Dzo kpo yi emenuwo dzi

Dzo kpo yi emenuawo dzi

Nyabiabia Siwo Tso Exlẽlawo Gbɔ

Nyabiabia Siwo Tso Exlẽlawo Gbɔ

Apostolo Paulo ŋlɔ bena Yehowa “maɖe mɔ woate mi akpɔ wu esi nu miate ŋu anɔ te ɖo o.” (1 Kor. 10:13) Ðe esia fia be Yehowa daa nuwo kpɔ henyaa tetekpɔ siwo nu míate ŋu anɔ te ɖo la do ŋgɔ eye wòtiaa esiwo nu wòaɖe mɔ ɖo be woava mía dzia?

Ne nenemae wòle la, ekema, bu nu siwo wòafia ŋu kpɔ. Nɔviŋutsu aɖe si viŋutsu wu eɖokui la bia be: ‘Ðe Yehowa da nuwo kpɔ do ŋgɔ hekpɔe be nye kple srɔ̃nye míate ŋu anɔ te ɖe vevesese si mía via ƒe eɖokuiwuwu ahe va mía dzi la nua? Ðe nu sia dzɔ le esi Mawu kpɔe be míate ŋu anɔ te ɖe enu ta?’ Ðe susu gobii aɖe li si tae míaxɔe ase be Yehowa ƒe asi nɔa nu sia nu si dzɔna le míaƒe agbe me la me le mɔ siawo tɔgbi nua?

Paulo ƒe nya si dze le 1 Korintotɔwo 10:13 la me dzodzro yi ŋgɔe na míeƒo nya ta ale: Ŋɔŋlɔawo me kpeɖodzi aɖeke meli si tae míaxɔe ase be Yehowa daa nɔnɔmeawo kpɔ be tetekpɔ kawo nue míate ŋu anɔ te ɖo hã eye wònɔa te ɖe esia dzi tiana esiwo nu wòaɖe mɔ ɖo be woava mía dzi o. Na míadzro susu ene siwo tae míate ŋu aƒo nya ta alea ɖo la me.

Gbã, Yehowa na tiatiawɔblɔɖe amegbetɔwo. Edi be míawo ŋutɔwo míatso nya me le mɔ si nu míanɔ agbe ɖo ŋu. (5 Mose 30:19, 20; Yos. 24:15) Ne míewɔ tiatia nyuitɔ la, míate ŋu akpɔ mɔ be Yehowa nafia mɔ míaƒe afɔɖeɖewo. (Lod. 16:9) Gake ne míewɔ tiatia gbegblẽ la, míakpɔ emetsonuawo. (Gal. 6:7) Ne Yehowa tiaa tetekpɔ siwo ava mía dzi la, ɖe ema mafia be ele mɔ xem ɖe míaƒe tiatiawɔblɔɖea nu oa?

Evelia, Yehowa mekpɔa mía ta tso ‘azãgbe kple nuɖiɖeamewo’ me o. (Nyagb. 9:11) Afɔku dziŋɔwo—siwo dometɔ aɖewo gblẽa nu le ame ŋu vevie la—tea ŋu dzɔna ɖe mía dzi le vo me. Yesu ƒo nu tso xɔ kɔkɔ aɖe si mu dze ame 18 dzi woku la ŋu, eye wògblɔ be menye Mawu ƒe lɔlɔ̃nue wònye be ame mawo naku o. (Luka 13:1-5) Eya ta, ɖe wòasɔ be míabui be Mawu ɖoa ame siwo aku le afɔkuwo me kple ame siwo maku o la ɖi do ŋgɔa?

