Dzo kpo yi emenuwo dzi

Dzo kpo yi emenuawo dzi

 NUSƆSRƆ̃NYATI 5

Nu Si Míaƒe Kpekpeawo Dede Ðena Fiana Le Mía Ŋu

Nu Si Míaƒe Kpekpeawo Dede Ðena Fiana Le Mía Ŋu

“[Miyi edzi mianɔ] gbeƒã ɖem Aƒetɔ la ƒe ku va se ɖe esime wòava.”​—1 KOR. 11:26.

HADZIDZI 18 Akpedada Ðe Tafea Ta

NYA VEVIAWO *

1-2. (a) Ne ame miliɔn geɖewo ƒo ƒu hena Aƒetɔ Ƒe Fiẽnuɖuɖua la, nu kae Yehowa dea dzesii? (Kpɔ foto si le akpaa dzi.) (b) Nu ka mee míadzro le nyati sia me?

BU EŊU kpɔ: Nu kae Yehowa dea dzesii ne ekpɔ ame miliɔn geɖe siwo le xexea me godoo la ƒo ƒu hena Aƒetɔ Ƒe Fiẽnuɖuɖua? Menye ame gbogbo siwo va ƒo ƒu la ƒe agbɔsɔsɔme koe wòkpɔna o; ke edea dzesi ame ɖeka ɖe sia ɖe si de wɔnaa la hã. Le kpɔɖeŋu me, edea dzesi ame siwo dea Ŋkuɖodzia nuteƒewɔwɔtɔe ƒe sia ƒe. Wo dometɔ aɖewo nye ame siwo dea wɔna sia, togbɔ be wole wo yome tim vevie gɔ̃ hã. Ame aɖewo hã medea míaƒe kpekpe bubuawo o, gake wobui be ele vevie ŋutɔ be yewoade Ŋkuɖodzia ya. Yehowa dea dzesi ame siwo de Ŋkuɖodzia zi gbãtɔe nye ema la hã, togbɔ be ɖewohĩ ɖeko wodi be yewoanya nu si tututu yia edzi le wɔna sia me gɔ̃ hã.

2 Vavãe, edzɔa dzi na Yehowa be ame gbogbo mawo vaa Ŋkuɖodzia. (Luka 22:19) Ke hã, menye ame agbɔsɔsɔme si va wɔnaa teƒe koe le vevie na Yehowa o. Susu si ta wova ɖo la le vevie nɛ wu; ɛ̃, nu si ʋã amewo wova lae le vevie na Yehowa. Le nyati sia me la, míadzro nyabiase aɖe si le vevie ŋutɔ la me; eyae nye: Nu ka tae menye ƒe sia ƒe ƒe Ŋkuɖodziwɔnaa ko míedena ko evɔ o, ke míedea kwasiɖa sia kwasiɖa ƒe kpekpe siwo ŋu Yehowa wɔ ɖoɖo ɖo na ame siwo lɔ̃nɛ la hã?

Míele ame miliɔn geɖe kpem le xexea me godoo be woade Aƒetɔ Ƒe Fiẽnuɖuɖu ƒe wɔnaa (Kpɔ memama 1-2 lia)

ÐOKUIBƆBƆ ƲÃA MÍ

3-4. (a) Nu ka tae míedea kpekpeawo ɖo? (b) Nu kae míaƒe kpekpeawo dede ɖena fiana le mía ŋu? (d) Le 1 Korintotɔwo 11:23-26 ƒe nya nu la, nu ka tae mele be Ŋkuɖodzia nato mía ŋu o?

3 Susu si koŋ tae míedea hamea ƒe kpekpewo ɖoe nye be, wonye míaƒe mawusubɔsubɔ ƒe akpa aɖe. Susu bubu si tae míedea kpekpeawo ɖoe nye be, Yehowa fiaa nu mí le kpekpeawo me.  Dadalawo melɔ̃na ɖe edzi be ehiã be woafia nu yewo o. (3 Yoh. 9) To vovo na woawo la, míawo ya míedina vevie be Yehowa kple eƒe habɔbɔ si zãm wòle la nafia nu mí.—Yes. 30:20; Yoh. 6:45.

