Dzo kpo yi emenuwo dzi

Dzo kpo yi emenuawo dzi

Sɔhɛwo—‘Miyi Edzi Mianɔ Miaƒe Ðeɖekpɔkpɔ Ŋuti Dɔ La Wɔm’

Sɔhɛwo—‘Miyi Edzi Mianɔ Miaƒe Ðeɖekpɔkpɔ Ŋuti Dɔ La Wɔm’

“Ale si mieɖoa to ɣesiaɣi . . . la, miyi edzi miatsɔ vɔvɔ̃ kple dzodzo nyanyanya anɔ miaƒe ɖeɖekpɔkpɔ ŋuti dɔ la wɔm.”—FLP. 2:12.

HADZIDZI: 133, 135

1. Nu ka tae nyɔnyrɔxɔxɔ le vevie ŋutɔ? (Kpɔ foto si le nyati sia ƒe gɔmedzedze.)

BIBLIA nusrɔ̃vi akpe geɖe xɔa nyɔnyrɔ ƒe sia ƒe. Wo dometɔ geɖe nye ɖeviwo kple ƒewuiviwo. Eye anɔ eme be wohe wo le nyateƒea me. Wò hã èle wo domea? Ne nenemae la, ke èdze na kafukafu. Ŋɔŋlɔawo ƒe nudidie wònye be Kristotɔ naxɔ nyɔnyrɔ, eye enye afɔ vevi aɖe si wòle be ame naɖe be wòakpɔ ɖeɖe.—Mat. 28:19, 20; 1 Pet. 3:21.

2. Nu ka tae mele be nàvɔ̃ be yeaɖe adzɔgbe na Yehowa o?

2 Togbɔ be nyɔnyrɔxɔxɔ ʋua yayra geɖewo ƒe mɔnukpɔkpɔwo ɖi na ame hã la, edaa agba ɖe ame dzi hã. Le mɔ ka nu? Le wò nyɔnyrɔxɔgbe la, èɖo nya ŋu be ɛ̃, esi wobia wò be, “Ðe nèxɔ Yesu Kristo ƒe tafevɔsaa dzi se hetrɔ dzi me tso wò nu vɔ̃wo me eye nètsɔ ɖokuiwò ɖe adzɔgbe na Yehowa be yeawɔ eƒe lɔlɔ̃nua?” Wò nyɔnyrɔxɔxɔ ɖo kpe edzi be èɖe adzɔgbe na Yehowa. Esia fia be èdo ŋugbe na Yehowa be yealɔ̃e, eye eƒe lɔlɔ̃nu wɔwɔe anɔ vevie na ye wu nu bubu ɖe sia ɖe. Afɔɖeɖe sia nye ŋkubiãnya. Ðe wòle be wòave wò be èɖe afɔ ma? Kura o! Menye  vodadae wònye kura be ame nalɔ̃ faa be Yehowa nafia mɔ ye le agbe me o. Le nyateƒe me la, ame siwo menɔa agbe ɖe Yehowa ƒe nudidiwo nu o la le Satana ƒe dziɖuɖu te. Abosam medi be nàkpɔ ɖeɖe o. Dzidzɔe wòanye nɛ be nàde ye dzi le tsitretsitsi ɖe Yehowa ŋu me, ale be agbe mavɔ ƒe mɔnukpɔkpɔa nato ŋuwò.

3. Aleke Yehowa yra wò le esi nèɖe adzɔgbe nɛ ta?

3 Bu ale si Yehowa yra wò le esi nèɖe adzɔgbe nɛ hexɔ nyɔnyrɔ ta ŋu kpɔ. Esi nètsɔ ɖokuiwò na Yehowa ta la, àte ŋu agblɔ kple kakaɖedzi geɖe wu be: “Yehowa li kplim; nyemavɔ̃ o. Nu kae amegbetɔ ate ŋu awɔm?” (Ps. 118:6) Bubu gã aɖeke megali wu esia be nànɔ Mawu ƒe akpa dzi ahanyae be ekpɔa ŋudzedze ɖe ŋuwò o.

ADZƆGBEÐEÐE DZI WƆWƆ NYE AME ŊUTƆ ƑE AGBA

4, 5. (a) Nu ka tae míate ŋu agblɔ be ame ŋutɔ ƒe agba wònye be wòawɔ ɖe adzɔgbe si wòɖe dzi? (b) Kuxi kawoe dzea ŋgɔ Kristotɔwo katã woɖanye ɖeviwo alo ame tsitsiwo o?

