Dzo kpo yi emenuwo dzi

Dzo kpo yi emenuawo dzi

Nyabiabia Siwo Tso Exlẽlawo Gbɔ

Nyabiabia Siwo Tso Exlẽlawo Gbɔ

Ðe wòasɔ be tu nanɔ Kristotɔ aɖe si be yeatsɔ akpɔ ye ɖokui ta tso ame bubuwo si mea?

Togbɔ be Kristotɔwo ate ŋu aɖe afɔ aɖewo atsɔ akpɔ egbɔ be yewole dedie hã la, womedaa Biblia me mɔfiamewo dzi le esia wɔwɔ me o. Mɔfiame siawo na wòdze ƒãa be womate ŋu azã lãnuwo, abe tuwo ene, atsɔ akpɔ wo ɖokuiwo ta tso ame bubuwo si me o. Bu nya siwo gbɔna ŋu kpɔ:

Le Yehowa gbɔ la, agbe nye nu kɔkɔe—vevietɔ, amegbetɔ ƒe agbe. Hakpala David nyae be Yehowa gbɔe “agbedzɔƒe le.” (Ps. 36:9) Eya ta, ne Kristotɔ aɖe ɖoe be yeaɖe afɔ siwo sɔ be yeatsɔ akpɔ ye ɖokui alo yeƒe nunɔamesiwo ta la, awɔ nu sia nu si wòate ŋui be wòaƒo asa na amegbetɔ ƒe agbe ɖeɖe ɖa ale be wòagaɖi ʋufɔ o.—5 Mose 22:8; Ps. 51:14.

Togbɔ be ate ŋu adzɔ be ame aɖe nazã nu bubuwo be yeatsɔ akpɔ ye ɖokui ta eye wòaɖi ʋufɔ hã la, tuzazã nana wònɔa bɔbɔe be woawu ame le manyamanya me alo aɖoe koŋ awu ame. * Gawu la, ne amedzidzela si anya tsi klokloklo xoxo la kpɔe be tu le ame kemɛa si la, esia awɔe be nɔnɔmea nado gã ɖe edzi, eye mlɔeba, ate ŋu ahe ku vɛ.

Esi Yesu gblɔ na eyomedzelawo le eƒe anyigbadzinɔnɔ ƒe zã mamlɛtɔ me be woadi yi na wo ɖokuiwo la, menye wo ɖokuiwo ta kpɔkpɔ ye nɔ susu me nɛ o. (Luka 22:36, 38) Ke boŋ, ɖe wòna wotsɔ yi vɛ be yeatsɔ afia nu vevi aɖe wo: Eyae nye be mele be ye yomedzelawo nato  ŋutasẽnuwɔnawo dzi akpɔ wo ɖokui ta o, ne ameha siwo lé lãnuwo ɖe asi la tso ɖe wo ŋu gɔ̃ hã. (Luka 22:52) Esi Petro da yi nunɔlagã la ƒe subɔvia vɔ megbe la, Yesu de se na Petro be: “Gbugbɔ wò yi la de eteƒe.” Eyome, Yesu gblɔ nyateƒenya vevi aɖe si gakpɔtɔ fiaa mɔ eyomedzelawo egbea be: “Ame siwo katã tsɔa yi ɖe ame ŋu la, yi nue woatsi.”—Mat. 26:51, 52.

Le Mika 4:3 ƒe nya nu la, Mawu ƒe amewo atsɔ “woƒe yiwo atu agblenuwoe, eye woatsɔ woƒe akplɔwo atu hɛ gobɛwoe.” Nɔnɔme sia si dea dzesi Kristotɔ vavãwo la wɔ ɖeka kple aɖaŋu si gbɔgbɔ ʋã apostolo Paulo wòɖo na Kristotɔwo be: “Migaɖo vɔ̃ vɔ̃ teƒe na ame aɖeke o. . . . Ne anya wɔ, eye wòanye nu si atso mia gbɔ la, minɔ anyi kple amewo katã le ŋutifafa me.” (Rom. 12:17, 18) Togbɔ be Paulo ɖo afɔku geɖe me eye ‘eɖo ŋɔdzi me le adzodalawo si me’ hã la, ewɔ nu wòsɔ kple eya ŋutɔ ƒe nyawo. Mebu eya ŋutɔ ƒe dedienɔnɔ ŋu ale gbegbe be wòŋe aɖaba ƒu Ŋɔŋlɔawo ƒe mɔfiamewo dzi kpɔ gbeɖe o. (2 Kor. 11:26) Ke boŋ, eɖo ŋu ɖe Mawu kple nunya si le Mawu ƒe Nyaa me ŋu—enyae be nunya ma “nyo wu aʋawɔnuwo.”—Nyagb. 9:18.