4 Ne míedea kpekpeawo la, esia ɖenɛ fiana be míenye ɖokuibɔbɔlawo—si fia be, míelɔ̃ faa be woafia nu mí. Menye esi wodi tso mía si be míade Yesu ƒe ku ƒe Ŋkuɖodzia ta koe míedea wɔna sia le Ŋkuɖodziŋkekea ƒe fiẽme ɖo o, ke boŋ, esi míeɖoa to Yesu ƒe se si wòde na mí be, “Minɔ esia wɔm hena ŋkuɖoɖo dzinye” la dzi ɖokuibɔbɔtɔe tae míedena ɖo. (Xlẽ 1 Korintotɔwo 11:23-26.) Kpekpe sia nana kakaɖedzi sẽŋu gasua mía si ɖe míaƒe etsɔmemɔkpɔkpɔa ŋu eye wògaɖoa ŋku ale si gbegbe Yehowa lɔ̃ míi hã dzi na mí. Ke hã, Yehowa nyae be míehiã na dzidedeƒo kple ŋusẽdodo enuenu le ƒe bliboa me, ke menye zi ɖeka ko o. Eya ta, ewɔ ɖoɖo ɖe kpekpewo ŋu na mí kwasiɖa sia kwasiɖa eye wòdea dzi ƒo na mí be míade wo. Ðokuibɔbɔ ʋãa mí be míaɖo toe. Míezãa gaƒoƒo geɖe kwasiɖa sia kwasiɖa tsɔ dzrana ɖo ɖe kpekpeawo ŋu hedea wo.

5. Nu ka tae ɖokuibɔbɔlawo wɔna ɖe Yehowa ƒe amekpekpea dzi?

5 Ƒe sia ƒe la, ɖokuibɔbɔla geɖe wɔna ɖe Yehowa ƒe amekpekpea dzi be wòafia nu yewo. (Yes. 50:4) Wokpɔa dzidzɔ ne wode Ŋkuɖodzia, eye wotea kpekpe bubuawo hã dede. (Zak. 8:20-23) Edoa dzidzɔ na mía kpli wo siaa be Yehowa “[míaƒe] kpeɖeŋutɔ kple [míaƒe] xɔnametɔ” la le nu fiam mí hele mɔ fiam mí. (Ps. 40:17) Le nyateƒe me la, nu kae gadoa dzidzɔ na ame wu alo le vevie wu wɔwɔ ɖe amekpekpe si Yehowa nana ame be wòana ye kple ye Vi, Yesu, si yelɔ̃ vevie la yewoafia nui la dzi?—Mat. 17:5; 18:20; 28:20.

6. Aleke ɖokuibɔbɔ kpe ɖe ŋutsu aɖe ŋu wòde Ŋkuɖodzia?

6 Ƒe sia ƒe la, míedzea agbagba kpea ame geɖe ale si nu míate ŋui be woade Yesu ƒe ku ƒe Ŋkuɖodzia. Ðokuibɔbɔla geɖewo wɔna ɖe míaƒe amekpekpea dzi, eye esia ɖea vi geɖe na wo. Bu eƒe kpɔɖeŋu aɖe ŋu kpɔ. Ƒe geɖee nye esi va yi la, nɔviŋutsu aɖe na amekpegbalẽvi ŋutsu aɖe tsɔ kpee be wòade Ŋkuɖodzia, gake ɖeko wògblɔ na nɔviŋutsua be yemate ŋu ade o. Ke hã, le Ŋkuɖodziŋkekea ƒe fiẽ la, ŋutsu sia va Fiaɖuƒe Akpataa me, eye esi nɔviŋutsua kpɔe la, ewɔ nuku nɛ ŋutɔ. Ale si nɔviwo do vivi ɖe ŋutsua ŋui la wɔ dɔ ɖe edzi ale gbegbe be ete míaƒe kwasiɖa sia kwasiɖa ƒe kpekpeawo dede. Le nyateƒe me la, le ƒe si kplɔe ɖo me katã la, zi etɔ̃ pɛ koe mete ŋu de kpekpeawo o. Nu kae kpe ɖe eŋu wòtso nya me be yeanɔ kpekpeawo katã dem? Ale si gbegbe wòbɔbɔ eɖokuii lae na wòtrɔ eƒe susu. Nɔviŋutsu si kpee la gblɔ emegbe be, “Enye ame aɖe si bɔbɔ eɖokui ale gbegbe.” Ðikeke mele eme o be, Yehowae he ŋutsu sia va eɖokui gbɔ be wòasubɔ ye, eye fifia, ezu nɔviŋutsu xɔnyɔnyrɔ.—2 Sam. 22:28; Yoh. 6:44.

