Dzo kpo yi emenuwo dzi

Dzo kpo yi emenuawo dzi

Dzidzɔ​—Nɔnɔme Nyui Si Tso Mawu Gbɔ

Dzidzɔ​—Nɔnɔme Nyui Si Tso Mawu Gbɔ

AME sia ame dina be yeakpɔ dzidzɔ le agbe me. Gake le ŋkeke mamlɛ siawo me la, ame ɖe sia ɖe le akɔ kpem kple kuxi ‘sesẽwo.’ (2 Tim. 3:1) Nu madzɔmadzɔ wɔwɔ ɖe ame ŋu, lãmesẽkuxiwo, dɔmakpɔwɔe, nublanuinyawo, alo nu bubu siwo nana ame tsia dzimaɖi alo xaa nu vevie la tea ŋu wɔnɛ be vivivi la, dzi megava nɔa ame aɖewo dzɔm o. Dzi ate ŋu aɖe le Mawu subɔlawo gɔ̃ hã ƒo eye womaganɔ dzidzɔ kpɔm o. Ne ele alea le gowòme la, aleke nàwɔ be dzi nagava nɔ dzɔwòm ake?

Hafi míate ŋu aɖo biabia sia ŋu la, gbã, ehiã be míase nu si dzidzɔ nye la gɔme eye míade dzesi nu si wɔe be ame aɖewo kpɔtɔ nɔ dzidzɔ kpɔm togbɔ be wonɔ kuxi sesẽwo me tom gɔ̃ hã. Eyome, míakpɔ nu si míate ŋu awɔ be míakpɔtɔ anɔ dzidzɔ kpɔm eye míaƒe dzidzɔa nadzi ɖe edzi gɔ̃ hã.

NU KAE NYE DZIDZƆ?

Ele be míade dzesii be dzidzɔ to vovo na vividodo ɖe ame ŋu alo nukoko. Le kpɔɖeŋu me: Ame si no aha geɖe mu la ate ŋu anɔ nu wɔm abe dzidzɔ kpɔm wòle ene. Gake ne eƒe mo va kɔ la, nukoko buna ɖee, eye ekpɔnɛ be yeƒe agbemekuxiwo kple nuxaxawo gakpɔtɔ li. Dzidzɔ si wòkpɔ ɣemaɣi la menye dzidzɔ vavãtɔ o.—Lod. 14:13.

Dzidzɔ vavãtɔ ya tsoa keke dzi me ke. Wogblɔ be enye “ale si ame sena le eɖokui me ne nu nyui aɖe su esi alo ne ele mɔ kpɔm na nu nyui aɖe.” Nɔnɔme nyui sia wɔnɛ be dzi gakpɔtɔ nɔa mía dzɔm le ɣeyiɣi nyuiwo kple ɣeyiɣi madeamedziwo siaa me. (1 Tes. 1:6) Eya ta, ame aɖe ate ŋu anɔ nɔnɔme sesẽ aɖe me tom gake dzi aganɔ edzɔm le ememe. Le kpɔɖeŋu me, woƒo apostoloawo le esi wonɔ ɖase ɖim le Kristo la ŋu ta. Ke hã, “wodzo le Sanhedrin la ŋkume, eye wonɔ dzidzɔ kpɔm be wobu yewo be yewodze woado vlo yewo le eƒe ŋkɔ la ta.” (Dɔw. 5:41) Eme kɔ ƒãa be menye esi woƒo wo tae wonɔ dzidzɔ kpɔm ɖo o. Ke boŋ, esi wonye Mawu subɔlawo ta la, wokpɔ dzidzɔ le ememe le esi wowɔ nuteƒe nɛ ta.

Womedzia ame kple dzidzɔ sia o; eye mesua ame si le eɖokui si hã o. Nu ka tae? Nu si tae nye be dzidzɔ vavãtɔ nye Mawu ƒe gbɔgbɔ kɔkɔea ƒe kutsetse ƒe akpa aɖe. Mawu ƒe gbɔgbɔa ate ŋu akpe ɖe mía ŋu míado “amenyenye yeye,” si ƒe akpa aɖee nye dzidzɔ la. (Ef. 4:24; Gal. 5:22) Eye ne dzidzɔ sia su mía si la, enana míetea ŋu kpea akɔ kple agbemekuxiwo nyuie wu.

