‘Nɔ ebiam le xɔse me, eye mègake ɖi kura o.’—YAK. 1:6.

HADZIDZI: 81, 70

1. Nu kae na be Kain mete ŋu tso nya me nyuie o, eye nu kae do tso eme?

NYAMETSOTSO aɖe dze ŋgɔ Kain: Ele be wòatiae nenye be aɖu eƒe seselelãme vɔ̃a dzi loo alo aɖe mɔ wòakpɔ ŋusẽ ɖe eƒe nuwɔna dzi. Aleke kee wòɖatso nya me o, emetsonua akpɔ ŋusẽ ɖe eƒe agbemeŋkeke mamlɛawo dzi. Abe ale si nènyae ene la, Kain metso nya me nyuie o. Eƒe nyametsotsoa wɔe be Abel, si nye nɔvia wɔnuteƒe la, bu eƒe agbe. Eye Kain ƒe nyametsotsoa gblẽ eya kple Ewɔlaa dome.—1 Mose 4:3-16.

2. Aleke gbegbee wòle vevie be míasrɔ̃ ale si míatso nya me nyuie?

2 Egbea, tiatiawo kple nyametsotsowo dzea ŋgɔ míawo hã. Menye wo katãe nyea agbe kple ku ƒe nya o. Ke hã, zi geɖe la, míaƒe nyametsotsowo kple tiatiawo me tsonuwo ate ŋu aɖe vi geɖe na mí loo alo agblẽ nu le mía ŋu vevie. Eya ta, ne míenya ale si míatso nya me nyuie la, ate ŋu ana míakpɔ tomefafa eye míaƒe kuxiwo nanɔ ʋɛ tsɔ wu be tɔtɔ, masɔmasɔwo kple dzigbãnyawo nanɔ fu ɖem na mí ɣesiaɣi.—Lod. 14:8.

3. (a) Aleke xɔse akpe ɖe mía ŋu míatso nya me nyuie? (b) Biabia kawo me míadzro?

3 Nu kae akpe ɖe mía ŋu míatso nya me nyuie? Ehiã vevie be míaxɔ Mawu dzi ase, eye míaka ɖe edzi bliboe be edi be yeakpe  ɖe mía ŋu eye ŋutete le esi be wòawɔe hã. Tsɔ kpe ɖe eŋu la, ele be míaxɔ Mawu ƒe Nyaa dzi ase ahaka ɖe edzi be Yehowa ƒe mɔwo kple eƒe mɔfiamewo nye nyuitɔ ɣesiaɣi. (Xlẽ Yakobo 1:5-8.) Zi ale si míele tetem ɖe eŋu eye míele eƒe Nyaa lɔ̃m vevie la, zi nenemae míeva kana ɖe edzi be eyae nya nu si nyo na mí. Esia awɔe be ɣesiaɣi si nyametsotso aɖe dze ŋgɔ mí la, míadzro Mawu ƒe Nyaa me gbã hafi atso nya me. Gake aleke míatu nyametsotso nyui wɔwɔ ƒe ŋutetea ɖo? Eye ne míetso nya me le nane ŋu ko la, ɖe esia fia be mele be míatrɔ susu gbeɖe oa?

EHIÃNA BE MÍ KATÃ MÍATSO NYA ME

4. Nyametsotso kae dze ŋgɔ Adam, eye nu kae va do tso eme mlɔeba?

4 Tso amegbetɔwo wɔɣi kee nyametsotso veviwo dzea ŋgɔ amegbetɔwo. Ehiã be Adam natiae nenye be yeaɖo to ye Wɔla loo alo yeaɖo to Xawa. Adam tso nya me ya, gake aleke nèkpɔ eƒe nyametsotsoa? Srɔ̃a si woble la ble enu wòwɔ nyametsotso si me nunya mele kura o, si wɔe be wonyãe le Paradisoa me eye wòva ku hã mlɔeba. Eye eƒe nu vɔ̃a me tsonuwo ƒe gɔmedzedze koe nye ema. Míegale Adam ƒe nyametsotso gbegblẽa me tsonuwo ƒe fu kpem va de asi na egbe.