7. Aleke nu siwo míesrɔ̃na le kpekpeawo me kple nu siwo míexlẽna le Biblia me la kpena ɖe mía ŋu míebɔbɔa mía ɖokuiwo?

7 Nu siwo míesrɔ̃na le kpekpeawo me kple nu siwo míexlẽna le Biblia me la kpena ɖe mía ŋu míebɔbɔa mía ɖokui. Le kwasiɖa siwo do ŋgɔ na Ŋkuɖodzia me la, míaƒe kpekpeawo me nyawo kuna ɖe kpɔɖeŋu si Yesu ɖo ɖi na mí kple ɖokuibɔbɔ si wòɖe fia esi wòtsɔ eƒe agbe sa vɔe wònye tafe ɖe mía ta la ŋu zi geɖe. Eye wodea dzi ƒo na mí be míaxlẽ Biblia me nuŋlɔɖi siwo ku ɖe Yesu ƒe ku kple eƒe tsitretsitsi ŋu la le ŋkeke siwo do ŋgɔ na Ŋkuɖodzia me. Nu siwo míesrɔ̃ le kpekpe mawo kple nu siwo míexlẽna le Biblia me ŋutinya mawo me la nana míegakpɔa ŋudzedze ɖe ale si Yesu tsɔ eɖokui sa vɔ ɖe mía ta la ŋu geɖe wu. Esia ʋãa mí míesrɔ̃a eƒe ɖokuibɔbɔa eye míewɔa Yehowa ƒe  lɔlɔ̃nu, ne esia wɔwɔ sesẽ na mí gɔ̃ hã.—Luka 22:41, 42.

DZINƆAMEƑO KPENA ÐE MÍA ŊU

8. Aleke Yesu ɖe dzinɔameƒo fiae?

8 Míedzea agbagba hã be míasrɔ̃ dzinɔameƒo ƒe kpɔɖeŋu si Yesu ɖo ɖi la. De ŋugble le dzinɔameƒo si wòɖe fia le ŋkeke siwo do ŋgɔ na eƒe ku me la ŋu kpɔ. Enyae nyuie be, eteƒe madidi o, yeƒe futɔwo aɖi gbɔ ye, woaƒo ye, ahawu ye. (Mat. 20:17-19) Ke hã, elɔ̃ faa be yeaku. Esi ɣeyiɣia de la, egblɔ na eƒe nusrɔ̃la wɔnuteƒe siwo nɔ eŋu le Getsemane la be: “Mitso, mina míadzo. Kpɔ ɖa! Ame si dem asi la gogo.” (Mat. 26:36, 46) Eye esi ameha aɖe tsɔ lãnuwo ɖe asi gbɔna elé ge la, ezɔ te ɖe wo ŋu heɖe eɖokui fia wo, eye wògblɔ na asrafoawo be woaɖe asi le yeƒe apostoloawo ŋu woadzo. (Yoh. 18:3-8) Dzinɔameƒo gã ka gbegbee nye esi Yesu ɖe fia! Egbea, Kristotɔ amesiaminawo kple alẽ bubuawo me tɔwo kua kutri vevie srɔ̃a Yesu ƒe dzinɔameƒo ƒe kpɔɖeŋua. Aleke wowɔa esiae?

