Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  January 2017

Nu Si Tae Afi Si Míaƒe Ŋutete Se Ðo Nyanya Le Vevie

Nu Si Tae Afi Si Míaƒe Ŋutete Se Ðo Nyanya Le Vevie

“Ame siwo nyaa afi si woƒe ŋutete se ɖo la si mee nunya le.”—LOD. 11:2.

HADZIDZI: 38, 69

1, 2. Nu ka tae Mawu megakpɔ ŋudzedze ɖe Saul ŋu o? (Kpɔ nɔnɔmetata si le nyati sia ƒe gɔmedzedze.)

ESIME blema Israel Fia Saul dze fiaɖuɖu gɔme la, enye ame aɖe si nya afi si eƒe ŋutete se ɖo eye wodea bubu eŋu. (1 Sam. 9:1, 2, 21; 10:20-24) Gake esi wòzu fia ɣeyiɣi kpui aɖe megbe la, eva zu ɖokuiŋudzela. Esi Mawu ƒe nyagblɔɖila Samuel meva Gilgal ɖe game si woɖo dzi o la, Saul mete ŋu ɖu eɖokui dzi o. Filistitɔwo ho aʋa, eye Israel-viwo nɔ kakam le Saul ŋu. Anya gblɔ na eɖokui be, ‘Ele be maɖe afɔ kaba hafi wòatsi megbe.’ Eya ta esa vɔ na Mawu, nu si se meɖe mɔ be wòawɔ o. Esia medze Yehowa ŋu o.—1 Sam. 13:5-9.

2 Esi Samuel va Gilgal mlɔeba la, eka mo na Saul. Saul melɔ̃ ɖe edzi be nu si yewɔ la menyo o, ke boŋ enɔ taflatsɛ dom eye wòda fɔbubua ɖe ame bubuwo dzi gɔ̃ hã. (1 Sam. 13:10-14) Tso ekema dzi la, Saul gaɖe afɔ gbegblẽ bubuwo, si wɔe be Yehowa gbee be maganye fia ɖe Israel dzi o. Gawu la, eƒe nu megadze Yehowa ŋu o. (1 Sam. 15:22, 23) Togbɔ be Saul dze fiaɖuɖu gɔme nyuie hã, meva wu enu nyuie kura o.—1 Sam. 31:1-6.

3. (a) Nu kae nye ame geɖe ƒe susu le nɔnɔme nyui si nye dzesidede afi si ame ƒe ŋutete se ɖo ŋu? (b) Biabia kawoe wòhiã be míakpɔ ŋuɖoɖo na?

 3 Le hoʋiʋli ƒe xexe sia me la, ame geɖe susuna be ele be yewoaʋli axɔ ŋgɔ na ame bubuwo. Le esia wɔwɔ me la, woƒoa adegbe be yewonyo wu ame bubuwo. Le kpɔɖeŋu me, sinimawɔla xɔŋkɔ aɖe si va zu dunyahela gblɔ gbe ɖeka be: “Dzesidede afi si ame ƒe ŋutete se ɖo ƒe nyaa mekam o, eye nyemadi be wòaku ɖe ŋunye gbeɖe o.” Gake nu ka tae dzesidede afi si ame ƒe ŋutete se ɖo ƒe nyaa gale vevie kokoko? Nu kae nɔnɔme nyui sia fia, eye nu kae mefia o? Aleke míawɔ alé nɔnɔme nyui sia me ɖe asi ne míedo go kuxiwo alo amewo ƒo nya ɖe mía nu? Míaɖo biabia eve gbãtɔwo ŋu le nyati sia me. Míaɖo etɔ̃lia ŋu le nyati si kplɔ esia ɖo me.

NU KA TAE DZESIDEDE AFI SI AME ƑE ŊUTETE SE ÐO LE VEVIE?

