“Mianye ame siwo to xɔse kple dzigbɔɖi me nyi ŋugbedodowo dome la srɔ̃lawo.”—HEBRITƆWO 6:12.

HADZIDZI: 86, 54

1, 2. Nyametsotso sesẽ kae dze ŋgɔ Yefta kple vianyɔnua?

ÐETUGBUI aɖee nye ema ƒu du yina atuu wɔ ge na fofoa. Dzi le edzɔm ŋutɔ be ye fofo trɔ gbɔ tso aʋagbedzi dedie. Esi fofoa ɖu aʋa gã aɖe dzi tae wòle ha dzim le ɣe ɖum kple dzidzɔ ɖo. Gake nu si fofoa wɔ esi wòva kpee kple nya si wògblɔ la wɔ nuku nɛ ŋutɔ. Fofoa dze eƒe awu eye wògblɔ kple nuxaxa be: “Ao, vinye! Ègbã dzi nam.” Egblɔ na via be yedo ŋugbe na Yehowa, eye esia fia be maɖe srɔ̃ alo adzi vi le eƒe agbemeŋkekewo katã me o. Gake ɖetugbuia ɖo eŋu na fofoa enumake be newɔ ɖe ŋugbe si wòdo na Yehowa dzi. Nya si wògblɔ na fofoa ɖee fia be, eka ɖe edzi bliboe be nu sia nu si Yehowa bia tso ye si la nyo. (Ʋɔnudrɔ̃lawo 11:34-37) Esi fofoa kpɔe be xɔse sẽŋu le ye via si la, edzɔ dzi nɛ ŋutɔ elabe enyae be ale si wòlɔ̃ faa be yeatsɔ ye ɖokui ana la ado dzidzɔ na Yehowa.

 2 Yefta kple vianyɔnua ka ɖe Yehowa kple ale si wòwɔa nui dzi bliboe. Wowɔ nuteƒe togbɔ be menɔ bɔbɔe na wo o hã. Wodi be yewoƒe nu nadze Yehowa ŋu, eye esia tae wolɔ̃ be yewoatsɔ nu sia nu asa vɔe ɖo.

3. Nu ka tae Yefta kple vianyɔnua ƒe kpɔɖeŋu ate ŋu aɖe vi na mí egbea?

3 Menɔa bɔbɔe ɣesiaɣi be míawɔ nuteƒe na Yehowa o. Ele be ‘míaʋli sesĩe alé xɔse me ɖe asi.’ (Yuda 3) Be míate ŋu awɔ esia la, mina míadzro ale si Yefta kple via do dzi le nɔnɔme sesẽwo me la me. Nu kae kpe ɖe wo ŋu wowɔ nuteƒe na Yehowa?

WƆ NUTEƑE NA YEHOWA LE XEXE MAWƆNUTEƑE SIA ME

4, 5. (a) Se kae Yehowa de na Israel-viwo esi woɖo Ŋugbedodonyigbaa dzi? (b) Abe ale si wòdze le Psalmo 106 ene la, nu kae dzɔ ɖe Israel-viwo dzi esi wogbe toɖoɖo ta?

4 Israel-viwo mewɔ nuteƒe na Yehowa o, eye Yefta kple via meŋlɔ dukɔa ƒe nuwɔnawo me tsonuwo be gbeɖe o. Anɔ ƒe 300 do ŋgɔ la, Yehowa de se na Israel-viwo be woatsrɔ̃ dukɔ siwo subɔa alakpamawuwo le Ŋugbedodonyigbaa dzi la katã ɖa, gake wosẽ to. (5 Mose 7:1-4) Israel-vi geɖewo va srɔ̃ Kanaantɔ siwo subɔa alakpamawuwo henɔa agbe ƒaƒã la ƒe nuwɔnawo.—Xlẽ Psalmo 106:34-39.

