Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  February 2016

Yehowa Yɔ Abraham Be “Xɔ̃nye”

Yehowa Yɔ Abraham Be “Xɔ̃nye”

“Wò, Israel, nye subɔla nènye; nye ame tiatia Yakob, xɔ̃nye Abraham ƒe dzidzimevi.”YESAYA 41:8.

HADZIDZI: 91, 22

1, 2. (a) Aleke míewɔ nya be amegbetɔ ate ŋu anye Mawu xɔlɔ̃? (b) Nu ka mee míadzro le nyati sia me?

TSO mía dziɣi va se ɖe míaƒe kugbe la, míedina be woalɔ̃ mí. Amegbetɔwo hiã xɔlɔ̃wo kple ƒometɔwo ƒe lɔlɔ̃, ke menye ŋutsu kple nyɔnu dome lɔlɔ̃ ko o. Gake nu vevitɔ si míehiãe nye Yehowa ƒe lɔlɔ̃. Esi míekpɔa Mawu kple ŋku o, eye wònye ŋusẽkatãtɔ ta la, ame geɖe susuna be míate ŋu ate ɖe eŋu kaka wòahayi mía xɔlɔ̃ nye ge o. Gake míawo ya míenya nyateƒea!

2 Míesrɔ̃e le Biblia me be amegbetɔ aɖewo zu Mawu xɔlɔ̃wo. Anyo be míasrɔ̃ woƒe kpɔɖeŋu. Nu ka ta? Elabena xɔlɔ̃dzedze Mawu ye nye taɖodzinu vevitɔ si gbɔ míadi be míaɖo le agbe me. Eya ta na míadzro Abraham ƒe kpɔɖeŋu me kpɔ. (Xlẽ Yakobo 2:23.) Aleke wòwɔ zu Mawu xɔlɔ̃? Xɔse ye na Abraham zu Mawu xɔlɔ̃ vevi, eye wova  yɔe be “ame siwo katã si xɔse le . . . la fofo.” (Romatɔwo 4:11) Ne èle eƒe kpɔɖeŋua me dzrom la, nɔ ɖokuiwò biam be, ‘Aleke mate ŋu asrɔ̃ Abraham ƒe xɔse ahatu nye kple Yehowa ƒe xɔlɔ̃wɔwɔa ɖo?’

ALEKE ABRAHAM WƆ ZU YEHOWA XƆLƆ̃?

3, 4. (a) Gblɔ nu si anya nye xɔse ƒe dodokpɔ sesẽtɔ na Abraham. (b) Nu ka tae Abraham lɔ̃ be yeatsɔ Isak asa vɔe?

3 Kpɔe ɖa le susu me be Abraham si xɔ abe ƒe 125 ene ye nye ema le afɔ ɖem blewublewu le to aɖe liam. [1] (Kpɔ dzesidenya la.) Via Isak, si xɔ abe ƒe 25 ene, hã le eyome. Isak tsɔ nake ɖe abɔta, eye Abraham lé hɛ kple dzodonu ɖe asi. Ðewohĩ mɔzɔzɔ mae nye sesẽtɔ kekeake le Abraham ƒe agbe me. Menye eƒe tɔgbuikuku tae o. Elabe ŋusẽ kpɔtɔ nɔ eŋu. Nu si na mɔzɔzɔ ma sesẽ nɛ koŋue nye be, Yehowa bia tso esi be wòatsɔ viaŋutsua asa vɔ na ye!—1 Mose 22:1-8

Menye ɖeko Abraham ɖo to Mawu nuwo ŋu mabumabui o

4 Anɔ eme be emae nye xɔse ƒe dodokpɔ sesẽtɔ na Abraham. Ame aɖewo gblɔna be tagbɔsesẽe na Mawu bia tso Abraham si be wòatsɔ via asa vɔ na ye. Eye ame aɖewo hã susui be esi Abraham melɔ̃ via o tae wòlɔ̃ be yeatsɔe asa vɔ ɖo. Ame siwo si xɔse mele o eye womenya nu si xɔse vavã nye kple ale si wòwɔa dɔe o ye gblɔa nya siawo. (1 Korintotɔwo 2:14-16) Gake menye ɖeko Abraham ɖo to Mawu nuwo ŋu mabumabui o, ke boŋ xɔse vavã si le esi tae. Enyae nyuie be Yehowa mabia naneke si agblẽ nu le ye ŋu tegbee la tso ye si gbeɖe o. ‘Koklovi si nɔna nɔa ŋue ɖua bɔ ƒe ata,’ eya ta Abraham ka ɖe edzi be Yehowa ayra ye kple ye vi lɔlɔ̃a ne yeɖo toe. Nu kae kpe ɖe Abraham ŋu be eƒe xɔse sẽŋu alea? Eyae nye sidzedze kple nuteƒekpɔkpɔ.

