Dzo kpo yi emenuwo dzi

Dzo kpo yi emenuawo dzi

Ðe Nèle Ale Si Yehowa Bua Nuwo Ŋui Srɔ̃ma?

Ðe Nèle Ale Si Yehowa Bua Nuwo Ŋui Srɔ̃ma?

“Mitrɔ miaƒe nɔnɔme to miaƒe tamesusu wɔwɔ yeyee me.”​—ROM. 12:2.

HADZIDZI: 56, 123

1, 2. Ne míele tsitsim le xɔse me la, nu ka gɔmee míeva sena? Wɔ eƒe kpɔɖeŋu.

TSƆE be ame aɖe na nu ɖevi sue aɖe. Edzilawo gblɔ nɛ be, “Gblɔ be akpe.” Ðevia gblɔe, gake esi edzilawo gblɔe nɛ tae. Ne eva le tsitsim la, eva sea edzilawo ƒe susuwo gɔme nyuie wu eye eƒe ŋudzedzekpɔkpɔ ɖe nu nyui siwo amewo wɔ nɛ ŋu la dzina ɖe edzi. Fifia ya, edaa akpe na amewo tso dzi me. Nu ka tae? Nu si tae nye be eva srɔ̃ ale si wòakpɔ ŋudzedze ɖe nu ŋu.

2 Nenema kee esi míeva xɔ nyateƒea la, míesrɔ̃ nu si tae wòle vevie be míawɔ ɖe Yehowa ƒe nudidiwo dzi. Gake esi míeva le tsitsim le nyateƒea me la, míesrɔ̃ nu geɖe tso ale si Yehowa bua nuwoe ŋu—nu siwo wòlɔ̃na, nu siwo wòtsri kple ale si wòbua nu vovovowoe. Ne míesrɔ̃ ale si míabu nuwo ŋu abe ale si Yehowa bua woe ene eye míeɖea mɔ eƒe susuwo kpɔa ŋusẽ ɖe míaƒe nuwɔna kple nyametsotsowo dzi la, míeɖenɛ fiana be míeva le nuwo ŋu bum abe ale si wòbua woe ene.

3. Nu ka tae wòate ŋu asesẽ na mí be míabu nuwo ŋu abe ale si Yehowa bua woe ene?

3 Togbɔ be edoa dzidzɔ na mí be míele ale si Yehowa bua nuwo ŋui srɔ̃m hã la, etea ŋu sesẽna na mí ɣeaɖewoɣi be míabu nuwo ŋu abe ale si wòbua woe ene, le esi míenye ame madeblibowo ta.  Le kpɔɖeŋu me, ate ŋu anɔ eme be esesẽ na mí be míase Yehowa ƒe susu le agbe nyui nɔnɔ, ŋutilãmenuwo yome titi, gbeƒãɖeɖedɔa, ʋuzazã le mɔ gbegblẽ nu kple bubuwo ŋu gɔme. Nu kae míate ŋu awɔ? Nu kae akpe ɖe mía ŋu be míayi ŋgɔ le agbagba si dzem míele be míabu nuwo ŋu abe ale si Mawu bua woe ene la me? Eye aleke wòle be esia nakpɔ ŋusẽ ɖe nyametsotso siwo míawɔ fifia kple etsɔme dzi?

ALE SI MÍAWƆ ABU NUWO ŊU ABE ALE SI MAWU BUA WOE ENE

4. Nu kae wòfia be míawɔ míaƒe tamesusu yeyee?

4 Xlẽ Romatɔwo 12:2. Le kpukpui sia me la, apostolo Paulo ƒo nu tso nu si wòfia be woabu nuwo ŋu abe ale si Yehowa bua woe ene la ŋu. Nyati si do ŋgɔ na esia kpe ɖe mía ŋu míekpɔe be hafi míate ŋu ‘adzudzɔ agbenɔnɔ ɖe nuɖoanyi sia ƒe nɔnɔme nu’ la, ele be míagbe xexea ƒe nuŋububu kple eƒe nuwɔnawo. Gake Paulo gblɔ kpee be ele be míawɔ míaƒe ‘tamesusu yeyee.’ Esia bia be míanɔ Mawu ƒe Nya la srɔ̃m kple susu be míase eƒe susuwo gɔme nyuie, ade ŋugble le wo ŋu, eye míana míaƒe nuŋububu nawɔ ɖeka kple Mawu ƒe susuwo.

