Dzo kpo yi emenuwo dzi

Dzo kpo yi emenuawo dzi

Woho Aʋa Ðe Wò Susu Ŋu​—Ʋli Sesĩe Nàɖu Dzi

Woho Aʋa Ðe Wò Susu Ŋu​—Ʋli Sesĩe Nàɖu Dzi

WOHO aʋa ɖe ŋuwò! Wò futɔ gãtɔ, Satana, le aʋawɔnu sesẽ aɖe zãm ɖe ŋuwò. Nu kae wònye? Eyae nye ameflunyawo! Enye aʋawɔnu aɖe si ŋu wòtrɔ asi le be wòagblẽ nu le wò susu ŋu, ke menye wò ametia ŋu o.

Apostolo Paulo nɔ ŋudzɔ ɖe ale si Satana ƒe ameflunyawo ate ŋu agblẽ nui ŋu, gake menɔ alea le ehati Kristotɔwo katã gome o. Le kpɔɖeŋu me, edze abe wo dometɔ aɖewo siwo nɔ Korinto la ka ɖe wo ɖokuiwo dzi fũu akpa ene—wosusu be yewoli ke le nyateƒea me ale gbegbe be yewomate ŋu adze anyi gbeɖe o. (1 Kor. 10:12) Esia tae Paulo xlɔ̃ nu wo be: “Mele vɔvɔ̃m be le mɔ aɖe nu la, ale si da la tsɔ eƒe ayedzedze ble Xawa la, ɖewohĩ woagblẽ miaƒe susu be miate ɖa tso anukwareɖiɖi kple dzadzɛnyenye si Kristo la dze na la gbɔ.”—2 Kor. 11:3.

Paulo ƒe nyawo ɖee fia kɔtɛ be afɔku le eme be míaka ɖe mía ɖokui dzi fũu akpa. Hafi nàte ŋu aɖu aʋa si woho ɖe wò susu ŋu dzi la, ele be nànya nu si ameflunyawo ate ŋu agblẽ le ŋuwò eye nàkpɔ ɖokuiwò ta.

ALEKE GBEGBEE AFƆKU LE AMEFLUNYAWO ME?

Nu kae nye ameflunya? Le nyati sia me la, enye nya si mele eteƒe o alo nyatakaka si akplɔ ame atra, si ŋu wotrɔ asi le be wòakpɔ ŋusẽ ɖe amewo ƒe tamebubu kple nuwɔnawo dzi. Ame aɖewo gblɔna be nu siwo ameflunya lɔ ɖe emee nye be “woaka aʋatso, atro gbo nya, able ame, woakplɔ ame atrae ahakpɔ ŋusẽ ɖe ame ƒe susu dzi,” eye wogblɔ tso eŋu be enye “nu si medze o, egblẽa nu le ame ŋu, eye wònye ametɔtrɔ to eme.”—Propaganda and Persuasion.

Aleke gbegbee ameflunyawo gblẽa nu le ame ŋui? Etea ŋu kpɔa ŋusẽ ɖe ame ƒe tamesusu dzi vivivi le eya ŋutɔ ƒe manyamanya me, abe ale si aɖiya vɔ̃ɖi si meʋẽna gɔ̃ hã o la gblẽa nu le ame ŋu ene. Le esia ta, Vance Packard si nye amegbetɔwo ƒe agbenɔnɔ ŋuti nunyala bibi aɖe gblɔ  be: “Wole ŋusẽ kpɔm ɖe mía dometɔ geɖe dzi eye míewɔa ame bubuwo ƒe susuwo dzi wu ale si míesusui gɔ̃ hã.” Agbalẽnyala aɖe hã gblɔ be ameflunyawo wɔe be wokplɔ ŋutsuwo kple nyɔnuwo trae “bɔbɔe ale be woƒo wo ɖokuiwo ɖe bometsinuwɔna siwo me afɔku le la me”—esiawo ƒe ɖewoe nye ‘ameƒomevi alo to aɖe me tɔwo tsɔtsrɔ̃ ɖa kura, aʋawɔwɔ kpakple fuléle amewo le woƒe ŋutigbalẽ ƒe vovototo, alo subɔsubɔha si me wole ta kple nuwɔna bubu geɖe siwo me susu mele o.’—Easily Led—A History of Propaganda.