Dzinɔameƒo si nèɖena fiana le Kristotɔwo ƒe kpekpewo dede me la doa ŋusẽ ame bubuwo (Kpɔ memama 9 lia) *

9. (a) Nu ka tae wòbia dzinɔameƒo be míade kpekpeawo edziedzi? (b) Aleke kpɔɖeŋu si míeɖona le go sia me la ate ŋu awɔ dɔ ɖe mía nɔvi siwo wolé de gaxɔ me le woƒe xɔse ta la dzi?

9 Ne míele nɔnɔme sesẽwo me tom la, ehiã be dzi nanɔ mía ƒo hafi míate ŋu anɔ kpekpeawo dem edziedzi. Mía nɔvi aɖewo dea kpekpeawo togbɔ be wole nu xam vevie, dzi ɖe le wo ƒo, alo wole lãmesẽkuxiwo me tom gɔ̃ hã. Dzi nɔa nɔvi bubuwo hã ƒo wodea kpekpeawo togbɔ be woƒe ƒometɔwo alo dziɖuɖumegãwo le wo yome tim vevie gɔ̃ hã. Tɔ sẽe nàbu ale si kpɔɖeŋu si míeɖona le kpekpeawo dede me la ɖea vi na nɔvi siwo wolé de gaxɔ me le woƒe xɔse ta la ŋu kpɔ. (Heb. 13:3) Ne wose be míeyi edzi le Yehowa subɔm togbɔ be míele xaxawo me tom hã la, esia doa ŋusẽ wo woléa xɔsea me ɖe asi, dzi ɖoa wo ƒo, eye woyia edzi wɔa nuteƒe. Apostolo Paulo nɔ nɔnɔme sia tɔgbi me kpɔ. Esi wònɔ gaxɔ me le Roma la, ɣesiaɣi si wòse be nɔviawo yi edzi le Mawu subɔm nuteƒewɔwɔtɔe la, ekpɔa dzidzɔ. (Flp. 1:3-5, 12-14) Anɔ eme be esi woɖe Paulo le gaxɔ me teti alo ɣeyiɣi kpui aɖe do ŋgɔ la, eŋlɔ agbalẽ ɖo ɖe Hebritɔwo. Ede dzi ƒo na Kristotɔ wɔnuteƒe mawo le eƒe agbalẽa me be woana woƒe “nɔvilɔlɔ̃ nayi edzi ɖaa” eye woagagblẽ woƒe kpekpewo ɖi gbeɖe o.—Heb. 10:24, 25; 13:1.

10-11. (a) Ame kawoe wòle be míakpe va Ŋkuɖodzia? (b) Le Efesotɔwo 1:7 ƒe nya nu la, susu ka tae wòle be míakpe wo ɖo?

10 Míeɖea dzinɔameƒo fiana ne míekpe míaƒe ƒometɔwo, dɔwɔhatiwo, kple aƒelikawo be woade Ŋkuɖodzia. Nu ka tae míekpea ame siawo ɖo? Nu si tae nye be, míekpɔ ŋudzedze ɖe nu si Yehowa kple Yesu wɔ na mí la ŋu ale gbegbe be, míedina vevie be míakpe wo godoo be woade Ŋkuɖodzia. Míedi be woanya nu si woawɔ be Yehowa ƒe “amenuveve” si wòɖe fia to tafea dzi la naɖe vi na woawo hã.—Xlẽ Efesotɔwo 1:7; Nyaɖ. 22:17.

11 Ne dzi le mía ƒo eye míeyi ɖaƒo ƒu kple mía nɔviwo ɖekae la, míetoa esia dzi ɖea nɔnɔme nyui xɔasi bubu aɖe si Mawu kple Via siaa ɖena fiana le mɔ ɖedzesiwo nu la fiana.

 LƆLƆ̃ ƑONƐ ÐE MÍA NU

12. (a) Aleke kpekpeawo dede nana lɔlɔ̃ si le mía si na Yehowa kple Yesu la gasẽna ɖe edzi? (b) Nu kae 2 Korintotɔwo 5:14, 15 dea dzi ƒo na mí be míawɔ ale be míate ŋu asrɔ̃ Yesu?