5. Anye mɔ ka dzie Abraham to srɔ̃ nu tso Yehowa ŋu, eye ŋusẽ kae sidzedze ma kpɔ ɖe edzi?

5 Sidzedze. Du si woyɔna be Ur mee Abraham nɔ tsi. Alakpamawuwoe dua  me tɔwo, kple fofoa hã, subɔna. (Yosua 24:2) Ke aleke Abraham wɔ srɔ̃ nu tso Yehowa ŋu? Biblia ɖee fia be, Noa viŋutsu Sem nye Abraham ƒe ƒometɔ. Eye Sem nɔ agbe va se ɖe esime Abraham xɔ ƒe 150. Xɔse sẽŋu nɔ Sem si, eye anɔ eme be eƒoa nu tso Yehowa ŋu na eƒe ƒometɔwo. Míenya tututu ya o, gake edze abe mɔ ma dzie Abraham to srɔ̃ nu tso Yehowa ŋu ene. Nu siwo Abraham srɔ̃ tso Yehowa ŋu na wòva lɔ̃e, eye sidzedze ma tu eƒe xɔse ɖo.

6, 7. Aleke nuteƒekpɔkpɔ siwo su Abraham si la do ŋusẽ eƒe xɔse?

6 Nuteƒekpɔkpɔ. Nu ka teƒee Abraham kpɔ si na wògaxɔ Yehowa dzi se geɖe wu? Ame aɖewo gblɔna be nane ŋu bubu ye ʋãa dzi na ame ale be wòva ɖea afɔ aɖewo. Nu si Abraham srɔ̃ tso Mawu ŋu ʋã dzi nɛ, eye esia na wòva de bubu deto “Yehowa, Mawu Dziƒoʋĩtɔ la, Ame si wɔ dziƒo kple anyigba” la ŋu. (1 Mose 14:22) Biblia yɔ bubu deto sia be “mawuvɔvɔ̃.” (Hebritɔwo 5:7) Ele be mawuvɔvɔ̃ nanɔ mía me hafi míate ŋu anye Mawu xɔlɔ̃wo. (Psalmo 25:14) Emae ʋã Abraham wòɖo to Yehowa ƒe gbe.

7 Mawu bia tso Abraham kple Sara si be woaʋu le wo de Ur ayi dzronyigba dzi. Wotsi ɣemaɣi, gake esia bia be woanɔ avɔgbadɔwo me. Togbɔ be Abraham nya be afɔku geɖe anɔ eme hã la, eɖoe be yeaɖo to Yehowa. Mawu yrae eye wòkpɔ eta le esi wòɖo toe ta. Le kpɔɖeŋu me, esi wokplɔ Abraham srɔ̃ dzetugbe Sara dzoe le egbɔ eye Abraham nɔ vɔvɔ̃m be woawu ye la, Yehowa kpɔ wo ame evea ta nukutɔe zi eve sɔŋ. (1 Mose 12:10-20; 20:2-7, 10-12, 17, 18) Nuteƒekpɔkpɔ siawo do ŋusẽ Abraham ƒe xɔse ɖe edzi.

