Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  April 2016

Nu Ka Tae Wòle Be Míaƒo Ƒu Asubɔ Mawu?

Nu Ka Tae Wòle Be Míaƒo Ƒu Asubɔ Mawu?

“Wodea ha ɖekae.”—DƆWƆWƆWO 2:42.

HADZIDZI: 20, 119

1-3. (a) Aleke Kristotɔ aɖewo ɖee fia be yewodina vevie be yewoaƒu ƒo ɖekae? (Kpɔ nɔnɔmetata si le nyati sia ƒe gɔmedzedze.) (b) Nu kawo mee míadzro le nyati sia me?

ESI Corinna xɔ ƒe 17 la, wolé dadaa hekplɔe yi gakpɔ me le dukɔ didi aɖe me. Emegbe wolé Corinna hã yi keke Siberia ke, afi si didi tso wo de kilometa akpe geɖe. Wona wòwɔ dɔ le agbledzi abe kluvi ene. Ɣeaɖewoɣi wozia edzi wòwɔa dɔ le ya nu esime sno le dzadzam eye xexea me fa miamiamia evɔ medoa vuvɔmewu vavã aɖeke o. Ke hã Corinna kple nɔvinyɔnu bubu aɖe ɖoe be yewoadze agbagba ɖe sia ɖe ade hame ƒe kpekpe.

2 Corinna gblɔ be: “Míedzo le agblea dzi le fiẽ me heto afɔ kilometa 25 yi ketekedzeƒe aɖe. Ketekea ho fɔŋli ga eve, eye gaƒoƒo ade megbe hafi míeɖo afi si yim míele. Eyome míegato afɔ kilometa ewo sɔŋ hafi ɖo kpekpea.” Dzi dzɔ Corinna ŋutɔ be yezɔ mɔ didi ma. Egblɔ be: “Le kpekpea la, míesrɔ̃ Gbetakpɔxɔ eye míedzi Fiaɖuƒehawo. Kpekpea tu mí ɖo hedo ŋusẽ míaƒe xɔse ale  gbegbe.” Nɔvinyɔnu eveawo trɔ gbɔ va agblea dzi le ŋkeke etɔ̃ megbe, evɔ agbletɔa menya gɔ̃ hã be wode afi aɖeke o.

3 Yehowa ƒe amewo dina vevie be yewoanɔ yewo nɔviwo dome. Le kpɔɖeŋu me, ƒe alafa gbãtɔ me Kristotɔwo kua kutri ɣesiaɣi be yewoanɔ ha me asubɔ Yehowa ahasrɔ̃ nu tso eŋu. (Dɔwɔwɔwo 2:42) Anɔ eme be wò hã èkpɔa mɔ na kpekpeawo vevie. Gake abe mía nɔvi bubuwo ene la, ɣeaɖewoɣi menɔa bɔbɔe be nàde kpekpeawo edziedzi o. Ðewohĩ èwɔa dɔ gaƒoƒo geɖe, alo aƒemedɔwo sɔ gbɔ ɖe dziwò, alo ɖeɖi tea ŋuwò belibeli zi geɖe. Ke nu kae akpe ɖe ŋuwò nàdo vevie kpekpeawo dede? [1] (Kpɔ dzesidenya la.) Aleke míate ŋu ade dzi ƒo na míaƒe Biblia nusrɔ̃viwo kple ame bubuwo be woade kpekpeawo kpli mí edziedzi? Le nyati sia me la, míakpɔ nu si tae kpekpeawo dede (1) ɖea vi na mí, (2) tua mía nɔviwo ɖo, (3) doa dzidzɔ na Yehowa. [2]—Kpɔ dzesidenya la.

