Dzo kpo yi emenuwo dzi

Dzo kpo yi emenuawo dzi

Di Kesinɔnu Vavãwo

Di Kesinɔnu Vavãwo

“Mitsɔ kesinɔnu madzɔmadzɔwo dze xɔlɔ̃woe na mia ɖokuiwo.”—LUKA 16:9.

HADZIDZI: 122, 129

1, 2. Nu ka tae ame dahewo anɔ nuɖoanyi sia me godoo?

EGBEA, xexe sia me asitsanuɖoanyia wɔe be nu de ame aɖewo dzi, evɔ agbea sesẽ na ame bubuwo ya. Sɔhɛwo le dɔwɔɖui dim do kpoe. Ame geɖe tsɔ woƒe agbe de afɔku me zɔ mɔ yi dukɔ deŋgɔwo me. Ahedada le afi sia afi; ele dukɔ siwo me nu de amewo dzi le gɔ̃ hã me. Eye kesinɔtɔwo le kesinɔnu geɖe kpɔm esime agbea yi edzi le sesẽm na ame dahewo ya. Akɔntabubu aɖe si wowɔ nyitsɔ laa la ɖee fia be, ne woma anyigbadzinɔlawo katã ɖe akpa alafa ɖeka me la, akpa ɖeka si le tsitre ɖi na kesinɔtɔwo la ƒe kesinɔnuwo sɔ kple anyigbadzinɔla susɔeawo katã ƒe kesinɔnuwo. Togbɔ be esesẽ be woaɖo kpe akɔntabubu sia dzi hã la, ame aɖeke make ɖi be anyigbadzinɔla miliɔn teƒe akpe geɖe da ahe kolikoli, evɔ kesinɔnu gbogbo si nu dzidzime geɖe anɔ agbe ɖo la le ame aɖewo ya si o. Nublanuinya sia dze ƒãa le nya si Yesu gblɔ be, “Ame dahewo le mia gbɔ ɖaa” la me. (Marko 14:7) Nu ka tae nuwo le alea ɖo?

2 Yesu nyae be Mawu Fiaɖuƒea koe ate ŋu aɖe fifi asitsanuɖoanyia ɖa. Dunyahenuɖoanyia, subɔsubɔhawo kple asitsala ŋuklẽlawo ƒe nuɖoanyia, si nye ‘asitsala’ si ŋu Nyaɖeɖefia 18:3 ƒo nu tsoe la katã nye Satana ƒe xexea ƒe akpa aɖe. Togbɔ be Mawu ƒe amewo ɖe wo ɖokui ɖa keŋkeŋ le dunyahehe kple alakpasubɔsubɔ me hã la, wo dometɔ akpa gãtɔ mate ŋu aɖe wo ɖokui ɖa  keŋkeŋ le Satana ƒe xexe sia me asitsanuɖoanyia ŋu o.

3. Biabia kawo mee míadzro?

3 Anyo be mí Kristotɔwo míabia nya siwo gbɔna la mía ɖokuiwo atsɔ adzro mía ɖokui me kpɔ be aleke míebua xexe sia me asitsanuɖoanyia mahã. Míate ŋu abia mía ɖokui be: ‘Mɔ ka nue mawɔ nye nunɔamesiwo ŋu dɔ le atsɔ aɖe nye nuteƒewɔwɔ na Mawu afia? Aleke mate ŋu aƒo asa na xexe sia me asitsanuɖoanyia ŋu dɔ wɔwɔ bliboe? Nuteƒekpɔkpɔ kawoe ɖee fia be Mawu ƒe amewo ɖoa ŋu ɖe eyama ŋu bliboe le ɣeyiɣi sesẽ siawo me?’

AƑEDZIKPƆLA MADZƆMADZƆ LA ŊUTI KPƆÐEŊUA

4, 5. (a) Nu kae dzɔ ɖe aƒedzikpɔla si ŋu Yesu ƒo nu tsoe la dzi? (b) Aɖaŋu kae Yesu ɖo na eyomedzelawo?