5. Aleke wòle be míabu agba si le mía dzi be míatso nya me na mía ɖokui lae?

5 Ame aɖewo asusui be agbea avivi wu ne ɖe mahiã be míawo ŋutɔwo míatso nya me le naneke ŋu o. Nenemae nèsusua? Ðo ŋku edzi be Yehowa mewɔ amegbetɔwo be woanɔ abe robot-wo, siwo ŋu ŋutete mele be woabu tame ahatso nya me o la ene o. Le nyateƒe me la, Biblia fiaa ale si míawɔ atso nya me nyuie la mí. Yehowa di be míawo ŋutɔwo míatso nya me, eye míawo ŋutɔwo míaƒe viɖe tae. Bu esia ŋuti kpeɖodzi aɖewo ŋu kpɔ.

6, 7. Tiatia kae wòhiã be blema Israel-viwo nawɔ, eye nu ka tae wòsesẽ na wo be woatso nya me nyuie? (Kpɔ nɔnɔmetata si le nyati sia ƒe gɔmedzedze.)

6 Esi Israel-viwo va nɔ Ŋugbedodonyigbaa dzi ko la, ehiã be woawɔ nyametsotso vevi aɖe: Woasubɔ Yehowa loo alo woasubɔ mawu bubuwo. (Xlẽ Yosua 24:15.) Esia adze nyametsotso bɔbɔe aɖe. Ke hã, woƒe nyametsotsoa ate ŋu anye agbe alo ku na wo. Le Ʋɔnudrɔ̃lawo ƒe ɣeyiɣia me la, Israel-viwo wɔ nyametsotso gbegblẽ enuenu. Wotrɔ le Yehowa yome hesubɔ alakpamawuwo. (Ʋɔn. 2:3, 11-23) Le kpɔɖeŋu me, de ŋugble le nane si dzɔ emegbe le Mawu ƒe amewo ƒe ŋutinya me esime wòva hiã be woawɔ nyametsotso aɖe ŋu kpɔ. Nyagblɔɖila Eliya tsɔ nu eve ɖo wo ŋkume be woatia ɖeka: Woasubɔ Yehowa loo alo woasubɔ alakpamawu Baal. (1 Fia. 18:21) Eliya ka mo na dukɔa le esi wotsi evedomesi ta. Ðewohĩ awɔ na wò be nyametsotso bɔbɔe ye wònye, elabe Yehowa subɔsubɔe nye nu si me nunya le, si ɖea vi ɣesiaɣi. Le nyateƒe me la, ne ame aɖe bua nuwo ŋu nyuie la, Baal ƒe nu madzroe ʋuu keke wòahayi esubɔla nye ge o. Ke hã, Israel-vi mawo ‘tsi evedomesi.’ Nunyatɔe la, Eliya de dzi ƒo na wo be woatia subɔsubɔ nyuitɔ, si nye Yehowa subɔsubɔ.

7 Nu ka tae wòanya sesẽ na Israel-vi mawo be woawɔ nyametsotso nyuitɔ? Gbã, womegaxɔ Yehowa dzi se o eye wogbe toɖoɖo eƒe gbe. Womesrɔ̃ Mawu ƒe nya la be nunya kple sidzedze vavãtɔ nasu wo si o; eye womeka ɖe Yehowa dzi hã o. Ne ɖe wonɔ agbe ɖe sidzedze vavãtɔ nu la, anye ne esia akpe ɖe wo ŋu woatso nya me nyuie hafi. (Ps. 25:12) Gawu la, woɖe mɔ dukɔ bubu me tɔwo kpɔ ŋusẽ gbegblẽ ɖe wo dzi alo tso nya me na wo gɔ̃ hã. Amedzrovi siwo nɔ wo dome, siwo menye Yehowa subɔlawo o la kpɔ ŋusẽ gbegblẽ  ɖe Israel-viwo ƒe nuŋububu dzi ale gbegbe be wodze ame siwo nɔ trɔ̃ subɔm la yome. Tso gbe aɖe gbe kee Yehowa xlɔ̃ nu wo be nu sia tɔgbi ate ŋu adzɔ.—2 Mose 23:2.