KPƆÐEŊU SIWO MÍADI BE MÍASRƆ̃

Yehowa ɖoe be nuwo nayi edzi nyuie le anyigba dzi, ke menye nu vloe siwo teƒe kpɔm míele egbea o. Ke hã, nu vɔ̃ɖi siwo wɔm amewo le la mewɔe be Yehowa megale dzidzɔ kpɔm o. Mawu ƒe Nya la gblɔ be: “Ŋusẽ kple dzidzɔ le enɔƒe.” (1 Kron. 16:27) Gakpe ɖe eŋu la, nu nyui siwo wɔm esubɔlawo le la doa ‘dzidzɔ na eƒe dzi.’—Lod. 27:11.

Ne nuwo meva yi abe ale si míenɔ mɔ kpɔm nɛ ene o gake míeɖe mɔ esia te ɖe mía dzi fũu akpa o la, ekema míele Yehowa srɔ̃m. Le esi míaɖe mɔ nɔnɔmea nate ɖe mía dzi teƒe la, anyo wu be míaƒe susu nanɔ nu nyui siwo su  mía si fifia ŋu eye míatsɔ dzigbɔɖi anɔ mɔ kpɔm na nu nyui siwo le ŋgɔ gbɔna. *

Kpɔɖeŋu geɖe le Biblia me ku ɖe ame siwo yi edzi nɔ dzidzɔ kpɔm togbɔ be wonɔ nɔnɔme sesẽwo me tom hã ŋu. Abraham ƒe agbe ɖo afɔku me ɣeaɖewoɣi eye amewo ƒe nuwɔna hã na kuxi sesẽwo va edzi. (1 Mose 12:10-20; 14:8-16; 16:4, 5; 20:1-18; 21:8, 9) Togbɔ be nɔnɔme sesẽ mawo va Abraham dzi hã la, egakpɔa dzidzɔ le ememe kokoko. Nu kae kpe ɖe eŋu? Etsɔ eƒe susu ɖo mɔkpɔkpɔ si nɔ esi be yeava nɔ agbe le xexe yeyea me le Mesia la ƒe dziɖuɖu te la ŋu. (1 Mose 22:15-18; Heb. 11:10) Yesu gblɔ be: “Mia fofo Abraham tso aseye be yeakpɔ nye ŋkeke la, ekpɔe hã, eye dzi dzɔe.” (Yoh. 8:56) Míate ŋu asrɔ̃ Abraham ƒe kpɔɖeŋua ne míedea ŋugble le dzidzɔɣi siwo le ŋgɔ gbɔna ŋu.—Rom. 8:21.

Abe Abraham ene la, apostolo Paulo kple eƒe zɔhɛ Sila siaa tsɔ woƒe susu ɖo Mawu ƒe ŋugbedodowo ŋu. Xɔse sẽŋu nɔ wo si, eye wokpɔtɔ nɔ dzidzɔ kpɔm togbɔ be woto nɔnɔme wɔnublanui geɖe me hã. Le kpɔɖeŋu me, ɣeaɖeɣi la, woƒo wo vevie helé wo de gaxɔ me, gake ‘le zã titina lɔƒo la, Paulo kple Sila nɔ gbe dom ɖa henɔ ha dzim nɔ Mawu kafum.’ (Dɔw. 16:23-25) Nu si do ŋusẽ Paulo kple Sila wodo dzi ye nye mɔkpɔkpɔ si nɔ wo si, eye dzi nɔ wo dzɔm, elabena wonyae be Kristo ƒe ŋkɔ la tae yewonɔ fu kpem ɖo. Míate ŋu asrɔ̃ Paulo kple Sila ƒe kpɔɖeŋua ne míaƒe susu nɔa nu nyui siwo dona tso Mawu subɔsubɔ nuteƒewɔwɔtɔe me ŋu.—Flp. 1:12-14.

Egbea, kpɔɖeŋu nyui ɖola siwo kpɔtɔ le dzidzɔ kpɔm togbɔ be woto nɔnɔme sesẽwo me la dometɔ geɖe le míaƒe nɔviwo ƒe habɔbɔa me. Le kpɔɖeŋu me, esime Haiyan Ahomya Sesẽ la tu le November 2013 me le Philippines dukɔa me la, Ðasefowo ƒe ƒome 1,000 kple edzivɔ ƒe aƒewo tsrɔ̃. George ƒe aƒe nɔ Tacloban dua me eye egbã gudugudu. Egblɔ be: “Togbɔ be ahom la gblẽ nɔviawo ƒe nuwo dome ŋutɔ hã la, wogakpɔtɔ nɔ dzidzɔ kpɔm. Esesẽ be maɖɔ dzidzɔ si míekpɔ.” Ne kuxi sesẽwo va mía dzi la, dzidzɔ akpɔtɔ anɔ mía me ne míede ŋugble le nu siwo Yehowa wɔ na mí ŋu eye míekpɔ ŋudzedze ɖe wo ŋu. Nu bubu kawoe Yehowa na mí siwo tae míekpɔa dzidzɔ ɖo?