4 Xlẽ Luka 16:1-9. Yesu ƒe kpɔɖeŋu si ku ɖe aƒedzikpɔlaa ŋu la nana ame bua tame. Esi wotsɔ nya ɖe eŋu be ele eƒe aƒetɔ ƒe nuwo dome gblẽm la, ‘edze aɖaŋu’ ‘hedze xɔlɔ̃wo,’ ale be woava kpe ɖe ye ŋu ne woxɔ aƒedzikpɔkpɔdɔa le ye si. * Menye ɖe Yesu nɔ dzi dem ƒo na eƒe nusrɔ̃lawo be woato mɔ madzɔmadzɔ dzi akpɔ woƒe agbemenuhiahiãwo le xexe sia me o, ke boŋ, egblɔ be ‘nuɖoanyi sia me viwoe’ wɔa nu nenema. Ke hã, ezã kpɔɖeŋua tsɔ ɖe nya vevi aɖe me.

5 Yesu nyae be abe ale si aƒedzikpɔlaa ƒe nɔnɔmewo va trɔ kpata ene la, asesẽ na ye yomedzelawo dometɔ geɖewo be woakpɔ wo ɖokuiwo dzi le xexe sia ƒe asitsanuɖoanyi madzɔmadzɔ la me. Eya ta, eɖo aɖaŋu na wo be: “Mitsɔ kesinɔnu madzɔmadzɔwo dze xɔlɔ̃woe na mia ɖokuiwo, ale be ne wo nu va yi la, [Yehowa kple Yesu naxɔ] mi ɖe nɔƒe mavɔwo.” Nu kae míate ŋu asrɔ̃ tso Yesu ƒe aɖaŋuɖoɖoa me?

6. Aleke míewɔ nya be fifi asitsanuɖoanyia menɔ Mawu ƒe tameɖoɖo me o?

6 Togbɔ be Yesu meɖe nu si tae wòyɔ kesinɔnuawo be kesinɔnu “madzɔmadzɔwo” la me o hã la, Biblia na eme kɔ ƒãa be asitsatsa menɔ Mawu ƒe tameɖoɖo me o. Yehowa na nu siwo Adam kple Xawa hiã la wo le agbɔsɔsɔ gã aɖe me. (1 Mose 2:15, 16) Emegbe, esi wokɔ gbɔgbɔ kɔkɔe ɖe amesiaminawo ƒe hamea dzi le ƒe alafa gbãtɔ me la, “wo dometɔ ɖeka pɛ hã megblɔna be nu siwo le ye si la nye ye ŋutɔ ye tɔ o, ke boŋ wowɔa nuwo katã ɖekae.” (Dɔw. 4:32) Nyagblɔɖila Yesaya gblɔ ɣeyiɣi si me amegbetɔwo katã awɔ anyigbadzinuwo ŋu dɔ femaxee la ŋu nya ɖi. (Yes. 25:6-9; 65:21, 22) Gake hafi ɣemaɣi naɖo la, ele be Yesu yomedzelawo ‘nadze aɖaŋu’ ale be woawɔ xexe sia me “kesinɔnu madzɔmadzɔwo” ŋu dɔ atsɔ akpɔ wo ɖokuiwo dzi, eye le ɣeyiɣi ma ke me la, woadze Mawu ŋu.

DZE AÐAŊU LE KESINƆNU MADZƆMADZƆWO ZAZÃ ME

7. Aɖaŋuɖoɖo kae dze le Luka 16:10-13?

7 Xlẽ Luka 16:10-13. Aƒedzikpɔla si ŋu Yesu ƒo nu tsoe le kpɔɖeŋua me la dze xɔlɔ̃wo le eya ŋutɔ ƒe viɖe ta. Ke hã, Yesu de dzi ƒo na eyomedzelawo be woadze xɔlɔ̃wo na wo ɖokuiwo le dziƒo, gake menye le ɖokuitɔdidi ta o. Nya siwo wògblɔ le kpɔɖeŋua yome la fia be edi be míanyae be ale si míezãa míaƒe “kesinɔnu madzɔmadzɔwo” ate ŋu aɖee afia nenye be míewɔa nuteƒe na Mawu loo, alo míewɔa nuteƒe nɛ o. Yesu ƒe nyae nye be, ne kesinɔnu mawo su mía si la, ‘míanye nuteƒewɔlawo’ ne míewɔ wo ŋu dɔ nyuie. Aleke míawɔ esiae?