Azɔ ne amegbetɔwo gɔ̃ hã ate ŋu ato ameflunyawo dzi akpɔ ŋusẽ ɖe mía dzi alea gbegbe ɖe, ke nu kae nèsusu be Satana ya ate ŋu awɔ? Ele ŋku lém ɖe amegbetɔwo ƒe nuwɔnawo ŋu tso wo wɔɣi ke. Eye fifia, “xexe blibo la katã” le eƒe ŋusẽ te. Ate ŋu awɔ xexe sia si le eƒe ŋusẽ te la ƒe akpa ɖe sia ɖe ŋu dɔ atsɔ akaka eƒe alakpanyawo. (1 Yoh. 5:19; Yoh. 8:44) Satana te ŋu ‘gbã ŋku na amewo ƒe tamesusu’ ale gbegbe be fifia, ele “anyigbadzinɔlawo katã blem.” (2 Kor. 4:4; Nyaɖ. 12:9) Nu kae nàwɔ be eƒe ameflunyawo nagakpɔ ŋusẽ ɖe dziwò o?

DO ŊUSẼ WÒ XƆSE

Yesu gblɔ mɔ si dzi míato akpɔ mía ɖokui ta tso ameflunyawo si me la kpuie ale: ‘Midze si nyateƒe la, eye nyateƒe la ana ablɔɖe mi.’ (Yoh. 8:31, 32) Esi wònye be ne aʋa dzɔ la, nyateƒenyawoe wotroa gboe gbã zi geɖe ta la, ehiã be nyatakakatsoƒe si ŋu kakaɖedzi le nanɔ asrafo ɖe sia ɖe, si le aʋagbedzi la si, ale be wòagadze futɔwo ƒe mɔ̃ me o. Nenema kee wòle be wòanɔ le wò hã gowòme, ale be futɔ la nagakpɔ ŋusẽ ɖe wò tamesusuwo dzi o. Yehowa na nyatakakatsoƒe sia wò. Eyae nye Biblia. Àte ŋu akpɔ nu sia nu si akpe ɖe ŋuwò be Satana ƒe ameflunyawo nagakpɔ ŋusẽ ɖe dziwò o la le eme.—2 Tim. 3:16, 17.

Satana, si nye ameflula gãtɔ la, hã nya esia nyuie. Eya ta, ewɔa eƒe nuɖoanyia ŋu dɔ tsɔ hea mí ɖa le Biblia-xexlẽ kple esɔsrɔ̃ ŋu. Mègaɖe mɔ eƒe ayemenuwɔna vɔ̃wo nakpɔ ŋusẽ ɖe dziwò o! (Ef. 6:11, etenuŋɔŋlɔ) Dze agbagba ‘nàse nyateƒe bliboa gɔme’ tsitotsito. (Ef. 3:18) Esia abia be nàku kutri geɖe. Gake ɖo ŋku nyateƒenya vevi aɖe si agbalẽŋlɔla, Noam Chomsky, gblɔ la dzi. Egblɔ be: “Ame aɖeke mate ŋu atrɔ nu si nye nyateƒe la akɔ ɖe susu me na wò o. Wò ŋutɔe adii na ɖokuiwò.” Eya ta, ‘dii na ɖokuiwò’ to ‘Ŋɔŋlɔawo me dzodzro tsitotsito gbe sia gbe’ kutrikukutɔe dzi.—Dɔw. 17:11.

