Dzo kpo yi emenuwo dzi

Dzo kpo yi emenuawo dzi

Ðe Yehowa Ƒe Susu Le Dzɔdzɔenyenye Ŋu Le Asiwòa?

Ðe Yehowa Ƒe Susu Le Dzɔdzɔenyenye Ŋu Le Asiwòa?

“Maɖe gbeƒã Yehowa ƒe ŋkɔ . . . , Mawu nyateƒetɔ, ame si mewɔa nu madzɔmadzɔ gbeɖe o.”—5 MOSE 32:3, 4.

HADZIDZI: 110, 2

1, 2. (a) Nu madzɔmadzɔ kae wowɔ ɖe Nabot kple viaŋutsuwo ŋu? (b) Nɔnɔme nyui eve kawo ŋue míaƒo nu tsoe le nyati sia me?

KPƆ nudzɔdzɔ sia le susu me ɖa. Woda alakpa ɖe ŋutsu aɖe si be ewɔ nu vɔ̃ gã aɖe si dze na ku. Eƒe ƒometɔwo kple xɔlɔ̃wo ƒe nu ku esi wokpɔe be ŋutsu siwo wonya le nutoa me be wonye yakamewo la ƒe aʋatsoɖaseɖiɖi dzie wonɔ te ɖo bu fɔe. Ete ɖe ame siwo lɔ̃ dzɔdzɔenyenye la dzi ŋutɔ esi wokpɔ eteƒe wowu ame maɖifɔ ma kple viaŋutsuwo. Menye nyakpakpae ŋutinya sia nye o. Yehowa subɔla wɔnuteƒe aɖe si ŋkɔe nye Nabot, si nɔ agbe le Israel Fia Ahab ƒe dziɖuɣi la ƒe ŋutinyae.—1 Fia. 21:11-13; 2 Fia. 9:26.

2 Le nyati sia me la, míadzro Nabot kple hamemetsitsi wɔnuteƒe aɖe si nɔ ƒe alafa gbãtɔ me Kristotɔ hamea me, si ɖe afɔ gbegblẽ aɖe la ƒe ŋutinyawo me. Ne míele Biblia me nudzɔdzɔ siawo me dzrom la, míakpɔe be hafi míate ŋu aɖee afia be Yehowa ƒe susu le dzɔdzɔenyenye ŋu le mía si la, ele be míabɔbɔ mía ɖokui. Míakpɔe hã be, ne míekpɔ nu madzɔmadzɔ wɔwɔ teƒe le hamea me eye míelɔ̃ faa be míatsɔ ake la, esia aɖee afia be Yehowa ƒe susu le dzɔdzɔenyenye ŋu le mía si.

 WOTSO AFIA VƆ̃ÐI

3, 4. Ame ka ƒomevie Nabot nye, eye nu ka tae wògbe be yemadzra waingblea na Fia Ahab o?

3 Nabot wɔ nuteƒe na Yehowa le ɣeyiɣi si me Israel-vi akpa gãtɔ nɔ Fia Ahab kple Fiasrɔ̃ Izebel si vɔ̃ɖi ŋutɔ la ƒe kpɔɖeŋu gbegblẽ srɔ̃m. Baal subɔla mawo medea bubu Yehowa ŋu kura o, eye womewɔa eƒe nudidiwo dzi hã o. Ke Nabot ya dea asixɔxɔ ƒomedodo si le eya kple Yehowa dome ŋu wu eya ŋutɔ ƒe agbe gɔ̃ hã.

4 Xlẽ 1 Fiawo 21:1-3. Esi Ahab gblɔ na Nabot be yeaƒle eƒe waingblea alo yeatsɔ waingble bubu si nyo wu aɖo eteƒe nɛ la, Nabot gbe. Nu ka tae? Eɖe eme bubutɔe be: “Mesɔ le Yehowa ŋkume be matsɔ tɔgbuinyewo ƒe domenyinu la ana wò o.” Nu si tae Nabot gbe ɖoe nye be, Yehowa de se na Israel-viwo be mele be woadzra ƒome ƒe domenyinu ɖikaa o. (3 Mose 25:23; 4 Mose 36:7) Eme kɔ ƒãa be Yehowa ƒe susu le nuwo ŋu nɔ Nabot si.

5. Akpa kae Izebel wɔ le Nabot wuwu me?

5 Nublanuitɔe la, esi Nabot gbe be yemadzra anyigbaa o ta la, Fia Ahab kple srɔ̃a wɔ nu vlo aɖewo si ɖe fu ŋutɔ. Esi Izebel di be anyigbaa nasu ye srɔ̃ si ta la, ena woda alakpa ɖe Nabot si, si wɔe be wowu Nabot kple viaŋutsuwo. Nu kae Yehowa awɔ tso nu madzɔmadzɔ dziŋɔ sia ŋu?

