Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  July 2017

Yehowa “Nena . . . Wò Ðoɖowo Katã Nadze Edzi Na Wò”

Yehowa “Nena . . . Wò Ðoɖowo Katã Nadze Edzi Na Wò”

“Yehowa ƒe nu nenyo ŋuwò vevie, ekema ana nu siwo wò dzi di la wò.”—PS. 37:4.

HADZIDZI: 135, 81

1. Nu ka ŋue wòle be sɔhɛ ɖe sia ɖe natso nya me le ku ɖe eƒe etsɔme ŋu, gake nu ka tae mele be wòatsi dzimaɖi fũu le eŋu o? (Kpɔ foto si le nyati sia ƒe gɔmedzedze.)

MI SƆHƐWO, mialɔ̃ ɖe edzi godoo be hafi miazɔ mɔ aɖe la, nunya le eme be miawɔ ɖoɖo ɖe afi si miayi ŋu. Agbea le abe mɔzɔzɔ ene, eye ɣeyiɣi si me wòle be miawɔ ɖoɖo ɖe agbea ŋue nye esime miekpɔtɔ nye sɔhɛwo. Enye nyateƒe be esia menɔa bɔbɔe ɣesiaɣi o. Nyɔnuvi aɖe si ŋkɔe nye Heather gblɔ be: “Esia doa ŋɔdzi nam. Ebia be matso nya me le nu si mawɔ le nye agbemeŋkekeawo katã me ŋu.” Ne esia wɔwɔ doa ŋɔdzi na mi la, miɖo ŋku edzi be Yehowa gblɔ na eƒe amewo be: “Mègatsi dzi o, elabena nyee nye wò Mawu. Mado ŋusẽ wò; makpe ɖe ŋuwò.”—Yes. 41:10.

2. Aleke nèwɔ nya be Yehowa di be nàwɔ ɖoɖo ɖe wò agbe ŋu ale be nàkpɔ dzidzɔ le etsɔme?

2 Yehowa le dzi dem ƒo na wò be nàwɔ ɖoɖo ɖe wò etsɔme ŋu le nunya me. (Nyagb. 12:1; Mat. 6:20) Edi be nàkpɔ dzidzɔ. Eƒe nuwɔwɔ dodzidzɔname siwo nèkpɔna, esiwo ƒe gbeɖiɖi nèsena kple nuɖuɖu vivi siwo nèɖuna la ɖo kpe esia dzi. Bu ale si wòléa be na mí kple ale si wòfiaa mɔ nyuitɔ si nu míanɔ agbe ɖo la mí hã ŋu kpɔ. Yehowa gblɔ na ame siwo gbe eƒe aɖaŋuɖoɖowo la be: “Nu si medzea ŋunye o lae mietia. . . . Kpɔ ɖa! Nye subɔlawo akpɔ dzidzɔ, ke  miawo la, ŋu akpe mi. Kpɔ ɖa! Nye subɔlawo atso aseye le dzi ƒe dzidzɔkpɔkpɔ ta.” (Yes. 65:12-14) Ne míetso nya me nyuie le agbe me la, míehea ŋutikɔkɔe vɛ na Yehowa.—Lod. 27:11.