8, 9. Gblɔ ale si ame aɖewo le eɖem fia be yewonye nuteƒewɔlawo le ale si wozãa woƒe kesinɔnu madzɔmadzɔwoe me ƒe kpɔɖeŋu.

8 Mɔ aɖe si dzi míate ŋu ato awɔ nuteƒe le míaƒe nunɔamesiwo ŋu dɔ wɔwɔ me ye  nye be míadzɔ nu atsɔ akpe asi ɖe xexea me katã ƒe gbeƒãɖeɖedɔ si ŋu nya Yesu gblɔ ɖi be woawɔ la ŋu. (Mat. 24:14) Nyɔnuvi dzaa aɖe si le India la nɔ gakuwo dzram ɖo vivivi ɖe gaɖakavi aɖe si le esi la me, eye meƒlea fefenuwo gɔ̃ hã o le esia ta. Esi aɖakavia yɔ la, etsɔ gaa na be woatsɔ akpe asi ɖe gbeƒãɖeɖedɔa ŋu. Nɔviŋutsu aɖe si le India, si si negble le la tsɔ ne gbogbo aɖewo yi na nɔviwo le Malayalam gbegɔmeɖedɔwɔƒea, elabena eƒe susue nye be esi wòhiã be dɔwɔƒea naƒle newo ta la, ne ye ŋutɔ yetsɔ neawo yi na wo la, aɖe vi geɖe wu gadzɔdzɔ. Esia nye aɖaŋudzedze. Nenema kee nɔvi siwo le Greece hã tsɔa ami, nyinotsibabla kple nuɖuɖu vovovowo yina na Betel ƒomea edziedzi.

9 Nɔviŋutsu aɖe si tso Sri Lanka, si ʋu ɖale duta fifia la tsɔ eƒe aƒe kple anyigba na be woanye kpekpewo kple takpekpewo wɔƒe kpakple dzeƒe na ɣeyiɣiawo katã ƒe subɔlawo. Ema nye ga gbogbo aɖe si nɔvia tsɔ sa vɔe, ke hã, enye kpekpeɖeŋu gã aɖe na nutoa me gbeƒãɖela siwo dzi nu mede kura o. Le dukɔ aɖe si me woɖo asi dɔa dzi le me la, nɔviwo tsɔ woƒe aƒewo na be woazã wo abe Fiaɖuƒe Akpatawo ene, si wɔe be mɔɖelawo kple gbeƒãɖela bubu geɖe siwo dzi nu mede o la kpɔ afi si woawɔ kpekpewo le femaxee.

10. Ne míeʋua asi me naa nu amewo faa la, yayra kawoe míakpɔ?

10 Kpɔɖeŋu mawo ɖee fia be Mawu ƒe amewo “wɔa nuteƒe le nu suetɔ me.” (Luka 16:10) Wozãa woƒe nunɔamesiwo tsɔ kpea asi ɖe subɔsubɔdɔa ŋu. Ne Yehowa xɔlɔ̃wo tsɔ woƒe nunɔamesiwo sa vɔe la, aleke wosena le wo ɖokui me? Wonyae be nunana faa alea nye mɔ aɖe si dzi yewoato be kesinɔnu “vavã” nasu yewo si. (Luka 16:11) Nɔvinyɔnu aɖe si dzɔa ga tsɔ doa alɔ Fiaɖuƒedɔa edziedzi la gblɔ tso yayra aɖe si wòkpɔ ŋu be: “Esi menaa nu faa ta la, mekpɔ yayra le mɔ wɔnuku aɖe nu le ƒe siawo katã me. Mekpɔe be zi ale si meʋua asi me faa la, zi nenemae nye nuwɔwɔ ɖe amewo ŋu ganyona ɖe edzii. Mekpɔe be eva le bɔbɔe nam be matsɔ ake, magbɔ dzi ɖi na amewo, alɔ̃ faa axɔ aɖaŋuɖoɖo, eye mado dzi ne nu si mele mɔ kpɔm na meva eme o.” Ame geɖe kpɔe be dɔmenyonyo ɖe vi na yewo le mɔ geɖe nu.—Ps. 112:5; Lod. 22:9.

