Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  June 2017

Ðe Nàte Ŋu Akpɔ Nu Ayi Ŋgɔ Wu Amewo Ƒe Dzedzemea?

Ðe Nàte Ŋu Akpɔ Nu Ayi Ŋgɔ Wu Amewo Ƒe Dzedzemea?

DON, si nye Yehowa Ðasefo le Canada la dzea agbagba etɔxɛe be yeaɖi ɖase na aƒemanɔsitɔ siwo tsi ablɔwo dzi. Don gblɔ tso ame siawo dometɔ ɖeka ŋu be: “Ŋutsu aɖe si ŋkɔe nye Peter la nɔ aƒemanɔsitɔ siwo ƒo ɖi wu, siwo mekpɔna le ablɔwo dzi la dome. Mekɔa mo ɖe ame kura o, eye enya ale si wòawɔ be amewo nagate ɖe ye ŋu o. Ɣesiaɣi si ame aɖe dze agbagba be yeanyo dɔme nɛ la, egbena.” Ke hã, Don gbɔ dzi ɖi nɔ nu wɔm ɖe eŋu dɔmenyotɔe ƒe 14 kple edzivɔ sɔŋ.

Gbe ɖeka, Peter bia Don be: “Nu ka tae nètsi dzi ɖe ŋunye? Ame sia ame ɖea asi le ŋunye kpoo. Nu ka tae nètsɔ ɖe le eme nam?” Don wɔ mawunyakpukpui etɔ̃ ŋu dɔ aɖaŋutɔe ale be yeƒe numeɖeɖea nawɔ dɔ ɖe Peter dzi. Gbã, ebia Peter be enya be ŋkɔ le Mawu si hã, eye wòʋu Psalmo 83:18 nɛ be eya ŋutɔ naxlẽe le Biblia me tẽe. Eyome, esi Don di be yeana Peter nanya nu si tae yetsɔ ɖe le eme nɛ ta la, exlẽ nya si le Romatɔwo 10:13, 14, si gblɔ be, “ame sia ame si yɔa Yehowa ƒe ŋkɔ la, woaɖee” la nɛ. Mlɔeba, Don xlẽ Mateo 9:36 nɛ eye wògblɔ na Peter be eya ŋutɔ hã naxlẽe. Mawunyakpukpui ma gblɔ be: “Esi wòkpɔ amehawo la, woƒe nu wɔ nublanui nɛ, elabena wowɔ fu wo, eye wotsi yame abe alẽ siwo nu kplɔla mele o la ene.” Esi Peter xlẽe vɔ la, aɖatsi lólo ɖe ŋku dzi nɛ eye wòbia Don be: “Nye hã alẽawo dometɔ ɖekae menyea?”

Peter dze tɔtrɔwɔwɔ gɔme. Ele tsi, elũ ge nyuie, eye wòdo awu nyui siwo Don tsɔ nɛ. Tso ekema dzi la, Peter nɔa dzadzɛ ɣesiaɣi.

Agbalẽ aɖe nɔ Peter si, si me wòŋlɔa ŋkekea me nudzɔdzɔwo ɖo. Nu siwo wòŋlɔ ɖe agbalẽa ƒe gɔmedzedze la wɔ nublanui, gake esiwo wòva ŋlɔ emegbe ya to vovo kura. Gbe ɖeka, eŋlɔ ɖe agbalẽa me be: “Egbea meva nya Mawu ƒe ŋkɔ. Fifia, metea ŋu doa gbe ɖa na Yehowa. Edzɔ dzi nam ŋutɔ be meva nya eƒe ŋkɔ. Don gblɔ be Yehowa ate ŋu azu Xɔ̃nye si mate  ŋu agblɔ nya sia nya na le ɣeyiɣi ɖe sia ɖe me, eye aɖo tom.”

Nya mamlɛtɔ si Peter ŋlɔ ɖe agbalẽa me la yi na eya ŋutɔ nɔviawo. Eŋlɔ bena:

“Nye lãme mele kɔkɔm egbea o. Metsi fifia, eye ewɔ nam be nye kuɣi le ɖoɖom. Ne esiae nye ŋkeke mamlɛtɔ si makpɔ ɣe hã la, menyae be magava kpɔ xɔ̃nye [Don] ake le Paradiso me. Ne miele nya sia xlẽm la, efia be nyemegali o. Gake ne miekpɔ ŋutsu aɖe le nye kuteƒe si miedze si o la, mite ɖe eŋu miaɖo dze kplii; azɔ hã, maɖe kuku na mi be miaxlẽ agbalẽ blɔ sia [Biblia-srɔ̃gbalẽ si nye “Nyateƒe, Si Kplɔa Ame Yia Agbe Mavɔ Mee,” si wotsɔ nɛ ƒe aɖewo va yi lae wòwɔnɛ]. * Agbalẽa gblɔ be magakpɔ xɔ̃nyea ake le Paradiso me. Meka ɖe esia dzi kple dzi blibo. Mia nɔvi lɔlɔ̃a, Peter.”

Esi wowɔ kua vɔ la, Peter nɔvinyɔnu Ummi gblɔ be: “Ƒe eve aɖewoe nye esia la, Peter ɖo dze aɖe kplim. Mede dzesii be enɔ dzidzɔ kpɔm; megakpɔ dzidzɔ nenema kpɔ o ƒe geɖee nye ema. Eko alɔgbɔnu gɔ̃ hã.” Ummi gblɔ na Don be: “Maxlẽ agbalẽa, elabena ne nane te ŋu wɔ dɔ ɖe nɔvinyea dzi la, ke nu tɔxɛ aɖee wòanye.” Ummi lɔ̃ hã be Yehowa Ðasefo aɖe nasrɔ̃ agbalẽ si wova ta emegbe, si nye Nuka Tututue Nye Biblia ƒe Nufiafia? kpli ye.

Míawo hã míate ŋu akpɔ nu ayi ŋgɔ wu amewo ƒe dzedzeme ko, aɖee afia be míelɔ̃ amewo vavã ahagbɔ dzi ɖi na ame ƒomeviwo katã. (1 Tim. 2:3, 4) Ne míewɔe alea la, míate ŋu akpe ɖe ame siwo le abe Peter ene, siwo ƒe dzedzeme manyo ame ŋu o, evɔ dzi nyui le wo si, la ŋu. Míate ŋu aka ɖe edzi be, Mawu, ame si “kpɔa keke dzi me ke” la, ana nyateƒea natsi le ame siwo si dzi ƒe nɔnɔme nyui le la ƒe dziwo me.—1 Sam. 16:7; Yoh. 6:44.

^ mm. 7 Yehowa Ðasefowoe tae, gake womegale etam fifia o.