TAÐODZINU SIWO ANA NÀKPƆ DZIDZƆ

3. Nu kae Yehowa di be nàwɔ?

3 Nu kae Yehowa di be nàtsɔ wò agbea awɔ? Hafi nàte ŋu akpɔ dzidzɔ vavãtɔ la, ehiã be nànya Yehowa ahasubɔe nuteƒewɔwɔtɔe. Aleae Yehowa wɔ mí. (Ps. 128:1; Mat. 5:3) Esia to vovo sãsãsã na ale si wòwɔ lãwoe. Nu siwo lãwo wɔna koe nye be woaɖu nu, ano nu ahadzi viwo. Gake to vovo na nu mawo la, Mawu di be nàwɔ ɖoɖo ɖe nu bubuwo hã ŋu ale be nàkpɔ dzidzɔ. Wɔwòla la nye ‘lɔlɔ̃ ƒe Mawu’ kple “Mawu dzidzɔtɔ,” ame si wɔ amegbetɔwo ɖe ‘eƒe nɔnɔme nu.’ (2 Kor. 13:11; 1 Tim. 1:11; 1 Mose 1:27) Ne èsrɔ̃ mía Mawu si nye lɔlɔ̃ ƒe Mawu la ƒe nɔnɔme la, àkpɔ dzidzɔ. Ŋɔŋlɔawo gblɔ be: “Dzidzɔ geɖe le nunana me wu nuxɔxɔ.” (Dɔw. 20:35) Ðe wò ŋutɔ èkpɔ nya ma ƒe nyateƒenyenye teƒe kpɔa? Esia nye nyateƒenya vevi aɖe le amegbetɔwo ƒe agbe me. Eya ta, Yehowa di be ɖoɖo si nàwɔ ɖe wò agbe ŋu la naku ɖe ale si nàɖe lɔlɔ̃ afia Mawu kple ame bubuwo ŋu.—Xlẽ Mateo 22:36-39.

4, 5. Nu kae na Yesu kpɔ dzidzɔ?

4 Yesu Kristo ɖo kpɔɖeŋu deblibo ɖi na mi sɔhɛwo. Esime wònye ɖevi la, ɖikeke mele eme o be efe fefe hekpɔ dzidzɔ. Mawu ƒe Nyaa gblɔ be, “nukoɣi li . . . eye ɣeɖuɣi li.” (Nyagb. 3:4) Yesu srɔ̃ Ŋɔŋlɔawo hã, si wɔe be wòte ɖe Yehowa ŋu kplikplikpli. Esi wòxɔ ƒe 12 la, nufiala siwo nɔ gbedoxɔa me la ƒe mo wɔ yaa ‘le eƒe nugɔmesese kple eƒe nyaŋuɖoɖowo ŋuti.’—Luka 2:42, 46, 47.

5 Yesu tsi va zu ame ɖɔʋu si nye dzidzɔme. Nu kae na wòkpɔ dzidzɔ? Tsɔ kpe ɖe dɔ bubu siwo Mawu de esi ŋu la, enyae be Mawu di hã be ‘yeagblɔ nya nyui na ame dahewo eye yeana ŋkuagbãtɔwo nakpɔ nu.’ (Luka 4:18) Nu si na Yesu kpɔ dzidzɔe nye be ewɔ nu si Mawu di tso esi. Psalmo 40:8 ɖe ale si Yesu se le eɖokui me la gblɔ nyuie ale: “Oo nye Mawu, wò lɔlɔ̃nu wɔwɔe nye nye dzidzɔ.” Yesu ƒe dzidzɔe wònye be yeafia nu amewo tso ye Fofo si le dziƒo la ŋu. (Xlẽ Luka 10:21.) Esia tae esi Yesu fia nu nyɔnu aɖe tso mawusubɔsubɔ vavãtɔ ŋu vɔ la, egblɔ na eƒe nusrɔ̃lawo be: “Nye nuɖuɖue nye be mawɔ ame si dɔm ɖa la ƒe lɔlɔ̃nu, eye mawu dɔ si wòde asi nam la nu.” (Yoh. 4:31-34) Esi Yesu ɖe lɔlɔ̃ fia Mawu kple ame bubuwo ta la, ekpɔ dzidzɔ. Ne wò hã èwɔ esia la, àkpɔ dzidzɔ godoo.