5. Vovototo kae le nuxexlẽ kple nusɔsrɔ̃ dome?

5 Nusɔsrɔ̃ bia nu geɖe wu nuxexlẽ dzro ko, eye ebia nu geɖe wu flitete ɖe nyabiaseawo ƒe ŋuɖoɖoawo te ko. Ne míele nu srɔ̃m la, ele be míade ŋugble le nu si nyatia le mía fiam tso Yehowa, eƒe mɔwo kple eƒe susuwo ŋu la ŋu. Ele be míadze agbagba be míase nu si tae Mawu bia tso mía si be míawɔ nanewo ahatsri nanewo ɖo la gɔme. Ele hã be míade ŋugble le tɔtrɔ siwo wòhiã be míawɔ le míaƒe agbenɔnɔ me kple ale si míebua nuwo ŋui ŋu. Togbɔ be míate ŋu awɔ nu siawo katã le míaƒe nusɔsrɔ̃ ɖe sia ɖe me o hã la, ne míedia ɣeyiɣi, ɖewohĩ ɣeyiɣi si míatsɔ asrɔ̃ nuae ƒe afã, tsɔ dea ŋugble le nu si míesrɔ̃ ŋu ŋudzedzekpɔkpɔtɔe la, aɖe vi geɖe na mí.—Ps. 119:97; 1 Tim. 4:15.

6. Ne míele ŋugble dem le Mawu ƒe Nyaa ŋu la, nu kae yia edzi?

6 Ne míedea ŋugble le Mawu ƒe Nyaa ŋu edziedzi la, nu wɔnuku aɖe yia edzi. ‘Míawo ŋutɔwo míeva kpɔa kakaɖedzi’ be Yehowa ƒe susu le nuwo ŋu de blibo. Míeva nɔa nuwo ŋu bum abe ale si wòbua woe ene, eye míaƒe susu va wɔa ɖeka kple etɔ. Míewɔa míaƒe tamesusu “yeyee,” eye míeva srɔ̃a nuwo ŋu bubu le mɔ bubu kura nu. Vivivi la, míeva bua nuwo ŋu abe ale si Yehowa bua woe ene.

ALE SI MÍEBUA NUWO ŊUI LA KPƆA ŊUSẼ ÐE MÍAƑE NUWƆNAWO DZI

7, 8. (a) Aleke Yehowa bua ŋutilãmenuwoe? (Kpɔ nɔnɔmetata siwo le nyati sia ƒe gɔmedzedze.) (b) Ne Yehowa ƒe susu le nuwo ŋu le mía si la, nu kae anɔ vevie na mí wu ɣeawokatãɣi?

7 Mele be míaƒo nya ta be susu ŋu dɔwɔwɔ dzro koe tamebubu nye o. Ale si míebua nuwo ŋui la kpɔa ŋusẽ ɖe míaƒe nuwɔnawo dzi. (Marko 7:21-23; Yak. 2:17) Kpɔɖeŋu ʋɛ aɖewo me dzodzro ana nya sia me nakɔ na mí nyuie wu. Le kpɔɖeŋu me, Nyanyuigbalẽawo na ale si Yehowa bua ŋutilãmenuwoe la dze kɔtɛ. Mawu tia Yosef kple Maria siwo nye atsu kple asi siwo dzi ganyawo mede ale o la be woanyi ye Via. (3 Mose 12:8; Luka 2:24) Esi wodzi Yesu la, Maria ‘tsɔe mlɔ lãnuɖunu me, elabena womekpɔ teƒe le amedzrodzeƒe o.’ (Luka 2:7) Ne Yehowa lɔ̃ la, ate ŋu ato mɔ vovovowo dzi akpɔ egbɔ be woadzi ye Via le teƒe si de ame dzi wu. Ke hã, edi be woadzi Yesu ɖe ƒome si tsɔa Mawu subɔsubɔ ɖoa nɔƒe gbãtɔ la me. Emae nye nu si nɔ vevie wu na Yehowa.

8 Biblia me ŋutinya sia si ku ɖe Yesu dzidzi ŋu la na míekpɔ ale si Yehowa bua ŋutilãmenuwoe. Dzila aɖewo dina godoo be nuwo nade yewo viwo dzi le ŋutilãme gome ne esia agblẽ nu le wo ŋu le gbɔgbɔme gome gɔ̃ hã. Eme kɔ ƒãa be le Yehowa gbɔ  la, ƒomedodo si le mía kplii dome ye nye nu si le vevie wu. Ðe wò susu wɔ ɖeka kple Yehowa tɔ le go sia mea? Nu kae wò nuwɔnawo ɖena fiana?—Xlẽ Hebritɔwo 13:5.

