SARA dzudzɔ dɔa sẽe de kame eye wòtrɔ nɔ adzɔge kpɔm ɖaa. Mɔfiame nyui si wòna eƒe subɔviwo na be wonɔ dɔ wɔm dzidzɔtɔe kple ŋkubiã. Sara si doa vevie dɔ ŋutɔ hã nɔ dɔ wɔm. Kpɔe ɖa le susu me be eyae nye ema le asi lilim asi ŋu hele wohem be wòaɖe vevesesea dzi akpɔtɔ. Ðewohĩ anya nɔ avɔgbadɔ si nye woƒe aƒea ƒe akpa siwo vuvu la tɔm moveviɖoɖotɔe. Esi ŋdɔkutsu ɖu agbadɔvɔ sia si wotsɔ gbɔ̃fu lɔ̃ eye tsi ƒoe ƒe geɖee ta la, eklo, eye esia ɖoa ŋku ɣeyiɣi didi si wonye tsatsalawo la dzi na Sara. Ɣea le to ɖom eye fifia ele amigo gbam. Ekpɔ Abraham * esime wònɔ dzodzom le ŋdia me, eye enɔ afi si wòto dzo la kpɔm tututu nɔ elalam. Esi wòkpɔ srɔ̃a wònɔ abu ɖim le togbɛa dzi le adzɔge gbɔna ɖaa la, eko alɔgbɔnu.

Ƒe ewo va yi tso esime Abraham kplɔ eƒe ƒome gã la wotso Frat-tɔsisia eye wova Kanaan-nyigba dzi. Sara lɔ̃ faa kplɔ srɔ̃a ɖo le mɔzɔzɔ vevi sia me yi afi si womenya o, elabe enya be ye srɔ̃ Abraham awɔ akpa vevi aɖe le tame si Yehowa ɖo be wòadzi vi aɖe si nu woave ŋutɔ, si me dukɔ aɖe ado go tso la me. Gake akpa kae Sara awɔ le nya sia me? Etsi ko, medzi vi aɖeke o, eye fifia exɔ ƒe 75. Anya bu nya sia ŋu be, ‘Aleke Yehowa ƒe ŋugbedodo sia ava eme esi wònye nyee nye Abraham srɔ̃?’ Ne ese le eɖokui me nenemaa, ke esɔ be wòatsi dzi.

Ate ŋu awɔ na míawo hã eveve ɣeaɖewoɣi be ɣekaɣie Mawu ƒe ŋugbedodowo ava eme. Dzi menya dona o, vevietɔ ne míele mɔ kpɔm na nane vevie. Nu kae míate ŋu asrɔ̃ tso nyɔnu dovevienu sia ƒe xɔse ŋu?

“YEHOWA XE NYE VIDZIDƆ”

Ƒomea trɔ tso Egipte medidi o. (1 Mose 13:1-4) Wova tu woƒe agbadɔwo ɖe kpo aɖe dzi le Betel ƒe ɣedzeƒe gome, afi si Kanaantɔwo yɔna be Luz. Le kponyigba sɔsɔe ma dzi la, Sara ate ŋu akpɔ Ŋugbedodonyigbaa ƒe teƒeteƒewo. Kanaantɔwo ƒe kɔƒeduwo le afi ma eye mɔwo li si dzi mɔzɔlawo tona yia du siwo le didiƒe la me. Gake le nuto ma katã me gɔ̃ hã la, Sara mate ŋu akpɔ wo de o. Mesopotamia ƒe dugã Ur si gbɔ didi kilometa 1,900 mee wònɔ tsi. Edzo le eƒe ƒometɔ geɖewo gbɔ, eye wògblẽ dzidzemegbe si wònɔ le dugã si me asi kple fiase gãwo nɔ, aƒe nyui si wotu hegba nyuie si me dzidzeme le, eye tsi toa pɔmpiwo me le la katã ɖi! Gake ne míebu Sara be anya nɔ ɣedzeƒe kpɔm alé blanui, eye wònɔ dzidzemegbe si wònɔ le wo de susum la, ke míedze si nyɔnu mawuvɔ̃la sia nyuie o.