KPEKPEAWO ÐEA VI NA MÍ

4. Aleke hame ƒe kpekpewo kpena ɖe mía ŋu míesrɔ̃a nu tso Yehowa ŋu?

4 Wofiaa nu mí le kpekpeawo me. Le kpekpe ɖe sia ɖe me la, míesrɔ̃a nu geɖe tso Yehowa ŋu. Le kpɔɖeŋu me, hame akpa gãtɔ srɔ̃ Te Ðe Yehowa Ŋu gbalẽa le Hame Ƒe Biblia Nusɔsrɔ̃ me nyitsɔ laa. Ðe mewɔ dɔ ɖe dziwò ŋutɔ esi míesrɔ̃ nu tso Yehowa ƒe nɔnɔme nyuiwo ŋu eye nɔviwo gblɔ ale si wose le wo ɖokuiwo me nèse oa? Ðikeke mele eme o be esia na nègalɔ̃ Yehowa ɖe edzi. Le kpekpeawo me la, míeléa to ɖe nuƒowo kple wɔwɔfiawo ŋu heɖoa to nyuie ne wole Biblia xlẽm, eye esia nana míenyaa Biblia nyuie. (Nehemiya 8:8) Eye bu nu xɔasi siwo ŋu míekena ɖo ne míedzra ɖo ɖe kwasiɖa sia kwasiɖa ƒe Biblia xexlẽa ŋu hese nu si nɔvi bubuwo hã srɔ̃ tso eme la ŋu kpɔ ko.

5. Aleke Kristotɔwo ƒe kpekpewo kpena ɖe ŋuwò be nàwɔ nu siwo nèsrɔ̃ le Biblia me dzi eye nàbi ɖe gbeƒãɖeɖedɔa me?

5 Kpekpeawo kpena ɖe mía ŋu be míanɔ agbe ɖe nu siwo míesrɔ̃ le Biblia me nu. (1 Tesalonikatɔwo 4:9, 10) Le kpɔɖeŋu me, ɖe Gbetakpɔxɔ Nusɔsrɔ̃ aɖe ʋã wò be nàwɔ geɖe le Yehowa subɔsubɔ me, be nàtrɔ asi le wò gbedodoɖawo ŋu wòaganyo ɖe edzi, alo be nàtsɔ nɔvi aɖe ƒe vodada akeea? Kwasiɖa domedome kpekpeawo hã fiaa ale si míaɖe gbeƒã nya nyuia kple ale si míakpe ɖe amewo ŋu woase Biblia me nyateƒea gɔme la mí.—Mateo 28:19, 20.

6. Aleke míaƒe kpekpeawo dea dzi ƒo na mí hedoa ŋusẽ míi?

6 Kpekpeawo dea dzi ƒo na mí. Satana ƒe xexea dina be míaƒe xɔse me nagbɔdzɔ, be nu nati kɔ na mí alo dzi  naɖe le mía ƒo. Gake míaƒe kpekpeawo dea dzi ƒo na mí hedoa ŋusẽ mí be míayi edzi asubɔ Yehowa. (Xlẽ Dɔwɔwɔwo 15:30-32.) Zi geɖe la, míedzroa ale si Biblia me nyagblɔɖiwo le eme vam me. Esia nana míegakana ɖe edzi geɖe wu be nu siwo katã ŋugbe Yehowa do la ava eme. Mía nɔviwo dea dzo yeye mía me, menye to nuƒowo ɖeɖe ko dzi o, ke to woƒe nyaŋuɖoɖowo kple ha siwo wodzina tso dzi me tsɔ kafua Yehowa hã dzi. (1 Korintotɔwo 14:26) Eye míaƒe dzi gbɔna ɖe eme ne míeɖo dze kpli wo do ŋgɔ na kpekpea kple kpakpã megbe le esi wonye mía xɔlɔ̃ siwo bua mía ŋu vevie ta.—1 Korintotɔwo 16:17, 18.

Míaƒe kpekpeawo dea dzi ƒo na mí hedoa ŋusẽ mí be míayi edzi asubɔ Yehowa

7. Nu ka tae wòle vevie be míade hamea ƒe kpekpewo?

7 Mawu ƒe gbɔgbɔ kɔkɔea kpena ɖe mía ŋu le kpekpeawo me. Yesu toa gbɔgbɔ kɔkɔea dzi kplɔa hamea. Egblɔ na mí be míase “nya si gblɔm gbɔgbɔ la le na hameawo.” (Nyaɖeɖefia 2:7) Gbɔgbɔ kɔkɔea kpena ɖe mía ŋu míeɖua tetekpɔwo dzi eye míeɖea gbeƒã vɔvɔ̃manɔmee. Egakpena ɖe mía ŋu be míatso nya me nyuie. Esia tae wòle be míaʋli vevie ade kpekpe ɖe sia ɖe be Mawu ƒe gbɔgbɔ kɔkɔea nanɔ mía dzi.