9, 10. Aleke Yehowa bua nukiklizuzu na amewoe, eye aleke míate ŋu aɖee afia be míaƒe susu wɔ ɖeka kple Yehowa tɔ le go sia me?

9 Kpɔɖeŋu bubue nye ale si Mawu bua nukiklizuzu na amewo. Yesu gblɔ be: “Ame sia ame si azu nukikli na ɖevi sue siawo siwo si xɔse le la dometɔ aɖe la, anyo nɛ wu be woatsɔ té, si tedziwo trona, atsi ɖe kɔ nɛ ahatsɔe aƒu gbe ɖe atsiaƒu me.” (Marko 9:42) Eme kɔ ƒãa be, nukiklizuzu na amewo nye ŋkubiãnya ŋutɔ! Esi wònye be Yesu ɖe Fofoa ƒe amenyenye fia le mɔ deblibo nu ta la, míate ŋu aka ɖe edzi be nenema tututue Yehowa hã sena le eɖokui me ne ame aɖe wɔ nu ameŋumabumabutɔe wòzu nukikli na Yesu yomedzelawo dometɔ ɖeka.—Yoh. 14:9.

10 Ðe míaƒe susu wɔ ɖeka kple Yehowa kpakple Yesu tɔ le nya sia mea? Nu kae míaƒe nuwɔnawo ɖena fiana? Le kpɔɖeŋu me, tsɔe be awudodo kple dzadzraɖo ƒomevi aɖe dzɔa dzi na wò, gake ate ŋu aɖe fu na nɔvi aɖewo le hamea me alo ate ŋu anyɔ gbɔdɔdɔ ƒe dzodzro vɔ̃ ɖe amewo me. Ðe ale si míetsɔ ɖe le eme na mía nɔviwo lɔlɔ̃tɔe la ana míaƒo asa na awudodo ƒe atsyã ma?—1 Tim. 2:9, 10.

11, 12. Ne míesrɔ̃ ale si míalé fu nu si Mawu lé fui eye míesrɔ̃ ɖokuidziɖuɖu la, aleke esia akpɔ mía tae?

11 Kpɔɖeŋu etɔ̃lia: Yehowa lé fu nu madzɔmadzɔ wɔwɔ. (Yes. 61:8) Yehowa nyae be esesẽna na mí ɣeaɖewoɣi be míawɔ nu si le eteƒe le míaƒe blibomademade ta, ke hã, edi be míabu nuwo ŋu abe ale si yebua woe ene eye míalé fu vɔ̃. (Xlẽ Psalmo 97:10.) Ne míedea ŋugble le nu si tae Yehowa lé fu nu gbegblẽ wɔwɔ ŋu la, esia akpe ɖe mía ŋu be míava nɔ nuwo ŋu bum abe ale si wòbua woe ene, eye esia ado ŋusẽ mí hã be míaƒo asa na nu gbegblẽ wɔwɔ.

12 Gakpe ɖe eŋu la, ne míesrɔ̃ ale si míalé fu nu gbegblẽ wɔwɔ la, esia akpe ɖe mía ŋu míade dzesii be nanewo nye nu gbegblẽwo, togbɔ be Biblia meƒo nu tso wo ŋu tẽe o hã. Le kpɔɖeŋu me, atadziɣeɖuɖu si nye gbɔdɔnuwɔna la va zu nu si ame geɖe le wɔwɔm le xexea me egbea. Ðewohĩ, ame aɖewo agblɔ be esia menye gbɔdɔdɔ ŋutɔŋutɔ o, eya ta, menye nuwɔna gbegblẽ si wòle be yewoaƒo asa na o. * Gake ɖe woƒe susu le nuwɔna sia ŋu wɔ ɖeka kple Mawu, ame si lé fu nu gbegblẽ wɔwɔ ƒomevi ɖe sia ɖe la ƒe susuwoa? Mina míasrɔ̃ ɖokuidziɖuɖu kpakple fuléle nu siwo Yehowa lé fui ale be míate ɖa le nu gbegblẽ wɔwɔ ŋu.—Rom. 12:9.