Se nya si gbɔgbɔ ʋã apostolo Paulo wòŋlɔ ƒe 2,000 megbe ɖa. Esi wònɔ nu ƒom tso Sara kple Abraham ƒe xɔse ŋu la, egblɔ be: “Ne ɖe wona woƒe susu kpɔtɔ nɔ teƒe si woʋu tso dzi la, anye ne mɔnukpɔkpɔ su wo si wogbugbɔ yi.” (Hebritɔwo 11:8, 11, 15) Sara kple Abraham siaa mena afi  si wonɔ tsã la dzro wo o. Ne ɖe wona woƒe susu kpɔtɔ nɔ nu mawo ŋu la, anye ne woaɖoe be yewoatrɔ ayi aƒe. Ne ɖe wotrɔ dzo yi Ur la, anye ne mɔnukpɔkpɔ xɔasi si Yehowa tsɔ ɖo wo ŋkume la ato wo ŋu. Anye ne wobu le amewo ƒe susu me; womanye xɔse ƒe kpɔɖeŋuɖola ʋãme siwo ƒe nu alé dzi na ame miliɔn geɖe la o.

Sara menɔ nu siwo wògblẽ ɖe megbe la susum o, ekpɔ ŋgɔ tẽe. Eya ta eyi edzi kpe asi ɖe srɔ̃a ŋu woʋu tso teƒe yi teƒe, ekpe asi ɖe agbadɔawo hoho kple wo tutu kple woƒe lãhawo kpɔkplɔ ɖe asi ŋu. Enɔ te ɖe tɔtrɔ yeyewo kple kuxi bubuwo nu. Yehowa gbugbɔ ɖo kpe ŋugbe si wòdo na Abraham la dzi nɛ, gake fifia hã megblɔ nya aɖeke tso Sara ya ŋu o.—1 Mose 13:14-17; 15:5-7.

Mlɔebaa Sara ɖoe be yeagblɔ susu aɖe si nɔ tame vam na ye la na Abraham. Kpɔ ale si wòadze le mo nɛ be etɔtɔ esi wògblɔ be: “[Meɖe kuku] Yehowa xe nye vidzidɔ” le susu me ɖa. Eya ta egblɔ na srɔ̃a be yeatsɔ yeƒe kosi Hagar nɛ wòadzi vi nɛ. Kpɔ ale si Sara anya nɔ veve sem esi wònɔ nya sia gblɔm na srɔ̃a ɖa! Ðewohĩ nya sia masɔ tome na mí egbea o, gake enye nu si dzɔna ɣemaɣi be ŋutsu naɖe nyɔnu bubu alo adze ahiã ale be wòate ŋu adzi vi si ava nye eƒe domenyila. * Ðe Sara anya susui be ne yewowɔe alea la, ekema tame si Mawu ɖo be Abraham ƒe dzidzimeviwo nava zu dukɔ la ava emea? Aleke kee wòɖale o, elɔ̃ faa be yeatsɔ nu gã aɖe asa vɔe. Aleke Abraham wɔ nui? Biblia gblɔ be: ‘eɖo to Sara ƒe gbe.’—1 Mose 16:1-3.

Ðe ŋutinyaa fia be Yehowa gbɔe susu ma tso va na Sara? Menye nenemae o. Ke boŋ eƒe susua ɖee fia be ebu nuwo ŋu abe ale si ko amegbetɔ ɖe sia ɖe abui ene. Esusu be Mawu gbɔe yeƒe kuxiawo tso eye mekpɔe be mɔ bubu aɖeke li si dzi Abraham ato akpɔ nyaa gbɔ o. Mɔ si dzi Sara ŋutɔ di be yewoato akpɔ nyaa gbɔ la ahe dzivee kple kuxiwo vɛ nɛ. Ke hã, susu si wòdo ɖa la ɖee fia be medi eɖokui tɔ o, eye esia nye nɔnɔme nyoameŋu aɖe. Le xexe sia si ɖea tɔnye ko nenyo ƒe nɔnɔme fiana me la, ɖe Sara ƒe ɖokuitɔmadimadia meɖe dzesi ŋutɔ oa? Ne míelɔ̃ faa tsɔa Mawu ƒe lɔlɔ̃nu wɔwɔ ɖoa nɔƒe gbãtɔ la, ke míele Sara ƒe xɔse srɔ̃m.