KPEKPEAWO DEDE TUA MÍA NƆVIWO ÐO

8. Aleke míaƒe kpekpeawo dede, nyaŋuɖoɖo kple hadzidzi tua haxɔsetɔwo ɖoe? (Kpɔ aɖaka si nye “ Eƒe Lãme Hayana Ɣesiaɣi Si Wòde Kpekpea.”)

8 Mɔnukpɔkpɔ sua mía si le kpekpeawo me be míaɖe lɔlɔ̃ afia mía nɔviwo. Hamea me tɔ geɖewo le dzi dom le nɔnɔme sesẽwo me. Apostolo Paulo gblɔ be: “Mina míanɔ mía nɔewo ŋu bum.” (Hebritɔwo 10:24, 25) Míeɖenɛ fiana be míebua mía nɔviwo ŋu ne míeƒoa ƒu dea dzi ƒo na mía nɔewo. Ne míeyi kpekpeawo la, enana mía nɔviwo kpɔnɛ be míele yewo susum, míedi be míakpɔ yewo aɖo dze kpli yewo, eye míedi be míanya nu siwo me tom yewole. Míaƒe nyaŋuɖoɖowo kple ha  siwo míedzina tso dzi me hã tua wo ɖo.—Kolosetɔwo 3:16.

9, 10. (a) Aleke Yesu ƒe nya siwo le Yohanes 10:16 na míekpɔe be ele vevie be míade ha kple mía nɔviwo? (b) Vi kae míaƒe kpekpeawo dede edziedzi ɖena na ame siwo ƒe ƒometɔwo gbe wo?

9 Ne míede kpekpeawo la, etea hamea ƒoa ƒu. (Xlẽ Yohanes 10:16.) Yesu tsɔ eɖokui sɔ kple alẽkplɔla eye wòtsɔ eyomedzelawo sɔ kple alẽha. Bu eŋu kpɔ: Ne alẽ eve le to aɖe tame, alẽ eve bubu le bali me, eye alẽ ɖeka aɖe hã le afi bubu aɖe la, ɖe woagblɔ be alẽ atɔ̃ siawo nye alẽha? Kura o, elabena alẽha nɔa teƒe ɖeka hekplɔa alẽkplɔlaa ɖo. Eya ta mele be míaɖe aga le mía nɔviwo ŋu agbe kpekpeawo dede o. Ehiã vevie be míaƒo ƒu be míazu “alẽha ɖeka” si kplɔa “alẽkplɔla ɖeka” ɖo.

10 Ne míedea kpekpeawo la, enana míewɔa ɖeka abe ƒome si me lɔlɔ̃ le ene. (Psalmo 133:1) Mía nɔvi aɖewo ƒe ƒometɔwo, abe wo dzilawo alo wo nɔvi siwo wo kpli wo tso ʋu ɖeka me ene, gbe nu le wo gbɔ. Gake Yesu do ŋugbe be yeana ƒome bubu nasu wo si, si me tɔwo alɔ̃ wo ahalé be na wo. (Marko 10:29, 30) Ne èdea kpekpeawo edziedzi la, àva zu tɔ alo nɔ, nɔviŋutsu alo nɔvinyɔnu na ame aɖe le hamea me. Ne ède ŋugble le esiawo ŋu la, aʋã wò nàdi godoo be yeade kpekpeawo.

KPEKPEAWO NANA MÍEDOA DZIDZƆ NA YEHOWA

11. Aleke kpekpeawo nana míetsɔa subɔsubɔ si Yehowa dze na la nanɛ?

11 Míetsɔa subɔsubɔ si Yehowa dze na la nanɛ le kpekpeawo me. Yehowae nye mía Wɔla, eya ta edze na míaƒe  akpedada, bubu kple kafukafu. (Xlẽ Nyaɖeɖefia 7:12.) Míewɔa esia le kpekpeawo me esi míedoa gbe ɖa nɛ, dzia kafukafuhawo nɛ heƒoa nu tso eyama ŋu. Mɔnukpɔkpɔ gã kae nye esi wònye na mí be míaƒo ƒu kwasiɖa sia kwasiɖa ade ta agu na Yehowa!

