Dzo kpo yi emenuwo dzi

Dzo kpo yi emenuawo dzi

Sɔhɛwo, Mia Wɔla Di Be Miakpɔ Dzidzɔ

Sɔhɛwo, Mia Wɔla Di Be Miakpɔ Dzidzɔ

“Eyae tsɔa nu nyuiwo ɖia ƒo na wò le wò agbemeŋkekewo katã me.”—PS. 103:5.

HADZIDZI: 135, 39

1, 2. Ne èle nu siwo nàtsɔ wò agbe awɔe ŋu bum la, nu ka tae nunya le eme be nàɖo to Wɔwòlaa? (Kpɔ foto siwo le nyati sia ƒe gɔmedzedze.)

NE SƆHƐE nènye la, anɔ eme be ame vovovowo ɖo aɖaŋu na wò ku ɖe nu si nàwɔ le etsɔme ŋu. Ðewohĩ wò nufialawo, aɖaŋuɖolawo kple ame bubuwo de dzi ƒo na wò be nàde suku kɔkɔ eye nàti dɔ si ana nàkpɔ ga geɖe la yome. Gake Yehowa ya di be nàwɔ nu si to vovo kura. Ele eme be edi be nàdo vevie nu le suku ale be ne èdo le suku la, nàte ŋu akpɔ dɔ awɔ atsɔ akpɔ ɖokuiwò dzi ya. (Kol. 3:23) Gake ne èle nya me tsom le nu siwo nàdi be woanye nu vevitɔwo na wò le agbe me ŋu la, edi be nàna yeƒe aɖaŋuɖoɖowo nafia mɔ wò ale be nàna yeƒe tameɖoɖowo kple yeƒe lɔlɔ̃nu wɔwɔ nanye nu vevitɔ na wò le ŋkeke mamlɛ siawo me.—Mat. 24:14.

2 Nenɔ susu me na wò hã be, Yehowa nya nu sia nu si le edzi yim le xexe sia me la nyuie, enya afi si xexea ɖo tae, eye enya ale si gbegbe xexea ƒe nuwuwu tu aƒee. (Yes. 46:10; Mat. 24:3, 36) Azɔ hã, enya mí nyuie, enya nu siwo nana míaƒe dzi dzea eme kple nu siwo nana míekpɔa dzidzɔ, eye enya nu siwo ɖea dzi le mía ƒo kple nu siwo nana míeléa blanui. Eya ta, aleke kee wòɖadze abe ɖe susu le amegbetɔwo ƒe aɖaŋuɖoɖowo me ene o, ne womewɔ ɖeka kple Mawu ƒe Nyaa o la, ke nunya aɖeke mele wo me o.—Lod. 19:21.

 “NUNYA . . . AÐEKE MATE ŊU ATSI TRE ÐE YEHOWA ŊU O”

3, 4. Esi Adam kple Xawa ɖo to aɖaŋu gbegblẽ si Satana ɖo na wo la, aleke esia gblẽ nu le woawo ŋutɔwo kple woƒe dzidzimeviwo ŋui?

3 Tso esime Satana ble Adam kple Xawa kee aɖaŋu gbegblẽ ɖoɖo na ame dze egɔme. Egblɔ na Xawa be woa kple srɔ̃a, Adam, woakpɔ dzidzɔ wu ne woawo ŋutɔwo wotia ale si woanɔ agbee. (1 Mose 3:1-6) Gake le nyateƒe me la, ɖe Satana nɔ eɖokui tɔ dim. Edi be Adam kple Xawa kpakple woƒe dzidzimeviwo nanɔ yeƒe ŋusẽ te, eye woasubɔ ye tsɔ wu be woasubɔ Yehowa. Gake Satana mena nu nyui aɖeke wo o. Yehowae na nu sia nu si le wo si la wo ameawo, eyae wɔ woa kple evea siaa na wo nɔewo, eyae na abɔ dzeani si nye woƒe aƒe la wo, eye eyae wɔ wo wode blibo kple ŋutete be woate ŋu anɔ agbe tegbee.