4. Nu kae nye ɖokuisinuwɔwɔ?

4 Biblia ɖee fia be dzesidede afi si ame ƒe ŋutete se ɖo kple ɖokuidodoɖedzi menyina o. (Xlẽ Lododowo 11:2.) Esi David dze nunya ta la, ebia Yehowa be ‘wòana yeaƒo asa na ɖokuiŋudzedze [alo ɖokuisinuwɔwɔ].’ (Ps. 19:13) Nu kae nye “ɖokuisinuwɔwɔ”? Ne ame aɖe tsi klokloklo dzi alo tsɔ ɖokuiŋudzedze wɔ nane si mekpɔ mɔ awɔ o la, ke ele ɖokuisinu wɔm. Esi míenyi nu vɔ̃ dome ta la, mí katã míeɖea nɔnɔme sia fiana ɣeaɖewoɣi. Gake abe ale si Fia Saul ƒe kpɔɖeŋua ɖee fia ene la, ne ɖokuisinuwɔwɔ va zu numame na mí la, míaƒe nu magava dze Mawu ŋu o. Psalmo 119:21 gblɔ tso Yehowa ŋu be: ‘Èkaa mo na ɖokuiŋudzelawo.’ Nu ka tae?

5. Nu ka tae ɖokuisinuwɔwɔ nye ŋkubiãnya?

5 Ðokuisinuwɔwɔ nye vodada si nye ŋkubiãnya wu dadaƒu le manyamanya me. Gbã, ne míewɔ nu ɖokuiŋudzedzetɔe la, efia be míetsɔ bubu si Yehowa, míaƒe Dziɖulagã la, dze na la nɛ o. Evelia, ne míewɔa nu si míekpɔ mɔ awɔ hafi o la, esia ate ŋu ade masɔmasɔ mía kple ame bubuwo dome. (Lod. 13:10) Etɔ̃lia, ne eva dze ƒãa be míewɔ nu ɖokuiŋudzedzetɔe la, esia ate ŋu ahe ŋukpe kple vlodoame gɔ̃ hã ava mía dzi. (Luka 14:8, 9) Nu nyui aɖeke medona tso ɖokuisinuwɔwɔ me o. Ŋɔŋlɔawo ɖee fia be dzesidede afi si míaƒe ŋutete se ɖoe nye nu nyuitɔ wòle be míawɔ ɣesiaɣi.

NU KAE WÒBIA BE AME NADE DZESI AFI SI EƑE ŊUTETE SE ÐO?

6, 7. Nu kae nye ɖokuibɔbɔ, eye aleke ɖokuibɔbɔ do ƒome kple dzesidede afi si ame ƒe ŋutete se ɖo?

6 Kadodo kplikplikpli le ɖokuibɔbɔ kple dzesidede afi si ame ƒe ŋutete se ɖo dome. Le Biblia me la, nu si ɖokuibɔbɔ fiae nye be dada alo ɖokuidodoɖedzi ƒe gbɔgbɔ naganɔ ame me o. Woate ŋu aɖɔe be tamebɔbɔɖeanyi. (Flp. 2:3) Zi geɖe la, ɖokuibɔbɔla nyaa afi si eƒe ŋutete se ɖo, enyaa nu siwo wòate ŋu awɔ, elɔ̃na ɖe eƒe vodadawo dzi, exɔa ame bubuwo ƒe susuwo eye wòsrɔ̃a nu tso wo gbɔ. Ðokuibɔbɔlawo ƒe nu dzea Yehowa ŋu ŋutɔ.

7 Le Biblia me la, dzesidede afi si ame ƒe ŋutete se ɖo bia be míagabu mía ɖokui ŋu fũu wu ale si dze o eye míanya nu si tututu míate ŋu awɔ. Le gbe gbãtɔ siwo me woŋlɔ Biblia ɖo la, ale si nɔnɔme sia nana míewɔa nu ɖe ame bubuwo ŋu dzi koŋue wòhe susu yi.