“ÈKO NU”

Eteƒe medidi hafi Hagar fɔ fu na Abraham o. Ðewohĩ Hagar ƒe fufɔfɔa na wòbui be yenyo wu Sara, eya ta megabua eƒe aƒenɔa ɖe ɖeke me o. Esia anya gbã dzi na Sara konɔ la ŋutɔ! Abraham ɖe mɔ na Sara wòhe to na Hagar le mɔ aɖe si Biblia megblɔ kaŋ o la nu, eye Mawu da asi ɖe edzi.  Hagar dzi ŋutsuvi si ŋkɔe nye Ismael, eye ƒe geɖewo va yi vɔ. (1 Mose 16:4-9, 16) Biblia ɖee fia be kaka gbedeasi aɖe nagatso Yehowa gbɔ ava na wo la, Sara xɔ ƒe 89 eye srɔ̃a xɔ ƒe 99. Nya dodzidzɔname ka gbegbee nye esi wose!

Yehowa gado ŋugbe na exɔlɔ̃ Abraham be yeana eƒe dzidzimeviwo nasɔ gbɔ. Mawu trɔ ŋkɔ nɛ gɔ̃ hã. Hafi wòatrɔ ŋkɔ nɛ la Abram ye woyɔna nɛ. Gake Yehowa trɔ ŋkɔ nɛ be Abraham, si gɔmee nye “Amehawo Fofo.” Eye esiae nye zi gbãtɔ si Yehowa gblɔ akpa si Sara awɔ le nya sia me la ŋu nya. Etrɔ eƒe ŋkɔ Sarai, si ɖewohĩ gɔmee nye “Dzreme,” wòzu Sara si nye ŋkɔ si míenya nyuie. Ŋkɔ Sara gɔme ɖe? Egɔmee nye “Fiavinyɔnu”! Yehowa gblɔ susu si ta wòtsɔ ŋkɔ ma na nyɔnu sia si gbɔ melɔ̃a nu le o la be: “Mayrae, eye mana wòadzi ŋutsuvi na wò; ɛ̃, mayrae, eye wòazu dukɔ geɖewo dada; dukɔwo ƒe fiawo adzɔ tso eme.”—1 Mose 17:5, 15, 16.

Nu, si Yehowa bla kple Abraham be yeato eƒe dzidzimevi aɖe dzi ayra dukɔwo katã la ava eme to ŋutsuvi si Sara adzi la dzi. Ŋkɔ Isak, si Mawu tsɔ na ŋutsuvia gɔmee nye “Nukokoe.” Esi Abraham se tame si Yehowa ɖo be yeana Sara ŋutɔ nadzi vi la, “Abraham tsyɔ mo anyi, eye wòde asi nukoko me.” (1 Mose 17:17) Ewɔ nuku nɛ eye wòkpɔ dzidzɔ ŋutɔ. (Romatɔwo 4:19, 20) Ke Sara ya ɖe?

Ema megbe kpuie la, ŋutsu etɔ̃ aɖewo va Abraham gbɔ le avɔgbadɔa me. Ŋdɔa nu sẽ, gake atsu kple asi tsitsi sia wɔ kaba wɔ amedzro na ŋutsuawo. Abraham gblɔ na Sara be: “Netsɔ! Ku wɔ memee seya etɔ̃, blui eye nàtsɔe amè aboloe.” Amedzrowɔwɔ bia dɔ geɖe wɔwɔ ɣemaɣi. Abraham megblẽ dɔa katã ɖe srɔ̃a ɖeɖe dzi o; ewɔ kaba wu nyitsui eye wotrɔ asi le nuɖuɖu kple nunono geɖe ŋu. (1 Mose 18:1-8) Yehowa ƒe dɔlawoe “ŋutsu” mawo nye! Nudzɔdzɔ siae anya nɔ susu me na apostolo Paulo esi wòŋlɔ bena: “Migaŋlɔ amedzrowɔwɔ be o, elabena to esia me ame aɖewo wɔ amedzro na mawudɔlawo, evɔ woawo ŋutɔwo menya o.” (Hebritɔwo 13:2) Ðe nàte ŋu asrɔ̃ Abraham kple Sara ƒe amedzrowɔwɔ ɖedzesi laa?