4 Nublanuitɔe la, Adam kple Xawa meɖo to Mawu o, esia na ƒomedodo si le wo kplii dome la me gblẽ. Eye nu gbegblẽwo sɔŋ koe do tso eme. Abe ale si seƒoƒo si wolã ɖa le eƒe atia ŋu la nɔa yɔyrɔm vivivi heva ƒuna keŋkeŋ ene la, nenema kee Adam kple Xawa va nɔ amegã kple nyagã kum vivivi eye wova ku mlɔeba. Nu vɔ̃ ƒe fiƒodea va woƒe dzidzimeviwo hã dzi, míawo hã míele eme. (Rom. 5:12) Esiawo katã megbe gɔ̃ hã la, ame akpa gãtɔ medina be yewoawɔ ɖe Mawu ƒe mɔfiafiawo dzi o. Wodina be yewoanɔ agbe ale si yewo ŋutɔwo yewodii. (Ef. 2:1-3) Gake Biblia gblɔ be “nunya . . . aɖeke mate ŋu atsi tre ɖe Yehowa ŋu o.”—Lod. 21:30.

5. Aleke gbegbee Mawu ka ɖe amegbetɔwo dzii, eye ɖe wòsɔ nenema?

5 Ke hã, Yehowa ka ɖe edzi be amegbetɔ aɖewo, siwo dome sɔhɛ nyui geɖewo le la, adi be yewoanya ye ahasubɔ ye. (Ps. 103:17, 18; 110:3) Yehowa dea asixɔxɔ sɔhɛ siawo ŋu ale gbegbe! Wo dometɔ aɖee nènyea? Ne wo dometɔ aɖee nènye la, ke ɖikeke mele eme o be èle vivi sem na ‘nu nyui’ geɖe siwo Mawu naa wò siwo nana nèkpɔa dzidzɔ geɖe la. (Xlẽ Psalmo 103:5; Lod. 10:22) Míadzro nu siawo dometɔ ene me. Woawoe nye gbɔgbɔmenuɖuɖu gbogbo siwo wònana mí, xɔlɔ̃ vavãwo, taɖodzinu nyuiwo, kple ablɔɖe vavãtɔ.

YEHOWA NAA GBƆGBƆMENUÐUÐU SIWO NÈHIÃ ALE BE WÒ KPLII DOME NANƆ KPLIKPLIKPLI LA WÒ

6. Nu ka tae wòle be nàdze agbagba be wò kple Yehowa dome nanɔ kplikplikpli, eye nu kawoe Yehowa nana wò be nàte ŋu awɔ esia?

6 To vovo na lãwo la, didi le mewò be nànya Ame si wɔ wò la ale be wò kplii dome nanɔ kplikplikpli; eya koe ate ŋu akpe ɖe ŋuwò nàɖi kɔ na didi ma. (Mat. 4:4) Ne míeɖo to Mawu la, nugɔmesese kple nunya sua mía si, eye míekpɔa dzidzɔ. Yesu gblɔ be: “Dzidzɔtɔwoe nye ame siwo nyae be gbɔgbɔmenuwo hiã yewo.” (Mat. 5:3) Mawu nana nu siwo nèhiã be wò kplii dome nanɔ kplikplikpli la wò to eƒe Nyaa kpakple gbɔgbɔmenuɖuɖu gbogbo siwo wònana mí to “kluvi nuteƒewɔla kple aɖaŋudzela” dzi la dzi. (Mat. 24:45) Gbɔgbɔmenuɖuɖuawo le hamehame, eye wovivia mía nu ale gbegbe!—Yes. 65:13, 14.

7. Vi kawoe gbɔgbɔmenuɖuɖuawo ɖena na wò?

7 Gbɔgbɔmenuɖuɖu si Mawu nana la ana nàdze nunya eye tamebubuŋutete nasu asiwò, eye esia ate ŋu akpe ɖe ŋuwò le mɔ geɖe nu. (Xlẽ Lododowo 2:10-14.) Le kpɔɖeŋu me, nɔnɔme nyui siawo nana nèdea dzesi alakpanufiafiawo, wo dometɔ aɖee nye be, Wɔla aɖeke meli o. Wokpɔa tawò hã tso alakpanya si nye be, ga kple nu geɖe ƒe amesinɔnɔe nana ame kpɔa dzidzɔ la me. Eye wokpena ɖe ŋuwò hã be nàde dzesi dzodzro vɔ̃ kple nuwɔna gbegblẽ siwo gblẽa nu le ame ŋu la ahaƒo asa na wo. Eya ta, yi edzi nànɔ agbagba dzem be mawumenunya kple tamebubuŋutete nasu asiwò, eye nàbu wo nu xɔasiwoe! Ne nɔnɔme  nyui xɔasi mawo va su asiwò la, wò ŋutɔ àkpɔe kple kakaɖedzi be Yehowa lɔ̃ wò eye edi be eme nanyo na wò.—Ps. 34:8; Yes. 48:17, 18.