4 Esi nènye Kristotɔ xɔnyɔnyrɔ ta la, ƒomedodo si le wò kple Yehowa dome la mele abe ale si dziwòlawo xea tsife kple dzofe ɖe nuwò la ene o. Ke boŋ, wò ŋutɔe adze agbagba aɖe afɔ siwo ana nàkpɔ ɖeɖe, nenye be dziwòlawo tee nègale gɔ̃ hã. Nu ka tae wòle vevie be nya sia nanɔ susu me na wò? Nu si tae nye be, mía dometɔ aɖeke mate ŋu anya xɔse ƒe dodokpɔ siwo ava mía dzi le etsɔme o. Le kpɔɖeŋu me, ɖewohĩ èxɔ nyɔnyrɔ esime mèɖo wò ƒewuiwo me haɖe o. Gake fifia esi nènye ƒewuivi la, èle seselelãme siwo menyɔna ɖe mewò tsã o la sem le ɖokuiwò me eye èdoa go kuxi yeyewo. Nyɔnuvi ƒewuivi aɖe gblɔ tso nya sia ŋu ale: “Ne womena ɖevi xɔnyɔnyrɔ aɖe dzigbezãɖubolo le suku o la, menye esia tae wòavee be yenye Yehowa Ðasefo o. Gake ne ƒe ʋɛ aɖewo va yi eye gbɔdɔdɔ ƒe dzodzrowo nu va sẽ la, ele be wòaka ɖe edzi bliboe be Yehowa ƒe sewo dzi wɔwɔe nye afɔɖeɖe nyuitɔ kekeake le nɔnɔme ɖe sia ɖe me.”

5 Ke hã, menye ɖeviwo kple sɔhɛwo koe doa go kuxi yeyewo o. Ame siwo tsi hafi xɔ nyɔnyrɔ gɔ̃ hã doa go xɔse ƒe dodokpɔ geɖe siwo womenɔ mɔ kpɔm na o. Dodokpɔ siawo tea ŋu kuna ɖe srɔ̃ɖeɖe, lãmesẽnyawo, alo dɔwɔɖuinyawo ŋu. Le nyateƒe me la, ame sia ame, eɖanye ɖevi alo ame tsitsi o, ado go nɔnɔme siwo abia be wòalé nuteƒewɔwɔ me ɖe asi na Yehowa.—Yak. 1:12-14.

6. (a) Nu ka dzie wòle be nàɖo ŋkui ku ɖe wò adzɔgbeɖeɖea ŋu? (b) Nu kae nàte ŋu asrɔ̃ tso Filipitɔwo 4:11-13 me nyawo me?

6 Nu si akpe ɖe ŋuwò nàwɔ nuteƒe le nɔnɔme ɖe sia ɖe mee nye be nàɖo ŋku edzi be ŋugbe si nèdo na Yehowa la bia be nàwɔ nuteƒe nɛ ɣeawokatãɣi aleke kee nɔnɔmea ɖale o. Esia fia be ègblɔ na xexea katã ƒe Dziɖulagã la be àyi edzi asubɔe ne xɔ̃wòwo kple dziwòlawo dzudzɔ esubɔsubɔ gɔ̃ hã. (Ps. 27:10) Le nɔnɔme ɖe sia ɖe me la, ŋusẽ si hiã be nànɔ agbe ɖe wò adzɔgbeɖeɖea nu la ate ŋu asu asiwò ne èɖo ŋu ɖe Yehowa ŋu be wòakpe ɖe ŋuwò.—Xlẽ Filipitɔwo 4:11-13.

7. Nu kae wòfia be nàtsɔ “vɔvɔ̃ kple dzodzo nyanyanya” awɔ wò ɖeɖekpɔkpɔ ŋuti dɔ la?

7 Yehowa di be nànye ye xɔlɔ̃. Ke hã, xɔlɔ̃wɔwɔ ma me léle ɖe asi kple wò ɖeɖekpɔkpɔa ŋuti dɔ wɔwɔ bia kutrikuku. Filipitɔwo 2:12 gblɔ be: “Miyi edzi miatsɔ vɔvɔ̃ kple dzodzo nyanyanya anɔ miaƒe ɖeɖekpɔkpɔ ŋuti dɔ la wɔm.” Nya mawo fia be ele be nàbu nu si nàwɔ be wò kple Yehowa dome nakpɔtɔ anɔ kplikplikpli eye nàyi edzi awɔ nuteƒe nɛ le nɔnɔme ɖe sia ɖe me la ŋu. Mègaka ɖe ɖokuiwò dzi akpa o. Ame siwo subɔ Mawu ƒe geɖe gɔ̃ hã dometɔ aɖewo va tra. Eya ta, afɔ kawoe nàte ŋu aɖe be nàwɔ wò ɖeɖekpɔkpɔ ŋuti dɔ la?

