Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  March 2017

Nye Xɔlɔ̃ Nyui Ne Miaƒe Xɔlɔ̃wɔwɔa Me Di Be Yeagblẽ

Nye Xɔlɔ̃ Nyui Ne Miaƒe Xɔlɔ̃wɔwɔa Me Di Be Yeagblẽ

Gianni kple Maurizio nye xɔlɔ̃wo ƒe 50 ye nye esia. Gake eva ɖo ɣeaɖeɣi la, esusɔ vie woƒe xɔlɔ̃wɔwɔa me gblẽ. Maurizio gblɔ be: “Esi menɔ ɣeyiɣi sesẽ aɖe me tom la, meɖe afɔ aɖewo siwo mesɔ kura o, si wɔe be mía dome megava nɔ vivim o.” Gianni hã gblɔ be: “Maurizio ye nye ame si srɔ̃ Biblia kplim. Enye ame si ŋu metena ɖo wòɖoa aɖaŋu nam. Eya ta, esesẽ nam ŋutɔ be maxɔe ase be eyae wɔ nu ma gbegbe. Dzi ɖe le ƒonye ŋutɔ, elabena ate ŋu adzɔ be míaganye xɔlɔ̃wo azɔ o. Ðeko mese le ɖokuinye me be ame aɖeke megale asinye o.”

ASIXƆXƆ gã le xɔlɔ̃ vavãwo ŋu, eye xɔlɔ̃ nyui mesua ame si agbagba madzemadzee o. Ne xɔlɔ̃wo dome le gbegblẽm la, nu kae woate ŋu awɔ tso nɔnɔmea ŋu? Míate ŋu asrɔ̃ nu tso ame aɖewo siwo ŋu woƒo nu tsoe le Biblia me, siwo nye xɔlɔ̃ nyuiwo gake emegbe woƒe xɔlɔ̃wɔwɔa me di be yeagblẽ la gbɔ.

NE XƆ̃WÒ AÐE WƆ NU GBEGBLẼ

Xɔlɔ̃ nyuiwo nɔ alẽkplɔla David, si va zu fia emegbe la si. Ðewohĩ wò susu ayi David xɔlɔ̃ Yonatan dzi. (1 Sam. 18:1) Gake xɔlɔ̃ bubuwo hã nɔ David si. Wo dometɔ ɖekae nye nyagblɔɖila Natan. Biblia megblɔ ɣeyiɣi si me wova zu xɔlɔ̃wo o. Ke hã, gbe ɖeka David ɖe nya aɖe dzi na Natan, abe ale si ko nàgblɔ wò dzimenya aɖe na xɔ̃wò ene. David ɖoe be yeatu gbedoxɔ na Yehowa. Edze kɔtɛ be esi Natan nye David xɔlɔ̃ kple ame si dzi Yehowa ƒe gbɔgbɔ le ta la, fia la dea asixɔxɔ eƒe susuwo ŋu.—2 Sam. 7:2, 3.

Gake nane va dzɔ si na wo dome gblẽ kloe. Fia David wɔ ahasi kple Bat-Seba, eye emegbe ena wowu nyɔnua srɔ̃ Uriya. (2 Sam. 11:2-21) David wɔ nuteƒe na Yehowa ƒe geɖe eye wòtsoa afia dzɔdzɔe. Gake eyae nye ma va wɔ  nu vɔ̃ gã ma! Aleke wòdzɔe be fia nyui ma wɔ nu ma gbegbe? Ðe mekpɔe be nu vɔ̃ gã aɖee nye ema wɔm yenɔ oa? Ðe wòsusu be yeate ŋu aɣla nu si yewɔ la ɖe Mawua?

Nu kae Natan awɔ? Ðe wòanɔ mɔ kpɔm be ame bubu aɖe ahe fia la ƒe susu ayi nu si wòwɔ dzia? Enɔ nyanya na ame bubuwo hã be David ye na wowu Uriya. Eya ta, nu ka tae Natan ade nu nyaa me, evɔ esia ate ŋu awɔe be woƒe xɔlɔ̃wɔwɔ nyuia me nagblẽ? Azɔ hã, nuƒoƒo tso nya sia ŋu ate ŋu ana Natan ƒe agbe naɖo afɔku me gɔ̃ hã, elabena David na wowu Uriya si meɖi fɔ aɖeke o.