BU AFƆ SI NÀÐE ŊU DO ŊGƆ

13. Nu ka tae wòle be míade ŋugble le Yehowa ƒe susu le nuwo ŋu la ŋu fifia ale be míate ŋu atso nya me nyuie le etsɔme?

13 Ne míele nu srɔ̃m la, ele be míade ŋugble le Yehowa ƒe susuwo ŋu, elabe esia ate ŋu akpe ɖe mía ŋu míatso nya me nyuie le etsɔme. Esia awɔe be, ne míeva ɖo nɔnɔme aɖe si me wòhiã le be míatso nya me enumake la, míanɔ dzadzraɖoɖi eye míanya nu si míawɔ. (Lod. 22:3) Bu Biblia me kpɔɖeŋu aɖewo ŋu kpɔ.

14. Nu kae míesrɔ̃ tso ale si Yosef wɔ nui esime Potifar srɔ̃ nɔ ahiãmo ɖom nɛ la me?

14 Esi Potifar srɔ̃ dze agbagba be yeable Yosef nu wòadɔ kpli ye la, Yosef gbe enumake. Edze ƒãa be Yosef de ŋugble le ale si Yehowa bua srɔ̃tɔwo ƒe nuteƒewɔwɔ na wo nɔewoe ŋu la ŋu do ŋgɔ. (Xlẽ 1 Mose 39:8, 9.) Gakpe ɖe eŋu la, Yosef ɖo nya ŋu na Potifar srɔ̃ be, “Aleke gɔ̃ mawɔ vɔ̃ gã sia  gbegbe ahawɔ nu vɔ̃ ɖe Mawu ŋu?” Esia ɖee fia kɔtɛ be ebua nuwo ŋu abe ale si Mawu bua woe ene. Ke míawo ya ɖe? Nu kae nàwɔ ne dɔwɔhati aɖe va le ahiãmo ɖom na wò? Alo nu kae nàwɔ ne ame aɖe ɖo gbɔdɔnyawo alo amamaɖeɖefotowo ɖe wò to asitelefon dzi? * Ne ède ŋugble le ale si Yehowa bua nu siawoe ŋu do ŋgɔ eye nètso nya me le afɔ si nàɖe ŋu xoxo la, esia ana nuteƒewɔwɔ na Yehowa nanɔ bɔbɔe na wò wu.

15. Nu kae míawɔ be míayi edzi awɔ nuteƒe na Yehowa abe ale si Hebrivi etɔ̃awo wɔe ene?

15 Azɔ bu kpɔɖeŋu si Hebrivi etɔ̃ siwo nye Sadrak, Mesak kple Abednego ɖo ɖi la ŋu kpɔ. Fia Nebukadnezar de se na wo be woade ta agu na sikalegba si yeli la, gake wogbe gbidii. Ale si woɖo nya ŋu na fia la dzinɔameƒotɔe la ɖee fia be wobu nu si wòhiã be woawɔ ale be woate ŋu ayi edzi awɔ nuteƒe na Yehowa la ŋu do ŋgɔ. (2 Mose 20:4, 5; Dan. 3:4-6, 12, 16-18) Tsɔe be wò dɔmemegã bia tso asiwò be nàdzɔ ga woatsɔ akpe asi ɖe alakpasubɔsubɔzã aɖe si ɖu ge woala la ƒe wɔnawo ŋu. Nu kae nàwɔ? Le esi nàlala nɔnɔme siawo tɔgbi nado mo ɖa hafi nàbu nu si wòle be nàwɔ ŋu teƒe la, ɖe manyo be nàde ŋugble le ale si Yehowa bua nu mawo ŋui la ŋu fifia oa? Esia awɔe be, ne nɔnɔme siawo do mo ɖa la, anɔ bɔbɔe na wò be nàwɔ nuteƒe le nyagbɔgblɔ kple nuwɔna me, abe ale si Hebrivi etɔ̃awo wɔe ene.

Ðe nèku nu me, kpe atikewɔnyawo ŋuti gbalẽvi si le se nu la ɖo, eye nèdzro nu me kple wò ɖɔkta? (Kpɔ memama 16 lia)

16. Ne míenya ale si Yehowa bua nuwo ŋui nyuie la, aleke esia ate ŋu akpe ɖe mía ŋu míanɔ dzadzraɖoɖi ne atikewɔnya aɖe va hiã kpata?