 BIBLIA SƆSRƆ̃ LE VEVIE

8. Nu kae ɖokuisinusɔsrɔ̃ bia, eye nu ka tae wòle vevie?

8 Be xɔlɔ̃wɔwɔ nanɔ mía kple Yehowa dome la, ehiã be míanɔ to ɖom eyama eye míanɔ nu ƒom nɛ hã. Biblia sɔsrɔ̃ le mía ɖokui si ye nye mɔ vevitɔ si dzi míetona ɖoa to Yehowa. Esia bia be míanɔ Mawu ƒe Nya la kple Biblia-srɔ̃gbalẽwo xlẽm ahanɔ ŋugble dem le wo me nyawo ŋu be míaƒe sidzedze nadzi ɖe edzi. Ne èle esia wɔm la, ɖo ŋku edzi be Biblia sɔsrɔ̃ mele abe agbalẽ me nyawo léle ɖe ta me dzro ko atsɔ adzra ɖo ɖe dodokpɔŋɔŋlɔ ŋu le suku ene o. Nusɔsrɔ̃ si ɖea vi le abe tsaɖiɖi ƒe mɔzɔzɔ si me nàte ŋu ake ɖe Yehowa ƒe amenyenye ƒe akpa siwo mènya tsã o ŋu le ene. Esia akpe ɖe ŋuwò nàte ɖe Mawu ŋu, eye eya hã ate ɖe ŋuwò.—Yak. 4:8.

Ðe dzeɖoɖo ƒe kadodo nyui le wò kple Yehowa domea? (Kpɔ memama 8-11)

9. Dɔwɔnu kawoe kpe ɖe ŋuwò le wò ɖokuisinusɔsrɔ̃ me?

9 Yehowa ƒe habɔbɔa na dɔwɔnu vovovowo mí siwo ate ŋu akpe ɖe ŋuwò le ɖokuisinusɔsrɔ̃ me. Le kpɔɖeŋu me, nu siwo le “Bibliasɔsrɔ̃ Ƒe Dɔdeasiwo” te le jw.org ƒe teƒe si nye “Sɔhɛwo” la ate ŋu akpe ɖe ŋuwò nàkpɔ nufiame siwo le Biblia me ŋutinyawo me. Azɔ hã, “Nu Ka Tututue Nye Biblia Ƒe Nufiafia?” ƒe nusrɔ̃gbalẽvi siwo le jw.org la ate ŋu akpe ɖe ŋuwò nàgaka ɖe wò dzixɔsewo dzi geɖe wu. Nusrɔ̃gbalẽvi siawo ate ŋu akpe ɖe ŋuwò nàsrɔ̃ ale si nàɖe wò dzixɔsewo me na amewo. Àgate ŋu ake ɖe nusɔsrɔ̃ ŋuti aɖaŋuɖoɖo bubuwo ŋu le nyati si nye “Sɔhɛwo Biana Be . . . Aleke Mawɔ Biblia Xexlẽ Navivi Nunye?” si dze le April 2009 ƒe Nyɔ! me la me. Nusɔsrɔ̃ kple ŋugbledede nye nu vevi aɖewo siwo akpe ɖe ŋuwò le wò ɖeɖekpɔkpɔ ŋuti dɔ la wɔwɔ me.—Xlẽ Psalmo 119:105.