Etɔ̃lia, agba le mía dometɔ ɖe sia dzi be wòawɔ nuteƒe na Mawu. Ðo ŋku edzi be Satana tsɔ nya ɖe Yehowa subɔlawo katã ƒe nuteƒewɔwɔ ŋu hegblɔ be mímayi edzi awɔ nuteƒe na Yehowa ne nɔnɔme sesẽwo va mía dzi o. (Hiob 1:9-11; 2:4; Nyaɖ. 12:10) Ne Yehowa kpɔa mía ta be tetekpɔ aɖewo nagava mía dzi o le esi wòkpɔe be woawu tsɔtsɔ na mí ta la,  ɖe esia mana wòadze abe ɖe Satana ƒe nya si nye be ɖokuitɔdidi tae míesubɔa Mawu ɖo la nye nyateƒe oa?

Enelia, mehiã be Yehowa nanya nu sia nu si adzɔ ɖe mía dzi la do ŋgɔ o. Susu si nye be Mawu tiaa tetekpɔ siwo ava mía dzi do ŋgɔ la afia be ele be wòanya nu sia nu si ava dzɔ ɖe mía dzi. Gake Ŋɔŋlɔawo meda asi ɖe nuŋububu ma dzi o. Enye nyateƒe be Mawu ate ŋu anya nu si adzɔ le etsɔme ya. (Yes. 46:10) Ke hã, Biblia ɖee fia be menye nu ɖe sia ɖe si adzɔ le etsɔme lae Yehowa tiana be yeanya o. (1 Mose 18:20, 21; 22:12) Eya ta mewɔa eƒe etsɔmenyanya ƒe ŋutetea ŋu dɔ le nu sia nu me o, eye edea bubu míaƒe tiatiawɔblɔɖea hã ŋu. Esi Mawu dea bubu míaƒe ablɔɖea ŋu eye wòdana sɔna bliboe le eƒe nɔnɔme ɖedzesiawo ŋu dɔ wɔwɔ me ta la, ɖe menye aleae nàkpɔ mɔ be wòawɔ nui oa?—5 Mose 32:4; 2 Kor. 3:17.

Ekema, aleke wòle be míase Paulo ƒe nya si nye, “Mawu . . . maɖe mɔ woate mi akpɔ wu esi nu miate ŋu anɔ te ɖo o” la gɔme? Nu si Paulo wɔnɛ le afi siae nye nu si Yehowa wɔna ne míele tetekpɔwo me tom, ke menye nu si wòwɔna do ŋgɔ na tetekpɔawo o. * Apostoloa ƒe nyawo ka ɖe edzi na mí be, tetekpɔ ka kee ɖava mía dzi o, Yehowa alé mí ɖe te ne míeɖo ŋu ɖe eŋu. (Ps. 55:22) Paulo ƒe akɔfanyaawo nɔ te ɖe nyateƒenya vevi eve aɖewo dzi.

Gbã, tetekpɔ siwo vaa mía dzi la nye “esi tɔgbi vaa amegbetɔwo dzi.” Esia fia be tetekpɔ siwo vaa amegbetɔwo dzi la koe vaa míawo hã dzi. Tetekpɔ mawo mawu tsɔtsɔ na mí o, zi ale si míeɖo ŋu ɖe Mawu ŋu ko. (1 Pet. 5:8, 9) Hafi Paulo nagblɔ eƒe nya si dze le 1 Korintotɔwo 10:13 la, ehe susu yi tetekpɔ siwo va Israel-viwo dzi le gbeadzi la dzi. (1 Kor. 10:6-11) Tetekpɔ mawo dometɔ aɖeke mewu tsɔtsɔ na amegbetɔwo loo alo nye esiwo nu Israel-vi wɔnuteƒewo mate ŋu anɔ te ɖo o. Paulo gblɔ zi ene sɔŋ be “wo dometɔ aɖewo” gbe toɖoɖo. Nublanuitɔe la, Israel-vi aɖewo ɖi kɔ na woƒe nudzodzro vɔ̃wo, elabena womeɖo ŋu ɖe Mawu ŋu o.