12 Lɔlɔ̃ si le mía si na Yehowa kple Yesu la ƒonɛ ɖe mía nu be míade kpekpeawo. Eye ne míede kpekpeawo la, nu siwo míesrɔ̃na la nana lɔlɔ̃ si le mía si na Yehowa kple Via la gasẽna ɖe edzi. Woɖoa ŋku nu siwo wowɔ na mí la dzi na mí edziedzi le kpekpeawo me. (Rom. 5:8) Ŋkuɖodzia koŋue ɖoa ŋku lɔlɔ̃ gã si gbegbe woɖe fia mía kple ame siwo mekpɔ de asixɔxɔ tafea ŋu haɖe o la siaa dzi na mí. Esi míekpɔ ŋudzedze ɖe nu si Yehowa kple Yesu wɔ na mí la ŋu tso dzi blibo me ta la, míedzea agbagba be míasrɔ̃ Yesu ƒe kpɔɖeŋu le míaƒe agbenɔnɔ me gbe sia gbe. (Xlẽ 2 Korintotɔwo 5:14, 15.) Tsɔ kpe ɖe eŋu la, míaƒe dzi ʋãa mí be míakafu Yehowa ɖe tafe si wòna ɖe mía ta la ta. Mɔ aɖe si dzi míate ŋu ato akafui ye nye be míaɖo nya ŋu tso dzi me le kpekpeawo me.

13. Aleke míate ŋu aɖe ale si gbegbe míelɔ̃ Yehowa kple Viae la afia? Ðe eme.

13 Míate ŋu aɖe ale si gbegbe míelɔ̃ Yehowa kple Viae la afia ne míelɔ̃na faa tsɔa nuwo saa vɔe hewɔa nu sia nu si wobia tso mía si. Zi geɖe la, ele be míatsɔ nanewo asa vɔe hafi míate ŋu ade kpekpeawo. Hame geɖe wɔa kpekpe aɖe le kwasiɖaa ƒe ŋkeke aɖe si dzi míedea dɔme la ƒe fiẽme esime ɖeɖi anya te mía ŋu. Eye wowɔa kpekpe bubu hã le kwasiɖaa ƒe nuwuwu esime ame bubuwo le ɖiɖim ɖe eme. Ðe Yehowa dea dzesii be míedea kpekpeawo togbɔ be ɖeɖi te mía ŋu gɔ̃ hã? Ɛ̃, edea dzesii godoo! Le nyateƒe me la, zi ale si míeʋlina vevie hafi dea kpekpeawo la, zi nenemae Yehowa dea asixɔxɔ lɔlɔ̃ si le mía si na eyama la ŋu.—Marko 12:41-44.

14. Aleke Yesu ɖo kpɔɖeŋu ɖi na mí le ɖokuitsɔtsɔsavɔ ƒe lɔlɔ̃ gome?

14 Yesu ɖo kpɔɖeŋu ɖi na mí le ɖokuitsɔtsɔsavɔ ƒe lɔlɔ̃ gome. Menye ɖeko wòlɔ̃ faa be yeaku ɖe yeƒe nusrɔ̃lawo ta ko evɔ o, ke elɔ̃ faa hã be nu sia nu si yeawɔ gbe sia gbe la naɖee afia be woƒe nyonyo le vevie na ye wu ye ŋutɔ ye tɔ. Le kpɔɖeŋu me, ekpe kple eyomedzelawo esime ɖeɖi te eŋu eye wònɔ nu xam vevie gɔ̃ hã. (Luka 22:39-46) Eye eƒe susu nɔa nu si wòate ŋu awɔ na amewo la ŋu, ke menye nu si wòate ŋu akpɔ tso wo gbɔ la ŋu o. (Mat. 20:28) Ne lɔlɔ̃ si le mía si na Yehowa kple mía nɔviwo la nu sẽ nenema gbegbe la, míawɔ nu sia nu si  míate ŋui ade Aƒetɔ Ƒe Fiẽnuɖuɖua kpakple hame ƒe kpekpe bubuawo katã.