GBEDODOÐA LE VEVIE

10. Nu ka tae wòle vevie be Kristotɔ xɔnyɔnyrɔ nanɔ gbe dom ɖa?

10 Biblia sɔsrɔ̃ le mía ɖokui si nye mɔ si dzi míetona ɖoa to Yehowa, eye gbedodoɖa nye mɔ si dzi míetona ƒoa nu nɛ. Mele be Kristotɔ nabu gbedodoɖa abe kɔnu dzro aɖe ko ene o; nenema kee mele be wòabui abe ‘dzɔgbenyuibiabia’ be nu nadze edzi na ame ene o. Ke boŋ gbedodoɖa nye nuƒoƒo kple mía Wɔla la. Yehowa di be nàƒo nu na ye. (Xlẽ Filipitɔwo 4:6.) Ne ètsi dzimaɖi le susu aɖe ta la, nu nyuitɔ si Biblia ɖo aɖaŋu be nàwɔe nye be ‘nàdro wò agba ɖe Yehowa dzi.’ (Ps. 55:22) Èka ɖe edzi be esia wɔwɔ ɖea vi ŋutɔŋutɔa?  Nɔviŋutsu kple nɔvinyɔnu miliɔn geɖewo ate ŋu aka ɖe edzi na wò be esia kpe ɖe yewo ŋu. Ate ŋu akpe ɖe wò hã ŋuwò!

11. Nu ka tae wòle be nàda akpe na Yehowa ɣeawokatãɣi?

11 Ke hã, menye ɣeyiɣi siwo me míehiã kpekpeɖeŋu tso Yehowa gbɔ koe wòle be míado gbe ɖa o. Biblia gblɔ be: “Minye akpedalawo.” (Kol. 3:15) Ɣeaɖewoɣi la, míetsia dzi ɖe míaƒe kuxiwo ŋu ale gbegbe be míedea dzesi yayra gbogbo siwo kpɔm míele la o. Ðe manyo ŋutɔ be nàɖoe be gbe sia gbe la, yeade ŋugble le nu etɔ̃ teti siwo ta wòle be nàda akpe na Yehowa ɖo la ŋu oa? Eyome do gbe ɖa nàda akpe nɛ ɖe yayra mawo ta. Abigail, si nye ƒewuivi aɖe si xɔ nyɔnyrɔ esime wòxɔ ƒe 12 la gblɔ be: “Meka ɖe edzi be Yehowa ye dze be míada akpe na wu ame bubu ɖe sia ɖe le xexea me godoo. Ele be míawɔ mɔnukpɔkpɔ ɖe sia ɖe ŋu dɔ ada akpe nɛ ɖe nu siwo wòna mí ta. Gbe ɖeka mese ame aɖe gblɔ nya nyui aɖe si me nufiame le la ale: Ne ŋu ke etsɔ eye míekpɔe be nu siwo ta míeda akpe na Yehowa ɖo egbe koe susɔ ɖe mía si la, aleke nuwo anɔ na mí?” *

VIÐE SIWO LE NUTEƑEKPƆKPƆ SIWO SUA AME SI ŊU

12, 13. Nu ka tae wòle vevie be nàde ŋugble le ale si wò ŋutɔ nèkpɔ Yehowa ƒe nyuiwɔwɔ teƒe le wò agbe me ŋu?

12 Yehowa kpe ɖe Fia David ŋu wòto nɔnɔme sesẽ geɖewo me. Le nu siwo teƒe wòkpɔ ta la, egblɔ be: “Miɖɔe kpɔ, eye miakpɔe be Yehowa nyo; dzidzɔtɔe nye ame si sinɛ tsona.” (Ps. 34:8) Mawunyakpukpui sia na míekpɔe kɔtɛ be nu si me ame ŋutɔ to la wɔa akpa vevi aɖe. Ne èle Biblia kple míaƒe agbalẽwo xlẽm la, èkpɔa ale si Mawu kpe ɖe eƒe amewo ŋu wowɔ nuteƒe nɛ. Nenema kee nèsea nuteƒekpɔkpɔ siawo tɔgbi ne ède Kristotɔwo ƒe kpekpewo. Gake ne ƒomedodo si le wò kple Yehowa dome va le sesẽm ɖe edzi la, ehiã be nàde dzesi ale si Yehowa le kpekpem ɖe ŋuwòe. Aleke wò ŋutɔ nèkpɔ Yehowa ƒe nyuiwɔwɔ teƒe le wò agbe me?