Kristotɔwo bua agbea be exɔ asi sãsãsã wu nunɔamesiwo. ‘Nu siwo le ame si la mana agbee o.’ (Luka 12:15) Eya ta, ne nuƒoƒo kple adzodala aɖe tufafatɔe mewɔ dɔ ɖe edzi o la, Kristotɔwo wɔna ɖe mɔfiame si dze le Yesu ƒe nya siawo me dzi: “Migatsi tsitre ɖe ame vɔ̃ɖi la ŋu o.” Ate ŋu ahiã gɔ̃ hã be míatsɔ míaƒe awutewuiwo kple awudziwuiwo anɛ, le kpɔɖeŋunyagbɔgblɔ nu. (Mat. 5:39, 40; Luka 6:29) * Gake afɔɖeɖe nyuitɔe nye be míaƒo asa na nu siwo ana adzodalawo natɔ ŋku mí. Ne míeƒo asa na míaƒe “nunɔamesiwo fiafia adegbeƒoƒotɔe” eye míaƒe aƒelikawo nya mí be míenye Yehowa Ðasefo siwo lɔ̃a ŋutifafa la, ate ŋu awɔe be adzodalawo matɔ ŋku mí o.—1 Yoh. 2:16; Lod. 18:10.

Kristotɔwo bua ame bubuwo ƒe dzitsinya ŋu. (Rom. 14:21) Ne haxɔsetɔwo va nyae be tu le hamea me tɔ aɖe si be yeatsɔ akpɔ ye ɖokui ta tso ame bubuwo si me la, awɔ nuku na wo dometɔ aɖewo, alo azu nukikli na wo gɔ̃ hã. Ðewohĩ, gome le mía si le se nu be tu nanɔ mía si, gake esi míelɔ̃ mía nɔvi Kristotɔwo ta la, mímadi gbeɖe be míaɖe afɔ si míenya be ate ŋu azu nukikli na wo o.—1 Kor. 10:32, 33; 13:4, 5.

Kristotɔwo dzea agbagba be yewoanye kpɔɖeŋu nyui ɖolawo. (2 Kor. 4:2; 1 Pet. 5:2, 3) Ne tu le Kristotɔ aɖe si be yeatsɔ akpɔ ye ɖokui ta tso ame bubuwo si me eye wotsɔ Ŋɔŋlɔawo ɖo aɖaŋu nɛ gake edo toku aɖaŋuɖoɖoa la, meganye kpɔɖeŋu nyui ɖola o. Eya ta, madze na agbanɔamedziwo alo subɔsubɔmɔnukpɔkpɔ tɔxɛwo xɔxɔ le hamea me o. Alea kee wòanɔ le Kristotɔ si tsɔa tu ɖe asi le eƒe dɔwɔɖui ta la hã gome. Aleke gbegbe wòanyo wue nye esi be wòadi dɔ bubu awɔ! *

Nu si Kristotɔ aɖe atia be yeatsɔ akpɔ ye ɖokui, yeƒe ƒomea, alo yeƒe nunɔamesiwo ta la nye eya ŋutɔ ƒe nya, eye nenema kee wòle le dɔwɔɖuinyawo hã gome. Togbɔ be ele alea hã la, ele be míawɔ Biblia me mɔfiamewo ŋu dɔ le míaƒe nyametsotsowo me. Mía Mawu si si nunya geɖe le la na mɔfiame mawo mí le esi wòlɔ̃ mí ta. Esia tae Kristotɔ siwo tsi le xɔse me la tiae be tu manɔ yewo si be yewoatsɔ akpɔ yewo ɖokui ta tso ame bubuwo si me o. Wonyae be ne yewoɖo ŋu ɖe Mawu ŋu henɔ agbe ɖe Biblia me mɔfiamewo nu la, yewoakpɔ dedienɔnɔ vavãtɔ si nɔa anyi ɖaa.—Ps. 97:10; Lod. 1:33; 2:6, 7.

Le xaxa gãa me la, Kristotɔwo aɖo ŋu ɖe Yehowa ŋu, womadze agbagba be yewoakpɔ yewo ɖokui ta tso amedzidzelawo si me o

^ mm. 3 Kristotɔ aɖe ate ŋu atiae be tu nanɔ ye si (eɖanye gã alo sue o) kple susu be yeatsɔ ada ade akpɔ lã aɖu alo atsɔ akpɔ ye ɖokui ta tso lã wɔadãwo si me. Gake ɣeyiɣi si me mele ezãm o la, anyo be wòaɖe tukpeawo le eme, alo kura gɔ̃ hã, wòaɖe eƒe akpa vovovoawo ɖa le wo nɔewo ŋu ahatsɔe adzra ɖo nyuie. Le dukɔ siwo me se meɖe mɔ ɖe tu ƒe amesinɔnɔ nu le o, alo esiwo me dziɖuɖua de se alo wɔ ɖoɖo ɖe eƒe amesinɔnɔ ŋu me la, ele be Kristotɔwo nawɔ ɖe sea dzi.—Rom. 13:1.

^ mm. 2 Kpɔ nyati si nye “Alesi Nàxe Mɔ Ðe Gbɔwò Dɔdɔ Sesẽe Nu,” si dze le May 8, 1993, ƒe Nyɔ! me, be nàxlẽ nu tso ale si ame ate ŋu aʋli eɖokui ta be woagadɔ egbɔ sesẽe o ŋu.

^ mm. 4 Àkpɔ nyatakaka bubuwo ku ɖe dɔwɔɖui si bia be tu nanɔ ame si ƒe nyaa ŋu le November 1, 2005, ƒe Gbetakpɔxɔ me, axa 31; kple July 15, 1983 tɔ, si le yevugbe me la me, axa 25-26.