6. Nu ka tae wònyo be nàdzro ɖoɖo si nèwɔ ɖe wò agbe ŋu la me kple Kristotɔ kpɔnuteƒewo?

6 Kristotɔ geɖe dze mɔɖeɖedɔa gɔme esime wonye sɔhɛwo, eye esia na wokpɔ dzidzɔ. Ðe manyo be nàƒo nu tso ɖoɖo si nèwɔ ɖe wò agbe ŋu la ŋu na wo oa? “Afi si adaŋudede mele o la, tameɖoɖowo tsia akpo dzi, ke afi si aɖaŋuɖola geɖewo le la, nuwo dzea edzi.” (Lod. 15:22) Kristotɔ siawo siwo tsi le xɔse me la agblɔ na wò be hehe si nàxɔ le ɣeyiɣiawo katã ƒe subɔsubɔdɔa me la aɖe vi na wò le wò agbemeŋkekewo katã me. Esi Yesu ɖe mɔ Fofoa fia nui le dziƒo vɔ la, egayi edzi srɔ̃ nu geɖe le eƒe anyigba dzi subɔsubɔdɔa me. Le kpɔɖeŋu me, eya ŋutɔ kpɔ dzidzɔ si gbegbe wònyena be woafia nu amewo wòaɖo woƒe dzi gbɔ la teƒe, eye enya dzidzɔ si wònyena ne wowɔ nuteƒe le dodokpɔwo me hã. (Xlẽ Yesaya 50:4; Heb. 5:8; 12:2) Azɔ, na míadzro ɣeyiɣiawo katã ƒe subɔsubɔdɔ siwo ate ŋu ana nàkpɔ dzidzɔ la dometɔ aɖewo me kpɔ.

NU SI TAE NUSRƆ̃LAWƆWƆDƆAE NYE DƆ NYUITƆ

7. Nu ka tae sɔhɛ geɖe kpɔa dzidzɔ le nusrɔ̃lawɔwɔdɔa me?

7 Yesu gblɔ be: “Miheyi ɖawɔ dukɔwo . . . me tɔwo woanye nusrɔ̃lawo, . . . miafia [nu] wo.” (Mat. 28:19, 20) Ne èwɔ ɖoɖo be yeatsɔ nusrɔ̃lawɔwɔdɔa awɔ wò agbemedɔe  la, ekema, dɔ si naa dzidzeme wu, si hea ŋutikɔkɔe vɛ na Mawue nye ema nètia. Abe ale si wòle le dɔ ɖe sia ɖe gome ene la, axɔ ɣeyiɣi hafi nàva bi ɖe dɔ sia me. Nyitsɔ laa la, nɔviŋutsu aɖe si ŋkɔe nye Timothy, si dze mɔɖeɖedɔa gɔme esime wònye sɔhɛ la gblɔ be: “Ɣeyiɣiawo katã ƒe subɔsubɔdɔa doa dzidzɔ nam, elabena eyae nye mɔ si dzi metona ɖenɛ fiana Yehowa be melɔ̃e. Le gɔmedzedzea me la, nyemete ŋu dze Biblia-nusɔsrɔ̃ aɖeke gɔme o, gake emegbe meʋu yi anyigbamama bubu me, eye medze Biblia-nusɔsrɔ̃ geɖe gɔme le ɣleti ɖeka ko me. Nye nusrɔ̃vi ɖeka te kpekpeawo dede le Fiaɖuƒe Akpata me. Esi mede ɣleti eve ƒe hehenasuku si nye Nɔviŋutsu Trewo Ƒe Bibliasrɔ̃sukua * megbe la, woɖom ɖe anyigbamama bubu me, eye medze Biblia-nusɔsrɔ̃ ene gɔme le afi ma. Nufiafia amewo doa dzidzɔ nam, elabena enana mekpɔa ale si gbɔgbɔ kɔkɔea le woƒe agbenɔnɔ trɔm.”—1 Tes. 2:19.