Yehowa nya agbagba siwo katã míedzena be míade kpekpeawo eye esia xɔ asi le eŋkume

12. Aleke Yehowa sena le eɖokui me ne míewɔ ɖe se si wòde na mí be míaƒo ƒu asubɔe dzi?

12 Ele be míaɖo to Yehowa le nu sia nu me elabe eyae wɔ mí. Ede se na mí be míagagblẽ míaƒe kpekpewo ɖi o, vevietɔ esi míele nuwuwua gogom. Se sia dzi wɔwɔ dzea Yehowa ŋu eye wòdoa dzidzɔ nɛ. (1 Yohanes 3:22) Enya agbagba siwo katã míedzena be míade kpekpeawo eye esia xɔ asi le eŋkume.—Hebritɔwo 6:10.

13, 14. Aleke kpekpeawo dede nana míetena ɖe Yehowa kple Yesu ŋu geɖe wu?

13 Kpekpeawo dede ɖenɛ fiana be míedi be míate ɖe Yehowa kple Via ŋu geɖe wu. Ne míede kpekpeawo la, míesrɔ̃a Biblia eye Yehowa fiaa nu si míawɔ kple ale si míanɔ agbee la mí. (Yesaya 30:20, 21) Ne ame siwo mesubɔa Yehowa o gɔ̃ hã va míaƒe kpekpewo la, wokpɔnɛ be Mawue le nu fiam mí vavã. (1 Korintotɔwo 14:23-25) Yehowa ƒe gbɔgbɔ kɔkɔea ye wòtsɔ le mɔ fiam mí, eye eya gbɔe nu siwo míesrɔ̃na le kpekpeawo me la tso. Eya ta ne míeyi kpekpeawo la, Yehowa ƒoa nu na mí, míekpɔa ale si gbegbe wòlɔ̃ mí, eye míetena ɖe eŋu geɖe wu.

14 Yesu si nye hamea ƒe Ta gblɔ be: “Afi si ame eve alo etɔ̃ ƒo ƒu ɖo le nye ŋkɔ me la, mele wo dome le afi ma.” (Mateo 18:20) Biblia gblɔ hã be Yesu ‘zɔna le hameawo domee.’ (Nyaɖeɖefia 1:20–2:1) Esia fia be Yehowa kple Yesu li kpli mí eye wodoa ŋusẽ mí le kpekpeawo me. Wò ya bu ale si gbegbe wòadzɔ dzi na Yehowa ne ekpɔe be èle kutri kum be yeate ɖe ye kple ye Via ŋu la ŋu kpɔ ko!

15. Aleke míaƒe kpekpeawo dede ɖenɛ fiana be míedi be míaɖo to Mawu?

15 Kpekpeawo dede ɖenɛ fiana be míeɖoa to Yehowa. Yehowa mezia mía dzi be míawɔ yeƒe lɔlɔ̃nu o. (Yesaya 43:23) Eya ta ne míewɔa se si wòde be míaƒo ƒu dzi la, eɖoa kpe edzi be míelɔ̃e eye míelɔ̃ ɖe edzi be eyae dze be wòaɖo nu si míawɔ la na mí. (Romatɔwo 6:17) Le kpɔɖeŋu me, nu kae nàwɔ ne wò dɔtɔ di be nàwɔ dɔ gaƒoƒo geɖe, si awɔe be màte ŋu ade kpekpeawo katã ɣesiaɣi o? Ke tsɔe be dziɖuɖua de se be, ne ame aɖe ke atsɛ de Yehowa Ðasefowo ƒe kpekpe la, woado fe nɛ, woadee gaxɔ me, alo woahe to sesẽ bubu aɖe nɛ. Ne edzɔ be míedi be míawɔ nu bubu aɖe tsɔ wu be míade kpekpea ya ɖe? Le nɔnɔme siawo katã me la, míawo ŋutɔe atso nya me le nu si míawɔ ŋu. (Dɔwɔwɔwo 5:29) Gake  ɣesiaɣi si míetiae be míawɔ Yehowa ƒe lɔlɔ̃nu la, edoa dzidzɔ nɛ.—Lododowo 27:11.