5 Israel-viwo ƒe tomaɖomaɖo wɔe be Yehowa mekpɔ wo ta tso woƒe futɔwo si me o. (Ʋɔnudrɔ̃lawo 2:1-3, 11-15; Psalmo 106:40-43) Manɔ bɔbɔe na ƒome siwo lɔ̃ Yehowa la be woawɔ nuteƒe nɛ le ɣeyiɣi sesẽ mawo me kura o. Ke hã, Biblia gblɔ be ame aɖewo, abe Yefta kple vianyɔnua, Elkana, Hana kple Samuel ene, wɔ nuteƒe. Woɖoe kplikpaa be yewoawɔ nu si ado dzidzɔ na Yehowa.—1 Samuel 1:20-28; 2:26.

6. Nuwɔna gbegblẽ kawoe xɔ aƒe ɖe xexea me egbea, eye nu kae wòle be míawɔ?

6 Egbea amewo ƒe nuŋububu kple nuwɔnawo le abe Kanaantɔwo tɔ ene. Woƒo wo ɖokuiwo ɖe gbɔdɔdɔ manɔsenu, gadidi kple ŋutasẽnuwɔwɔ me vĩi. Gake Yehowa de se siwo me kɔ la na mí. Edi be yeakpɔ mía ta tso nuwɔna gbegblẽwo me abe ale si wòɖoe be yeakpɔ Israel-viwo ta ene. Nu kae míate ŋu asrɔ̃ tso Israel-viwo ƒe vodadawo me? (1 Korintotɔwo 10:6-11) Ele be míatsri xexea ƒe nuŋububu gbegblẽwo keŋkeŋ. (Romatɔwo 12:2) Ðe míadze agbagba awɔ esia?

YEFTA WƆ NUTEƑE TOGBƆ BE NUWO MEYI NYUIE NƐ O HÃ

7. (a) Nu kae Yefta nɔviwo kple edetɔwo wɔ ɖe eŋu? (b) Aleke Yefta wɔ nui?

7 Le Yefta ƒe ŋkekeawo me la, Israel-viwo gbe toɖoɖo Yehowa, eya ta eɖe mɔ Filistitɔwo kple Amonitɔwo te wo ɖe anyi. (Ʋɔnudrɔ̃lawo 10:7, 8) Gake menye dukɔ mawo gbɔ koe Yefta ƒe kuxiwo tso o, ke etso eya ŋutɔ nɔviawo kple Israel ƒe ametsitsiwo hã gbɔ. Le ŋuʋaʋã ta la, Yefta nɔviwo lé fui henyae ɖa le fofoa ƒe anyigba dzi. (Ʋɔnudrɔ̃lawo 11:1-3) Gake Yefta ya melé fu wo le ŋutasẽnu si wowɔ ɖe  eŋu ta o. Aleke míewɔ nya? Esi dumemetsitsiawo ɖe kuku nɛ emegbe be wòava xɔ na yewo la, elɔ̃ ɖe edzi enumake. (Ʋɔnudrɔ̃lawo 11:4-11) Nu kae ʋã Yefta wòwɔ esia?

8, 9. (a) Aleke mɔfiame siwo le Mose ƒe Sea me kpe ɖe Yefta ŋui? (b) Nu kae nɔ vevie na Yefta?

8 Yefta nye aʋakalẽtɔ aɖe si nya Israel-viwo ƒe ŋutinya kple Mose ƒe Sea nyuie. Ale si Yehowa Mawu wɔ nu kple Eƒe amewo na Yefta kpɔ eƒe susu le nyui kple vɔ̃ ŋu dze sii. (Ʋɔnudrɔ̃lawo 11:12-27) Yefta zã sidzedze ma ɣesiaɣi si wòatso nya me. Enya nyuie be Yehowa Mawu medi be yeƒe amewo nalé dziku ɖi alo awɔ wɔɖenui o, ke boŋ woalɔ̃ wo nɔewo. Gakpe ɖe eŋu la, Sea na wòsrɔ̃ ale si wòawɔ nu ɖe ehaviwo kple ame siwo lé fui gɔ̃ hã ŋu.—Xlẽ 2 Mose 23:5; 3 Mose 19:17, 18.