8. Nu kae sɔhɛ Kristotɔ aɖewo wɔ ale be woate ŋu aɖe gbeƒã na ame geɖe wu?

8 Kristotɔ sɔhɛ aɖewo srɔ̃ gbe bubu. Le kpɔɖeŋu me, Jacob, si tso North America la, gblɔ be: “Esime mexɔ ƒe adre la, nye sukuhati geɖewo nye Vietnamtɔwo. Medi be maƒo nu tso Yehowa ŋu na wo, eya ta, le ɣeyiɣi aɖe megbe la, mewɔ ɖoɖo be masrɔ̃ wo degbea. Nu si mewɔ koŋue nye be, metsɔa Eŋlisigbe me Gbetakpɔxɔ me nyawo sɔna kple Vietnamgbe me tɔwo. Medze xɔlɔ̃wo hã le Vietnamgbedolawo ƒe hame aɖe si te ɖe mía ŋu la me. Esi mexɔ ƒe 18 la, medze mɔɖeɖedɔa gɔme. Emegbe, mede Nɔviŋutsu Trewo Ƒe Bibliasrɔ̃sukua. Esia le vi ɖem nam le afi si mele mɔɖeɖedɔa wɔm le fifia. Nye ɖeka koe nye hamemetsitsi le Vietnamgbedolawo ƒe ƒuƒoƒo si me mele la me. Ewɔa nuku na Vietnamtɔ geɖewo be mesrɔ̃ woƒe gbea. Woxɔam nyuie, eye zi geɖe la, metea ŋu dzea Biblia-sɔsrɔ̃ gɔme kpli wo. Wo dometɔ aɖewo va xɔ nyɔnyrɔ.”—Tsɔe sɔ kple Dɔwɔwɔwo 2:7, 8.

9. Mɔ ka nue nusrɔ̃lawɔwɔdɔa naa hehe mí le?

9 Nusrɔ̃lawɔwɔdɔa ana hehe wò nàzu ame si léa fɔ ɖe dɔ ŋu, ana nàbi ɖe nuƒoƒo me, dzi anɔ ƒowò, eye ànye ame si ɖɔa ŋu ɖo le nuwɔwɔ kple amewo me. (Lod. 21:5; 2 Tim. 2:24) Gake nu si koŋ ana nàkpɔ dzidzɔ le nusrɔ̃lawɔwɔdɔa mee nye be, akpe ɖe ŋuwò nànya Ŋɔŋlɔ siwo ɖo kpe wò dzixɔsewo dzi la nyuie. Akpe ɖe ŋuwò hã be nàsrɔ̃ ale si nàwɔ dɔ aduadu kple Yehowa.—1 Kor. 3:9.

10. Ne èle anyigbamama si metsea ku o me gɔ̃ hã la, aleke nàwɔ akpɔ dzidzɔ le nusrɔ̃lawɔwɔdɔa me?

10 Ne ame geɖe melɔ̃na be yewoasrɔ̃ Biblia le anyigbamama si me nèle me o gɔ̃ hã la, àte ŋu akpɔ dzidzɔ le nusrɔ̃lawɔwɔdɔa me. Menye ame ɖeka ƒe dɔe nusrɔ̃lawɔwɔdɔa nye o. Hame bliboa kpea asi ɖe dzi anukwaretɔwo didi ŋu. Togbɔ be ɖewohĩ nɔvi ɖeka koe ke ɖe ame aɖe si va zu nusrɔ̃la ŋu hã la, hame bliboa kpe asi ɖe amewo didi ŋu, eye wo katã woakpɔ dzidzɔ. Le kpɔɖeŋu me, Brandon wɔ mɔɖeɖedɔa le anyigbamama matseku aɖe me ƒe asieke sɔŋ. Egblɔ be: “Gbeƒãɖeɖe nya nyuia doa dzidzɔ nam, elabe eyae nye dɔ si Yehowa de asi na mí be míawɔ. Esi mewu suku nu teti koe medze mɔɖeɖedɔa gɔme. Melɔ̃a dzidede ƒo na sɔhɛ siwo le míaƒe hamea me eye dzi dzɔam ne mekpɔ ale si wole ŋgɔyiyi wɔm le hamea me. Esi mede Nɔviŋutsu Trewo Ƒe Bibliasrɔ̃sukua megbe la, woɖom ɖe anyigbamama bubu me be mayi mɔɖeɖedɔa dzi le afi ma. Togbɔ be ame siwo mesrɔ̃ nu kple le anyigbamamaa me la dometɔ aɖeke mexɔ nyɔnyrɔ o hã la, nɔvi bubuwo ƒe nusrɔ̃viwo xɔ nyɔnyrɔ. Edzɔ dzi nam ŋutɔ be mewɔ ɖoɖo kpɔ gome le nusrɔ̃lawɔwɔdɔa me bliboe.”—Nyagb. 11:6.

