Dzo kpo yi emenuwo dzi

Dzo kpo yi emenuawo dzi

Mègade Akpa Aɖeke Dzi Le Dunyawo Me O!

Mègade Akpa Aɖeke Dzi Le Dunyawo Me O!

“Mitsɔ nu siwo nye Mawu tɔ la na Mawu.”—MATEO 22:21.

HADZIDZI: 33,  137

1. Aleke míaɖo to Mawu kple dziɖuɖuwo siaae?

BIBLIA fia mí be míabɔbɔ mía ɖokui na dziɖuɖuwo, gake egblɔ hã be míaɖo to Mawu ɣesiaɣi. (Dɔwɔwɔwo 5:29; Tito 3:1) Aleke míate ŋu awɔ esia? Yesu na mɔfiame aɖe si kpe ɖe mía ŋu míenya ame si wòle be míaɖo toe. Egblɔ be: “Mitsɔ nu siwo nye Kaisaro tɔ la na Kaisaro, eye mitsɔ nu siwo nye Mawu tɔ la na Mawu.” [1] (Kpɔ dzesidenya la.) (Mateo 22:21) Míetsɔa ‘nu siwo nye Kaisaro tɔ la naa Kaisaro’ ne míewɔa dukɔa ƒe sewo dzi, míedea bubu dumegãwo ŋu, eye míexea míaƒe adzɔwo dedie. (Romatɔwo 13:7) Gake ne dukplɔlawo di be míawɔ nane si tsi tsitre ɖe Mawu ƒe sewo ŋu la, míegbena bubutɔe.

2. Mɔ kawo nue míeɖenɛ fiana le be míedea akpa aɖeke dzi le xexe sia ƒe dunyawo me o?

2 Mɔ aɖe si dzi míetona tsɔa ‘nu siwo nye Mawu tɔ la naa Mawu’ ye nye be míedea akpa aɖeke dzi le xexe sia ƒe dunyawo me o. (Yesaya 2:4) Esi wònye be Yehowae ɖe mɔ amegbetɔwo ƒe dziɖuɖuwo li ta la, míetsia tre ɖe wo ŋu o.  Eye míeƒoa mía ɖokui ɖe dulɔlɔ̃ alo dunyahehe nuwɔna aɖeke me hã o. (Romatɔwo 13:1, 2) Míemua dziɖuɖuwo alo tena kpɔ be míaɖo nu na dunyahelawo o, eye míedaa akɔ tiaa dumegãwo loo, alo va zua dunyahelawo o.

3. Nu ka tae mele be míade akpa aɖeke dzi o?

3 Susu geɖewo tae Mawu medi be míade akpa aɖeke dzi o ɖo. Ðekae nye be míesrɔ̃a Yesu, ame si menye “xexea ƒe akpa aɖeke o.” Mede nu dunya alo aʋawɔnyawo me kura o. (Yohanes 6:15; 17:16) Susu bubue nye be Mawu Fiaɖuƒea dzie míedena. Eya ta míaƒe dzitsinya meɖea fu na mí ne míele gbeƒã ɖem be Mawu Fiaɖuƒea koe akpɔ amegbetɔwo ƒe kuxiwo katã gbɔ o. Alakpasubɔsubɔhawoe dea nu dunya me, eye wodea mama woƒe hameviwo dome. Gake esi míawo míedea akpa aɖeke dzi o ta la, mí katã míewɔa ɖeka le xexea me godoo.—1 Petro 2:17.

4. (a) Aleke míewɔ nya be akpa aɖeke dzi mademade ava sesẽ na mí? (b) Nu ka tae wòle be míabla ali dzi fifia be míagade akpa aɖeke dzi gbeɖe o?

