ALEKE gbegbee dɔmenyonuwɔna tea ŋu nana ame ƒe dzi dzea eme hefaa akɔ na ame ye nye esi! Ne míede dzesii be ame aɖe tsɔ ɖe le eme na mí la, dzi dzɔa mí. Esi wònye be mía dometɔ ɖe sia ɖe dina be woawɔ nu ɖe ye ŋu dɔmenyotɔe ta la, aleke míawɔ be míasrɔ̃ nɔnɔme nyui sia?

Dɔmenyonyo bia be míatsɔ ɖe le amewo ƒe nyonyo me tso dzi me—míate ŋu awɔ esia to nya tuameɖowo gbɔgblɔ kple kpekpeɖeŋunana wo me. Esi wònye be nuwɔna koŋ mee nɔnɔme nyui sia dzena le ta la, nuwɔwɔ amebubutɔe kple nu dzeame wɔwɔ ɖeɖe mesu o. Lɔlɔ̃ vavã kple veveseɖeamenu ye ʋãa ame wòɖea dɔmenyonyo vavãtɔ fiana. Gawu la, dɔmenyonyo vavãtɔ nye Mawu ƒe gbɔgbɔ kɔkɔe la ƒe kutsetse, si wòdi be Kristotɔwo katã nasrɔ̃, la ƒe akpa aɖe. (Gal. 5:22, 23) Ele be míasrɔ̃ dɔmenyonyo, eya ta, na míadzro ale si Yehowa kple Via ɖe nɔnɔme sia fia kpakple ale si míate ŋu asrɔ̃ woƒe kpɔɖeŋu la me.

YEHOWA NYOA DƆME NA AMEWO KATÃ

Yehowa nyoa dɔme na “ame madakpewo kple ame vɔ̃ɖiwo,” eye wòwɔa nu ɖe wo ŋu ameŋububutɔe. (Luka 6:35) Le kpɔɖeŋu me, Yehowa nana “eƒe ɣe dzena na ame vɔ̃ɖiwo kple ame nyuiwo, eye wònana tsi dzana na ame dzɔdzɔewo kple ame madzɔmadzɔwo siaa.” (Mat. 5:45) Le esia ta la, nu nyui siwo Yehowa na mí le agbe me la ɖea vi na ame siwo melɔ̃na ɖe edzi be Eyae nye yewo Wɔla o la gɔ̃ hã, eye woawo hã wotea ŋu kpɔa dzidzɔ aɖe sinu.

Dɔmenyonyo ƒe kpɔɖeŋu ɖedzesi aɖe dze le nu si Yehowa wɔ na Adam kple Xawa la me. Esi Adam kple Xawa wɔ nu vɔ̃ megbe kpuie la, ‘wotɔ gboti ƒe aŋgbawo hesa ɖe ali.’ Ke hã, Yehowa nyae be woahiã na awu si asɔ ɖe nɔnɔmeawo nu le Eden-bɔa godo, le anyigba si Mawu ƒo fi de be “amie ŋù kple aŋɔka,” la dzi. Eya ta, Yehowa ƒe dɔme trɔ ɖe wo ŋu eye wòtɔ “lãgbalẽwu legbe” na wo tsɔ kpɔ woƒe nuhiahiã ma gbɔ na wo.—1 Mose 3:7, 17, 18, 21.

Togbɔ be Yehowa nyoa dɔme na “ame vɔ̃ɖiwo kple ame nyuiwo” hã la, eƒe didi vevie ye nye be yeanyo dɔme na ye subɔla wɔnuteƒewo. Le kpɔɖeŋu me, le nyagblɔɖila Zakariya ƒe ŋkekeawo me la, ete ɖe mawudɔla aɖe dzi vevie be Yerusalem gbedoxɔa ƒe gbugbɔgatudɔa tsi akpo dzi. Yehowa ɖo to se mawudɔlaa ƒe nyawo eye wòtsɔ “nya nyuiwo kple akɔfanyawo ɖo eŋu” na mawudɔlaa. (Zak. 1:12, 13) Yehowa wɔ nu ɖe nyagblɔɖila Eliya hã ŋu nenema ke. Ɣeaɖeɣi la, nu te ɖe nyagblɔɖilaa dzi ale gbegbe be egblɔ na Yehowa be wòaɖe yeƒe agbe ɖa. Yehowa meŋe aɖaba ƒu Eliya ƒe seselelãmewo dzi o, ke boŋ edɔ mawudɔla aɖe ɖa be wòaɖado ŋusẽe. Azɔ hã, Mawu ka ɖe edzi na nyagblɔɖilaa be menye eya ɖeka koe kpɔtɔ o. Esi Eliya se nya fadziname siawo hexɔ kpekpeɖeŋu si wòhiã megbe la, ete ŋu wɔ dɔ si Mawu de esi la. (1 Fia. 19:1-18) Le Yehowa Mawu subɔlawo katã dome la, ame kae ɖe eƒe nɔnɔme ɖedzesi si nye dɔmenyonyo la fia wu?