11. (a) Ne míenaa nu faa la, aleke esia ɖenɛ fiana be ‘míedze aɖaŋu’? (b) Nu kae le edzi yim le Mawu ƒe amewo dome egbea? (Kpɔ foto si le nyati sia ƒe gɔmedzedze.)

11 Ne míezãa míaƒe nunɔamesiwo tsɔ doa Fiaɖuƒea ƒe nuwo ɖe ŋgɔ la, esia hã nye mɔ bubu aɖe si dzi míetona ɖenɛ fiana be ‘míedze aɖaŋu.’ Enaa mɔnukpɔkpɔ mí be míakpe ɖe ame bubuwo ŋu. Ame siwo si xexe sia me kesinɔnuwo le evɔ womate ŋu awɔ ɣeyiɣiawo katã ƒe subɔsubɔdɔa alo aʋu ayi teƒe si hiahiã geɖe wu le o la kpɔa dzidzɔ be ga si yewodzɔna la kpena ɖe ame bubuwo ŋu le subɔsubɔdɔa me. (Lod. 19:17) Le kpɔɖeŋu me, míaƒe lɔlɔ̃nu faa nudzɔdzɔwo wɔnɛ be wotea ŋu taa agbalẽwo hekpea asi ɖe gbeƒãɖeɖedɔa ŋu le nuto siwo me ahedada xɔ aƒe ɖo evɔ ame geɖewo le nyateƒea me vam la me. Ƒe aɖewo va yi la, Biblia xɔ asi ŋutɔ le dukɔwo abe Congo, Madagascar kple Rwanda ene me. Ɣeaɖewoɣi la, Biblia ƒe home tea ŋu nyena kwasiɖa ɖeka alo  ɣleti ɖeka ƒe dɔwɔfetu. Eya ta, ehiãna be nɔviwo natiae nenye be woaƒle nuɖuɖu na woƒe ƒomea loo alo woaƒle Biblia. Gake fifia, míaƒe nudzɔdzɔwo wɔe be Yehowa ƒe habɔbɔa ɖea Biblia gɔme hemanɛ na ƒomewo kple Biblia nusrɔ̃viwo femaxee “be nuwo nasɔ pɛ.” (Xlẽ 2 Korintotɔwo 8:13-15.) Esia wɔe be ame siwo naa nu kple ame siwo xɔa nu la siaa va zua Yehowa xɔlɔ̃wo.