YEHOWA DRƆ̃A ƲƆNU DZƆDZƆE

6, 7. Aleke Yehowa ɖee fia be yelɔ̃a nya dzɔdzɔe, eye nu ka tae esia anya fa akɔ na Nabot ƒe ƒometɔwo kple exɔlɔ̃wo?

6 Yehowa ɖe afɔ kaba esi wòdɔ Eliya ɖe Ahab gbɔ be wòaƒo nu nɛ. Eliya bu fɔ Ahab be enye amewula kple fiafi. Aleke Yehowa drɔ̃ ʋɔnu Ahab? Nu si dzɔ ɖe Nabot kple viaŋutsuwo dzi la kee adzɔ ɖe Ahab kple srɔ̃a kpakple viaŋutsuwo dzi.—1 Fia. 21:17-25.

7 Togbɔ be Nabot ƒe ƒometɔwo kple exɔlɔ̃wo xa nu ɖe ale si Ahab wu Nabot kple viawoe ŋuti hã la, ɖikeke mele eme o be wokpɔ akɔfafa esi wova nyae be nu madzɔmadzɔ si nɔ edzi yim la nɔ nyanya na Yehowa, eye etso ɖe eŋu kaba. Ke hã, nane si womanɔ mɔ kpɔm na o, si ate ŋu ado woƒe ɖokuibɔbɔ kple ŋuɖoɖo ɖe Yehowa ŋu kpɔ la va dzɔ.

8. Aleke Ahab wɔ nui esi wogblɔ Yehowa ƒe ʋɔnudrɔ̃gbedeasia nɛ, eye nu kae do tso eme?

8 Esi Ahab se Yehowa ƒe ʋɔnudrɔ̃nyawo la, “edze eƒe awuwo, ta akpanya, eye wòtsi nu dɔ, etsi akpanya me dɔ, eye wònɔ yiyim kpookpookpoo.” Ahab bɔbɔ eɖokui! Eya ta nu kae Yehowa wɔ? Egblɔ na Eliya be: “Esi wòbɔbɔ eɖokui le ŋkunyeme ta la, nyemahe vɔ̃ la vɛ le eŋɔli o. Mahe vɔ̃ la ava eƒe aƒe la dzi le via ŋɔli.” (1 Fia. 21:27-29; 2 Fia. 10:10, 11, 17) Yehowa, ame si “dzroa dziwo me kpɔna” la, kpɔ nublanui na Ahab va se ɖe afi aɖe.—Lod. 17:3.

ÐOKUIBƆBƆ KPƆA AME TA

9. Nu ka tae ɖokuibɔbɔ akpɔ Nabot ƒe ƒometɔwo kple exɔlɔ̃wo ta?

9 Aleke ame siwo nya nu tso Ahab ƒe nu vlo wɔwɔa ŋu ase le wo ɖokui me ku ɖe Yehowa ƒe nyametsotsoa ŋu? Ale si wòdze abe Yehowa kpɔ eme na Ahab la anya do Nabot ƒe ƒometɔwo kple exɔlɔ̃wo ƒe xɔse kpɔ. Ekema anɔ eme be ɖokuibɔbɔ kpɔ wo ta, si wɔe be woyi edzi subɔ Yehowa Mawu nuteƒewɔwɔtɔe le esi woka ɖe edzi be mate ŋu awɔ nu madzɔmadzɔ gbeɖe o ta. (Xlẽ 5 Mose 32:3, 4.) Ne Yehowa va fɔ ame dzɔdzɔewo ɖe tsitre la, Nabot kple viaŋutsuwo kpakple woƒe ƒomewo akpɔe be Yehowa tso afia dzɔdzɔe na yewo. (Hiob 14:14, 15; Yoh. 5: 28, 29) Gawu la, ame si bɔbɔ eɖokui la ɖoa ŋku edzi be “Mawu vavã la le dɔwɔwɔ ɖe sia ɖe ƒomevi he ge ava ʋɔnui, esiwo le ɣaɣla hã, eɖanye nyui alo vɔ̃ o.” (Nyagb. 12:14) Ɛ̃, ne Yehowa le ʋɔnu drɔ̃m la, ebua nu siwo mele nyanya me na mí o hã ŋu hafi tsoa afia. Eya ta, ɖokuibɔbɔ kpɔa ame siwo ŋu wowɔ nu madzɔmadzɔ ɖo la ta ale be woƒe xɔse nagagbɔdzɔ o.