Ke hã, Mawu ƒe nyanuɖela ye Natan nye. Nyagblɔɖilaa nyae nyuie be ne yezi kpi la, ye kple David dome kadodoa maganɔ nyui o, eye ye ŋutɔ hã yeƒe dzitsinya aɖe fu na ye. Nu si exɔlɔ̃a David wɔ la medze Yehowa ŋu kura o. Ehiã vevie ŋutɔ be David nadzra eya kple Yehowa dome ɖo. Ɛ̃, xɔlɔ̃ vavãe David hiã ɣemaɣi. Xɔlɔ̃ ma tɔgbi ye Natan nye na David. Nuƒoƒo tso nya sia ŋu asesẽ, eya ta Natan wɔ kpɔɖeŋu aɖe si ana eƒe nyawo nawɔ dɔ ɖe David, si nye alẽkplɔla tsã la dzi. Natan gblɔ Mawu ƒe gbedeasia na David, ke hã etrɔ asi le eƒe nyawo ŋu le mɔ aɖe nu be wòana David nakpɔ ale si gbegbe eƒe nu vɔ̃a nye ŋkubiãnyae eye wòaɖɔ eƒe mɔwo ɖo.—2 Sam. 12:1-14.

Nu kae nàwɔ ne xɔ̃wò aɖe da vo gã aɖe alo wɔ nu vɔ̃ aɖe si nye ŋkubiãnya? Ðewohĩ awɔ na wò be ne yehe eƒe susu yi nu gbegblẽ si wòwɔ dzi la, esia ana miaƒe xɔlɔ̃wɔwɔa me nagblẽ. Alo ɖewohĩ àse le ɖokuiwò me be ne yegblɔ nu vɔ̃ si wòwɔ ŋu nya na hamemetsitsi siwo ate ŋu ana gbɔgbɔmekpekpeɖeŋui la, ke efia be mèwɔ nuteƒe na xɔ̃wòa o. Nu kae nàwɔ?

Gianni, si ŋu nya míegblɔ va yi la gblɔ be: “Mede dzesii be nane menɔ yiyim nyuie o. Maurizio megate ŋu nɔ tetem ɖe ŋunye abe tsã ene o. Eya ta, metso nya me be nye ŋutɔ mate ɖe eŋu, togbɔ be esia wɔwɔ menɔ bɔbɔe nam o hã. Mebia ɖokuinye be: ‘Nya kae mate ŋu agblɔ nɛ si menya xoxo o? Ðewohĩ akpɔ dziku!’ Gake esi meɖo ŋku nu siwo míesrɔ̃ va yi dzi la, dzi ɖo ƒonye be maƒo nu kplii. Maurizio hã tsɔ ɖe le eme nam alea va yi esime mehiã kpekpeɖeŋu. Menye ɖe medi be mía kplii dome nagblẽ o, ke boŋ ɖe medi be makpe ɖe eŋu, elabe metsɔ ɖe le eme nɛ.”

Maurizio gblɔ be: “Ale si nyaa le lae Gianni gblɔ, eye egblɔe ɖe eteƒe. Menya be nu gbegblẽ siwo mewɔ la me tsonuwo metso Gianni gbɔ o, eye metso Yehowa gbɔ hã o. Eya ta, melɔ̃ xɔ tohehea, eye le ɣeyiɣi aɖe megbe la, mehaya le gbɔgbɔ me.”

NE NANE DZƆ ÐE XƆ̃WÒ AÐE DZI

Xɔlɔ̃ bubuwo nɔ David si siwo nɔ eŋu nuteƒewɔwɔtɔe le ɣeyiɣi sesẽwo me. Wo dometɔ ɖekae nye Husai, ame si ŋu Biblia gblɔ le be enye “David xɔlɔ̃.” (2 Sam. 16:16; 1 Kron. 27:33) Anɔ eme be ewɔa dɔ le fiasãa me, eye wònye David xɔlɔ̃ kple eŋumewo dometɔ ɖeka si David dea dɔ vevi siwo nye nya ɣaɣlawo la asi na.