Evelia, “nuteƒewɔlae Mawu nye.” Ale si Mawu wɔ nu kple eƒe amewo la ƒe ŋutinya ɖee fia be ewɔa nuteƒe na “ame siwo lɔ̃nɛ kple ame siwo léa eƒe sededewo me ɖe asi.” (5 Mose 7:9) Ŋutinya mawo ɖee fia hã be Mawu wɔa eƒe ŋugbedodowo dzi ɣesiaɣi. (Yos. 23:14) Esi wònye be Mawu wɔa nuteƒe ɣeawokatãɣi ta la, ame siwo lɔ̃nɛ heɖoa toe la ate ŋu aka ɖe edzi be awɔ eƒe ŋugbedodo eve siawo dzi godoo le tetekpɔ siwo ava wo dzi me: (1) Maɖe mɔ be tetekpɔ aɖeke nu nasẽ ale gbegbe be wòawu tsɔtsɔ na wo o, eye (2) ‘ana mɔ si dzi woato ado le eme’ la wo.

Yehowa “faa akɔ na mí le míaƒe tetekpɔwo katã me”

Ne tetekpɔwo va mía dzi eye míeɖo ŋu ɖe Yehowa ŋu la, aleke wòana mɔ si míato ado le eme la mí? Ne enye eƒe lɔlɔ̃nu la, ɖeko wòaɖe tetekpɔa ɖa. Gake ɖo ŋku edzi be Paulo gblɔ be: “[Yehowa] ana mɔ si dzi miato ado le eme la hã, ale be miate ŋu ado dzi atsɔe.” Eya ta, le go geɖe me la, ale si wònana ‘mɔ si dzi míato ado le eme’ ye nye be enaa nu siwo míehiã be míate ŋu ato tetekpɔawo me ado dedie la mí. Bu mɔ siwo dzi Yehowa tona wɔa esiae la dometɔ aɖewo ŋu kpɔ:

  • ‘Efaa akɔ na mí le míaƒe tetekpɔwo katã me.’ (2 Kor. 1:3, 4) Yehowa ate ŋu ato eƒe Nya la, eƒe gbɔgbɔ kɔkɔea kple gbɔgbɔmenuɖuɖu si kluvi nuteƒewɔlaa nana dzi ana míaƒe dzi kple susu nadze akɔ anyi eye míakpɔ ŋutifafa le ememe.—Mat. 24:45; Yoh. 14:16, etenuŋɔŋlɔ; Rom. 15:4.

  • Ate ŋu ato gbɔgbɔ kɔkɔea dzi afia nu si wòle be míawɔ la mí. (Yoh. 14:26) Ne tetekpɔwo va mía dzi la, gbɔgbɔa ate ŋu akpe ɖe mía ŋu míaɖo ŋku Biblia me ŋutinyawo kple gɔmeɖosewo dzi eye wòana míanya afɔ nyuitɔ si wòle be míaɖe.

  • Ate ŋu ato mawudɔlawo dzi akpe ɖe mía ŋu.—Heb. 1:14.

  • Ate ŋu ato haxɔsetɔwo dzi akpe ɖe mía ŋu. To woƒe nyagbɔgblɔ kple nuwɔnawo dzi la, woate ŋu ‘ado ŋusẽ’ mí.—Kol. 4:11, etenuŋɔŋlɔ.

Ekema, aleke wòle be míase nya si Paulo gblɔ le 1 Korintotɔwo 10:13 la gɔme? Yehowa metiaa tetekpɔ siwo vaa mía dzi o. Gake ne tetekpɔwo va mía dzi la, míate ŋu aka ɖe nya sia ya dzi: Ne míeɖoa ŋu ɖe Yehowa ŋu bliboe la, maɖe mɔ be tetekpɔ siwo ava mía dzi la dometɔ aɖeke nu nasẽ agbɔ esi nu amegbetɔ ate ŋu anɔ te ɖo la ŋu gbeɖe o; eye ana mɔ si dzi míato ado le wo me hã mí ɣesiaɣi. Nya fakɔname ka gbegbee nye esi!

^ mm. 2 Helagbe me nya si gɔme woɖe be “tetekpɔ” ate ŋu afia “xaxa alo dodokpɔ.”