ÐE WÒLE BE AME BUBU NATSO NYA ME NA MÍA?

8. Nu vevi kae míesrɔ̃ ku ɖe nyametsotso ŋu le Israel-viwo ƒe ŋutinya me?

8 Nufiame vevi aɖe le kpɔɖeŋu siwo me míedzro fifia me na mí. Míawo ŋutɔwo ƒe agbae wònye be míatso nya me na mía ɖokui, eye Ŋɔŋlɔawo me sidzedze vavãtɔe ana míatso nya me nyuie le nunya me. Galatiatɔwo 6:5 gblɔ na mí be: “Ame sia ame atsɔ eya ŋutɔ ƒe agba.” Mele be míadro agba si le mía dzi be míatso nya me na mía ɖokui la ɖe ame bubuwo dzi o. Ke boŋ, ele be míawo ŋutɔwo míanya nu si le eteƒe le Mawu ŋkume eye míatiae be míawɔe.

9. Nu ka tae afɔku le eme be míana ame bubuwo natso nya me na mí?

9 Aleke wòate ŋu adzɔ be míaɖe mɔ ame bubuwo natso nya me na mí? Mía hatiwo ate ŋu aƒo nya ɖe mía nu be míawɔ nyametsotso gbegblẽ. (Lod. 1:10, 15) Ke hã, aleke kee amewo ɖaƒo nya ɖe mía nui o, míaƒe agbanɔamedzie wònye be míawɔ dzitsinya si míetsɔ Biblia na hehee la ŋu dɔ. Zi geɖe ne míeɖe mɔ ame bubuwo tso nya me na mí la, efia be míetiae be ‘míadze wo yome.’ Gake tiatia sia ate ŋu anye afɔku na mí.

10. Nu ka ŋue Paulo xlɔ̃ nu Galatiatɔwo le?

10 Apostolo Paulo na Galatiatɔwo nyae nyuie be ne woɖe mɔ ame bubuwo tso nya me na wo la, agblẽ nu le wo ŋu. (Xlẽ Galatiatɔwo 4:17.) Hamea me tɔ aɖewo dze agbagba be yewoatso nya me na ame bubuwo ale be yewoahe wo ɖa le apostoloawo ŋu. Nu ka tae? Ðokuitɔdila mawo nɔ bubu dim na wo ɖokuiwo. Womekpɔ mɔ awɔ esia o, eye womede bubu gome si le wo nɔvi Kristotɔwo si be woawo ŋutɔwo natso nya me na wo ɖokuiwo la ŋu o.

11. Aleke míate ŋu akpe ɖe ame bubuwo ŋu be woatso nya me na wo ɖokuiwo?

11 Mí katã míate ŋu asrɔ̃ nu tso kpɔɖeŋu nyui si apostolo Paulo ɖo ɖi la me. Enyae be gome le ye nɔvi haxɔsetɔwo si be woatso nya na wo ɖokuiwo, eya ta ede bubu woƒe gomenɔamesia ŋu. (Xlẽ  2 Korintotɔwo 1:24.) Ne hamemetsitsiwo le aɖaŋu ɖom na nɔviawo le nya siwo ka woawo ŋutɔwo ŋu la, ele be woasrɔ̃ kpɔɖeŋu ma. Edzɔa dzi na hamemetsitsiwo be yewoahe nɔviawo ƒe susu ayi Biblia me mɔfiamewo dzi. Ke hã, woɖɔa ŋu ɖo heɖea mɔ na nɔviawo be woawo ŋutɔwo natso nya me na wo ɖokuiwo. Susu le eme, elabena ame siwo nyaa ka la ŋutɔe atsɔ emetsonua, eɖanye nyui alo vɔ̃ o. Nufiame vevi aɖee nye esi: Míate ŋu akpe ɖe nɔviwo ŋu woanya Ŋɔŋlɔawo me mɔfiame alo aɖaŋuɖoɖo siwo hiã alo ahe woƒe susu ayi wo dzi. Ke hã, gome le wo si be woatso nya me na wo ɖokuiwo, eye woƒe agbae wònye. Ne wotso nya me nyuie la, aɖe vi na wo. Eme kɔ ƒãa be, ne míesusuna be míekpɔ mɔ atso nya me na mía nɔviwo la, ele be míatrɔ susu.