4 Ðewohĩ amewo meɖea fu na mí fifia ne míegbe be míade nu dunya me o. Gake zi ale si Satana ƒe nuɖoanyia ƒe nuwuwu le aƒe tum la, zi nenemae akpa aɖeke dzi mademade asesẽ na míi. Egbea gɔ̃ hã ame geɖe “melɔ̃na ɖe ɖoɖo aɖeke dzi o,” wonye “totrilawo,” eye fuléle si le wo dome la nu agava sẽ ɖe edzi. (2 Timoteo 3:3, 4) ‘Xexea me agamagbalẽe wònye,’ eya ta dunyawo trɔ kpata le xexea ƒe akpa aɖewo eye wògblẽ nu le mía nɔvi aɖewo ŋu. Ele be míabla ali dzi fifia ale be ne nɔnɔmeawo va le sesẽm gɔ̃ hã la, míade akpa aɖeke dzi gbeɖe o. Mina míadzro nu ene siwo míate ŋu awɔ atsɔ adzra ɖo me.

BU AMEGBETƆWO ƑE DZIÐUÐUWO ABE ALE SI YEHOWA BUA WOE ENE

5. Aleke Yehowa bua amegbetɔwo ƒe dziɖuɖuwoe?

5 Nu siwo míawɔ fifia atsɔ adzra ɖo dometɔ ɖekae nye be míabu amegbetɔwo ƒe dziɖuɖuwo abe ale si Yehowa bua woe ene. Yehowa mewɔ amegbetɔwo be woaɖu wo nɔvi amegbetɔwo dzi o. (Yeremiya 10:23) Ebua mí katã abe ƒome gã ɖeka ene. Gake amegbetɔwo ƒe fiaɖuƒewo de mama amewo me le esi wobu woƒe dukɔa be enyo wu bubuawo ta. Ne edze abe dziɖuɖu aɖewo nyo ene gɔ̃ hã la, womate ŋu akpɔ kuxiwo katã gbɔ o. Gakpe ɖe eŋu la, wozu Mawu Fiaɖuƒe si dze dziɖuɖu gɔme le ƒe 1914 me la ƒe futɔwo. Eteƒe madidi o, Mawu Fiaɖuƒea agbã amegbetɔwo ƒe dziɖuɖuwo katã.—Xlẽ Psalmo 2:2, 7-9.

Dzra ɖo fifia be nàgade akpa aɖeke dzi le dunyawo me gbeɖe o

6. Aleke wòle be míawɔ nu ɖe ŋusẽtɔwo ŋu?

6 Nu si tae Mawu ɖe mɔ na amegbetɔwo ƒe dziɖuɖuwoe nye be wonana dua me fana eye nuwo nɔa ɖoɖo nu vie. Esia kpena ɖe mía ŋu míeɖea gbeƒã Mawu Fiaɖuƒe ŋuti nya nyuia. (Romatɔwo 13:3, 4) Mawu gblɔ be míado gbe  ɖa ɖe ŋusẽtɔwo ta ale be míate ŋu asubɔ ye le tomefafa me. (1 Timoteo 2:1, 2) Ne amewo mewɔ nu ɖe mía ŋu nyuie o la, míate ŋu abia kpekpeɖeŋu tso setɔwo gbɔ. Ema tututue Paulo wɔ. (Dɔwɔwɔwo 25:11) Togbɔ be Biblia gblɔ be Satana le ŋusẽ kpɔm ɖe amegbetɔwo ƒe dziɖuɖuwo dzi hã la, megblɔ gbeɖe be ele dziɖuɖumegã ɖe sia ɖe dom abe sɔ ene o. (Luka 4:5, 6) Eya ta mele be míafia asi dziɖula aɖeke be Abosam ye le nu ɖom nɛ o. Biblia gblɔ be míagadzu amewo o.—Tito 3:1, 2.