Sara lɔ̃ amedzrowɔwɔ

Esi mawudɔlawo dometɔ ɖeka gbugbɔ gblɔ ŋugbe si Mawu do na Abraham be Sara adzi vi la, Sara menɔ wo gbɔ o, enɔ agbadɔa me nɔ to ɖom. Esi wòse be ye mama kukui sia yeadzi vi la, ewɔ moyaa nɛ ale gbegbe be mete ŋu le eɖokui o, eko nu le dzi me gblɔ be: “Esi wɔna vɔ le ŋunye, eye nye aƒetɔ hã tsi ku amegã ɖe, ɖe magate ŋu akpɔ dzidzɔ sia nyateƒea?” Mawudɔlaa ɖɔ Sara ɖo esi wòbiae kaŋ be: “Ðe nane sesẽ na Yehowaa?” Sara vɔ̃ eye wòɖe eɖokui nu, eye esɔ le dzɔdzɔme nu be ame nase le eɖokui me nenema. Egblɔ enumake be: “Nyemeko nu o lo!” Mawudɔlaa ɖo ŋu be: “Ao! Èko nu.”—1 Mose 18:9-15.

Ðe Sara ƒe nukokoa fia be xɔse mele esi oa? Kura o. Biblia gblɔ be: “Le xɔse me wona ŋusẽ Sara hã wòfɔ fu dzi vi, esime wòtsi to vidzidzi me kura gɔ̃ hã, elabena ebu Ame si do ŋugbea la nuteƒewɔlae.” (Hebritɔwo 11:11) Sara nya Yehowa nyuie, enya be ate ŋu ana eƒe ŋugbedodo ɖe sia ɖe nava eme. Mía dometɔ kae mehiã xɔse ma ƒomevi o? Ele be míadze agbagba adze si, Mawu si ŋu Biblia ƒo nu tsoe la nyuie. Ne míewɔe alea la, míava kpɔ nu si tae xɔse ma tɔgbi nɔ Sara si. Yehowa wɔa nuteƒe eye wòwɔa eƒe ŋugbedodowo katã dzi. Ɣeaɖewoɣi la, mɔ siwo dzi wòtona wɔnɛ la awɔ nuku na mí ale gbegbe be ɖeko míako nu!

“ÐO TOE”

Yehowa ɖo eteƒe na Sara ɖe eƒe xɔse ɖedzesi la ta

Esi Sara xɔ ƒe 90 la, eƒe asi su nu si tututu dim wònɔ vevie le eƒe agbe me katã la dzi mlɔeba. Edzi vi na srɔ̃a lɔlɔ̃a si xɔ ƒe 100 fifia la! Abraham tsɔ ŋkɔ na vidzĩa be Isak alo “Nukokoe,” abe ale si Mawu gblɔe ene. Míate ŋu akpɔ ale si dzidzɔ anya yɔ mo na Sara si ƒe mo lé ayi la, esi wògblɔ be: “Mawu do nukokoe nam; ame sia ame si asee  la ako nu kplim.” (1 Mose 21:6) Nunana wɔnuku sia si Yehowa nɛ la anya do dzidzɔ nɛ le eƒe agbemeŋkeke mamlɛawo me. Ke hã, esia da agba gã aɖe ɖe edzi.

Esi Isak xɔ ƒe atɔ̃ eye ɣeyiɣia de be woatso no nɛ la, ƒomea ɖu azã be woatsɔ aɖo ŋku edzi. Gake kuxi aɖe nɔ anyi. Biblia gblɔ be Sara “de dzesii” be nu tramaa aɖe nɔ edzi yim le aƒea me. Hagar vi Ismael si xɔ ƒe 19 la nɔa fewu ɖum le Isak ŋu atraɖii. Menye hatsekaka dzro koe o. Gbɔgbɔ ʋã apostolo Paulo wògblɔ emegbe be Ismael ƒe nuwɔnaa nye yometiti. Sara kpɔe be menye fefe dzro koe o, ke boŋ enye nuwɔna si ava de ye via ƒe agbe afɔku me. Sara nya nyuie be menye ye vi koe Isak nye o, awɔ akpa vevi aɖe be Yehowa ƒe tameɖoɖowo nava eme. Eya ta etso kpla eye wògblɔ nu si nɔ dzɔdzɔm la na Abraham, nya aɖeke maɣlamaɣlae. Egblɔ nɛ be wòanya Hagar kple Ismael siaa.—1 Mose 21:8-10; Galatiatɔwo 4:22, 23, 29.