13 Kristotɔ ɖe sia ɖe ɖɔ Yehowa ƒe nyuiwɔwɔ kpɔ le mɔ tɔxɛ aɖe nu. Yehowa kpe mía dometɔ ɖe sia ɖe be wòate ɖe ye kple ye Vi la ŋu. Yesu gblɔ be: “Ame aɖeke mate ŋu ava gbɔnye o, negbe ɖe Fofo si dɔm ɖa la, hee vɛ.” (Yoh. 6:44) Ðe nèsena le ɖokuiwò me be nya mawo ku ɖe ye hã ye ŋua? Sɔhɛ aɖe ate ŋu agblɔ le ta me be, ‘Yehowa he dzinyelawo va eɖokui gbɔ, eye nye ya ɖeko medze wo yome.’ Gake esi nètsɔ ɖokuiwò ɖe adzɔgbe na Yehowa hexɔ nyɔnyrɔ la, èɖee fia be ƒomedodo tɔxɛ aɖe va le wò kplii dome. Fifia, Yehowa va nya wò vavã. Biblia na míenya be: “Ne ame aɖe lɔ̃ Mawu la, ekema Mawu nya eya amea.” (1 Kor. 8:3) Dze agbagba nàde asixɔxɔ akpa si wɔm nèle le Yehowa ƒe habɔbɔa me ŋu.

14, 15. Aleke gbeƒãɖeɖedɔa ate ŋu akpe ɖe ŋuwò nàdo ŋusẽ wò xɔse?

14 Go bubu si me nàte ŋu akpɔ Yehowa ƒe nyuiwɔwɔ teƒe lee nye ne èkpɔ ale si wòle kpekpem ɖe ŋuwò be nàƒo nu tso wò dzixɔsewo ŋu na amewo. Àte ŋu aʋu wò xɔse me le gbeadzisubɔsubɔdɔa me kple suku siaa. Esesẽna na ɖevi aɖewo be woaɖe gbeƒã na woƒe sukuhatiwo. Anɔ eme be ènya nu si tae esia sesẽna ɖo. Màte ŋu anya ale si woaxɔ nyaae o. Nuƒoƒo na sukuviwo le ha me ya gasesẽna kura wu nuƒoƒo na wò sukuhati ɖeka. Nu kae ate ŋu akpe ɖe ŋuwò le go sia me?

15 Gbã la, bu nu si tae nèka ɖe wò dzixɔsewo dzi la ŋu. Ðe nusrɔ̃gbalẽvi siwo le jw.org la le mia degbe mea? Ne mèka ɖe edzi tututu o la, ekema gbɔ dzi ɖi nàdii nyuie kpɔ. Wotrɔ asi le wo ŋu be woakpe  ɖe ŋuwò nàde ŋugble le nu siwo dzi nèxɔ se, nu siwo tae nèxɔ wo dzi se kple ale si nàɖe wo me na ame bubuwo la ŋu. Ne kakaɖedzi sẽŋu su asiwò eye nèdzra ɖo nyuie do ŋgɔ la, esia aʋã wò nàdi be yeaɖi ɖase tso Yehowa ƒe ŋkɔa ŋu.—Yer. 20:8, 9.

16. Ne èvɔ̃na be yeaƒo nu tso yeƒe dzixɔsewo ŋu la, nu kae ate ŋu akpe ɖe ŋuwò?

16 Ne èdzra ɖo nyuie do ŋgɔ gɔ̃ hã la, ate ŋu adzɔ be nànɔ vɔvɔ̃m be yeaƒo nu tso yeƒe dzixɔsewo ŋu. Nɔvinyɔnu aɖe si xɔ ƒe 18, si xɔ nyɔnyrɔ esime wòxɔ ƒe 13 la gblɔ be, “Menya nu si dzi mexɔ se, gake esesẽna nam ɣeaɖewoɣi be maɖe nye susuwo agblɔ.” Aleke wòwɔna ɖua kuxi sia dzi? Egblɔ be, “Medzea agbagba be maɖo dze gbadzawo ko. Nye sukuhatiwo ƒoa nu tso nu siwo wowɔna la ŋu faa. Ele be nye hã mate ŋu aƒo nu tso tɔnyewo ŋu faa. Eya ta megblɔa nya aɖe ko abe, ‘Nyitsɔ esime menɔ nu fiam amewo tso Biblia me la, . . . ’ Eyome meyia edzi ƒoa nu tso nudzɔdzɔ si ŋu medi be maɖo dze tsoe na wo la ŋu. Togbɔ be nu si ŋu mele dze ɖom tsoe na wo la ŋutɔ meku ɖe Biblia ŋu o hã la, zi geɖe la, wova dina be yewoanya nu si fiam mele amewo tso Biblia me hafi nua dzɔ. Ɣeaɖewoɣi la, esia nana wobiaa Biblia me nyawòm. Zi ale si mele mɔnu sia ŋu dɔ wɔm la, zi nenemae wòva nɔa bɔbɔe wu be maƒo nu tso nye dzixɔsewo ŋu. Eye ɣesiaɣi si mewɔ eŋu dɔ ko la, dzi dzɔam ŋutɔ!”