MƆNUKPƆKPƆ SIWO ATE ŊU ASU ASIWÒ

11. Subɔsubɔdɔ kɔkɔea ƒe akpa ka mee sɔhɛ geɖe le gome kpɔm le?

11 Subɔsubɔdɔ ƒe mɔnukpɔkpɔ geɖe le  ʋuʋu ɖi na mi. Le kpɔɖeŋu me, sɔhɛ geɖe tsɔ wo ɖokuiwo na faa le gome kpɔm le xɔtudɔwo me. Ehiã be habɔbɔa natu Fiaɖuƒe Akpata alafa geɖe. Xɔ siawo tutu hea ŋutikɔkɔe vɛ na Mawu. Eye asikpekpe ɖe dɔ sia ŋu ana nàkpɔ dzidzɔ. Abe ale si ko wòle le subɔsubɔdɔ kɔkɔe bubuawo gome ene la, dzi adzɔ wò be nàde ha kple wò hadɔwɔlawo. Teokrasixɔtudɔwo hã ana hehe wò, elabena woana nàsrɔ̃ dedienɔnɔ ƒe vevienyenye, àsrɔ̃ veviedodonu kpakple dɔwɔwɔ aduadu kple dɔa dzi kpɔlawo.

Ame siwo ƒo wo ɖokui ɖe ɣeyiɣiawo katã ƒe subɔsubɔdɔa me la akpɔ yayra geɖe (Kpɔ memama 11-13)

12. Aleke mɔɖeɖedɔa ate ŋu ana subɔsubɔmɔnukpɔkpɔ bubuwo nasu asiwò?

12 Nɔviŋutsu aɖe si ŋkɔe nye Kevin gblɔ be: “Tso nye ɖevime kee meɖoe be mava wɔ ɣeyiɣiawo katã ƒe subɔsubɔdɔ na Yehowa gbe ɖeka. Mlɔeba, esi mexɔ ƒe 19 la, medze mɔɖeɖedɔa gɔme. Mewɔa dɔ ŋkeke aɖewo na nɔviŋutsu aɖe si nye xɔtula ale be mate ŋu akpɔ ɖokuinye dzi. Mesrɔ̃ xɔgbagba kpakple fesrewo kple ʋɔtruwo dede. Emegbe, mewɔ dɔ kple kpekpeɖeŋunadɔwɔla siwo naa kpekpeɖeŋu nɔvi siwo ŋu ahom gblẽ nu le hena ƒe eve; míetu Fiaɖuƒe Akpatawo hedzra nɔviwo ƒe aƒewo hã ɖo. Esi mese be wohiã xɔtudɔwɔlawo le South Africa la, mede asi dɔbiagbalẽ te be mayi, eye wokpem. Le Afrika afi sia la, ne mekpɔ gome le Fiaɖuƒe Akpata tutu dɔ aɖe me hena kwasiɖa ʋɛ aɖewo megbe la, meyia teƒe bubu ɖakpea asi ɖe Fiaɖuƒe Akpata tutu dɔ bubu ŋu. Nye kple nye xɔtuha me tɔwo míele abe ƒome ene. Mí katã míenɔa teƒe ɖeka, míesrɔ̃a Biblia ɖekae hewɔa dɔ ɖekae. Gbeƒãɖeɖedɔa wɔwɔ kple nutoa me nɔviwo kwasiɖa sia kwasiɖa hã doa dzidzɔ nam. Ðoɖo si mewɔ tso nye ɖevime ke la na meva le dzidzɔ kpɔm wu ale si mesusui gɔ̃ hã.”

