɔnɔ’ le gbɔgbɔ me bia nu geɖe wu be didia nanɔ mía me ko. Ŋkeke ʋɛ aɖewo do ŋgɔ na nu si dzɔ le Getsemane-bɔa me la, Yesu gblɔ na nusrɔ̃la mawo ke be woanɔ kokoƒoƒo dzi na Yehowa ɖaa. (Xlẽ Luka 21:36.) Eya ta nu si akpe ɖe mía ŋu míanɔ ŋudzɔe nye be, míanɔ gbe dom ɖa ɣeawokatãɣi.—1 Pet. 4:7.

NƆ ŊUDZƆ ƔESIAƔI

17. Aleke míawɔ anɔ dzadzraɖoɖi ɖe nu siwo adzɔ kpuie la ŋu?

17 Yesu gblɔ be nuwuwua ava “le gaƒoƒo si [míesusu] be eya dzie wòava o la dzi.” Eya ta menye fifiae míanɔ akɔlɔ̃e dɔm le gbɔgbɔ me o. Menye fifiae míanɔ ameflunu kple nu gbɔlo siwo Satana kple eƒe xexea dona ɖe ŋgɔ siwo dzroa míaƒe ŋutilã la yome o. (Mat. 24:44) Le Biblia me la, Mawu kple Kristo na míenya nu nyui siwo gbɔna kpuie kple ale si míawɔ anɔ ŋudzɔ. Eya ta mina míanɔ ŋku lém ɖe ale si Biblia me nyagblɔɖiwo le eme vamee ŋu, míanɔ tetem ɖe Yehowa ŋu ɖaa ahatsɔ eƒe Fiaɖuƒea ƒe nuwo aɖo nɔƒe gbãtɔ le agbe me. Ele be míanya ɣeyiɣi si me míele kple nu siwo le dzɔdzɔm ale be míanɔ ŋudzɔ ahanɔ dzadzraɖo ɖi. (Nyaɖ. 22:20) Agbe kple ku ƒe nyae!

^ [1] (memama 14) Kpɔ Mawu Fiaɖuƒea Le Dzi Ðum! gbalẽa ƒe ta 21 lia.