7. Susu kae wòle be míaɖe aƒu gbe?

7 Ne míeɖoa to Mawu la, mele be míado vivi ɖe dunyahela alo dunyaheha aɖeke ŋu o, ne woƒe susu le nane ŋu ate ŋu ade mía dzi gɔ̃ hã, elabe ‘lã maɖumaɖua wometsɔa aɖu kanɛ o.’ Tsɔe be dziɖuɖu aɖe na dumevi siwo dome Yehowa Ðasefowo hã le, le fu kpem vevie, eye amewo dze aglã ɖe eŋu. Màkpe asi ɖe aglãdzela mawo ŋu ya o, gake ɖe wòanɔ wɔwɔm na wò be wo tɔ dzɔ eye nàdi be wòadze edzi na woa? (Efesotɔwo 2:2) Ne míedi be míade akpa aɖe dzi o la, ke mele be míasusui be akpa ɖeka tɔ dzɔ alo be enyo wu kemɛa o. Esia adze ƒãa le míaƒe nyagbɔgblɔ kple nuwɔna me.

‘DZE AYE’ GAKE NA ‘ŊUWÒ NADZA’

8. Ne akpa aɖeke dzi mademade va le sesẽm na mí la, aleke ‘míadze aye,’ evɔ ‘mía ŋu nadza’?

8 Nu evelia si akpe ɖe mía ŋu be míade akpa aɖeke dzi o ye nye be ‘míadze aye abe dawo ene, eye míadza abe ahɔnɛwo ene.’ (Xlẽ Mateo 10:16, 17.) ‘Míedzea aye’ nenye be míebua nɔnɔme sesẽ siwo ate ŋu ava mía dzi la ŋu do ŋgɔ, elabena ‘dze aʋa ɖi, aʋa mesinɛ o.’ Eye ‘mía ŋu adza’ nenye be míede akpa aɖeke dzi ne nɔnɔme sesẽawo va o. Mina míadzro nɔnɔme siwo míate ŋu ado goe dometɔ aɖewo kple ale si míawɔ nuteƒe na Mawu Fiaɖuƒea me.

9. Nu ka ŋue wòle be míaɖɔ ŋu ɖo le ne míele dze ɖom kple amewo?

9 Dzeɖoɖowo. Ele be míakpɔ nyuie ne amewo le dze ɖom tso dunyawo ŋu. Le kpɔɖeŋu me, ne míele ɖase ɖim na amewo tso Mawu Fiaɖuƒea ŋu la, mele be míagblɔ be míeda asi ɖe dunyaheha alo dumegã aɖe ƒe susuwo dzi loo, alo míeda asi ɖe edzi o. Le esi teƒe be nànɔ nu siwo amegbetɔwo ƒe dziɖuɖuwo di be yewoawɔ atsɔ akpɔ kuxiwo gbɔ gblɔm la, zã Biblia nàtsɔ aɖe ale si Mawu Fiaɖuƒea akpɔ míaƒe kuxiwo gbɔ keŋkeŋ la me boŋ. Ne amewo le nya hem le ŋutsu kple ŋutsu alo nyɔnu kple nyɔnu ƒe srɔ̃ɖeɖe, fuɖeɖe alo esiawo tɔgbi ŋu la, gblɔ nu si Mawu ƒe Nya la fia tso nya siawo ŋu kple ale si nèdzea agbagba be yeawɔ wo dzii la na wo. Ne ame aɖe le tɔ tem ɖe edzi be ele be woate fli ɖe se aɖewo me alo atrɔ wo la, mele be míade nu eme o.

Tsɔ nya siwo nèsena la sɔ kple “nya siwo le blibo” siwo le Biblia me

10. Nu kae míawɔ be nya siwo míexlẽna alo sena to nyakakamɔnuwo dzi la nagana míava nɔ nu dem dunya me o?

10 Nyakakamɔnuwo. Ɣeaɖewoɣi wogblɔa nyadzɔdzɔwo wòdea akpa ɖeka dzi. Vevietɔ le dukɔ siwo me dziɖuɖua ɖoa nu na nyadzɔdzɔgblɔlawo la me. Ele be míakpɔ nyuie be míaƒe susu nagawɔ ɖeka kple wo tɔ o. Le kpɔɖeŋu me, bia ɖokuiwò be, ‘Ðe melɔ̃a toɖoɖo nyadzɔdzɔgblɔla aɖe le esi nya  siwo wògblɔna tso dunyahehe ŋu sɔna nam ta?’ Mèganɔ television dzi wɔna siwo dea akpa ɖeka dzi kpɔm alo anɔ nyadzɔdzɔgbalẽ siwo le alea xlẽm o, be nàgava de akpa aɖe dzi o. Ke boŋ tia esiwo medea akpa aɖeke dzi o. Azɔ hã, tsɔ nya siwo nèsena la sɔ kple “nya siwo le blibo” siwo le Biblia me.—2 Timoteo 1:13.