13. Aleke Betel subɔsubɔdɔa nana sɔhɛwo kpɔa dzidzɔ?

13 Sɔhɛ aɖewo siwo wɔ ɖoɖo be yewoawɔ ɣeyiɣiawo katã ƒe subɔsubɔdɔ na Yehowa la le subɔsubɔm le Betel fifia. Betel  subɔsubɔdɔa nye agbemedɔ nyui aɖe si me dzidzɔ geɖe le, elabena dɔ ɖe sia ɖe si nàwɔ le afi ma la nye subɔsubɔdɔwɔwɔ na Yehowa. Betel-ƒomea kpea asi ɖe Biblia kple Biblia-srɔ̃gbalẽ siwo kpena ɖe amewo ŋu wosrɔ̃a nyateƒea la tata ŋu. Betel-ƒomea me tɔ aɖe si ŋkɔe nye Dustin gblɔ be: “Tso esime mexɔ ƒe asieke kee meɖoe be mawɔ ɣeyiɣiawo katã ƒe subɔsubɔdɔa, eye medze mɔɖeɖedɔa gɔme esi mewu suku nu. Ƒe ɖeka kple afã megbe la, wokpem be mava subɔ le Betel. Esi meyi Betel la, mesrɔ̃ agbalẽtamɔ̃ zazã, emegbe mesrɔ̃ kɔmpiutadzidɔwɔɖoɖo ŋu dɔ wɔwɔ hã. Esi mele Betel ta la, mesea ale si gbeƒãɖeɖedɔa le dzidzedze kpɔm le xexea me katã la ŋuti nyatakakawo tẽe. Subɔsubɔ le afi sia doa dzidzɔ nam, elabe dɔ siwo míewɔna la kpena ɖe amewo ŋu wova nyaa Yehowa helɔ̃nɛ.”

ÐOÐO KAE NÀWƆ ÐE WÒ ETSƆME ŊU?

14. Nu kawoe nàte ŋu awɔ fifia atsɔ adzra ɖo ɖe ɣeyiɣiawo katã ƒe subɔsubɔdɔa wɔwɔ ŋu?

14 Aleke nàte ŋu adzra ɖo ɖe ɣeyiɣiawo katã ƒe subɔsubɔdɔa wɔwɔ ŋu? Hafi nàte ŋu asubɔ Yehowa nyuie la, ehiã be nàtu Kristotɔwo ƒe nɔnɔme nyuiwo ɖo. Eya ta, do vevie Mawu ƒe Nya la sɔsrɔ̃, de ŋugble le eŋu, eye nàdze agbagba aʋu wò xɔse me le hamea ƒe kpekpewo me. Esime nègakpɔtɔ le suku dem la, dze agbagba nàbi ɖe nya nyuia gbɔgblɔ na amewo me. Srɔ̃ ale si nàɖe ɖetsɔleme afia amewo hã. Àte ŋu awɔ esia ne ètsɔa ŋuɖɔɖo biaa woƒe susu le nyawo ŋu eye nèɖoa to wo nyuie ne wole nu ƒom. Azɔ hã, àte ŋu atsɔ ɖokuiwò ana faa be yeakpe asi ɖe dɔwo ŋu le miaƒe hamea me. Esia ƒe ɖewoe nye Fiaɖuƒe Akpata me dzadzraɖo kple beléle nɛ. Edzea Yehowa ŋu be yeazã ame siwo bɔbɔa wo ɖokuiwo ɖe anyi hetsɔa wo ɖokuiwo nana faa alea. (Xlẽ Psalmo 110:3; Dɔw. 6:1-3) Apostolo Paulo kpe Timoteo be wòawɔ ɖeka kpli ye le dutanyanyuigbɔgblɔdɔa me, elabena nɔviwo “ƒo nu nyui le eŋu.”—Dɔw. 16:1-5.