Hafi nàte ŋu aɖu aʋa si woho ɖe wò susu ŋu dzi la, ele be nànya nu si ameflunyawo ate ŋu agblẽ le ŋuwò eye nàkpɔ ɖokuiwò ta

Nenɔ susu me na wò be Satana medi be nàbu nuwo ŋu nyuie ahase nyateƒenya siwo nèse la  gɔme o. Nu ka tae? Agbalẽ aɖe si ƒo nu tso amewo kple nyakakamɔnuwo ŋu la gblɔ be ameflunyawo “kpɔa ŋusẽ ɖe amewo dzi bɔbɔe wu ne . . . wose nya siwo awɔe be womagabu nuwo ŋu nyuie o.” (Media and Society in the Twentieth Century) Eya ta, mègaxɔ nya sia nya si nèse la dzi se eŋu mabumabui o. (Lod. 14:15) Wɔ tamebubuŋutete si Mawu na wò la ŋu dɔ be nàwɔ nyateƒea tɔwòe.—Lod. 2:10-15; Rom. 12:1, 2.

NƆ ŊUDZƆ ÐE AGBAGBA SIWO DZEM FUTƆA LE BE YEADE MAMA MÍA DOME AHAÐU MÍA DZI LA ŊU

Aʋawɔdaŋudelawo tea ŋu wɔa ameflunyawo ŋu dɔ ale be futɔwo navɔ̃ eye woƒe lãme nafa ɖe aʋawɔwɔ ŋu. Woate ŋu ana futɔawo ŋutɔwo nawɔ aʋa kple wo nɔewo alo woaflu wo be woaɖe wo ɖokui ɖe aga tso woawo ŋutɔwo ƒe asrafohaa ŋu. Germanytɔwo ƒe aʋafia aɖe gblɔ be nu si tae woɖu yewo dzi le Xexemeʋa Gbãtɔ mee nye be, futɔwo ƒe “ameflunyawo kpɔ ŋusẽ ɖe dukɔa dzi ale gbegbe be wotɔtɔ le wo ɖokui me eye womenya nu si woawɔ o, abe ale si ko fɔmizi tɔtɔna ne ekpɔ da ene.” Satana hã wɔa aɖaŋu ma ke ŋu dɔ, elabe edzea agbagba be yeama mía me ahaɖu mía dzi. Le kpɔɖeŋu me, edina be yeade masɔmasɔ nɔvi Kristotɔwo dome alo ana woase le wo ɖokui me be wowɔ nu madzɔmadzɔ ɖe yewo ŋu, ale be woaɖe wo ɖokui ɖe aga tso Yehowa ƒe habɔbɔa gbɔ.

Mègana Satana naflu wò o! Na Mawu ƒe Nya la nafia mɔ wò. Le kpɔɖeŋu me, Biblia ɖo aɖaŋu na mí le nu si míawɔ be ɖekawɔwɔ nanɔ mía kple mía nɔvi Kristotɔwo dome ŋu esi wòde dzi ƒo na mí be míayi edzi ‘atsɔ anɔ mía nɔewo kem faa,’ eye míawɔ kaba akpɔ masɔmasɔwo gbɔ. (Kol. 3:13, 14; Mat. 5:23, 24) Biblia xlɔ̃ nu mí vevie be míagaɖe mía ɖokui ɖe aga tso hamea gbɔ o. (Lod. 18:1) Zã nyabiase siwo gbɔna nàtsɔ ado ɖokuiwò kpɔ be èle dzadzraɖoɖi be Satana ƒe ameflunyawo nagaɖu dziwò o hã. Bia ɖokuiwò be: ‘Esi nɔvi aɖe dze agɔ le dzinye nyitsɔ laa la, nu kae kpɔ ŋusẽ ɖe nye nuwɔna dzi? Xexea ƒe gbɔgbɔe loo alo Mawu ƒe gbɔgbɔa ye?’—Gal. 5:16-26; Ef. 2:2, 3.