11. Ne nunɔamesiwo nye nu vevitɔ na mí la, aleke esia ate ŋu ana wòasesẽ na mí be míaɖe nu le dunyawo me?

11 Ŋutilãmenudidi vivivo. Ne ga kple nunɔamesiwo va zu nu vevitɔ na mí le agbe me la, ate ŋu ana wòasesẽ na mí be míaɖe nu le dunyawo me. Le ƒe 1970 megbe la, wogblẽ Ðasefo geɖe siwo le Malawi ƒe nunɔamesiwo katã dome le esi wogbe be yewomade dunyahehawo dzi o ta. Nublanuitɔe la, esesẽ na wo dometɔ ʋɛ aɖewo be woaɖe asi le dzidzemegbe si wonɔ va yi ŋu. Nɔvinyɔnu aɖe si ŋkɔe nye Ruth gblɔ be: “Esi míesi yi dukɔ bubuwo me la, agbea va sesẽ na mí le sitsoƒesaɖawo me, si wɔe be nɔvi aɖewo na ta eye woɖo dunyaheha me hetrɔ yi aƒe be woakpɔ gbɔdzɔe.” Gake menye aleae Mawu ƒe amewo dometɔ akpa gãtɔ le o. Ne woɖo hiã me alo amewo gblẽ woƒe nunɔamesiwo katã dome hã la, womedea akpa aɖeke dzi gbeɖe o.—Hebritɔwo 10:34.

12, 13. (a) Aleke Yehowa bua amegbetɔwoe? (b) Aleke míawɔ anya nenye be dukɔ si me míetso na míele mía ɖokui dom ɖe dzi?

12 Dàda. Wogblɔna be ‘wometsɔa miasi fiaa ame de o,’ eya ta afi si míetso ate ŋu ana dadagbɔgbɔ naɖo mía me. Gake Yehowa ya mebua ame ƒomevi aɖewo be wonyo wu bubuwo o. Mí katã míesɔ le eŋkume. Ðe Yehowa ɖoe koŋ wɔ míaƒe ŋutigbalẽwo vovovo be wòanya kpɔ na ŋku. Medi be míaƒe dekɔnuwo nakpe ŋu na mí o. Eye medi hã be míabui be míenyo wu ame bubuwo o.—Romatɔwo 10:12.

13 Mele be wòawɔ na mí be mía detɔwo alo míaƒe dukɔa nyo wu bubuawo gbeɖe o. Ne míebunɛ nenema la, ana míava nɔ akpa aɖe dzi dem. Esia dzɔ le ƒe alafa gbãtɔ me. Kristotɔ Hebrigbe dola aɖewo menɔ nu wɔm ɖe ahosi siwo nye Helagbe dolawo ŋu nyuie o. (Dɔwɔwɔwo 6:1) Ke aleke míawɔ anya ne dadagbɔgbɔ le mía me ɖom? Ne nɔvi si tso du alo dukɔ bubu me do susu aɖe ɖa la, ɖe nègblɔna na ɖokuiwò be, ‘Afi kae ame sia tso hafi be yeava ɖo nu na mí?’ hegbea eƒe susua? Ekema mina míaɖo ŋku nuxlɔ̃ame sia dzi be: “Mitsɔ ɖokuibɔbɔ bu ame bubuwo be wonye gã wu mi.”—Filipitɔwo 2:3.