15. Ðoɖo kae nàte ŋu awɔ be nàkpɔ ɖokuiwò dzi le mɔɖeɖedɔa me?

15 Le go geɖe me la, ehiã be dɔwɔɖui nanɔ mɔɖelawo si. (Dɔw. 18:2, 3) Ðewohĩ, àte ŋu asrɔ̃ dɔ ɣeyiɣi kpui aɖe le dɔsrɔ̃suku be wòakpe ɖe ŋuwò nàkpɔ ɣeyiɣi aɖe ƒe dɔ si hiã le miaƒe nutoa me. Ne èle ɖoɖoa wɔm la, ƒo nu kple miaƒe nutome sue dzikpɔla kple mɔɖela siwo le miaƒe nutome suea me. Bia wo be dɔwɔɖui kae asɔ na mɔɖelawo hã. Eyome, abe ale si Biblia gblɔe ene la, “tsɔ wò dɔ ɖe sia ɖe de asi na Yehowa, ekema wò ɖoɖowo adze edzi.”—Lod. 16:3; 20:18.

16. Ne èsubɔ Yehowa bliboe esime nènye sɔhɛ la, aleke esia ate ŋu adzra wò ɖo ɖe agbanɔamedzi bubuwo tsɔtsɔ ŋu le etsɔme?

16 Ka ɖe edzi be Yehowa di be wò “asi nasu” etsɔme si me dzidzɔ vavã le dzi. (Xlẽ 1 Timoteo 6:18, 19.) Ɣeyiɣiawo katã ƒe subɔsubɔdɔa wɔwɔ ana nàva nɔ ha dem kple ɣeyiɣiawo katã ƒe subɔla bubuwo, eye esia akpe ɖe ŋuwò nàtsi le xɔse me. Ame geɖe kpɔe be esi yewosubɔ Yehowa bliboe le yewoƒe sɔhɛme ta la, esia kpe ɖe yewo ŋu yewole dzidzɔ kpɔm le yewoƒe srɔ̃ɖeɖe me. Zi geɖe la, ame siwo nɔ mɔɖeɖedɔa wɔm hafi va ɖe srɔ̃ la tea ŋu yia mɔɖeɖedɔa dzi ɖekae le woƒe srɔ̃ɖeɖea megbe.—Rom. 16:3, 4.

17, 18. Akpa kae wò dzi awɔ ne èle ɖoɖo wɔm ɖe wò etsɔme ŋu?

17 Dzi la wɔa akpa vevi aɖe ne ame le ɖoɖo wɔm ɖe etsɔme ŋu. Psalmo 20:4 gblɔ tso Yehowa ŋu be: “Nena nu si wò dzi di la wò eye wòana wò ɖoɖowo katã nadze edzi na wò.” Eya ta, bu tame le nu si nèdi be nàtsɔ wò agbe awɔ ŋu. De ŋugble le nu si wɔm Yehowa le le míaƒe ŋkekea me kple nu si nàte ŋu awɔ atsɔ akpe asi ɖe eƒe dɔa ŋu la ŋu. Eyome, ɖoe wò taɖodzinu be nàwɔ nu si adze eŋu.

18 Ne sɔhɛ ye nènye la, zã wò agbea nàtsɔ asubɔ Yehowa bliboe fifia. Esia ana nàkpɔ dzidzɔ geɖe, elabena esia ahe ŋutikɔkɔe vɛ nɛ. Ɛ̃, “Yehowa ƒe nu nenyo ŋuwò vevie, ekema ana nu siwo wò dzi di la wò.”—Ps. 37:4.

^ mm. 7 Fiaɖuƒe Nyanyuigblɔlawo Ƒe Sukua va xɔ ɖe suku sia teƒe.