ALE SI MÍAWƆ BE MÍAGAZÃ ƔEYIƔI FŨU ÐE “ASITSADƆ SIWO AMEWO WƆNA LE AGBE ME” LA ŊU O

12. Aleke Abraham ɖee fia be yeɖo ŋu ɖe Mawu ŋu?

12 Mɔ bubu aɖe si dzi míato azu Yehowa xɔlɔ̃ ye nye be míaɖe ɣeyiɣi si míezãna ɖe asitsadɔ siwo amewo wɔna le agbe me ŋu la dzi akpɔtɔ, eye míazã mɔnukpɔkpɔa atsɔ adi kesinɔnu ‘vavãwo.’ Abraham, si nye nuteƒewɔla si nɔ anyi le blema la ɖo to Mawu ƒe gbe heʋu tso Ur, si nye du si me kesinɔnuwo bɔ ɖo la me ale be yeaɖanɔ avɔgbadɔwo me eye yeana ye kple Yehowa dome nanɔ kplikplikpli. (Heb. 11:8-10) Ekpɔ Mawu, ame si nye kesinɔnu vavãwo Tsoƒe la sinu ɣesiaɣi. Meti ŋutilãmenuwo yome gbeɖe o, elabena esia aɖee afia be meɖo ŋu ɖe Mawu ŋu o. (1 Mose 14:22, 23) Yesu kafu xɔse sia ƒomevi esi wògblɔ na ɖekakpui kesinɔtɔ aɖe be: “Ne èdi be yeazu blibo la, yi nàdzra nu siwo le asiwò la nàtsɔ ga la ana ame dahewo, ekema kesinɔnuwo anɔ asiwò le dziƒo; eye nàva dze yonyeme.” (Mat. 19:21) Xɔse si nɔ Abraham si la menɔ ŋutsu ma si o, gake ame bubuwo ya ɖo ŋu ɖe Mawu ŋu bliboe.

13. (a) Aɖaŋu kae Paulo ɖo na Timoteo? (b) Aleke míate ŋu awɔ ɖe Paulo ƒe aɖaŋuɖoɖoa dzi egbea?

13 Timoteo nye ame si si xɔse nɔ. Esi Paulo yɔ Timoteo be “Kristo Yesu ƒe asrafo nyui” vɔ la, egblɔ nɛ be: “Ame si le asrafodɔ wɔm la megaƒoa eɖokui ɖe asitsadɔ siwo amewo wɔna le agbe me la me o, ale be wòadze ame si xɔe ɖe asrafodɔa me la ŋu.” (2 Tim. 2:3, 4) Egbea, Yesu yomedzelawo, siwo dome ɣeyiɣiawo katã ƒe subɔla miliɔn ɖeka kple edzivɔwo le la, wɔa Paulo ƒe aɖaŋuɖoɖoa dzi le ale si woƒe nɔnɔmea ɖe mɔe nu. Womeɖea mɔ boblododowo kple ame siwo dome wole ƒe nuwɔnawo kpɔa ŋusẽ ɖe wo dzi o, elabena woɖoa ŋku Biblia me mɔfiame vevi sia si gblɔ be, “Ame si doa nu le ame si la zua kluvi na ame si si wòdo nua le” la dzi. (Lod. 22:7) Adzɔ dzi na Satana ŋutɔ be yeana míazã míaƒe ɣeyiɣi kple ŋusẽ katã agbla ɖe dɔwɔwɔ ŋu le xexe sia me asitsanuɖoanyia me abe kluviwo ene. Míaƒe nyametsotso aɖewo ate ŋu awɔe be míazu fenyilawo ƒe geɖe. Ame aɖewo doa ga gbogbowo tsɔ ƒlea aƒe alo ʋu xɔasiwo, tsɔ dea suku alo wɔa srɔ̃ɖeɖe kpeɖiwo gɔ̃ hã, eye esia hea wo dea gakuxi sesẽwo me. Míeɖenɛ fiana be míedze aɖaŋu ne míenɔa agbe tsɛ eye míeƒoa asa na fenyinyi kple gagbegblẽ. Ne míewɔe alea la, míavo awɔ subɔsubɔdɔ na Mawu tsɔ wu be míazu kluviwo na xexe sia ƒe asitsanuɖoanyia.—1 Tim. 6:10.