Hamemetsitsi lɔ̃ameawo kpena ɖe nɔviawo ŋu wosrɔ̃a ale si woatso nya me na wo ɖokuiwo (Kpɔ memama 11)

MÈGAÐE MƆ WÒ SESELELÃME NAKPƆ ŊUSẼ ÐE WÒ NYAMETSOTSOWO DZI O

12, 13. Nu ka tae afɔku le eme be míatso nya me le nya veviwo ŋu ne míedo dziku alo dzi ɖe le mía ƒo?

12 Nya aɖe si ame geɖe lɔ̃a gbɔgblɔ ye nye: Ðo to wò dzi. Gake nya ma dzi wɔwɔ ate ŋu agblẽ nu le ame ŋu. Eye le mɔ aɖe nu la, esia tsi tsitre ɖe Ŋɔŋlɔawo ŋu. Biblia xlɔ̃ nu mí be míagaɖe mɔ míaƒe dzi madebliboa alo seselelãme nakpɔ ŋusẽ ɖe míaƒe nyametsotsowo dzi o. (Lod. 28:26) Eye Biblia na míenya nu wɔnublanui siwo dona tso toɖoɖo ame ƒe dzi me. Kuxiae nye be, le amegbetɔ madeblibowo gome la, ‘dzi la nye alakpatɔ wu nuwo katã, eye enu menya léna o.’ (Yer. 3:17; 13:10; 17:9; 1 Fia. 11:9) Eya ta, nu kae ate ŋu ado tso eme ne míewɔa nu sia nu si míaƒe dzi gblɔ na mí be míawɔ?

13 Kristotɔ ƒe dzi wɔa akpa vevi aɖe, elabena Yehowa de se na mí be míalɔ̃ ye kple dzi blibo eye míalɔ̃ mía havi abe mía ɖokui ene. (Mat. 22:37-39) Ke hã, mawunyakpukpui siwo dze le memama si do ŋgɔ me la me nyawo te gbe ɖe edzi be afɔku le eme ne míeɖe mɔ míaƒe seselelãmewo kpɔ ŋusẽ ɖe míaƒe tamesusu kple nuwɔnawo dzi. Le kpɔɖeŋu me, nu kae ate ŋu adzɔ ne míewɔ nyametsotso aɖe esime dzi le mía kum? Ne míewɔ nu alea kpɔ la, ekema míawo ŋutɔwo míenya nu si ate ŋu ado tso eme. (Lod. 14:17; 29:22) Alo ɖe wòate ŋu adzɔ be míatso nya me nyuie esime dzi ɖe le mía ƒoa? (4 Mose 32:6-12; Lod. 24:10) Ðo ŋku edzi be Mawu ƒe Nyaa de dzi ƒo na mí be míaɖe mɔ “Mawu ƒe se la” nafia mɔ míaƒe tamesusu. (Rom. 7:25) Eme kɔ ƒãa be, ne míedo dziku alo dzi ɖe le mía ƒo hafi míetso nya me le nya veviwo ŋu la, esia ate ŋu akpɔ ŋusẽ gbegblẽ ɖe míaƒe nyametsotsowo dzi.