8. Nu ka tae wòle be nàna wò kple Mawu dome nanɔ kplikplikpli fifia, eye aleke esia aɖe vi na wò le etsɔme?

8 Madidi o, Yehowa atsrɔ̃ nu sia nu si le Satana ƒe xexea me, eye Yehowa ɖeɖe koe ana míanɔ dedie. Ate ŋu ava dzɔ be eya sinu ko míakpɔ hafi akpɔ nu aɖu le ɣeyiɣi aɖewo me gɔ̃ hã! (Hab. 3:2, 12-19) Ɛ̃, fifiae nye ɣeyiɣi si wòle be nàna wò kple Fofowò si le dziƒo la dome nanɔ kplikplikpli eye nànɔ ŋu ɖom ɖe eŋu geɖe wu. (2 Pet. 2:9) Ne èwɔe alea la, nu ka kee ɖale dzɔdzɔm o, àse le ɖokuiwò me abe hakpala David ene, esi wògblɔ be: “Metsɔa Yehowa ɖoa ŋkunyeme ɖaa. Esi wòle nye ɖusime ta la, nyemaʋã akpɔ o.”—Ps. 16:8.

YEHOWA NA XƆLƆ̃ VAVÃ GEÐEWO WÒ

9. (a) Le Yohanes 6:44 ƒe nya nu la, nu kae Yehowa wɔna? (b) Nu ka tae gododo Ðasefo bubuwo zi gbãtɔ nyea nu si le etɔxɛ?

9 Yehowa hea ame siwo wòlɔ̃ la vaa eƒe ƒome gã la me, ehea dzianukwaretɔwo vaa subɔsubɔ vavãtɔa me lɔlɔ̃tɔe. (Xlẽ Yohanes 6:44.) Ne èdo go ame aɖe si mele nyateƒea me o la zi gbãtɔ la, nu kae nàgblɔ be yenya tso eŋu? To vovo na eƒe ŋkɔ kple eƒe dzedzeme la, anɔ eme be mènya nu boo aɖeke tso eŋu o. Gake menɔa alea ne èdo go ame aɖe si nya Yehowa helɔ̃e la zi gbãtɔ o. Ne dukɔ bubu aɖe alo to bubu aɖe mee wòtso, alo gbe bubu aɖee wòdona eye woƒe dekɔnuwo to vovo kura gɔ̃ hã la, ènya nu geɖe tso eŋu xoxo, eye nenema kee wòle le eya hã gome!

Yehowa di be xɔlɔ̃ vavãwo nasu mía si eye míaɖo gbɔgbɔmetaɖodzinuwo na mía ɖokuiwo (Kpɔ memama 9-12 lia)

10, 11. Nu kae ɖea dzesi le Yehowa ƒe amewo katã ŋu, eye aleke esia ɖea vi na míi?

10 Le kpɔɖeŋu me, mi ame evea siaa miedea dzesi miaƒe “gbegbɔgblɔ,” si nye nyateƒea ƒe “gbegbɔgblɔ dzadzɛ” la enumake. (Zef. 3:9) Esia fia be, mi ame evea siaa mielɔ̃ Mawu, mienɔa agbe ɖe agbe nyui nɔnɔ ƒe dzidzenu ɖeka ma ke nu, etsɔmemɔkpɔkpɔ ɖekae le mia si, kple bubuawo. Gawu la, nu mawoe nye nu vevitɔ kekeake siwo wòle be míanya tso ame aɖe ŋu hafi aka ɖe edzi ahaɖo ŋu ɖe eŋu. Nu mawo kee kpena ɖe mi ame evea siaa ŋu miezua xɔlɔ̃ vavãwo, eye miaƒe xɔlɔ̃wɔwɔa nyea esi nɔa anyi ɖaa.