16 Ne míedea ŋugble le ale si Yehowa bua nuwo ŋui ŋu do ŋgɔ la, esia akpe ɖe mía ŋu hã be míayi edzi awɔ nuteƒe nɛ ne atikewɔnya aɖe va hiã kpata. Míeɖoe kplikpaa be míalɔ̃ woado ʋu alo ʋumenu vevi eneawo dometɔ aɖeke na mí o. Ke hã, le dɔdamɔnu siwo me wozãa ʋu le dometɔ aɖewo gome la, ehiã be ame ŋutɔ nawɔ Biblia me gɔmeɖosewo ŋu dɔ ahatso nya me wòawɔ ɖeka kple ale si Yehowa bua nuwo ŋui. (Dɔw. 15:28, 29) Ðikeke mele eme o be, menye ɣeyiɣi si me míele kɔdzi, esime míele veve sem eye wole eƒom ɖe mía nu be míatso nya me kaba lae wòle be míatso nya me le nya siawo ŋu o. Fifiae wòle be nàku nu me, akpe atikewɔnyawo ŋuti gbalẽvi si le se nu,  si me nàɖe wò didiwo me le nyuie, abe DPA gbalẽvia ene la ɖo ahadzro nu me kple wò ɖɔkta. *

17-19. Nu ka tae wòle vevie be nàsrɔ̃ ale si Yehowa bua nuwo ŋui fifia? Gblɔ nɔnɔme siwo ŋu wòhiã le be míadzra ɖo ɖo do ŋgɔ la ƒe kpɔɖeŋu ɖeka.

17 Mlɔeba, de ŋugble le ale si Yesu gbe nya na Petro enumake esime Petro nɔ aɖaŋu gbegblẽ ɖom nɛ be, “Aƒetɔ, di nyui na ɖokuiwò” la ŋu kpɔ. Edze ƒãa be Yesu de ŋugble le nu si nye Mawu ƒe lɔlɔ̃nu na eyama kpakple Ŋɔŋlɔ siwo ku ɖe eƒe agbenɔnɔ kple eƒe ku ŋu la ŋu nyuie do ŋgɔ. Esia do ŋusẽ tame si wòɖo kplikpaa be yeayi edzi awɔ nuteƒe na Yehowa eye yeatsɔ yeƒe agbe asa vɔ ɖe mí katã ta.—Xlẽ Mateo 16:21-23.

18 Egbea, Mawu ƒe lɔlɔ̃nue nye be míanye ye xɔlɔ̃wo eye míaɖe gbeƒã nya nyuia kple míaƒe ŋutete katã. (Mat. 6:33; 28:19, 20; Yak. 4:8) Gake ame siwo susu be yewole nyui dim na mí la adze agbagba be yewoaɖe dzi le mía ƒo be míagado vevie nu le dɔ sia me o, abe ale si Petro wɔe na Yesu ene. Le kpɔɖeŋu me, ne wò dɔmemegã gblɔ na wò be yeado wò ɖe ŋgɔ le dɔme eye yeada ɖe fetu dzi na wò gake ɖoƒe yeyea axɔ ɣeyiɣi siwo nètsɔ dea hame ƒe kpekpewo kple gbeadzi le asiwò ɖe? Alo ne sukuvie nènye eye mɔnukpɔkpɔ ʋu ɖi na wò be nàʋu le aƒe me aɖade suku akpee ya ɖe? Ɣemaɣi la, ɖe wòahiã be nàdo gbe ɖa, aku nu me tso nyaa ŋu, abia wò ƒometɔwo kple ɖewohĩ hamemetsitsiwo ƒe susu le nyaa ŋu hafi atso nya mea? Ðe manyo be nàde ŋugble le ale si Yehowa bua nu siawoe la ŋu fifia eye nàdze agbagba be wò susu nawɔ ɖeka kple etɔ oa? Ekema, ne eva dzɔ be wotsɔ mɔnukpɔkpɔ ma tɔgbi ɖo ŋkuwòme la, manye tetekpɔ na wò kura o. Ènya wò gbɔgbɔmetaɖodzinuwo nyuie xoxo, èɖo tame kplikpaa be yeaɖo wo gbɔ, eya ta, nu si susɔ koe nye be nàwɔ ɖe nyametsotso si nèwɔ xoxo la dzi.

19 Àte ŋu agabu nɔnɔme bubu siwo ate ŋu ado mo ɖa le vo me, siwo ado wò nuteƒewɔwɔ na Yehowa kpɔ la ŋu. Ele eme be menye nɔnɔme ɖe sia ɖe ŋue míate ŋu adzra ɖo ɖo do ŋgɔ ya o. Gake ne míedea ŋugble le Yehowa ƒe susuwo ŋu esime míele ɖokuisinusɔsrɔ̃ wɔm la, anɔ eme be míaɖo ŋku nu siwo míesrɔ̃ la dzi ahatsɔe awɔ dɔe le nɔnɔme si dze ŋgɔ mí la me. Eya ta, mina wòanye míaƒe taɖodzinu be míanya ale si Yehowa bua nuwo ŋui, míana míaƒe tamesusuwo nawɔ ɖeka kple eƒe susuwo, eye míabu ale si esia akpe ɖe mía ŋu míatso nya me nyuie fifia kple etsɔme siaa la ŋu.