14. Nu kae wòle be míaɖo kplikpaa be míawɔ? Gblɔ eƒe kpɔɖeŋu aɖewo.

14 Hafi míate ŋu anɔ agbe tsɛ la, ehiã be míatsɔ nu siwo le vevie wu la aɖo nɔƒe gbãtɔ. Le kpɔɖeŋu me, dɔwɔƒe gã aɖe nɔ atsu kple asi aɖe si. Gake esi woɖoe be yewoagawɔ ɣeyiɣiawo katã ƒe subɔsubɔdɔa ake ta la, wodzra woƒe dɔwɔƒea, tɔdziʋu si nɔ wo si kple nunɔamesi bubuwo. Eyome, wotsɔ wo ɖokui na faa be yewoakpe asi ɖe habɔbɔa ƒe dɔwɔƒegã la tutu ŋu le Warwick, New York. Esia na mɔnukpɔkpɔ tɔxɛ aɖe su wo si: eyae nye be woa kple wo vinyɔnua kple srɔ̃a siaa wosubɔ le Betel, eye woa kple wo toyɔvia dzilawo wokpɔ gome le Warwick xɔtudɔa me kwasiɖa aɖewo. Nɔvinyɔnu mɔɖela aɖe si le Colorado, Amerika, la kpɔ ɣeyiɣi aɖe ƒe dɔ le gadzraɖoƒe aɖe. Gadzraɖoƒea ƒe dɔdzikpɔlawo kpɔ ŋudzedze ɖe eƒe dɔwɔwɔ ŋu ale gbegbe be wogblɔ nɛ be yewoaxɔe ɖe dɔa me koŋ eye yewoaxe  eƒe dɔwɔfetua teƒe etɔ̃ nɛ. Ke hã, esi wònye be dɔa mana wòakpɔ vovo ɖe subɔsubɔdɔa ŋu o ta la, egbe. Esiawo nye ale si Yehowa subɔlawo tsɔa nuwo saa vɔe la ƒe kpɔɖeŋu ʋɛ aɖewo ko. Eɖoɖo kplikpaa atsɔ Fiaɖuƒea ƒe nuwo aɖo nɔƒe gbãtɔ alea ɖenɛ fiana be míedea asixɔxɔ mɔnukpɔkpɔ si su mía si be míawɔ kesinɔnu vavãwo le Mawu gbɔ ahanye exɔlɔ̃wo la ŋu wu ŋutilãmenuwo.

NE ŊUTILÃMEKESINƆNUWO NU VA YI

15. Kesinɔnu kawoe nana míekpɔa dzidzeme vavãtɔ?

15 Ŋutilãmekesinɔnuwo ƒe amesinɔnɔ menye kpeɖodzi be Mawu kpɔ ŋudzedze ɖe amea ŋu o. Yehowa yraa ame siwo nye “kesinɔtɔwo le dɔ nyuiwo wɔwɔ me.” (Xlẽ 1 Timoteo 6:17-19.) Le kpɔɖeŋu me, esi Lucia * se be wohiã gbeƒãɖela geɖe wu le Albania la, eʋu tso Italy le ƒe 1993 me yi afi ma. Togbɔ be menya dɔ si wòawɔ atsɔ akpɔ eɖokui dzi le dukɔ ma me o hã, eɖo ŋu ɖe Yehowa ŋu bliboe. Eva ɖu tu na Albaniagbea, eye wòkpe ɖe ame ɖekaɖeka 60 ŋu wotsɔ wo ɖokui ɖe adzɔgbe na Yehowa. Togbɔ be Mawu ƒe amewo dometɔ akpa gãtɔ meɖea gbeƒã le anyigbamama siwo tsea ku alea me o hã, nu sia nu si míewɔna tsɔ kpena ɖe amewo ŋu wova kena ɖe agbemɔa ŋu henɔa edzi la nye kesinɔnu siwo ŋu míawo ŋutɔwo kple woawo siaa míade asixɔxɔe tegbee.—Mat. 6:20.

16. (a) Nu kae ava dzɔ ɖe egbegbe asitsanuɖoanyia dzi? (b) Esi esia le nyanya na mí ta la, aleke wòle be míabu ŋutilãmekesinɔnuwoe?