Esi David vi Absalom dze agbagba be yeaxɔ fiazikpuia le fofoa si la, Israel-vi geɖe wɔ ɖeka kplii, gake menɔ alea le Husai ya gome o. Esi David nɔ sisim la, Husai yi egbɔ. Ete ɖe David dzi ŋutɔ be ye ŋutɔ ye vi tsi tsitre ɖe ye ŋu alea eye ame bubu siwo dzi yeka ɖo hã de edzi. Ke hã, Husai yi edzi wɔ nuteƒe na David eye wòlɔ̃ faa be yeade yeƒe agbe afɔku me ale be yeatsɔ dɔ aɖe si awɔe be woagblẽ aglãdzelaawo ƒe nugbeɖoɖoa me. Menye esi Husai nye fiaŋume ta koe wòyi dɔa gbe o. Ke esi wònye xɔlɔ̃ vavã tae.—2 Sam. 15:13-17, 32-37; 16:15–17:16.

Enyea dzidzɔ na mí egbea be ɖekawɔwɔ sẽŋu le nɔviwo dome, metsɔ le agbanɔamedzi siwo le wo dzi le hamea me la me o. Nɔnɔme siwo woɖena fiana le ko abe ɖe wole gbɔgblɔm be, “Menye esi wòle be manye xɔ̃wò tae míenye xɔlɔ̃wo ɖo o, ke esi nèle vevie nam tae” ene.

 Esia dze ƒãa le nɔviŋutsu aɖe si ŋkɔe nye Federico gome. Exɔlɔ̃ vevi Antonio kpe ɖe eŋu esime wònɔ nɔnɔme sesẽ aɖe me tom. Federico gblɔ be: “Esi Antonio ʋu va míaƒe hamea me la, eteƒe medidi hafi míezu xɔlɔ̃wo o. Mí ame evea siaa míenye subɔsubɔdɔwɔlawo, eye dzi nɔ mía dzɔm be míenɔ dɔ wɔm ɖekae. Ɣeyiɣi kpui aɖe megbe la, eva zu hamemetsitsi. Tsɔ kpe ɖe ale si míenye xɔlɔ̃wo ŋu la, eganye ame si ɖoa kpɔɖeŋu nyui nam.” Emegbe Federico ɖe afɔ gbegblẽ aɖe. Enumake, eyi hamemetsitsiwo gbɔ be woana gbɔgbɔmekpekpeɖeŋu ye, gake megadze anye mɔɖela alo subɔsubɔdɔwɔla o. Aleke Antonio wɔ nu ɖe eŋu?

Esi Federico ɖo xaxa me la, xɔlɔ̃a, Antonio, ɖo toe dzigbɔɖitɔe hede dzi ƒo nɛ

Federico gblɔ be: “Mekpɔe be Antonio se veve ɖe nunye. Edze agbagba wɔ etɔ sinua de dzi ƒo nam. Edi vevie be mahaya le gbɔgbɔ me eye megblẽm ɖi gbeɖe o. Ede dzi ƒo nam be madze agbagba agasẽ ŋu le gbɔgbɔ me eye nyemagana ta o.” Antonio hã gblɔ be: “Meva nɔ Federico ŋu kplikplikpli wu tsã. Medi be wòanɔ bɔbɔe nɛ be wòagblɔ nu siwo te ɖe edzi kple nu sia nu si le dzi me nɛ la nam faa.” Dzidzɔtɔe la, Federico gasẽ ŋu le gbɔgbɔ me eye wògazu mɔɖela kple subɔsubɔdɔwɔla le ɣeyiɣi kpui aɖe megbe. Antonio ƒo nyaa ta be: “Togbɔ be menye hame ɖeka mee míele fifia o hã la, tsi metoa mía dome o.”

ÐE NÀLÉ DZIKU ÐE DƆMEA?

Aleke nàse le ɖokuiwò me ne xɔ̃wò aɖe gblẽ wò ɖi le ɣeyiɣi si nèhiã eƒe kpekpeɖeŋu wu la me? Zi geɖe la, esia vena ŋutɔ. Ðe nàte ŋu atsɔe ake xɔ̃wòa? Ðe mia kplii dome ate ŋu agava nɔ kplikplikpli abe tsã enea?