 YESU NYO DƆME NA AMEWO ETƆXƐE

Le Yesu ƒe anyigbadzisubɔsubɔdɔa me la, amewo nyae be enyoa dɔme eye wòbua ame ŋu. Mewɔ ŋlɔmi le amewo ŋu alo zi eƒe didiwo ɖe amewo dzi gbeɖe o. Egblɔ na amewo veveseɖeamenutɔe be: “Miva gbɔnye, mi ame siwo katã le dagbadagbam, eye agba le mia wum la, eye nye la, mana gbɔdzɔe mi. . . . Elabena nye kɔkuti la tsɔtsɔ le bɔbɔe.” (Mat. 11:28-30) Esi Yesu wɔa nu ɖe amewo ŋu dɔmenyotɔe ta la, amewo dzea eyome yia afi sia afi si wòayi. Amewo ƒe “nu wɔ nublanui” na Yesu, eya ta efia nu wo, eda gbe le dɔnɔwo kple ame siwo tsi teƒe ɖeka le lãmesẽkuxiwo ta la ŋu, eye wòfia ‘nu geɖe’ wo tso Fofoa ŋu.—Marko 6:34; Mat. 14:14; 15:32-38.

Yesu ƒe dɔmenyonyo gã la dze ƒãa le ale si wòse nu gɔme na amewo hewɔ nu ɖe wo ŋu ameŋububutɔe la me. Le nyateƒe me la, exɔa ame siwo tsoa dzi blibo me dia eƒe kpekpeɖeŋu la “nyuie,” ne nu si wodi tso esi la made eya ŋutɔ dzi o gɔ̃ hã. (Luka 9:10, 11) Le kpɔɖeŋu me, esi nyɔnu aɖe si nɔ ʋusisidɔ lém, si wɔe be eŋu mekɔ o eye wònɔ vɔvɔ̃m la ka asi Yesu ƒe awudziwui ŋu kple susu be yeahaya la, Yesu meka mo nɛ o. (3 Mose 15:25-28) Yesu ƒe dɔme trɔ ɖe nyɔnu sia si kpe fu ƒe 12 la ŋu, eye wògblɔ nɛ be: “Vinyenyɔnu, wò xɔse na nèhaya. Heyi le ŋutifafa me, eye nàhaya tso wò dɔléle vɔ̃ɖi la si me.” (Marko 5:25-34) Dɔmenyonuwɔna nyui ka gbegbee nye esi!

DƆMENYONYO BIA BE MÍAWƆ NYUI NA AMEWO

Le kpɔɖeŋu siwo me míedzro va yi me la, míede dzesii be nuwɔna mee woɖea dɔmenyonyo vavãtɔ fiana le. Yesu wɔ kpɔɖeŋu aɖe ku ɖe Samariatɔ havilɔ̃la aɖe ŋu tsɔ ɖee fia be ehiã be míawɔ nu ŋutɔŋutɔwo atsɔ aɖe dɔmenyonyo afia. Togbɔ be Samariatɔwo kple Yudatɔwo menyina o hã la, ame si adzodalawo da adzoe heƒo wòku afã kple afã eye wogblẽe ɖi dzo la ƒe nu wɔ nublanui na Samariatɔ si ŋu Yesu ƒo nu tsoe le eƒe kpɔɖeŋua me. Dɔmenyonyo ʋã Samariatɔ la wòɖe afɔ. Ebla ŋutsua ƒe abiwo nɛ eye wòkɔe yi amedzrodzeƒe aɖe. Eyome Samariatɔ la xe fe na amedzrodzeƒea dzi kpɔla be wòalé be na ŋutsu si dze afɔku la, eye wògblɔ be yeaxe nu sia nu si wòagagblẽ ɖe ŋutsua ŋu la ŋuti fe nɛ.—Luka 10:29-37.

Togbɔ be nuwɔna mee míeɖea dɔmenyonyo fiana le zi geɖe hã la, míate ŋu aɖee afia to nya tuameɖowo kple nya siwo dea dzi ƒo na ame hã gbɔgblɔ me. Eya ta, togbɔ be “nuxaxa le dzi me ɖe wòtea ame ƒe dzi ɖe anyi,” abe ale si Biblia gblɔe ene hã la, egagblɔ kpee be “nya nyui nana dzi kpɔa dzidzɔ.” (Lod. 12:25) Ne míaƒe dɔme trɔna ɖe amewo ŋu eye míedina be míawɔ nyui na amewo la, esia aʋã mí be míagblɔ nya siwo ade dzi ƒo na wo, eye esia wɔwɔ akpe ɖe wo ŋu be woakpɔ dzidzɔ. * Nya siwo míagblɔ na wo dɔmenyotɔe la aɖee afia be míetsɔ ɖe le eme na wo. Esia ana dzi naɖo wo ƒo eye wòanɔ bɔbɔe na wo be woado dzi le nɔnɔme sesẽ siwo me tom wole la me.—Lod. 16:24.