16 Yesu gblɔ be: “Ne [kesinɔnu madzɔmadzɔwo] nu va yi la.” Megblɔ be, ‘ɖewohĩ, wo nu ava yi o,’ si fia be wo nu ava yi godoo. (Luka 16:9) Ale si gadzraɖoƒewo ɖua agba eye ga ŋuti ɖoɖowo tɔtɔna le ŋkeke mamlɛ siawo me la maɖi naneke o ne wotsɔe sɔ kple nu si gbɔna dzɔdzɔ ge kpuie le anyigba bliboa dzi. Satana ƒe nuɖoanyi bliboa, si me dunyahehe, subɔsubɔ kple asitsanuɖoanyia siaa le la nu ava yi godoo. Nyagblɔɖila Ezekiel kple Zefaniya gblɔ nya ɖi be sika kple klosalo, siwo nye adzɔnu veviwo tso blema ke la, magava ɖi naneke o. (Eze. 7:19; Zef. 1:18) Ne míeva ɖo xexe sia ƒe nuwuwu eye míekpɔe dze sii be míeli kɔ “kesinɔnu madzɔmadzɔwo” ɖi gleglegle evɔ mímede asixɔxɔ aɖeke kesinɔnu vavãwo ŋu o la, aleke míase le mía ɖokui me? Míate ŋu ase le mía ɖokui me abe ŋutsu aɖe si wɔ dɔ le eƒe agbemeŋkekeawo katã me heƒo ga gbogbo aɖe nu ƒu ɖi, eyome wòva de dzesii be ga manyomanyo sɔŋ ko yeli kɔ ɖi la ene. (Lod. 18:11) Ɛ̃, kesinɔnu mawo nu ava yi, eya ta, mègana mɔnukpɔkpɔ si su asiwò be nàwɔ wo ŋu dɔ atsɔ ‘adze xɔlɔ̃wo’ le dziƒo la nato ŋuwò o. Nu sia nu si míewɔna tsɔ doa Yehowa ƒe Fiaɖuƒea ƒe nuwo ɖe ŋgɔ la ana míazu kesinɔtɔwo le Mawu gbɔ.

17, 18. Nu kawoe Mawu xɔlɔ̃wo le mɔ kpɔm na?

17 Ne Mawu Fiaɖuƒea va la, xɔfetu kple gadodo nu ayi, nuɖuɖu abɔ eye mímaxe fe ɖe wo ta o, mímagahiã ɖɔktawo alo atikewo o. Yehowa ƒe ƒomea ƒe akpa si le anyigba dzi la ase vivi na anyigba dzi nu nyuitɔwo. Sika, klosalo kple kpe xɔasiwo azu atsyɔ̃ɖonuwo, ke menye kesinɔnu siwo woali kɔ ɖi ɖe ɣaɣlaƒe o. Xɔtunu siwo nye atiwo kple kpewo kpakple ga adodoeawo abɔ míatsɔ atu aƒe nyuiwo femaxee. Xɔlɔ̃wo akpe asi ɖe mía ŋu le dzidzɔkpɔkpɔ kple vivisese ta, ke menye ɖe ga ta o. Ɣemaɣi la, mí katã míama anyigba dzi nu vavãwo.

18 Nu xɔasi siwo asu ame siwo wɔ xɔlɔ̃ na wo ɖokuiwo le dziƒo si la ƒe akpa sue aɖe koe nye esia. Seɖoƒe manɔe na dzidzɔ si gbegbe Yehowa subɔla siwo le anyigba dzi la akpɔ o, vevietɔ ne wosee Yesu gblɔ na wo be, “Miva, mi ame siwo Fofonye yra, minyi Fiaɖuƒe si wodzra ɖo ɖi na mi tso xexea ƒe gɔmeɖoanyiɣi la dome.”—Mat. 25:34.

^ mm. 4 Yesu megblɔe nenye be nya si wotsɔ ɖe aƒedzikpɔlaa ŋu la le eme loo alo mele eme o. Helagbe me nya si gɔme woɖe le Luka 16:1 be “wova tso enu” la agate ŋu afia be ɖe wogblẽ aƒedzikpɔlaa ŋu. Ke hã, Yesu he susu yi afɔ si aƒedzikpɔlaa ɖe dzi, ke menye nu si tae wole dɔ xɔm le esi la dzi o.

^ mm. 15 Lucia Moussanett ƒe agbemeŋutinya dze le July 8, 2003, ƒe Nyɔ! me, axa 28-32.