KA ÐE AME SIWO LE ŊGƆ XƆM LA DZI

Ne asrafo aɖe megaka ɖe eƒe kplɔla dzi o la, megawɔa aʋa nyuie o. Eya ta, ameflulawo dzea agbagba be yewoaƒã ɖikeke ɖe asrafowo me be woagaka ɖe woƒe kplɔlawo dzi alo aɖo ŋu ɖe wo ŋu o. Woate ŋu awɔ ameflunya siawo ƒomevi ŋu dɔ: “Miaƒe kplɔlawo menye ame siwo dzi woate ŋu aka ɖo o!” alo “Migana woakplɔ mi ade  afɔku me o!” Gawu la, woate ŋu ahe futɔawo ƒe susu ayi vodada aɖewo siwo woƒe kplɔlawo wɔ va yi la dzi ayetɔe ale be woaxɔ woƒe ameflunyawo dzi ase. Satana hã wɔa esia. Edzea agbagba ɣesiaɣi be yeana míagaka ɖe ame siwo dzi Yehowa to le eƒe amewo kplɔm la dzi o.

Aleke nàkpɔ ɖokuiwò ta? Ðoe kplikpaa be nàku ɖe Yehowa ƒe habɔbɔa ŋu eye nàwɔ nu aduadu kple ame siwo le ŋgɔ xɔm la nuteƒewɔwɔtɔe, togbɔ be womede blibo o hã. (1 Tes. 5:12, 13) Ne xɔsegbelawo alo ameflula bubuwo gblɔ nya vɔ̃wo ɖe habɔbɔa ŋu eye wòdze abe woƒe nyawo le eme ene gɔ̃ hã la, mègana ‘woatɔtɔ wò susu kaba o.’ (2 Tes. 2:2; Tito 1:10) Wɔ ɖe aɖaŋu si woɖo na sɔhɛ Timoteo la dzi. Lé nyateƒe si nèsrɔ̃ la me ɖe asi, eye nàɖo ŋku ame siwo gbɔ nèsrɔ̃e le la dzi. (2 Tim. 3:14, 15) Ðikeke mele eme o be susu geɖewo li siwo tae wòle be nàyi edzi aka ɖe ame siwo zãm Yehowa le ƒe alafa ɖeka kloe ye nye esia wole mía kplɔm le nyateƒemɔa dzi la dzi ɖo.—Mat. 24:45-47; Heb. 13:7, 17.

MÈGAVƆ̃ FUTƆ LA ƑE ŊƆDZIDODOWO O

Nenɔ susu me na wò be menye ameflunya siwo nya kpɔna dzea si bɔbɔe la koe Satana zãna ɣesiaɣi o. Ɣeaɖewoɣi la, ewɔa ŋɔdzidodowo, si nye “ameflumɔnu xoxotɔwo dometɔ ɖeka” la ŋu dɔ. (Easily Led—A History of Propaganda) Le kpɔɖeŋu me, Nufialagã Philip M. Taylor, si nye Britaintɔ la gblɔ tso Asiriatɔwo ŋu be, wotoa “ŋɔdzinuwɔwɔwo kple ameflunyawo” dzi kpɔa ŋusẽ ɖe woƒe futɔwo dzi. Satana awɔ amegbetɔvɔvɔ̃, vɔvɔ̃ na yometiti, vɔvɔ̃ na ku kple ŋɔdzidonu bubu ɖe sia ɖe ŋu dɔ adze agbagba be yeakpɔ ŋusẽ ɖe dziwò be nàdzudzɔ Yehowa subɔsubɔ.—Yes. 8:12; Yer. 42:11; Heb. 2:15.