 11 Eya ta, ne èsubɔa Yehowa la, ke xɔlɔ̃ vavã siwo nye nyuitɔ kekeake la le asiwò le xexea me godoo. Menye amiɖeɖe ɖe nyae esia nye kura o. Ðeko mèkpɔ do go wo dometɔ akpa gãtɔ haɖe o! Ðe habɔbɔ bubu aɖe gali si si nu xɔasi sia gbegbe le tsɔ wu Yehowa ƒe amewoa?

YEHOWA NA TAÐODZINU NYUIWO WÒ

12. Gbɔgbɔmetaɖodzinu nyui kawoe nàte ŋu aɖo na ɖokuiwò?

12 Xlẽ Nyagblɔla 11:9–12:1. Ðe gbɔgbɔmetaɖodzinu ɖeka eve aɖewo le asiwò siwo gbɔ nèle agbagba dzem be yeaɖoa? Ðewohĩ èɖoe wò taɖodzinu be yeanɔ Biblia xlẽm gbe sia gbe, alo yeanɔ nya ŋu ɖom nyuie wu alo yeawɔ dɔdeasiwo nyuie wu le kpekpeawo me. Alo ɖewohĩ wò taɖodzinue nye be yeadze agbagba awɔ Biblia ŋu dɔ nyuie wu le gbeadzi. Taɖodzinu ka kee ɖale asiwò o, ne èkpɔe be yele ŋgɔyiyi wɔm, alo ame bubuwo de dzesii eye wokafu wò la, aleke nèsena le ɖokuiwò me? Ðikeke mele eme o be, dzi dzɔa wò le nu siwo nète ŋu wɔ ta. Eye aleae wòle be nàse le ɖokuiwò me hã, elabena ètsɔ Mawu ƒe lɔlɔ̃nu wɔwɔ ɖo nɔƒe gbãtɔ abe ale si Yesu wɔe ene.—Ps. 40:8; Lod. 27:11.

13. Aleke Yehowa subɔsubɔ tsɔtsɔ ɖo nɔƒe gbãtɔ nyo sãsãsã wu xexea ƒe taɖodzinuwo yome titi?

13 Ne ètsɔa Yehowa subɔsubɔ ɖoa nɔƒe gbãtɔ la, esia fia be èle dɔ si me dzidzɔ kple dzidzeme vavãtɔ le la wɔm, elabe esia menye agbagbadzedze dzodzro o. Apostolo Paulo ŋlɔ bena: “Minɔ te sesĩe, maʋamaʋã, eye miwɔ geɖe le Aƒetɔ la ƒe dɔ la me ɣesiaɣi, elabena mienyae be miaƒe agbagbadzedze le Aƒetɔ la me menye dzodzro o.” (1 Kor. 15:58) Gake ne amewo ti xexe sia ƒe taɖodzinuwo yome vevie eye ga geɖe va su wo si alo woxɔ ŋkɔ gɔ̃ hã la, esia menana wokpɔa dzidzɔ vavãtɔ o. Ne nu dze edzi na wo gɔ̃ hã la, wogasena le wo ɖokuiwo me kokoko be nane susɔ na yewo. (Luka 9:25) Fia Salomo ƒe agbemeŋutinya na míekpɔ esia ƒe nyateƒenyenye dze sii.—Rom. 15:4.

14. Nu kae nàte ŋu asrɔ̃ tso ale si Salomo te agbeɖuɖu kpɔ la me?

14 Kesinɔnu sɔ gbɔ ɖe Salomo si eye wòkpɔ ŋusẽ eteƒe mekɔ o. Eɖoe be ‘yeate agbeɖuɖu kpɔ, ne yeakpɔ nu nyui si ado tso eme.’ (Nyagb. 2:1-10) Etu xɔwo, etso abɔwo kple tsaɖibɔwo, eye wòti nu sia nu si nya dzroe ko la yome. Le esiawo katã megbe la, aleke wòse le eɖokui me? Ðe wòkpɔ dzidzɔ kple dzidzemea? Salomo ŋutɔ ɖo eŋu na mí. Egblɔ be: “Esi mede ŋugble le dɔ siwo katã nye asiwo wɔ . . .  ŋu la, mekpɔe be wo katã wonye tofloko . . . Viɖe gbagbe aɖeke mele wo me . . . o.” (Nyagb. 2:11) Nufiame vevi kae nye esi! Ðe nàsrɔ̃ nu tso Salomo ƒe nuteƒekpɔkpɔa mea?