YI KPEKPEAWO DEDE DZI!

16, 17. (a) Aleke míewɔ nya be kpekpeawo dede nɔ vevie na Kristotɔ gbãtɔwo? (b) Aleke Nɔviŋutsu George Gangas bu Kristotɔwo ƒe kpekpeawoe?

16 Esi Kristotɔ gbãtɔwo ƒo ƒu le ƒe 33 ƒe Pentekoste ŋkekea dzi megbe la, wonɔa ha me subɔa Yehowa edziedzi. “Woyi edzi lé fɔ ɖe apostoloawo ƒe nufiafiawo ŋu vevie, wodea ha ɖekae.” (Dɔwɔwɔwo 2:42) Ɛ̃, ‘ɖekawɔwɔ me ŋusẽ le,’ eya ta esime Roma dziɖuɖua kple Yuda subɔsubɔhakplɔlawo nɔ Kristotɔwo yome tim gɔ̃ hã la, womedzudzɔ ƒuƒoƒo kple wo nɔewo o. Togbɔ be nɔnɔmeawo sesẽ hã la, wodea kpekpeawo ɣesiaɣi.

17 Yehowa subɔla siwo li egbea hã daa akpe gã ɖe kpekpeawo ta, eye afi ma yiyi vivia wo nu ŋutɔ. Nɔviŋutsu George Gangas, si nye Dɔdzikpɔhaa me tɔ ƒe 22 sɔŋ, gblɔ be: “Nye la, hadede kple nɔviwo nye agbe me vivisese gã aɖe kple dzideƒotsoƒe nam. Edzɔa dzi nam be manɔ ame siwo ava ɖo Fiaɖuƒe Akpataa me gbã la dome, eye ne anya wɔ la, manɔ ame mamlɛtɔ siwo adzo la dome. Mekpɔa dzidzɔ le dzi me ne mele dze ɖom kple Mawu ƒe amewo. Ne mía kple nye ƒomea míele wo dome la, míaƒe dzi dzea eme le gbɔgbɔ me paradisoa me.” Egblɔ kpee be: “Nye tameɖoɖo kple dzimedidie nye be made kpekpeawo ɖaa.”

18. Aleke nèbua míaƒe kpekpeawoe, eye nu kae nèɖo be yeawɔ?

18 Ðe wò hã nèkpɔa dzidzɔ ɖe Yehowa subɔsubɔ ŋu abe nɔviŋutsu wɔnuteƒe ma enea? Ekema wɔ nu sia nu si nàte ŋui be nànɔ nɔviwo dome le kpekpeawo me, ne nuwo me le sesẽm na wò gɔ̃ hã. Na Yehowa nakpɔe be, èle abe Fia David ene, ame si gblɔ be: “Yehowa, melɔ̃ wò aƒe, afi si nèle.”—Psalmo 26:8.

^ [1] (memama 3) Le kuxi siwo ŋu mía nɔvi aɖewo mate ŋu awɔ naneke le o ta la, kpekpe aɖewo toa wo ŋu. Ðewohĩ wo dometɔ aɖewo ƒe lãme gblẽ vevie. Mía nɔvi siawo ate ŋu aka ɖe edzi be Yehowa nya nu siwo me tom yewole, eye wòkpɔa ŋudzedze ɖe agbagba siwo dzem wole le esubɔsubɔ me ŋu ŋutɔ. Hamemetsitsiwo ate ŋu awɔ ɖoɖo na nɔvi siawo be woaɖo to kpekpea me nyawo to telefonkadodo dzi alo alée ɖe mɔ̃ dzi na wo.

^ [2] (memama 3) Kpɔ aɖaka si nye “ Susu Siwo Ta Míedea Kpekpeawo.”