8. Aleke sidzedze kple nuteƒekpɔkpɔ si ana míazu Yehowa xɔlɔ̃ veviwo awɔ asu mía si?

8 Ðe míawo hã míate ŋu azu Yehowa xɔlɔ̃ veviwoa? Ɛ̃, míate ŋui! Abe Abraham ene la, ehiã be míasrɔ̃ nu tso Yehowa ŋu. Sidzedze kple nuteƒekpɔkpɔ si míehiã la ate ŋu asu míawo hã si. Egbea, nu geɖe su mía si wu Abraham. (Daniel 12:4; Romatɔwo 11:33) Biblia fia nu gbogbo aɖewo mí ku ɖe “Ame si wɔ dziƒo kple anyigba” ŋuti. Nu siwo míesrɔ̃na nana míelɔ̃a Yehowa eye míedea bubu gã eŋu. Eye lɔlɔ̃ kple bubu sia ʋãa mí míeɖoa to Mawu.  Toɖoɖo hã nana wòkpɔa mía ta heyraa mí, si wɔnɛ be nuteƒekpɔkpɔ si doa ŋusẽ míaƒe xɔse la sua mía si. Ne míesubɔ Yehowa kple dzi blibo la, míekpɔa dzidzɔ, dzidzeme kple ŋutifafa. (Psalmo 34:8; Lododowo 10:22) Eye zi ale si sidzedze kple nuteƒekpɔkpɔ le mía si sum la, zi nenemae mía kplii ƒe xɔlɔ̃dzedzea me sẽna ɖe edzi.

NU SI KPE ÐE ABRAHAM ŊU WÒYI EDZI NYE MAWU XƆLƆ̃

9, 10. (a) Nu kae hiã hafi xɔlɔ̃wo dome nanyo wu? (b) Nu kae ɖee fia be Abraham de asixɔxɔ eya kple Yehowa ƒe xɔlɔ̃dzedzea ŋu?

9 Xɔlɔ̃ vavã nɔamesi nye nu xɔasi aɖe. (Xlẽ Lododowo 17:17.) Xɔlɔ̃dzedze mele abe ze nyui xɔasi aɖe si wotsɔ ɖo atsyɔ̃ na xɔ me ene o. Ke boŋ ele abe seƒoƒo ŋutɔŋutɔ ene, ehiã be woanɔ tsi demee ahanɔ be lém nɛ. Abraham de asixɔxɔ eya kple Yehowa ƒe xɔlɔ̃wɔwɔa ŋu helé be nɛ. Aleke wòwɔe?

Xɔlɔ̃dzedze le abe seƒoƒo ŋutɔŋutɔ ene, ehiã be woanɔ tsi demee ahanɔ be lém nɛ

10 Abraham yi edzi vɔ̃ Mawu heɖo toe le nu sia nu me. Le kpɔɖeŋu me, esi wòkplɔ eƒe ƒomea kple subɔviwo woʋu yi Kanaan la, ena Yehowa fia mɔe le nyametsotso suewo kple gãawo siaa me. Ƒe ɖeka do ŋgɔ na Isak dzidzi, esime Abraham xɔ ƒe 99 la, Yehowa gblɔ nɛ be wòatso aʋa na eƒemeŋutsuwo katã. Ðe Abraham he nya, eye wòdi nya aɖewo tsɔ do taflatsɛ hegbe Yehowa ƒe nya sia dzi wɔwɔa? Kura o! Eɖo ŋu ɖe Yehowa ŋu, eɖo toe hewɔ sedede sia dzi “gbe ma gbe ke.”—1 Mose 17:10-14, 23.

11. Nu ka tae Abraham tsi dzi ɖe Sodom kple Gomora ŋu, eye aleke Yehowa kpe ɖe eŋui?

11 Esi Abraham ɖoa to Yehowa le nu suetɔ kekeake me ta la, wo dome va le kplikplikpli. ‘Buamee wobuna,’ eya ta eka ɖe edzi be yeate ŋu aɖe yeƒe susu agblɔ na Yehowa faa eye alɔ̃ aɖo to ye, ne yebia nya wɔmoyawo gɔ̃ hã. Le kpɔɖeŋu me, esi Yehowa gblɔ be yele Sodom kple Gomora tsrɔ̃ ge la, Abraham tsi dzi ŋutɔ. Nu ka ta? Elabe enɔ vɔvɔ̃m be woatsrɔ̃ ame nyuiwo akpe ɖe ame vɔ̃ɖiwo ŋu. Anɔ eme be etsi dzimaɖi ɖe tɔɖiyɔvia Lot kple eƒe ƒomea, siwo nɔ Sodom ɣemaɣi ŋu. Abraham ka ɖe Yehowa, “anyigba blibo la ƒe Ʋɔnudrɔ̃la” dzi, eya ta egblɔ eƒe dzimenyawo nɛ ɖokuibɔbɔtɔe. Yehowa gbɔ dzi ɖi na exɔlɔ̃a, eye wòna wònya be nublanuikpɔlae Yenye. Yehowa ɖe eme nɛ be, ne yele to hem na amewo la, yedia ame nyuiawo hexɔna na wo.—1 Mose 18:22-33.