15. Nu ka tae xɔse le vevie, eye le Psalmo 32:8 ƒe nya nu la, aleke xɔse ɖea vii?

15 Yehowa medi be nàkpe fu hafi adze nunya le agbe me o. Ehiã be xɔse nanɔ asiwò hafi nàte ŋu aɖo to Mawu ahatsɔ eƒe lɔlɔ̃nu wɔwɔ aɖo nɔƒe gbãtɔ le agbe me. Xɔse ma le vevie ale gbegbe, eye nu siwo wò xɔse ʋã wò nèwɔ la mava ve wò kpɔ gbeɖe o. Ɛ̃, Yehowa maŋlɔ “lɔlɔ̃ si [nèɖe] fia le eƒe ŋkɔ la ta” la be gbeɖe o. (Heb. 6:10) Eya ta, ku kutri vevie nàtu xɔse sẽŋu ɖo, ale be wò ŋutɔ nàkpɔ kpeɖodzi be Fofowò si le dziƒo la di vevie be eme nanyo na wò.—Xlẽ Psalmo 32:8.

MAWU NA ABLƆÐE VAVÃTƆ WÒ

16. Nu ka tae wòle be míade asixɔxɔ ablɔɖe ŋu ahawɔ eŋu dɔ le nunya me?

16 Paulo ŋlɔ bena: “Afi si Yehowa ƒe gbɔgbɔ le la, afi mae ablɔɖe le.” (2 Kor. 3:17) Ɛ̃, Yehowa lɔ̃ ablɔɖe eye ede lɔlɔ̃ ma dzi me na wò. Ke hã, edi be nàwɔ wò ablɔɖea ŋu dɔ le nunya me, eye esia akpɔ tawò. Ðewohĩ ènya sɔhɛ aɖewo siwo kpɔa amamaɖeɖenuwɔnawo alo ƒoa wo ɖokuiwo ɖe gbɔdɔdɔ manɔsenu me, wowɔa kamedefefe siwo me afɔku le, alo zãa atike vɔ̃ɖiwo eye womua  aha. Ele eme be woaɖu agbe ahakpɔ dzidzɔ ɣeyiɣi vi aɖe ya. Gake zi geɖe la, vɔ̃ koe dona tso eme—ɖewohĩ woadze dɔ, alo woadi be yewoaɖe asi le nuwɔna gbegblẽ aɖewo ŋu dokpoe, alo woaku gɔ̃ hã. (Gal. 6:7, 8) Eme kɔ ƒãa be, ameɖokuifuflu ye woƒe yeaɖi ablɔɖe la nye.—Tito 3:3.

17, 18. (a) Aleke toɖoɖo Mawu naa ablɔɖe míi? (b) Mɔ ka nue ablɔɖe si me Adam kple Xawa nɔ le gɔmedzedzea me la de ŋgɔ wu esi me amegbetɔwo le egbea?

17 Wò ya bu eŋu kpɔ: Ame nenie nènya siwo dze dɔ le esi woɖoe kplikpaa be yewoanɔ agbe ɖe Biblia ƒe dzidzenuwo nu ta? Eme kɔ ƒãa be, toɖoɖo Yehowa nana míenɔa lãmesẽ kple ablɔɖe me. (Ps. 19:7-11) Gawu la, ne èwɔa wò ablɔɖea ŋu dɔ le nunya me, si fia be, wò ŋutɔ ètiae be yeawɔ ɖe Mawu ƒe se kple eƒe mɔfiame debliboawo dzi la, àto esia me aɖee afia Mawu kple dziwòlawo siaa be woate ŋu aka ɖe dziwò eye woate ŋu ana ablɔɖe geɖe wu wò. Le nyateƒe me la, Mawu ƒe tameɖoɖoe wònye be, mlɔeba la, yeava na ablɔɖe deblibo, si Biblia yɔ be “Mawu ƒe viwo ƒe ŋutikɔkɔe ƒe ablɔɖe la” ye subɔla wɔnuteƒewo.—Rom. 8:21.