Mègaɖe mɔ Satana nazã vɔvɔ̃ atsɔ aɖe dzi le ƒowò alo agblẽ wò nuteƒewɔwɔ me o. Yesu gblɔ be: “Migavɔ̃ ame siwo wua ŋutilã, eye le esia megbe la womegatea ŋu wɔa naneke wu ema o la o.” (Luka 12:4) Ka ɖe edzi bliboe be Yehowa awɔ ŋugbe si wòdo be yeakpɔ tawò, yeana “ŋusẽ si gbɔ dzɔdzɔmetɔ ŋu la” wò, eye yeakpe ɖe ŋuwò be dzi nanɔ ƒowò togbɔ be futɔ la adze agbagba be yeado ŋɔdzi na wò be nàna ta hã la dzi.—2 Kor. 4:7-9; 1 Pet. 3:14.

Ele eme be ɣeaɖewoɣi la, nanewo ate ŋu adzɔ siwo ana nàvɔ̃ alo dzi naɖe le ƒowò ya. Gake na nya si Yehowa gblɔ tsɔ de dzi ƒo na Yosua la nanɔ susu me na wò ɣesiaɣi. Egblɔ nɛ be: “Mègavɔ̃ o, eye ŋɔ megadzi wò o, elabena Yehowa wò Mawu li kpli wò le afi sia afi si nàyi.” (Yos. 1:9) Ne nane dzɔ si na nètsi dzimaɖi vevie la, do gbe ɖa na Yehowa enumake eye nàgblɔ wò dzimenyawo katã nɛ. Àte ŋu aka ɖe edzi be ‘Mawu ƒe ŋutifafa, si ƒo gɔmesesewo katã ta la, adzɔ wò dzi kple wò tamesusuwo ŋu’ ale be ŋusẽ nanɔ ŋuwò be nàte ŋu anɔ te ɖe Satana ƒe ameflunyawo katã nu.—Flp. 4:6, 7, 13.

Èɖo ŋku ameflunya siwo Rabsake, si nye Asiriatɔwo ƒe amedɔdɔ la, gblɔ na Mawu ƒe amewo la dzia? Kpuie ko la, enɔ gbɔgblɔm be, ‘Ame aɖeke mate ŋu akpɔ mia ta tso Asiria dukɔa si me o. Mia Mawu, Yehowa, gɔ̃ hã mate ŋu axɔ na mi o.’ Egblɔ kpe ɖe eŋu dzinɔameƒotɔe be: ‘Yehowa ŋutɔe gblɔ na mí be míatsrɔ̃ anyigba sia.’ Nya kae Yehowa gblɔ tsɔ ɖo eŋu? Egblɔ be: “Mègavɔ̃ le nya siwo nèse, siwo nye busunya siwo Asiria-fia ƒe dɔlawo gblɔ ɖe ŋunye la ta o.” (2 Fia. 18:22-25; 19:6) Eyome, edɔ mawudɔla ɖeka ɖa wòɖawu Asiriatɔ 185,000 le zã ɖeka me!—2 Fia. 19:35.

DZE NUNYA—ÐO TO YEHOWA ƔEAWOKATÃƔI

Ðe nèkpɔ film aɖe kpɔ si me nèkpɔe le kɔtɛ be wole ame aɖe blem evɔ eya ŋutɔ mekpɔe dze sii oa? Ðewohĩ, èdi gɔ̃ hã be yeagblɔ nɛ be: ‘Mègaxɔe se o! Alakpae!’ Azɔ, kpɔe ɖa le susu me be mawudɔlawo le nya ma tɔgbi gblɔm na wò be: “Mègaxɔ Satana ƒe alakpanyawo dzi se o!”

Eya ta, mègaɖo to Satana ƒe ameflunyawo o. (Lod. 26:24, 25) Ðo to Yehowa eye nàɖo ŋu ɖe eŋu le nu sia nu me. (Lod. 3:5-7) Wɔ ɖe amekpekpe si wòtsɔ ɖo ŋkuwòme lɔlɔ̃tɔe la dzi. Ele gbɔgblɔm na wò be: “Vinye, dze nunya, be nàdo dzidzɔ na nye dzi.” (Lod. 27:11) Ne èwɔ esia la, ekema, àɖu aʋa si woho ɖe wò susu ŋu la dzi!