12, 13. (a) Aleke sidzedze kple nuteƒekpɔkpɔ si su Abraham si kpe ɖe eŋu emegbe? (b) Nu kae ɖee fia be Abraham ka ɖe Yehowa dzi bliboe?

12 Eme kɔ ƒãa be sidzedze kple nuteƒekpɔkpɔ siwo katã su Abraham si kpe ɖe eŋu wòtu eya kple Yehowa ƒe xɔlɔ̃wɔwɔa  ɖo. Eya ta emegbe esi Yehowa bia tso Abraham si be wòatsɔ via asa vɔ na ye la, eka ɖe edzi be Yehowa nyea dzigbɔɖitɔ, nublanuikpɔla, ŋuɖoɖeŋutɔ kple ametakpɔla ɣesiaɣi. Abraham xɔe se bliboe be Yehowa mate ŋu atrɔ kpata ava zu tagbɔsesẽtɔ kple vevemaseɖeamenula gbeɖe o! Nu ka tae míegblɔe alea?

13 Hafi Abraham nadzo le eƒe subɔviwo gbɔ la, egblɔ na wo be: “Minɔ afi sia kple tedzi la, ke nye kple ɖevi la míayi ŋgɔ vie aɖade ta agu atrɔ ava mia gbɔ.” (1 Mose 22:5) Abraham ƒe nya sia gɔme ɖe? Ðe wòle wo blem be ye kple Isak yewoatrɔ agbɔ, evɔ wònya nyuie be yetsɔe yina vɔ sa gea? Gbeɖe. Biblia gblɔ be Abraham xɔe se be Yehowa ate ŋu agbɔ agbe Isak. (Xlẽ Hebritɔwo 11:19.) Abraham nyae be Yehowae na ŋusẽ ye kple Sara yewodzi vi togbɔ be yewoku tɔgbui kple mama hã. (Hebritɔwo 11:11, 12, 18) Eya ta eka ɖe edzi be naneke mesesẽ na Yehowa o. Abraham menya nu si adzɔ gbe ma gbe o. Gake exɔe se bliboe be ne eva hiã la, Yehowa Mawu afɔ ye via ɖe tsitre ale be Eƒe ŋugbedodowo katã nava eme. Ema tae woyɔ Abraham be “ame siwo katã si xɔse le . . . la fofo” ɖo.

Abraham xɔe se bliboe be ne eva hiã la, Yehowa Mawu afɔ ye via ɖe tsitre ale be Eƒe ŋugbedodowo katã nava eme

14. Kuxi kawoe nèdoa goe le Yehowa subɔsubɔ me, eye aleke Abraham ƒe kpɔɖeŋua ate ŋu akpe ɖe ŋuwòe?

14 Egbea Yehowa mebia tso mía si be míatsɔ mía viwo asa vɔ na ye o, ke hã edi be míawɔ ɖe yeƒe sewo dzi. Ɣeaɖewoɣi míanya susu si ta wòde se siawo ɖo o, alo ate ŋu awɔ na mí be wo dzi wɔwɔ sesẽ. Ðe wòwɔna na wò hã alea ɣeaɖewoɣia? Ame aɖewo bua gbeƒãɖeɖedɔa be esesẽ akpa. Ðewohĩ wokpea ŋu, alo nuƒoƒo na ame si womedze si o menɔa bɔbɔe na wo o. Menya wɔna na ame aɖewo hã be yewoato vovo le dɔwɔƒe alo suku o. (2 Mose 23:2; 1 Tesalonikatɔwo 2:2) Ne nane wɔwɔ le sesẽm na wò la, ɖo ŋku xɔse kple dzideƒo ƒe kpɔɖeŋu ɖedzesi si Abraham ɖo ɖi la dzi. Ne míedea ŋugble le ŋutsu kple nyɔnu nuteƒewɔlawo ƒe kpɔɖeŋuwo ŋu la, esia aʋã mí be míasrɔ̃ woƒe xɔse, eye wòate mí ɖe mía Xɔlɔ̃ Yehowa ŋu geɖe wu.—Hebritɔwo 12:1, 2.