NE EHIÃ BE MÍATRƆ SUSU

14. Aleke míewɔ nya be ɣeaɖewoɣi la, asɔ be míatrɔ nyametsotso aɖe si míewɔ va yi?

14 Ele vevie be míatso nya me nyuie. Ke hã, ema mefia be ne míenya tso nya me le nane ŋu ko la, mímate ŋu atrɔe gbeɖe o. Ɣeaɖewoɣi la, ahiã be míagbugbɔ alé ŋku ɖe nyametsotso aɖe si míewɔ ŋu eye míawɔ tɔtrɔ ne ehiã. Bu kpɔɖeŋu si Yehowa ɖo ɖi le ale si wòwɔ nu kple Niniwetɔwo le Yona ƒe ŋkekea me ŋu kpɔ. “Esi Mawu vavã la kpɔ nu si wowɔ, ale si woɖe asi le woƒe zɔzɔme vɔ̃ɖi la ŋu la, Mawu vavã la gbugbɔ bu vɔ̃ si wòbe yeahe vɛ la ŋu, eye megahee vɛ o.” (Yona 3:10) Esi Yehowa kpɔ ale si Niniwetɔwo trɔ dzi me la, etrɔ nu si wòɖo be yeawɔ la. Le esia wɔwɔ me la, eɖee fia be yeda sɔ eye wòɖe eƒe ɖokuibɔbɔ kple nublanuikpɔkpɔ hã fia. To vovo na ale si wòle le amegbetɔ geɖe gome la, Mawu mewɔa nyametsotso siwo me nunya mele gbeɖe o, ne edo dziku gɔ̃ hã.

15. Nu ka tae wòate ŋu ahiã be míatrɔ nyametsotso aɖe si míewɔ va yi?

15 Nɔnɔme aɖewo ate ŋu ana wòava hiã  be míagbugbɔ alé ŋku ɖe tiatia alo nyametsotso aɖe si míewɔ ŋu. Ðewohĩ nuwo megava le abe ale si wonɔ tsã ene o. Ɣeaɖewoɣi la, Yehowa hã trɔa nu si wòɖo be yeawɔ ne nɔnɔmeawo trɔ. (1 Fia. 21:20, 21, 27-29; 2 Fia. 20:1-5) Ðewohĩ nyatakaka yeye aɖewo va su mía si, si na míekpɔe be susu le eme be míatrɔ nyametsotso aɖe si míewɔ va yi. Le kpɔɖeŋu me, woka aʋatso ɖe Saul ƒe tɔgbuiyɔvi Mefiboset si na Fia David. Gake esi David va nyanyateƒea emegbe la, etrɔ nyametsotso si wòwɔ va yi. (2 Sam. 16:3, 4; 19:24-29) Ɣeaɖewoɣi la, nunya le eme be míawɔe nenema.

16. (a) Mɔfiame nyui kawoe ate ŋu akpe ɖe mía ŋu míatso nya me nyuie? (b) Nu ka tae wòahiã be míagbugbɔ alé ŋku ɖe nyametsotso siwo míewɔ va yi ŋu, eye aleke míawɔe?

16 Mawu ƒe Nyaa ɖoa aɖaŋu na mí be míagatsɔ dzitsitsi atso nya me le nya veviwo ŋu o. (Lod. 21:5) Zi geɖe la, ne míegbɔ dzi ɖi bu nya bliboa kple nya siwo katã do ƒome kplii ŋu nyuie la, míaƒe nyametsotsoa anye nyuitɔ. (1 Tes. 5:21) Hafi ƒome ƒe ta natso nya me le afɔ si wòaɖe ŋu la, ele be wòadi ɣeyiɣi aku Ŋɔŋlɔawo me, awɔ numekuku le Kristotɔwo ƒe agbalẽwo me, eye wòabia ƒomea me tɔ bubuwo hã ƒe susu le nyaa ŋu. Ðo ŋku edzi be Mawu gblɔ na Abraham be wòaɖo to srɔ̃a. (1 Mose 21:9-12) Ele be hamemetsitsiwo hã nadi ɣeyiɣi aku nu me. Eye ne wonye nugɔmesela siwo bɔbɔa wo ɖokuiwo la, mawɔ na wo be ne yewonɔ te ɖe nyatakaka yeye siwo va su yewo si la dzi wɔ tɔtrɔ le nyametsotso si yewowɔ va yi ŋu la, yewoava ɖu ŋukpe o. Ele be woalɔ̃ faa atrɔ woƒe susu kple nyametsotso si wowɔ va yi ne esɔ nenema, eye ele be mí katã míasrɔ̃ woƒe kpɔɖeŋu le go sia me. Esia ate ŋu ado ŋutifafa kple ɖekawɔwɔ ɖe ŋgɔ le hamea me.—Dɔw. 6:1-4.

