Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI | MAWUDƆLAWO—WOLI ŊUTƆŊUTƆA? NU SI TA NYA SIA LE VEVIE

Nyateƒe Si Ku Ðe Mawudɔlawo Ŋu

Nyateƒe Si Ku Ðe Mawudɔlawo Ŋu

Àdi be yeanya nyateƒe si ku ɖe mawudɔlawo—ame siwo wonye, ale si wowɔ va dzɔ kple dɔ siwo wowɔna ŋua? Ŋuɖoɖoawo mele afi aɖeke tsɔ wu Mawu ƒe Nya Biblia me o. (2 Timoteo 3:16) Nya kae Biblia gblɔ?

  • Ale si ko Mawu nye Gbɔgbɔe la, nenema kee mawudɔlawo hã nye gbɔgbɔ, “ŋutilã kple ƒu” mele wo si o. Dziƒoe mawudɔla wɔnuteƒewo le eye wodona ɖe Mawu ŋkume.—Luka 24:39; Mateo 18:10; Yohanes 4:24.

  • Le blema la, Mawu dɔa wo ɖe anyigba dzi wova wɔa dɔwo eye wotrɔa wo ɖokuiwo zua amegbetɔwo, eye ne wowu woƒe dɔdeasiawo nu vɔ la wogatrɔa wo ɖokuiwo mawudɔlawoe.—Ʋɔnudrɔ̃lawo 6:11-23; 13:15-20.

  • Togbɔ be Biblia ƒoa nu tso mawudɔlawo ŋu abe ŋutsuwoe wonye ene, eye ɣesiaɣi si wotrɔ wo ɖokuiwo la wodzena ŋutsuwo hã la, womenye ŋutsuwo loo alo nyɔnuwo o. Womeɖea srɔ̃ dzia mawudɔla bubuwo o. Azɔ hã, mawudɔlawo medo ŋgɔ nɔ anyigba dzi gbã nye vidzĩwo, ɖeviwo alo ame tsitsiwo o. Yehowae wɔ mawudɔlawo, esia tae Biblia yɔa wo be “Mawu vavã la ƒe viwo.”—Hiob 1:6; Psalmo 148:2, 5.

  • Biblia ƒo nu tso “amegbetɔwo kple mawudɔlawo ƒe gbegbɔgblɔwo” ŋu, si fia be gbegbɔgblɔ le mawudɔlawo si eye woƒoa nu. Togbɔ be Mawu ƒo nu na amegbetɔwo to mawudɔlawo dzi hã la, meɖe mɔ na mí be míasubɔ wo alo ado gbe ɖa na wo o.—1 Korintotɔwo 13:1; Nyaɖeɖefia 22:8, 9.

  • Mawudɔla akpe ewo teƒe akpe ewowoe li, ɖewohĩ woade biliɔn gbogbo aɖewo.—Daniel 7:10; Nyaɖeɖefia 5:11.

  • Mawudɔlawo nye ‘kalẽtɔ sesẽwo,’ ŋusẽ le wo ŋu boo wu amegbetɔwo, eye woƒe susu de ŋgɔ sãsãsã wu amegbetɔwo tɔ. Edze ƒãa be woɖea abla ŋutɔ, woƒe duƒuƒu mele gbɔgblɔ me o, ewu nu sia nu si le anyigba dzi.—Psalmo 103:20; Daniel 9:20-23.

  • Togbɔ be mawudɔlawo ƒe susu de ŋgɔ eye wonye gbɔgbɔmenuwɔwɔ sẽŋuwo hã la, seɖoƒe li na wo eye menye nu sia nue wonya o.—Mateo 24:36; 1 Petro 1:12.

  • Wowɔ mawudɔlawo be woaɖe nɔnɔme nyuiwo afia eye ŋutetewo kple tiatiawɔwɔ ƒe ablɔɖe hã le wo si. Eya ta woawo hã woate ŋu atiae be yewoawɔ nu nyui alo nu vɔ̃ abe amegbetɔwo ke ene. Nublanuitɔe la, mawudɔla aɖewo tiae be yewoadze aglã ɖe Mawu ŋu.—Yuda 6.