9 Anɔ eme be Yefta srɔ̃ nu tso Yosef ƒe kpɔɖeŋu hã me. Anya ɖo ŋku ale si Yosef kpɔ nublanui na nɔviawo togbɔ be wolé fui hã dzi. (1 Mose 37:4; 45:4, 5) Kpɔɖeŋu sia ŋu bubu kpe ɖe Yefta ŋu wòwɔ nu si dze Yehowa ŋu. Nu si Yefta nɔviwo wɔ la gbã dzi nɛ ŋutɔ. Gake Yehowa ƒe ŋkɔa kple eƒe amewo ta ʋiʋli nɔ vevie na Yefta wu eya ŋutɔ ƒe seselelãmewo. (Ʋɔnudrɔ̃lawo 11:9) Eɖoe be yeawɔ nuteƒe na Yehowa nu ka kee ɖadzɔ o. Esia na Yehowa yra eya kple Israel dukɔ bliboa.—Hebritɔwo 11:32, 33.

Mele be míana amewo ƒe nuwɔna nana míadzudzɔ Yehowa subɔsubɔ o

10. Aleke Mawu ƒe mɔfiamewo ate ŋu akpe ɖe mía ŋu míawɔ nu abe Kristotɔ akuakuawo ene?

10 Nu kae míate ŋu asrɔ̃ tso Yefta gbɔ? Nu kae míawɔ ne mía nɔvi Kristotɔwo wɔ nu wòve mí, alo ne ewɔ na mí be womewɔ nu ɖe mía ŋu nyuie o? Mele be míana esia nana míadzudzɔ Yehowa subɔsubɔ o. Mègadzudzɔ Kristotɔwo ƒe kpekpewo dede alo hadede kple nɔviwo o. Mina míasrɔ̃ Yefta ƒe kpɔɖeŋua aɖo to Yehowa. Esia ana míado dzi le nɔnɔme sesẽwo me ale be míawo hã míaɖo kpɔɖeŋu nyui ɖi.—Romatɔwo 12:20, 21; Kolosetɔwo 3:13.

ÐOKUITSƆTSƆSAVƆ ÐENƐ FIANA BE XƆSE LE MÍA SI

11, 12. Adzɔgbe kae Yefta ɖe na Yehowa, eye nu kae esia bia tso esi?

11 Yefta nya be yemate ŋu aɖe Israel tso Amonitɔwo si me Mawu ƒe kpekpeɖeŋu manɔmee o. Edo ŋugbe na Yehowa be ne ena yeɖu aʋa dzi la, yeatsɔ ame gbãtɔ si ado tso yeƒe aƒe me ava kpe ye la anae “abe numevɔsa ene.” (Ʋɔnudrɔ̃lawo 11:30, 31) Nu kae nya ma fia?

12 Yehowa de se be woagatɔ dzo amegbetɔ atsɔ asa vɔe o, eya ta míenya be Yefta mawɔ esia o. (5 Mose 18:9, 10) Le Mose ƒe Sea me la, numevɔsa  nye nunana tɔxɛ si wotsɔ ke Yehowa keŋkeŋ. Eya ta nu si le susu me na Yefta ye nye be yeatsɔ ame gbãtɔ si ado go ava kpe ye la ana Yehowa wòasubɔe le avɔgbadɔa me le eƒe agbemeŋkekewo katã me. Yehowa wɔ nu si Yefta bia la nɛ hena wòɖu aʋa dzi. (Ʋɔnudrɔ̃lawo 11:32, 33) Gake ame kae Yefta atsɔ ana Yehowa?

13, 14. Nu kae Yefta ƒe nya si dze le Ʋɔnudrɔ̃lawo 11:35 ɖe fia tso eƒe xɔse ŋu?

13 Wò ya gakpɔ nudzɔdzɔ si ŋu míeƒo nu tsoe le nyati sia ƒe gɔmedzedze ɖa le susu me ko. Esi Yefta trɔ gbɔ tso aʋagbedzi la, vianyɔnu ɖekɛ si gbɔ melɔ̃a nu le o lae do va kpee! Ðe Yefta awɔ eƒe ŋugbedodoa dzia? Ðe wòatsɔ vianyɔnu ɖekɛ la ana Yehowa be wòasubɔe le avɔgbadɔa me le eƒe agbe me katã?