8. Nu kawoe ana míakpɔe adze sii be ɖokuiŋudzedze ƒe gbɔgbɔ ɖo mía me?

8 Nu kae ana míade dzesii be míele mía ɖokui ŋu dzem? Bu dzesiawo dometɔ ʋɛ aɖewo ŋu kpɔ. Ate ŋu adzɔ be míeva le mía ɖokui bum be míenyo wu ame bubuwo alo mɔnukpɔkpɔ siwo su mía si la wɔe be míele dadam. (Rom. 12:16) Ðewohĩ míeva le susu hem va mía ɖokui dzi fũu akpa. (1 Tim. 2:9, 10) Alo míeva le tɔ tem ɖe míaƒe susuwo dzi le ɖoƒe si le mía si,  ame siwo míedea ha kpli alo nu si míawo ŋutɔwo míesusu ko ta. (1 Kor. 4:6) Ne míewɔ nu alea la, zi geɖe la, míenyana gɔ̃ hã be míewɔ nu wògbɔ eme heva zu ɖokuiŋudzela alo ɖokuisinuwɔla o.

9. Aleke wòdzɔe be ame aɖewo va zu ɖokuiŋudzelawo? Gblɔ Biblia me kpɔɖeŋu aɖe.

9 Ame sia ame ate ŋu ava zu ɖokuiŋudzela ne eɖe mɔ ŋutilãmenudzodzrowo ɖu edzi. Nu gã didi, ŋubiabiã kple dziku dzi maɖumaɖu na ame aɖewo wɔ nu dadatɔe. Ame siwo ŋu Biblia ƒo nu tsoe abe Absalom, Uziya kple Nebukadnezar ene ƒo wo ɖokuiwo ɖe ŋutilã la ƒe dɔwɔwɔwo me, eye Yehowa bɔbɔ wo ɖe anyi le esi wodo wo ɖokuiwo ɖe dzi ta.—2 Sam. 15:1-6; 18:9-17; 2 Kron. 26:16-21; Dan. 5:18-21.

10. Nu ka tae mele be míanɔ ʋɔnu drɔ̃m amewo o? Gblɔ Biblia me kpɔɖeŋu aɖe.

10 Ame aɖewo wɔa nu ɖokuiŋudzedzetɔe le susu bubu aɖewo ta. Bu Biblia me kpɔɖeŋu siwo dze le mawunyakpukpui siawo me ŋu kpɔ: 1 Mose 20:2-7 kple Mateo 26:31-35. Ðe Abimelek kple Petro wɔ nu ɖokuiŋudzedzetɔea? Ðe wòanye be womenya ale si tututu nɔnɔmea le o alo womebu nuwo ŋu hafi ɖe afɔ oa? Esi wònye be míate ŋu akpɔ ame ƒe dzi me o ta la, nu si sɔ, si me lɔlɔ̃ le ye nye be míaƒo asa na ʋɔnudɔdrɔ̃ amewo ɖe nu si wowɔ ta.—Xlẽ Yakobo 4:12.

NYA WÒ WƆƑE LE MAWU ƑE HABƆBƆA ME

11. Aleke dzesidede afi si míaƒe ŋutete se ɖo do ƒome kple míaƒe wɔƒe le Mawu ƒe habɔbɔa me nyanya?

11 Dzesidede afi si ame ƒe ŋutete se ɖo bia be ame nanya eƒe wɔƒe le Mawu ƒe habɔbɔa me. Esi Yehowa nye ɖoɖo ƒe Mawu ta la, ena wɔƒe mía dometɔ ɖe sia ɖe le eƒe habɔbɔa me. Wɔƒe si le ame sia ame si le hamea me la to vovo, ke hã mía dometɔ ɖe sia ɖe le vevie. Yehowa na ŋutete kple nunana vovovowo mía dometɔ ɖe sia ɖe le eƒe amenuveve nu. Míate ŋu awɔ wo ŋu dɔ atsɔ ahe ŋutikɔkɔe vɛ nɛ eye míakpe ɖe ame bubuwo ŋu. (Rom. 12:4-8) Wɔƒe si Yehowa na mí le eƒe habɔbɔa me la na míezu aƒedzikpɔla siwo dzi wòka ɖo hedea bubui, eye wòkpɔa mɔ be míawɔ nunana siwo yena mí la ŋu dɔ nyuie.—Xlẽ 1 Petro 4:10.