XƆLƆ̃DZEDZE SI ME YAYRA LE

15. Nu ka tae míeka ɖe edzi be meve Abraham kpɔ be yewɔ nuteƒe na Yehowa heɖo toe o?

15 Ðe wòte ɖe Abraham dzi kpɔ be yeɖo to Yehowa? Kura o! Biblia gblɔ be Abraham “tsi nyuie, etsi ku amegã eye agbenɔnɔ ɖi kɔ nɛ hafi wòku.” (1 Mose 25:8) Esi Abraham xɔ ƒe 175 gɔ̃ hã, eƒe dzi dzea eme ne eɖo ŋku ƒe siwo katã wòtsɔ nɔ agbee dzi. Nu ka  ta? Elabena le eƒe agbe me katã la, eya kple Yehowa ƒe xɔlɔ̃dzedzea ye nye nu vevitɔ nɛ ɣesiaɣi. Gake esi wogblɔ be Abraham tsi, “ku amegã eye agbenɔnɔ ɖi kɔ nɛ” la, esia mefia be megale mɔ kpɔm be yeava nɔ agbe le etsɔme o.

16. Nu kawoe ado dzidzɔ na Abraham le Paradiso me?

16 Biblia gblɔ be Abraham nɔ “du si gɔmeɖoanyi ŋutɔŋutɔwo li na lalam, du si ƒe aɖaŋuwɔla kple tsolae nye Mawu.” (Hebritɔwo 11:10) Abraham nɔ mɔ kpɔm be gbe ɖeka la, yeakpɔ eteƒe du ma, si nye Mawu Fiaɖuƒea, nava ɖu anyigba bliboa dzi. Eye akpɔ eteƒe hã vavã! Kpɔ ale si Abraham akpɔ dzidzɔe ne ele agbe le paradiso me le anyigba dzi eye mɔnukpɔkpɔ su esi be wòayi edzi anɔ tetem ɖe Mawu ŋui ɖa! Dzi adzɔe ŋutɔ ne eva nyae be yeƒe xɔse ƒe kpɔɖeŋua de dzi ƒo na Mawu subɔlawo ƒe akpe geɖe! Eye wòava see le Paradisoa me be, vɔ ma si yesa le Moria Toa dzi la nye kpɔɖeŋu na nane si lolo wu. (Hebritɔwo 11:19) Ava see hã be, veve si yese esime yebe yeawu ye via atsɔ asa vɔe la, kpe ɖe nuteƒewɔla miliɔn geɖewo ŋu be wose veve si Yehowa se esime wòtsɔ Via Yesu Kristo sa vɔ ɖe amegbetɔwo ta la gɔme. (Yohanes 3:16) Abraham ƒe kpɔɖeŋua kpena ɖe mí katã ŋu míekpɔa ŋudzedze ɖe tafevɔsa, si nye lɔlɔ̃ gãtɔ si woɖe fia mí kpɔ, la ŋu geɖe wu!

17. Nu kae nèɖo kplikpaa be yeawɔ, eye nu ka mee míadzro le nyati si kplɔ esia ɖo me?

17 Mina míaɖoe kplikpaa be míasrɔ̃ Abraham ƒe xɔse. Eye be sidzedze kple nuteƒekpɔkpɔ nasu míawo hã si. Ne míeyi edzi le nu srɔ̃m tso Yehowa ŋu hele to ɖomee la, míava kpɔ ale si wòyraa mí hekpɔa mía ta adze sii. (Xlẽ Hebritɔwo 6:10-12.) Neva eme be Yehowa nanye mía Xɔlɔ̃ tegbee! Le nyati si kplɔ esia ɖo me la, míadzro nuteƒewɔla etɔ̃ bubu siwo hã nye Mawu xɔlɔ̃ veviwo ƒe kpɔɖeŋuwo me.

^ [1] (memama 3) Woyɔ Abraham kple Sara le gɔmedzedzea be Abram kple Sarai. Gake le nyati sia me la, míazã ŋkɔ si Yehowa tsɔ na wo emegbe.