ALE SI MÍAWƆ BE MÍANYE DƆMENYOLAWO

Esi wònye be Mawu wɔ amegbetɔwo “ɖe eƒe nɔnɔme nu” ta la, anya wɔ na mí katã be míasrɔ̃ dɔmenyonyo. (1 Mose 1:27) Le kpɔɖeŋu me, le Sidon dugã la me la, Yulio, si nye Roma asrafomegã si nɔ Paulo ŋu dzɔm la, ‘nyo dɔme na Paulo ŋutɔ, eye wòɖe mɔ nɛ be wòayi exɔlɔ̃awo gbɔ ne woakpɔ eƒe nuhiahiãwo gbɔ nɛ.’ (Dɔw. 27:3) Le ɣeyiɣi aɖe megbe la, Maltatɔwo “nyo dɔme” na Paulo kple ame bubu siwo ƒe tɔdziʋu gbã ɣeyiɣi kpui aɖe koe nye ema la “eteƒe mekɔ o.” Ƒukpoa dzi nɔlawo do dzo na wo be woaƒu gɔ̃ hã. (Dɔw. 28:1, 2) Wodze na kafukafu le nu siwo wowɔ la ta, ke hã, dɔmenyonyo bia nu geɖe wu dɔmenyonu wɔwɔ ɣeaɖewoɣi ko.

Hafi míate ŋu adze Mawu ŋu bliboe la, ele be dɔmenyonyo nanye míaƒe amenyenye ƒe akpa aɖe eye wòanye nu si míewɔna ɖaa. Le esia ta la, Yehowa bia tso mía si be ‘míado’ dɔmenyonyo. (Kol. 3:12) Ke hã, menɔa bɔbɔe na mí ɣesiaɣi be míana mawumenɔnɔme nyui sia nanye míaƒe  amenyenye ƒe akpa aɖe o. Nu ka tae? Nu si tae nye be ɣeaɖewoɣi la, míehena ɖe megbe le dɔmenyonyo na amewo gome le ŋukpe, kakaɖedzimanɔamesi, tsitretsiɖeŋu alo ɖokuitɔdidi ƒe nɔnɔme aɖewo siwo gakpɔtɔ le mía me la ta. Togbɔ be ele alea hã la, míate ŋu aɖu kplamatsɛdonu mawo dzi ne míeɖo ŋu ɖe gbɔgbɔ kɔkɔea ŋu eye míesrɔ̃ ale si Yehowa nyoa dɔmee.—1 Kor. 2:12.

Ðe míate ŋu ade dzesi go siwo me wòhiã le be míagawɔ geɖe wu le dɔmenyonyo gomea? Ele be míabia mía ɖokui be: ‘Ðe meɖoa to sea amewo ƒe dzimenyawo veveseɖeamenutɔea? Ðe menɔa ŋudzɔ ɖe nu si mate ŋu awɔ atsɔ akpe ɖe amewo ŋu la ŋua? Ɣekaɣie nye zi mamlɛtɔ si menyo dɔme na ame aɖe si menye nye ƒometɔ alo xɔlɔ̃ kplikplikpli o?’ Eyome míate ŋu aɖo taɖodzinuwo na mía ɖokuiwo, le kpɔɖeŋu me, míadze agbagba anya nu tso ame siwo dome míele la ŋu geɖe wu, vevietɔ Kristo hamea me tɔwo. To esia wɔwɔ me la, míava nya nɔnɔme siwo me tom wole kple woƒe nuhiahiãwo. Tsɔ kpe ɖe esia ŋu la, ele be míadze agbagba anyo dɔme na amewo le mɔ siwo míadi be amewo nanyo dɔme na mí le la nu. (Mat. 7:12) Mlɔeba, Yehowa akpe ɖe mía ŋu míanye dɔmenyolawo ne míebia eƒe kpekpeɖeŋu.—Luka 11:13.