Bu nu si dzɔ ɖe Yesu dzi le eƒe anyigbadzinɔɣi ƒe ŋkeke mamlɛawo me ŋu kpɔ. Zi geɖe la, Yesu kple eƒe apostoloawo koe zɔna eye wo kplii dome nɔ kplikplikpli. Esɔ be Yesu yɔ wo be ye xɔlɔ̃wo. (Yoh. 15:15) Gake nu kae dzɔ esi amewo va lé Yesu? Apostoloawo si. Petro ƒu asi akɔ be yemagblẽ yeƒe Aƒetɔ la ɖi gbeɖe o, gake le zã ma ke me la, Petro gbe nu le Yesu gbɔ!—Mat. 26:31-33, 56, 69-75.

 Yesu nyae be ne dodokpɔ mamlɛa va ye dzi la, ye ɖeka koe adze ŋgɔe. Ke hã, etɔ dzɔ be wòase le eɖokui me be wogblẽ ye ɖi, alo wòate ɖe edzi gɔ̃ hã. Gake le dze si wòɖo kple eƒe nusrɔ̃lawo ŋkeke ʋɛ aɖewo le eƒe tsitretsitsi megbe me la, naneke meɖee fia be nu si wowɔ la vee, alo ete ɖe edzi, alo elé wo ɖe dɔme o. Yesu mekpɔe be ehiã be yeaƒo nu tso yeƒe nusrɔ̃lawo ƒe vodadawo ŋu o, eye meƒo nu tso ale si wogblẽe ɖi le zã si me wolée la ŋu hã o.

Ke boŋ, Yesu de dzi ƒo na Petro kple apostolo bubuawo. Ena mɔfiame wo ku ɖe nufiafiadɔ vevitɔ si woawɔ le amegbetɔwo ƒe ŋutinya me la ŋu tsɔ ɖo kpe edzi na wo be yegaka ɖe wo dzi kokoko. Yesu gakpɔtɔ bu apostoloawo be wonye ye xɔlɔ̃wo. Ale si gbegbe wòlɔ̃ woe la wɔ dɔ ɖe wo dzi ŋutɔ. Eya ta, woawɔ woƒe ŋutete ɖe sia ɖe be yewomagawɔ nu ɖe yewoƒe Aƒetɔ la ŋu nenema azɔ o. Eye le nyateƒe me hã, eƒe nusrɔ̃lawo te ŋu wɔ dɔ si wòde wo si la de goe.—Dɔw. 1:8; Kol. 1:23.

Nɔvinyɔnu aɖe si ŋkɔe nye Elvira la ɖo ŋku ɣeyiɣi aɖe si masɔmasɔ ɖo eya kple exɔlɔ̃ vevi si nye Giuliana dome la dzi. Egblɔ be: “Esi wògblɔ nam be nu si mewɔ la ve ye la, ete ɖe dzinye ŋutɔ. Etɔ dzɔ be wòado dziku. Gake nu si wɔ dɔ ɖe dzinye wue nye be, nu gbegblẽ si ate ŋu ado tso nye nuwɔnaa me kple nye ŋutɔ nye nyonyo ŋue wòtsi dzi ɖo. Metsɔ susu ɖo nu si mewɔ ɖe eŋu la dzi o, ke boŋ nu si nye nuwɔnaa agblẽ le nye ŋutɔ ŋunye boŋ ŋue wòtsi dzi ɖo. Nyemaŋlɔ esia be gbeɖe o. Meda akpe na Yehowa be xɔlɔ̃ nyui sia le asinye. Metsɔ susu ɖo eƒe seselelãme ŋu o, ke boŋ nye nyonyoe nɔ vevie nɛ wu.”

Eya ta, aleke xɔlɔ̃ nyui awɔ nui ne woƒe xɔlɔ̃wɔwɔa me di be yeagblẽ? Alɔ̃ aƒo nu tso kuxia ŋu faa ne ehiã, eye awɔe ameŋububutɔe. Xɔlɔ̃ ma ƒomevi anɔ abe Natan kple Husai, siwo yi edzi wɔ nuteƒe na wo xɔlɔ̃ le ɣeyiɣi sesẽwo me la ene; eye anɔ abe Yesu, si lɔ̃ faa tsɔ exɔlɔ̃awo ƒe vodada ke wo la ene. Xɔlɔ̃ sia tɔgbie nènyea?