Ne akpa si míewɔna le Mawu ƒe habɔbɔa me trɔ la, aleke Yesu ƒe kpɔɖeŋua ate ŋu aɖe vi na mí (Kpɔ memama 12-14)

12, 13. Nu ka tae mele be wòawɔ nuku na mí ne subɔsubɔmɔnukpɔkpɔ si le mía si le Mawu ƒe habɔbɔa me la trɔ o?

12 Ke hã, subɔsubɔmɔnukpɔkpɔ si le mía si le Mawu ƒe habɔbɔa me ate ŋu atrɔ. Bu Yesu ƒe kpɔɖeŋua ŋu kpɔ. Le gɔmedzedzea me la, woa kple Yehowa ɖeɖe koe nɔ anyi. (Lod. 8:22) Emegbe ewɔ dɔ kple Yehowa wowɔ mawudɔla bubuwo, míaƒe xexe gbahooa kple amegbetɔwo. (Kol. 1:16) Esia megbe la, Mawu de dɔ bubu asi na Yesu be wòava wɔ le anyigba dzi, si bia be woadzii wòanye vidzĩ wɔnamanɔŋutɔ hafi ava tsi. (Flp. 2:7) Esi Yesu tsɔ eƒe agbe sa vɔe megbe la, etrɔ yi dziƒo be wòava zu Mawu Fiaɖuƒea ƒe Fia le ƒe 1914 me. (Heb. 2:9) Gake menye emae anye zi mamlɛtɔ si eƒe dɔdeasi atrɔ o. Le Yesu ƒe Ƒe Akpe Ðeka Dziɖuɖua ƒe nuwuwu la, atsɔ eƒe Fiaɖuƒea ade asi na Yehowa ale be “Mawu nanye nuwo katã na ame sia ame.”—1 Kor. 15:28.

13 Ele be wòanɔ susu me na mí be míaƒe wɔƒe le Mawu ƒe habɔbɔa me ate ŋu atrɔ le ɣeyiɣi aɖe megbe, eye zi geɖe la, etsoa tiatia siwo míawo ŋutɔwo míewɔ gbɔ. Le kpɔɖeŋu me, tre ye nènye tsã eye fifia nèɖe srɔ̃a? Ðe viwo va le asiwò fifia? Esi nètsi fifia la, ɖe nèva le agbe tsɛ nɔm be yeate ŋu awɔ ɣeyiɣiawo katã ƒe subɔsubɔdɔa? Tiatia mawo dometɔ ɖe sia ɖe vana kple eƒe mɔnukpɔkpɔwo kpakple agbanɔamedziwo. Ne nuwo trɔ le míaƒe agbe me la, esia ate ŋu ana mɔnukpɔkpɔ mí be míagawɔ geɖe loo alo aɖe míaƒe wɔƒe dzi akpɔtɔ. Sɔhɛ alo ame tsitsi ye nènyea? Ðe  nèle lãmesẽ nyui mea, alo lãmesẽnyawo mede dziwò tututu o? Yehowa bua akpa si mía dometɔ ɖe sia ɖe ate ŋu awɔ nyuie wu le eƒe subɔsubɔdɔa me ŋu ɣesiaɣi. Nu si míate ŋu awɔ koe wòbiana tso mía si eye ekpɔa ŋudzedze ɖe nu sia nu si míewɔna ŋu ale gbegbe.—Heb. 6:10.