DƆMENYONYO WƆA DƆ ÐE AMEWO DZI

Esi apostolo Paulo nɔ nu ƒom tso nu vovovo siwo de dzesi eyama be enye Mawu ƒe subɔla ŋu la, eyɔ “dɔmenyonyo” hã. (2 Kor. 6:3-6) Ðetsɔleme si Paulo ɖe fia amewo to eƒe dɔmenyonuwɔnawo kple nuƒoƒo dzi la wɔe be amewo tena ɖe eŋu. (Dɔw. 28:30, 31) Nenema kee míawo hã míate ŋu ato ale si míewɔa nu ɖe amewo ŋu dɔmenyotɔe dzi ana nyateƒea sɔsrɔ̃ nadzro amewo. Ne míewɔa nu ɖe amewo katã ŋu dɔmenyotɔe, ne wotsi tsitre ɖe mía ŋu gɔ̃ hã la, esia ate ŋu alé woƒe dziku nu eye wòana woakɔ dɔme ɖe mía ŋu. (Rom. 12:20) Eye ɖewohĩ le ɣeyiɣi aɖe megbe la, woava di be yewoase Biblia me gbedeasia.

Ðikeke mele eme o be le anyigba dzi Paradiso si gbɔna me la, dzidzɔ gãe wòanye na ame gbogbo siwo woafɔ ɖe tsitre la be woakpɔ dɔmenyonyo vavãtɔ teƒe, ɖewohĩ zi gbãtɔ le woƒe agbe me. Woakpɔ ŋudzedze ɖe dɔmenyonyo si teƒe woakpɔ la ŋu ale gbegbe be woawo hã woawɔ nu ɖe ame bubuwo ŋu dɔmenyotɔe. Ɣemaɣi la, ame ɖe sia ɖe si agbe be yemanyo dɔme na ame bubuwo o eye madi be yeakpe ɖe wo ŋu o la manɔ Paradiso la me tegbee o. Ke hã, ame siwo ŋu Yehowa akpɔ ŋudzedze ɖo la awɔ nu ɖe wo nɔewo ŋu le lɔlɔ̃ kple dɔmenyonyo me. (Ps. 37:9-11) Aleke gbegbe dedienɔnɔ kple ŋutifafa axɔ aƒe ɖe xexea mee nye esi! Gake hafi ɣemaɣi naɖo la, aleke dɔmenyonyo na amewo aɖe vi na mí fifia?

ALE SI DƆMENYONYO NA AMEWO ÐEA VII

Biblia gblɔ be, “Ame si nyoa dɔme la le nyui wɔm na eya ŋutɔ ɖokui.” (Lod. 11:17) Ame si nyoa dɔme la ƒe nu dzɔa dzi na amewo, eye woawo hã wonyoa dɔme nɛ. Yesu gblɔ be: “Dzidzenu si mietsɔ le nu dzidzem na amewo la kee woatsɔ adzidzee na mi.” (Luka 6:38) Le esia ta, enɔa bɔbɔe be dɔmenyola nadze xɔlɔ̃ nyuiwo.

Apostolo Paulo de dzi ƒo na nɔvi siwo nɔ Efeso hamea me be ‘woanyo dɔme na wo nɔewo, woƒe dɔme natrɔ ɖe wo nɔewo ŋu vevie, eye woatsɔ anɔ wo nɔewo kem faa.’ (Ef. 4:32) Ne Kristo hamea me tɔwo katã sea veve ɖe wo nɔewo nu, wonyoa dɔme na wo nɔewo, eye wodina vevie be yewoakpe ɖe yewo nɔewo ŋu la, esia ɖea vi geɖe na hamea. Ewɔnɛ be womegblɔa nya tɔamewo na wo nɔewo o, eye womehea nya ɖe wo nɔewo ŋu alo gblɔa gbɔɖiamenyawo ɖe wo nɔewo ŋu o. Le esi woakaka ameŋugblẽnyawo ɖe wo nɔewo ŋu teƒe la, wodzea agbagba be yewoazã yewoƒe aɖe atsɔ atu ame bubuwo ɖo. (Lod. 12:18) Eye esia wɔnɛ be hamea lia ke nyuie eye nɔviawo subɔa Yehowa kple dzidzɔ.

Ɛ̃, dɔmenyonyo nye nɔnɔme aɖe si míeɖena fiana to míaƒe nyawo kple nuwɔnawo me. Ne míenyoa dɔme na amewo la, míetoa esia dzi ɖenɛ fiana be míele mía Mawu lɔ̃ame Yehowa, si nyoa dɔme la srɔ̃m. (Ef. 5:1) Esia nana míaƒe hamewo lia ke nyuie eye wòhea amewo vaa subɔsubɔ vavãtɔ gbɔ. Neva eme be amewo nanya mí be míenye ame siwo nyoa dɔme!

^ mm. 13 Míadzro nɔnɔme nyui si nye nyuiwɔwɔ me le nyati asieke siwo le vavam ɖe wo nɔewo yome, siwo dometɔ ɖe sia ɖe dzro Mawu ƒe gbɔgbɔa ƒe kutsetsea ƒe akpa aɖe me la me.