Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  June 2017

Èɖo Ŋku Wo Dzia?

Èɖo Ŋku Wo Dzia?

Ðe nèxlẽ Gbetakpɔxɔ ƒe tata siwo do nyitsɔ laa la beléletɔea? Ekema kpɔe ɖa be àte ŋu aɖo biabia siwo gbɔna ŋu hã:

Ne Mawu ƒe habɔbɔa na mɔfiamewo mí la, aleke wòle be nɔviŋutsuwo, abe nutome sue dzikpɔlawo kple hamemetsitsiwo ene, nawɔ nui?

Ele be woawɔ ɖe mɔfiameawo dzi enumake. Woate ŋu abia wo ɖokuiwo be: ‘Ðe mele asi kpem ɖe nɔvi siwo dome mele ŋu be woatsi le gbɔgbɔ mea? Ðe metsona bla wɔna ɖe mɔfiafiawo dzi hekpea asi ɖe eŋu be nuwo natsɔ afɔ nyuiea?’—w16.11, axa 11.

Ɣekaɣie Kristotɔ vavãwo yi Babilon ƒe aboyo me?

Esia dzɔ ɣeyiɣi kpui aɖe le apostoloawo ƒe ku megbe. Ɣemaɣi la, wova ɖo nunɔlawo ƒe ha anyi. Ha la kple Dukɔa wɔ dɔ asi-le-asi-me do Kristotɔ xɔsegbelawo ƒe hamea ɖe ŋgɔ eye wodze agbagba be yewoade ga nu na Kristotɔ siwo le abe luwo ene. Gake tso ƒe 1800-awo ƒe nuwuwu va de asi na ƒe 1914 me la, amesiaminawo nɔ woƒe kawo tsom le wo ɖokuiwo ŋu.—w16.11, axa 23-25.

Nu ka tae dɔ si Lefèvre d’Étaples wɔ la ɖe dzesi?

Le ƒe 1520-awo me la, Lefèvre ɖe Biblia gɔme ɖe Fransegbe me ale be ame tsɛwo nate ŋu axlẽe. Ale si Lefèvre ɖe Biblia ƒe akpa aɖewo me la kpɔ ŋusẽ gã aɖe ɖe Martin Luther, William Tyndale kple John Calvin dzi.—wp16.6, axa 10-12.

Vovototo kae le “susu ɖoɖo ŋutilã la ŋu” kple “susu ɖoɖo gbɔgbɔ la ŋu” dome? (Rom. 8:6)

Ame si tsɔa susu ɖoa ŋutilãa ŋu la tsɔa eƒe susu ɖoa ŋutilã ƒe nudzodzrowo kple amegbetɔ madeblibo ƒe didiwo ŋu, eƒoa nu tso wo ŋu enuenu, eye wòkafua wo. Ke le ame si tsɔa susu ɖoa gbɔgbɔ la ŋu gome la, nu siwo ku ɖe Mawu kple eƒe lɔlɔ̃nu ŋu lae nɔa vevie nɛ le agbe me; gbɔgbɔ kɔkɔea ye fiaa mɔ Kristotɔ sia tɔgbi. Esia hea agbe kple ŋutifafa vanɛ, gake ekemɛa ya hea ku vanɛ.—w16.12, axa 15-17.

Nu kawoe nàte ŋu awɔ atsɔ aɖe dzimaɖitsitsi dzi akpɔtɔ?

Tsɔ nu vevitɔwo ɖo nɔƒe gbãtɔ, nya afi si wò ŋutete se ɖo, di tomefafaɣiwo na ɖokuiwò gbe sia gbe, kpɔ dzidzɔ ɖe Mawu ƒe nuwɔwɔwo ŋu, na wò dzi nakpɔ dzidzɔ, nɔ kame dem edziedzi, eye nàdɔ alɔ̃ nyuie.—w16.12, axa 22-23.

Gɔmesese ka nue “wokɔ Enok dzoe [le] be wòagakpɔ ku o”? (Heb. 11:5)

Anɔ eme be Mawu na Enok ku kpoo esi menɔ nyanya me nɛ be yele kukum o.—wp17.1, axa 12-13.

Nu ka tae dzesidede afi si ame ƒe ŋutete se ɖo le vevie?

Dzesidede afi si ame ƒe ŋutete se ɖo bia be míagabu mía ɖokui ŋu fũu wu ale si dze o eye míanya nu si tututu míate ŋu awɔ. Ele be míanɔ ŋudzɔ ɖe ale si míaƒe nuwɔnawo ate ŋu akpɔ ŋusẽ ɖe ame bubuwo dzii ŋu, eye míaganɔ mía ɖokui bum be míenyo wu ame bubuwo o.—w17.01, axa 18.

Kpeɖodzi kae li be Mawue fia mɔ dɔdzikpɔhaa le ƒe alafa gbãtɔ me abe ale si ko wògale mɔ fiam Dɔdzikpɔha si li egbea ene?

Gbɔgbɔ kɔkɔea kpe ɖe woamawo ŋu wose Ŋɔŋlɔawo me nyateƒewo gɔme. Wokpɔ gbeƒãɖeɖedɔa dzi le mawudɔlawo ƒe kpekpeɖeŋu me, eye woɖo ŋu ɖe Mawu ƒe Nyaa ƒe mɔfiafia ŋu. Alea kee wòle egbea hã.—w17.02, axa 26-28.

Nu kawoe nana míedea asixɔxɔ gã tafea ŋu?

Nu ene siawo le vevie: Ame si na tafea, nu si tae wòna tafea ɖo, nu si wòtsɔ sa vɔe hafi na tafea kple hiahiã vevi si gbɔ tafea kpɔ. Ele be míade ŋugble le ale si nu vovovo ene siawo do ƒome kple tafea ŋu.—wp17.2, axa 4-6.

Ne Kristotɔ tso nya me le nya aɖe ŋu vɔ la, ɖe wòagate ŋu atrɔ eƒe susua?

Ele be míawɔ míaƒe nya dzi. Ke hã, ɣeaɖewoɣi la, ahiã be míagalé ŋku ɖe nyametsotso si míewɔ va yi la ŋu. Esi Niniwetɔwo trɔ dzi me la, Mawu trɔ nu si wòtso nya me be yeawɔ la. Ɣeaɖewoɣi la, ale si nɔnɔmeawo va trɔe alo nyatakaka yeyewo abia be míawo hã míawɔ nenema ke.—w17.03, axa 16-17.

Nu ka tae afɔku le ameŋunyagbɔgblɔ si mesɔ o me?

Ate ŋu ana wòasesẽ be woakpɔ kuxi aɖe gbɔ alo ana kuxia nado gã ɖe edzi. Mía tɔ dzɔ alo mía tɔ medzɔ o, ameŋunyagbɔgblɔ si mesɔ o maɖe vi le mɔ aɖeke nu o.—w17.04, axa 21.