14. Aleke dzesidede afi si míaƒe ŋutete se ɖo ate ŋu akpe ɖe mía ŋu míakpɔ dzidzeme kple dzidzɔ le nɔnɔme ɖe sia ɖe me?

14 Yesu kpɔ dzidzɔ le eƒe subɔsubɔdɔ ɖe sia ɖe me, eye míawo hã míate ŋu akpɔ dzidzɔ le mía tɔwo me. (Lod. 8:30, 31) Ame si nya afi si eƒe ŋutete se ɖo la kpɔa ŋudzedze ɖe agbanɔamedzi siwo su esi le hamea me ŋu. Metsia dzi be yeaxɔ subɔsubɔmɔnukpɔkpɔ bubuwo loo alo ʋãa ŋu ame bubuwo ɖe nu si wote ŋu le wɔwɔm ta o. Ke boŋ etsɔa eƒe ŋusẽ katã wɔa dɔ si wode asi nɛ eye wòkpɔa dzidzɔ kple dzidzeme tso eme, elabena enyae be Yehowa gbɔe wòtso. Le ɣeyiɣi ma ke me la, edea bubu wɔƒe si Yehowa na ame bubuwo la ŋu tso eƒe dzi blibo me. Dzesidede afi si míaƒe ŋutete se ɖo wɔnɛ be míelɔ̃na faa tsɔa bubu si ame bubuwo dze na la naa wo hekpea asi ɖe woƒe dɔwo ŋu.—Rom. 12:10.

NU SI DZESIDEDE AFI SI AME ƑE ŊUTETE SE ÐO MEFIA O?

15. Nu kae míate ŋu asrɔ̃ tso Gideon ƒe kpɔɖeŋua me?

15 Gideon ɖo kpɔɖeŋu ɖedzesi aɖe ɖi na mí le nya sia me. Esi Yehowa ƒe dɔla ɖe eɖokui fiae zi gbãtɔ la, Gideon gblɔ nɛ be ame tsɛe yenye eye menye ame ŋkutawoe yeƒe ƒometɔwo nye o. (Ʋɔn. 6:15) Esi Gideon xɔ dɔ si Yehowa de asi nɛ la, ekpɔ egbɔ be yese nu si Yehowa bia tso ye si la  gɔme nyuie, eye wòbia eƒe mɔfiafia le dɔa wɔwɔ me. (Ʋɔn. 6:36-40) Dzi nɔ Gideon ƒo. Ke hã, edze aye eye wòwɔ nu ŋuɖɔɖotɔe. (Ʋɔn. 6:11, 27) Mewɔ mɔnukpɔkpɔa ŋu dɔ be ɖoƒe gã nasu ye si o. Ke boŋ, esi wònya kpɔ mɔnu ko la, etrɔ yi enɔƒe.—Ʋɔn. 8:22, 23, 29.

16, 17. Ne ame si nya afi si eƒe ŋutete se ɖo le gbɔgbɔmeŋgɔyiyi ŋu bum la, nu kae nɔa susu me nɛ?

16 Dzesidede afi si ame ƒe ŋutete se ɖo mefia be mímaxɔ subɔsubɔmɔnukpɔkpɔ bubuwo alo aminya wo o. Ŋɔŋlɔawo de dzi ƒo na mí katã be míayi ŋgɔ le mawusubɔsubɔ me. (1 Tim. 4:13-15) Gake ɣesiaɣie esia biana be míaxɔ subɔsubɔmɔnukpɔkpɔ bubua? Mebia nenema kokoko o. Le Yehowa ƒe kpekpeɖeŋu me la, míate ŋu ayi ŋgɔ le akpa si wɔm míele le eƒe subɔsubɔdɔa me fifia me. Míate ŋu abi ɖe ŋutete siwo Mawu na mí la ŋu dɔ wɔwɔ me be míasubɔ eyama nyuie wu ahakpe ɖe ame bubuwo ŋu.