10, 11. (a) Nɔnɔme kawoe ate ŋu ana wòahiã be míatrɔ míaƒe susu le nu si míebuna nu dzɔdzɔe la ŋu? (b) Mɔ kawo nue ɖokuibɔbɔ akpɔ mía ta le?

10 Aleke nàwɔ nui ne mèse hamemetsitsiwo ƒe nyametsotso aɖe gɔme o alo wò susu mewɔ ɖeka kple wo tɔ le nyaa ŋu o? Le kpɔɖeŋu me, nu kae nàwɔ ne woxɔ subɔsubɔmɔnukpɔkpɔ nyui aɖe le wò ŋutɔ loo alo wò ame vevi aɖe si? Ke ne woɖe srɔ̃wò alo viwò alo xɔ̃wò vevi aɖe le haa me evɔ wò susu mewɔ ɖeka kple nyametsotsoa o hã ɖe? Ke ne èse le ɖokuiwò me be wokpɔ nublanui na nu gbegblẽ wɔla aɖe madzemadzee hã ɖe? Nu siawo ate ŋu ado ale si gbegbe míexɔ Yehowa dzi se kple ale si míeka ɖe eƒe hakplɔɖoɖowo dzi la akpɔ. Aleke ɖokuibɔbɔ akpɔ tawò le nɔnɔme siawo tɔgbi me? Bu mɔ eve aɖewo ŋu kpɔ.

Aleke nàwɔ nui ne wò susu mewɔ ɖeka kple nyametsotso aɖe si hamemetsitsiwo ɖe gbeƒãe o? (Kpɔ memama 10, 11)

11 Gbã, ɖokuibɔbɔ ana míalɔ̃ ɖe edzi be míenya nu sia nu ku ɖe nya bliboa  ŋu o. Aleke kee míeɖanya nu tso nɔnɔmea ŋui o, Yehowa koe tea ŋu nyana nu si le ame ƒe dzi me. (1 Sam. 16:7) Ŋkuɖoɖo nyateƒe matrɔmatrɔ sia dzi ana míabɔbɔ mía ɖokui, anya afi si míaƒe ŋutete se ɖo, eye míaɖɔ míaƒe susu ɖo le nyaa ŋu. Evelia, ɖokuibɔbɔ akpe ɖe mía ŋu míayi edzi anye toɖolawo eye míagbɔ dzi ɖi anɔ Yehowa sinu kpɔm be wòaɖɔ nu madzɔmadzɔ ɖe sia ɖe ɖo. Esia wɔ ɖeka kple nya si nunyalaa gblɔ be: “Eme anyo na ame siwo vɔ̃a Mawu vavã la godoo . . . , ke eme manyo na ame vɔ̃ɖi ya o, eye madidi eƒe agbenɔƒe” hã ɖe edzi o. (Nyagb. 8:12, 13) Ðikeke mele eme o be ɖokuibɔbɔ aɖe vi na míawo ŋutɔwo kple ame siwo katã nyaa ka.—Xlẽ 1 Petro 5:5.

ALAKPANUWƆWƆ AÐE SI YI EDZI LE HAMEA ME

12. Ŋutinya ka mee míadzro fifia, eye nu ka tae?

12 Le ƒe alafa gbãtɔ me la, nɔnɔme aɖe do mo ɖa le Kristo hame si le Antiokia si le Siria la me si do nɔviawo ƒe ɖokuibɔbɔ kpɔ, eye wòna wòdze ƒãa nenye be wolɔ̃a tsɔtsɔke. Na míadzro nudzɔdzɔ ma me ne míakpɔ ale si wòakpe ɖe mía ŋu míadzro mía ɖokui me ku ɖe ale si míewɔa nui ne eva hiã be míatsɔ ake ŋu. Eye ana ale si tsɔtsɔke do ƒome kple ale si Yehowa bua dzɔdzɔenyenyee me hã nakɔ na mí.

13, 14. Subɔsubɔmɔnukpɔkpɔ kae su Petro si, eye aleke wòwɔ nu dzinɔameƒotɔe?