YEHOWA ADO ŊUSẼ WÒ

14. Aleke gbedodoɖa ɖea vi na míi, eye Biblia me kpɔɖeŋu kae ɖo kpe esia dzi?

14 Nu etɔ̃lia si akpe ɖe mía ŋu be míade akpa aɖeke dzi o ye nye be míaɖo ŋu ɖe Yehowa ŋu. Eya ta do gbe ɖa nàbia  gbɔgbɔ kɔkɔea be wòakpe ɖe ŋuwò nàgbɔ dzi ɖi ahaɖu ɖokuiwò dzi. Nɔnɔme siawo akpe ɖe ŋuwò nenye be dziɖuɖumegãwo le nu fitifiti alo nu madzɔmadzɔ wɔm. Bia Yehowa ne wòana nunya wò ale be nàte ŋu ade dzesi nu siwo me wòasesẽ na wò le be nànɔ eƒe akpa dzi. Eye biae ne wòakpe ɖe ŋuwò nàwɔ nu si sɔ. (Yakobo 1:5) Woate ŋu ade wò gaxɔ me alo ahe to bubu aɖe na wò le nuteƒewɔwɔ na Yehowa ta. Ne edzɔ alea la, do gbe ɖa nàbia dzideƒo ale be nàte ŋu aɖe nu si ta mèdea akpa aɖeke dzi le dunyawo me o la me nyuie. Ka ɖe edzi be Yehowa ado ŋusẽ wò nàdo dzi.—Xlẽ Dɔwɔwɔwo 4:27-31.

Lé Biblia ƒe kpukpui siwo akpe ɖe ŋuwò be màde akpa aɖeke dzi o kple esiwo ku ɖe xexe yeyea ŋu la ɖe susu me

15. Aleke Biblia ate ŋu akpe ɖe ŋuwò be màde akpa aɖeke dzi o? (Kpɔ aɖaka si nye “ Mawu Ƒe Nya La Do Ŋusẽ Wo” hã.)

15 Yehowa na Biblia mí be wòado ŋusẽ mí. Eya ta nɔ ŋugble dem le ŋɔŋlɔ siwo akpe ɖe ŋuwò be màde akpa aɖeke dzi gbeɖe o la ŋu. Lé ŋɔŋlɔ mawo ɖe susu me ale be nàte ŋu aɖo ŋku wo dzi ne Biblia mele asiwò le afi si nèle o gɔ̃ hã. Biblia ate ŋu ado ŋusẽ wò be nànɔ mɔ kpɔm na Mawu ƒe ŋugbedodowo vevie. Mɔkpɔkpɔ sia ana nàdo dzi le yometiti me. (Romatɔwo 8:25) Tia mawunyakpukpui siwo ku ɖe nu siwo wɔwɔ ado dzidzɔ na wò le xexe yeyea me ŋu, eye nànɔ ɖokuiwò kpɔm le afi ma.

SRƆ̃ YEHOWA SUBƆLA WƆNUTEƑEWO ƑE KPƆÐEŊU

16, 17. Nu kae míate ŋu asrɔ̃ tso Mawu subɔla wɔnuteƒe siwo mede akpa aɖeke dzi o la gbɔ? (Kpɔ nɔnɔmetata si le nyati sia ƒe gɔmedzedze.)

16 Nu enelia si akpe ɖe mía ŋu ye nye be míasrɔ̃ Yehowa subɔla wɔnuteƒewo, elabe ‘kpɔɖeŋue nye nyaɖeŋu.’ Nuteƒewɔla siwo le Biblia me dometɔ geɖe lé dzi ɖe ƒo, eye wowɔ tiatia nyuiwo, si kpe ɖe wo ŋu be womede akpa aɖeke dzi o. Bu Sadrak, Mesak kple Abednego, siwo gbe be yewomade ta agu na legba si Babilon fia li anyi o ŋu kpɔ. (Xlẽ Daniel 3:16-18.) Biblia me ŋutinya sia kpena ɖe Ðasefo geɖe ŋu egbea woléa dzi ɖe ƒo hegbena be yewomado  gbe na dukɔa ƒe aflaga o. Yesu mede nu dunya alo nya bubu siwo dea mama amewo me la me o. Enyae be yeƒe nusrɔ̃lawo asrɔ̃ nu tso yeƒe kpɔɖeŋu me. Egblɔ be: “Milé dzi ɖe ƒo! Nye la meɖu xexea dzi.”—Yohanes 16:33.