TAME SI YEHOWA ÐO ÐE WÒ ETSƆME ŊU

20, 21. (a) Nu ka tae dzi adzɔ mí ɖe ablɔɖe si míakpɔ le xexe yeyea me ŋu? (b) Aleke míawɔ be míakpɔ dzidzɔ ma ƒe ɖe fifia?

20 Míele mɔ kpɔm na xexe yeyea vevie. Le mía dometɔ akpa gãtɔ gome la, míele mɔ kpɔm be míanɔ agbe le paradiso me le anyigba dzi. Le Fiaɖuƒea ƒe dziɖuɖu te la, amegbetɔwo avo tso vevesese kple fukpekpe siwo xɔ aƒe ɖe xexe sia me la me. Le xexe yeyea me la, tiatiawɔblɔɖe akpɔtɔ anɔ amegbetɔwo si. Ame sia ame ŋutɔ awɔ tiatia le eƒe didiwo kple nu siwo doa dzidzɔ nɛ la nu.

21 Gake menye ablɔɖe si seɖoƒe meli na o ye wòanye o. Le nya siwo ku ɖe nyui kple vɔ̃ ŋu me la, ame fafawo ana Yehowa ƒe sewo kple eƒe susuwo nafia mɔ wo. Esia anyo ale gbegbe, elabe ana míakpɔ dzidzɔ kple ŋutifafa geɖe. (Ps. 37:11) Gake hafi ɣemaɣi naɖo la, míate ŋu ase vivi ma ƒe ɖe fifia ne míebua nuwo ŋu abe ale si Yehowa bua woe ene.

^ mm. 12 Wogblɔ be atadziɣeɖuɖu nye “nuwɔna aɖe si me woxea fe na ɣeɖula aɖe si le amama kloe wònɔa anyi ɖe ame bubu ƒe ata dzi nɔa ɣe ɖum henɔa eɖokui trom ɖeƒomevii le.” Le ale si nɔnɔmeawo le nu la, nuwɔna sia ate ŋu afia gbɔdɔnuwɔna manɔsenu si tae wòle be woaɖo ʋɔnudrɔ̃kɔmiti ɖo. Ne Kristotɔ aɖe ƒo eɖokui ɖe nuwɔna sia me la, ele be wòabia kpekpeɖeŋu tso hamemetsitsiwo gbɔ.—Yak. 5:14, 15.

^ mm. 14 Woyɔa gbɔdɔnyawo, amamaɖeɖefotowo alo woƒe videowo ɖoɖo ɖe amewo to telefon dzi be sexting (alo sexto). Le ale si nɔnɔmeawo le nu la, ate ŋu abia be woaɖo ʋɔnudrɔ̃kɔmiti le nuwɔna sia ta. Le go aɖewo me la, dziɖuɖua drɔ̃ ʋɔnu ƒewuivi siwo ƒo wo ɖokuiwo ɖe nuwɔna sia me la be woɖi gbɔdɔnuwɔna manɔsenu ŋuti fɔ. Àte ŋu axlẽ nu geɖe tso nya sia ŋu le nyatakakadzraɖoƒe si nye jw.org ƒe nyati si nye “Sɔhɛwo Biana Be—Nu Kawoe Wòle Be Manya Tso Amamaɖenuwo Ðoɖo Ða To Asitelefon Dzi Ŋu?” la me. (Àkpɔe le BIBLIA ƑE NUFIAFIAWO > SƆHƐWO.) Alo kpɔ nyati si nye “Dzeɖoɖo Tso Asitelefon Dzi Amamaɖenuwo Ŋu Kple Viwò,” si dze le November 2013 ƒe Nyɔ! me, axa 4-5.

^ mm. 16 Wodzro Biblia me gɔmeɖose siwo ku ɖe nya siawo ŋu la me le míaƒe agbalẽwo me. Le kpɔɖeŋu me, kpɔ agbalẽ si nye Minɔ Mawu Ƒe Lɔlɔ̃ La Me Ðaa,” axa 215-218.