13 Apostolo Petro nye hamemetsitsi si wonya nyuie le Kristo hamea me. Enɔ Yesu ŋu kplikplikpli eye wòtsɔ agbanɔamedzi kpekpewo. (Mat. 16:19) Le kpɔɖeŋu me, le ƒe 36 K.Ŋ. la, mɔnukpɔkpɔ su Petro si wògblɔ nya nyuia na Kornelio kple eƒe aƒemetɔwo. Esia ɖe dzesi, elabena Dukɔwo me tɔ aʋamatsomatsotɔe Kornelio nye. Esi Kornelio kple eƒe aƒemetɔwo xɔ gbɔgbɔ kɔkɔe la, Petro ʋu eme be: “Ðe ame aɖe ate ŋu axe mɔ be woaganyrɔ ame siawo ɖe tsi me, esi woxɔ gbɔgbɔ kɔkɔe la abe míawo ke ene oa?”—Dɔw. 10:47.

14 Le ƒe 49 K.Ŋ. la, apostoloawo kple hamemetsitsi siwo le Yerusalem la kpe ta be yewoakpɔe ɖa nenye be ele be woabia tso Dukɔwo me tɔ siwo va zu Kristotɔwo la si be woatso aʋa hã. Le kpekpe ma me la, Petro ƒo nu kple dzideƒo eye wòɖo ŋku edzi na nɔviawo be ƒe aɖewo do ŋgɔ la, Dukɔwo me tɔwo xɔ gbɔgbɔ kɔkɔe ƒe nunana faa la. Nudzɔdzɔ ma si teƒe Petro kpɔ, si ŋu wòƒo nu tsoe la kpe ɖe ƒe alafa gbãtɔ me dɔdzikpɔhaa ŋu wokpɔ ta na nya ma. (Dɔw. 15:6-11, 13, 14, 28, 29) Anɔ eme be Yudatɔwo kple Dukɔwo me tɔ siwo zu Kristotɔwo siaa kpɔ ŋudzedze ɖe ale si Petro ƒo nu tso nya ma ŋu dzinɔameƒotɔe ŋu. Masesẽ be ame naka ɖe ame sia si tsi le gbɔgbɔ me alea la dzi kura o.—Heb. 13:7.

15. Vodada kae Petro wɔ esime wònɔ Antiokia si le Siria? (Kpɔ nɔnɔmetata si le nyati sia ƒe gɔmedzedze.)

15 Ɣeyiɣi kpui aɖe le kpekpe ma si wowɔ le ƒe 49 K.Ŋ. me megbe la, Petro gayi Antiokia si le Siria. Le afi ma la, ede ha kple nɔvi siwo nye Dukɔwo me tɔwo la faa. Ðikeke mele eme o be, sidzedze kple nuteƒekpɔkpɔ si su Petro si la ɖe vi na wo. Eya ta, bu ale si wòawɔ nuku na wo eye wòate ɖe wo dzii esi gbe ɖeka kple eƒe zãdodo ko Petro dzudzɔ nuɖuɖu kpli wo la ŋu kpɔ. Petro ƒe nuwɔnaa kpɔ ŋusẽ gbegblẽ ɖe hamea me tɔ bubu siwo nye Yudatɔwo, siwo dome Barnaba hã nɔ dzi. Nu kae na Kristotɔ hamemetsitsi kpɔnuteƒe ma da vo gã ma si ate ŋu ade mama hamea me hafi la? Vevietɔ  wu la, nu kae míate ŋu asrɔ̃ tso Petro ƒe vodadaa me si akpe ɖe mía ŋu míanya ale si míawɔ nui ne hamemetsitsi aɖe gblɔ nya aɖe alo wɔ nane si te ɖe mía dzi?

16. Aleke woɖɔ Petro ɖoe, eye biabia kawoe esia fɔ ɖe te?

16 Xlẽ Galatiatɔwo 2:11-14. Amegbetɔvɔvɔ̃ ƒe mɔ̃ lae ɖe Petro. (Lod. 29:25) Togbɔ be Petro nya Yehowa ƒe susu le nyaa ŋu nyuie hã la, evɔ̃ na nu si Yudatɔ aʋatsotsotɔ siwo tso Yerusalem hamea me va la asusu. Apostolo Paulo, si hã nɔ kpekpea me le Yerusalem le ƒe 49 K.Ŋ. la, ka mo na Petro le Antiokia heƒo nu tsi tre ɖe eƒe alakpanuwɔwɔa ŋu. (Dɔw. 15:12; Gal. 2:13) Aleke Dukɔwo me tɔ siwo zu Kristotɔwo, siwo dzi Petro ƒe nu madzɔmadzɔ wɔwɔa te ɖo la awɔ nui? Ðe woaɖe mɔ nu si dzɔ la nazu nukikli na woa? Ðe subɔsubɔmɔnukpɔkpɔwo age le Petro si le eƒe vodadaa ta?