17 Ðasefo siwo li egbea hã dometɔ akpa gãtɔ medea akpa aɖeke dzi le dunyawo me o. Le wo dometɔ aɖewo gome la, wowɔ fu wo, wolé wo de gaxɔ me, alo wu wo gɔ̃ hã le nuteƒewɔwɔ na Yehowa ta. Woƒe kpɔɖeŋuwo ate ŋu akpe ɖe mía ŋu míalé dzi ɖe ƒo. Nɔviŋutsu aɖe si tso Turkey gblɔ be: “Franz Reiter nye ɖekakpui aɖe si wowu le esi wògbe be yemaɖo Hitler ƒe asrafoha me o ta. Lɛta si wòŋlɔ na nɔa le zã si do ŋgɔ na eƒe ku me la me nyawo ɖee fia be xɔse sẽŋu nɔ esi eye wòka ɖe Yehowa dzi vevie, eye nye hã medi be masrɔ̃ eƒe kpɔɖeŋu ne medo go dodokpɔ ma tɔgbi.” [2]—Kpɔ dzesidenya la.

18, 19. (a) Aleke hamea me tɔwo ate ŋu akpe ɖe ŋuwòe? (b) Nu kae nèɖo kplikpaa be yeawɔ?

18 Nɔvi siwo le hamea me hã ate ŋu akpe ɖe ŋuwò be màde akpa aɖeke dzi le dunyawo me o. Bia kpekpeɖeŋu tso hamemetsitsiwo gbɔ ne esia le sesẽm na wò. Woate ŋu aɖo aɖaŋu nyuiwo na wò tso Biblia me. Eye nɔviwo hã ate ŋu ade dzi ƒo na wò ne wonya nu siwo me tom nèle. Gblɔe na wo be woaɖo ŋku dziwò le gbedodoɖa me. Esi wònye be ‘ɖusi klɔa mia, eye mia klɔa ɖusi’ ta la, ele be wò hã nàkpe ɖe nɔviwo ŋu ahado gbe ɖa ɖe wo ta. (Mateo 7:12) Be nàkpɔ nɔvi siwo le gaxɔ me ƒe ŋkɔwo la, ʋu nyati si nye “Yehowa Ðasefo Siwo Wolé De Ga Ðe Woƒe Xɔse Ta—Le Du Vovovowo Me” le jw.org; àkpɔe le NYADZƆDZƆWO > SENYAWO te. Yɔ wo dometɔ aɖewo ƒe ŋkɔwo le wò gbedodoɖawo me nàbia Yehowa be wòakpe ɖe wo ŋu woalé dzi ɖe ƒo ahayi edzi awɔ nuteƒe nɛ.—Efesotɔwo 6:19, 20.

19 Esi míele nuwuwua gogom la, míakpɔ mɔ be dziɖuɖuwo ate ŋu azi mía dzi vevie be míanɔ yewoƒe akpa dzi. Esia tae wòle vevie be míadzra ɖo fifia be míagade akpa aɖeke dzi le dunyawo me o!

^ [1] (memama 1) Dziɖuɖuwo ŋue Yesu nɔ nu ƒom tsoe esi wòyɔ Kaisaro. Ɣemaɣi la, Kaisaro ye nye dziɖula si kpɔ ŋusẽ wu.

^ [2] (memama 17) Kpɔ Proclaimers (Prédicateurs) gbalẽa ƒe axa 662, kple aɖaka si nye “Ebu Eƒe Agbe Le Nuteƒewɔwɔ Na Mawu Ta” le Mawu Fiaɖuƒea Le Dzi Ðum! gbalẽa ƒe ta 14 lia me.