15. Ame kawo hã ŋue míedina vevie be míakpe ɖo?

15 Kristotɔwo ƒe nɔviwo ƒe habɔbɔ vavãtɔ ɖeka kolia la me tɔwoe míenye, eye edzɔa dzi na mí be míazã ɣeyiɣi geɖe ale si nu míate ŋui atsɔ akpe ɖe amewo ŋu be woava wɔ ɖeka kpli mí le habɔbɔ sia me. Ke hã, míedina vevie be míakpe ɖe ame siwo “do ƒome kpli mí le xɔse la me” gake wova dzudzɔ gbeadzidede alo kpekpeawo dede la hã ŋu. (Gal. 6:10) Míeɖenɛ fiana wo be míelɔ̃ wo ne míedea dzi ƒo na wo be woade kpekpeawo, vevietɔ Ŋkuɖodzia. Abe Yehowa kple Yesu ene la, dzi dzɔa mí ale gbegbe ne nɔvi aɖe si gbɔdzɔ la trɔ va Yehowa, mía Fofo kple Alẽkplɔla lɔ̃ame la gbɔ.—Mat. 18:14.

16. (a) Aleke míate ŋu ade dzi ƒo na mía nɔewo, eye nu kae míaƒe kpekpewo ate ŋu awɔ na mí? (b) Nu ka tae wòsɔ nyuie be míaɖo ŋku Yesu ƒe nya si dze le Yohanes 3:16 la dzi le ƒea ƒe ɣeyiɣi sia me?

16 Le kwasiɖa siwo gbɔna me la, dze agbagba nàkpe ame ale si nu nàte ŋui la be woade Ŋkuɖodzia le Fiɖa, April 19, 2019, ƒe fiẽme. (Kpɔ aɖaka si nye “Èle Wo Kpe Gea?”) Neva eme be, míanɔ kpekpe siwo katã ƒe ɖoɖo Yehowa wɔ na mí la dem, be míanɔ dzi dem ƒo na mía nɔewo ɣesiaɣi. Esi nuɖoanyi sia ƒe nuwuwu le aƒe tum la, ehiã be míanɔ kpekpeawo dem ale be woakpe ɖe mía ŋu míayi edzi abɔbɔ mía ɖokui, dzi nanɔ mía ƒo, eye míaɖe lɔlɔ̃ afia geɖe wu. (1 Tes. 5:8-11) Mina míaɖe ale si míesena le mía ɖokui me tso ale si gbegbe Yehowa kple Via lɔ̃ míi ŋu la fia tso dzi blibo me!—Xlẽ Yohanes 3:16.

HADZIDZI 126 Nɔ Ŋudzɔ, Nɔ Tsitre Sesĩe, Nàsẽ Ŋu

^ mm. 5 Kristo ƒe ku ƒe Ŋkuɖodziwɔna si míawɔ le Fiɖa, April 19, 2019, dzi le fiẽ me lae nye kpekpe vevitɔ kekeake si míawɔ le ƒe bliboa me. Nu kae ʋãa mí be míade wɔna sia? Ðikeke mele eme o be, esi míedi be míadze Yehowa ŋu tae. Le nyati sia me la, míadzro nu si Ŋkuɖodzia kple míaƒe kwasiɖa sia kwasiɖa ƒe kpekpeawo dede ɖena fiana le mía ŋu la me.

^ mm. 52 NU SI LE EDZI YIM LE FOTOA ME: Nɔviŋutsu aɖe si wolé de gaxɔ me le eƒe xɔse ta la xɔ lɛta tso eƒe ƒomea gbɔ eye esia de dzi ƒo nɛ. Esia na wòse le eɖokui me be womeŋlɔ ye be o; dzi dzɔe esi eƒe ƒomea gblɔ nɛ be yewo hã yewoyi edzi le nuteƒe wɔm na Yehowa, togbɔ be ʋunyaʋunya le edzi yim le yewoƒe nutoa me hã.