17. Aleke nɔnɔme si le asiwò ɖe wò dzixɔsewo ŋu ate ŋu akpe ɖe ŋuwò le nuƒoƒo na amewo me?

17 Ne amewo kpɔe be ètsɔ ɖe le eme na yewo eye nèdea bubu yewo ŋu la, anɔ bɔbɔe na woawo hã be woaɖo to wò ahawɔ nu ɖe ŋuwò nyuie. Olivia, si xɔ ƒe 17 eye wòxɔ nyɔnyrɔ hafi ɖo eƒe ƒewuiwo me la gblɔ be: “Tso ɣeaɖeɣi ke la, mevɔ̃na be ne mehe susu yi Biblia dzi le dzeɖoɖo aɖe me la, woabum zazɛ̃nyahelae.” Gake emegbe eƒe nuŋububu va trɔ. Le esi Olivia natsɔ susu aɖo nu siwo vɔ̃m wònɔ ŋu fũu akpa teƒe la, egblɔ boŋ be: “Ðevi geɖe menya naneke tso Yehowa Ðasefowo ŋu o. Míawo koe nye Ðasefo siwo wonya. Eya ta ale si míewɔa nui la akpɔ ŋusẽ ɖe ale si woaxɔ nyaae dzi. Ke ne ŋu kpea mí alo esesẽna na mí be míaƒo nu tso míaƒe dzixɔsewo ŋu, alo míedea vovo ge do kpoe ne míele nu ƒom ɖe? Ekema woasusu be ame siwo míenye la kpea ŋu na mí. Ale si dzi mele mía ƒo o la gɔ̃ hã ate ŋu ana be womawɔ nu ɖe mía ŋu nyuie o. Ke hã, ne míeƒoa nu tso míaƒe dzixɔsewo ŋu faa kakaɖedzitɔe le míaƒe gbe sia gbe dzeɖoɖowo me la, esia ana woade bubu mía ŋu.”

YI EDZI NÀNƆ WÒ ÐEÐEKPƆKPƆ ŊUTI DƆ LA WƆM

18. Nu kae wò ɖeɖekpɔkpɔ ŋuti dɔ la wɔwɔ bia?

18 Abe ale si míekpɔe ene la, wò ɖeɖekpɔkpɔ ŋuti dɔ la wɔwɔ nye agbanɔamedzi si wòle be nàbu ŋkubiãnyae. Esia bia be nànɔ Mawu ƒe Nya la xlẽm ahanɔ ŋugble dem le eŋu, anɔ gbe dom ɖa na Yehowa, eye nànɔ ŋugble dem le nu siwo wòtsɔ yra wòe la ŋu. Nu siawo wɔwɔ ana nàgaka ɖe edzi geɖe wu be Yehowa nye Xɔ̃wò. Eye esia aʋã wò be nàƒo nu tso wò dzixɔsewo ŋu.—Xlẽ Psalmo 73:28.

19. Nu ka tae agbagba siwo dzem nèle be yeakpɔ ɖeɖe la menye dzodzro o?

19 Yesu gblɔ be: “Ne ame aɖe di be yeadze yonyeme la, negbe nu le eɖokui gbɔ, eye wòatsɔ eƒe fuwɔameti la, eye wòadze yonyeme ɖaa.” (Mat. 16:24) Eme kɔ ƒãa be ele be Kristotɔ ɖe sia ɖe nadze Yesu yome, eye esia bia be wòaɖe adzɔgbe axɔ nyɔnyrɔ. Ke hã, esia ʋua mɔnukpɔkpɔ ɖi na ame be Mawu nayrae geɖe fifia, eye le etsɔme la, wòakpɔ agbe mavɔ le xexe yeyea me. Eya ta, susu nyui geɖewo li siwo ta wòle be nàyi edzi anɔ wò ɖeɖekpɔkpɔ ŋuti dɔ la wɔm ɖo!

^ mm. 11 Ne èdi aɖaŋuɖoɖo bubuwo la, kpɔ nyati si nye “Sɔhɛwo Biana Be—Nu Ka Tae Wòle Be Mado Gbe Ða?” kple eƒe dɔwɔgbalẽvia le jw.org.