17 Ame si si nɔnɔme nyui sia le la bua nu si agbanɔamedzi yeye aɖe abia tso esi la ŋu gbã. Esia akpe ɖe eŋu be wòada nuwo kpɔ nyuie. Le kpɔɖeŋu me, ɖe wòate ŋu axɔ dɔ alo agbanɔamedzi yeye aɖe evɔ maŋe aɖaba aƒu nu bubu siwo le vevie la dzi oa? Ðe woate ŋu atsɔ dɔ si wɔm wòle fifia ƒe ɖe ade asi na ame bubu wòawɔ ale be wòate ŋu akpɔ vovo ɖe dɔdeasi yeyea ŋua? Ne biabia siawo dometɔ ɖeka alo evea siaa ƒe ŋuɖoɖo nye ao la, ɖewohĩ ame aɖe li si ate ŋu awɔ dɔa nyuie wu. Ne míedo gbe ɖa heda nuwo kpɔ nyuie la, akpe ɖe mía ŋu be mímado agba na mía ɖokui wòagbɔ míaƒe ŋutete ŋu o. Eya ta míaxɔ agbanɔamedzia o.

18. (a) Nu kae ame si nya afi si eƒe ŋutete se ɖo la awɔ ne wode dɔ yeye asi nɛ? (b) Aleke nya siwo le Romatɔwo 12:3 la ku ɖe ame ma tɔgbi ŋu?

18 Ne míexɔ agbanɔamedzi yeye la, Gideon ƒe kpɔɖeŋua ɖoa ŋku edzi na mí be, Yehowa ƒe mɔfiafia kple yayra manɔmee la, míate ŋu akpɔ dzidzedze o. Esia me kɔ, elabena Ŋɔŋlɔawo gblɔ be ‘míabɔbɔ mía ɖokui ɖe anyi ahazɔ kple mía Mawu’ la. (Mika 6:8) Eya ta ɣesiaɣi si míexɔ agbanɔamedzi yeye aɖe la, ehiã be míado gbe ɖa ahabu mɔfiame ɖe sia ɖe si Yehowa na mí to eƒe Nyaa kple eƒe habɔbɔa dzi ŋu. Mele be míaɖo ŋu ɖe míaƒe gɔmesese ŋu o, ke boŋ míazɔ ɖe Yehowa ƒe mɔfiafia si nyo wu sãsãsã la dzi. Mina míaɖo ŋku edzi be menye míaƒe ŋutetee ‘doa gã mí’ o, ke boŋ Yehowa ƒe ɖokuibɔbɔ ye. (Ps. 18:35) Eya ta ne míetiae be míabɔbɔ mía ɖokui ɖe anyi ahazɔ kple Mawu la, esia akpe ɖe mía ŋu be mímabu mía ɖokui ŋu wu ale si dze o eye mímasusu be míele ɖeke me hã o.—Xlẽ Romatɔwo 12:3.

19. Susu kawo tae wòle be míanya afi si míaƒe ŋutete se ɖo?

19 Ame si nya afi si eƒe ŋutete se ɖo la tsɔa bubu si Yehowa dze na la nanɛ, elabena Yehowae nye mía Wɔla kple Xexea Me Katã Ƒe Dziɖulagã. (Nyaɖ. 4:11) Nɔnɔme nyui sia kpena ɖe mía ŋu míewɔa dɔ si wode asi na mí le Mawu ƒe habɔbɔa me la nyuie eye míekpɔa ŋudzedze ɖe eŋu. Ekpena ɖe mía ŋu hã míeƒoa asa na nu si medze o wɔwɔ, eye míedoa ɖekawɔwɔ ɖe ŋgɔ le Yehowa ƒe amewo dome. Eʋãa mí be míabu ame bubuwo be wonye gã wu mí, eye wònana míeɖɔa ŋu ɖo heƒoa asa na vodada siwo nye ŋkubiãnya. Le susu siawo ta, dzesidede afi si ame ƒe ŋutete se ɖo gale vevie na Mawu ƒe amewo, eye Yehowa dea asixɔxɔ ame siwo tu nɔnɔme nyui sia ɖo la ŋu. Ke ne dodokpɔwo va mía dzi ya ɖe? Nyati si kplɔ esia ɖo la akpe ɖe mía ŋu míayi edzi alé nɔnɔme nyui sia me ɖe asi le ɣeyiɣi sesẽwo gɔ̃ hã me.