14 Le nya sia hã me la, mɔfiame siwo le Mawu ƒe Sea me kpe ɖe Yefta ŋu wòwɔ nuteƒe. Ðewohĩ eɖo ŋku 2 Mose 23:19 me nyawo dzi, afi si gblɔ be Mawu ƒe amewo nalɔ̃ faa atsɔ woƒe nu nyuitɔwo ana Yehowa. Sea gblɔ hã be ne ame aɖe ɖe adzɔgbe alo ka atam na Yehowa la, “megada eƒe nya la dzi o. Newɔ atam sia atam si wòka la dzi.” (4 Mose 30:2) Abe nuteƒewɔla Hana si anya nɔ agbe le Yefta ƒe ŋkekeawo me ene la, ele be Yefta nawɔ ɖe ŋugbe si wòdo la dzi, togbɔ be enya be esia manɔ bɔbɔe na ye kple ye via o hã. Ne via yi ɖasubɔ le avɔgbadɔa me la, madzi vi gbeɖe o. Esia fia be vi aɖeke manɔ anyi si alé Yefta ƒe ŋkɔ ɖe te alo anyi eƒe nuwo dome o. (Ʋɔnudrɔ̃lawo 11:34) Ke hã Yefta gblɔ be: “Meɖe adzɔgbe na Yehowa, eye nyemagate ŋu atrɔe o.” (Ʋɔnudrɔ̃lawo 11:35) Nu gã si Yefta  tsɔ sa vɔe la dze Yehowa ŋu eye wòyrae ɖe eta. Ne wòe nye Yefta la, ɖe nàwɔ nuteƒe abe ale si wòwɔe enea?

15. Adzɔgbe kae míawo hã míeɖe na Yehowa, eye aleke míawɔ ɖe edzii?

15 Esi míeɖe adzɔgbe na Yehowa la, míedo ŋugbe nɛ be míawɔ eƒe lɔlɔ̃nu le nu sia nu me. Míenya be ŋugbedodo sia dzi wɔwɔ manɔ bɔbɔe ɣesiaɣi o. Ke ne wode dɔ aɖe si medzɔ dzi na mí o asi na mí la, nu kae míawɔ? ‘Ʋutɔtrɔ ŋue wotrɔa ɣeɖuɖu ɖo.’ Eya ta ne míeɖu dziku dzi helɔ̃ faa wɔ ɖe Mawu ƒe mɔfiafia dzi la, aɖee afia be míewɔna ɖe ŋugbe si míedo la dzi. Ate ŋu asesẽ na mí be míatsɔ nanewo asa vɔe, gake ne míewɔe la, Yehowa adudu eƒe yayrawo akɔ ɖe mía dzi godoo. (Malaki 3:10) Ke Yefta vinyɔnua ya ɖe, aleke wòwɔ nu ɖe ŋugbe si fofoa do ŋui?

Aleke míate ŋu aɖe xɔse si le abe Yefta kple vianyɔnua tɔ ene afia? (Kpɔ memama 16, 17)

16. Aleke Yefta vinyɔnua wɔ nu ɖe ŋugbe si fofoa do ŋui? (Kpɔ nɔnɔmetata si le nyati sia ƒe gɔmedzedze.)

16 Adzɔgbe si Yefta ɖe la to vovo na Hana tɔ. Hana ɖe adzɔgbe be yeana ye vi Samuel nazu Naziritɔ asubɔ le avɔgbadɔa me. (1 Samuel 1:11) Naziritɔwo ɖea srɔ̃ dzia vi. Gake Yefta ya tsɔ vianyɔnua na abe “numevɔsa” blibo ene, eya ta mɔnukpɔkpɔ masu esi wòaɖe srɔ̃ adzi vi o. (Ʋɔnudrɔ̃lawo 11:37-40) Wò ya bu eŋu kpɔ ko! Ðetugbui sia fofo zu kplɔla kple ame ŋkuta le Israel. Eya ta mɔnukpɔkpɔ asu esi be wòaɖe ŋutsu gbati aɖe hafi. Gake fifia eyae nye ema yina dɔlanyɔnu bɔbɔɖeanyi zu ge le avɔgbadɔa me. Nu kae ɖetugbui sia awɔ? Eɖee fia be Yehowa subɔsubɔ ye nye nu vevitɔ na ye esi wòɖo eŋu na fofoa be: “Wɔm abe ale si nèdo ŋugbee ene.” (Ʋɔnudrɔ̃lawo 11:36) Enye nyɔnu ɖe sia ɖe ƒe didi be yeaɖe srɔ̃ adzi vi, gake etsɔ esiawo sa vɔe ɖe Yehowa subɔsubɔ ta. Aleke míate ŋu asrɔ̃ eƒe ɖokuitsɔtsɔsavɔ ƒe nɔnɔme siae?