TSƆ KE FAA

17. Aleke Yehowa ƒe tsɔtsɔke ɖe vi na Petro?

17 Edze ƒãa be, Petro megbe Paul ƒe mokanamea o, ke boŋ ebɔbɔ eɖokui woɖɔe ɖo. Ŋɔŋlɔawo megblɔ naneke si fia be mɔnukpɔkpɔwo ge le esi o. Le ɣeyiɣi aɖe megbe gɔ̃ hã la, Mawu ƒe gbɔgbɔ ʋãe wòŋlɔ agbalẽ eve siwo va nye Biblia ƒe akpa aɖe. Eɖe dzesi ŋutɔ be le agbalẽ evelia si Petro ŋlɔ me la, eyɔ Paulo be “mía nɔvi lɔlɔ̃tɔ.” (2 Pet. 3:15) Togbɔ be afɔ gbegblẽ si Petro ɖe la ate ɖe Dukɔwo me tɔ siwo nɔ hamea me dzi hã la, Yesu, si nye hamea ƒe ta la, yi edzi nɔ ezãm. (Ef. 1:22) Esia ana mɔnukpɔkpɔ hamea me tɔwo be woasrɔ̃ Yesu kple Fofoa ƒe kpɔɖeŋu ahatsɔ Petro ƒe vodadaa akee. Anɔ eme be wo dometɔ aɖeke meɖe mɔ ame madeblibo sia ƒe nuwɔna zu nukikli nɛ o.

18. Nɔnɔme kawoe abia be míaɖee afia be Yehowa ƒe susu le dzɔdzɔenyenye ŋu le mía si?

18 Abe ale si wònɔ le ƒe alafa gbãtɔ me ene la, hamemetsitsi deblibo aɖeke mele Kristo hamea me egbea o, “elabena mí katã míedaa vo zi geɖe.” (Yak. 3:2) Míelɔ̃na ɖe nya sia dzi bɔbɔe, gake afi si wòva sesẽna le ye nye ne nɔvi aɖe ƒe vodada gblẽ nu le míawo ŋutɔwo ŋu. Le go sia me la, ɖe míana Yehowa ƒe susu le dzɔdzɔenyenye ŋu nakplɔ mía? Le kpɔɖeŋu me, aleke nàwɔ nui ne edze le hamemetsitsi aɖe ƒe nuƒoƒo me be ele susu manyomanyowo bum ɖe ame ƒomevi aɖewo ŋu? Ne hamemetsitsi aɖe mebu nuwo ŋu nyuie o, si wɔe be wògblɔ nya aɖe si ve wò la, ɖe nàna esia nazu nukikli na wòa? Le esi nàtsɔ dzitsitsi aƒo nya ta be nɔviŋutsua megadze anye hamemetsitsi o teƒe la, ɖe nàgbɔ dzi ɖi akpɔ Yesu, si nye hamea ƒe ta la sinua? Le esi nàtsɔ susu aɖo nɔviŋutsua ƒe vodadaa ŋu teƒe la, ɖe nàna wò susu nanɔ ale si wòtsɔ ƒe geɖe subɔ Yehowa nuteƒewɔwɔtɔe boŋ ŋua? Ne nɔviŋutsu aɖe si dze agɔ le dziwò la gakpɔtɔ nye hamemetsitsi alo wogana subɔsubɔmɔnukpɔkpɔ bubuwoe la, ɖe nàkpɔ dzidzɔ kpliia? Ale si nàlɔ̃ faa atsɔ ake aɖee afia be Yehowa ƒe susu le dzɔdzɔenyenye ŋu le asiwò.—Xlẽ Mateo 6:14, 15.

19. Nu kae wòle be míaɖo kplikpaa be míawɔ?

19 Ame siwo lɔ̃a dzɔdzɔenyenye la le mɔ kpɔm na gbe si gbe Yehowa ava ɖe nu madzɔmadzɔ wɔwɔ siwo katã teƒe kpɔm amegbetɔwo le le Satana kple eƒe nuɖoanyi vɔ̃ɖia ta la ɖa keŋkeŋ. (Yes. 65:17) Gake hafi ɣemaɣi naɖo la, neva eme be mí katã míaɖoe kplikpaa be míaɖee afia be Yehowa ƒe susu le dzɔdzɔenyenye ŋu le mía si. Míawɔ esia ne míelɔ̃na ɖe edzi be menye nu sia nue míenya o eye míetsɔna kea ame siwo dze agɔ le mía dzi.