NU SIWO TA MÍEKPƆA DZIDZƆ ÐO

Susu si ƒo ɖe sia ɖe ta si tae míekpɔa dzidzɔ ɖoe nye ƒomedodo si le mía kple Yehowa dome. Wò ya bu eŋu kpɔ: Míenya Xexea Me Katã Ƒe Dziɖulagã la. Eyae nye mía Fofo, mía Mawu kple mía Xɔlɔ̃!—Ps. 71:17, 18.

Míedea asixɔxɔ agbe kple ŋutete si Mawu na mí be míase vivi na agbea la ŋu. (Nyagb. 3:12, 13) Esi míenye Yehowa ƒe nuwɔwɔ siwo si nunya le, siwo wòhe va eɖokui gbɔ ta la, míenya nu si wòdi tso mía si. (Kol. 1:9, 10) Esia wɔe be taɖodzinu vavã le míaƒe agbe ŋu eye míenya ale si míanɔ agbee. Gake ame akpa gãtɔ ya menya taɖodzinu si le agbea ŋu o. Paulo na vovototo sia dze ƒãa esi wòŋlɔ bena: “‘Nu siwo Mawu dzra ɖo ɖi na ame siwo lɔ̃nɛ la, ŋku mekpɔ wo kpɔ o, eye to mese wo kpɔ o, eye womeva ame ƒe dzi me hã kpɔ o.’ Elabena míawoe Mawu ɖee fia to eƒe gbɔgbɔ la dzi.” (1 Kor. 2:9, 10) Ðe nu siwo míenya tso Yehowa ƒe lɔlɔ̃nu kple eƒe tameɖoɖo ŋu la menana míekpɔa dzidzɔ oa?

Gabu nu bubu aɖe si Yehowa wɔ na eƒe amewo ŋu kpɔ. Ðe dzi medzɔa mí be Mawu tsɔa míaƒe nu vɔ̃wo kea mí oa? (1 Yoh. 2:12) Le Mawu ƒe nublanuikpɔkpɔ ta la, mɔkpɔkpɔ le mía si be míava nɔ agbe le xexe yeye si tu aƒe la me. (Rom. 12:12) Fifia gɔ̃ hã la, Yehowa na hati mawusubɔla gbogbo aɖewo mí. (Ps. 133:1) Mawu ƒe Nyaa hã ka ɖe edzi na mí be Yehowa kpɔa eƒe amewo ta tso Satana kple eƒe gbɔgbɔ vɔ̃wo si me. (Ps. 91:11) Ne míedea ŋugble le Mawu ƒe yayra siawo katã ŋu la, dzi adzɔ mí geɖe wu eye míaƒe dzidzɔa anɔ dzidzim ɖe edzi.—Flp. 4:4.

 ALE SI MÍANA MÍAƑE DZIDZƆ NADZI ÐE EDZI

Ðe Kristotɔ si le dzidzɔ kpɔm xoxo la agate ŋu akpɔ dzidzɔ geɖe wua? Yesu gblɔ be: “Nya siawoe megblɔ na mi, be nye dzidzɔ la nanɔ mia me, eye miaƒe dzidzɔ la nagba go.” (Yoh. 15:11) Ðe esia mena míekpɔe be míaƒe dzidzɔa ate ŋu adzi ɖe edzi oa? Àte ŋu atsɔ agbagba si dzem nèle be wò dzidzɔ nadzi ɖe edzi la asɔ kple ale si wotua dzo ɖoe. Ele be nànɔ nake dem dzoa me ale be dzoa nalé nyuie. Le gɔmesese ma ke nu la, ele be nànɔ ɖokuiwò tum ɖo le gbɔgbɔ me be wò dzidzɔ nadzi ɖe edzi. Ðo ŋku edzi: Mawu ƒe gbɔgbɔ kɔkɔe lae nana míekpɔa dzidzɔ. Eya ta, ne èdoa gbe ɖa biaa Yehowa edziedzi be wòana gbɔgbɔ kɔkɔea nakpe ɖe ŋuwò eye nèdea ŋugble le Eƒe Nyaa si tso gbɔgbɔ me ŋu vevie la, àva nɔ dzidzɔ geɖe wu kpɔm.—Ps. 1:1, 2; Luka 11:13.