Enye nyɔnu ɖe sia ɖe ƒe didi be yeaɖe srɔ̃ adzi vi, gake Yefta vinyɔnua tsɔ esiawo sa vɔe ɖe Yehowa subɔsubɔ ta

17. (a) Aleke míate ŋu aɖe xɔse si le abe Yefta kple vianyɔnua tɔ ene afia? (b) Aleke Hebritɔwo 6:10-12 ate ŋu ade dzi ƒo na wò nàtsɔ nuwo asa vɔe?

 17 Ðekakpui kple ɖetugbui Kristotɔ akpe geɖewo lɔ̃ faa tsɔ srɔ̃ɖeɖe alo vidzidzi sa vɔ hena ɣeyiɣi aɖe. Nu ka tae? Elabena wodi be yewoatsɔ susu aɖo Yehowa subɔsubɔ ŋu bliboe. Eye nɔvi tsitsi geɖewo hã tsɔ ɣeyiɣi si woazã ɖe wo viwo kple tɔgbuiyɔviwo ŋu ƒe akpa aɖe sa vɔe ale be woate ŋu azã ɣeyiɣi geɖe ɖe Yehowa subɔsubɔ ŋu. Wo dometɔ aɖewo le asi kpem ɖe habɔbɔa ƒe xɔtudɔwo ŋu alo dea Fiaɖuƒe Nyanyuigblɔlawo Ƒe Suku heʋuna yia hame siwo me gbeƒãɖelawo hiã geɖe wu le. Nɔvi geɖewo hã wɔa ɖoɖo dzia woƒe subɔsubɔdɔa ɖe edzi le Ŋkuɖodziɖuɣia. Yehowa maŋlɔ nu siwo katã lɔlɔ̃ ʋãa nuteƒewɔla siawo wotsɔ saa vɔe be akpɔ o. (Xlẽ Hebritɔwo 6:10-12.) Ke wò ya ɖe? Ðe nàtsɔ nanewo asa vɔe ale be nàwɔ geɖe le Yehowa subɔsubɔ mea?

NU KAE MÍESRƆ̃?

18, 19. Nu kae nèsrɔ̃ tso Yefta kple vianyɔnua ŋuti nuŋlɔɖi si le Biblia me la me, eye aleke nàsrɔ̃ woƒe xɔse?

18 Nu kae kpe ɖe Yefta ŋu wònɔ te ɖe kuxi geɖe siwo me wòto la nu? Ena Yehowa fia mɔe le agbe me. Yefta mena ame siwo dome wònɔ la kpɔ ŋusẽ gbegblẽ ɖe edzi o. Eyi edzi wɔ nuteƒe togbɔ be amewo mewɔ nu ɖe eŋu nyuie o hã. Yehowa yra Yefta kple vianyɔnua ɖe woƒe ɖokuitsɔtsɔsavɔ ta, eye wòzã wo tsɔ do tadedeagu vavãtɔ ɖe ŋgɔ. Yefta kple via yi edzi wɔ nuteƒe na Yehowa togbɔ be ame siwo dome wonɔ mewɔ nuteƒe o hã.

19 Biblia gblɔ be míanye “ame siwo to xɔse kple dzigbɔɖi me nyi ŋugbedodowo dome la srɔ̃lawo.” (Hebritɔwo 6:12) Eya ta mina míasrɔ̃ Yefta kple vianyɔnua ƒe kpɔɖeŋu, elabena ne míeyi edzi wɔ nuteƒe na Yehowa la, ayra mí geɖe.