WƆ NU SI NÈTSO NYA ME BE YEAWƆ LA

17. Nu kae ate ŋu akpe ɖe mía ŋu be míaƒe nyametsotsowo nanye nyuitɔ?

17 Nyametsotso aɖewo nyea ŋkubiãnya wu bubuwo. Hafi míawɔ nyametsotso siwo nye ŋkubiãnya la, ehiã be míabu nuwo ŋu nyuie ahado gbe ɖa abia Mawu ƒe kpekpeɖeŋu. Ehiã be Kristotɔ aɖewo natso nya me le ame si woaɖe ŋu alo woatiae nenye be yewoaɖe srɔ̃ loo alo yewomaɖe srɔ̃ o. Nyametsotso vevi bubu si ate ŋu ahe yayra geɖe vɛ ye nye ɣeyiɣiawo katã ƒe subɔsubɔdɔa ƒe akpa si me woaƒo wo ɖokui ɖo kple ɣeyiɣi si me woadze egɔme. Le nya siawo tɔgbi me la, ele vevie be míaka ɖe edzi bliboe be Yehowa gbɔe mɔfiame nyuitɔ tsona, eye ate ŋu akpe ɖe mía ŋu hã. (Lod. 1:5) Esia ta, ele vevie be míawɔ Biblia, si me aɖaŋuɖoɖo nyuitɔ le la ŋu dɔ, eye míado gbe ɖa abia Yehowa ƒe kpekpeɖeŋu. Eye nenɔ susu me na wò be Yehowa ate ŋu ana ŋutete si míehiã la mí be míawɔ nyametsotso siwo wɔ ɖeka kple eƒe lɔlɔ̃nu. Ɣesiaɣi si nèle nyametsotso veviwo wɔm la, anyo be nàbia ɖokuiwò be: ‘Ðe wòaɖe lɔlɔ̃ si le asinye na Yehowa la afia? Ðe wòahe ŋutifafa kple dzidzɔ avɛ na nye ƒomea? Eye ɖe wòaɖee afia be megbɔa dzi ɖi henyoa dɔmea?’

18. Nu ka tae Yehowa di be míawo ŋutɔwo míatso nya me na mía ɖokui?

18 Yehowa mezia mía dzi be míalɔ̃ ye ahasubɔ ye o. Míawo ŋutɔwoe atso nya me. Esi wòna tiatiawɔwɔ ƒe ablɔɖe mí ta la, edea bubu gome si le mía si be ‘míawo ŋutɔwo míatiae’ nenye be míasubɔe loo alo míasubɔe o la ŋu, eye ebunɛ be mía ŋutɔwo ƒe agbae wònye. (Yos. 24:15; Nyagb. 5:4) Gake ekpɔa mɔ be míawɔ ɖe nyametsotso si míewɔ le ɖekawɔwɔ me kple yeƒe mɔfiafia la dzi. Ne míexɔe se be Yehowa ƒe mɔwo nye nyuitɔ eye míezɔ ɖe eƒe mɔfiafia dzi la, míate ŋu awɔ nyametsotso nyuiwo eye míali ke le míaƒe mɔwo katã dzi.—Yak. 1:5-8; 4:8.