Nu kae Abraham wɔ? Biblia gblɔ be: “Nya si wògblɔ tso via ŋu la medzɔ dzi na Abraham kura o.” Elɔ̃ Ismael, eye abe vifofo enea, mate ŋu ado dzi awɔ nu ma o. Ke hã, Yehowa kpɔ nu sia nu si nɔ dzɔdzɔm la nyuie eya ta ede nu nyaa me. Biblia gblɔ be: “Mawu gblɔ na Abraham be: ‘Mègana nya siwo gblɔm Sara le na wò le ŋutsuvi la kple kosi la ŋu nave wò o. Ðo toe, elabena ame si woayɔ be wò dzidzimevi la adzɔ tso Isak me.’” Yehowa ka ɖe edzi na Abraham be yeakpɔ Hagar kple via ƒe nuhiahiãwo gbɔ na wo. Abraham nuteƒewɔla la lɔ̃ ɖe nyaa dzi.—1 Mose 21:11-14.

Srɔ̃nyɔnu nyui aɖe kple kpeɖeŋutɔ vavãe Sara nye na Abraham. Menye nya siwo avivi le to me na srɔ̃a koe wògblɔna nɛ o. Esi kuxi aɖe si ka ƒomea kple woƒe etsɔme do mo ɖa la, eƒo nu tso eŋu na srɔ̃a faa. Eƒe nuƒoƒo kaŋ la mefia be mede bubu srɔ̃a ŋu o. Le nyateƒe me la, apostolo Petro si nye srɔ̃tɔ gblɔ emegbe tso Sara ŋu be, enye srɔ̃nyɔnu kpɔɖeŋu nyui ɖola si de bubu srɔ̃a ŋu. (1 Korintotɔwo 9:5; 1 Petro 3:5, 6) Nyateƒeae nye be, ne ɖe Sara mia nu ɖe nya sia dzi la, anye ne mede bubu Abraham ŋu o, elabena nu si gbegbe wòagblẽ le srɔ̃a kple ƒome bliboa ŋu la manɔ gbɔgblɔ me o. Lɔlɔ̃ ʋã Sara wògblɔ nya si wòle be wòagblɔ.

Srɔ̃nyɔnu geɖewo dea asixɔxɔ kpɔɖeŋu si Sara ɖo la ŋu. Wosrɔ̃ ale si woaɖo dze kple wo srɔ̃wo tso dzi me bubutɔe la tso egbɔ. Ɣeaɖewoɣi la, srɔ̃nyɔnu aɖewo adi be Yehowa nade nu yewoƒe nyawo me abe ale si wòwɔe na Sara ene. Togbɔ be ele alea hã la, wosrɔ̃a Sara ƒe xɔse sesẽ, eƒe lɔlɔ̃ kple eƒe dzigbɔɖi.

Yehowa yɔ Sara be “Fiavinyɔnu,” ke hã, menɔ mɔ kpɔm be woawɔ nu ɖe ye ŋu abe fiavinyɔnu ene o

Togbɔ be Yehowa ŋutɔ yɔ nyɔnu lɔlɔ̃ sia be “Fiavinyɔnu” hã la, menɔ mɔ kpɔm be woawɔ nu ɖe ye ŋu abe fiavinyɔnu ene o. Mewɔ nuku o be, esi wòxɔ ƒe 127 eye wòku la, Abraham “xa nu vevie eye wòfa Sara ŋutɔ.” * (1 Mose 23:1, 2) Esusu eƒe “Fiavinyɔnu” lɔlɔ̃a ŋutɔ. Ðikeke mele eme o be, Yehowa Mawu ŋutɔ hã susu nyɔnu wɔnuteƒe sia eye eɖoe be yeafɔe ɖe tsitre va paradiso me le anyigba dzi. Etsɔme nyui aɖe si me dzidzɔ le la le Sara kple ame siwo katã srɔ̃a eƒe xɔse la lalam.—Yohanes 5:28, 29.

^ mm. 3 Tsãa, ŋkɔ si woyɔna na srɔ̃tɔ siawoe nye Abram kple Sarai va se ɖe esime Mawu trɔ ŋkɔ na wo, gake kpuie ko la, míazã ŋkɔ si ame geɖe nya na wo wu la.

^ mm. 10 Yehowa ɖe mɔ ɖe srɔ̃ geɖe ɖeɖe kple ahiãdzedze ŋu ɣemaɣi, gake emegbe ena Yesu Kristo gbugbɔ ɖo kpe ale si Mawu ɖoe le gɔmedzedzea me le Eden be ŋutsu naɖe nyɔnu ɖeka la dzi.—1 Mose 2:24; Mateo 19:3-9.

^ mm. 25 Le Biblia me la, Sara koe nye nyɔnu si ƒe ƒe Biblia yɔ le eƒe kuɣi.