Ne èdoa vevie nu le dɔwɔna siwo dzea Yehowa ŋu me la, esia hã ana wò dzidzɔ nadzi ɖe edzi. (Ps. 35:27; 112:1) Nu ka tae? Nu si tae nye be wowɔ mí be ‘míavɔ̃ Mawu vavã la, eye míalé eƒe sewo me ɖe asi, elabena nu sia koe wodi tso amegbetɔwo katã si.’ (Nyagb. 12:13) Ne míagblɔe bubui la, ɖe wowɔ mí be míawɔ Mawu ƒe lɔlɔ̃nu. Eya ta, ne míesubɔa Yehowa la, míekpɔa dzidzɔ le agbe me. *

DZIDZƆ ƑE VIÐEWO

Ne dzidzɔ si tsoa Mawu gbɔ va le mía si sum la, míava kpɔ viɖe siwo de ŋgɔ wu ale si míele sesem le mía ɖokui me ko. Le kpɔɖeŋu me, míava dze mía Fofo si le dziƒo la ŋu geɖe wu ne míeyi edzi le esubɔm dzidzɔtɔe esime míele kuxiwo me tom gɔ̃ hã. (5 Mose 16:15; 1 Tes. 5:16-18) Azɔ hã, ne dzidzɔ vavãtɔ su mía si la, míava kpɔe be menye ŋutilãmenunɔamesiwoe le vevie le agbe me o, eye míatsɔ nu geɖe wu asa vɔe le Mawu Fiaɖuƒea ta. (Mat. 13:44) Ne míekpɔ viɖe siwo do tso esia me la, míaƒe dzidzɔ adzi ɖe edzi, míaƒe dzi adze eme geɖe wu, eye míana ame bubuwo hã nakpɔ dzidzɔ.—Dɔw. 20:35; Flp. 1:3-5.

Esi numekula aɖe si le Nebraska Yunivɛsiti, le Amerika, ku nu me le lãmesẽnya vovovowo ŋu vɔ la, eŋlɔ bena: “Ne dzidzɔ kple dzidzeme su asiwò fifia la, ate ŋu awɔe be lãmesẽnyawo nava de dziwò wu le etsɔme.” Esia wɔ ɖeka kple nya si Biblia gblɔ be: “Dzi kpɔdzidzɔ nye atike nyui.” (Lod. 17:22) Ɛ̃, ne èna wò dzidzɔ le dzidzim ɖe edzi la, ate ŋu ana nànɔ lãmesẽ nyui me.

Eya ta, togbɔ be míele ɣeyiɣi si me xaxawo bɔ ɖo me hã la, míakpɔ dzidzɔ vavãtɔ ne gbɔgbɔ kɔkɔea su mía si to gbedodoɖa, Yehowa ƒe Nyaa sɔsrɔ̃ kple ŋugbledede le eŋu me. Míagate ŋu ana míaƒe dzidzɔ nadzi ɖe edzi ne míedea ŋugble le yayra siwo su mía si fifia ŋu, ne míesrɔ̃a ame bubuwo ƒe xɔse, eye míedzea agbagba wɔa Mawu ƒe lɔlɔ̃nu. Ne míewɔa nu siawo katã la, ekema, nya si Psalmo 64:10 gblɔ be, “Ame dzɔdzɔe akpɔ dzidzɔ ɖe Yehowa ŋu, eye wòasii atso” la ava eme na mí.

^ mm. 10 Míava dzro nɔnɔme nyui si nye dzigbɔgbɔ blewu me le nyati siawo siwo le vavam ɖe wo nɔewo yome, siwo ku ɖe ‘gbɔgbɔa ƒe kutsetsea’ ŋu, la dometɔ ɖeka me.

^ mm. 20 Kpɔ nu bubu siwo nàte ŋu awɔ be wò dzidzɔ nadzi ɖe edzi la le aɖaka si nye “ Mɔ Bubu Siwo Dzi Nàto Adzi Wò Dzidzɔ Ðe Edzi” la me.