18 Adam kple Xawa ɖɔ ablɔɖe ma kpɔ. Le Eden-bɔa me la, se nenie Mawu de na wo? Ðeka pɛ. Se si wode na wo koe nye be woagaɖu ati ɖeka aɖe ƒe kutsetse o. (1 Mose 2:9, 17) Ðe nàgblɔ be sedede ɖeka pɛ ma dzi wɔwɔ sesẽ akpa eye wòxɔ ablɔɖe le wo sia? Kura o! Tsɔ ema sɔ kple amegbetɔwo ƒe sedede gbogbo manyaxlẽ siwo wodi tso amewo si be woasrɔ̃ ahawɔ wo dzi la kpɔ.

19. Aleke Yehowa kple Yesu le nu fiam mí be míava nye ablɔɖemewo?

19 Yehowa wɔa nu ɖe esubɔlawo ŋu le nunya deblibo me. Yehowa mede se gbogbo manyaxlẽwo na mí o, ke boŋ efiaa nu mí dzigbɔɖitɔe be míawɔ ɖe lɔlɔ̃ ƒe se la dzi. Edi be míanɔ agbe ɖe yeƒe gɔmeɖosewo nu eye míatsri vɔ̃. (Rom. 12:9) Via Yesu kpe ɖe mía ŋu le eƒe Todzimawunyaa me míese nu siwo kplɔa ame dea nu gbegblẽ wɔwɔ me la gɔme. (Mat. 5:27, 28) Esi wònye be Kristoe nye Mawu Fiaɖuƒea ƒe Fia ta la, ayi edzi anɔ nu fiam mí le xexe yeyea me, ale be míava bu nyui kple vɔ̃ abe ale si pɛpɛpɛ wòbua woe ene. (Heb. 1:9) Akpe ɖe mía ŋu hã be míava deblibo le ŋutilã kple susu me mlɔeba. Wò ya bu ale si agbea anɔ ne nu vɔ̃ ƒe tetekpɔ aɖeke megali o eye míegakpea fu le blibomademade ta o ŋu kpɔ. Ɣemaɣie nàse vivi na “ŋutikɔkɔe ƒe ablɔɖe” si ŋugbe Yehowa do na wò la.

20. (a) Aleke Yehowa wɔa eƒe ablɔɖea ŋu dɔe? (b) Aleke nàte ŋu asrɔ̃ Mawu ƒe kpɔɖeŋua?

20 Le xexe yeyea me la, seɖoƒe aganɔ míaƒe ablɔɖea ŋu kokoko. Le mɔ ka nu? Lɔlɔ̃ na Mawu kple lɔlɔ̃ na mía havi ye afia mɔ mí le míaƒe ablɔɖea ŋu dɔ wɔwɔ me ɣesiaɣi. Le nyateƒe me la, ɖe Yehowa di be míasrɔ̃ ye. Togbɔ be seɖoƒe meli na eƒe ablɔɖea o hã la, etiae be lɔlɔ̃ tae yeawɔ nu sia nu ɖo, esia hã tae wòwɔa nu ɖe mía ŋu le lɔlɔ̃ me ɖo. (1 Yoh. 4:7, 8) Eya ta eme kɔ ƒãa be, ne míeɖe mɔ lɔlɔ̃ si tso Mawu gbɔ la fiaa mɔ mí le nu sia nu si míewɔna me ko hafi míanye ablɔɖemewo le gɔmesese deblibo nu.

21. (a) Aleke David se le eɖokui me tso Yehowa ŋu? (b) Nu ka mee míadzro le nyati si kplɔ esia ɖo me?

21 Ðe nèkpɔa ŋudzedze ɖe ‘nu nyui’ geɖe siwo Yehowa na wò la ŋua? Ena gbɔgbɔmenuɖuɖu, xɔlɔ̃ vavãwo, taɖodzinu nyuiwo kple mɔkpɔkpɔ si nye be ablɔɖe deblibo ava su asiwò le etsɔme la wò. (Ps. 103:5) Ne èkpɔa ŋudzedze ɖe nu siawo ŋu la, ekema nya siwo hakpalaa gblɔ le gbedodoɖa me, siwo dze le Psalmo 16:11 la neva eme na wò hã, esi wògblɔ be: “Èna menya agbemɔ la, dzidzɔ bɔ ɖe ŋkuwòme; vivisese le wò ɖusime tegbee.” Míadzro Mawu ƒe Nya la me kesinɔnu bubu siwo le Psalmo 16 lia me la me le nyati si kplɔ esia ɖo me. Esiawo akpe ɖe ŋuwò nànya nu si nàwɔ be agbea nadze edzi na wò geɖe wu.